Gbalɛi ni awie he yɛ akrabatsa nɛɛ mli lɛ ekomɛi ba mli yɛ be kome too lɛ nɔŋŋ mli. Amɛ fɛɛ amɛhãa wɔnaa akɛ, “naagbee be lɛ” mli wɔyɔɔ lɛ.​—Dan. 12:4.

• Ŋmalɛ Kpo. 11:7; 12:13, 17; 13:1-8, 12

  Gbalɛ “Kooloo awuiyelɔ” lɛ baaye mɛi ni yɔɔ shikpɔŋ lɛ nɔ lɛ anɔ afii akpei abɔ. Yɛ naagbee be lɛ mli lɛ, abaapila eyitso ni ji kpawo lɛ. Afii komɛi asɛɛ lɛ, abaatsa pilamɔ lɛ ni “shikpɔŋ muu lɛ fɛɛ” baanyiɛ kooloo lɛ sɛɛ. Satan baatsɔ nakai kooloo lɛ nɔ ekɛ “yoo lɛ seshi ni eshwɛ” lɛ awu.

  Emlibaa Yɛ Nu Afua lɛ sɛɛ lɛ, adesa nɔyelii komɛi te shi amɛwo Yehowa. Afii akpei abɔ sɛɛ lɛ, aye nɔyelii nɛɛ ekome ni atsɛɔ lɛ Britain lɛ awui waa yɛ Jeŋ Ta I lɛ mli. Ená hewalɛ ekoŋŋ be ni Amerika bafata ehe lɛ. Satan kɛ nɔyelii fɛɛ ni yɔɔ shikpɔŋ lɛ nɔ lɛ miiwa Nyɔŋmɔ webii lɛ ayi, titri lɛ, yɛ naagbee be nɛɛ mli.

• Ŋmalɛ Dan. 11:25-45

  Gbalɛ Kooyigbɛ maŋtsɛ lɛ kɛ wuoyigbɛ maŋtsɛ lɛ baatswa yɛ naagbee be lɛ mli.

  Emlibaa Germany kɛ Anglo-Amerika Jeŋ Hewalɛ lɛ tswa. Yɛ 1945 lɛ, Soviet Union lɛ kɛ maji ni fata ehe lɛ batsɔ kooyigbɛ maŋtsɛ lɛ. Yɛ 1991 lɛ, Soviet Union lɛ jwa, ni sɛɛ mli lɛ, Russia kɛ maji ni fata ehe lɛ batsɔ kooyigbɛ maŋtsɛ lɛ.

• Ŋmalɛi Yes. 61:1; Mal. 3:1; Luka 4:18

  Gbalɛ Yehowa baatsu ‘etsulɔ lɛ’ ni ‘eyasaa gbɛ’ dani ato Mesia Maŋtsɛyeli lɛ shishi. Kuu ni baasɔmɔ akɛ tsulɔ lɛ ‘baajaje sane kpakpa lɛ amɛhã mɛi ni he jɔ lɛ.’

  Emlibaa Kɛjɛ 1870 kɛyaa lɛ, C. T. Russell kɛ mɛi ni fata ehe lɛ kɛ hiɛdɔɔ gbála Biblia mli anɔkwalei amli amɛtsɔɔ mɛi. Kɛjɛ 1881 kɛyaa lɛ, amɛhã efee faŋŋ akɛ, esa akɛ Nyɔŋmɔ tsuji ashiɛ. Amɛkala saji tamɔ, “Aatao Shiɛlɔi 1,000” kɛ “Afɔ Amɛ Mu Ni Amɛshiɛ” lɛ yɛ Buu-Mɔɔ lɛ mli.

• Ŋmalɛ Mat. 13:24-30, 36-43

  Gbalɛ Henyɛlɔ ko baadu jwɛi efutu wiiti ni adu yɛ ŋmɔ ko mli, ni abaaŋmɛ jwɛi lɛ gbɛ ni eda. Jwɛi lɛ baaha wiiti lɛ nɔ kɛyashi nikpamɔ be lɛ. Yɛ nikpamɔ be lɛ mli lɛ, abaabua jwɛi lɛ naa kɛje wiiti lɛ teŋ.

  Emlibaa Kɛjɛ 1870 kɛyaa lɛ, nibii pii hã ebasoro anɔkwa Kristofoi kwraa yɛ amale Kristofoi ahe. Yɛ naagbee be lɛ mli lɛ, atse anɔkwa Kristofoi kɛje amale Kristofoi ahe, ni abua anɔkwa Kristofoi lɛ anaa awo Kristofoi asafo lɛ mli.

• Ŋmalɛ Dan. 2:31-33, 41-43

  Gbalɛ Dade amaga ko nanetokotai ni fã dade ni fã hu sũ lɛ.

  Emlibaa Sũ lɛ damɔ shi kɛhã mɛi ni yɔɔ nɔyelii enyɔ ni feɔ Anglo-Amerika Jeŋ Hewalɛ lɛ ashishi ni teɔ shi amɛwoɔ nɔyelii nɛɛ loo amɛkɛ amɛ tswaa. Mɛi nɛɛ ahewɔ lɛ, jeŋ hewalɛ nɛɛ, ni yɔɔ hewalɛ tamɔ dade lɛ, nyɛɛɛ atsu eyiŋtoi ahe nii jogbaŋŋ kɛmɔ shi.

• Ŋmalɛ Mat. 13:30; 24:14, 45; 28:19, 20

  Gbalɛ Abaabua “wiiti lɛ” naa awo ‘nitoohe lɛ,’ ni abaahala “nyɔŋ anɔkwafo kɛ hiɛshikalɔ lɛ” ato Nuŋtsɔ lɛ ‘webii lɛ’ anɔ. Abaashiɛ Maŋtsɛyeli lɛ he sane kpakpa lɛ “yɛ shikpɔŋ lɛ nɔ fɛɛ.”

  Emlibaa Yɛ 1919 lɛ, ahala nyɔŋ anɔkwafo lɛ ato Nyɔŋmɔ webii lɛ anɔ. Kɛjɛ nakai be lɛ kɛyaa lɛ, Biblia Kaselɔi lɛ bɔi shiɛmɔ waa fe tsutsu lɛ po. Ŋmɛnɛ lɛ, Yehowa Odasefoi miishiɛ yɛ maji ni fa fe 200 anɔ, ni amɛmiifee woji, vidioi, kɛ nibii krokomɛi ni akɛkaseɔ Biblia lɛ yɛ wiemɔi 1,000 kɛ sɛɛ amli.

• Ŋmalɛi Dan. 12:11; Kpo. 13:11, 14, 15

  Gbalɛ Kooloo awuiyelɔ ko ni yɔɔ akolontoi enyɔ lɛ baanyiɛ hiɛ ni afee ‘amaga ahã kooloo awuiyelɔ lɛ,’ ni ‘ekɛ kɔɔyɔɔ ni amuɔ baahã amaga lɛ.’

  Emlibaa Anglo-Amerika Jeŋ Hewalɛ lɛ nyiɛ hiɛ ni ato Jeŋmaji Akpaŋmɔ lɛ shishi. Maji krokomɛi fi gbɛjianɔtoo nɛɛ sɛɛ. Sɛɛ mli lɛ, kooyigbɛ maŋtsɛ lɛ hu kɛ ehe dɔmɔ Jeŋmaji Akpaŋmɔ lɛ, shi efee nakai kɛjɛ 1926 kɛyashi 1933. Sɛɛ mli lɛ, Jeŋmaji Ekomefeemɔ lɛ (UN) baye Jeŋmaji Akpaŋmɔ lɛ najiaŋ. Mɛi he amɛye akɛ Jeŋmaji Akpaŋmɔ lɛ kɛ toiŋjɔlɛ baaba jeŋ fɛɛ, ni nakai nɔŋŋ amɛhe amɛye yɛ UN lɛ he. Shi Nyɔŋmɔ Maŋtsɛyeli lɛ pɛ baanyɛ afee nakai.

• Ŋmalɛ Dan. 8:23, 24

  Gbalɛ Maŋtsɛ ko ni he yɔɔ gbeyei lɛ ‘baakpãtã nii ahiɛ waa diɛŋtsɛ.’

  Emlibaa Anglo-Amerika Jeŋ Hewalɛ lɛ kpãtã nii ahiɛ waa. Akɛ nɔkwɛmɔnɔ lɛ, be ni awuɔ Jeŋ Ta II lɛ, Amerika ŋmɛɛ okplɛmii enyɔ ni fiteɔ nii waa lɛ ahe eshwie maŋ ko ni wuɔ eshiɔ Anglo-Amerika Jeŋ Hewalɛ lɛ nɔ.

• Ŋmalɛi Dan. 11:31; Kpo. 17:3, 7-11

  Gbalɛ “Kooloo awuiyelɔ ko ni tsuɔ waa” ni yɔɔ akolontoi nyɔŋma lɛ baajɛ bu kwɔŋkwɔŋ lɛ mli eje kpo, ni ebaatsɔ maŋtsɛ ni ji kpaanyɔ. Yɛ Daniel wolo lɛ mli lɛ, atsɛ maŋtsɛ nɛɛ akɛ, “nyaŋemɔ nii ni kɛ amaŋfɔfeemɔ baa.”

  Emlibaa Be ni awuɔ Jeŋ Ta II lɛ, Jeŋmaji Akpaŋmɔ lɛ kpa nitsumɔ. Be ni ta lɛ ba naagbee lɛ, ato UN lɛ shishi. Bɔ ni mɛi he amɛye akɛ Jeŋmaji Akpaŋmɔ lɛ kɛ toiŋjɔlɛ baaba jeŋ fɛɛ lɛ, nakai nɔŋŋ amɛhe amɛye yɛ UN lɛ hu he. Shi Nyɔŋmɔ Maŋtsɛyeli lɛ pɛ baanyɛ ahã toiŋjɔlɛ aba jeŋ fɛɛ. UN lɛ baatutua amale jamɔ.

• Ŋmalɛi 1 Tes. 5:3; Kpo. 17:16

  Gbalɛ Jeŋmaji lɛ baakɛɛ akɛ “toiŋjɔlɛ kɛ shweshweeshwe,” ni “akolontoi nyɔŋma” lɛ kɛ “kooloo awuiyelɔ lɛ” baatutua “ashawo yoo lɛ” ni amɛbaakpãtã ehiɛ. No sɛɛ lɛ, abaakpãtã jeŋmaji lɛ ahiɛ.

  Emlibaa Jeŋmaji lɛ baakɛɛ akɛ amɛhã toiŋjɔlɛ eba je lɛŋ fɛɛ, ni mɛi yɛ shweshweeshwe. No sɛɛ lɛ, maji ni feɔ UN lɛ baakpãtã amale jamɔi fɛɛ ahiɛ. Enɛ baatsɔɔ akɛ amanehulu kpeteŋkpele lɛ eje shishi. Amanehulu kpeteŋkpele lɛ baaba naagbee kɛ́ akpãtã jeŋ fɔŋ nɛɛ hiɛ yɛ Harmagedon lɛ.

• Ŋmalɛi Eze. 38:11, 14-17; Mat. 24:31

  Gbalɛ Gog baafã kɛba Nyɔŋmɔ webii lɛ ashikpɔŋ lɛ nɔ. Ni ŋwɛibɔfoi lɛ ‘baabua halamɔbii lɛ anaa.’

  Emlibaa Kooyigbɛ maŋtsɛ lɛ kɛ je lɛŋ nɔyelii krokomɛi ni eshwɛ lɛ fɛɛ baafee ekome ni amɛtutua Nyɔŋmɔ webii lɛ. Kɛ́ tutuamɔ nɛɛ je shishi lɛ, abaabua mɛi ni afɔ amɛ mu lɛ ateŋ mɛi ni eshwɛ lɛ anaa kɛya ŋwɛi.

• Ŋmalɛi Eze. 38:18-23; Dan. 2:34, 35, 44, 45; Kpo. 6:2; 16:14, 16; 17:14; 19:20

  Gbalɛ ‘Mɔ ni ta okpɔŋɔ yɛŋ lɛ nɔ lɛ’ baagbe ekunimyeli lɛ naa kɛ́ ekpãtã Gog kɛ esraafoi lɛ ahiɛ. Abaashɛ “kooloo awuiyelɔ lɛ” awo “la kpaakpo” lɛ mli, ni abaajwara amaga wulu lɛ.

  Emlibaa Yesu, ni ji Nyɔŋmɔ Maŋtsɛyeli lɛ nɔ Maŋtsɛ lɛ baahere Nyɔŋmɔ webii lɛ ayiwala. Yesu, mɛi 144,000 ni baafata ehe kɛye nɔ akɛ maŋtsɛmɛi lɛ, kɛ ŋwɛibɔfoi lɛ baakpãtã jeŋmaji lɛ fɛɛ ahiɛ, ni no kɛ Satan je lɛ baaba naagbee.