1. Be ni okɛ mɛi bɔi Biblia lɛ mli sane gbaa lɛ, mɛni ekolɛ amɛteŋ mɛi pii fee ni hã onaa kpɛ ohe waa?

ANI okaiɔ bɔ ni onu he ohã be ni oyɔse akɛ ona anɔkwale lɛ? Onu nibii ni okaseɔ yɛ Biblia lɛ mli lɛ ashishi oya nɔŋŋ. Osusu akɛ mɔ fɛɛ mɔ baanya he. Ona akɛ kɛ́ amɛkase Biblia lɛ, ebaaye ebua amɛ yɛ shihilɛ mli bianɛ ni wɔsɛɛ hu lɛ, amɛbaaná shihilɛ kpakpa. (Lala 119:105) No hewɔ lɛ, ogba onanemɛi kɛ owekumɛi nibii ni okase lɛ. Shi mɛni ba? Amɛteŋ mɛi pii booo bo toi, ni enɛ hã onaa kpɛ ohe waa.

2-3. Te mɛi babaoo fee amɛnii amɛhã tɛŋŋ yɛ Yesu kɛ sane ni eshiɛ lɛ he?

² Kɛ́ wɔmiishiɛ wɔmiihã mɛi ni amɛbooo toi lɛ, esaaa akɛ efeɔ wɔ naakpɛɛ. Be ni Yesu yɔɔ shikpɔŋ lɛ nɔ lɛ, efee naakpɛɛ nii ni tsɔɔ faŋŋ akɛ Nyɔŋmɔ ni tsu lɛ, shi lɛ po diɛŋtsɛ lɛ, mɛi pii booo lɛ toi. Akɛ nɔkwɛmɔnɔ lɛ, etee Lazaro shi, ni enɛ ji naakpɛɛ nii ko ni mɛi ni teɔ shi amɛwoɔ lɛ lɛ po nyɛɛɛ aje he ŋwane. Shi fɛɛ sɛɛ lɛ, Yudafoi lɛ ahiɛnyiɛlɔi lɛ heee amɛyeee akɛ lɛ ji Mesia lɛ. Amɛshwe moŋ akɛ amɛgbe lɛ kɛ Lazaro fɛɛ.​—Yoh. 11:47, 48, 53; 12:9-11.

³ Yesu le akɛ mɛi pii heŋ amɛyeŋ akɛ lɛ ji Mesia lɛ. (Yoh. 5:39-44) Ekɛɛ Yohane Baptisilɔ lɛ kaselɔi komɛi akɛ: “Mɔ ni hãaa mihe sane ko atɔ̃tɔ enane lɛ yɛ miishɛɛ.” (Mat. 11:2, 3, 6) Mɛni hewɔ mɛi babaoo booo Yesu toi lɛ?

4. Mɛni he wɔbaasusu yɛ nikasemɔ nɛɛ mli?

⁴ Yɛ nikasemɔ nɛɛ kɛ nɔ ni nyiɛ sɛɛ lɛ mli lɛ, wɔbaakwɛ yiŋtoi ahewɔ ni mɛi pii ni hi shi yɛ Yesu beiaŋ lɛ heee enɔ  amɛyeee lɛ. Agbɛnɛ hu, wɔbaakwɛ nɔ hewɔ ni ŋmɛnɛ lɛ, mɛi babaoo booo sane ni wɔshiɛɔ lɛ toi lɛ. Nɔ ni fe fɛɛ lɛ, wɔbaakwɛ nɔ ni esa akɛ wɔfee koni wɔná hemɔkɛyeli ni mli wa yɛ Yesu mli koni wɔnane akatɔ̃tɔ.

5. Mɛni hewɔ ekolɛ no mli lɛ mɛi komɛi heee amɛyeee akɛ Yesu ji Mesia lɛ?

⁵ Mɛi babaoo booo Yesu toi yɛ he ni ejɛ lɛ hewɔ. Amɛle akɛ Yesu tsɔɔ nii waa ni efeɔ naakpɛɛ nii hu. Shi amɛbu lɛ akɛ kapintafonyo ohiafo ko bi kɛkɛ. Agbɛnɛ hu, ejɛ Nazaret, ni ji maŋ ko ni ekolɛ mɛi babaoo ebuuu lɛ tsɔ lɛ mli. Natanael ni sɛɛ mli lɛ ebatsɔ Yesu kaselɔ lɛ po wie akɛ: “Ani nɔ ko kpakpa ko baanyɛ ajɛ Nazaret?” (Yoh. 1:46) Ekolɛ Natanael ebuuu maŋ mli ni Yesu yɔɔ yɛ nakai beiaŋ lɛ. Aloo ekolɛ gbalɛ ni yɔɔ Mika 5:2 ni tsɔɔ akɛ abaafɔ Mesia lɛ yɛ Betlehem shi jeee Nazaret lɛ ni yɔɔ ejwɛŋmɔ mli.

6. Mɛni kulɛ ebaanyɛ eye ebua mɛi ni hi shi yɛ Yesu beiaŋ lɛ, koni amɛnyɛ amɛna akɛ lɛ ji Mesia lɛ?

⁶ Mɛni no mli lɛ Hebri Ŋmalɛ lɛ ewie? Gbalɔ Yesaia gba akɛ, Yesu henyɛlɔi lɛ gbaŋ amɛhe naa “yɛ eyinɔ he saji lɛ ahe.” (Yes. 53:8) No hewɔ lɛ, eyɛ mli akɛ mɛi le Yesu he gbalɛi momo, shi amɛgbaaa amɛhe naa ni amɛbaatao Yesu he saji fɛɛ fitsofitso ni amɛkɛto gbalɛi nɛɛ ahe. Eji amɛfee nakai kulɛ, amɛbaana akɛ afɔ lɛ yɛ Betlehem, ni ejɛ Maŋtsɛ David weku lɛ mli. (Luka 2:4-7) No hewɔ lɛ, afɔ Yesu yɛ he ni Mika 5:2 lɛ gba akɛ abaafɔ lɛ yɛ lɛ pɛpɛɛpɛ. Kɛ́ nakai ni lɛ, mɛni hewɔ amɛyooo akɛ Yesu ji Mesia lɛ? Amɛyaye amɛhe oyai kɛmu sane naa yɛ gbɛ ni ejaaa nɔ, ejaakɛ no mli lɛ amɛleee Yesu jogbaŋŋ. Enɛ hewɔ ni amɛheee amɛyeee akɛ Yesu ji Mesia lɛ.

7. Ŋmɛnɛ lɛ, mɛni hewɔ mɛi babaoo sumɔɔɔ ni amɛboɔ Yehowa Odasefoi lɛ atoi lɛ?

⁷ Ani nakai nɔŋŋ eji ŋmɛnɛ? Hɛɛ! Yehowa Odasefoi babaoo jeee niiatsɛmɛi loo mɛi titri yɛ shihilɛ mli. Enɛ hewɔ lɛ, mɛi buɔ amɛ akɛ “mɛi ni leee woloŋ kɛ mɛi foji kɛkɛ.” (Bɔf. 4:13) Mɛi komɛi nuɔ he akɛ akɛni wɔyako osɔfoi askul hewɔ lɛ, wɔnyɛŋ wɔtsɔɔ mɛi Biblia lɛ. Mɛi komɛi hu wieɔ akɛ Yehowa Odasefoi lɛ ajamɔ lɛ ji “Amerikabii ajamɔ.” Shi anɔkwa sane lɛ ji, kɛ́ obua Odasefoi kpawo naa lɛ, amɛteŋ mɔ kome pɛ ni yɔɔ United States. Alaka mɛi komɛi hu akɛ Odasefoi lɛ heee Yesu nɔ amɛyeee. Afii babaoo nɛ lɛ, mɛi ená susumɔi srɔtoi yɛ wɔhe. Mɛi komɛi kɛɛ wɔgbalaa wekumɛi ateŋ. Mɛi komɛi hu kɛɛ wɔyitseiaŋ wala. Ni mɛi komɛi hu kɛɛ wɔyɛ nɔ ko ko tsɔ. No hewɔ lɛ, akɛni mɛi ni akɛɛ amɛ saji ni tamɔ nɛkɛ yɛ wɔhe lɛ leee wɔ jogbaŋŋ hewɔ lɛ, amɛsumɔɔɔ ni amɛboɔ wɔ toi.

8. Yɛ nɔ ni aŋma yɛ Bɔfoi 17:11 lɛ naa lɛ, kɛ́ mɛi miitao amɛle mɛi ni ji Nyɔŋmɔ tsuji ŋmɛnɛ lɛ, mɛni esa akɛ amɛfee?

⁸ Mɛni esa akɛ mɔ ko afee koni enane akatɔ̃tɔ? Esa akɛ mɛi ale nɔ fɛɛ nɔ mli anɔkwa saji. Nakai pɛpɛɛpɛ Sanekpakpa ŋmalɔ Luka fee. ‘Ekɔ efɔ̃ enɔ akɛ ebaatao nibii fɛɛ amli fitsofitso kɛjɛ shishijee.’ Eetao ni mɛi ni baakane ewolo lɛ aná ale akɛ nibii ni amɛnu yɛ Yesu he lɛ “ji anɔkwale shiishi.” (Luka 1:1-4) Yudafoi ni hi shi yɛ Beroia lɛ hu fee amɛnii tamɔ Luka. Be ni amɛnu Yesu he sane kpakpa lɛ, amɛtao Hebri Ŋmalɛ lɛ mli jogbaŋŋ koni amɛkwɛ akɛ nibii ni atsɔɔ amɛ lɛ yɛ mli nakai lo. (Kanemɔ Bɔfoi 17:11.) Nakai nɔŋŋ esa akɛ mɛi atao nibii amli fitsofitso. Esa akɛ amɛkɛ nibii ni atsɔɔ amɛ lɛ ato nibii ni yɔɔ  Biblia lɛ mli lɛ ahe. Agbɛnɛ hu, esa akɛ amɛkase nibii ni Yehowa Odasefoi efee yɛ ŋmɛnɛŋmɛnɛ beiaŋ lɛ ahe nii jogbaŋŋ. Kɛ́ mɛi tao nibii amli jogbaŋŋ lɛ, no lɛ amɛhãŋ nibii ni amɛnuɔ yɛ Yehowa Odasefoi ahe lɛ atɔ̃tɔ amɛnane.

9. Be ni Yesu efeee okadi ko ni jɛ ŋwɛi etsɔɔɔ mɛi lɛ, te amɛmu sane naa amɛhã tɛŋŋ yɛ ehe?

⁹ Nibii ni Yesu tsɔɔ mɛi lɛ anɔ bɛ. Shi mɛi ni hi shi yɛ ebeiaŋ lɛ ateŋ mɛi komɛi nu he akɛ anyɛŋ adamɔ no pɛ nɔ akɛɛ akɛ lɛ ji Mesia lɛ. Amɛnu he akɛ esa akɛ efee nibii krokomɛi kɛfata he. Amɛbi lɛ koni efee “okadi ko ni jɛ ŋwɛi” etsɔɔ amɛ koni amɛna akɛ lɛ ji Mesia lɛ. (Mat. 16:1) Eeenyɛ efee akɛ nɔ ni awie yɛ Daniel 7:13, 14 lɛ hewɔ amɛbi lɛ nakai lɛ. Shi no mli lɛ, be shɛko ni Yehowa baahã nakai gbalɛ lɛ aba mli. No hewɔ lɛ, kulɛ nɔ ni Yesu tsɔɔ mɛi lɛ nɔŋŋ po kɛkɛ baanyɛ ahã amɛna akɛ lɛ ji Mesia lɛ. Shi be ni ehãaa amɛ okadi ni amɛtaoɔ lɛ, amɛheee amɛyeee akɛ lɛ ji Mesia lɛ.​—Mat. 16:4.

10. Mɛni Yesu fee ni hã nɔ ni Yesaia gba yɛ Mesia lɛ he lɛ ba mli?

¹⁰ Mɛni no mli lɛ Hebri Ŋmalɛ lɛ ewie? Gbalɔ Yesaia lɛ wie yɛ Mesia lɛ he akɛ: “Ebolɔŋ ni ewoŋ egbee nɔ, ni ehãŋ anu egbee yɛ gbɛjegbɛ lɛ nɔ.” (Yes. 42:1, 2) Yesu tsuuu eshiɛmɔ nitsumɔ lɛ yɛ gbɛ ni baahã mɛi agbala amɛjwɛŋmɔ kɛba enɔ lɛ nɔ. Emamɔɔɔ sɔlemɔtsui, ewooo atadei krɛdɛi, ni ehãaa mɛi kɛ gbɛ́i wuji atsɛ lɛ. Be ni Yesu damɔ Maŋtsɛ Herode hiɛ ni ayeɔ esane lɛ, efeee naakpɛɛ nii ko koni ekɛsa Herode hiɛ, eyɛ mli akɛ Herode baanyɛ abu lɛ gbele fɔ. (Luka 23:8-11) Eyɛ mli akɛ Yesu fee naakpɛɛ nii komɛi moŋ, shi nɔ titri ni etsu ji shiɛmɔ nitsumɔ lɛ. Ekɛɛ ekaselɔi lɛ akɛ: “Enɛ hewɔ miba.”​—Mar. 1:38.

11. Mɛɛ susumɔi ni ejaaa mɛi hiɛ ŋmɛnɛ?

¹¹ Ani nakai nɔŋŋ eji ŋmɛnɛ? Hɛɛ! Ŋmɛnɛ lɛ, kɛ́ mɛi na sɔlemɔtsui wujiwuji ni akɛ nibii ni jara wala esaa mli kɛ osɔfoi ni hiɛ  gbɛ́i wujiwuji lɛ, nomɛi amɛsumɔɔ. Agbɛnɛ hu, amɛnyaa jamɔŋ nifeemɔi komɛi ahe, ni amɛjwɛŋŋ nɔ hewɔ ni afeɔ nifeemɔi nɛɛ ahe, ni egbaaa amɛnaa kɛji eteɔ shi ewoɔ Biblia lɛ po. Shi atsɔɔɔ mɛi ni kɛ amɛhe woɔ jamɔŋ nifeemɔi nɛɛ amli lɛ Nyɔŋmɔ kɛ eyiŋtoi lɛ ahe nii. Shi mɛi ni baa wɔ-Kristofoi akpeei lɛ ashishi lɛ kaseɔ nɔ ni Yehowa miisumɔ ni wɔfee. Akɛ nibii ni jara wala esako wɔ-Maŋtsɛyeli Asai lɛ amli, shi amɛnɔ tse. Akɛ gbɛ́i wuji tsɛɛɛ mɛi ni nyiɛ hiɛ yɛ asafo lɛ mli lɛ, ni amɛwooo atadei srɔto ko. Nibii ni wɔtsɔɔ kɛ nibii ni wɔheɔ wɔyeɔ lɛ fɛɛ jɛ Biblia lɛ mli. Ni kɛ̃lɛ, ŋmɛnɛ lɛ, mɛi pii booo wɔ toi ejaakɛ amɛsusuɔ akɛ wɔjamɔ lɛ eŋɔɔɔ, ni nibii ni wɔtsɔɔ lɛ eŋɔɔɔ amɛtoi naa.

12. Tamɔ bɔ ni wɔnaa yɛ Hebribii 11:1, 6 lɛ, mɛni kɛ́ wɔfee lɛ wɔhemɔkɛyeli lɛ mli baawa?

¹² Mɛni esa akɛ wɔfee koni wɔnane akatɔ̃tɔ? Bɔfo Paulo kɛɛ Kristofoi ni yɔɔ Roma lɛ akɛ: “Hemɔkɛyeli nyiɛɔ nɔ ni anuɔ lɛ sɛɛ kɛbaa. Ni nɔ ni anuɔ lɛ hu tsɔɔ Kristo he wiemɔ lɛ nɔ kɛbaa.” (Rom. 10:17) No hewɔ lɛ, nɔ ni hãa wɔhemɔkɛyeli mli waa ji Biblia lɛ ni wɔbaakase, shi jeee gbijurɔyelii ni Biblia lɛ fĩii sɛɛ lɛ ni wɔbaaye ekɔɔɔ he eko bɔ ni amɛ yeli ŋɔɔ hã. Esa akɛ wɔkase Biblia lɛ jogbaŋŋ koni wɔhemɔkɛyeli lɛ mli awa, ejaakɛ “kɛ́ hemɔkɛyeli bɛ lɛ, anyɛŋ asa Nyɔŋmɔ hiɛ jogbaŋŋ.” (Kanemɔ Hebribii 11:1, 6.) No hewɔ lɛ, jeee ja wɔna okadi ko ni jɛ ŋwɛi dani wɔbaana akɛ wɔna anɔkwale lɛ. Shi kɛ́ wɔkase Biblia lɛ jogbaŋŋ lɛ, ebaahã wɔna akɛ anɔkwale lɛ mli wɔyɔɔ lɛ, ni ehãŋ wɔyiŋ afee wɔ kɔshikɔshi.

13. Mɛni hewɔ mɛi pii sumɔɔɔ Yesu sane lɛ?

¹³ Yɛ Yesu beiaŋ lɛ, Yohane Baptisilɔ lɛ kaselɔi lɛ anaa kpɛ amɛhe akɛ Yesu kaselɔi lɛ ehiii ŋmaa. Yesu kɛɛ amɛ akɛ, bei abɔ ni eyɔɔ wala mli nɛɛ ehe ehiaaa ni ekaselɔi lɛ hiɔ ŋmaa. (Mat. 9:14-17) Shi fɛɛ sɛɛ lɛ,  Farisifoi lɛ kɛ mɛi krokomɛi ni teɔ shi amɛwoɔ lɛ lɛ wie amɛshi lɛ akɛni ekɛ ehe wooo amɛkusumii lɛ amli lɛ hewɔ. Amɛmli fu lɛ be ni etsa mɛi yɛ Hejɔɔmɔ Gbi lɛ nɔ. (Mar. 3:1-6; Yoh. 9:16) Amɛshi amɛtsitsi akɛ amɛyeɔ Hejɔɔmɔ Gbi lɛ; shi amɛ nɔŋŋ lɛ, amɛyeɔ jara yɛ sɔlemɔ shĩa lɛ. Be ni Yesu wie eshi jara ni amɛyeɔ yɛ sɔlemɔ shĩa lɛ, amɛmli fu lɛ waa. (Mat. 21:12, 13, 15) Be ni Yesu kɛ mɛi ni eshiɛɔ ehãa yɛ kpeehe lɛ yɛ Nazaret lɛ to mɛi komɛi ni hi shi yɛ blema lɛ he koni amɛna akɛ amɛmiifó amɛ pɛ amɛnɔ mli ni amɛbɛ hemɔkɛyeli lɛ, amɛmli fu lɛ waa. (Luka 4:16, 25-30) Akɛni Yesu efeee enii tamɔ bɔ ni amɛkpaa gbɛ lɛ hewɔ lɛ, amɛsumɔɔɔ esane.​—Mat. 11:16-19.

14. Mɛni hewɔ Yesu wie eshi adesai akusumii ni kɛ Ŋmalɛ lɛ kpãaa gbee lɛ?

¹⁴ Mɛni no mli lɛ Hebri Ŋmalɛ lɛ ewie? Yehowa kɛ emumɔ lɛ tsirɛ gbalɔ Yesaia ni ewie akɛ: “Maŋ nɛɛ baa miŋɔɔ kɛ amɛnaabu ni amɛkɛ amɛnaabu woɔ mihiɛ nyam, shi amɛtsui kɛ mi teŋ jekɛ waa; ni amɛsheɔ mi gbeyei yɛ gbɔmɛi akitãi ni atsɔɔ amɛ lɛ hewɔ.” (Yes. 29:13) No hewɔ lɛ, Yesu sane ja akɛ ewie eshi adesai akusumii ni kɛ Ŋmalɛ lɛ kpãaa gbee lɛ. Mɛi ni bu adesai akusumii akɛ amɛhe hiaa fe Ŋmalɛ lɛ kpoo Yehowa kɛ mɔ ni etsu akɛ Mesia lɛ.

15. Mɛni hewɔ mɛi babaoo sumɔɔɔ Yehowa Odasefoi asane lɛ?

¹⁵ Ani nakai nɔŋŋ eji ŋmɛnɛ? Hɛɛ! Kɛ́ mɛi miiye amɛfɔmɔ gbi loo Blonya loo gbii juji krokomɛi ni kɛ Biblia lɛ kpãaa gbee ni Yehowa Odasefoi kɛ amɛhe wooo mli lɛ, kɛkɛ lɛ amɛmli efu. Mɛi komɛi hu amli fuɔ kɛ́ Yehowa Odasefoi kɛ amɛhe wooo gbii juji ni tsɔɔ maŋhedɔɔ loo yarafeemɔ kusumii ni kɛ Biblia lɛ kpãaa gbee lɛ amli. Ekolɛ, mɛi ni tamɔ nɛkɛ lɛ nuɔ he akɛ amɛmiijá Nyɔŋmɔ yɛ gbɛ ni esumɔɔ lɛ nɔ. Shi akɛni amɛsumɔɔ je lɛ kusumii moŋ fe Biblia lɛ mli tsɔɔmɔi ni amɛkɛbaatsu nii lɛ hewɔ lɛ, amɛjamɔ lɛ esaaa ehiɛ.​—Mar. 7:7-9.

16. Yɛ nɔ ni aŋma yɛ Lala 119:97, 113, 163-165 lɛ naa lɛ, mɛni esa akɛ wɔfee, ni mɛni esaaa akɛ wɔfeɔ?

¹⁶ Mɛni esa akɛ wɔfee koni wɔnane akatɔ̃tɔ? Esa akɛ wɔsumɔ Yehowa mlai lɛ kɛ eshishitoo mlai lɛ waa. (Kanemɔ Lala 119:97, 113, 163-165.) Kɛ́ wɔsumɔɔ Yehowa lɛ, wɔkɛ wɔhe woŋ kusumii ni esaaa ehiɛ lɛ amli. Esaaa akɛ wɔhãa nɔ ko nɔ ko he hiaa wɔ fe Yehowa suɔmɔnaa nii ni wɔbaafee.

17. Mɛni Yudafoi lɛ ateŋ mɛi pii susu akɛ Mesia lɛ baafee?

¹⁷ Mɛi komɛi ni hi shi yɛ Yesu beiaŋ lɛ shwe ni atsake nɔyeli lɛ. Amɛsusu akɛ Mesia lɛ baahã amɛye amɛhe kɛjɛ Roma nɔyeli lɛ ni yeɔ amɛnɔ dɛŋdɛŋ lɛ shishi. Shi be ni amɛka akɛ amɛbaawó Yesu maŋtsɛ lɛ, ekpoo. (Yoh. 6:14, 15) No mli lɛ, osɔfoi lɛ kɛ mɛi krokomɛi hu susuɔ akɛ Yesu baato nɔyeli ko ni baabaye Roma nɔyeli lɛ najiaŋ. Ni kɛ́ ebalɛ nakai lɛ, Romabii lɛ amli baafu osɔfoi lɛ, ni amɛbaashɔ̃ hegbɛi ni amɛhã amɛ lɛ kɛje amɛdɛŋ. Saji nɛɛ ahewɔ lɛ, Yudafoi lɛ ateŋ mɛi pii sumɔɔɔ Yesu sane.

18. Mɛɛ gbalɛi ni kɔɔ Mesia lɛ he mɛi pii ku amɛhiɛ amɛshwie nɔ?

¹⁸ Mɛni no mli lɛ Hebri Ŋmalɛ lɛ ewie? Eyɛ mli akɛ Mesia lɛ he gbalɛi pii tsɔɔ akɛ ekɛ ehenyɛlɔi baawu ni eye amɛnɔ kunim moŋ, shi gbalɛi krokomɛi tsɔɔ akɛ klɛŋklɛŋ lɛ, ebaagbo yɛ wɔhe eshai lɛ ahewɔ. (Yes. 53:9, 12) No hewɔ lɛ, mɛni hewɔ Yudafoi lɛ ateŋ mɛi pii ná susumɔi ni ejaaa yɛ Mesia lɛ he lɛ? Nɔ hewɔ lɛ ji, amɛku amɛhiɛ amɛshwie  gbalɛi ni tsuŋ naagbai ni amɛkɛkpeɔ lɛ ahe nii amrɔ nɔŋŋ lɛ anɔ.​—Yoh. 6:26, 27.

19. Mɛɛ susumɔi ni ejaaa mɛi pii hiɛ yɛ wɔhe ni no hewɔ amɛsumɔɔɔ wɔsane lɛ?

¹⁹ Ani nakai nɔŋŋ eji ŋmɛnɛ? Hɛɛ! Ŋmɛnɛ hu lɛ, akɛni wɔkɛ wɔhe wooo pɔlitis kɛ maŋ saji amli hewɔ lɛ, mɛi pii sumɔɔɔ wɔsane. Amɛsusuɔ akɛ esa akɛ wɔfɔ̃ oshiki. Shi wɔ lɛ wɔle akɛ kɛ́ wɔhala adesa ko akɛ wɔnɔyelɔ lɛ, belɛ wɔmiikpoo Yehowa. (1 Sam. 8:4-7) Mɛi komɛi hu susuɔ akɛ kulɛ esa akɛ wɔmamɔ skul kɛ helatsamɔhei ni wɔfee nibii krokomɛi kɛye wɔbua mɛi. Shi akɛni wɔfeee nibii nɛɛ ni mɛi susuɔ akɛ no baatsu naagbai ni amɛkɛkpeɔ lɛ ahe nii shi moŋ wɔkɛ wɔjwɛŋmɔ maa shiɛmɔ nitsumɔ lɛ nɔ hewɔ lɛ, amɛsumɔɔɔ wɔsane.

20. Yɛ nɔ ni Yesu wie yɛ Mateo 7:21-23 lɛ naa lɛ, mɛni nɔ titri esa akɛ wɔkɛ wɔjwɛŋmɔ ama?

²⁰ Mɛni esa akɛ wɔfee koni wɔnane akatɔ̃tɔ? (Kanemɔ Mateo 7:21-23.) Esa akɛ wɔkɛ wɔjwɛŋmɔ ama nitsumɔ ni Yesu efã wɔ akɛ wɔtsu lɛ nɔ. (Mat. 28:19, 20) Esaaa akɛ wɔfiteɔ wɔbe yɛ pɔlitis kɛ maŋ saji ahe. Wɔsumɔɔ mɛi, ni naagbai ni amɛkɛkpeɔ lɛ haoɔ wɔ waa. Shi wɔle akɛ nɔ ni hi fe fɛɛ ni wɔbaanyɛ wɔfee kɛye wɔbua amɛ ji, ni wɔbaatsɔɔ amɛ Nyɔŋmɔ Maŋtsɛyeli lɛ he nii, ni wɔye wɔbua amɛ ni amɛkɛ Yehowa abɔ naanyo.

21. Mɛni esa akɛ wɔtswa wɔfai shi akɛ wɔbaafee?

²¹ Wɔsusu nibii ejwɛ ni hãaa mɛi ni hi shi yɛ Yesu beiaŋ lɛ asumɔ esane ni ŋmɛnɛ hu lɛ ehãaa mɛi asumɔ wɔsane lɛ ahe yɛ nikasemɔ nɛɛ mli. Shi ani nibii nɛɛ pɛ baanyɛ atɔ̃tɔ wɔnane? Yɛ nikasemɔ ni nyiɛ sɛɛ lɛ mli lɛ, wɔbaasusu nibii ejwɛ krokomɛi ni baanyɛ atɔ̃tɔ wɔnane lɛ ahe. Nyɛhãa wɔtswaa wɔfai shi akɛ, wɔbaahã wɔhemɔkɛyeli lɛ mli awa koni nɔ ko nɔ ko akatɔ̃tɔ wɔnane!