Nyɛmimɛi komɛi kɛ apps srɔtoi ni eba nɔ lɛ ekomɛi tsuɔ nii ni amɛkɛ amɛwekumɛi kɛ nyɛmimɛi krokomɛi gbaa sane. Shi mɔ fɛɛ mɔ ni wekukpaa kpakpa yɔɔ ekɛ Yehowa teŋ lɛ hãa ŋaawoo nɛɛ hiɔ ejwɛŋmɔ mli, akɛ: “Hiɛtɛ̃lɔ naa oshãra lɛ, ni eteɔ ehe, shi mɔ ni jwɛŋmɔ esako lɛ, ebɛŋkɛɔ he, ni enaa amane.”​—Abɛi 27:12.

Wɔle akɛ Yehowa miitao ebu wɔhe, ni no hewɔ lɛ, wɔkɛ mɛi ni kɛ mligbalamɔ baa, mɛi ni ashwie amɛ kɛje asafo lɛ mli, kɛ mɛi ni tsɔɔ tsɔɔmɔi ni ejaaa lɛ ebɔɔɔ. (Rom. 16:17; 1 Kor. 5:11; 2 Yoh. 10, 11) Agbɛnɛ hu, nyɛmimɛi lɛ ekomɛi kɛ mɛi ni baa asafoŋ kpeei lɛ ekomɛi kɛ Biblia mli gbɛtsɔɔmɔi tsuuu nii. (2 Tim. 2:20, 21) No hewɔ lɛ, dani wɔkɛ mɔ ko baabɔ naanyo lɛ, wɔkwɛɔ nɛkɛ nibii nɛɛ fɛɛ. Shi enɛ feemɔ baanyɛ awa kɛ́ wɔkɛ mɛi miigba sane kɛtsɔ apps srɔtoi ni akɛsɛndiɔ mɛi mɛseji lɛ anɔ.

Kɛ́ atse kuu yɛ apps srɔtoi nɛɛ eko nɔ lɛ, ehe miihia ni wɔkwɛ jogbaŋŋ, titri lɛ, kɛ́ mɛi ni yɔɔ kuu nɛɛ mli lɛ ayi fa waa diɛŋtsɛ. Nyɛmimɛi komɛi ni kɛ kui ni mɛi ayi fa waa yɛ mli tamɔ nɛkɛ lɛ ekomɛi yabɔ lɛ eyagbeee naa jogbaŋŋ. Shi kɛ́ okwɛ lɛ, te aaafee tɛŋŋ ni nyɛmi nuu ko loo nyɛmi yoo ko kɛ kuu ni mɛi ohai abɔ loo akpei abɔ yɔɔ mli lɛ aaabɔ ni ekɛɛ akɛ eekwɛ ehe nɔ jogbaŋŋ lɛ? Enyɛŋ ele mɛi tuuntu ni amɛteŋ mɔ fɛɛ mɔ ji kɛ shidaamɔ ni amɛteŋ mɔ fɛɛ mɔ yɔɔ yɛ asafo lɛ mli lɛ kɔkɔɔkɔ. Lala 26:4 lɛ kɛɛ: “Mikɛ mɛi ni lakaa mɛi ebɔɔɔ, ni mitsiɔ mihe kɛjeɔ mɛi ni kɛ amɛsubaŋ teɔ lɛ ahe.” Ŋmalɛ nɛɛ hãa wɔnaa akɛ, nilee yɛ mli waa akɛ wɔkɛ mɛi ni wɔle amɛ lɛ pɛ baagba sane yɛ apps srɔtoi nɛɛ anɔ.

Kɛ́ mɛi ni yɔɔ kuu lɛ mli lɛ ayi faaa po lɛ, esa akɛ wɔkwɛ be ni wɔfiteɔ ni wɔkɛ amɛ gbaa sane kɛ nɔ sane ni agbaa lɛ jogbaŋŋ. Esaaa akɛ wɔnuɔ he akɛ sane lɛ eko fɛɛ eko lɛ, esa ni wɔwie eko, ekɔɔɔ he eko nɔ ni he ni awieɔ loo be ni ebaahe. Paulo kɛɛ Timoteo akɛ ‘mɛi komɛi wieɔ mɛi ahe, ni amɛkɛ amɛhe woɔ mɛi asaji amli hu.’ Ŋmɛnɛ hu lɛ, mɛi baanyɛ afee nakai nɔŋŋ kɛtsɔ apps srɔtoi nɛɛ anɔ.

Mɔ fɛɛ mɔ ni wekukpaa kpakpa yɔɔ ekɛ Yehowa teŋ lɛ ewieŋ mɛi ahe nyanyaanya, ni ejieŋ mɛi ateemɔŋ saji akpo hu. Ni nakai nɔŋŋ kɛ́ mɔ ko hu miifee nakai lɛ, eboŋ toi. (Lala 15:3; Abɛi 20:19) Agbɛnɛ hu, egbaŋ mɛi saji ni ewa akɛ abaahe aye loo ebɛ nɔmimaa akɛ amɛji anɔkwale. Ni kɛ́ mɔ ko hu miigba saji nɛɛ, ekɛ ehe woŋ nakai sanegbaa lɛ mli. (Efe. 4:25) Wɔyɛ Biblia mli saji pii kɛ saji ni wɔbaanyɛ wɔmu wɔfɔ̃ nɔ yɛ wɔwɛbsaiti, ni ji jw.org lɛ nɔ kɛ daa nyɔɔŋ nɔ JW Broadcasting^® nifeemɔi lɛ amli. No hewɔ lɛ, ehe ehiaaa ni wɔyabo saji nɛɛ toi kɛjɛ he kroko.

Nyɛmimɛi komɛi tsɔɔ apps srɔtoi nɛɛ anɔ amɛhɔ̃ɔ nii, amɛheɔ nii, amɛtswaa nibii ni amɛhɔ̃ɔ lɛ he adafi, loo amɛhãa mɛi leɔ akɛ aatao mɛi yɛ nitsumɔ ko mli. Enɛ lɛ, nitsumɔ sane ni, ni jeee asafoŋ sane ni. No hewɔ lɛ, nyɛmimɛi ni sumɔɔɔ ni ‘shika suɔmɔ baa amɛshihilɛ mli lɛ,’ kwɛɔ jogbaŋŋ koni amɛkatsɔ amɛnyɛmimɛi lɛ anɔ amɛtao shika.​—Heb. 13:5.

Shi ani mɔ ko baanyɛ etsɔ apps srɔtoi nɛɛ anɔ ni ebi nyɛmimɛi ni amɛtsu shika koni akɛyaye abua nyɛmimɛi ni amɛhe efĩ amɛ loo nyɛmimɛi ni adebɔɔ naa oshãra ko enina amɛ lɛ? Wɔsumɔɔ wɔnyɛmimɛi lɛ, ni amɛsane kã wɔtsui nɔ waa. No hewɔ lɛ, kɛ́ wɔnu akɛ amɛteŋ mɔ ko he efĩ lɛ loo eyaje oshãra mli lɛ, wɔsumɔɔ ni wɔye wɔbua lɛ ni wɔwo lɛ hewalɛ. (Yak. 2:15, 16) Shi kɛ́ wɔtsɔ kuu ko ni atse yɛ app ko nɔ ni mɛi babaoo yɔɔ mli lɛ nɔ wɔfee enɛ lɛ, ebaanyɛ efite gbɛjianɔ ni nitsumɔhe nine lɛ loo asafoŋ onukpai lɛ eto ni akɛye abua mɛi ni tamɔ nɛkɛ lɛ. (1 Tim. 5:3, 4, 9, 10, 16) Wɔteŋ mɔ ko sumɔŋ ni efee enii tamɔ nɔ ni akɛ nitsumɔ ko ewo edɛŋ akɛ ekwɛ nyɛmimɛi lɛ anɔ.

Wɔmiisumɔ ni nɔ fɛɛ nɔ ni wɔfeɔ lɛ, wɔfee kɛwo Nyɔŋmɔ hiɛ nyam. (1 Kor. 10:31) No hewɔ lɛ, kɛ́ okɛ apps srɔtoi ni akɛsɛndiɔ mɛi mɛseji nɛɛ eko miitsu nii lɛ, ofainɛ susumɔ oshãrai ni yɔɔ he lɛ ahe ni okwɛ jogbaŋŋ.