Mɛni hewɔ nuu ni atsɛ lɛ “Ashimashi” lɛ kɛɛ kɛ́ ekɛ Rut hi shi lɛ, no baanyɛ “afite” lɛ diɛŋtsɛ egboshinii lɛ? (Rut 4:1, 6)

Yɛ blema Israel lɛ, kɛ́ nuu ko ni ebote gbalashihilɛ mli gbo ni ebɛ bi lɛ, ehe bahiaa ni ana saji komɛi anaa. Nomɛi ji: Kɛ́ eyɛ shikpɔŋ ko lɛ, mɛni abaafee yɛ he? Ani egbɛ́i baalaaje kwraa? Mose Mla lɛ hã aná sanebimɔi nɛɛ ahetoo.

Kɛ́ nuu ko yɛ shikpɔŋ ni ehe fĩ lɛ ni ehɔ̃ɔ loo egbo lɛ, mɛni afeɔ yɛ eshikpɔŋ lɛ he? Enyɛmi nuu loo ewekunyo ko ni bɛŋkɛ lɛ kpaakpa lɛ baanyɛ akpɔ̃ nakai shikpɔŋ lɛ. Enɛ baahã shikpɔŋ lɛ aya nɔ ahi weku lɛ mli.​—3 Mo. 25:23-28; 4 Mo. 27:8-11.

Kɛ́ wekunyo ko kpɔ̃ shikpɔŋ lɛ, mɛni afeɔ koni mɔ ni egbo lɛ gbɛ́i akalaaje? Wekunyo lɛ kɛ mɔ ni egbo lɛ ŋa hiɔ shi, tamɔ eba lɛ yɛ Rut gbɛfaŋ lɛ. Bi ni amɛbaafɔ lɛ baahiɛ mɔ ni egbo lɛ gbɛ́i ni ebaaŋɔ egboshinii lɛ. Gbɛjianɔ ni ajɛ suɔmɔ mli ato nɛɛ hewɔ lɛ, yoo okulafo lɛ, ni ji mɔ ni egbo lɛ ŋa lɛ, hu náa mɔ ko kwɛɔ lɛ.​—5 Mo. 25:5-7; Mat. 22:23-28.

Hã wɔkɛ nɔ ni wɔsusu he nɛɛ ato Naomi sane lɛ he wɔkwɛ. Ekɛ nuu ko ni atsɛɔ lɛ Elimelek lɛ bote gbalashihilɛ mli. Shi ewu lɛ kɛ amɛbihii enyɔ lɛ gboi, ni enáaa mɔ ko ni baakwɛ lɛ dɔŋŋ. (Rut 1:1-5) Naomi ku esɛɛ kɛtee Yuda, ni be ni eyaa lɛ, eshaayoo Rut kɛ lɛ tee. Be ni amɛyashɛ lɛ, Naomi kɛɛ Rut akɛ, eyakɛɛ Elimelek wekunyo kpaakpa ko ni atsɛɔ lɛ Boaz lɛ ni ebakpɔ̃ amɛshikpɔŋ lɛ. (Rut 2:1, 19, 20; 3:1-4) Shi Boaz le akɛ, wekunyo ko yɛ ni bɛŋkɛ Elimelek kpaakpa fe lɛ, ni no hewɔ lɛ, nakai wekunyo lɛ klɛŋklɛŋ esa akɛ abi lɛ kɛji ebaasumɔ ni ekpɔ̃ shikpɔŋ lɛ. Biblia lɛ tsɛ wekunyo nɛɛ akɛ, “Ashimashi.”​—Rut 3:9, 12, 13.

Kulɛ, nuu ni atsɛ lɛ “Ashimashi” lɛ miisumɔ ni ekpɔ̃ shikpɔŋ lɛ, ejaakɛ ele akɛ Naomi nyɛŋ afɔ. (Rut 4:1-4) Eji Naomi baanyɛ afɔ kulɛ, Elimelek shikpɔŋ lɛ baatsɔ nakai bi lɛ nɔ. Shi akɛni enyɛŋ efɔ hewɔ lɛ, nakai shikpɔŋ lɛ baabafata lɛ Ashimashi lɛ gboshinii lɛ he. Enɛ hewɔ lɛ, ena akɛ ehi akɛ ebaakpɔ̃ shikpɔŋ lɛ, eyɛ mli akɛ no baahã ebɔ nyɔmɔ fioo moŋ.

Shi be ni Ashimashi lɛ na akɛ enɛ baabi ni ekɛ Rut abote gbalashihilɛ mli lɛ, etsake ejwɛŋmɔ. Ewie akɛ: “Minyɛŋ makpɔ̃, ejaakɛ no baanyɛ afite mi diɛŋtsɛ migboshinii lɛ.” (Rut 4:5, 6) Mɛni hewɔ etsake ejwɛŋmɔ lɛ?

Kɛ́ mɔ ni atsɛ lɛ Ashimashi lɛ loo mɔ kroko kɛ Rut hi shi ni amɛfɔ binuu lɛ, Elimelek shikpɔŋ lɛ baatsɔ nakai bi lɛ nɔ. Mɛɛ gbɛ nɔ enɛ baanyɛ “afite” Ashimashi lɛ ‘gboshinii’ lɛ? Biblia lɛ etsɔɔɔ. Shi eeenyɛ efee akɛ, gbɛi ni nyiɛ sɛɛ nɛɛ ekomɛi anɔ ebaatsɔ efite.

• Klɛŋklɛŋ lɛ, ebaafee tamɔ shika ni ekɛkpɔ̃ Elimelek shikpɔŋ lɛ efee efolo, ejaakɛ shikpɔŋ lɛ ebatsɔŋ lɛ enɔ, ebaatsɔ Rut binuu lɛ moŋ nɔ.

• Nɔ ni ji enyɔ lɛ, kɛ́ ekpɔ̃ shikpɔŋ lɛ, belɛ esa akɛ ekwɛ Rut kɛ Naomi fɛɛ.

• Nɔ ni ji etɛ lɛ, kɛ́ ekɛ Rut fɔ bii krokomɛi lɛ, bii nɛɛ kɛ bii ni eyɔɔ momo lɛ baaja egboshinii lɛ.

• Nɔ ni ji ejwɛ lɛ, kɛ́ lɛ Ashimashi lɛ bɛ lɛ diɛŋtsɛ ebii lɛ, belɛ bi ni ekɛ Rut baafɔ lɛ baakɔ Elimelek kɛ lɛ Ashimashi lɛ gboshinii lɛ fɛɛ. No hewɔ lɛ kɛ́ egbo lɛ, eshikpɔŋ lɛ baayaje mɔ ko ni Elimelek moŋ gbɛ́i kã enɔ lɛ dɛŋ. Enɛ hewɔ lɛ, Ashimashi lɛ sumɔɔɔ ni ewaa Naomi ni no hã lɛ diɛŋtsɛ egboshinii lɛ je edɛŋ. Eesumɔ ni Boaz, mɔ ni yɔɔ hegbɛ akɛ ekpɔ̃ɔ yɛ esɛɛ lɛ moŋ akpɔ̃. Boaz kpɔ̃ shikpɔŋ lɛ, ejaakɛ eesumɔ ni “nuu lɛ ni egbo lɛ gbɛ́i abakã egboshinii lɛ nɔ.”​—Rut 4:10.

Eeenyɛ efee akɛ, nɔ ni he hiaa nuu lɛ ni atsɛ lɛ Ashimashi lɛ waa ji, ni egbɛ́i akalaaje, ni agbɛnɛ hu, egboshinii lɛ akaje edɛŋ. Efó lɛ pɛ enɔ mli. Bɔ ni Ashimashi lɛ bɔ mɔdɛŋ ni egbɛ́i ahi shi lɛ fɛɛ sɛɛ lɛ, ŋmɛnɛ lɛ, wɔleee egbɛ́i po. Agbɛnɛ hu, jɔɔmɔ krɛdɛɛ ko ni kulɛ ebaaná lɛ yaje Boaz moŋ dɛŋ. No ji, atsĩ Boaz tã afata Yesu Kristo, ni ji Mesia lɛ, blematsɛmɛi lɛ ahe. Enɛ ji nɔ ni ba mɔ ni atsɛ lɛ Ashimashi lɛ nɔ ejaakɛ efó lɛ pɛ enɔ mli, ni eyeee ebuaaa Naomi, mɔ ni ehia lɛ lɛ!​—Mat. 1:5; Luka 3:23, 32.