1. Mɛɛ jɔɔmɔi wɔnáa yɛ Yehowa asafo lɛ mli?

 EŊƆƆ wɔnaa waa akɛ wɔyɛ Yehowa asafo lɛ mli yɛ naagbee gbii ni mli shihilɛ wa nɛɛ amli. Nibii miifite waa yɛ je lɛ mli, shi Yehowa ehã wɔ nyɛmimɛi yɛ jeŋ fɛɛ koni amɛye amɛbua wɔ. (Lala 133:1) Eyeɔ ebuaa wɔ koni wɔná miishɛɛ yɛ wɔweku lɛ mli. (Efe. 5:33–6:1) Agbɛnɛ hu, ehãa wɔ sɛɛyoomɔ kɛ hiɛshikamɔ ni wɔkɛtsu naagbai ni mli wawai ni wɔkɛkpeɔ lɛ ahe nii koni wɔkahao yɛ shihilɛ mli.

2. Mɛni esa akɛ wɔfee? Ni mɛni hewɔ?

² Shi ja wɔmia wɔhiɛ waa dani wɔbaanyɛ wɔya nɔ wɔsɔmɔ Yehowa jogbaŋŋ. Mɛni hewɔ? Nɔ hewɔ lɛ ji, bei komɛi lɛ, nibii ni mɛi komɛi feɔ loo amɛwieɔ lɛ baanyɛ agba wɔnaa. Agbɛnɛ hu, wɔ diɛŋtsɛ wɔtɔmɔi baanyɛ ahã wɔnijiaŋ aje wui, titri lɛ, kɛ́ daa nɛɛ tɔmɔ kome too lɛ nɔŋŋ wɔtɔ̃ɔ. Esa akɛ wɔmia wɔhiɛ waa ni wɔya nɔ wɔsɔmɔ Yehowa kɛ́ (1) wɔnyɛmi Kristofonyo ko fee wɔ nɔ ko ni edɔ wɔ waa, (2) nibii eyaaa lɛ bɔ ni wɔkpaa gbɛ yɛ wɔgbalashihilɛ mli, kɛ (3) kɛ́ wɔhao waa yɛ tɔmɔ ko ni wɔtɔ̃ lɛ hewɔ. Yɛ nikasemɔ nɛɛ mli lɛ, wɔbaakɔlɔ naagbai nɛɛ ekomekomei ni wɔsusu he. Yɛ eko fɛɛ eko mli lɛ, wɔbaakwɛ nɔ ni wɔbaanyɛ wɔkase yɛ mɔ ko ni awie ehe yɛ Biblia lɛ mli ni kɛ nakai naagba eko kpe lɛ dɛŋ.

YAA NƆ OSƆMƆ YEHOWA KƐ́ NYƐMI KO FEE NƆ KO NI EDƆ BO PO

3. Mɛɛ naagbai Yehowa webii kɛkpeɔ?

³ Naagba lɛ. Nyɛmimɛi komɛi anifeemɔi baanyɛ awo wɔmli la waa. Mɛi komɛi hu baanyɛ afee nibii komɛi ni baadɔ wɔ waa loo amɛkɛ wɔ baaye yɛ gbɛ ni esaaa nɔ. Asafoŋ onukpai lɛ hu baanyɛ atɔ̃. Kɛ́ nibii tamɔ nɛkɛ ba lɛ, ehãa mɛi komɛi nuɔ  he akɛ ekolɛ jeee Yehowa asafo lɛ nɛ. Kɛkɛ lɛ, nɔ najiaŋ ni amɛbaaya nɔ amɛkɛ amɛnyɛmimɛi lɛ ‘afee ekome’ kɛsɔmɔ Yehowa lɛ, ekolɛ amɛkɛ nyɛmimɛi ni etɔ̃ amɛnɔ lɛ baakpa wiemɔ loo amɛbaakpa asafoŋ kpeeibaa kwraa. (Zef. 3:9) Shi ani nilee yɛ mli akɛ wɔbaafee nakai? Wɔbaasusu mɔ ko ni awie ehe yɛ Biblia lɛ mli ni kɛ shihilɛ ko ni tamɔ nɛkɛ kpe lɛ he ni wɔkwɛ akɛ mɛni wɔbaanyɛ wɔkase yɛ esane lɛ mli.

4. Mɛɛ naagbai bɔfo Paulo kɛkpe?

⁴ Mɔ ni wɔbaanyɛ wɔkase. Bɔfo Paulo le akɛ enyɛmimɛi Kristofoi lɛ yeee emuu. Akɛ nɔkwɛmɔnɔ lɛ, be ni ekɛ asafo lɛ bɔi bɔɔ lɛ sɛɛ etsɛɛɛ lɛ, nyɛmimɛi komɛi ni yɔɔ Yerusalem asafo lɛ mli lɛ heee amɛyeee akɛ ebatsɔ Kristo kaselɔ lɛɛlɛŋ. (Bɔf. 9:26) Sɛɛ mli lɛ, mɛi komɛi hu wie ehe saji gbohii koni amɛkɛfite lɛ amɛhã mɛi. (2 Kor. 10:10) Agbɛnɛ hu, Paulo yɛ jɛmɛ ni asafoŋ onukpa ko kpɛ yiŋ ko ni ejaaa ni eeenyɛ efee akɛ etɔ̃tɔ mɛi anane. (Gal. 2:​11, 12) Ni enaanyo ko ni esumɔɔ esane waa ni atsɛɔ lɛ Marko lɛ hã enine nyɛ shi. (Bɔf. 15:​37, 38) Kulɛ, Paulo baanyɛ akɛɛ akɛ ekɛ nyɛmimɛi nɛɛ ebɔɔɔ dɔŋŋ. Shi efeee nakai, moŋ lɛ, etee nɔ ekɛ enyɛmimɛi lɛ bɔ ejaakɛ esumɔɔ amɛ, ni etee nɔ esɔmɔ Yehowa jogbaŋŋ. Mɛni ye ebua lɛ ni efee nakai?

5. Mɛni ye ebua Paulo ni etseee ehe kɛjeee enyɛmimɛi lɛ ahe? (Kolosebii 3:​13, 14) (Kwɛmɔ mfoniri lɛ hu.)

⁵ Paulo sumɔɔ enyɛmimɛi lɛ waa. Enɛ hewɔ lɛ, ekɛ ejwɛŋmɔ emaaa amɛfatɔi lɛ anɔ, moŋ lɛ, ekɛ ejwɛŋmɔ ma sui kpakpai ni amɛyɔɔ lɛ anɔ. Agbɛnɛ hu, suɔmɔ ye ebua lɛ ni etsu nɔ ni eŋma yɛ Kolosebii 3:​13, 14 lɛ he nii. (Kanemɔ.) Wɔnaa enɛ yɛ bɔ ni Paulo kɛ Marko ye ehã lɛ mli. Klɛŋklɛŋ be ni Paulo fã gbɛ kɛtee maŋsɛɛ koni eyashiɛ lɛ, ekɛ Marko tee, shi Marko shi lɛ ni eba shĩa. Enɛ dɔ Paulo waa, shi eyaaa nɔ ehiɛɛɛ mlifu lɛ mli. Sɛɛ mli be ni Paulo ŋma wolo eyahã asafo ni yɔɔ Kolose lɛ, ejie Marko yi akɛ eji nitsulɔ kpakpa ni ‘shɛjeɔ emii babaoo.’ (Kol. 4:​10, 11) Be ni awo Paulo tsũŋ yɛ Roma lɛ, ebi ni Marko aba ni ebaye ebua lɛ. (2 Tim. 4:11) Enɛ hãa wɔnaa faŋŋ akɛ, Paulo kɛ enyɛmimɛi lɛ ahe ke amɛ, ni etseee ehe yɛ amɛhe. Mɛni wɔbaanyɛ wɔkase yɛ Paulo sane lɛ mli?

6-7. Mɛni baaye abua wɔ ni wɔya nɔ wɔsumɔ wɔnyɛmimɛi lɛ yɛ emuu ni amɛyeee lɛ fɛɛ sɛɛ? (1 Yohane 4:7)

⁶ Nɔ ni wɔkaseɔ yɛ mli. Yehowa miisumɔ ni wɔya nɔ wɔsumɔ wɔnyɛmimɛi lɛ, ekɔɔɔ he eko nɔ ni baaba. (Kanemɔ 1 Yohane 4:7.) No hewɔ lɛ, kɛ́ nyɛmi ko kɛ wɔ yeee jogbaŋŋ lɛ, wɔle akɛ jeee gbɛ eje, ejaakɛ wɔ fɛɛ wɔmiimia wɔhiɛ ni wɔhi shi bɔ ni Yehowa miisumɔ ni  wɔhi shi lɛ. (Abɛi 12:18) Nyɔŋmɔ sumɔɔ etsuji anɔkwafoi lɛ yɛ emuu ni amɛyeee lɛ fɛɛ sɛɛ. Kɛ́ wɔtɔ̃ lɛ, eshɛɛɛ wɔ efɔ̃ɔɔ, ni ekɛ wɔhe mlifu hu etooo emli. (Lala 103:9) Eŋɔɔ wɔnaa waa akɛ Yehowa kɛ wɔtɔmɔi keɔ wɔ, ni esa akɛ wɔkase lɛ.—Efe. 4:32–5:1.

⁷ Esa akɛ wɔhã ehi wɔjwɛŋmɔ mli hu akɛ, amrɔ nɛɛ ni naagbee lɛ ebɛŋkɛ waa lɛ, esa akɛ wɔhã wekukpaa ni yɔɔ wɔ kɛ wɔnyɛmimɛi lɛ ateŋ lɛ mli awa. Mɛni hewɔ? Ejaakɛ wɔle akɛ, abaawa wɔ yi waa fe tsutsu lɛ po. Ekolɛ abaawo wɔ tsũŋ po yɛ wɔhemɔkɛyeli lɛ hewɔ. Kɛ́ eba lɛ nakai lɛ, wɔnyɛmimɛi lɛ ayelikɛbuamɔ he baahia wɔ waa diɛŋtsɛ. (Abɛi 17:17) Naa nɔ ni ba asafoŋ onukpa ko ni yɔɔ Spain ni atsɛɔ lɛ Josep a lɛ nɔ. Awo ekɛ nyɛmimɛi komɛi tsũŋ yɛ he kome yɛ amɛhe ni amɛkɛwooo asraafoi anitsumɔ mli lɛ hewɔ. Ewie akɛ: “Yɛ tsuŋwoohe lɛ, wɔ fɛɛ wɔyɛ he kome, no hewɔ lɛ ewaaa akɛ mɔ ko baafee nɔ ko ni baagba enyɛmi naa. Ehe bahia ni wɔna mli wɔhã wɔhe ni wɔkɛkekee wɔhe tswaa. Enɛ ni wɔfee lɛ ye ebua wɔ ni wɔfee ekome ni ebu wɔhe hu, ejaakɛ mɛi ni wɔkɛyɔɔ tsuŋwoohe lɛ jáaa Yehowa. Mikaiɔ akɛ be ko lɛ mipila ni awo minine POP, no hewɔ lɛ minyɛɛɛ mikɛ minine lɛ afee nɔ ko nɔ ko. Shi nyɛmimɛi lɛ ateŋ mɔ kome fɔ minii ahe ni efee nibii krokomɛi kɛye ebua mi. Nakai be ni mihe fi mi waa lɛ mli mina lɛɛlɛŋ akɛ, miyɛ nyɛmimɛi ni sumɔɔ mi.” Ani niiashikpamɔ nɛɛ hãaa wɔna akɛ kɛ́ naagba yɛ wɔkɛ nyɛmi ko teŋ lɛ, esa akɛ wɔsaa bianɛ nɔŋŋ?

YAA NƆ OFEE NƆ NI YEHOWA SUMƆƆ KƐ́ NIBII EYAAA LƐ BƆ NI OKPAA GBƐ YƐ OGBALASHIHILƐ LƐ MLI

8. Mɛɛ naagba mɛi ni ebote gbalashihilɛ mli lɛ kɛkpeɔ?

⁸ Naagba lɛ. Gbalashihilɛ fɛɛ gbalashihilɛ lɛ, naagba yɛ mli. Biblia lɛ hãa mɛi ni ebote gbalashihilɛ mli lɛ leɔ faŋŋ akɛ, “amɛbaana amanehulu yɛ amɛheloo mli.” (1 Kor. 7:28) Mɛni hewɔ? Nɔ hewɔ lɛ ji, mɛi enyɔ lɛ ni ebote gbalashihilɛ mli lɛ ateŋ mɔ ko mɔ ko yeee emuu, ni esoro amɛteŋ mɔ fɛɛ mɔ su, nibii ni esumɔɔ, kɛ nibii ni esumɔɔɔ. Bei komɛi po lɛ, esoro he ni amɛteŋ mɔ fɛɛ mɔ jɛ. Agbɛnɛ hu, ebaanyɛ eba lɛ akɛ, be ni amɛbote gbalashihilɛ mli lɛ sɛɛ lɛ, amɛbaayɔse sui komɛi yɛ amɛhefatalɔ lɛ he ni amɛyɔseee be ni amɛboteko gbalashihilɛ mli lɛ. Nibii ni wɔtsĩ tã nɛɛ ateŋ eko fɛɛ eko baanyɛ ekɛ naagba aba. Nɔ najiaŋ ni amɛteŋ mɔ fɛɛ mɔ baayɔse nɔ ni efeee lɛ jogbaŋŋ ni kɛ naagba lɛ ba, kɛ nɔ ni ebaanyɛ efee koni anyɛ atsu he nii lɛ, obaana ni mɔ nɛ miishwa mɔ nɛ, ni mɔ nɛ hu miishwa mɔ nɛ. Eshɛɔ he ko po ni amɛnuɔ he akɛ kɛ́ amɛtse gbãla lɛ, loo mɔ nɛ yahi he ko ni mɔ nɛ yahi he kroko lɛ, no moŋ baaye abua amɛ. Shi ani no baahã amɛhe ajɔ amɛ lɛɛlɛŋ? b Nyɛhãa wɔkwɛa nɔ ni wɔbaanyɛ wɔkase kɛjɛ mɔ ko ni awie ehe yɛ Biblia lɛ mli ni tee nɔ efee nɔ ni Yehowa sumɔɔ be ni nibii eyaaa lɛ jogbaŋŋ yɛ egbalashihilɛ mli lɛ dɛŋ.

9. Mɛɛ naagba Abigail kɛkpe?

⁹ Mɔ ni wɔbaanyɛ wɔkase. No mli lɛ, Abigail wu ji Nabal, ni Biblia lɛ kɛɛ nuu nɛɛ yitsoŋ wa ni ebɛ subaŋ. (1 Sam. 25:3) Ekã shi faŋŋ akɛ, enɛ hewɔ lɛ nibii eyaaa lɛ jogbaŋŋ kwraa kɛhã Abigail yɛ gbalashihilɛ nɛɛ mli. Ani Abigail ná hegbɛ ko ni kulɛ ebaanyɛ ekɛje shihilɛ nɛɛ mli? Hɛɛ, ená hegbɛ ko ni tamɔ nakai be ni enu akɛ David, ni ji mɔ ni baaye Israel nɔ maŋtsɛ wɔsɛɛ lɛ miiba ebagbe ewu lɛ yɛ jɛ ni  ewu lɛ jɛ David kɛ mɛi ni fata ehe lɛ hewɔ lɛ. (1 Sam. 25:​9-13) Kulɛ Abigail baanyɛ ejo foi kɛshi shĩa lɛ koni David abagbe Nabal. Shi efeee nakai, moŋ lɛ, eyakpa David fai koni ekagbe Nabal. (1 Sam. 25:​23-27) Mɛni tsirɛ lɛ ni efee nakai?

10. Mɛni eeenyɛ efee akɛ no hewɔ Abigail shiii Nabal yɛ naagbai ni ekɛkpeɔ yɛ gbalashihilɛ lɛ mli lɛ fɛɛ sɛɛ?

¹⁰ Abigail sumɔɔ Yehowa, ni ena gbalashihilɛ tamɔ bɔ ni Yehowa naa lɛ lɛ. Ŋwanejee ko bɛ he akɛ, ele nɔ ni Nyɔŋmɔ kɛɛ Adam be ni ekɛ Hawa hã lɛ akɛ ehefatalɔ lɛ. (1 Mo. 2:24) Abigail le akɛ, gbalashihilɛ ji nɔ ko ni Yehowa sumɔɔɔ ni akɛshwɛɔ kwraa. Eesumɔ ni efee nɔ ni Nyɔŋmɔ sumɔɔ, ni ekã shi faŋŋ akɛ, enɛ ni tsirɛ lɛ ni efee nɔ fɛɛ nɔ ni ebaanyɛ kɛhere eshĩabii lɛ, ni ewu fata he lɛ yiwala. Etsu saji ahe nii oya nɔŋŋ koni David akabagbe Nabal. Agbɛnɛ hu, eyɛ mli akɛ Nabal ni tɔ̃ moŋ, shi Abigail ŋɔ shwamɔ lɛ efɔ̃ lɛ diɛŋtsɛ enɔ ni ekpa David fai yɛ he. Abigail tsɔɔ akɛ eyɛ ekãa ni ejwɛŋŋ lɛ pɛ ehe, ni enɛ hã Yehowa sumɔ lɛ waa. Mɛni ŋamɛi kɛ wumɛi baanyɛ akase yɛ Abigail sane lɛ mli?

11. (a) Mɛni Yehowa miisumɔ ni mɛi ni ebote gbalashihilɛ mli lɛ afee? (Efesobii 5:33) (b) Mɛni okaseɔ yɛ nɔ ni Carmen fee koni egbãla lɛ akafite lɛ mli? (Kwɛmɔ mfoniri lɛ hu.)

¹¹ Nɔ ni wɔkaseɔ yɛ mli. Kɛ́ wɔhefatalɔ lɛ kɛ shihilɛ wa po lɛ, Yehowa miisumɔ ni wɔya nɔ wɔkɛ lɛ ahi shi. No hewɔ lɛ, kɛ́ ena ni mɛi ni ebote gbalashihilɛ mli lɛ miifee bɔ fɛɛ bɔ ni amɛbaanyɛ koni amɛtsu amɛnaagbai lɛ ahe nii ni amɛjie suɔmɔ kɛ bulɛ kpo amɛtsɔɔ amɛhe lɛ, enáa miishɛɛ waa. (Kanemɔ Efesobii 5:33.) Naa nyɛmi yoo ko ni atsɛɔ lɛ Carmen lɛ niiashikpamɔ ni kɔɔ enɛ he. Be ni ebote gbalashihilɛ mli lɛ sɛɛ afii ekpaa loo nɔ lɛ, Yehowa Odasefoi kɛ lɛ bɔi Biblia lɛ kasemɔ, ni sɛɛ mli lɛ abaptisi lɛ. Carmen wie akɛ: “Miwu lɛ eyanyaaa enɛ he kwraa. Edɔ lɛ akɛ mishiɔ lɛ yɛ shĩa ni miyaa asafoŋ kpeei, ni mitswa mifai shi akɛ masɔmɔ Yehowa. Bei komɛi lɛ, ejɛɔ mi ni ekɛɔ mi akɛ ebaashi mi.” Fɛɛ sɛɛ lɛ, Carmen kɛ ewu lɛ gbalaaa mli. Emia ehiɛ akɛ ebaajie suɔmɔ kpo etsɔɔ ewu lɛ ni ebu lɛ, ni efee enɛ afii 50 sɔŋŋ. Ewie akɛ: “Be ni be shwieɔ mli lɛ, mibale miwu lɛ jogbaŋŋ, ni mibana bɔ ni kɛ́ mikɛ lɛ wie mihã lɛ, ekɛ béi baŋ. Akɛni mile akɛ gbalashihilɛ ji nɔ ko ni Yehowa sumɔɔɔ ni akɛshwɛɔ kwraa hewɔ lɛ, mifee nɔ fɛɛ nɔ ni manyɛ koni migbãla lɛ akafite. Mishiii gbãla lɛ, ejaakɛ misumɔɔ Yehowa.” c Kɛ́ nibii eyaaa lɛ jogbaŋŋ yɛ ogbalashihilɛ lɛ mli lɛ, ná hemɔkɛyeli akɛ Yehowa baaye ebua bo ni oya nɔ ohi gbãla lɛ mli.

 YAA NƆ OSƆMƆ YEHOWA KƐ́ OHAO WAA YƐ TƆMƆ KO NI OTƆ̃ LƐ HEWƆ PO

12. Kɛ́ wɔfee esha ko ni yɔɔ hiɛdɔɔ lɛ, te ekolɛ wɔbaanu he wɔhã tɛŋŋ?

¹² Naagba lɛ. Kɛ́ wɔfee esha ko ni yɔɔ hiɛdɔɔ lɛ, ekolɛ wɔbaahao waa. Biblia lɛ kɛɔ akɛ, kɛ́ wɔfee esha lɛ, no baanyɛ ahã ‘wɔtsui akumɔ ni wɔwerɛ aho wɔhe.’ (Lala 51:17) Akɛ nɔkwɛmɔnɔ lɛ, nyɛmi nuu ko ni atsɛɔ lɛ Robert lɛ mia ehiɛ waa afii abɔ ni ebatsɔ asafoŋ sɔɔlɔ. Shi efee esha ko ni yɔɔ hiɛdɔɔ waa, ni lɛ diɛŋtsɛ ena akɛ ekumɔ Yehowa tsui. Ewie akɛ: “Mihenilee gba minaa waa, ni mihao waa diɛŋtsɛ. Mifó ni misɔle mikpa Yehowa fai. Shi mikaiɔ akɛ be ni misɔleɔ lɛ fɛɛ lɛ, mijwɛŋmɔ miikɛɛ mi akɛ Nyɔŋmɔ efoŋ midaaŋ, ejaakɛ mifee lɛ nii ni edɔ lɛ.” Kɛ́ wɔfee esha ko ni yɔɔ hiɛdɔɔ lɛ, ekolɛ wɔtsui baakumɔ ni wɔbaanu he akɛ Yehowa ekwa wɔ, ni no hewɔ lɛ, ehe ehiaaa ni wɔsɔmɔɔ lɛ dɔŋŋ. (Lala 38:4) Kɛ́ nɛkɛ onuɔ he lɛ, hã wɔsusu nuu anɔkwafo ko ni awie ehe yɛ Biblia lɛ mli ni tee nɔ esɔmɔ Yehowa yɛ esha ko ni yɔɔ hiɛdɔɔ ni efee lɛ fɛɛ sɛɛ lɛ he.

13. Mɛɛ esha ni yɔɔ hiɛdɔɔ bɔfo Petro fee? Ni mɛɛ tɔmɔi bibii hã eyafee esha nɛɛ?

¹³ Mɔ ni wɔbaanyɛ wɔkase. Gbi gbɛkɛ ni enɔ jetsɛremɔ lɛ abaagbe Yesu lɛ, bɔfo Petro tɔ̃ tɔmɔi srɔtoi ni hã efee esha ko ni yɔɔ hiɛdɔɔ waa. Klɛŋklɛŋ lɛ, Petro he ehe eye ni eshwã akɛ, kɛ́ bɔfoi krokomɛi lɛ fɛɛ shi Yesu po lɛ, lɛ lɛ eshiŋ lɛ kɔkɔɔkɔ. (Mar. 14:​27-29) No sɛɛ lɛ, be ni amɛyɔɔ Getsemane abɔɔ lɛ mli ni Yesu kɛɛ amɛshi kpe lɛ, wɔ sɔŋŋ Petro wɔ. (Mar. 14:​32, 37-41) Agbɛnɛ hu, be ni mɛi ba koni amɛbamɔ Yesu lɛ, Petro jo foi eshi lɛ. (Mar. 14:50) Naagbee kwraa lɛ, Petro tso shii etɛ akɛ eleee Yesu, ni ekã kitã po kɛfi amale nɛɛ sɛɛ. (Mar. 14:​66-71) Be ni Petro yɔse akɛ efee esha ni yɔɔ hiɛdɔɔ lɛ, te enu he ehã tɛŋŋ? Ekã shi faŋŋ akɛ, ehenilee bu lɛ fɔ waa, ni ewerɛ ho ehe ni ebɔi yaafo. (Mar. 14:72) Enɛ sɛɛ ŋmɛlɛtswai fioo lɛ, agbe Yesu, ni ji enaanyo lɛ. Ŋwanejee ko bɛ he akɛ, enɛ hã bɔ ni Petro ehao ehã lɛ mli wo wu, ni enu he akɛ Yesu kɛ lɛ efeŋ nɔ ko dɔŋŋ!

14. Mɛni ye ebua Petro ni etee nɔ esɔmɔ Yehowa yɛ tɔmɔi ni etɔ̃ lɛ fɛɛ sɛɛ? (Kwɛmɔ mfoniri lɛ.)

¹⁴ Yɛ nibii nɛɛ ni ba Petro nɔ lɛ fɛɛ sɛɛ lɛ, etee nɔ esɔmɔ Yehowa. Mɛni ye ebua lɛ ni enyɛ efee nakai? Nɔ kome ji, etseee ehe kɛjeee kaselɔi krokomɛi lɛ ahe; etee amɛŋɔɔ ni amɛshɛje emii. (Luka 24:33) Agbɛnɛ hu, be ni atee Yesu shi lɛ, ejie ehe kpo etsɔɔ Petro. Eeenyɛ efee akɛ, efee nakai koni ekɛwo lɛ hewalɛ. (Luka 24:34; 1 Kor. 15:5) Sɛɛ mli be ni Yesu kɛ Petro kpe ekoŋŋ lɛ, ewieee ehiɛ yɛ etɔmɔi lɛ ahewɔ, shi moŋ etu nitsumɔi komɛi ni he hiaa waa ewo edɛŋ. (Yoh. 21:​15-17) Petro le akɛ etɔ̃ tɔmɔi ni yɔɔ hiɛdɔɔ, shi ekpaaa Yehowa  sɔɔmɔ. Mɛni hewɔ? Nɔ hewɔ lɛ ji, ele akɛ Yesu, ni ji e-Nuŋtsɔ lɛ sumɔɔ lɛ lolo. Agbɛnɛ hu, kaselɔi krokomɛi lɛ tee nɔ amɛye amɛbua lɛ. Mɛni wɔkaseɔ yɛ Petro sane lɛ mli?

15. Mɛni Yehowa miisumɔ ni wɔle? (Lala 86:5; Romabii 8:​38, 39) (Kwɛmɔ mfoniri lɛ hu.)

¹⁵ Nɔ ni wɔkaseɔ yɛ mli. Yehowa miisumɔ ni wɔle akɛ esumɔɔ wɔ, ni kɛ́ wɔtɔ̃ enɔ lɛ, efee klalo akɛ ekɛbaake wɔ. (Kanemɔ Lala 86:5; Romabii 8:​38, 39.) Kɛ́ wɔfee esha lɛ, wɔhenilee buɔ wɔ fɔ, ni esa nakai. Shi esaaa akɛ no hãa wɔnuɔ he akɛ Yehowa sumɔɔɔ wɔ dɔŋŋ loo ekɛ wɔhe esha lɛ ekeŋ wɔ. Moŋ lɛ, esa akɛ wɔhã aye abua wɔ amrɔ nɔŋŋ. Robert, ni wɔtsĩ etã kɛtsɔ hiɛ lɛ wie akɛ: “Be ni mikɛ kaa lɛ kpe lɛ, miyahe mihe miye tsɔ ni no hã mifee esha lɛ.” Robert na akɛ esa akɛ eyana asafoŋ onukpai lɛ. Ewie akɛ: “Be ni miyana asafoŋ onukpai lɛ, amɛye amɛbua mi ni mina akɛ Yehowa sumɔɔ mi. Minu he akɛ, amɛ hu amɛsumɔɔ misane. Agbɛnɛ hu, sane ni amɛkɛ mi gba lɛ hã mina akɛ Yehowa kpooko mijeŋ ehãko mi.” Wɔ hu wɔbaanyɛ wɔhe wɔye akɛ, Yehowa sumɔɔ wɔ waa, ni akɛ kɛ́ wɔfee esha ni wɔtsake wɔtsui, wɔbi yelikɛbuamɔ, ni wɔfee bɔ fɛɛ bɔ ni wɔbaanyɛ koni wɔkayafee nakai esha lɛ dɔŋŋ lɛ, Yehowa kɛbaake wɔ aahu. (1 Yoh. 1:​8, 9) Kɛ́ wɔyɛ hemɔkɛyeli ni tamɔ nɛkɛ lɛ, no lɛ kɛ́ wɔfee esha po lɛ, wɔkpaŋ Yehowa sɔɔmɔ.

16. Mɛni hewɔ otswa ofai shi akɛ obaaya nɔ osɔmɔ Yehowa kɛ́ nibii eyaaa lɛ jogbaŋŋ po?

¹⁶ Yehowa naa mɔdɛŋ fɛɛ ni wɔbɔɔ koni wɔsɔmɔ lɛ yɛ naagbee gbii ni mli shihilɛ wa waa nɛɛ amli lɛ, ni ehiɛ sɔɔ enɛ waa. Yɛ Yehowa yelikɛbuamɔ naa lɛ, wɔbaanyɛ wɔya nɔ wɔsɔmɔ lɛ kɛ́ nibii eyaaa lɛ jogbaŋŋ po. Kɛ́ wɔnyɛmimɛi lɛ tɔ̃ wɔnɔ po lɛ, wɔbaanyɛ wɔya nɔ wɔjie suɔmɔ kpo wɔtsɔɔ amɛ ni wɔkɛ amɛhe eshai lɛ ake amɛ. Kɛ́ wɔná naagbai yɛ wɔgbalashihilɛ mli lɛ, wɔfeɔ bɔ fɛɛ bɔ ni wɔbaanyɛ koni wɔtsu he nii, ni no hãa Yehowa naa akɛ wɔsumɔɔ lɛ ni wɔbuuu gbalashihilɛ akɛ nɔ ko flɛflɛ. Naagbee kwraa lɛ, kɛ́ wɔfee esha lɛ, esa akɛ wɔhã Yehowa aye abua wɔ, wɔhe wɔye akɛ esumɔɔ wɔ ni ekɛ wɔhe eshai lɛ baake wɔ, ni agbɛnɛ hu, wɔya nɔ wɔsɔmɔ lɛ. Kɛ́ wɔfee nibii nɛɛ, no baatsɔɔ akɛ ‘ekpakpafeemɔ etɔɔɔ wɔ,’ ni Yehowa baajɔɔ wɔ waa.—Gal. 6:9.