1-2. Mɛɛ naagbai nyɛmimɛi pii kɛkpeɔ?

BƆFO PAULO wo Timoteo hewalɛ ni etsu esɔɔmɔ lɛ he nii pɛpɛɛpɛ. (2 Tim. 4:5) Wɔ hu wɔboɔ ŋaa ni Paulo wo Timoteo lɛ toi, ni wɔtsuɔ nɔ fɛɛ nɔ ni wɔbaanyɛ yɛ Yehowa sɔɔmɔ lɛ mli. Shi bei komɛi lɛ, wɔkɛ naagbai komɛi kpeɔ. Wɔnyɛmimɛi lɛ ekomɛi yɛ ni amɛsheɔ gbeyei kɛ́ amɛbaaya shiɛmɔ, shi amɛyaa kɛ̃. (2 Tim. 4:2) Akɛ nɔkwɛmɔnɔ lɛ, wɔnyɛmimɛi lɛ ekomɛi yɛ ni hei ni amɛyɔɔ lɛ amɛnáaa heyeli kɛtsuuu shiɛmɔ nitsumɔ lɛ bɔ ni amɛsumɔɔ loo atsĩ nitsumɔ lɛ naa kwraa yɛ jɛmɛ. Kɛ́ amɔ amɛ ni amɛmiiya shiɛmɔ lɛ, abaanyɛ awo amɛ tsuŋ, shi amɛtsuɔ shiɛmɔ nitsumɔ lɛ kɛ̃!

² Agbɛnɛ hu, Yehowa tsuji pii kɛ naagbai ni baanyɛ aje amɛnijiaŋ wui kpeɔ. Akɛ nɔkwɛmɔnɔ lɛ, amɛteŋ mɛi komɛi tsuɔ nii ŋmɛlɛtswai babaoo dani amɛnyɛɔ amɛnáa nɔ ko amɛhãa amɛweku lɛ. Kulɛ amɛbaasumɔ ni amɛkɛ ŋmɛlɛtswai pii ashiɛ, shi be ni baashɛ otsi lɛ naagbee lɛ, etɔ amɛ bliboo. Nyɛmimɛi komɛi hu yɛ ni hela kɛ gbɔlɛ hewɔ lɛ, amɛnyɛɛɛ amɛtsu babaoo yɛ shiɛmɔ nitsumɔ lɛ mli. Amɛteŋ mɛi komɛi po yɛ ni amɛka tsũ mli. Mɛi komɛi hu yɛ ni daa nɛɛ amɛnuɔ he akɛ amɛhe bɛ sɛɛnamɔ kɛhã Yehowa. Nyɛmi yoo ko ni atsɛɔ lɛ Mary * lɛ wie akɛ: “Bei pii kɛ́ minu he akɛ mihe bɛ sɛɛnamɔ lɛ, etɔɔ mi waa dani minyɛɔ mijieɔ nakai susumɔ gbonyo lɛ kɛjeɔ mijwɛŋmɔ mli, ni enɛ hãa mifeɔ gbedee. Ni kɛ́ mifee gbedee lɛ, minyɛɛɛ mikɛ minyɛmɔ kɛ mibe pii atsu shiɛmɔ nitsumɔ lɛ, ni no hu hãa mihenilee haoɔ mi.”

3. Mɛni he wɔbaasusu yɛ nikasemɔ nɛɛ mli?

 ³ Ekɔɔɔ he eko naagbai ni wɔkɛkpeɔ lɛ, Yehowa baanyɛ ewaje wɔ ni wɔya nɔ wɔsɔmɔ lɛ kɛ wɔnyɛmɔ fɛɛ. Yɛ nikasemɔ nɛɛ mli lɛ, wɔbaasusu gbɛi anɔ ni Yehowa baanyɛ etsɔ ewaje wɔ lɛ ahe. Shi dani no baaba lɛ, nyɛhãa wɔsusua bɔ ni ewaje Paulo kɛ Timoteo ni amɛtee nɔ amɛtsu amɛsɔɔmɔ nitsumɔ lɛ yɛ naagbai ni amɛkɛkpe lɛ fɛɛ sɛɛ lɛ he.

4. Mɛɛ naagbai Paulo kɛkpe?

⁴ Paulo kɛ naagbai babaoo kpe. Akɛ nɔkwɛmɔnɔ lɛ, ayi lɛ, atswia lɛ tɛi, ni awo lɛ tsuŋ, ni ehe bahia waa ni Yehowa awaje lɛ. (2 Kor. 11:23-25) Bei komɛi hu lɛ, enijiaŋ jeɔ wui, ni ehiɛ gbooo akɛ ebaahã mɛi ale enɛ. (Rom. 7:18, 19, 24) Agbɛnɛ hu, ewie akɛ eyɛ “ŋmei ko yɛ heloo lɛ mli” ni esɔle ekpa Nyɔŋmɔ fai shii abɔ koni ejie ehã lɛ.​—2 Kor. 12:7, 8.

5. Mɛɛ nibii Paulo nyɛ etsu yɛ naagbai ni ekɛkpe lɛ fɛɛ sɛɛ?

⁵ Yehowa waje Paulo ni enyɛ etee nɔ etsu esɔɔmɔ nitsumɔ lɛ yɛ naagbai ni ekɛkpe lɛ fɛɛ sɛɛ. Bo lɛ susumɔ nibii ni Paulo nyɛ etsu lɛ ahe okwɛ. Be ni eyɔɔ Roma ni atsĩ enaa yɛ lɛ diɛŋtsɛ eshĩa ni aŋmɛɛɛ lɛ gbɛ ni eya he ko he ko lɛ, ekɛ ekãa shiɛ ehã Yudafoi lɛ ahiɛnaanɔbii lɛ, ni eeenyɛ efee akɛ eshiɛ ehã amralofoi po. (Bɔf. 28:17; Fip. 4:21, 22) Agbɛnɛ hu, eshiɛ ehã Roma Maŋtsɛ Lɛ Bulɔi babaoo, ni eye mɛi fɛɛ ni basara lɛ lɛ odase. (Bɔf. 28:30, 31; Fip. 1:13) Yɛ nakai be lɛ mli nɔŋŋ lɛ, Paulo ŋmala woji emaje asafoi srɔtoi, ni kɛbashi ŋmɛnɛ lɛ wɔmiiná woji nɛɛ ahe sɛɛ. Paulo nɔkwɛmɔnɔ lɛ waje nyɛmimɛi ni yɔɔ Roma lɛ, ni no hã ‘amɛkɛ ekãa babaoo jaje Nyɔŋmɔ wiemɔ lɛ fe tsutsu lɛ ni amɛsheee gbeyei.’ (Fip. 1:14) Eyɛ mli akɛ bei komɛi lɛ Paulo shihilɛ eŋmɛɛɛ lɛ gbɛ ni etsu babaoo moŋ, shi efee nɔ ni ebaanyɛ ni enɛ ‘hã sane kpakpa lɛ shwere.’​—Fip. 1:12.

6. Yɛ nɔ ni Paulo wie yɛ 2 Korintobii 12:9, 10 lɛ naa lɛ, mɛni ye ebua lɛ ni enyɛ etsu esɔɔmɔ lɛ he nii pɛpɛɛpɛ?

⁶ Paulo le akɛ jeee lɛ diɛŋtsɛ enyɛmɔ naa enyɛ etsu nibii ni etsu yɛ Yehowa sɔɔmɔ lɛ mli lɛ. Ewie akɛ Nyɔŋmɔ hewalɛ lɛ “yeɔ emuu yɛ gbɔjɔmɔ mli.” (Kanemɔ 2 Korintobii 12:9, 10.) Yehowa tsɔ emumɔ krɔŋkrɔŋ lɛ nɔ ewaje Paulo ni enyɛ etsu esɔɔmɔ nitsumɔ lɛ he nii pɛpɛɛpɛ yɛ eyi ni awa, tsuŋ ni awo lɛ, kɛ naagbai krokomɛi ni ekɛkpe lɛ fɛɛ sɛɛ.

7. Mɛɛ naagbai Timoteo kɛkpe ni kulɛ ebaanyɛ ehã ewa ehã lɛ akɛ ebaatsu esɔɔmɔ nitsumɔ lɛ?

 ⁷ Agbɛnɛ hu, ehe bahia ni Timoteo, ni ji oblanyo ni fata Paulo he lɛ kɛ ehiɛ afɔ̃ Nyɔŋmɔ nɔ akɛ ebaawaje lɛ koni enyɛ etsu esɔɔmɔ nitsumɔ lɛ. Timoteo fata Paulo he yɛ emaŋsɛɛ sɔɔmɔ nitsumɔ lɛ mli, ni amɛtee hei shɔŋŋshɔŋŋ. Kɛfata he lɛ, Paulo tsu lɛ ni eyasara asafoi komɛi ni ewo amɛ hewalɛ. (1 Kor. 4:17) Ekolɛ Timoteo nu he akɛ enyɛŋ etsu nitsumɔ nɛɛ. Ni eeenyɛ efee akɛ enɛ hewɔ Paulo wo lɛ ŋaa akɛ, ‘ekafee nɔ ko ni hãŋ abu lɛ yɛ oblanyo ni eji lɛ hewɔ’ lɛ. (1 Tim. 4:12) No mli lɛ, Timoteo hu yɛ naagba ko ni tamɔ ŋmei yɛ eheloo lɛ mli. No ji ‘ehe ni yeɔ kpitiokpitio lɛ.’ (1 Tim. 5:23) Shi Timoteo le akɛ Yehowa baatsɔ emumɔ krɔŋkrɔŋ lɛ nɔ ewaje lɛ koni enyɛ eshiɛ sane kpakpa lɛ ni esɔmɔ enyɛmimɛi lɛ.​—2 Tim. 1:7.

8. Mɛɛ gbɛi anɔ Yehowa tsɔɔ ewajeɔ ewebii lɛ ŋmɛnɛ?

⁸ Ŋmɛnɛ hu lɛ, Yehowa hãa ewebii lɛ “hewalɛ ni fa kɛteke nɔ” koni amɛnyɛ amɛya nɔ amɛsɔmɔ lɛ. (2 Kor. 4:7) Nyɛhãa wɔsusua gbɛi ejwɛ ni Yehowa tsɔɔ nɔ ewajeɔ wɔ koni wɔya nɔ wɔsɔmɔ lɛ lɛ ahe. Nomɛi ji; sɔlemɔ, Biblia lɛ, wɔnyɛmimɛi Kristofoi lɛ, kɛ shiɛmɔ nitsumɔ lɛ.

9. Mɛɛ gbɛ nɔ sɔlemɔ baanyɛ aye abua wɔ?

⁹ Sɔlemɔ wajeɔ wɔ. Paulo wie yɛ Efesobii 6:18 lɛ akɛ, wɔsɔle wɔhã Nyɔŋmɔ “yɛ shihilɛ fɛɛ shihilɛ mli.” Kɛ́ wɔsɔle lɛ Nyɔŋmɔ baawaje wɔ. Nyɛmi nuu ko ni yɔɔ Bolivia ni atsɛɔ lɛ Jonnie lɛ ná enɛ mli niiashikpamɔ be ni ekɛ naagbai srɔtoisrɔtoi kpe lɛ. Hela mɔ efɔlɔi, ni yɛ nakai be lɛ nɔŋŋ mli lɛ hela mɔ eŋa hu. Etɔ Jonnie waa kɛ amɛyi etɛ lɛ fɛɛ akwɛmɔ. Emami gbo, ni ehe be kplaŋŋ dani eŋa kɛ epapa ná hewalɛ. Jonnie wie akɛ: “Yɛ nakai bei lɛ amli lɛ, kɛ́ mihao waa lɛ, nɔ ni yeɔ ebuaa mi ji, ni masɔle makɛɛ Yehowa bɔ ni minuɔ he mihãa lɛ.” Yehowa waje Jonnie ni enyɛ edamɔ nakai shihilɛ lɛ naa. Asafoŋ onukpa ko ni yɔɔ Bolivia ni atsɛɔ lɛ Ronald lɛ hu ná ele akɛ emami ená kansa. Enɔ nyɔɔŋ kome nɔŋŋ ni emami gbo. Mɛni ye ebua lɛ ni enyɛ edamɔ shihilɛ nɛɛ naa? Ewie akɛ: “Kɛ́ misɔle mihã Yehowa lɛ, mikɛɔ lɛ mitsuiŋ saji fɛɛ kɛ bɔ ni minuɔ he mihãa. Mile akɛ ele mi jogbaŋŋ fe mɔ fɛɛ mɔ. Ele mi fe bɔ ni mi diɛŋtsɛ po mile mihe, ni no hewɔ lɛ enuɔ mi shishi.” Bei komɛi lɛ, wɔnuɔ he akɛ wɔnaagbai lɛ tsii fe wɔ, ni wɔleee nɔ ni wɔbaakɛɛ Yehowa po kɛ́ wɔsɔle. Shi Yehowa miisumɔ ni wɔsɔle wɔhã lɛ kɛ́ wɔleee nɔ ni wɔbaawie loo bɔ ni wɔbaawie lɛ wɔhã po.​—Rom. 8:26, 27.

10. Yɛ nɔ ni aŋma yɛ Hebribii 4:12 lɛ naa lɛ, mɛni hewɔ ehe miihia waa ni wɔkane Biblia lɛ ni wɔjwɛŋ nɔ ni wɔkane lɛ nɔ lɛ?

¹⁰ Biblia lɛ wajeɔ wɔ. Paulo kane Ŋmalɛ lɛ, ni no ji nɔ ni waje lɛ ni eshɛje emii, ni esa akɛ wɔ hu wɔfee nakai nɔŋŋ. (Rom. 15:4) Kɛ́ wɔkane Ŋmalɛ lɛ ni wɔjwɛŋ nɔ lɛ, Yehowa baanyɛ ekɛ emumɔ lɛ aye abua wɔ ni wɔna bɔ ni Ŋmalɛ lɛ baanyɛ aye abua wɔ yɛ shihilɛ ni wɔkɛkpeɔ lɛ mli. (Kanemɔ Hebribii 4:12.) Ronald ni wɔtsĩ etã kɛtsɔ hiɛ lɛ wie akɛ: “Eŋɔɔ minaa waa akɛ mito gbɛjianɔ akɛ daa gbɛkɛ lɛ, makane Biblia lɛ fã ko dani mawɔ. Mijwɛŋɔ Yehowa sui lɛ kɛ bɔ ni ekwɛ etsuji lɛ anɔ jogbaŋŋ lɛ nɔ. Enɛ wajeɔ mi waa.”

11. Mɛɛ gbɛ nɔ Biblia lɛ ye ebua nyɛmi yoo ko ni ehao waa?

¹¹ Kɛ́ wɔjwɛŋ Nyɔŋmɔ Wiemɔ lɛ nɔ lɛ, ebaanyɛ eye ebua wɔ ni wɔjie susumɔi ni ejaaa ni wɔhiɛ yɛ wɔnaagbai lɛ ahe lɛ kɛje wɔjwɛŋmɔ  mli. Nyɛmi yoo ko ni ewu egbo eshi lɛ lɛ ná enɛ mli niiashikpamɔ. Asafoŋ onukpa ko wo lɛ ŋaa akɛ, kɛ́ ekane Hiob wolo lɛ ebaanyɛ eye ebua lɛ waa. Be ni ebɔi kanemɔ lɛ, enu he akɛ susumɔ ni Hiob hiɛ yɛ enaagbai lɛ ahe lɛ ejaaa. Nyɛmi yoo lɛ wie akɛ: “Hiob! Kaajwɛŋ bo pɛ ohe!” Shi nɔŋŋ ni eyɔse akɛ, bɔ ni Hiob feɔ enii lɛ nakai pɛpɛɛpɛ lɛ hu efeɔ enii lɛ. Enɛ ye ebua lɛ ni ekɛ ejwɛŋmɔ ma Yehowa kɛ eshiwoi lɛ anɔ, ni ejwɛŋŋ enaagba lɛ he fe nine, ni no waje lɛ ni enyɛ edamɔ dɔlɛ ni enuɔ he yɛ ewu lɛ gbele lɛ hewɔ lɛ naa.

12. Mɛɛ gbɛ nɔ Yehowa tsɔɔ wɔnyɛmimɛi Kristofoi lɛ anɔ ewajeɔ wɔ?

¹² Wɔnyɛmimɛi Kristofoi lɛ wajeɔ wɔ. Gbɛ kroko ni Yehowa tsɔɔ nɔ ewajeɔ wɔ ji, kɛtsɔ wɔnyɛmimɛi Kristofoi lɛ anɔ. Paulo wie akɛ eeshwe ni ena enyɛmimɛi Kristofoi lɛ ‘koni amɛwowoo amɛhe hewalɛ.’ (Rom. 1:11, 12) Mary ni wɔtsĩ etã kɛtsɔ hiɛ lɛ náa miishɛɛ waa kɛ́ eyɛ enyɛmimɛi Kristofoi lɛ ateŋ. Ewie akɛ: “Yehowa etsɔ nyɛmimɛi ni leee naagbai ni mikɛkpeɔ lɛ po anɔ ewaje mi. Bei komɛi lɛ, amɛwieɔ nɔ ko loo amɛŋmaa nɔ ko amɛmajeɔ mi ni ewoɔ mi hewalɛ waa. Mikɛ nyɛmimɛi yei ni kɛ shihilɛ ni mikɛkpeɔ lɛ eko ekpe pɛŋ lɛ hu gbaa sane, ni mikaseɔ nii waa kɛjɛɔ amɛniiashikpamɔi lɛ amli. Agbɛnɛ hu, asafoŋ onukpai lɛ hãa minaa akɛ nyɛmimɛi lɛ sumɔɔ mi waa diɛŋtsɛ.”

13. Kɛ́ wɔtee asafoŋ kpeei lɛ, mɛni wɔbaanyɛ wɔfee kɛwo wɔnyɛmimɛi lɛ hewalɛ?

¹³ He kome ni wɔnáa hegbɛ wɔwoɔ wɔnyɛmimɛi lɛ hewalɛ waa yɛ ji kɛ́ wɔtee asafoŋ kpeei. No hewɔ lɛ, kɛ́ otee asafoŋ kpeei lɛ, hã onyɛmimɛi lɛ ale akɛ osumɔɔ amɛ, ni ohiɛ sɔɔ nibii ni amɛtsuɔ lɛ waa, enɛ baanyɛ awaje amɛ. Akɛ nɔkwɛmɔnɔ lɛ, be ko lɛ dani abaaje asafoŋ kpee shishi lɛ, asafoŋ onukpa ko ni atsɛɔ lɛ Peter lɛ kɛɛ nyɛmi yoo ko ni ewu jeee Odasefonyo lɛ akɛ: “Kɛ́ wɔna bo yɛ asafoŋ kpee shishi lɛ, ewoɔ wɔ hewalɛ waa. Daa nɛɛ okwɛɔ ni obii ekpaa lɛ saa amɛhe fain, ni nyɛtsɔɔ hiɛ nyɛsaa nyɛhe kɛhã asafoŋ kpee lɛ koni amɛnyɛ amɛhã saji ahetoo.” Ewiemɔ lɛ ta nyɛmi yoo lɛ tsuiŋ aahu akɛ ehiŋmɛiiaŋ tɛo nu ni ewie akɛ: “Nɔ ni owie lɛ ewo mi hewalɛ waa diɛŋtsɛ.”

14. Kɛ́ wɔtee shiɛmɔ lɛ, mɛɛ gbɛ nɔ eyeɔ ebuaa wɔ?

¹⁴ Shiɛmɔ nitsumɔ lɛ wajeɔ wɔ. Kɛ́ wɔtee shiɛmɔ lɛ, wɔtsui nyɔɔ wɔmli ni wɔmii shɛɔ wɔhe kɛ́ mɛi bo wɔ toi jio amɛbooo wɔ toi jio. (Abɛi 11:25) Nyɛmi yoo ko ni atsɛɔ lɛ Stacy lɛ ná enɛ mli niiashikpamɔ. Be ni ashwie ewekunyo ko kɛje asafo lɛ mli lɛ ehao waa, ni esusu akɛ kulɛ ebaanyɛ efee nɔ ko kɛye ebua ewekunyo lɛ koni akashwie lɛ. Sane nɛɛ he ejwɛŋmɔ fɛɛ. Mɛni ye ebua lɛ ni enyɛ edamɔ shihilɛ ni hã ehao nɛɛ naa? No ji shiɛmɔ nitsumɔ lɛ. Kɛ́ etee shiɛmɔ lɛ, esusuɔ mɛi ni yɔɔ eshikpɔŋkuku lɛ mli lɛ ahe kɛ nɔ ni ebaanyɛ efee kɛye ebua amɛ, ni no hewɔ lɛ ejwɛŋŋ enaagba lɛ he tsɔ. Ewie akɛ: “Yɛ nakai be lɛ mli lɛ, Yehowa hã mi Biblia mli nikaselɔ ko ni sumɔɔ ni ekɛ nɔ ni ekaseɔ lɛ atsu nii. Enɛ wo mi hewalɛ waa. Shiɛmɔ nitsumɔ lɛ ji nɔ ni eye ebua mi fe fɛɛ.”

15. Mɛni okaseɔ yɛ nɔ ni Mary wie lɛ mli?

¹⁵ Bei komɛi lɛ, shihilɛi komɛi ahewɔ lɛ wɔnyɛmimɛi lɛ nyɛɛɛ amɛtsu bɔ ni amɛsumɔɔ yɛ shiɛmɔ nitsumɔ lɛ mli ni enɛ hãa amɛhaoɔ. Kɛ́ nakai onuɔ he lɛ, kaimɔ akɛ Yehowa hiɛ sɔɔ onyɛmɔ fɛɛ ni okɛtsuɔ sɔɔmɔ nitsumɔ lɛ. Susumɔ Mary niiashikpamɔ lɛ he ekoŋŋ okwɛ. Be ni efã kɛtee shikpɔŋkuku ko ni awieɔ wiemɔ kroko yɛ mli lɛ mli lɛ, enyɛɛɛ etsu shiɛmɔ nitsumɔ jogbaŋŋ bɔ ni eshweɔ ni etsu lɛ lɛ. Ewie akɛ: “Yɛ nakai beiaŋ lɛ kɛ́ mitee asafoŋ kpeei lɛ, nɔ ni nɔŋŋ ni minyɛɔ mifeɔ  ji ni mahã hetoo kuku loo ni makane ŋmalɛ, ni trati pɛ minyɛɔ mihãa kɛ́ mitee shiɛmɔ.” Enɛ hã enu he akɛ ebɔɔɔ mɔdɛŋ kɛ́ akɛ lɛ to mɛi ni wieɔ wiemɔ lɛ jogbaŋŋ lɛ ahe. Shi sɛɛ mli lɛ, ejaje esusumɔ yɛ sane nɛɛ he. Eyɔse akɛ, Yehowa baanyɛ ekɛ lɛ atsu nii yɛ wiemɔ lɛ ni enyɛɛɛ ewie lɛ jogbaŋŋ lɛ fɛɛ sɛɛ. Ewie akɛ: “Nibii ni yɔɔ Biblia lɛ mli lɛ ashishinumɔ waaa, ni ebaanyɛ eye ebua mɛi ni amɛtsake amɛshihilɛ.”

16. Mɛni baanyɛ aye abua mɛi ni eka tsũ mli lɛ koni amɛnijiaŋ akaje wui?

¹⁶ Wɔteŋ mɛi komɛi miishwe ni wɔya shiɛmɔ, shi wɔnyɛɛɛ wɔje kpo ni wɔyashiɛ ejaakɛ wɔka tsũ mli. Yehowa le enɛ, ni no hewɔ lɛ ebaanyɛ eye ebua wɔ ni wɔshiɛ wɔhã datrɛfoi, nɛɛsifoi, kɛ mɛi krokomɛi ni kwɛɔ wɔ lɛ. Kɛ́ wɔkɛ nɔ ni wɔnyɛɔ wɔtsuɔ bianɛ lɛ to nɔ ni wɔnyɛɔ wɔtsuɔ be ko ni eho lɛ he lɛ, ekolɛ wɔnijiaŋ baaje wui. Shi kɛ́ wɔkɛ wɔjwɛŋmɔ ma bɔ ni Yehowa yeɔ ebuaa wɔ amrɔ nɛɛ nɔ lɛ, no baawaje wɔ ni wɔkɛ miishɛɛ afi shi yɛ shihilɛ fɛɛ shihilɛ mli.

17. Yɛ nɔ ni awie yɛ Jajelɔ 11:6 lɛ naa lɛ, mɛni hewɔ esa akɛ wɔya nɔ wɔshiɛ kɛ́ wɔnaaa akɛ wɔshiɛmɔ lɛ miiwo yibii kpakpai po?

¹⁷ Wɔleee anɔkwale dumɔwui ni wɔduɔ lɛ ateŋ nɔ ni baawo yibii. (Kanemɔ Jajelɔ 11:6.) Naa niiashikpamɔ ni nyɛmi yoo ko ni atsɛɔ lɛ Barbara lɛ ná. Barbara eye fe afii 80 ni etsɔɔ tɛlifoŋ kɛ lɛta nɔ eshiɛɔ. Gbi ko lɛ, ekɛ March 1, 2014 Buu-Mɔɔ lɛ ni hiɛ yitso akɛ, “Nɔ Ni Nyɔŋmɔ Efee Ehã Bo” lɛ wo wolo lɛ eko ni eŋma lɛ mli. Asomoaŋ, mɛi ni ekɛ lɛta lɛ maje lɛ ji gbalashihilɛ mli hefatalɔi komɛi ni ashwie amɛ kɛje asafo lɛ mli. Amɛkane Buu-Mɔɔ lɛ shii abɔ. Nuu lɛ nu he akɛ Yehowa kɛ lɛ miiwie tɛ̃ɛ. Ekɛ eŋa lɛ fɛɛ bɔi asafoŋ kpeei yaa, ni sɛɛ mli lɛ ahe amɛ. Kɛjɛ be ni ashwie amɛ kɛyashi be ni ahe amɛ lɛ, nɔ ni fe afii 27 sɔŋŋ eho. Nɔ ni jɛ lɛta nɛɛ ni Barbara ŋma lɛ mli kɛba lɛ wo lɛ hewalɛ waa diɛŋtsɛ ni ewaje lɛ!

18. Mɛni esa akɛ wɔfee koni Yehowa awaje wɔ?

¹⁸ Yehowa tsɔɔ gbɛi pii anɔ ewajeɔ wɔ. Kɛ́ wɔsɔle, wɔkane Biblia lɛ, wɔkɛ wɔnyɛmimɛi Kristofoi lɛ bɔ, wɔshiɛ, ni wɔfee nibii krokomɛi ni baahã Yehowa anyɛ awaje wɔ lɛ, no tsɔɔ akɛ wɔkɛ wɔhiɛ fɔ̃ɔ enɔ akɛ ebaanyɛ eye ebua wɔ, ni eyɛ he miishɛɛ akɛ ebaafee nakai. Nyɛhãa wɔkɛ wɔhiɛ afɔ̃a Yehowa, wɔ-Tsɛ ni yɔɔ ŋwɛi lɛ nɔ be fɛɛ be, mɔ ni yɔɔ he miishɛɛ akɛ ‘ekɛ ehewalɛ baaye abua mɛi ni kɛ amɛtsui fɛɛ ehã lɛ lɛ.’​—2 Kro. 16:9.