Bei pii lɛ, kɛ́ mɔ ko kane sane nɛɛ ni ejwɛŋŋ he kɛyaaa shɔŋŋ lɛ, ebiɔ ehe sane ni tamɔ nɛkɛ nɔŋŋ. Shi yɛ anɔkwale mli lɛ, aawie hii srɔtoi enyɔ ni atsɛɔ amɛ fɛɛ Mefiboshet lɛ ahe yɛ ŋmalɛ nɛɛ mli. Nyɛhãa wɔsusua sane nɛɛ he jogbaŋŋ ni wɔkwɛa akɛ mɛni wɔbaanyɛ wɔkase kɛjɛ mli.

Maŋtsɛ Saul fɔ bihii kpawo kɛ biyei enyɔ. Yonatan ji ekromɔbi. Sɛɛ mli lɛ, Maŋtsɛ Saul kɛ ehemɔ ni atsɛɔ lɛ Rizpa lɛ fɔ binuu ni ewo lɛ Mefiboshet. Nɔ ko ni sa kadimɔ ji, Yonatan hu fɔ binuu ni ewo lɛ Mefiboshet. No hewɔ lɛ, Maŋtsɛ Saul yɛ binuu kɛ nabi ni atsɛɔ amɛ fɛɛ Mefiboshet.

Be ko lɛ, Maŋtsɛ Saul gbegbee Gibeonbii lɛ, ni etsɔ ŋaa koni ebule amɛshishi kɛje Israel shikpɔŋ lɛ nɔ. Nɔ ni efee nɛɛ ehiii kwraa. Mɛni hewɔ? Nɔ hewɔ lɛ ji akɛ, yɛ Yoshua beiaŋ lɛ, Israel onukpai lɛ kɛ Gibeonbii lɛ kpaŋ toiŋjɔlɛ kpaŋmɔ.​—Yos. 9:3-27.

Yɛ Maŋtsɛ Saul beiaŋ lɛ, kpaŋmɔ nɛɛ yɛ lolo. Shi Saul ku ehiɛ eshwie nɔ, ni eka akɛ ebaabule Gibeonbii lɛ ashishi. Enɛ hewɔ lɛ, ‘Saul kɛ eshĩa lɛ ye lá yi sɔ̃.’ (2 Sam. 21:1) Be ni David batsɔ maŋtsɛ lɛ, Gibeonbii lɛ ateŋ mɛi ni shwɛ lɛ yakɛɛ lɛ esha kpele ni Saul efee lɛ. David bi amɛ nɔ ni efee kɛkpãtã amɛ koni Yehowa ajɔɔ Israel shikpɔŋ lɛ. Gibeonbii lɛ biii shika. Moŋ lɛ, amɛbi ni ahã amɛ nuu ni ‘tsɔ ŋaa koni ebule amɛshishi’ lɛ bihii kpawo koni agbe amɛ. (4 Mo. 35:30, 31) David fee nɔ ni amɛbi lɛ ehã amɛ.​—2 Sam. 21:2-6.

Be ni sane nɛɛ ba lɛ, no mli lɛ Saul kɛ ebi Yonatan fɛɛ egboi yɛ ta mli. Shi Yonatan binuu Mefiboshet yɛ wala mli. Mefiboshet gbekɛbiiashi lɛ, egbee shi ni etsɔ obubuafo, ni efataaa enii Saul he be ni egbeɔ Gibeonbii lɛ. Be ni Yonatan yɔɔ wala mli lɛ, enaanyo kpaakpa ji David. Ni David kã Yonatan kitã ko ni eseshibii tamɔ Mefiboshet baaná he sɛɛ. (1 Sam. 18:1; 20:42) Biblia lɛ wie akɛ: “[Maŋtsɛ David] musuŋ tsɔ lɛ ehã Mefiboshet, Saul binuu Yonatan binuu lɛ, yɛ kitã ni David kɛ Saul binuu Yonatan kã yɛ Yehowa hiɛ lɛ hewɔ.”​—2 Sam. 21:7.

Kɛ̃lɛ, David nyɛ efee nɔ ni Gibeonbii lɛ bi lɛ ehã amɛ. Ejie Saul bihii enyɔ kɛ enabii enumɔ ehã amɛ. Atsɛɔ Saul bihii enyɔ ni eŋɔ amɛ ehã lɛ ateŋ mɔ kome Mefiboshet. (2 Sam. 21:8, 9) Nɛkɛ David fee ekpãtã Gibeonbii lɛ ni Israelbii lɛ yeee lá yi sɔ̃ dɔŋŋ.

Mɛni wɔkaseɔ yɛ sane nɛɛ mli? Yehowa wie faŋŋ yɛ Mla lɛ mli akɛ: “Akagbe bii yɛ amɛtsɛmɛi anifeemɔ hewɔ. Mɔ fɛɛ mɔ lɛ, lɛ diɛŋtsɛ ehe esha hewɔ agbe lɛ.” (5 Mo. 24:16) No hewɔ lɛ, etamɔ nɔ ni Saul bihii enyɔ lɛ kɛ enabii enumɔ lɛ ye amɛbua lɛ yɛ gbɛ ko nɔ be ni eka akɛ ebaabule Gibeonbii lɛ ashishi lɛ. Ejaakɛ eji amɛyeɔ bem kulɛ, Yehowa ekpɛlɛŋ ni agbe amɛ. Saul seshibii kpawo nɛɛ gboi yɛ amɛ diɛŋtsɛ amɛhe eshai lɛ ahewɔ.

Bei komɛi lɛ, kɛ́ mɛi yafee esha lɛ, amɛnuɔ he loo amɛwieɔ po akɛ, fã afã amɛ ni amɛyafee nɔ ni amɛyafee lɛ, ni no hewɔ lɛ sɔ̃ ko tereee amɛ. Shi sane nɛɛ hãa wɔnaa akɛ, kɛ́ mɔ ko nu he nakai loo ewie nakai lɛ, eetɔ̃ waa. Abɛi awolo lɛ kɛɛ: “Jajemɔ hei ni okɛ onaji mamɔɔ lɛ, ni otɛŋ yɛ ogbɛi fɛɛ anɔ.” (Abɛi 4:24-27; Efe. 5:15) Kɛ́ wɔbo ŋaawoo nɛɛ toi lɛ, no baatsɔɔ akɛ wɔhiɛ kã shi.