1. Mɛni Nyɔŋmɔ kɛdro wɔ yɛ e-Wiemɔ lɛ mli?

YEHOWA ji wɔ-Tsɔɔlɔ Kpele, ni no hewɔ lɛ, naagba fɛɛ naagba ni wɔkɛbaakpe lɛ, ebaanyɛ etsɔɔ wɔ bɔ ni wɔbaafee wɔkpee naa. (Yes. 30:20, 21) Nibii fɛɛ ni he baahia wɔ koni wɔnyɛ wɔfee mɛi ni ‘sa jogbaŋŋ, ni asaa amɛ jogbaŋŋ kɛhã nitsumɔ kpakpa fɛɛ nitsumɔ kpakpa’ lɛ yɛ e-Wiemɔ lɛ mli. (2 Tim. 3:17) Kɛ́ wɔkɛ nɔ ni Biblia lɛ tsɔɔ lɛ tsu nii lɛ, wɔhiɛ kãa shi fe mɛi ni kɛ “je nɛɛ mli hiɛshikamɔ lɛ” tsuɔ nii lɛ.​—1 Kor. 3:19; Lala 119:97-100.

2. Mɛni he wɔbaasusu yɛ nikasemɔ nɛɛ mli?

² Tamɔ bɔ ni wɔbaana yɛ nikasemɔ nɛɛ mli lɛ, je nɛŋ hiɛshikamɔ lɛ woɔ wɔ hewalɛ ni wɔfee nibii ni wɔtsui shweɔ. No hewɔ lɛ, ekolɛ ebaawa kɛhã wɔ akɛ wɔbaatsi wɔhe kɛje mɛi ni yɔɔ je lɛ mli lɛ ahe koni amɛsusumɔi kɛ amɛnifeemɔi akaná wɔnɔ hewalɛ. Enɛ hewɔ lɛ, Biblia lɛ woɔ wɔ ŋaa akɛ: “Nyɛkwɛa jogbaŋŋ ni mɔ ko kɛ jeŋ nilee kɛ tsɔɔmɔi ni sɛɛnamɔ bɛ he lɛ akaŋɔ nyɛ nom, yɛ gbɔmɛi akusum naa.” (Kol. 2:8) Wɔbaasusu amalei enyɔ komɛi ni ehe shi waa yɛ je lɛ mli ŋmɛnɛ lɛ ahe. Wɔbaakwɛ bɔ ni fee ni amalei nɛɛ bahe shi, ni wɔbaana akɛ, je lɛŋ hiɛshikamɔ lɛ ji kwashiai asane. Agbɛnɛ hu, wɔbaana akɛ, nɔ ko bɛ je nɛɛ mli ni he yɔɔ sɛɛnamɔ fe ni wɔkɛ nɔ ni Nyɔŋmɔ Wiemɔ lɛ kɛɔ lɛ baatsu nii.

3-4. Mɛɛ gbɛ nɔ susumɔ ni mɛi hiɛ yɛ bɔlɛnamɔ he lɛ tsake yɛ United States kɛjɛ aaafee afi 1900 kɛmiimɔ afi 1930?

³ Be ko ni eho lɛ, yɛ United States lɛ, mɛi pii kpɛlɛɔ nɔ akɛ gbalashihilɛ mli hefatalɔi pɛ esa akɛ amɛná bɔlɛ, ni agbaaa bɔlɛnamɔ he sane yɛ maŋjaanɔ. Shi kɛjɛ aaafee afi 1900 kɛmiimɔ afi 1930 lɛ, nibii tsake kwraa. Kɛjɛ nakai beiaŋ kɛbaa lɛ, kɛ́ mɛi  enyɔ ni jeee gbalashihilɛ mli hefatalɔi kɛ amɛhe ná bɔlɛ lɛ, anaaa lɛ nɔ ko dɔŋŋ.

⁴ Abale afi 1920 kɛbashi afi 1929 akɛ Roaring Twenties (Hiɛshwɛmɔ Afii), ni lɛɛlɛŋ, jeŋba gbee shi kwraa yɛ United States yɛ nakai afii lɛ amli. Niiamlitaolɔ ko wie akɛ: “Sinii, dramai, lalai, woji, kɛ adafitswaa nibii ni ba yɛ nakai beiaŋ lɛ fɛɛ bɔi bɔlɛnamɔ he wiemɔ.” Agbɛnɛ hu, mɛi bɔi joi ni teɔ bɔlɛnamɔ akɔnɔi ashi joo, ni amɛbɔi atadei ni bɛ hiŋmɛi nɔ woo. Mɛi ‘basumɔ shwɛmɔ-kɛ-ŋɔɔmɔ,’ tamɔ bɔ ni Biblia lɛ wie akɛ ebaaba lɛ yɛ naagbee gbii lɛ amli lɛ pɛpɛɛpɛ.​—2 Tim. 3:4.

5. Kɛjɛ aaafee afi 1960 kɛbaa nɛɛ, mɛɛ gbɛ nɔ mɛi ajeŋba ekpɔtɔ kwraa?

⁵ Hii kɛ yei ni yɛ tamɔ wu kɛ ŋa tsɛbelɛ amɛboteko gbalashihilɛ mli, kɛ hii ni kɛ hii náa bɔlɛ kɛ yei ni kɛ yei náa bɔlɛ lɛ ayi bafa waa kɛjɛ aaafee afi 1960 kɛmiimɔ afi 1969. Agbɛnɛ hu, mɛi tse gbãla bɔ ni amɛsumɔɔ kɛkɛ. Sinii kɛ hiɛtserɛjiemɔi krokomɛi ni mɛi miiná bɔlɛ kpetekpelee yɛ mli lɛ bahe shi waa. Anɔkwa, mɛi ajeŋba kpɔtɔ kwraa. Ani nɔ ko kpakpa ejɛ amɛjeŋba gbonyo lɛ mli kɛba? Dabi kwraa. Wolo ko wie akɛ, susumɔ ni mɛi hiɛ yɛ bɔlɛnamɔ he ŋmɛnɛ lɛ kɛ naagbai pii eba. Akɛ nɔkwɛmɔnɔ lɛ, wekui pii yɛ ni fɔlɔ kome pɛ kwɛɔ gbekɛbii lɛ, loo fɔlɔi enyɔ lɛ fɛɛ bɛ he kome, ponografi kwɛmɔ eka mɛi pii ahe, ni mɛi pii ehao. Agbɛnɛ hu, bɔlɛnamɔ mli helai tamɔ AIDS egbɛ eshwã waa. Nibii nɛɛ fɛɛ hãa wɔnaa akɛ, je nɛɛ mli hiɛshikamɔ lɛ ji kwashiai asane.​—2 Pet. 2:19.

6. Mɛni hewɔ wɔbaanyɛ wɔkɛɛ akɛ susumɔ ni je lɛ hiɛ yɛ bɔlɛnamɔ he lɛ hãa Satan náa miishɛɛ lɛ?

⁶ Bɔlɛnamɔ kɛ bifɔmɔ ji nikeenii ni jɛ Nyɔŋmɔ ŋɔɔ. Shi susumɔ ni je lɛ hiɛ yɛ bɔlɛnamɔ he lɛ hãa mɛi bɔɔ ajwamaŋ, ni amɛkɛ amɛnifeemɔ tsɔɔ akɛ amɛbuuu nikeenii ni Nyɔŋmɔ kɛdro adesai lɛ amɛhãaa nɔ ko. Ekã shi faŋŋ akɛ, nakai pɛpɛɛpɛ Satan miisumɔ ni mɛi afee, ni no hewɔ lɛ, kɛ́ ena nakai lɛ, enáa miishɛɛ waa. (Efe. 2:2) Kɛ́ mɛi nɛɛ tsakeee amɛtsui lɛ, amɛnáŋ naanɔ wala.​—1 Kor. 6:9, 10.

7-8. Mɛni hewɔ nɔ ni Biblia lɛ wieɔ yɛ bɔlɛnamɔ he lɛ hi kwraa fe susumɔ ni je lɛ hiɛ yɛ he lɛ?

⁷ Mɛi ni je nɛɛ mli hiɛshikamɔ lɛ ená amɛnɔ hewalɛ lɛ kɛɔ akɛ, anyɛŋ akɛ nɔ ni Biblia lɛ kɛɔ yɛ bɔlɛnamɔ he lɛ atsu nii. Amɛkɛɔ akɛ, ‘Mɛni hewɔ Nyɔŋmɔ kɛɔ wɔ akɛ wɔye wɔbɔlɛnamɔ henumɔi lɛ anɔ, tsɛbelɛ lɛ nɔŋŋ ekɛ henumɔi nɛɛ wo wɔmli lɛ?’ Amɛkɛɔ nakai, ejaakɛ amɛsusuɔ akɛ nɔ fɛɛ nɔ ni wɔbaanu he akɛ wɔfee lɛ, esa akɛ wɔfee; esaaa akɛ wɔyeɔ wɔhe nɔ. Shi jeee  nakai Biblia lɛ tsɔɔ. Biblia lɛ tsɔɔ akɛ, kɛ́ wɔnu he akɛ wɔyafee nɔ ko lɛ, wɔbaanyɛ wɔkpɛ wɔyiŋ akɛ wɔbaaye wɔhe nɔ ni wɔkafee. (Kol. 3:5) Hegbɛ nɛɛ ni Yehowa ehã wɔ lɛ tsɔɔ akɛ ebuɔ wɔ waa. Agbɛnɛ hu, Yehowa eto gbɛjianɔ koni adesai atsu bɔlɛnamɔ henumɔi ni amɛyɔɔ lɛ he nii yɛ gbɛ ni ja nɔ kɛ́ amɛbote gbalashihilɛ mli. (1 Kor. 7:8, 9) No hewɔ lɛ, gbalashihilɛ mli bii baanyɛ aná bɔlɛ ni amɛsheee gbeyei akɛ amɛbaaná naagbai ni bei pii lɛ mɛi ni bɔɔ ajwamaŋ lɛ náa lɛ eko.

⁸ Nɔ ni Biblia lɛ wieɔ yɛ bɔlɛnamɔ he lɛ yeee mɔ awui, ni esoro no kwraa yɛ je nɛŋ hiɛshikamɔ lɛ he. Biblia lɛ kɛɔ akɛ, bɔlɛnamɔ baanyɛ ahã mɔ aná miishɛɛ. (Abɛi 5:18, 19) Shi ebɔɔ wɔ kɔkɔ hu akɛ: “Nyɛteŋ mɔ fɛɛ mɔ ale bɔ ni ebaakudɔ lɛ diɛŋtsɛ egbɔmɔtso yɛ krɔŋkrɔŋfeemɔ kɛ woo mli, jeee yɛ bɔlɛnamɔ he akɔnɔ ni anyɛɛɛ nɔ aye ni akɛ hiɛjoomɔ tiuɔ sɛɛ lɛ mli, tamɔ bɔ ni jeŋmaji ni leee Nyɔŋmɔ lɛ feɔ lɛ.”​—1 Tes. 4:4, 5.

9. (a) Mɛɛ gbɛ nɔ awo Yehowa webii ni hi shi kɛjɛ aaafee afi 1900 kɛmiimɔ afi 1930 lɛ hewalɛ ni amɛkɛ Nyɔŋmɔ Wiemɔ lɛ atsu nii? (b) Mɛɛ ŋaawoo ni nɔ bɛ wɔnaa yɛ 1 Yohane 2:15, 16? (d) Mɛɛ jeŋbai gbohii ni esa akɛ wɔkwa atsĩ tã yɛ Romabii 1:24-27?

⁹ Yehowa webii ni hi shi aaafee afi 100 ni eho nɛ lɛ hãaa susumɔ gbonyo ni mɛi ni “nɔ ko nɔ ko efeee amɛ hiɛgbele dɔŋŋ” lɛ hiɛ lɛ aná amɛnɔ hewalɛ. (Efe. 4:19) Amɛbɔ mɔdɛŋ fɛɛ ni amɛbaanyɛ koni amɛkɛ Yehowa gbɛtsɔɔmɔi atsu nii. May 15, 1926, Blɔfo Buu-Mɔɔ lɛ wie akɛ, “esa akɛ nuu fɛɛ nuu ahã esusumɔi kɛ enifeemɔi ahe atse, titri lɛ yɛ bɔ ni ekɛ yei yeɔ ehãa lɛ mli, ni nakai nɔŋŋ esa akɛ yoo fɛɛ yoo hu afee, titri lɛ yɛ bɔ ni ekɛ hii yeɔ ehãa lɛ mli.” Yehowa webii lɛ tswa amɛfai shi akɛ amɛkɛ nɔ ni Nyɔŋmɔ Wiemɔ lɛ kɛɔ lɛ baatsu nii, ekɔɔɔ he eko bɔ ni mɛi ni ebɔle amɛ lɛ feɔ amɛnii amɛhãa. (Kanemɔ 1 Yohane 2:15, 16.) Eŋɔɔ wɔnaa waa akɛ Nyɔŋmɔ edro wɔ Biblia lɛ, ni wɔmiida lɛ shi waa akɛ ehãa wɔ gbɛtsɔɔmɔi ni he hiaa wɔ lɛ yɛ be ni sa mli koni no aye abua wɔ ni wɔwu wɔshi susumɔ ni je lɛ hiɛ yɛ bɔlɛnamɔ he lɛ! *​—Kanemɔ Romabii 1:24-27.

10-11. Mɛni Biblia lɛ ebɔ kɔkɔ akɛ ebaaba yɛ naagbee gbii lɛ amli?

¹⁰ Biblia lɛ bɔɔ wɔ kɔkɔ akɛ, yɛ naagbee gbii lɛ amli lɛ “gbɔmɛi baatsɔmɔ hesuɔlɔi.” (2 Tim. 3:1, 2) No hewɔ lɛ, ebɛ naakpɛɛ kwraa akɛ ŋmɛnɛ lɛ, mɛi naa amɛhe waa yɛ je lɛ mli. Niiamlitaomɔ wolo ko wie akɛ, yɛ aaafee afi 1970 kɛmiimɔ afi 1979 lɛ, “woji ni woɔ mɛi ŋaa yɛ bɔ ni amɛbaafee amɛye omanye yɛ shihilɛ mli lɛ he lɛ bafa waa.” Woji nɛɛ ateŋ ekomɛi “wo mɛi ni kaneɔ lɛ hewalɛ ni amɛkatsake nɔ ko nɔ ko yɛ amɛshihilɛ mli, ni amɛkanu he akɛ naagba ko yɛ bɔ ni amɛyɔɔ lɛ he.” Akɛ nɔkwɛmɔnɔ lɛ, yɛ woji nɛɛ ateŋ ekome mli lɛ, awie akɛ: “Esa akɛ osumɔ ohe, ejaakɛ mɔ ko bɛ ni he yɔɔ fɛo, ni he yɔɔ miishɛɛ, ni he yɔɔ sɛɛnamɔ fe bo.” Nakai wolo lɛ nɔŋŋ wie akɛ: “Esa akɛ mɔ fɛɛ mɔ akpɛ eyiŋ yɛ bɔ ni ebaasumɔ ni ehi shi ehã lɛ he, ni efee nɔ ni esusuɔ akɛ no ja ni baahã ehe ajɔ lɛ.”

¹¹ Enɛ tamɔ nɔ ni Satan kɛɛ Hawa yɛ Eden abɔɔ lɛ mli lɛ. Ekɛɛ lɛ akɛ, ‘ebaatsɔ tamɔ Nyɔŋmɔ, ebaale ekpakpa kɛ efɔŋ.’ (1 Mo. 3:5) Ŋmɛnɛ lɛ, mɛi pii naa amɛhe aahu akɛ, amɛsumɔɔɔ ni mɔ ko mɔ ko tsɔɔ amɛ nɔ ni ja kɛ nɔ ni ejaaa. Amɛsumɔɔɔ ni Nyɔŋmɔ po feɔ nakai. Akɛ nɔkwɛmɔnɔ lɛ, mɛi pii sumɔɔɔ ni amɛkɛ nɔ ni Biblia lɛ wieɔ yɛ gbalashihilɛ he lɛ tsuɔ nii.

12. Te anaa gbalashihilɛ ahãa tɛŋŋ yɛ je lɛ mli?

¹² Biblia lɛ woɔ wumɛi kɛ ŋamɛi ŋaa akɛ amɛjie bulɛ kpo amɛtsɔɔ amɛhe ni amɛye shi ni  amɛwo amɛhe be ni amɛboteɔ gbalashihilɛ mli lɛ nɔ. Ewoɔ amɛ hewalɛ hu ni amɛtswa amɛfai shi akɛ amɛbaaye amɛhe anɔkwa. Ekɛɔ akɛ: “Nuu baashi epapa kɛ emami ni ebaakpɛtɛ eŋa he, ni amɛbaatsɔ heloo kome.” (1 Mo. 2:24) Nɔ ni tamɔɔɔ nakai lɛ, yɛ je lɛ mli lɛ, awoɔ wumɛi kɛ ŋamɛi hewalɛ ni amɛfó amɛ pɛ amɛnɔ mli. Wolo ko ni wieɔ bɔ ni gbalamlitsemɔ ehe shi yɛ wɔbe nɛɛ mli lɛ he lɛ wie akɛ: “Yɛ yookpeemɔi komɛi ashishi lɛ, kɛ́ nuu lɛ kɛ yoo lɛ miikã amɛhe kitã ni amɛshɛ sane ni afɔɔ kɛɛmɔ akɛ ‘bei abɔ ni wɔyi enyɔ lɛ fɛɛ wɔkɛaahi wala mli’ lɛ nɔ lɛ, amɛtsakeɔ hiɛ amɛkɛɔ akɛ, ‘bei abɔ ni wɔyi enyɔ lɛ fɛɛ wɔbaasumɔ wɔhe lolo.’” Enɛ tsɔɔ akɛ, mɛi naa gbalashihilɛ akɛ kpaŋmɔ ni abaanyɛ aku mli be fɛɛ be ni asumɔɔ, ni enɛ ehã wekui babaoo amli egbala ni mɛi babaoo awerɛ eho amɛhe waa. Eyɛ faŋŋ akɛ, jwɛŋmɔ ni je lɛ hiɛ yɛ gbalashihilɛ he lɛ ji kwashiai asane.

13. Tsɔɔmɔ nɔ kome hewɔ ni Yehowa hiɔ mɛi ni wóɔ amɛhe nɔ lɛ.

¹³ Biblia lɛ kɛɔ akɛ: “Yehowa miihi mɔ fɛɛ mɔ ni wóɔ ehe nɔ yɛ etsui mli.” (Abɛi 16:5) Mɛni hewɔ Yehowa hiɔ mɛi ni wóɔ amɛhe nɔ lɛ? Yiŋtoo kome ji akɛ, mɛi ni naa amɛhe tsɔ ni amɛwoɔ mɛi krokomɛi hewalɛ ni amɛfee nakai lɛ miifee amɛnii tamɔ Satan, mɔ ni wóɔ ehe nɔ lɛ. Bo lɛ kwɛmɔ sane, Satan he eye akɛ ebaanyɛ ehã Yesu, mɔ ni Nyɔŋmɔ tsɔ enɔ ebɔ nibii fɛɛ lɛ akula shi ejá lɛ! (Mat. 4:8, 9; Kol. 1:15, 16) Bɔ ni mɛi ni naa amɛhe tsɔ lɛ feɔ amɛnii amɛhãa lɛ hãa wɔnaa akɛ je nɛɛ mli hiɛshikamɔ lɛ ji kwashiai asane yɛ Nyɔŋmɔ hiɛ lɛɛlɛŋ.

14. Mɛɛ gbɛ nɔ Romabii 12:3 lɛ yeɔ ebuaa wɔ koni wɔkana wɔhe tsɔ?

¹⁴ Biblia lɛ hãa wɔleɔ akɛ tɔmɔ bɛ he akɛ wɔbaasumɔ wɔ diɛŋtsɛ wɔhe. Akɛ nɔkwɛmɔnɔ lɛ, Yesu wie akɛ, esa akɛ ‘wɔsumɔ wɔnyɛmi gbɔmɔ tamɔ wɔ diɛŋtsɛ wɔhe.’ (Mat. 19:19) Enɛ tsɔɔ akɛ, esaaa akɛ wɔwaa wɔhe yi. Shi ani no tsɔɔ akɛ Biblia lɛ miiwo wɔ hewalɛ ni wɔnu he akɛ wɔnɔ kwɔlɔ fe mɛi krokomɛi? Dabi. Nyɔŋmɔ Wiemɔ lɛ kɛɔ akɛ: “Nyɛkajɛa naataamɔ loo nyɛhe ni nyɛnaa tsɔ mli nyɛfea nɔ ko nɔ ko, shi  moŋ nyɛkɛ heshibaa abua mɛi krokomɛi akɛ amɛnɔ kwɔlɔ fe nyɛ.”​—Fip. 2:3; kanemɔ Romabii 12:3.

15. Mɛni ona ni hãa onaa akɛ ŋaa ni Biblia lɛ woɔ akɛ wɔkana wɔhe tsɔ lɛ ji ŋaawoo kpakpa?

¹⁵ Ŋmɛnɛ lɛ, mɛi ni je lɛ buɔ amɛ akɛ amɛhiɛ kã shi lɛ ateŋ mɛi babaoo kɛɔ akɛ, nilee bɛ ŋaa ni Biblia lɛ woɔ akɛ wɔkana wɔhe tsɔ lɛ mli. Amɛkɛɔ hu akɛ, kɛ́ ona mɛi krokomɛi akɛ amɛnɔ kwɔlɔ fe bo lɛ, mɛi baata bo okpɔŋɔ. Shi mɛni ejɛ susumɔ ni ejaaa nɛɛ ni mɛi hiɛ yɛ je lɛ mli lɛ mli kɛba? Mɛni okpa shi ona? Ani mɛi ni fóɔ amɛ pɛ amɛnɔ mli lɛ yɛ miishɛɛ? Ani miishɛɛ yɛ amɛwekui lɛ amli? Ani amɛyɛ nanemɛi kpakpai? Ani wekukpaa kpakpa yɛ amɛ kɛ Nyɔŋmɔ teŋ? No hewɔ lɛ, kɛ́ okwɛ lɛ, je nɛɛ mli hiɛshikamɔ lɛ kɛ nɔ ni yɔɔ Nyɔŋmɔ Wiemɔ lɛ mli lɛ, te nɔ ni woɔ yibii kpakpai lɛ?

16-17. Mɛni esa akɛ wɔda Yehowa shi yɛ he? Ni mɛni hewɔ?

¹⁶ Kɛ́ wɔkɛ mɛi ni je lɛ buɔ amɛ akɛ amɛhiɛ kã shi lɛ aŋaawoo tsu nii lɛ, no lɛ wɔtamɔ gbɛfãlɔ ko ni elaaje ni miibi gbɛfãlɔ kroko ni lɛ hu elaaje lɛ gbɛ. Yesu wie nɔ ko ni tamɔ nɛkɛ yɛ mɛi ni abuɔ amɛ akɛ amɛhiɛ kã shi yɛ ebeiaŋ lɛ ahe. Ekɛɛ akɛ: “Gbɛtsɔɔlɔi shwilafoi ji amɛ. Kɛ́ shwilafo tsɔɔ shwilafo gbɛ lɛ, amɛyi enyɔ lɛ fɛɛ amɛbaayagbee bu mli.” (Mat. 15:14) Ani oona nɔ hewɔ ni je nɛɛ mli hiɛshikamɔ lɛ ji kwashiai asane yɛ Nyɔŋmɔ hiɛ lɛ?

¹⁷ Ŋaawoo ni yɔɔ Biblia lɛ mli lɛ hi be fɛɛ be, ni “ehe yɛ sɛɛnamɔ kɛhã nitsɔɔmɔ, kɛhã mɔjajemɔ, kɛhã nibii ajajemɔ, kɛhã tsɔsemɔ yɛ jalɛ mli.” (2 Tim. 3:16) Wɔmiida Yehowa shi waa akɛ, etsɔɔ esafo lɛ nɔ ebuɔ wɔhe koni susumɔi ni ejaaa ni ehe shi yɛ je nɛɛ mli lɛ akaná wɔnɔ hewalɛ! (Efe. 4:14) Mumɔŋ niyenii ni ekɛhãa wɔ lɛ hãa wɔnyɛɔ wɔhiɔ shi yɛ mlai kɛ shishitoo mlai ni yɔɔ e-Wiemɔ lɛ mli lɛ anaa. Eŋɔɔ wɔnaa waa akɛ Yehowa tsɔɔ Biblia lɛ nɔ ekɛ gbɛtsɔɔmɔ ni nɔ bɛ hãa wɔ!