1. Te Yehowa tsuji anɔkwafoi lɛ ateŋ mɛi komɛi nuɔ he amɛhãa tɛŋŋ?

 YEHOWA yɛ ewebii lɛ ahe miishɛɛ, ni enɛ ni wɔle lɛ hãa wɔtsui nyɔɔ wɔmli waa! Biblia lɛ kɛɔ akɛ: “Yehowa yɛ emaŋ lɛ he miishɛɛ.” (Lala 149:4) Shi bei komɛi lɛ, Yehowa webii lɛ ateŋ mɛi komɛi anijiaŋ jeɔ wui ni amɛnuɔ he akɛ Yehowa bɛ amɛhe miishɛɛ. Yehowa tsuji anɔkwafoi ni awie amɛhe yɛ Biblia lɛ mli lɛ ateŋ mɛi pii po nu he nakai bei komɛi.—1 Sam. 1:​6-10; Hiob 29:​2, 4; Lala 51:11.

2. Namɛi Yehowa náa amɛhe miishɛɛ?

² Biblia lɛ hãa wɔnaa faŋŋ akɛ, Yehowa baanyɛ ená wɔhe miishɛɛ eyɛ mli akɛ wɔji adesai ni yeee emuu. Mɛni kɛ́ wɔfee lɛ, ebaahã ená wɔhe miishɛɛ? No ji, ni wɔbaahe Yesu Kristo nɔ wɔye ni wɔhã abaptisi wɔ. (Yoh. 3:16) Kɛ́ wɔfee nibii nɛɛ, ehãa mɔ fɛɛ mɔ naa akɛ wɔtsake wɔtsui ni wɔwo Nyɔŋmɔ shi akɛ wɔbaafee esuɔmɔnaa nii. (Bɔf. 2:38; 3:19) Kɛ́ Yehowa na akɛ wɔmiifee nibii nɛɛ koni wɔ kɛ lɛ teŋ naanyobɔɔ lɛ mli awa lɛ, enáa miishɛɛ. Kɛ́ wɔfee bɔ fɛɛ bɔ ni wɔbaanyɛ ni wɔye shi ni wɔwo lɛ akɛ wɔbaasɔmɔ lɛ lɛ nɔ lɛ, enáa wɔhe miishɛɛ ni enaa wɔ akɛ enanemɛi kpaakpai.—Lala 25:14.

3. Mɛni he wɔbaasusu yɛ nikasemɔ nɛɛ mli?

³ Shi kɛ́ nakai ni lɛ, mɛni hewɔ bei komɛi lɛ, Yehowa tsuji komɛi nuɔ he akɛ ebɛ amɛhe miishɛɛ lɛ? Mɛni Yehowa feɔ kɛtsɔɔ akɛ eyɛ wɔhe miishɛɛ? Ni mɛni wɔbaanyɛ wɔfee koni hemɔkɛyeli ni wɔyɔɔ akɛ Nyɔŋmɔ yɛ wɔhe miishɛɛ lɛ mli awa? Abaahã sanebimɔi nɛɛ hetoo yɛ nikasemɔ nɛɛ mli.

NƆ HEWƆ NI YEHOWA TSUJI KOMƐI NUƆ HE AKƐ EBƐ AMƐHE MIISHƐƐ

4-5. Kɛ́ wɔnuɔ he akɛ wɔhe bɛ sɛɛnamɔ po lɛ, mɛni esa akɛ wɔhã ehi wɔjwɛŋmɔ mli?

⁴ Wɔteŋ mɛi komɛi yɛ ni kɛjɛ wɔgbekɛbiiashi tɔ̃ɔ lɛ, wɔnuɔ he akɛ wɔhe bɛ sɛɛnamɔ. (Lala 88:15) Nyɛmi nuu ko ni atsɛɔ lɛ Adrián lɛ wie akɛ: “Kɛjɛ migbekɛbiiashi tɔ̃ɔ lɛ, minuɔ he akɛ  mihe bɛ sɛɛnamɔ. Mikaiɔ akɛ be ni midako lɛ, misɔleɔ mihãa miweku lɛ koni Yehowa aye abua amɛ ni amɛyashɛ Paradeiso lɛ mli, shi mi lɛ, minuɔ he akɛ miyaŋ, ejaakɛ mibɔɔɔ mɔdɛŋ.” Nyɛmi nuu ko ni atsɛɔ lɛ Tony, ni lɛ lɛ, efɔlɔi bɛ asafo lɛ mli lɛ hu wie akɛ: “Mifɔlɔi ekɛɛɛ mi shi kome po akɛ amɛsumɔɔ mi loo mibɔ mɔdɛŋ waa. Enɛ hã minu he akɛ nɔ ko bɛ ni mifeɔ ni sa amɛhiɛ.”

⁵ Be fɛɛ be ni wɔbaanu he akɛ wɔhe bɛ sɛɛnamɔ lɛ, esa akɛ wɔkai akɛ Yehowa diɛŋtsɛ ni gbala wɔ kɛba emasɛi. (Yoh. 6:44) Enaa wɔtsui mli, ni ele sui kpakpai ni wɔyɔɔ lɛ kɛ́ wɔ diɛŋtsɛ wɔnaaa po. (1 Sam. 16:7; 2 Kro. 6:30) No hewɔ lɛ, kɛ́ Yehowa kɛɛ wɔjara wa hã lɛ lɛ, esaaa akɛ wɔjeɔ he ŋwane.—1 Yoh. 3:​19, 20.

6. Te bɔfo Paulo nu he ehã tɛŋŋ yɛ eshai ni efee be ko ni eho lɛ ahewɔ?

⁶ Wɔteŋ mɛi komɛi yɛ ni wɔfee nibii gbohii dani wɔbale anɔkwale lɛ, ni kɛbashi ŋmɛnɛ lɛ, wɔhenilee buɔ wɔ fɔ yɛ nibii nɛɛ ahe. (1 Pet. 4:3) Wɔteŋ mɛi komɛi hu yɛ ni wɔsɔmɔ Yehowa jogbaŋŋ afii pii, shi wɔyɛ subaŋ ko ni wɔmiibɔ mɔdɛŋ ni wɔye nɔ, shi kɛ́ eyɛ mli aahu lɛ, kɛkɛ lɛ ejie ehiɛ kpo. Ani bo hu nibii tamɔ nɛkɛ hãa onuɔ he akɛ Yehowa bɛ ohe miishɛɛ? Kɛ́ nakai ni lɛ, jeee okome. Yehowa tsuji ni hi shi yɛ blema lɛ ateŋ mɛi komɛi hu nu he nakai. Akɛ nɔkwɛmɔnɔ lɛ, tɔmɔi ni bɔfo Paulo tɔ̃ lɛ ahewɔ lɛ, enu he akɛ enii yɛ mɔbɔ. (Rom. 7:24) Wɔle akɛ, Paulo tsake etsui ni ehã abaptisi lɛ. Fɛɛ sɛɛ lɛ, ewie akɛ ‘lɛ ji bibioo kwraa yɛ bɔfoi lɛ ateŋ’ ni lɛ ji eshafeelɔi ateŋ “mɔ ni ehiii fe fɛɛ.”—1 Kor. 15:9; 1 Tim. 1:15.

7. Kɛ́ wɔfee eshai be ko ni eho lɛ, mɛni esa akɛ wɔhã ehi wɔjwɛŋmɔ mli?

⁷ Wɔ-Tsɛ ni yɔɔ ŋwɛi lɛ ewo shi akɛ, kɛ́ wɔtsake wɔtsui lɛ, ekɛ wɔhe eshai baake wɔ. (Lala 86:5) No hewɔ lɛ, kɛ́ wɔfee eshai be ko ni eho ni edɔ wɔ waa akɛ wɔfee nibii ni tamɔ nakai lɛ, wɔbaanyɛ wɔhe wɔye akɛ Yehowa kɛke wɔ tamɔ bɔ ni ewo shi lɛ.—Kol. 2:13.

8-9. Mɛni baaye abua wɔ ni wɔkanu he akɛ ja wɔfee fe bɔ ni wɔhewalɛ baanyɛ dani Yehowa baaná wɔsɔɔmɔ lɛ he miishɛɛ?

⁸ Wɔ fɛɛ wɔmiisumɔ ni wɔtsu babaoo yɛ Yehowa sɔɔmɔ lɛ mli. Shi ekolɛ wɔnuɔ he akɛ nɔ ni wɔtsuɔ yɛ Yehowa sɔɔmɔ lɛ mli lɛ faaa, ni no hewɔ lɛ ebɛ wɔhe miishɛɛ. Nyɛmi yoo ko ni atsɛɔ lɛ Amanda lɛ wie akɛ: “Bei pii lɛ, minuɔ he akɛ kɛ́ mitsuuu babaoo fe bɔ ni mitsuɔ amrɔ nɛɛ, belɛ jeee mihewalɛ fɛɛ mikɛsɔmɔɔ Yehowa lɛ. Enɛ hewɔ lɛ, daa nɛɛ miitao mafee fe bɔ ni mifeɔ bianɛ lɛ kɛ́ mihewalɛ shɛɛɛ po. Ni kɛ́ miyanyɛɛɛ lɛ, minine nyɛɔ shi, ni minuɔ he akɛ mihã Yehowa hu nine enyɛ shi.”

⁹ Mɛni baaye abua wɔ ni wɔkanu he akɛ ja wɔfee fe bɔ ni wɔhewalɛ baanyɛ dani Yehowa baaná wɔsɔɔmɔ lɛ he miishɛɛ? Nɔ kome ni baaye abua wɔ ji, ni wɔbaahã ehi wɔjwɛŋmɔ mli akɛ, Yehowa nuɔ nii ashishi; ebɛ kpɛŋŋ. Ekɛŋ wɔ ni wɔfee nɔ ko ni ele akɛ wɔnyɛŋ wɔfee kɔkɔɔkɔ. Kɛ́ fioo wɔnyɛɔ wɔtsuɔ jio, pii wɔnyɛɔ wɔtsuɔ jio, ehiɛ sɔɔ, bei abɔ ni wɔnyɛmɔ fɛɛ mli wɔjɛɔ wɔfeɔ nakai. Nɔ kroko ni baaye abua wɔ ji, ni wɔbaasusu mɛi ni sɔmɔ Yehowa kɛ amɛtsui muu fɛɛ ni awie amɛhe yɛ Biblia lɛ mli lɛ ahe. Mɛi nɛɛ ateŋ mɔ kome ji Paulo. Paulo tsu nii waa yɛ Yehowa sɔɔmɔ lɛ mli. Efã gbɛ kɛtee hei ni yɔɔ shɔŋŋshɔŋŋ eyashiɛ, ni eye ebua ni ato asafoi babaoo shishi. Shi ebashɛ he ko ni agbɛnɛ lɛ, eshihilɛ tsake, ni no hewɔ lɛ, enyɛɛɛ etsu shiɛmɔ nitsumɔ lɛ waa tamɔ tsutsu ko. Ani Yehowa náaa ehe miishɛɛ dɔŋŋ yɛ enɛ hewɔ? Dabi. Paulo tee nɔ etsu nɔ ni ebaanyɛ, ni Yehowa jɔɔ lɛ. (Bɔf. 28:​30, 31) Nakai nɔŋŋ wɔ hu jeee be fɛɛ be wɔbaanyɛ wɔtsu babaoo yɛ Yehowa sɔɔmɔ lɛ mli tamɔ bɔ ni wɔshweɔ. Shi jeee no nɔ Yehowa kɛ ejwɛŋmɔ maa; ekɛ ejwɛŋmɔ maa nɔ hewɔ ni wɔsɔmɔɔ lɛ lɛ nɔ. Agbɛnɛ, nyɛhãa wɔkwɛa nɔ ni Yehowa feɔ kɛtsɔɔ akɛ eyɛ wɔhe miishɛɛ.

 MƐNI YEHOWA FEƆ KƐTSƆƆ AKƐ EYƐ WƆHE MIISHƐƐ?

10. Mɛɛ gbɛ nɔ wɔnuɔ ni Yehowa miikɛɛ wɔ akɛ eyɛ wɔhe miishɛɛ? (Yohane 16:27)

¹⁰ Ehã wɔ Biblia lɛ. Be fɛɛ be lɛ, Yehowa kwɛɔ nɔ ni ebaanyɛ efee kɛtsɔɔ ewebii lɛ akɛ esumɔɔ amɛ ni eyɛ amɛhe miishɛɛ. Biblia lɛ bɔɔ amaniɛ shii enyɔ sɔŋŋ akɛ, Yehowa kɛɛ e-Bi Yesu akɛ, esumɔɔ lɛ ni eyɛ ehe miishɛɛ. (Mat. 3:17; 17:5) Ani bo hu obaasumɔ ni Yehowa akɛɛ bo akɛ eyɛ ohe miishɛɛ? Yehowa ejɛɛɛ ŋwɛi ekɛ wɔ ewieee tɛ̃ɛ, shi ekɛ wɔ wieɔ kɛtsɔ Biblia lɛ nɔ. Nibii ni Yesu kɛɛ ekaselɔi lɛ ta amɛtsuiŋ waa, ni kɛ́ wɔkane ewiemɔi lɛ, etamɔ nɔ ni wɔmiinu ni Yehowa miikɛɛ wɔ nakai nɔŋŋ. (Kanemɔ Yohane 16:27.) Bɔ ni Yehowa feɔ enii lɛ, nakai pɛpɛɛpɛ Yesu fee enii. No hewɔ lɛ, kɛ́ wɔkane yɛ Biblia lɛ mli akɛ Yesu hã esɛɛnyiɛlɔi anɔkwafoi lɛ le akɛ eyɛ amɛhe miishɛɛ yɛ emuu ni amɛyeee lɛ fɛɛ sɛɛ lɛ, wɔbaanyɛ wɔfee Yehowa he mfoniri ni eekɛɛ wɔ hu nakai.—Yoh. 15:​9, 15.

11. Kɛ́ wɔmiitsɔ shihilɛi ni mli wawai amli po lɛ, mɛni hewɔ no etsɔɔɔ akɛ Yehowa bɛ wɔhe miishɛɛ dɔŋŋ? (Yakobo 1:12)

¹¹ Edroɔ wɔ nibii ni he hiaa wɔ. Yehowa efee klalo akɛ ebaaye ebua wɔ. Nibii ni efeɔ kɛyeɔ ebuaa wɔ lɛ eko ji akɛ, ehãa wɔ nibii ni he hiaa wɔ yɛ heloo gbɛfaŋ lɛ. Bei komɛi lɛ, Yehowa ŋmɛɔ gbɛ ni wɔtsɔɔ shihilɛi ni mli wawai amli, tamɔ eba lɛ yɛ Hiob sane lɛ mli lɛ. (Hiob 1:​8-11) Shi kɛ́ wɔyaje shihilɛi ni mli wawai amli po lɛ, no etsɔɔɔ akɛ Nyɔŋmɔ bɛ wɔhe miishɛɛ dɔŋŋ. Shihilɛi ni tamɔ nakai lɛ moŋ hãa wɔnáa hegbɛ ni wɔkɛtsɔɔ Nyɔŋmɔ akɛ wɔsumɔɔ lɛ waa ni wɔkɛ wɔhiɛ fɔ̃ɔ enɔ. (Kanemɔ Yakobo 1:12.) Kɛ́ wɔyaje shihilɛi ni mli wawai amli lɛ, Yehowa yeɔ ebuaa wɔ ni wɔfiɔ shi, ni no hãa wɔnaa akɛ esumɔɔ wɔ waa.

12. Mɛni wɔkaseɔ yɛ Dmitrii niiashikpamɔ lɛ mli?

¹² Naa nyɛmi nuu ko ni yɔɔ Asia ni atsɛɔ lɛ Dmitrii lɛ niiashikpamɔ. Enitsumɔ je edɛŋ, ni nyɔji pii ho ni enáaa eko. No hewɔ lɛ, ekpɛ eyiŋ akɛ ekɛ be babaoo baawo shiɛmɔ nitsumɔ lɛ mli, ni no hãa wɔnaa akɛ ekɛ ehiɛ fɔ̃ Yehowa nɔ. Fɛɛ sɛɛ lɛ, nyɔji pii ho ni loloolo lɛ, enáaa nitsumɔ. Kɛkɛ ni hela bamɔ lɛ waa bɔ ni enyɛɛɛ shi ete po. Nibii nɛɛ ahewɔ lɛ, enu he akɛ jeee wu kpakpa kɛ tsɛ kpakpa ji lɛ, ni enu he po akɛ ekolɛ Yehowa náaa ehe miishɛɛ dɔŋŋ. Gbi ko gbɛkɛnaashi lɛ, ebiyoo printi wiemɔi ni yɔɔ Yesaia 30:15 lɛ ni ekɛbahã lɛ. Jɛmɛ kɛɔ akɛ: “Kɛji nyɛhi shi kpoo ni nyɛkɛ  nyɛhiɛ fɔ̃ minɔ lɛ, nyɛbaaná hewalɛ.” Be ni ebiyoo lɛ kɛbahã lɛ lɛ, ekɛɛ lɛ akɛ: “Dada, be fɛɛ be ni owerɛ baaho ohe lɛ, kaimɔ ŋmalɛ nɛɛ.” Dmitrii susu nii ahe ni ena akɛ, yɛ bɔ ni shihilɛ lɛ efee lɛ fɛɛ sɛɛ lɛ, Yehowa dromɔ naa lɛ, eweku lɛ yɛ nɔ ni amɛbaaye, nɔ ni amɛbaawo, kɛ he ni amɛkɛ amɛyitso baafɔ̃. Ewie akɛ: “Nɔ ni ehe bahia ni mafee kɛkɛ ji, ni maya nɔ mafee kpoo ni mikɛ mihiɛ afɔ̃ mi-Nyɔŋmɔ lɛ nɔ.” Ani bo hu okɛ shihilɛ ni tamɔ nɛkɛ miikpe? Hemɔ oye akɛ osane kã Yehowa tsui nɔ, ni ebaaye ebua bo ni onyɛ ofi shi.

13. Namɛi anɔ Yehowa baanyɛ etsɔ ehã wɔna akɛ eyɛ wɔhe miishɛɛ? Ni mɛni ehãa amɛfeɔ ni hãa wɔnaa nakai?

¹³ Ehã wɔ nyɛmimɛi Kristofoi. Yehowa tsɔɔ wɔnyɛmimɛi Kristofoi lɛ anɔ ehãa wɔnaa akɛ eyɛ wɔhe miishɛɛ. Akɛ nɔkwɛmɔnɔ lɛ, ebaanyɛ etsirɛ wɔnyɛmimɛi Kristofoi lɛ eko ni ewo wɔ hewalɛ be ni hewalɛwoo he miihia wɔ waa. Nyɛmi yoo ko ni yɔɔ Asia lɛ ná enɛ mli niiashikpamɔ be ko be ni ehao waa lɛ. No mli lɛ, enitsumɔ eje edɛŋ, ni ebɛ hewalɛ waa. Kɛkɛ ni ewu hu yafee esha ko ni yɔɔ hiɛdɔɔ ni ahã ekpa sɔɔmɔ akɛ asafoŋ onukpa. Nyɛmi yoo lɛ wie akɛ: “Minuuu nɔ ni yaa nɔ lɛ shishi. Minu he akɛ ekolɛ mitɔ̃ Yehowa nɔ ni ebɛ mihe miishɛɛ dɔŋŋ.” Wɔnyɛmi yoo lɛ kpa Yehowa fai ni efee nɔ ko ni baahã ena akɛ eyɛ ehe miishɛɛ lolo. No hewɔ lɛ, mɛni Yehowa fee? Nyɛmi yoo lɛ wie akɛ: “Asafoŋ onukpai lɛ kɛ mi gba sane ni amɛhã mina akɛ Yehowa sumɔɔ mi lolo.” Sɛɛ mli lɛ, nyɛmi yoo lɛ saa ebi Yehowa ni efee nɔ ko ekoŋŋ kɛtsɔɔ akɛ eyɛ ehe miishɛɛ. Ewie akɛ: “Nakai gbi lɛ nɔŋŋ lɛ, nyɛmimɛi komɛi ni yɔɔ misafo lɛ mli lɛ ŋma mi wolo. Be ni mikane wolo lɛ, emli wiemɔi lɛ shɛje mimii waa ni minu he akɛ Yehowa ebo mi toi.” Niiashikpamɔ nɛɛ hãa wɔnaa lɛɛlɛŋ akɛ, bei pii lɛ, Yehowa tsɔɔ nibii ni wɔnyɛmimɛi lɛ wieɔ lɛ anɔ ehãa wɔnaa akɛ eyɛ wɔhe miishɛɛ.—Lala 10:17.

14. Mɛni ji nɔ kroko ni Yehowa feɔ ni hãa wɔnaa akɛ eyɛ wɔhe miishɛɛ?

 ¹⁴ Nɔ kroko ni Yehowa feɔ ni hãa wɔnaa akɛ eyɛ wɔhe miishɛɛ ji, etsɔɔ wɔnyɛmimɛi lɛ anɔ ewoɔ wɔ ŋaa kɛ́ ehe bahia. Akɛ nɔkwɛmɔnɔ lɛ, yɛ blema Kristofoi lɛ abeiaŋ lɛ, Yehowa kɛ mumɔ krɔŋkrɔŋ lɛ tsirɛ bɔfo Paulo ni eŋmala woji 14 eyahã enyɛmimɛi Kristofoi lɛ. Paulo wo enyɛmimɛi lɛ ŋaa yɛ nibii pɔtɛi ahe yɛ woji nɛɛ amli, shi efee nakai bɔ ni baahã amɛna akɛ esumɔɔ amɛsane. Mɛni hewɔ Yehowa kɛ emumɔ lɛ tsirɛ lɛ ni ewo enyɛmimɛi lɛ ŋaa yɛ woji nɛɛ amli lɛ? Nɔ hewɔ lɛ ji, Yehowa ji Tsɛ kpakpa, ni etsɔseɔ ebii ni ‘eyɔɔ amɛhe miishɛɛ lɛ.’ (Abɛi 3:​11, 12) No hewɔ lɛ, kɛ́ mɔ ko jɛ Biblia lɛ mli ewo wɔ ŋaa lɛ, no etsɔɔɔ akɛ Yehowa mli efu wɔ, moŋ lɛ, etsɔɔ akɛ Yehowa yɛ wɔhe miishɛɛ waa. (Heb. 12:6) Mɛni ji nibii krokomɛi ni hãa wɔnaa akɛ Yehowa yɛ wɔhe miishɛɛ?

NIBII KROKOMƐI NI HÃA WƆNAA AKƐ YEHOWA YƐ WƆHE MIISHƐƐ

15. Namɛi Yehowa hãa amɛ emumɔ krɔŋkrɔŋ lɛ? Ni mɛni hewɔ enɛ baanyɛ ahã wɔná hemɔkɛyeli akɛ eyɛ wɔhe miishɛɛ?

¹⁵ Mɛi ni Yehowa yɔɔ amɛhe miishɛɛ lɛ, amɛ ni ehãa amɛ emumɔ krɔŋkrɔŋ lɛ. (Mat. 12:18) Wɔbaanyɛ wɔbi wɔhe akɛ, ‘Ani minyɛ mijie mumɔ lɛ yibii lɛ eko kpo yɛ mishihilɛ mli?’ Ani bianɛ lɛ, otoɔ otsui shi waa ohãa mɛi fe be ni obaleko Yehowa lɛ? Kɛ́ ofee nibii ni baahã onyɛ ojie mumɔ lɛ yibii lɛ kpo jogbaŋŋ yɛ oshihilɛ mli lɛ, no baahã ohe oye waa akɛ Yehowa yɛ ohe miishɛɛ.—Kwɛmɔ akrabatsa ni ji, “ Yibii Ni Mumɔ Lɛ Woɔ Lɛ Ji . . .”

16. Namɛi Yehowa ehã amɛ hegbɛ akɛ amɛshiɛ sane kpakpa lɛ? Ni te enɛ hãa onuɔ he ohãa tɛŋŋ? (1 Tesalonikabii 2:4)

¹⁶ Mɛi ni Yehowa yɔɔ amɛhe miishɛɛ lɛ, amɛ ni ekɛ nitsumɔ ewo amɛdɛŋ akɛ amɛyashiɛ sane kpakpa lɛ. (Kanemɔ 1 Tesalonikabii 2:4.) Nyɛmi yoo ko ni atsɛɔ lɛ Jocelyn lɛ na enɛ faŋŋ be ko be ni etee shiɛmɔ lɛ. Gbi ko be ni Jocelyn te shi lɛ, enu he akɛ ehao waa. Ewie akɛ: “Minu he akɛ mihewalɛ fɛɛ etã, ni minyɛŋ matsu nɔ ko nɔ ko. Shi akɛni gbɛgbalɔ ji mi, ni nakai gbi lɛ ji gbi ni mikɛyaa shiɛmɔ hewɔ lɛ, misɔle ni mitee shiɛmɔ.” Nakai leebi lɛ, be ni etee shiɛmɔ lɛ, ekɛ yoo ko ni atsɛɔ lɛ Mary lɛ kpe. Yoo nɛɛ bo lɛ toi jogbaŋŋ ni ekpɛlɛ ni akɛ lɛ akase Biblia lɛ. Nyɔji komɛi asɛɛ lɛ, Mary kɛɛ Jocelyn akɛ, be ni ebatswa eshinaa lɛ nakai gbi lɛ, no mli lɛ esɔle ehã Nyɔŋmɔ aahu ni eye ebua lɛ. Mɛni Jocelyn kase yɛ niiashikpamɔ nɛɛ mli? Ewie akɛ: “Minu he tamɔ nɔ ni  Yehowa miikɛɛ mi akɛ, ‘Miyɛ ohe miishɛɛ.’” Eyɛ mli akɛ kɛ́ wɔtee shiɛmɔ lɛ, jeee mɔ fɛɛ mɔ baabo wɔ toi moŋ, shi wɔle akɛ kɛ́ wɔmia wɔhiɛ wɔshiɛ sane kpakpa lɛ wɔhã mɛi lɛ, Yehowa náa wɔhe miishɛɛ.

17. Mɛni okaseɔ yɛ nɔ ni Vicky wie yɛ kpɔmɔnɔ lɛ he lɛ mli? (Lala 5:12)

¹⁷ Mɛi ni Yehowa yɔɔ amɛhe miishɛɛ lɛ, amɛ ni amɛnáa kpɔmɔnɔ lɛ he sɛɛ. (1 Tim. 2:​5, 6) Eyɛ mli akɛ abaptisi wɔ ni wɔheɔ wɔyeɔ akɛ Yesu kɛ ewala bashã afɔle ehã wɔ moŋ, shi bei komɛi lɛ, wɔnuɔ he akɛ Yehowa bɛ wɔhe miishɛɛ. Kɛ́ eba lɛ nakai lɛ, mɛni wɔbaanyɛ wɔfee? Nɔ kome ni esa akɛ wɔkai ji akɛ, jeee be fɛɛ be bɔ ni wɔnuɔ he wɔhãa yɛ sane ko he lɛ ja, shi nɔ fɛɛ nɔ ni Yehowa kɛɔ wɔ lɛ ja be fɛɛ be. Yehowa buɔ mɛi fɛɛ ni heɔ kpɔmɔnɔ lɛ amɛyeɔ lɛ jalɔi, ni ewo shi akɛ ebaajɔɔ amɛ. (Kanemɔ Lala 5:12; Rom. 3:26) Nyɛmi yoo ko ni atsɛɔ lɛ Vicky lɛ he be esusu kpɔmɔnɔ lɛ he, ni enɛ ye ebua lɛ waa. Gbi ko be ni esusu kpɔmɔnɔ lɛ he waa lɛ, ewie akɛ, “Mina akɛ Yehowa eto etsui shi ehã mi waa. . . . Shi etamɔ nɔ ni miikɛɛ lɛ akɛ: ‘Osuɔmɔ lɛ mli waaa bɔ ni obaanyɛ osumɔ mi. O-Bi lɛ afɔleshaa lɛ nyɛŋ akpãtã mi kɛ bo teŋ.’” Be ni ehe be ejwɛŋ kpɔmɔnɔ lɛ he lɛ, ebana agbɛnɛ akɛ, Yehowa sumɔɔ lɛ. Kɛ́ wɔ hu wɔhe be wɔsusu kpɔmɔnɔ lɛ he lɛ, wɔbaana akɛ Yehowa sumɔɔ wɔ ni eyɛ wɔhe miishɛɛ.

18. Kɛ́ wɔtee nɔ wɔfee nibii ni tsɔɔ akɛ wɔsumɔɔ wɔ-Tsɛ ni yɔɔ ŋwɛi lɛ, mɛni wɔbaanyɛ wɔhe wɔye akɛ lɛ hu ebaafee?

¹⁸ Ekolɛ wɔbaabɔ mɔdɛŋ waa ni wɔkɛ ŋaawoi ni yɔɔ nikasemɔ nɛɛ mli lɛ atsu nii. Shi fɛɛ sɛɛ lɛ, yɛ be kɛ beiaŋ lɛ, wɔnijiaŋ baanyɛ aje wui ni wɔbaanyɛ wɔnu he akɛ Yehowa bɛ wɔhe miishɛɛ. Kɛ́ eba lɛ nakai lɛ, esa akɛ wɔkai wɔhe akɛ, Yehowa yɛ ‘mɛi fɛɛ ni yaa nɔ amɛsumɔɔ lɛ lɛ’ ahe miishɛɛ. (Yak. 1:12) No hewɔ lɛ, yaa nɔ ofee nibii ni baahã osumɔ Yehowa waa, ni okɛ ohiɛ afɔ̃ shi koni oyɔse nibii ni efeɔ kɛtsɔɔ akɛ eyɛ ohe miishɛɛ lɛ. Ni kaahã ohiɛ kpa nɔ kɔkɔɔkɔ akɛ, Yehowa kɛ “wɔteŋ mɔ fɛɛ mɔ teŋ jekɛɛɛ.”—Bɔf. 17:27.