1-2. Gbaa nɔ ni yaa nɔ kɛ́ ayaabaptisi mɔ ko. Ni mɛni he wɔbaasusu yɛ nikasemɔ nɛɛ mli?

 ANI ona ni ayaabaptisi mɛi pɛŋ? Gbee ni amɛkɛhãa sanebimɔi enyɔ ni abiɔ amɛ dani abaptisiɔ amɛ lɛ hetoo lɛ hãa anaa akɛ, amɛmiisumɔ waa ni abaptisi amɛ. Onaa ni amɛwekumɛi kɛ amɛnanemɛi ená miishɛɛ. Kɛ́ akɛ amɛwo nu lɛ mli ni awó amɛnɔ lɛ, onaa akɛ amɛná miishɛɛ waa, ni onuɔ ni mɛi miitswa amɛdɛ̃. Wɔbaanyɛ wɔkɛɛ akɛ, daa otsi lɛ, mɛi akpei abɔ jɔɔ amɛhe nɔ amɛhãa Yehowa Nyɔŋmɔ ni amɛhãa abaptisiɔ amɛ ni amɛbatsɔmɔɔ edasefoi.

² Ni bo hu? Ani oosusu baptisimɔ he? Kɛ́ nakai lɛ, belɛ esoro bo kwraa yɛ mɛi pii ni yɔɔ jeŋ fɔŋ nɛɛ mli lɛ ahe, ejaakɛ ‘ootao Yehowa sɛɛ gbɛ.’ (Lala 14:1, 2) Kɛ́ oda jio, odako jio, bo titri ohe nikasemɔ nɛɛ kɔɔ. Shi wɔ mɛi ni abaptisi wɔ lɛ hu baaná nikasemɔ nɛɛ he sɛɛ, ejaakɛ ebaahã wɔfai shi ni wɔtswa akɛ wɔbaasɔmɔ Yehowa kɛya naanɔ lɛ mli awa. Wɔyɛ yiŋtoi pii ahewɔ ni esa akɛ wɔsɔmɔ Yehowa, shi wɔbaasusu emli etɛ ahe yɛ nikasemɔ nɛɛ mli.

3. Mɛni hewɔ Yehowa tsuji sumɔɔ anɔkwale lɛ ni amɛsumɔɔ ni amɛfee nɔ ni ja lɛ? (Lala 119:128, 163)

³ Yehowa fã ewebii lɛ ni ‘amɛsumɔ anɔkwale.’ (Zak. 8:19) Yesu hu wo esɛɛnyiɛlɔi lɛ hewalɛ ni amɛtiu jalɛ sɛɛ. (Mat. 5:6) Nɔ ni enɛ tsɔɔ ji, esa akɛ wɔná he miishɛɛ waa akɛ wɔbaafee nɔ ni ja ni hi ni he tse yɛ Nyɔŋmɔ hiɛ. Ani osumɔɔ anɔkwale lɛ, ni osumɔɔ ni ofee nɔ ni ja? Wɔle akɛ osumɔɔ waa. Onyɛɔ amale kɛ nibii gbohii fɛɛ. (Kanemɔ Lala 119:128, 163.) Mɛi fɛɛ ni maleɔ lɛ miikase Satan, ni ji jeŋ nɛɛ nɔyelɔ lɛ. (Yoh. 8:44; 12:31) Oti kome ni ma Satan hiɛ ji, ni efite Yehowa Nyɔŋmɔ gbɛ́i ni  yɔɔ krɔŋkrɔŋ lɛ. Kɛjɛ be ni Satan hã Adam kɛ Hawa tse Yehowa hiɛ atua yɛ Eden abɔɔ lɛ mli lɛ, egbɛ Yehowa he amalei eshwã kɛbashi ŋmɛnɛ. Satan hã efee tamɔ nɔ ni Yehowa ji nɔyelɔ ni susuɔ lɛ pɛ ehe ni yeee anɔkwa ni kɛ nibii kpakpai teɔ eshishibii. (1 Mo. 3:1, 4, 5) Satan miiya nɔ eemale Yehowa he, ni no ehã mɛi ená Yehowa he jwɛŋmɔ gbonyo. Kɛ́ mɛi kpɛ amɛyiŋ akɛ amɛbaabo Satan amalei lɛ toi moŋ fe ni amɛbaabo anɔkwale lɛ toi lɛ, enine baashɛ amɛnɔ, ni amɛbaafee nibii ni ejaaa kɛ nibii gbohii srɔtoi fɛɛ.​—Rom. 1:25-31.

4. Mɛni Yehowa efee ni hãa wɔnaa lɛɛlɛŋ akɛ lɛ ji “anɔkwale Nyɔŋmɔ” lɛ? (Kwɛmɔ mfoniri lɛ hu.)

⁴ Yehowa ji “anɔkwale Nyɔŋmɔ” lɛ, ni eshashaooo shi kwraa akɛ ebaatsɔɔ mɛi ni sumɔɔ lɛ lɛ anɔkwale lɛ. (Lala 31:5) Enɛ ni efeɔ lɛ yeɔ ebuaa amɛ koni Satan akanyɛ elaka amɛ dɔŋŋ. Agbɛnɛ hu, Yehowa tsɔɔ etsuji lɛ nii koni amɛye anɔkwa ni amɛsumɔ nɔ ni ja. Enɛ hãa bulɛ baa amɛhe, ni amɛtsui nyɔɔ amɛmli hu. (Abɛi 13:5, 6) Kɛjɛ be ni obɔi Biblia lɛ kasemɔ nɛɛ, ani oyɔse akɛ Yehowa efee nakai ehã bo? Nibii ni okase lɛ ehã ona akɛ, kɛ́ adesai kɛ Yehowa gbɛtsɔɔmɔi tsu nii lɛ amɛnáa he sɛɛ, ni bo diɛŋtsɛ hu ona nakai yɛ oshihilɛ mli. (Lala 77:13) No hewɔ lɛ, oosumɔ ni ofee nɔ ni ja yɛ Yehowa hiɛ, aloo jeee nakai? (Mat. 6:33) Oosumɔ ni ohã mɛi ale anɔkwale lɛ ni ohã ana akɛ nibii fɛɛ ni Satan ewie yɛ Yehowa, wɔ-Nyɔŋmɔ lɛ he lɛ bɛ mli. Shi te obaafee tɛŋŋ ofee nakai?

5. Mɛni obaanyɛ ofee kɛtsɔɔ akɛ osumɔɔ anɔkwale lɛ ni osumɔɔ ni ofee nɔ ni ja?

⁵ Obaanyɛ ohi shi bɔ ni baahã mɛi ana faŋŋ akɛ, oheee Satan amalei lɛ oyeee shi moŋ ofiɔ anɔkwale lɛ sɛɛ. Obaanyɛ ohã ana akɛ, oosumɔ ni Yehowa aye onɔ ni oosumɔ ni ofee nɔ ni ja yɛ ehiɛ. Te obaafee tɛŋŋ ofee nakai? Sɔlemɔ ohã Yehowa ni owo lɛ shi akɛ obaasɔmɔ lɛ kɛya naanɔ, koni no sɛɛ lɛ, ohã abaptisi bo ni mɛi ana faŋŋ akɛ ojɔɔ ohe nɔ ohã lɛ. Kɛ́ osumɔɔ anɔkwale lɛ, ni osumɔɔ ni ofee nɔ ni ja lɛ, no baatsirɛ bo ni ohã abaptisi bo.

6. Yɛ nɔ ni awie yɛ Lala 45:4 lɛ naa lɛ, mɛni ji yiŋtoi komɛi ahewɔ ni osumɔɔ Yesu Kristo?

⁶ Mɛni hewɔ osumɔɔ Yesu Kristo lɛ? Lala 45:4 lɛ tsɔɔ wɔ nibii kpakpai komɛi ahewɔ ni esa akɛ wɔsumɔ Yesu Kristo. (Kanemɔ.) Yesu sumɔɔ anɔkwale lɛ, ebaa ehe shi, ni esumɔɔ ni efee nɔ ni ja, ni ewoɔ mɛi hewalɛ ni amɛjie sui nɛɛ akpo. No hewɔ lɛ, kɛ́ osumɔɔ anɔkwale lɛ, ni osumɔɔ ni ofee nɔ ni ja lɛ, belɛ ebɛ  naakpɛɛ mɔ akɛ osumɔɔ Yesu Kristo. Kɛ́ osusu Yesu shihilɛ he lɛ, ani onaaa akɛ ekɛ ekãa fã anɔkwale lɛ he ni efee nɔ ni ja? (Yoh. 18:37) Shi mɛɛ gbɛ nɔ Yesu woɔ wɔ hewalɛ ni wɔba wɔhe shi?

7. Mɛni osumɔɔ waa yɛ bɔ ni Yesu baa ehe shi ehãa lɛ he?

⁷ Bɔ ni Yesu baa ehe shi lɛ woɔ wɔ hewalɛ ni wɔ hu wɔba wɔhe shi. Akɛ nɔkwɛmɔnɔ lɛ, kɛ́ efee nɔ ko lɛ, eŋɔɔɔ anunyam lɛ ehãaa ehe, moŋ lɛ ekɛ fɛɛ hãa e-Tsɛ lɛ. (Mar. 10:17, 18; Yoh. 5:19) Kɛ́ okwɛ bɔ ni Yesu baa ehe shi lɛ, te ehãa onuɔ he ohãa tɛŋŋ? Ani etsirɛɛɛ bo ni osumɔ Nyɔŋmɔ Bi lɛ ni onyiɛ esɛɛ? Ŋwanejee ko bɛ he akɛ, nakai pɛpɛɛpɛ etsirɛɔ bo ni ofee. Shi mɛni hewɔ Yesu baa ehe shi lɛ? Nɔ hewɔ lɛ ji akɛ, e-Tsɛ lɛ baa ehe shi. Yesu sumɔɔ e-Tsɛ lɛ, ni eesumɔ ni ekase lɛ. (Lala 18:35; Heb. 1:3) Kɛ́ okwɛ bɔ ni Yesu kaseɔ Yehowa ni ejieɔ esui lɛ akpo pɛpɛɛpɛ lɛ, ani no hãaa osumɔ Yesu?

8. Mɛni hewɔ eŋɔɔ wɔnaa waa akɛ Yesu ji wɔ-Maŋtsɛ lɛ?

⁸ Eŋɔɔ wɔnaa waa akɛ Yesu ji wɔ-Maŋtsɛ, ejaakɛ eji maŋtsɛ ni nɔ bɛ. Yehowa diɛŋtsɛ ni tsɔse e-Bi lɛ, ni lɛ nɔŋŋ ewó lɛ Maŋtsɛ. (Yes. 50:4, 5) Agbɛnɛ hu, Yesu sumɔɔ wɔ aahu akɛ, ekɛ ewala shã afɔle ehã wɔ. (Yoh. 13:1) No hewɔ lɛ esa akɛ wɔ hu wɔsumɔ Yesu, wɔ-Maŋtsɛ lɛ, aloo jeee nakai? Yesu etsɔɔ mɛi ni sumɔɔ lɛ lɛɛlɛŋ lɛ, ni ji mɛi ni etsɛɔ amɛ akɛ enanemɛi lɛ, nɔ ni amɛbaanyɛ amɛfee kɛtsɔɔ akɛ amɛsumɔɔ lɛ. No ji, ni amɛbaaye ekitãi lɛ anɔ. (Yoh. 14:15; 15:14, 15) Eji hegbɛ kpele akɛ wɔbatsɔmɔ Yehowa Bi lɛ nanemɛi!

9. Mɛɛ gbɛ nɔ Kristofoi abaptisimɔ tamɔ Kristo nɔ lɛ nɔŋŋ?

⁹ Nibii ni Yesu fã esɛɛnyiɛlɔi lɛ akɛ amɛfee lɛ ateŋ ekome ji, ni amɛhã abaptisi amɛ. (Mat. 28:19, 20) Yesu diɛŋtsɛ fee enɛ he nɔkwɛmɔnɔ. Ehã abaptisi lɛ. Yɛ gbɛ ko nɔ lɛ, esoro Yesu baptisimɔ lɛ yɛ esɛɛnyiɛlɔi lɛ anɔ lɛ he. (Kwɛmɔ akrabatsa ni yitso ji, “ Mɛɛ Gbɛ Nɔ Esoro Yesu Baptisimɔ Lɛ Yɛ Esɛɛnyiɛlɔi Lɛ Anɔ Lɛ He?”) Shi yɛ gbɛ kroko hu nɔ lɛ, etamɔ amɛnɔ lɛ nɔŋŋ. Be ni Yesu hã abaptisi lɛ lɛ, no hã ana faŋŋ akɛ ebaafee e-Tsɛ lɛ suɔmɔnaa nii. (Heb. 10:7) Nakai nɔŋŋ kɛ́ Kristo sɛɛnyiɛlɔi hã abaptisi amɛ lɛ, no hãa mɛi naa faŋŋ akɛ amɛjɔɔ amɛhe nɔ amɛhã Yehowa Nyɔŋmɔ. Kɛjɛ nakai be lɛ nɔ kɛyaa lɛ, nɔ ni he hiaa amɛ fe fɛɛ yɛ shihilɛ mli ji, ni amɛbaafee Nyɔŋmɔ suɔmɔnaa nii, shi jeee amɛ diɛŋtsɛ amɛnɔ. No hewɔ lɛ wɔbaanyɛ wɔwie akɛ, amɛnyiɛ Yesu nanemaahei lɛ asɛɛ.

10. Kɛ́ osumɔɔ Yesu lɛ, mɛɛ gbɛ nɔ no baatsirɛ bo ni ohã abaptisi bo?

¹⁰ Oheɔ oyeɔ akɛ Yesu ji Yehowa Bi koome lɛ, ni lɛ ji mɔ ni Yehowa ewó lɛ Maŋtsɛ koni eye wɔnɔ. Obana akɛ, Yesu baa ehe shi, ni ekaseɔ e-Tsɛ lɛ jogbaŋŋ kɛmɔɔ shi yɛ nɔ fɛɛ nɔ mli. Agbɛnɛ hu, okase akɛ, Yesu hã mɛi ni hɔmɔ yeɔ amɛ lɛ niyenii, eshɛje mɛi ni werɛ eho amɛhe lɛ amii, ni etsa helai po. (Mat. 14:14-21) Ona hu akɛ, Yesu ni nyiɛ Kristofoi asafo lɛ hiɛ ŋmɛnɛ, ni ole akɛ wɔsɛɛ lɛ, Yesu, ni ji Nyɔŋmɔ Maŋtsɛyeli lɛ nɔ Maŋtsɛ lɛ baafee nibii kpakpai pii ehã wɔ. (Mat. 23:10) Mɛni obaanyɛ ofee kɛtsɔɔ akɛ osumɔɔ lɛ? No ji, ni obaanyiɛ enɔkwɛmɔnɔ lɛ sɛɛ. (Yoh. 14:21) Klɛŋklɛŋ nibii ni obaanyɛ ofee kɛtsɔɔ nakai lɛ ateŋ ekome ji, ni obaajɔɔ ohe nɔ ohã Yehowa ni ohã abaptisi bo.

11. Mɛni ji yiŋtoo ni he hiaa fe fɛɛ hewɔ ni esa akɛ ohã abaptisi bo?

¹¹ Mɛni ji yiŋtoo ni he hiaa fe fɛɛ hewɔ ni esa akɛ ohã abaptisi bo? Yesu hã wɔna Nyɔŋmɔ kitãi lɛ ateŋ nɔ ni he hiaa fe fɛɛ. Ewie akɛ: “Suɔmɔ Yehowa, o-Nyɔŋmɔ lɛ, kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ kɛ onyɛmɔ fɛɛ.” (Mar. 12:30) Ani osumɔɔ Nyɔŋmɔ  waa tamɔ bɔ ni kitã nɛɛ tsɔɔ akɛ wɔsumɔ lɛ lɛ?

12. Mɛni hewɔ osumɔɔ Yehowa? (Kwɛmɔ mfoniri lɛ hu.)

¹² Oyɛ yiŋtoi kpakpai pii ahewɔ ni esa akɛ osumɔ Yehowa. Akɛ nɔkwɛmɔnɔ lɛ, obana akɛ lɛ ‘eŋɔɔ wala jɛɔ,’ ni lɛ edɛŋ “nikeenii kpakpai fɛɛ kɛ nikeenii ni hi kɛwula shi fɛɛ” jɛɔ. (Lala 36:9; Yak. 1:17) Nibii kpakpai fɛɛ ni oyɔɔ lɛ jɛ o-Tsɛ ni sumɔɔ bo waa ni feɔ ejurɔ hu lɛ ŋɔɔ.

13. Mɛni hewɔ kpɔmɔnɔ lɛ ji nikeenii ni nɔ bɛ lɛ?

¹³ Kpɔmɔnɔ lɛ ji nikeenii ni nɔ bɛ ni Yehowa kɛhã wɔ. Mɛni hewɔ wɔkɛɔ nakai? Wekukpaa ni yɔɔ Yehowa kɛ e-Bi Yesu teŋ lɛ mli wa waa. Yesu wie akɛ: “Tsɛ lɛ sumɔɔ mi,” ni “misumɔɔ Tsɛ lɛ.” (Yoh. 10:17; 14:31) Yesu kɛ e-Tsɛ lɛ hi shi yɛ ŋwɛi afii akpekpe toi akpei abɔ, ni ŋwanejee ko bɛ he akɛ, wekukpaa ni yɔɔ amɛteŋ lɛ mli bawa waa. (Abɛi 8:22, 23, 30) No hewɔ lɛ kɛ́ okwɛ lɛ, te Nyɔŋmɔ nu he ehã tɛŋŋ be ni eŋmɛ gbɛ ni apiŋ e-Bi lɛ ni agbe lɛ lɛ? Ŋwanejee ko bɛ he akɛ, edɔ lɛ waa. Yehowa sumɔɔ adesai fɛɛ ni bo hu ofata he lɛ waa. No hewɔ ejɛ esuɔmɔ mli ehã e-Bi ni esumɔɔ lɛ lɛ kɛ ewala bashã afɔle koni bo kɛ mɛi krokomɛi anyɛ ahi shi kɛya naanɔ lɛ. (Yoh. 3:16; Gal. 2:20) Enɛ ji yiŋtoo ni fe fɛɛ hewɔ ni esa akɛ wɔsumɔ Nyɔŋmɔ.

14. Mɛni ji oti ni hi fe fɛɛ ni obaanyɛ okɛma ohiɛ?

¹⁴ Okase Yehowa he nii babaoo, no hewɔ lɛ, obasumɔ lɛ waa. Ekã shi faŋŋ akɛ, obaasumɔ  ni okɛ lɛ teŋ naanyobɔɔ lɛ mli aya nɔ awa kɛya naanɔ, ni obaanyɛ ofee nakai. Yehowa kɛɛ ohã etsui anya. (Abɛi 23:15, 16) Jeee owiemɔi pɛ anɔ obaanyɛ otsɔ ofee nakai. Obaanyɛ otsɔ onifeemɔi hu anɔ ofee nakai. Obaanyɛ ohi shi bɔ ni baahã ana akɛ osumɔɔ Yehowa lɛɛlɛŋ. (1 Yoh. 5:3) Enɛ ji oti ni hi fe fɛɛ ni obaanyɛ okɛma ohiɛ.

15. Mɛni obaanyɛ ofee kɛtsɔɔ akɛ osumɔɔ Yehowa?

¹⁵ Mɛni obaanyɛ ofee kɛtsɔɔ akɛ osumɔɔ Yehowa? Klɛŋklɛŋ lɛ, jee gbɛ osɔle sɔlemɔ krɛdɛɛ ko ohã anɔkwa Nyɔŋmɔ lɛ, ni ohã ele akɛ oojɔɔ ohe nɔ oohã lɛ. (Lala 40:8) No sɛɛ lɛ, hã abaptisi bo koni mɛi fɛɛ ana akɛ ojɔɔ ohe nɔ ohã Yehowa. Tamɔ bɔ ni wɔwie kɛtsɔ hiɛ yɛ nikasemɔ nɛɛ mli lɛ, gbi ni abaabaptisi bo lɛ ji gbi ko ni sa kadimɔ waa yɛ oshihilɛ mli, ni obaaná miishɛɛ. Kɛjɛ nakai gbi lɛ nɔ kɛyaa lɛ, obaafee nɔ ni Yehowa sumɔɔ, shi jeee nɔ ni bo diɛŋtsɛ osumɔɔ. (Rom. 14:8; 1 Pet. 4:1, 2) Ekolɛ oonu he akɛ enɛ jeee yiŋkpɛɛ bibioo, ni lɛɛlɛŋ, ejeee yiŋkpɛɛ bibioo. Shi jɔɔmɔi ni ebaahã oná lɛ anɔ bɛ kwraa. Mɛni hewɔ wɔkɛɔ nakai?

16. Mɛni Lala 41:12 lɛ hãa wɔnaa akɛ Yehowa baafee ehã mɛi ni sɔmɔɔ lɛ amɛwala gbii fɛɛ lɛ?

¹⁶ Mɔ ko kwraa bɛ ni feɔ ejurɔ fe Yehowa. Kɛ́ oke Yehowa nɔ ko lɛ, lɛ hu ekeɔ bo nɔ ko ni da kwraa fe nɔ ni oke lɛ lɛ. (Mar. 10:29, 30) Ebaahã oná miishɛɛ waa ni otsui anyɔ omli hu yɛ jeŋ fɔŋ nɛɛ ni etsɛŋ ebaaba enaagbee lɛ mli po. Ni miishɛɛ sane ji, obaanyɛ oná shihilɛ kpakpa nɛɛ mli ŋɔɔmɔ ni oya nɔ osɔmɔ o-Tsɛ ni sumɔɔ bo lɛ kɛya naanɔ. Daa gbi lɛ, suɔmɔ ni oyɔɔ kɛhã lɛ lɛ mli baawa, ni lɛ hu ebaasumɔ bo waa. Agbɛnɛ hu, obaahi shi kɛya naanɔ tamɔ bɔ ni lɛ hu eyɛ kɛmiiya naanɔ lɛ.​—Kanemɔ Lala 41:12.

17. Mɛni obaanyɛ ohã Yehowa ni ebɛ momo?

¹⁷ Kɛ́ ojɔɔ ohe nɔ ni ohã abaptisi bo lɛ, ohã o-Tsɛ Yehowa nɔ ko ni jara wa waa. Yehowa ji mɔ ni edro bo nibii kpakpai fɛɛ ni ehã oná miishɛɛ yɛ shihilɛ mli lɛ. Bo hu obaanyɛ ohã lɛ, mɔ ni nibii fɛɛ ni yɔɔ ŋwɛi kɛ shikpɔŋ lɛ ji enɔ lɛ, nɔ ko ni ebɛ momo. No ji, ni obaajɛ osuɔmɔ mli osɔmɔ lɛ owala gbii fɛɛ. (Hiob 1:8; 41:11; Abɛi 27:11) Enɛ ji nɔ ni hi fe fɛɛ ni obaanyɛ ofee yɛ oshihilɛ mli. No hewɔ lɛ, ekã shi faŋŋ  akɛ, kɛ́ osumɔɔ Yehowa lɛ, no ji nɔ titri ni baatsirɛ bo ni ohã abaptisi bo.

18. Mɛɛ saji obaanyɛ obi ohe?

¹⁸ No hewɔ lɛ, kɛ́ abi bo akɛ, ‘Ani obaasumɔ ni abaptisi bo?’ lɛ, mɛni obaakɛɛ? Mɔ ko nyɛŋ ehã sanebimɔ nɛɛ hetoo ehã bo. Shi nɔ kome ni baanyɛ aye abua bo ni ohã hetoo ji ni obaabi ohe akɛ, ‘Mɛni mimɛɔ?’ (Bɔf. 8:36) Yɛ nikasemɔ nɛɛ mli lɛ, wɔsusu yiŋtoi etɛ ahewɔ ni esa akɛ ohã abaptisi bo lɛ ahe. Klɛŋklɛŋ nɔ lɛ ji, osumɔɔ anɔkwale lɛ ni osumɔɔ ni ofee nɔ ni ja. Bi ohe akɛ, ‘Ani miishwe be ni mɔ fɛɛ mɔ baawie anɔkwale ni efee nɔ ni ja?’ Nɔ ni ji enyɔ lɛ, osumɔɔ Yesu Kristo. Bi ohe akɛ, ‘Ani miisumɔ ni Nyɔŋmɔ Bi lɛ aye minɔ maŋtsɛ ni manyiɛ enɔkwɛmɔnɔ lɛ sɛɛ?’ Nɔ ni ji etɛ, ni ji yiŋtoo ni he hiaa fe fɛɛ ji, osumɔɔ Yehowa. Bi ohe akɛ, ‘Ani miisumɔ ni masɔmɔ Yehowa koni etsui anya?’ Kɛ́ ohã sanebimɔi nɛɛ fɛɛ hetoo akɛ hɛɛ lɛ, belɛ mɛni hewɔ ohãaa abaptisi bo? Mɛni omɛɔ?​—Bɔf. 16:33.

19. Mɛni hewɔ esaaa akɛ oshashaoɔ shi akɛ obaahã abaptisi bo? Okɛ enɛ he nɔkwɛmɔnɔ ahã. (Yohane 4:34)

¹⁹ Kɛ́ ooshashao shi akɛ obaahã abaptisi bo lɛ, susumɔ nɔkwɛmɔnɔ ko ni Yesu kɛtsu nii lɛ he okwɛ. (Kanemɔ Yohane 4:34.) Yesu kɛ e-Tsɛ lɛ suɔmɔnaa nii ni ebaafee lɛ to niyenii he. Mɛni hewɔ? Ejaakɛ niyenii hi hã wɔ. Yesu le akɛ, nɔ fɛɛ nɔ ni Yehowa baakɛɛ wɔfee lɛ hi hã wɔ. Yehowa ekɛŋ wɔ ni wɔfee nɔ ko ni baaye wɔ awui. Ani baptisimɔ fata nibii ni Yehowa miisumɔ ni ofee lɛ ahe? Hɛɛ, efata he. (Bɔf. 2:38) No hewɔ lɛ obaanyɛ ohe oye akɛ, kɛ́ ohã abaptisi bo lɛ obaaná he sɛɛ. Kɛ́ oshashaoŋ shi akɛ obaaye niyenii ni ŋɔɔ fe fɛɛ yɛ je lɛ mli lɛ, mɛni hewɔ oshashaoɔ shi akɛ obaahã abaptisi bo?

20. Mɛni he wɔbaasusu yɛ nikasemɔ ni nyiɛ sɛɛ lɛ mli?

²⁰ Mɛi pii yɛ ni kɛ́ abi amɛ nɔ ni amɛmɛɔ dani amɛhã abaptisi amɛ lɛ, amɛkɛɔ akɛ amɛfeko klalo. Lɛɛlɛŋ, eheɔ be, ni ebiɔ ni mɔ asusu nii ahe jogbaŋŋ ni emia ehiɛ dani ebaafee klalo akɛ ebaajɔɔ ehe nɔ ehã Yehowa ni ehã abaptisi lɛ, ejaakɛ no ji yiŋkpɛɛ ni he hiaa fe fɛɛ yɛ shihilɛ mli. Shi kɛ́ yɛ otsuiŋ tɔ̃ɔ lɛ, oosumɔ ni abaptisi bo lɛɛlɛŋ lɛ, mɛni obaanyɛ ofee bianɛ kɛsaa ohe koni onyɛ oshɛ nakai oti lɛ he? Wɔbaahã sanebimɔ nɛɛ hetoo yɛ nikasemɔ ni nyiɛ sɛɛ lɛ mli.