1-2. Mɛni woloŋmalɔ ko wie? Ni mɛni he wɔbaasusu yɛ nikasemɔ nɛɛ mli?

ŊMƐNƐ lɛ, mɛi akpekpei abɔ kɛɔ akɛ amɛheɔ Yesu nɔ amɛyeɔ, shi amɛkɛ nibii ni etsɔɔ lɛ tsuuu nii. (2 Tim. 4:3, 4) Be ko lɛ, woloŋmalɔ ko ŋma akɛ: “Ŋmɛnɛ lɛ, eji mɔ ko yɛ wɔteŋ ni feɔ enii tamɔ Yesu, ni wieɔ nibii bɔ ni Yesu wie lɛ lɛ pɛpɛɛpɛ kulɛ . . . , ani wɔbaabo lɛ toi? . . . Hetoo lɛ ji, dabi. Bɔ ni mɛi ni hi shi yɛ Yesu beiaŋ lɛ booo lɛ toi lɛ, nakai nɔŋŋ kulɛ wɔ hu wɔboŋ lɛ toi.”

² Mɛi ni hi shi yɛ Yesu beiaŋ lɛ ateŋ mɛi babaoo nu nibii ni etsɔɔ lɛ, ni amɛna naakpɛɛ nii ni efee lɛ, shi amɛheee enɔ amɛyeee. Mɛni hewɔ? Yɛ nikasemɔ ni tsɔ hiɛ lɛ mli lɛ, wɔsusu yiŋtoi ejwɛ ahewɔ ni mɛi booo Yesu toi yɛ nibii ni ewie kɛ nibii ni efee lɛ ahewɔ lɛ ahe. Yɛ nikasemɔ nɛɛ mli lɛ, wɔbaasusu yiŋtoi ejwɛ krokomɛi hu ahe. Agbɛnɛ hu, wɔbaana nɔ hewɔ ni ŋmɛnɛ lɛ mɛi booo Yesu sɛɛnyiɛlɔi lɛ toi kɛ nɔ ni wɔbaafee koni wɔnane akatɔ̃tɔ.

3. Mɛni Yesu fee ni hãaa mɛi komɛi asumɔ esane?

³ Be ni Yesu yɔɔ shikpɔŋ lɛ nɔ lɛ, ekɛ mɛi srɔtoi bɔ. Ekɛ niiatsɛmɛi kɛ mɛi ni yɔɔ hegbɛi wuji ye nii, shi ekɛ ohiafoi kɛ mɛi ni bɛ yelikɛbualɔ ko lɛ hu bɔ. Agbɛnɛ hu, emusuŋ tsɔ lɛ yɛ mɛi ni abuɔ amɛ akɛ “eshafeelɔi” lɛ ahe. Mɛi komɛi ni buɔ amɛhe jalɔi lɛ eyasumɔɔɔ Yesu sane yɛ mɛi srɔtoi ni ekɛbɔ lɛ hewɔ. Amɛbi Yesu kaselɔi lɛ akɛ: “Mɛni hewɔ nyɛkɛ toohelɔi kɛ eshafeelɔi yeɔ nii ni nyɛkɛ amɛ nuɔ nii lɛ?” Yesu hã amɛ hetoo akɛ: “Mɛi ni yɔɔ hewalɛ lɛ, datrɛfonyo he  ehiaaa amɛ, shi mɛi ni bɛ hewalɛ lɛ moŋ ehe hiaa. Mibaaa jalɔi atsɛmɔ, shi moŋ eshafeelɔi kɛhã tsuitsakemɔ.”​—Luka 5:29-32.

4. Yɛ nɔ ni gbalɔ Yesaia gba lɛ naa lɛ, kulɛ mɛni esa akɛ Yudafoi lɛ ale yɛ Mesia lɛ he?

⁴ Mɛni no mli lɛ Hebri Ŋmalɛ lɛ ewie? Afii pii dani Mesia lɛ ba lɛ, gbalɔ Yesaia wie yɛ ehe akɛ, mɛi pii sumɔŋ esane. Egba akɛ: “Anyaŋe lɛ, ni gbɔmɛi tsi amɛhe kɛje ehe . . . Etamɔ nɔ ni akɛ ehiɛ etee wɔ. Anyaŋe lɛ, ni wɔbuuu lɛ wɔhãaa nɔ ko.” (Yes. 53:3) Gbalɛ nɛɛ tsɔɔ faŋŋ akɛ, mɛi baatsi amɛhe kɛje Mesia lɛ he. No hewɔ lɛ, kulɛ esaaa akɛ efeɔ Yudafoi ni hi shi yɛ Yesu beiaŋ lɛ naakpɛɛ akɛ mɛi pii sumɔɔɔ Yesu sane.

5. Te mɛi pii buɔ Yesu sɛɛnyiɛlɔi lɛ amɛhãa tɛŋŋ?

⁵ Ani nakai nɔŋŋ eji ŋmɛnɛ? Hɛɛ. Osɔfoi pii kɛ miishɛɛ hereɔ mɛi ni ehe gbɛ́i, niiatsɛmɛi, kɛ mɛi ni abuɔ amɛ akɛ nilelɔi yɛ je lɛ mli lɛ kɛbaa amɛsɔlemɔi lɛ amli. Bei pii lɛ, mɛi ni tamɔ nɛkɛ lɛ feɔ nibii ni Nyɔŋmɔ sumɔɔɔ, shi egbaaa osɔfoi nɛɛ anaa. Nɛkɛ osɔfoi nɛɛ nɔŋŋ lɛ, kɛ́ amɛna Yehowa webii ni kɛ ekãa miifee esuɔmɔnaa nii ni baa amɛjeŋ jogbaŋŋ lɛ, amɛhe woɔ amɛmli la, ejaakɛ mɛi ebuuu Yehowa webii lɛ akɛ gbɔmɛi wuji. Tamɔ bɔ ni Paulo wie lɛ, ‘Nyɔŋmɔ lɛ, mɛi ni je lɛ nyaŋeɔ lɛ moŋ ehalaa.’ (1 Kor. 1:26-29) Yehowa tsuji anɔkwafoi fɛɛ ajara wa hã lɛ.

6. Yɛ nɔ ni Yesu wie yɛ Mateo 11:25, 26 lɛ naa lɛ, te enaa halamɔ ni e-Tsɛ lɛ halaa mɛi ni baa amɛhe shi ni ekɛ amɛ tsuɔ nii lɛ ehãa tɛŋŋ? Ni te wɔbaafee tɛŋŋ wɔkase lɛ?

⁶ Mɛni esa akɛ wɔfee koni wɔnane akatɔ̃tɔ? (Kanemɔ Mateo 11:25, 26.) Kaana Nyɔŋmɔ webii lɛ tamɔ bɔ ni mɛi ni yɔɔ je lɛ mli lɛ naa amɛ lɛ. Be fɛɛ be lɛ, hã ehi ojwɛŋmɔ mli akɛ, mɛi ni baa amɛhe shi pɛ Yehowa kɛtsuɔ nii. (Lala 138:6) Jwɛŋmɔ nibii abɔ ni Yehowa enyɛ etsɔ mɛi ni je lɛ ebuuu amɛ akɛ hiɛshikalɔi loo nilelɔi lɛ anɔ etsu lɛ nɔ.

7. Mɛni hewɔ Yesu tsɛ Farisifoi lɛ akɛ osatofoi lɛ? Ni te amɛfee amɛnii amɛhã tɛŋŋ?

⁷ Yesu fee ekãa ni ewie eshi jamɔŋ hiɛnyiɛlɔi ni yɔɔ ebeiaŋ lɛ yɛ nibii ni esaaa Nyɔŋmɔ hiɛ ni amɛfeɔ lɛ ahewɔ. Akɛ nɔkwɛmɔnɔ lɛ, Yesu tsɛ Farisifoi lɛ osatofoi, ejaakɛ bɔ ni esa akɛ mɔ afɔ edɛ̃ ahã lɛ he hia amɛ fe bɔ ni esa akɛ mɔ akwɛ efɔlɔi ahã. (Mat. 15:1-11) Ekolɛ Yesu kaselɔi lɛ anaa kpɛ amɛhe yɛ nibii ni ewie eshi Farisifoi lɛ hewɔ. No hewɔ lɛ, amɛbi lɛ akɛ: “Ani ole akɛ be ni Farisifoi lɛ nu nɔ ni owie lɛ ewo amɛmli la (loo “ehã amɛnane tɔ̃tɔ”)?” Yesu here nɔ ekɛɛ: “Tso fɛɛ tso ni jeee miŋwɛi Tsɛ lɛ du lɛ, abaafã. Nyɛkafoa amɛdaaŋ. Gbɛtsɔɔlɔi shwilafoi ji amɛ. Kɛ́ shwilafo tsɔɔ shwilafo gbɛ lɛ, amɛyi enyɔ lɛ fɛɛ amɛbaayagbee bu mli.” (Mat. 15:12-14, shn.) Jamɔŋ hiɛnyiɛlɔi lɛ amli fu Yesu waa yɛ nibii ni etsɔɔ lɛ hewɔ. Shi no hãaa Yesu amua enaa ni ekawie anɔkwale lɛ.

8. Mɛɛ gbɛ nɔ Yesu hã ana akɛ jeee nibii fɛɛ ni jamɔŋ hiɛnyiɛlɔi lɛ tsɔɔ lɛ ni sa Nyɔŋmɔ hiɛ?

⁸ Yesu kpa amale tsɔɔmɔi hu ahe mama. Ehã ana akɛ, jeee nibii fɛɛ ni jamɔŋ hiɛnyiɛlɔi lɛ tsɔɔ lɛ ni sa Nyɔŋmɔ hiɛ. Ewie akɛ, ‘mɛi babaoo baatsɔ gbɛ ni lɛɛ ni kɛ mɔ yaa hiɛkpatamɔ mli lɛ nɔ. Ni mɛi fioo pɛ baatsɔ gbɛ ni elɛɛɛ ni kɛ mɔ yaa wala mli lɛ nɔ.’ (Mat. 7:13, 14) Ehã efee faŋŋ akɛ, mɛi komɛi baakɛɛ amɛmiijá Nyɔŋmɔ, shi yɛ anɔkwale mli lɛ, jeee lɛ amɛjáa lɛ. Ebɔ ekaselɔi lɛ kɔkɔ akɛ: “Nyɛkwɛa nyɛhe nɔ jogbaŋŋ yɛ amale gbalɔi lɛ ahe, ejaakɛ amɛkɛ gwantɛŋ hewolo haa amɛhe kɛbaa nyɛŋɔɔ, shi amɛmligbɛ lɛ amɛji ŋa mli gbei ni yeɔ nii hwaŋhwaŋ. Amɛyibii lɛ nyɛkɛbaayoo amɛ.”​—Mat. 7:15-20.

9. Mɛni ji nibii komɛi ni jamɔŋ hiɛnyiɛlɔi lɛ tsɔɔ ni Yesu hã ana akɛ ejaaa?

 ⁹ Mɛni no mli lɛ Hebri Ŋmalɛ lɛ ewie? Biblia lɛ gba akɛ ‘Yehowa shĩa lɛ he hiɛdɔɔ lɛ baatso yɛ Mesia lɛ mli tamɔ la.’ (Lala 69:9; Yoh. 2:14-17) Hiɛdɔɔ nɛɛ ni tsirɛ Yesu ni ehã ana akɛ nibii ni jamɔŋ hiɛnyiɛlɔi lɛ tsɔɔ kɛ nibii ni amɛfeɔ lɛ ejaaa. Akɛ nɔkwɛmɔnɔ lɛ, Farisifoi lɛ tsɔɔ akɛ kɛ́ mɔ ko gbo lɛ, susuma ko yɛ emli ni gbooo; shi Yesu tsɔɔ akɛ, mɛi ni egboi lɛ miiwɔ. (Yoh. 11:11) Sadukifoi lɛ hu kɛɛ gbohiiashitee ko bɛ; shi Yesu tee enaanyo Lazaro shi. (Yoh. 11:43, 44; Bɔf. 23:8) Farisifoi lɛ kɛɛ nɔ fɛɛ nɔ ni baaba lɛ, eji shɛɛ mli sane loo Nyɔŋmɔ ni to akɛ eba lɛ nakai, ni adesa ko kwraa bɛ lɛ diɛŋtsɛ eshihilɛ nɔ hewalɛ; shi Yesu tsɔɔ akɛ adesai yɛ amɛshihilɛ nɔ hewalɛ, ni amɛbaanyɛ amɛkpɛ amɛyiŋ kɛji amɛbaasɔmɔ Nyɔŋmɔ loo amɛsɔmɔŋ lɛ.​—Mat. 11:28.

10. Mɛni hewɔ mɛi pii sumɔɔɔ wɔsane yɛ nibii ni wɔtsɔɔ lɛ ahewɔ?

¹⁰ Ani nakai nɔŋŋ eji ŋmɛnɛ? Hɛɛ. Ŋmɛnɛ lɛ, wɔtsɔɔ Biblia lɛ nɔ wɔhãa mɛi naa akɛ nibii ni atsɔɔ yɛ jamɔi lɛ amli lɛ ejaaa, ni enɛ hewɔ lɛ mɛi pii sumɔɔɔ wɔsane. Akɛ nɔkwɛmɔnɔ lɛ, osɔfoi lɛ tsɔɔ amɛsɔlemɔ bii lɛ akɛ, Nyɔŋmɔ baashã efɔŋfeelɔi lɛ yɛ hɛl la mli. Amɛkɛ amale tsɔɔmɔ nɛɛ woɔ amɛsɔlemɔ bii lɛ ahe gbeyei. Shi Yehowa tsuji hãa anaa akɛ, akɛni Nyɔŋmɔ yɛ suɔmɔ hewɔ lɛ, efeŋ nɔ ko ni tamɔ nakai, ni no hewɔ lɛ, nakai tsɔɔmɔ lɛ ejaaa. Osɔfoi lɛ tsɔɔ hu akɛ, kɛ́ mɔ ko gbo lɛ, eyɛ susuma ko ni gbooo. Eji enɛ ji anɔkwale kulɛ, gbohiiashitee he ehiaaa. Shi Biblia lɛ hãa wɔnaa akɛ ejeee anɔkwale. Agbɛnɛ hu, be ni jamɔi pii tsɔɔ akɛ nɔ fɛɛ nɔ ni baaba lɛ shɛɛ mli sane ni loo Nyɔŋmɔ eto momo akɛ eba lɛ nakai lɛ, wɔ lɛ, wɔtsɔɔ akɛ adesai yɛ heyeli, ni amɛbaanyɛ amɛkpɛ amɛyiŋ kɛji amɛbaajá Nyɔŋmɔ loo amɛjáŋ lɛ. Te enɛ hãa jamɔŋ hiɛnyiɛlɔi lɛ nuɔ he amɛhãa tɛŋŋ? Ewoɔ amɛmli la waa!

11. Yɛ nɔ ni Yesu wie yɛ Yohane 8:45-47 lɛ naa lɛ, mɛni Nyɔŋmɔ miisumɔ ni wɔfee?

¹¹ Mɛni esa akɛ wɔfee koni wɔnane akatɔ̃tɔ? Kɛ́ wɔsumɔɔ anɔkwale lɛ lɛɛlɛŋ lɛ, belɛ esa akɛ wɔbo nɔ ni Nyɔŋmɔ kɛɔ wɔ lɛ toi.  (Kanemɔ Yohane 8:45-47.) Wɔhiɛɔ anɔkwale lɛ mli kpɛŋŋ, ni wɔfeee wɔnii tamɔ Satan Abonsam. Wɔhiɔ shi yɛ nibii ni wɔkaseɔ lɛ anaa. (Yoh. 8:44) Nyɔŋmɔ miisumɔ ni ‘wɔhi efɔŋ’ ni ‘wɔkpɛtɛ ekpakpa he,’ tamɔ bɔ ni Yesu fee lɛ.​—Rom. 12:9; Heb. 1:9.

12. Mɛni hewɔ gbɛ ni atsɔ nɔ agbe Yesu lɛ hãaa Yudafoi pii ahe enɔ amɛye lɛ?

¹² Mɛni ji nɔ kroko hewɔ ni Yudafoi ni hi shi yɛ Yesu beiaŋ lɛ heee enɔ amɛyeee lɛ? Bɔfo Paulo wie akɛ: “Kristo ni agbe lɛ yɛ tso jaŋŋ lɛ nɔ lɛ wɔshiɛɔ, mɔ ni ji nanetɔ̃tɔmɔnɔ kɛhã Yudafoi lɛ.” (1 Kor. 1:23) Mɛni hewɔ gbɛ ni atsɔ nɔ agbe Yesu lɛ gba Yudafoi lɛ ateŋ mɛi babaoo anaa lɛ? Nɔ hewɔ lɛ ji, gbɛ ni atsɔ nɔ agbe lɛ lɛ hã amɛna lɛ akɛ ojotswalɔ kɛ eshafeelɔ, shi jeee Mesia lɛ.​—5 Mo. 21:22, 23.

13. Mɛni Yudafoi ni heee Yesu nɔ amɛyeee lɛ ajwɛŋmɔ eyaaa nɔ?

¹³ Yudafoi ni heee Yesu nɔ amɛyeee lɛ ajwɛŋmɔ eyaaa nɔ akɛ efeko efɔŋ ko, saji ni akɛshwie enɔ lɛ bɛ mli, ni gbɛ ni atsɔ nɔ aye esane lɛ ejaaa. Mɛi ni ye Yesu sane lɛ yeee jalɛ sane. Yudafoi lɛ asaneyelihe wulu lɛ mli kojolɔi lɛ bua amɛhe naa oyayaayai, ni amɛkɛ gbɛtsɔɔmɔi ni ahã yɛ bɔ ni aye sane ahã lɛ he lɛ tsuuu nii. (Luka 22:54; Yoh. 18:24) Nɔ najiaŋ ni amɛbaabo saji ni akɛshwie Yesu nɔ lɛ toi ni amɛkwɛ akɛ eyɛ mli lo lɛ, amɛ diɛŋtsɛ amɛtao “amale odase ko amɛshi Yesu koni amɛgbe lɛ.” Be ni no eyayeee omanye lɛ, osɔfonukpa lɛ ka akɛ ebaatsɔ ŋaa gbɛ nɔ ehã Yesu awie nɔ ko ni abaanyɛ adamɔ nɔ abu lɛ fɔ. Enɛ kɛ bɔ ni Mla lɛ etsɔɔ akɛ aye saji ahã lɛ kpãaa gbee kwraa. (Mat. 26:59; Mar. 14:55-64) Be ni atee Yesu shi lɛ, kojolɔi ni yeee jalɛ sane nɛɛ hã Roma asraafoi ni bu he ni afu lɛ yɛ lɛ “jwiɛtɛi kapɛji babaoo” koni amɛkɛɛ akɛ ekaselɔi lɛ baju egbonyo lɛ, ni no hewɔ ebɛ gbonyobu lɛ mli lɛ.​—Mat. 28:11-15.

14. Mɛni Ŋmalɛ lɛ egba efɔ̃ shi yɛ Mesia lɛ he?

¹⁴ Mɛni no mli lɛ Hebri Ŋmalɛ lɛ ewie? Eyɛ mli akɛ Yudafoi ni hi shi yɛ Yesu beiaŋ  lɛ ateŋ mɛi babaoo susuuu akɛ esa akɛ Mesia lɛ agbo moŋ, shi kadimɔ nɔ ni no mli lɛ agba afɔ̃ shi yɛ Ŋmalɛ lɛ mli. Agba akɛ: “Efɔse ewala eshwie shi yɛ gbele mli po ni abu lɛ ashi nɔtɔlɔi anɔ; etere mɛi pii ahe esha, ni edamɔ mli ehã nɔtɔlɔi lɛ.” (Yes. 53:12) No hewɔ lɛ, kulɛ esaaa akɛ egbaa Yudafoi lɛ anaa akɛ abu Yesu akɛ eshafeelɔ ni agbe lɛ.

15. Mɛɛ saji mɛi ewie eshi Yehowa Odasefoi ni no ehã mɛi sumɔɔɔ ni amɛboɔ wɔ toi lɛ?

¹⁵ Ani nakai nɔŋŋ eji ŋmɛnɛ? Hɛɛ. Afolɔ Yesu naa ni abu lɛ fɔ, eyɛ mli akɛ efeko nɔ ko, ni nakai nɔŋŋ afeɔ Yehowa Odasefoi hu. Naa nɔkwɛmɔnii komɛi ni tsɔɔ nakai. Kɛjɛ afi 1930 kɛyashi afi 1950 lɛ, aye saji pii yɛ kɔɔtu yɛ United States ni kɔɔ hegbɛ ni wɔyɔɔ akɛ wɔjáa Nyɔŋmɔ lɛ he. Kojolɔi lɛ ekomɛi hã ana faŋŋ akɛ amɛtaooo wɔ. Yɛ Quebec yɛ Canada lɛ, Katolik Sɔlemɔ lɛ kɛ nɔyeli lɛ fee ekome ni amɛte shi amɛwo wɔ. Awo nyɛmimɛi pii tsuŋ yɛ Nyɔŋmɔ Maŋtsɛyeli lɛ ni amɛmiishiɛ amɛmiihã mɛi lɛ hewɔ. Yɛ Germany lɛ, Nazi nɔyeli lɛ gbe nyɛmimɛi oblahii anɔkwafoi babaoo. Nyɛsɛɛ nɛɛ yɛ Russia lɛ, nɔyeli lɛ kɛ wɔnyɛmimɛi pii eye sane ni awo amɛ tsuŋ yɛ Biblia lɛ mli sane ni amɛkɛ mɛi gbaa lɛ hewɔ, ejaakɛ nɔyeli lɛ kɛɛ amɛmiiku maŋ lɛ mla mli. Agbɛnɛ hu, Yehowa gbɛ́i ni yɔɔ Russia Ŋmalɛ Krɔŋkrɔŋ Lɛ​—Jeŋ Hee Shishitsɔɔmɔ lɛ mli lɛ hewɔ lɛ, maŋ lɛ mla eŋmɛɛɛ gbɛ ni akɛtsu nii.

16. Mɛni hewɔ esa akɛ wɔbo ŋaa ni awo yɛ 1 Yohane 4:1 lɛ toi lɛ?

¹⁶ Mɛni esa akɛ wɔfee koni wɔnane akatɔ̃tɔ? Esa akɛ wɔtao saji amli koni wɔle anɔkwalei fɛɛ ni yɔɔ mli. Yɛ Yesu Gɔŋ Nɔ Shiɛmɔ lɛ mli lɛ, ebɔ mɛi ni boɔ lɛ toi lɛ kɔkɔ akɛ ‘mɛi baamale amɛwie amɛhe efɔŋ fɛɛ efɔŋ.’ (Mat. 5:11) Satan ji mɔ ni hɔ amalei nɛɛ asɛɛ. Lɛ ji mɔ ni tsirɛɔ mɛi ni teɔ shi amɛwoɔ wɔ lɛ ni amɛgbɛɔ wɔhe amalei amɛshwãa lɛ. (Kpo. 12:9, 10) Esaaa akɛ wɔboɔ amalei ni mɛi ni teɔ shi amɛwoɔ wɔ lɛ wieɔ lɛ toi, ni esaaa akɛ wɔhãa amalei nɛɛ woɔ wɔhe gbeyei loo ehãa wɔhemɔkɛyeli lɛ mli gbɔjɔɔ kɔkɔɔkɔ.​—Kanemɔ 1 Yohane 4:1.

17. Mɛɛ gbɛ nɔ ekolɛ nibii ni tee nɔ gbi gbɛkɛ ni enɔ jetsɛremɔ lɛ agbe Yesu lɛ, baanyɛ ahã mɛi komɛi akpɛ amɛyiŋ akɛ amɛsumɔŋ ni amɛtsɔmɔ esɛɛnyiɛlɔi?

¹⁷ Gbi gbɛkɛ ni enɔ jetsɛremɔ lɛ abaagbe Yesu lɛ, ebɔfoi 12 lɛ ateŋ mɔ kome tsɔɔ esɛɛgbɛ. Mɔ kome hu kwa lɛ shii etɛ, ni mɛi ni eshwɛ lɛ fɛɛ jo foi amɛshi lɛ. (Mat. 26:14-16, 47, 56, 75) Enɛ efeee Yesu naakpɛɛ. Etsɔ hiɛ egba po akɛ nɔ ko nakai baaba. (Yoh. 6:64; 13:21, 26, 38; 16:32) Kɛ́ mɔ ko na nɔ ni tee nɔ lɛ, ekolɛ ebaasusu akɛ, ‘Kɛ́ nɛkɛ Yesu bɔfoi lɛ yɔɔ lɛ, belɛ misumɔŋ ni mafata amɛhe mɔ.’

18. Mɛɛ gbalɛi ba mli gbi gbɛkɛ ni enɔ jetsɛremɔ lɛ abaagbe Yesu lɛ?

¹⁸ Mɛni no mli lɛ Hebri Ŋmalɛ lɛ ewie? Afii pii dani Yesu baaba shikpɔŋ lɛ nɔ lɛ, Yehowa hã ale yɛ e-Wiemɔ lɛ mli akɛ abaatsɔɔ Mesia lɛ sɛɛgbɛ ahe jwiɛtɛi kapɛji 30. (Zak. 11:12, 13) Ehã ale hu akɛ, enanemɛi ni bɛŋkɛ lɛ kpaakpa lɛ ateŋ mɔ kome ni baatsɔɔ esɛɛgbɛ. (Lala 41:9) Gbalɔ Zakaria hu ŋma akɛ: “Tswaa tookwɛlɔ lɛ nɔ, ní tooku lɛ agbɛ ashwã.” (Zak. 13:7) Mɛi ni hiɛ tsui kpakpa lɛ hãaa nibii nɛɛ ni tee nɔ lɛ atɔ̃tɔ amɛnane. Moŋ lɛ, be ni amɛna akɛ gbalɛi nɛɛ eba mli yɛ Yesu gbɛfaŋ lɛ, ehã amɛhemɔkɛyeli lɛ mli wa.

19. Mɛni mɛi ni hiɛ tsui kpakpa lɛ le?

¹⁹ Ani nakai nɔŋŋ eji ŋmɛnɛ? Hɛɛ. Yɛ wɔbei nɛɛ amli lɛ, nyɛmimɛi komɛi ni ale amɛ waa lɛ eshi anɔkwale lɛ, amɛtsɔmɔ jamɔkwalɔi,  ni amɛka akɛ amɛbaagbala mɛi krokomɛi kɛje anɔkwale lɛ mli. Amɛtsɔ adafitswaa woji, redio, TV, kɛ Intanɛt lɛ nɔ amɛgbɛ Yehowa Odasefoi ahe saji fɔji kɛ saji ni bɛ mli amɛshwã. Shi mɛi ni hiɛ tsui kpakpa lɛ hãaa nibii ni tamɔ nɛkɛ lɛ atɔ̃tɔ amɛnane. Amɛle akɛ Biblia lɛ egba akɛ nibii tamɔ nakai baaba.​—Mat. 24:24; 2 Pet. 2:18-22.

20. Mɛɛ nibii kɛ́ wɔfee lɛ, mɛi ni eshi anɔkwale lɛ nyɛŋ atɔ̃tɔ wɔnane? (2 Timoteo 4:4, 5)

²⁰ Mɛni esa akɛ wɔfee koni wɔnane akatɔ̃tɔ? Esa akɛ wɔkase Biblia lɛ daa, wɔsɔle be fɛɛ be, ni wɔkɛ ekãa atsu nitsumɔ ni Yehowa kɛhã wɔ akɛ wɔtsu lɛ. Kɛ́ wɔfee nibii nɛɛ, wɔhemɔkɛyeli lɛ mli baawa. (Kanemɔ 2 Timoteo 4:4, 5.) Kɛ́ wɔyɛ hemɔkɛyeli lɛ, wɔtsui efaŋ kɛ́ wɔnu amaniɛbɔi gbohii ni kɔɔ Yehowa webii lɛ ahe. (Yes. 28:16) Kɛ́ wɔsumɔɔ Yehowa, e-Wiemɔ lɛ, kɛ wɔnyɛmimɛi lɛ, mɛi ni eshi anɔkwale lɛ nyɛŋ atɔ̃tɔ wɔnane.

21. Eyɛ mli akɛ ŋmɛnɛ lɛ mɛi babaoo booo wɔsane lɛ toi moŋ, shi mɛni mɛi babaoo hu efee? Ni mɛni hewɔ?

²¹ Yɛ Yesu beiaŋ lɛ, mɛi babaoo booo lɛ toi. Shi mɛi babaoo hu bo lɛ toi ni amɛbatsɔmɔ esɛɛnyiɛlɔi. Wɔle akɛ kɛ́ hooo kwraa lɛ, Yudafoi lɛ asaneyelihe wulu lɛ mli bii lɛ ateŋ mɔ kome kɛ “osɔfoi lɛ ateŋ mɛi babaoo” batsɔmɔ esɛɛnyiɛlɔi. (Bɔf. 6:7; Mat. 27:57-60; Mar. 15:43) Ŋmɛnɛ hu lɛ, mɛi babaoo hãaa nibii gbohii ni awieɔ yɛ Odasefoi lɛ ahe lɛ atɔ̃tɔ amɛnane. Mɛi babaoo ebo Yehowa Odasefoi lɛ toi ni amɛbatsɔmɔ Yesu sɛɛnyiɛlɔi. Mɛni hewɔ? Ejaakɛ amɛkase Biblia lɛ, ni amɛsumɔɔ nibii ni amɛkase yɛ Biblia lɛ mli lɛ. Nyɔŋmɔ Wiemɔ lɛ kɛɔ akɛ: “Mɛi ni sumɔɔ omla lɛ yɛ toiŋjɔlɛ babaoo; nɔ ko nɔ ko hãaa amɛnane atɔ̃tɔ.”​—Lala 119:165, shn.