Wɔle akɛ kpɔmɔnɔ lɛ ni Yesu tsɔ elá lɛ nɔ ekɛhã lɛ pɛ nɔ abaanyɛ atsɔ akɛ wɔhe eshai ake wɔ. (Efe. 1:7) Shi Biblia lɛ kɛɛ: “[Nyɔŋmɔ mɔ] etsui mli ni ekɛ eshai ni afee yɛ blema lɛ ke,” ni tsɔɔ akɛ, ekɛ nakai eshai lɛ ke kwraa dani Yesu kɛ ewala bashã afɔle akɛ kpɔmɔnɔ. (Rom. 3:25) Te feɔ tɛŋŋ Yehowa feɔ enɛ, ni nakai beiaŋ nɔŋŋ lɛ, akɛɔ akɛ eji Nyɔŋmɔ ni yeɔ jalɛsane lɛ?

Yɛ Yehowa hiɛ lɛ, kɛjɛ gbi nɔ ni ewo shi akɛ ebaahã ‘seshi’ ko abahere adesai ni heɔ enɔ amɛyeɔ lɛ, etamɔ nɔ ni akɛ kpɔmɔnɔ lɛ ehã momo. (1 Mo. 3:15; 22:18) Nyɔŋmɔ yɛ nɔmimaa waa akɛ, yɛ be ni eto lɛ naa lɛ, e-Bi koome lɛ baajɛ esuɔmɔ mli ekɛ ewala ashã afɔle akɛ kpɔmɔnɔ. (Gal. 4:4; Heb. 10:​7-10) Be ni Yesu yɔɔ shikpɔŋ lɛ nɔ lɛ, Yehowa hã lɛ hegbɛ akɛ ebaanyɛ ekɛ eshai ake be ni no mli lɛ ekɛ ewala eshãko afɔle lɛ po. Yesu nyɛ ekɛ mɛi ni heɔ Nyɔŋmɔ nɔ amɛyeɔ lɛ ahe eshai ke amɛ, ejaakɛ ele akɛ, kɛ́ ekɛ ewala shã afɔle akɛ kpɔmɔnɔ lɛ, ebaahere mɛi nɛɛ kɛjɛ amɛhe eshai lɛ amli.—Mat. 9:​2-6.