1. Yɛ nɔ ni awie yɛ Mateo 24:9 lɛ naa lɛ, mɛni hewɔ esaaa akɛ efeɔ wɔ naakpɛɛ akɛ je lɛ nyɛɔ wɔ?

BƆ NI Yehowa bɔ wɔ ehã lɛ hewɔ lɛ, wɔnyɛɔ wɔjieɔ suɔmɔ kpo wɔtsɔɔ mɛi, ni wɔkpaa gbɛ akɛ mɛi hu baajie suɔmɔ kpo amɛtsɔɔ wɔ. No hewɔ lɛ, kɛ́ wɔna akɛ mɔ ko miinyɛ wɔ lɛ, egbaa wɔnaa waa, ni ehãa wɔsheɔ gbeyei po. Akɛ nɔkwɛmɔnɔ lɛ, nyɛmi yoo ko ni yɔɔ Yuropa ni atsɛɔ lɛ Georgina lɛ wie akɛ: “Be ni miye afii 14 lɛ, mimami nyɛ mi yɛ Yehowa ni misɔmɔɔ lɛ hewɔ. Minii fee mɔbɔ, mihe fee shoo, ni minu he akɛ jeee gbɔmɔ kpakpa ji mi.” * Nyɛmi nuu ko ni atsɛɔ lɛ Danylo lɛ hu wie akɛ: “Be ko lɛ, asraafoi yi mi, amɛjɛ mi, ni amɛwo mihe gbeyei akɛ amɛbaapila mi akɛni miji Yehowa Odasefonyo lɛ hewɔ. Enɛ hã mishe gbeyei, ni minu he akɛ ashwie mihiɛ shi.” Kɛ́ mɛi nyɛ wɔ nɛkɛ lɛ, edɔɔ wɔ waa. Shi efeee wɔ naakpɛɛ ejaakɛ Yesu gba akɛ abaanyɛ wɔ.​—Kanemɔ Mateo 24:9.

2-3. Mɛni hewɔ mɛi nyɛɔ wɔ?

² Mɛni hewɔ je lɛ nyɛɔ wɔ, ni ji Yesu sɛɛnyiɛlɔi lɛ? Nɔ hewɔ lɛ ji, ‘wɔfataaa je lɛ he,’ tamɔ bɔ ni Yesu hu fataaa je lɛ he lɛ. (Yoh. 15:17-19) Enɛ hewɔ lɛ, eyɛ mli akɛ wɔbuɔ nɔyelɔi lɛ moŋ, shi wɔkɛ wɔhe wooo pɔlitis mli, wɔŋaaa aflaŋaa, ni wɔláaa jakumaŋ lala hu. Yehowa pɛ wɔjáa. Wɔfiɔ Nyɔŋmɔ sɛɛ akɛ lɛ ji mɔ ni sa akɛ eye je lɛ nɔ. Shi Satan kɛ “eseshi” lɛ fiii nakai nɔ lɛ sɛɛ. (1 Mo. 3:1-5, 15) Wɔhãa mɛi leɔ akɛ, Nyɔŋmɔ Maŋtsɛyeli lɛ pɛ baanyɛ atsu adesai anaagbai fɛɛ ahe nii. Ni akɛ etsɛŋ, Maŋtsɛyeli lɛ baakpãtã mɛi fɛɛ ni teɔ shi amɛwoɔ lɛ  lɛ ahiɛ. (Dan. 2:44; Kpo. 19:19-21) Mɛi ni he jɔ lɛ nyaa sane nɛɛ he, shi mɛi fɔji lɛ nyaaa he kwraa.​—Lala 37:10, 11.

³ Nɔ kroko hewɔ ni je lɛ nyɛɔ wɔ ji, wɔbaa wɔjeŋ yɛ Nyɔŋmɔ mlai lɛ anaa, shi je lɛ efeee nakai. Amɛ lɛ, nɔ ni Nyɔŋmɔ kɛɛ akɛ eja lɛ, amɛnaa lɛ akɛ ejaaa; ni nɔ ni Nyɔŋmɔ kɛɛ ejaaa lɛ, amɛnaa lɛ akɛ eja. Akɛ nɔkwɛmɔnɔ lɛ, ŋmɛnɛ lɛ, mɛi miifee nibii ni tamɔ nibii ni mɛi fee yɛ Sodom kɛ Gomora ni hã Nyɔŋmɔ kpãtã amɛhiɛ lɛ nɔŋŋ, shi mɛi enaaa lɛ nɔ ko. (Yuda 7) Shi akɛni wɔkɛ wɔhe wooo nifeemɔi nɛɛ amli, ni wɔfiii sɛɛ hu hewɔ lɛ, mɛi pii yeɔ wɔhe fɛo, ni amɛkɛɔ akɛ wɔyɛ kpɛŋŋ.​—1 Pet. 4:3, 4.

4. Kɛ́ mɛi nyɛ wɔ lɛ, mɛɛ sui baanyɛ aye abua wɔ?

⁴ Kɛ́ mɛi nyɛ wɔ ni amɛjɛ wɔ lɛ, mɛni baaye abua wɔ ni wɔya nɔ wɔsɔmɔ Yehowa ni wɔnijiaŋ ejeee wui? Esa akɛ wɔhe wɔye waa akɛ Yehowa baaye ebua wɔ. Wɔhemɔkɛyeli lɛ tamɔ tsɛŋ, ni ebaanyɛ ‘egbe mɔ fɔŋ lɛ gãimlibii ni tsoɔ lɛ fɛɛ.’ (Efe. 6:16) Shi jeee hemɔkɛyeli pɛ esa akɛ wɔná. Esa akɛ wɔná suɔmɔ hu. Mɛni hewɔ? Nɔ hewɔ lɛ ji, suɔmɔ ‘mli wooo la,’ edamɔɔ dɔlɛ nibii fɛɛ naa, ni efiɔ shi hu. (1 Kor. 13:4-7, 13) Agbɛnɛ, nyɛhãa wɔkwɛa bɔ ni kɛ́ wɔsumɔ Yehowa, wɔsumɔɔ wɔnyɛmimɛi Kristofoi lɛ, ni wɔsumɔɔ wɔhenyɛlɔi po lɛ, no baaye abua wɔ ni wɔfi shi kɛ́ mɛi nyɛ wɔ.

5. Akɛni Yesu sumɔɔ e-Tsɛ lɛ hewɔ lɛ, mɛni enyɛ efee?

⁵ Gbi gbɛkɛ ni enɔ jetsɛremɔ lɛ Yesu henyɛlɔi lɛ baagbe lɛ lɛ, ekɛɛ esɛɛnyiɛlɔi anɔkwafoi lɛ akɛ: “Misumɔɔ Tsɛ lɛ, [no hewɔ lɛ] miifee bɔ ni Tsɛ lɛ ewo mi kitã akɛ mifee lɛ pɛpɛɛpɛ.” (Yoh. 14:31) Suɔmɔ ni Yesu yɔɔ kɛhã Yehowa lɛ waje lɛ ni enyɛ efi shi yɛ shihilɛi ni mli wawai ni ekɛkpe lɛ fɛɛ amli. Wɔ hu kɛ́ wɔsumɔɔ Yehowa lɛ, ebaaye ebua wɔ ni wɔfi shi.

6. Yɛ nɔ ni awie yɛ Romabii 5:3-5 lɛ naa lɛ, kɛ́ je lɛ miinyɛ wɔ, Yehowa tsuji lɛ, te wɔnuɔ he wɔhãa tɛŋŋ?

⁶ Yehowa tsuji sumɔɔ lɛ waa. Ni be fɛɛ be lɛ, enɛ yeɔ ebuaa amɛ ni amɛnyɛɔ amɛdamɔɔ yiwaa naa. Akɛ nɔkwɛmɔnɔ lɛ, be ni mɛi ni yɔɔ Yudafoi lɛ asaneyelihe wulu lɛ fã bɔfoi lɛ akɛ amɛkpa shiɛmɔ lɛ, suɔmɔ ni amɛyɔɔ kɛhã Nyɔŋmɔ lɛ hewɔ lɛ, ‘amɛbo Nyɔŋmɔ moŋ toi akɛ nɔyelɔ fe gbɔmɛi.’ (Bɔf. 5:29; 1 Yoh. 5:3) Ŋmɛnɛ hu lɛ, nɔyelii ni yitseiaŋ wala miiwa wɔnyɛmimɛi lɛ ayi. Shi akɛni amɛ hu amɛsumɔɔ Nyɔŋmɔ hewɔ lɛ, amɛmiifi shi ni amɛmiiye lɛ anɔkwa. Kɛ́ je lɛ miinyɛ wɔ lɛ, wɔnijiaŋ ejeee wui. Moŋ lɛ, wɔnáa miishɛɛ.​—Bɔf. 5:41; kanemɔ Romabii 5:3-5.

7. Kɛ́ wɔwekumɛi te shi amɛwo wɔ lɛ, te esa akɛ wɔkɛ amɛ aye ahã tɛŋŋ?

⁷ Kɛ́ wɔwekumɛi te shi amɛwo wɔ lɛ, edɔɔ wɔ waa. Ni bei komɛi lɛ, ewa waa akɛ wɔbaadamɔ naa. Kɛ́ akɛ wɔ bɔi Biblia lɛ kasemɔ lɛ, ekolɛ wɔwekumɛi komɛi baasusu akɛ alaka wɔ. Ekolɛ amɛteŋ mɛi komɛi po baasusu akɛ wɔjwɛŋmɔ tsuuu nii jogbaŋŋ. (Okɛto Marko 3:21 lɛ he.) Ekolɛ amɛteŋ mɛi komɛi po baate shi amɛwo wɔ waa. Shi esaaa akɛ enɛ feɔ wɔ naakpɛɛ. Yesu wie akɛ: “Mɔ diɛŋtsɛ shĩabii baatsɔmɔ ehenyɛlɔi.” (Mat. 10:36) Shi ekɔɔɔ he eko bɔ ni wɔwekumɛi lɛ kɛ wɔ baaye ahã lɛ, esaaa akɛ wɔnyɛɔ amɛ. Moŋ lɛ, akɛni suɔmɔ ni wɔyɔɔ kɛhã Yehowa lɛ mli miiya nɔ eewa hewɔ lɛ, suɔmɔ ni wɔyɔɔ kɛhã amɛ kɛ mɛi krokomɛi fɛɛ lɛ mli waa. (Mat. 22:37-39) Shi wɔkuŋ Nyɔŋmɔ mla loo shishitoo mla mli kɔkɔɔkɔ koni wɔkɛsa gbɔmɛi ahiɛ.

8-9. Be ni ate shi awo nyɛmi yoo ko waa lɛ, mɛni ye ebua lɛ ni enyɛ efi shi?

⁸ Georgina ni wɔtsĩ etã kɛtsɔ hiɛ lɛ mia ehiɛ waa ni efi shi be ni emami te shi ewo lɛ lɛ. Ewie akɛ: “Mikɛ mimami fɛɛ ni Odasefoi lɛ kɛ wɔ bɔi Biblia lɛ kasemɔ. Shi nyɔji ekpaa sɛɛ be ni miitao mabɔi asafoŋ kpeei yaa lɛ, mimami  tsake ewo mi kwraa. Sɛɛ mli lɛ, mibana akɛ, ekɛ mɛi ni etse amɛhe kɛje asafo lɛ he ni amɛwieɔ nibii fɔji yɛ asafo lɛ he lɛ ebɔi sharamɔ. Ni kɛ́ ekɛ mi miiwie lɛ, lɛ hu ewieɔ nakai nibii fɔji lɛ nɔŋŋ yɛ asafo lɛ he. Bei komɛi lɛ, ejɛɔ mi, egbalaa miyitsɔi, emiaa misɛ̃, ni eshɛrɛɔ asafo lɛ woji lɛ eshwieɔ. Be ni miye afii 15 lɛ, mihã abaptisi mi. Yɛ mibaptisimɔ lɛ sɛɛ lɛ, mimami kɛ mi tee he ni akɛ gbekɛbii ni feɔ nibii gbohii yaa lɛ koni mikanyɛ misɔmɔ Yehowa. Gbekɛbii ni yɔɔ jɛmɛ lɛ ekomɛi kɛ tsofai fɔji tsuɔ nii ni amɛfeɔ nibii gbohii krokomɛi. Kɛ́ mɔ ko ni okpaa gbɛ akɛ ebaasumɔ bo ni ekwɛ bo jogbaŋŋ lɛ te shi ewo bo lɛ, ewa waa akɛ obaadamɔ naa.”

⁹ Mɛni ye ebua Georgina ni enyɛ efi shi? Ewie akɛ: “Gbi ni mimami te shi ewo mi lɛ, nakai gbi lɛ tuuntu migbe Biblia lɛ fɛɛ kanemɔ naa. Mina akɛ mina anɔkwale lɛ, ni mi kɛ Yehowa teŋ naanyobɔɔ lɛ mli ewa waa. Misɔle mihã lɛ shii abɔ, ni ebo mi toi. Be ni miyɔɔ he ni mimami kɛ mi tee lɛ, kɛ́ efee lɛ miyaa nyɛmi yoo ko ŋɔɔ ni wɔkaseɔ Biblia lɛ. Nakai be lɛ mli fɛɛ lɛ, nyɛmimɛi lɛ woɔ mi hewalɛ. Amɛkɛ mi ye tamɔ amɛwekunyo. Enɛ hã mina faŋŋ akɛ, Yehowa he wa kwraa fe mɛi ni teɔ shi amɛwoɔ wɔ lɛ, ekɔɔɔ he eko mɛi ni amɛji.”

10. Mɛni wɔbaanyɛ wɔhe wɔye akɛ Yehowa baafee ehã wɔ be fɛɛ be?

¹⁰ Bɔfo Paulo ŋma akɛ, ‘nɔ ko nɔ ko nyɛŋ atse wɔ kɛje Nyɔŋmɔ suɔmɔ ni yɔɔ Kristo Yesu, wɔ-Nuŋtsɔ lɛ mli lɛ he.’ (Rom. 8:38, 39) Eyɛ mli akɛ wɔbaana nɔ be fioo moŋ, shi Yehowa shiŋ wɔ kɔkɔɔkɔ. Ebaashɛje wɔmii, ni ebaawaje wɔ. Tamɔ bɔ ni wɔna yɛ Georgina niiashikpamɔ lɛ mli lɛ, Yehowa baanyɛ atsɔ wɔnyɛmimɛi Kristofoi lɛ hu anɔ eye ebua wɔ ni wɔfi shi.

11. Kɛ́ Yesu sɛɛnyiɛlɔi lɛ sumɔɔ amɛhe tamɔ bɔ ni ewie yɛ Yohane 15:12, 13 lɛ, mɛɛ gbɛ nɔ ebaaye ebua amɛ? Okɛ enɛ he nɔkwɛmɔnɔ ahã.

¹¹ Gbi gbɛkɛ ni enɔ jetsɛremɔ lɛ abaagbe Yesu lɛ, ekɛɛ esɛɛnyiɛlɔi lɛ akɛ amɛsumɔ amɛhe. (Kanemɔ Yohane 15:12, 13.) Ele akɛ kɛ́ amɛsumɔ amɛhe lɛ, no baaye abua amɛ ni amɛya nɔ amɛfee ekome ni amɛfi shi kɛ́ je lɛ miinyɛ amɛ. Nakai Tesalonika asafo lɛ fee. Kɛjɛ be ni ato nakai asafo lɛ shishi lɛ, awa emli bii lɛ ayi waa. Shi amɛtee nɔ amɛhiɛ amɛhemɔkɛyeli lɛ mli ni amɛjie suɔmɔ kpo, ni enɛ bafee nɔkwɛmɔnɔ kpakpa. (1 Tes. 1:3, 6, 7) Paulo wo amɛ hewalɛ ni amɛya nɔ  amɛsumɔ amɛhe waa ni “eteke nɔ fe tsutsu lɛ” po. (1 Tes. 4:9, 10) Ehã amɛle akɛ, kɛ́ amɛsumɔɔ amɛhe lɛ, amɛbaashɛje mɛi ni ehao lɛ amii, ni amɛbaaye amɛbua mɛi ni he waaa lɛ. (1 Tes. 5:14) Nyɛmimɛi lɛ bo ŋaa ni Paulo wo amɛ lɛ toi, ejaakɛ aaafee afi sɛɛ, be ni eŋma amɛ wolo ni ji enyɔ lɛ, ekɛɛ amɛ akɛ: “Suɔmɔ ni nyɛteŋ mɔ fɛɛ mɔ kɛsumɔɔ enyɛmi lɛ miifa kɛmiiya nɔ.” (2 Tes. 1:3-5) Suɔmɔ ni yɔɔ nyɛmimɛi nɛɛ ateŋ lɛ ye ebua amɛ ni amɛnyɛ amɛfi shi be ni amɛkɛ shihilɛ ni mli wa kpe kɛ be ni aawa amɛ yi lɛ.

12. Be ni awuɔ ta yɛ maŋ ko nɔ lɛ, mɛɛ gbɛ nɔ nyɛmimɛi lɛ jie suɔmɔ kpo amɛtsɔɔ amɛhe?

¹² Naa niiashikpamɔ lɛ ni Danylo ni wɔtsĩ etã kɛtsɔ hiɛ lɛ kɛ eŋa ná. Be ni awuɔ ta yɛ amɛmaŋ lɛ mli lɛ, amɛtee asafoŋ kpeei, amɛtee shiɛmɔ, ni amɛkɛ amɛnyɛmimɛi lɛ ja niyenii ni amɛyɔɔ lɛ. Kɛkɛ ni gbi ko lɛ, asraafoi ni hiɛ tui ba Danylo shĩa lɛ. Danylo wie akɛ: “Amɛkɛɛ mi akɛ miwie akɛ mijeee Odasefonyo dɔŋŋ. Be ni mikɛɛ mikɛɛɛ nakai lɛ, amɛyi mi, ni amɛtswa tu kɛwo kɔɔyɔɔ mli kɛwo mihe gbeyei. Be ni amɛshiɔ lɛ, amɛkɛɛ mi akɛ kɛ́ amɛku amɛsɛɛ amɛba ekoŋŋ lɛ, amɛbaato miŋa kabonaa. Shi oya nɔŋŋ ni nyɛmimɛi lɛ hã wɔkwɔ oketeke kɛtee maŋ kroko nɔ. Mihiɛ kpaŋ suɔmɔ ni nyɛmimɛi lɛ jie lɛ kpo amɛtsɔɔ wɔ lɛ nɔ kɔkɔɔkɔ. Be ni wɔyashɛ nakai maŋ lɛ nɔ lɛ, nyɛmimɛi ni yɔɔ jɛmɛ lɛ hã wɔ niyenii, ni amɛye amɛbua mi ni miná nitsumɔ kɛ he ko ni wɔbaahi. Enɛ hewɔ lɛ, wɔnyɛ wɔhã nyɛmimɛi krokomɛi ni jo foi kɛjɛ he ni awuɔ ta lɛ yɛ lɛ he ko ni amɛbaahi.” Niiashikpamɔi tamɔ enɛɛmɛi hãa wɔnaa akɛ, kɛ́ wɔsumɔɔ wɔhe lɛ, no baaye abua wɔ ni wɔfi shi kɛ́ mɛi nyɛ wɔ.

13. Mɛɛ gbɛ nɔ mumɔ krɔŋkrɔŋ lɛ yeɔ ebuaa wɔ ni wɔyaa nɔ wɔsɔmɔɔ Yehowa kɛ́ mɛi nyɛ wɔ po?

¹³ Yesu kɛɛ esɛɛnyiɛlɔi lɛ akɛ, amɛsumɔ amɛhenyɛlɔi. (Mat. 5:44, 45) Ani enɛ feemɔ yɛ mlɛo? Dabi kwraa! Shi Nyɔŋmɔ mumɔ krɔŋkrɔŋ lɛ baanyɛ aye abua wɔ ni wɔfee nakai. Yibii ni mumɔ lɛ woɔ lɛ eko ji suɔmɔ, tsuishitoo, mlihilɛ, mlijɔlɛ, kɛ henɔyeli. (Gal. 5:22, 23) Sui nɛɛ yeɔ amɛbuaa wɔ ni wɔfiɔ shi kɛ́ aanyɛ wɔ. Mɛi pii yɛ ni be ko ni eho lɛ amɛteɔ shi amɛwoɔ wɔ. Shi amɛtsake, akɛni amɛwu, amɛŋa, amɛbi, loo amɛkutsoŋnyo ko jie sui nɛɛ eko kpo lɛ hewɔ, ni amɛteŋ mɛi pii ebatsɔmɔ wɔnyɛmimɛi Kristofoi. No hewɔ lɛ, kɛ́ ewa kɛhã bo akɛ obaasumɔ mɛi ni  nyɛɔ bo yɛ Yehowa ni osɔmɔɔ lɛ hewɔ lɛ, sɔlemɔ obi Yehowa mumɔ krɔŋkrɔŋ lɛ. (Luka 11:13) Hemɔ oye akɛ, kɛ́ wɔbo Nyɔŋmɔ toi lɛ, wɔshwaŋ wɔhe kɔkɔɔkɔ.​—Abɛi 3:5-7.

14-15. Mɛɛ gbɛ nɔ Romabii 12:17-21 lɛ ye ebua Yasmeen ni ejie suɔmɔ kpo etsɔɔ ewu yɛ shi ni ete ewo lɛ waa lɛ fɛɛ sɛɛ?

¹⁴ Naa nyɛmi yoo ko ni yɔɔ Middle East ni atsɛɔ lɛ Yasmeen lɛ niiashikpamɔ. Be ni ebatsɔ Yehowa Odasefonyo lɛ, ewu susu akɛ alaka lɛ, ni eka akɛ ebaahã ekpa Yehowa sɔɔmɔ. Ejɛ lɛ, ni ewo ewekumɛi, osɔfo ko, kɛ ŋkunyaayelɔ ko yiŋ ni amɛwo ehe gbeyei, ni amɛkɛɛ lɛ akɛ ekɛ mligbalamɔ miiba eweku lɛ mli. Eyajɛ nyɛmimɛi lɛ yɛ Maŋtsɛyeli Asa lɛ nɔ be ni aafee asafoŋ kpee. Shihilɛ ni Yasmeen kɛkpe lɛ hewɔ lɛ, bei pii lɛ, efoɔ.

¹⁵ Kɛ́ Yasmeen tee asafoŋ kpee lɛ, nyɛmimɛi lɛ shɛjeɔ emii, ni amɛwajeɔ lɛ. Asafoŋ onukpai lɛ wo lɛ hewalɛ ni ekɛ wiemɔi ni yɔɔ Romabii 12:17-21 lɛ atsu nii. (Kanemɔ.) Yasmeen wie akɛ: “Mináaa lɛ mlɛo kwraa. Shi mikpa Yehowa fai ni eye ebua mi, ni mimia mihiɛ akɛ mikɛ nɔ ni Biblia lɛ kɛɔ lɛ baatsu nii. No hewɔ lɛ, kɛ́ miwu je gbɛ ebatsi shia eshwie kpata lɛ shi lɛ, mibɛɔ fɛɛ. Kɛ́ ejɛ mi lɛ, mijɛɛɛ lɛ eko. Ni be ni ebɛ hewalɛ lɛ, mikwɛ lɛ.”

16-17. Mɛni okase yɛ Yasmeen niiashikpamɔ lɛ mli?

¹⁶ Mɛɛ nɔ kpakpa jɛ suɔmɔ ni Yasmeen jie lɛ kpo etsɔɔ ewu lɛ mli kɛba? Yasmeen wie akɛ: “Miwu lɛ bahe mi eye waa, ejaakɛ ena akɛ, be fɛɛ be lɛ miwieɔ anɔkwale. Agbɛnɛ hu, kɛ́ mikɛ lɛ miiwie Nyɔŋmɔ kɛ Biblia lɛ he lɛ, eboɔ mi toi, ni ehã mile akɛ, ekɛ mi béŋ dɔŋŋ. Bianɛ lɛ, lɛ po ewoɔ mi hewalɛ ni miya asafoŋ kpeei. Nibii etsake kwraa yɛ shĩa, ni amrɔ nɛɛ, toiŋjɔlɛ yɛ wɔteŋ. Mishwelɛ ji akɛ, miwu baamɔ anɔkwale lɛ mli ni ebafata mihe ni wɔ fɛɛ wɔjá Yehowa.”

¹⁷ Yasmeen niiashikpamɔ lɛ hãa wɔnaa akɛ, suɔmɔ ‘damɔɔ nibii fɛɛ naa, ehiɛ kãa nibii fɛɛ nɔ, ni efiɔ shi yɛ nibii fɛɛ mli.’ (1 Kor. 13:4, 7) Kɛ́ mɛi nyɛ wɔ lɛ, eyɛ dɔlɛ waa. Shi suɔmɔ yeɔ ebuaa. Kɛ́ wɔsumɔɔ mɛi ni nyɛɔ wɔ lɛ, ebaanyɛ ehã amɛtsake. Ni agbɛnɛ hu, ehãa Yehowa tsui nyaa. Shi kɛ́ mɛi ni nyɛɔ wɔ lɛ tsakeee po lɛ, wɔbaanyɛ wɔya nɔ wɔná miishɛɛ. Mɛni hewɔ wɔkɛɔ nakai?

18. Mɛni hewɔ wɔmii baanyɛ ashɛ wɔhe kɛ́ mɛi nyɛ wɔ?

¹⁸ Yesu wie akɛ: “Nyɛyɛ miishɛɛ kɛji gbɔmɛi nyɛ nyɛ.” (Luka 6:22) Jeee wɔ wɔfeɔ ni mɛi nyɛɔ wɔ. Ni eŋɔɔɔ wɔnaa hu akɛ mɛi baawa wɔ  yi yɛ wɔhemɔkɛyeli lɛ hewɔ. No hewɔ lɛ, mɛni hewɔ wɔmii baanyɛ ashɛ wɔhe kɛ́ mɛi nyɛ wɔ lɛ? Naa yiŋtoi etɛ ahewɔ. Klɛŋklɛŋ lɛ, kɛ́ mɛi nyɛ wɔ ni wɔfi shi lɛ, Yehowa náa wɔhe miishɛɛ. (1 Pet. 4:13, 14) Nɔ ni ji enyɔ lɛ, no kaa wɔhemɔkɛyeli lɛ ekwɛɔ, ni ehãa wɔhemɔkɛyeli lɛ mli waa. (1 Pet. 1:7) Nɔ ni ji etɛ lɛ, kɛ́ wɔfi shi lɛ, wɔbaaná jweremɔnɔ ni nɔ bɛ. No ji, naanɔ wala.​—Rom. 2:6, 7.

19. Mɛni hewɔ bɔfoi lɛ ná miishɛɛ be ni agwao amɛ lɛ?

¹⁹ Yesu shitee lɛ sɛɛ etsɛɛɛ lɛ, ebɔfoi lɛ ná miishɛɛ ni ewie he lɛ. Be ni agwao amɛ ni afã amɛ akɛ amɛkpa shiɛmɔ lɛ, amɛná miishɛɛ. Mɛni hewɔ? “Ejaakɛ [Yesu gbɛ́i] lɛ hewɔ lɛ, abu amɛ akɛ mɛi ni sa akɛ ashwie amɛhiɛ shi.” (Bɔf. 5:40-42) Suɔmɔ ni amɛyɔɔ kɛhã amɛ-Nuŋtsɔ lɛ mli wa fe gbeyei ni amɛsheɔ mɛi ni nyɛɔ amɛ lɛ. Amɛtee nɔ amɛshiɛ sane kpakpa lɛ ni “amɛkpaaa,” ni enɛ tsɔɔ akɛ, amɛsumɔɔ amɛ-Nuŋtsɔ lɛ. Ŋmɛnɛ lɛ, nyɛmimɛi babaoo miiya nɔ amɛmiisɔmɔ Yehowa yɛ shihilɛi ni mli wawai ni amɛkɛkpeɔ lɛ fɛɛ sɛɛ. Amɛle akɛ, Yehowa hiɛ kpaŋ amɛnitsumɔ lɛ kɛ suɔmɔ ni amɛjie lɛ kpo yɛ egbɛ́i lɛ hewɔ lɛ nɔ.​—Heb. 6:10.

20. Mɛni wɔbaasusu he yɛ nikasemɔ ni nyiɛ sɛɛ lɛ mli?

²⁰ Bei abɔ ni jeŋ fɔŋ nɛɛ bako naagbee nɛɛ, mɛi baaya nɔ anyɛ wɔ. (Yoh. 15:19) Shi esaaa akɛ wɔsheɔ gbeyei. Nikasemɔ ni nyiɛ sɛɛ lɛ baahã wɔna akɛ, Yehowa ‘baawaje wɔ, ni ebaabu wɔhe.’ (2 Tes. 3:3) No hewɔ lɛ, nyɛhãa wɔyaa nɔ wɔsumɔa Yehowa, wɔnyɛmimɛi lɛ, kɛ mɛi ni nyɛɔ wɔ lɛ po. Kɛ́ wɔfee nakai lɛ, toiŋjɔlɛ baahi wɔteŋ, wɔhemɔkɛyeli lɛ mli baawa, wɔbaawo Yehowa hiɛ nyam, ni wɔbaahã ana faŋŋ akɛ, suɔmɔ yɛ hewalɛ kwraa fe nyɛɛ.