1. Mɛɛ naagba wɔteŋ mɛi pii kɛkpe pɛŋ?

 ANI okɛ oti ko ema ohiɛ yɛ Yehowa sɔɔmɔ lɛ mli pɛŋ ni etɔ bo waa dani oshɛ he? b Nyɛmimɛi pii kɛ nakai shihilɛ lɛ ekpe dã. Akɛ nɔkwɛmɔnɔ lɛ, nyɛmi nuu ko ni atsɛɔ lɛ Philip lɛ kɛma ehiɛ akɛ ebaafɔ sɔlemɔ ni esɔle jogbaŋŋ fe bɔ ni efeɔ tsutsu lɛ. Shi enáaa be po ni ekɛsɔle. Nyɛmi yoo ko ni atsɛɔ lɛ Erika lɛ hu kɛma ehiɛ akɛ ekpeŋ sɛɛ kɛhã kpee kɛhã shiɛmɔyaa, shi fɛɛ sɛɛ lɛ, daa nɛɛ ekpe sɛɛ. Nyɛmi nuu ko ni atsɛɔ lɛ Tomáš lɛ ka shii abɔ akɛ ebaakane Biblia muu lɛ fɛɛ. Ewie akɛ: “Biblia lɛ kanemɔ eyaŋɔɔɔ minaa. Mika akɛ makane shii etɛ sɔŋŋ, shi be fɛɛ be lɛ, kɛ́ miyashɛ Mose Wolo Ni Ji Etɛ lɛ, minyɛɛɛ matsa nɔ dɔŋŋ.”

2. Kɛ́ okɛ oti ko ema ohiɛ yɛ Yehowa sɔɔmɔ lɛ mli shi onyɛko oshɛ he lɛ, mɛni hewɔ esaaa akɛ onijiaŋ jeɔ wui?

² Kɛ́ okɛ oti ko ema ohiɛ shi kɛbashi bianɛ lɛ oshɛko he lɛ, kaahã no je onijiaŋ wui. Bei pii lɛ, eheɔ be kɛ mɔdɛŋbɔɔ dani anyɛɔ ashɛɔ otii bibii po ahe. No hewɔ lɛ kaaye otsui. Shwelɛ ni oyɔɔ lolo akɛ obaashɛ oti ni okɛma ohiɛ lɛ he lɛ tsɔɔ akɛ osumɔɔ Yehowa waa ni oosumɔ ni osɔmɔ lɛ kɛ onyɛmɔ fɛɛ. Yehowa hiɛ sɔɔ mɔdɛŋ ni obɔɔ lɛ waa. Anɔkwa, ele he ni onyɛmɔ yawaa, ni ekpaaa gbɛ akɛ obaafee nɔ ko ni onyɛŋ ofee. (Lala 103:14; Mika 6:8) No hewɔ lɛ, kɛ́ okɛ oti ko ema ohiɛ lɛ, kwɛmɔ akɛ eji oti ni obaanyɛ oshɛ he lo. Kɛ́ obaanyɛ oshɛ he lɛ, mɛni baaye abua bo ni onyɛ ofee nakai? Naa ŋaawoi komɛi ni baaye abua bo.

3. Mɛni hewɔ ehe miihia ni oshwe waa akɛ obaashɛ oti ni okɛma ohiɛ lɛ he?

³ Ehe miihia ni oshwe waa akɛ obaashɛ oti ni okɛma ohiɛ lɛ he. Mɛni hewɔ? Kɛ́ mɔ ko miishwe waa ni eshɛ oti ko he lɛ, efeɔ bɔ fɛɛ  bɔ ni ebaanyɛ koni eshɛ he. Wɔbaanyɛ wɔkɛ shwe ni wɔshweɔ akɛ wɔshɛ oti ko he lɛ ato kɔɔyɔɔ he, ni wɔkɛ oti lɛ ato lɛlɛ ni abalaa ma nɔ lɛ he. Bɔ ni kɔɔyɔɔ tsiɔ lɛlɛ ko ni abalaa ma nɔ lɛ kɛyaa he ni eyaa lɛ, nakai nɔŋŋ kɛ́ wɔmiishwe waa ni wɔshɛ oti ko he lɛ, no baaye ebua wɔ ni wɔshɛ he. Kɛ́ kɔɔyɔɔ lɛ miitswa ni ekpaaa lɛ, lɛlɛ lɛ baayashɛ he ni eyaa lɛ. Ni kɛ́ kɔɔyɔɔ lɛ naa wa lɛ, lɛlɛ lɛ baayashɛ mra. Nakai nɔŋŋ kɛ́ wɔmiishwe waa ni wɔshɛ oti ko he lɛ, ewaaa akɛ wɔbaashɛ he. Nyɛmi nuu ko ni yɔɔ El Salvador ni atsɛɔ lɛ David lɛ wie akɛ: “Kɛ́ ooshwe waa ni oshɛ oti ko he lɛ, ofeɔ bɔ fɛɛ bɔ ni obaanyɛ koni oshɛ he, ni ohãaa nɔ ko nɔ ko atsĩ bo gbɛ ni okashɛ nakai oti lɛ he.” No hewɔ lɛ, mɛni baaye abua bo ni oshwe waa akɛ obaashɛ oti ni okɛma ohiɛ lɛ he?

4. Mɛni wɔbaanyɛ wɔsɔle wɔbi Yehowa? (Filipibii 2:13) (Kwɛmɔ mfoniri lɛ hu.)

⁴ Sɔlemɔ ni Yehowa aye abua bo ni oshwe waa akɛ obaashɛ oti lɛ he. Yehowa baanyɛ etsɔ emumɔ lɛ nɔ ehã oshwe waa akɛ obaashɛ oti ni okɛma ohiɛ lɛ he. (Kanemɔ Filipibii 2:13.) Bei komɛi lɛ, wɔkɛ oti ko maa wɔhiɛ ejaakɛ wɔmiina akɛ esa akɛ wɔkɛma wɔhiɛ. Shi ekolɛ yɛ wɔtsui mli tɔ̃ɔ lɛ, nɔ ko tsirɛɛɛ wɔ ni wɔmia wɔhiɛ ni wɔshɛ nakai oti lɛ he. Kɛ́ nɛkɛ ji bɔ ni onuɔ he ohãa lɛ, belɛ jeee okome. Nyɛmi yoo ko ni yɔɔ Uganda ni atsɛɔ lɛ Norina lɛ hu nu he nakai. Ekɛma ehiɛ akɛ ebaaje Biblia mli nikasemɔ shishi. Shi akɛni enuɔ he akɛ eleee nitsɔɔmɔ hewɔ lɛ, nɔ ko kanyaaa lɛ ni emia ehiɛ ni eshɛ nakai oti lɛ he. Mɛni ye ebua lɛ? Ewie akɛ: “Misɔle mikpa Yehowa fai daa gbi ni ehã shwelɛ ni miyɔɔ akɛ maje Biblia mli nikasemɔ shishi lɛ mli awa. Yɛ nakai beiaŋ nɔŋŋ lɛ, mikase bɔ ni atsɔɔ nii jogbaŋŋ. Nyɔji fioo komɛi asɛɛ lɛ, miyɔse akɛ shwelɛ ni miyɔɔ akɛ mikɛ mɔ ko baakase Biblia lɛ mli ewa. Nakai afi lɛ mli nɔŋŋ lɛ, minyɛ mikɛ mɛi enyɔ je Biblia mli nikasemɔ shishi.”

5. Mɛɛ nibii kɛ́ wɔsusu he lɛ, no baahã shwelɛ ni wɔyɔɔ akɛ wɔshɛ oti ni wɔkɛma wɔhiɛ lɛ he lɛ mli awa?

⁵ Hemɔ be kɛsusu nibii ni Yehowa efee ehã bo lɛ ahe. (Lala 143:5) Bɔfo Paulo he be esusu mlihilɛ kpele ni Yehowa ejie kpo etsɔɔ lɛ lɛ he, ni enɛ tsirɛ lɛ ni etsu nii waa yɛ Yehowa sɔɔmɔ lɛ mli. (1 Kor. 15:9, 10; 1 Tim. 1:12-14) Nakai nɔŋŋ kɛ́ wɔ hu wɔhe be wɔsusu nibii ni Yehowa efee ehã wɔ lɛ ahe lɛ, no baatsirɛ wɔ ni wɔmia wɔhiɛ wɔshɛ otii ni wɔkɛmamɔ wɔhiɛ lɛ ahe. (Lala 116:12) Enɛ ji nɔ ni ye ebua nyɛmi yoo ko ni yɔɔ Honduras lɛ ni enyɛ eshɛ oti ni ekɛma ehiɛ akɛ ebaatsɔ daa gbɛgbalɔ lɛ he. Ewie akɛ: “Misusu nibii pii ni Yehowa efee kɛtsɔɔ akɛ esumɔɔ mi lɛ ahe. Akɛ nɔkwɛmɔnɔ lɛ, eye ebua mi ni mibafata ewebii lɛ ahe, ni ekwɛɔ mi ni ebuɔ mihe. Be ni misusu nibii nɛɛ ahe lɛ, ehã mibasumɔ Yehowa waa, ni enɛ ji nɔ ni tsirɛ mi koni mafee nibii ni esa akɛ mafee ni matsɔ daa gbɛgbalɔ lɛ.”

6. Mɛni ekoŋŋ kɛ́ wɔfee lɛ, no baahã wɔshwe waa akɛ wɔshɛ oti ni wɔkɛma wɔhiɛ lɛ he?

⁶ Okɛ ojwɛŋmɔ ama bɔ ni obaaná he sɛɛ ohã kɛji onyɛ oshɛ oti ni okɛma ohiɛ lɛ he lɛ nɔ. Naa nɔ ni ye ebua Erika ni wɔtsĩ etã kɛtsɔ hiɛ lɛ ni enyɛ eshɛ oti ni ekɛma ehiɛ akɛ ekpeŋ sɛɛ kɛhã kpee kɛhã shiɛmɔyaa lɛ he. Ewie akɛ: “Mina akɛ kɛ́ mikpe sɛɛ lɛ, nibii pii ŋmɛɔ mi. Shi kɛ́ miyashɛ mra lɛ, manyɛ maŋa nyɛmimɛi lɛ ni mikɛ amɛ agba sane. Agbɛnɛ hu, manu ŋaawoi kpakpai ni  akɛbaahã yɛ shiɛmɔ nitsumɔ lɛ he lɛ, ni no baaye abua mi ni masumɔ shiɛmɔ nitsumɔ lɛ waa ni matsu lɛ jogbaŋŋ hu.” Nɔ ni Erika wie nɛɛ hãa wɔnaa akɛ, ejwɛŋmɔ ni ekɛma sɛɛnamɔi ni baajɛ shɛ ni ebaayashɛ kpee kɛhã shiɛmɔyaa lɛ shishi mra lɛ nɔ lɛ, ji nɔ ni ye ebua lɛ ni eshɛ oti ni ekɛma ehiɛ lɛ he. Bo hu mɛɛ sɛɛnamɔi obaanyɛ okɛ ojwɛŋmɔ ama nɔ kɛji oti ni ma ohiɛ ji, ni okane Biblia lɛ daa loo osɔle jogbaŋŋ fe bɔ ni ofeɔ bianɛ lɛ? Obaanyɛ osusu bɔ ni no baahã okɛ Yehowa teŋ naanyobɔɔ lɛ mli awa lɛ he. (Lala 145:18, 19) Kɛ́ oti ni ma ohiɛ ji ni onyɛ ojie su ko ni esa akɛ Kristofoi aná lɛ kpo lɛ, susumɔ bɔ ni no baahã okɛ mɛi ahi shi jogbaŋŋ lɛ he. (Kol. 3:14) Kɛ́ ebaahi lɛ, ŋmalamɔ yiŋtoi fɛɛ ahewɔ ni oosumɔ ni oshɛ oti ni okɛma ohiɛ lɛ he lɛ oshwie shi ni ofɔ mli kwɛmɔ. Tomáš ni wɔwie ehe kɛtsɔ hiɛ lɛ wie akɛ: “Kɛ́ miyɛ yiŋtoi babaoo hewɔ ni esa akɛ mashɛ oti ko he lɛ, no hãa mimiaa mihiɛ waa koni mashɛ he.”

7. Mɛni ye ebua Julio kɛ eŋa koni amɛnyɛ amɛshɛ oti ni amɛkɛma amɛhiɛ lɛ he?

⁷ Okɛ mɛi ni baawo bo hewalɛ ni oshɛ oti ni okɛma ohiɛ lɛ he lɛ abɔ. (Abɛi 13:20) Nyɛmi nuu ko ni atsɛɔ lɛ Julio lɛ kɛ eŋa kɛma amɛhiɛ akɛ amɛbaafã kɛya he ni hiamɔ lɛ da yɛ. Naa nɔ ni ye ebua amɛ ni amɛnyɛ amɛshɛ oti nɛɛ he. Julio wie akɛ: “Wɔkɛ nanemɛi ni nyaa oti ni wɔkɛma wɔhiɛ lɛ he lɛ bɔ, ni bei komɛi lɛ wɔkɛ amɛ gbaa oti ni ma wɔhiɛ lɛ he sane. Amɛteŋ mɛi babaoo enyɛ eshɛ otii ni tamɔ nakai lɛ ahe, no hewɔ lɛ amɛnyɛ amɛwo wɔ ŋaa kpakpai ni baaye abua wɔ ni wɔshɛ oti lɛ he. Yɛ be kɛ beiaŋ lɛ, amɛbiɔ wɔ bɔ ni nibii yaa lɛ, ni amɛwoɔ wɔ hewalɛ kɛ́ amɛna akɛ nakai feemɔ he miihia wɔ.”

8. Kɛ́ ja nɔ ko etsirɛ wɔ dani wɔbaafee nibii ni baahã wɔshɛ oti ni ma wɔhiɛ lɛ he lɛ, mɛni baanyɛ aba? (Kwɛmɔ mfoniri lɛ hu.)

⁸ Yɛ anɔkwale mli lɛ, bei komɛi lɛ, nɔ ko tsirɛɛɛ wɔ ni wɔfee nibii ni baahã wɔshɛ oti ni ma wɔhiɛ lɛ he. Shi kɛ́ eba lɛ nakai lɛ, ani no tsɔɔ akɛ wɔnyɛŋ wɔshɛ oti ni ma wɔhiɛ lɛ he? Dabi, etsɔɔɔ nakai. Bo lɛ, hã wɔkɛ kɔɔyɔɔ lɛ kɛ lɛlɛ lɛ ni abalaa lɛ ma nɔ lɛ he nɔkwɛmɔnɔ lɛ nɔŋŋ atsɔɔ enɛ mli. Kɔɔyɔɔ lɛ ji nɔ ni tsiɔ lɛlɛ lɛ kɛyaa he ni eyaa lɛ. Shi esoro bɔ ni kɔɔyɔɔ lɛ tswaa ehãa gbi fɛɛ gbi. Gbii komɛi po lɛ, etswaaa kwraa. Kɛ́ eba lɛ nakai lɛ, ani lɛlɛ lɛ baawa edamɔ shi? Jeee doo. Lɛji babaoo yɛ ni moto loo tablɔi yɛ he. Abaanyɛ akɛ nibii nɛɛ eko fɛɛ eko atsu nii koni lɛlɛ lɛ ayashɛ he ni eyaa lɛ. Wɔbaanyɛ wɔkɛ shwelɛ ni wɔyɔɔ akɛ wɔshɛ oti ni ma wɔhiɛ lɛ he lɛ ato kɔɔyɔɔ lɛ he. Jeee be fɛɛ be ni nakai shwelɛ lɛ mli baawa. Bei komɛi po lɛ, nɔ ko kanyaŋ wɔ ni wɔfee nibii ni baahã wɔshɛ oti ni ma wɔhiɛ lɛ he. No hewɔ lɛ, kɛ́ eba lɛ akɛ ja nɔ ko miitsirɛ wɔ dani wɔbaafee nibii ni baahã wɔshɛ oti ni ma wɔhiɛ lɛ he lɛ, no lɛ, wɔshɛŋ he kɔkɔɔkɔ. Bɔ ni kɛ́ kɔɔyɔɔ etswaaa po lɛ akɛ nibii krokomɛi kudɔɔ lɛlɛ lɛ koni enyɛ eya ehiɛ lɛ, wɔ hu nibii komɛi yɛ ni wɔbaanyɛ wɔfee koni wɔnyɛ wɔshɛ oti ni ma wɔhiɛ lɛ he, kɛ́ nɔ ko tsirɛɛɛ wɔ po. Lɛɛlɛŋ, wɔnáŋ lɛ mlɛo moŋ, shi kɛ́ wɔmia wɔhiɛ wɔshɛ oti ni ma wɔhiɛ lɛ he lɛ, wɔmii baashɛ wɔhe waa. Shi dani  wɔbaasusu nibii ni wɔbaanyɛ wɔfee lɛ ahe lɛ, nyɛhãa wɔsusua sanebimɔ nɛɛ he.

9. Kɛ́ wɔkɛ oti ko ema wɔhiɛ shi nɔ ko tsirɛɛɛ wɔ ni wɔfee nɔ ni esa akɛ wɔfee koni wɔshɛ he lɛ, ani esa akɛ wɔya nɔ wɔmia wɔhiɛ ni wɔshɛ he? Mɛni hewɔ okɛɔ nakai?

⁹ Yehowa miisumɔ ni wɔjɛ wɔtsuiŋ wɔsɔmɔ lɛ kɛ miishɛɛ. (Lala 100:2; 2 Kor. 9:7) No hewɔ lɛ, kɛ́ wɔkɛ oti ko ema wɔhiɛ shi nɔ ko tsirɛɛɛ wɔ ni wɔtsu nii koni wɔshɛ he lɛ, ani esa akɛ wɔya nɔ wɔmia wɔhiɛ ni wɔshɛ he? Hã wɔsusu bɔfo Paulo he akɛ nɔkwɛmɔnɔ wɔkwɛ. Ewie akɛ: “Migbálaa migbɔmɔtso lɛ mai ni miyeɔ lɛ nyɔŋ.” (1 Kor. 9:25-27) Paulo mia ehiɛ efee nibii ni ele akɛ esa akɛ efee lɛ kɛ́ amɛfeemɔ bɛ ehiɛ po. Ani Yehowa ná nɔ ni Paulo fee nɛɛ he miishɛɛ? Hɛɛ, ená he miishɛɛ waa ni ejɔɔ lɛ.​—2 Tim. 4:7, 8.

10. Kɛ́ nɔ ko tsirɛɛɛ wɔ ni wɔshɛ oti ko ni wɔkɛma wɔhiɛ lɛ he, shi fɛɛ sɛɛ lɛ wɔmiimia wɔhiɛ ni wɔshɛ he lɛ, mɛɛ gbɛ nɔ wɔnáa he sɛɛ?

¹⁰ Yehowa náa miishɛɛ kɛ́ ena akɛ wɔ hu wɔmiibɔ mɔdɛŋ ni wɔshɛ oti ko ni wɔkɛma wɔhiɛ lɛ he, eyɛ mli akɛ nɔ ko tsirɛɛɛ wɔ ni wɔshɛ nakai oti lɛ he po. Nɔ hewɔ ni enáa miishɛɛ lɛ ji, ele akɛ eyɛ mli akɛ nɔ ko tsirɛɛɛ wɔ ni wɔshɛ oti lɛ he moŋ, shi wɔmiimia wɔhiɛ ni wɔshɛ he kɛ̃, ejaakɛ wɔsumɔɔ lɛ. Bɔ ni Yehowa jɔɔ Paulo lɛ, nakai nɔŋŋ ebaajɔɔ wɔ hu. (Lala 126:5) Ni kɛ́ wɔna bɔ ni ejɔɔ wɔ lɛ, ekolɛ no po baatsirɛ wɔ ni wɔmia wɔhiɛ ni wɔshɛ oti lɛ he. Nyɛmi yoo ko ni jɛ Poland ni atsɛɔ lɛ Lucyna lɛ wie akɛ: “Bei komɛi lɛ, minuuu he akɛ miya shiɛmɔ, titri lɛ kɛ́ etɔ mi waa. Shi kɛ́ mimia mihiɛ mitee lɛ, mináa miishɛɛ waa, ni minaa enɛ akɛ eji nikeenii kpele.” No hewɔ lɛ, kɛ́ nɔ ko tsirɛɛɛ wɔ ni wɔmia wɔhiɛ ni wɔshɛ oti ko ni wɔkɛma wɔhiɛ lɛ he lɛ, mɛni wɔbaanyɛ wɔfee?

11. Mɛɛ gbɛ nɔ Yehowa baanyɛ eye ebua wɔ ni wɔye wɔhe nɔ?

¹¹ Sɔlemɔ obi Yehowa ni eye ebua bo ni oye ohe nɔ. Kɛ́ akɛɛ mɔ ko yeɔ ehe nɔ lɛ, belɛ jeee nɔ fɛɛ nɔ ni baa ejwɛŋmɔ mli akɛ efee lɛ efeɔ, ni ehãaa ehenumɔi hu akudɔ lɛ. Bei pii lɛ, wɔyeɔ wɔhe nɔ koni wɔkafee nɔ ko gbonyo. Shi nakai su lɛ nɔŋŋ baanyɛ aye abua wɔ ni wɔfee nɔ ko kpakpa hu, titri lɛ, kɛ́ nii lɛ feemɔ wa loo nɔ ko tsirɛɛɛ wɔ akɛ wɔfee. Henɔyeli fata yibii ni mumɔ lɛ woɔ lɛ ahe, no hewɔ lɛ, esa akɛ wɔbi Yehowa mumɔ krɔŋkrɔŋ lɛ koni no aye abua wɔ ni wɔjie su ni he hiaa nɛɛ kpo jogbaŋŋ. (Luka 11:13; Gal. 5:22, 23) Sɔlemɔ ji nɔ ni ye ebua David ni wɔtsĩ etã kɛtsɔ hiɛ lɛ. Kɛ́ obaakai lɛ, no mli lɛ, eetao efɔ aŋkro nikasemɔ feemɔ. Ewie akɛ: “Mikpa Yehowa fai ni eye ebua mi ni maye mihe nɔ. Eye ebua mi ni minyɛ mibɔi nikasemɔ ni mifolɔɔɔ mli.”

12. Mɛɛ gbɛ nɔ shishitoo mla ni yɔɔ Jajelɔ 11:4 lɛ baanyɛ aye abua wɔ ni wɔshɛ oti ko ni wɔkɛma wɔhiɛ lɛ he?

¹² Kaakɛɛ akɛ oomɛ ni nibii ahi dã. Yɛ jeŋ fɔŋ nɛɛ mli lɛ, ewa akɛ nɔ fɛɛ nɔ baahi yɛ wɔshihilɛ mli. No hewɔ lɛ, kɛ́ wɔkɛɛ wɔmiimɛ ni nibii ahi dani wɔtsu oti ko ni wɔkɛma wɔhiɛ lɛ he nii lɛ, ekolɛ wɔshɛŋ he kɔkɔɔkɔ. (Kanemɔ Jajelɔ 11:4.) Nyɛmi nuu ko ni atsɛɔ lɛ Dayniel lɛ wie akɛ: “Yɛ jeŋ nɛɛ mli lɛ, onyɛŋ oná nɔ fɛɛ nɔ pɛpɛɛpɛ. No hewɔ lɛ, kaakɛɛ akɛ oomɛ ni nibii ahi. Jee nitsumɔ lɛ shishi.” Nyɛmi nuu ko ni yɔɔ Uganda ni atsɛɔ lɛ Paul lɛ tsɔɔ nɔ kroko hewɔ ni esaaa akɛ wɔkɛɔ akɛ wɔmiimɛ ni nibii ahi dã. Ewie akɛ: “Kɛ́ nibii amli wa, shi fɛɛ sɛɛ lɛ wɔje nɔ ko shishi lɛ, Yehowa baaye ebua wɔ.”​—Mal. 3:10.

13. Mɛni hewɔ ehi akɛ wɔkɛ otii bibiibibii baamamɔ wɔhiɛ?

¹³ Okɛ otii bibiibibii aje shishi. Bei komɛi lɛ, nɔ ko tsirɛɛɛ wɔ ni wɔshɛ oti ni wɔkɛma wɔhiɛ lɛ he ejaakɛ wɔnuɔ he akɛ ebaawa kɛhã wɔ akɛ wɔbaashɛ he. Ani nakai eji yɛ ogbɛfaŋ? Kɛ́ nakai eji lɛ, ani obaanyɛ okɛ otii bibiibibii ni baaye abua bo ni oshɛ oti ni okɛma ohiɛ lɛ he lɛ amamɔ ohiɛ? Akɛ nɔkwɛmɔnɔ lɛ, kɛ́ ootao ni oná Kristofoi asu ko lɛ, klɛŋklɛŋ lɛ, miamɔ ohiɛ ni ojie lɛ kpo yɛ nibii bibiibibii po amli. Loo kɛ́ oti ni ma ohiɛ ji, ni okane Biblia muu lɛ fɛɛ lɛ, obaanyɛ oto gbɛjianɔ ni daa gbi lɛ okane fioo. Tomáš ni wɔtsĩ etã yɛ nikasemɔ nɛɛ shishijee lɛ kɛma ehiɛ akɛ ebaakane Biblia muu lɛ fɛɛ yɛ afi mli, shi eyanyɛɛɛ. Ewie  akɛ: “Be ni mibɔi kanemɔ lɛ, mina akɛ yitsei abɔ ni mikɛma mihiɛ akɛ makane daa gbi lɛ fa tsɔ. No hewɔ lɛ, mije Biblia lɛ kanemɔ shishi ekoŋŋ, shi agbɛnɛ lɛ, mikɛma mihiɛ akɛ makane kukuji fioo pɛ daa gbi ni majwɛŋ nɔ. Enɛ hã Biblia lɛ kanemɔ baŋɔɔ minaa waa.” Biblia lɛ kanemɔ baŋɔɔ Tomáš naa aahu akɛ, fiofio lɛ, be ni ekɛkaneɔ lɛ bafa fe tsutsu lɛ, ni naagbee aahu lɛ, enyɛ ekane Biblia muu lɛ fɛɛ. c

14. Mɛɛ nibii baanyɛ ahã ewa kɛhã wɔ akɛ wɔbaashɛ otii ni wɔkɛmamɔ wɔhiɛ lɛ ahe?

¹⁴ Dɔlɛ sane ji akɛ, kɛ́ wɔmiishwe waa ni wɔshɛ oti ko ni wɔkɛma wɔhiɛ lɛ he loo wɔmiimia wɔhiɛ waa ni wɔtsu he nii po lɛ, nɔ ko baanyɛ agbala wɔsɛɛ. Akɛ nɔkwɛmɔnɔ lɛ, nɔ ko baanyɛ aba trukaa ni baahe be ni wɔto akɛ wɔkɛbaatsu oti ni wɔkɛma wɔhiɛ lɛ he nii lɛ. (Jaj. 9:11) Loo ekolɛ, wɔkɛ naagba ko baakpe ni baahã wɔnijiaŋ aje wui ni wɔnuŋ he akɛ wɔtiu oti ni wɔkɛma wɔhiɛ lɛ sɛɛ. (Abɛi 24:10) Loo ekolɛ, emuu ni wɔyeee lɛ hewɔ lɛ, wɔbaafee nɔ ko ni baahã ewa kɛhã wɔ akɛ wɔbaashɛ oti ni wɔkɛma wɔhiɛ lɛ he. (Rom. 7:23) Bei komɛi hu lɛ, tɔlɛ kɛkɛ po baanyɛ ahã ewa kɛhã wɔ akɛ wɔbaashɛ oti ni wɔkɛma wɔhiɛ lɛ he. (Mat. 26:43) Kɛ́ nɔ ko gbala osɛɛ po lɛ, mɛni baanyɛ aye abua bo ni okahã no je onijiaŋ wui?

15. Kɛ́ nɔ ko gbala osɛɛ lɛ, ani no tsɔɔ akɛ onyɛŋ oshɛ oti ni okɛma ohiɛ lɛ he? Mɛni hewɔ okɛɔ nakai? (Lala 145:14)

¹⁵ Kaimɔ akɛ, kɛ́ nɔ ko gbala osɛɛ lɛ, no etsɔɔɔ akɛ esaaa akɛ otiuɔ oti ni okɛma ohiɛ lɛ sɛɛ dɔŋŋ. Biblia lɛ hãa wɔleɔ akɛ, wɔkɛ naagbai baakpe shii abɔ. Shi ehãa wɔleɔ hu akɛ, ekɔɔɔ he eko nɔ ni baaba lɛ, wɔbaanyɛ wɔshɛ oti ni ma wɔhiɛ lɛ he, titri lɛ, kɛ́ wɔhã Yehowa ye ebua wɔ. (Kanemɔ Lala 145:14.) Philip ni wɔtsĩ etã kɛtsɔ hiɛ lɛ wie akɛ: “Mikɛ mijwɛŋmɔ emaaa shii abɔ ni minyɛɛɛ mashɛ oti ni mikɛma mihiɛ lɛ he lɛ nɔ. Moŋ lɛ, mikɛ mijwɛŋmɔ maa shii abɔ ni mikaa akɛ matsu he nii ekoŋŋ lɛ nɔ.” David ni wɔtsĩ etã kɛtsɔ hiɛ lɛ wie akɛ: “Kɛ́ nɔ ko gbala misɛɛ loo migbi lɛ  eyaaa lɛ jogbaŋŋ lɛ, mihãaa no aje minijiaŋ wui. Moŋ lɛ, minaa lɛ akɛ hegbɛ ni miná ni mikɛbaatsɔɔ Yehowa akɛ misumɔɔ lɛ waa.” Lɛɛlɛŋ, kɛ́ nɔ ko gbala wɔsɛɛ shi wɔtee nɔ wɔfee nibii ni baahã wɔshɛ oti ni wɔkɛma wɔhiɛ lɛ he lɛ, wɔhãa Yehowa naa akɛ wɔmiisumɔ ni wɔsa ehiɛ. Ŋwanejee ko bɛ he akɛ, kɛ́ Yehowa na akɛ oofee bɔ fɛɛ bɔ ni obaanyɛ ni oshɛ oti ni okɛma ohiɛ lɛ he lɛ, enáa miishɛɛ waa!

16. Bei komɛi lɛ kɛ́ nɔ ko ba ni wɔyanyɛɛɛ wɔshɛ oti ko ni wɔkɛma wɔhiɛ lɛ he lɛ, mɛni esa akɛ wɔfee?

¹⁶ Kɛ́ nɔ ko gbala osɛɛ lɛ, kasemɔ nii kɛjɛ mli. Susumɔ nii ahe ni okwɛ akɛ mɛni hã eba lɛ nakai, ni obi ohe akɛ, ‘Mɛni manyɛ mafee koni ekaba lɛ nakai dɔŋŋ?’ (Abɛi 27:12) Bei komɛi lɛ, kɛ́ oofee bɔ fɛɛ bɔ ni obaanyɛ shi onyɛɛɛ oshɛ oti ni okɛma ohiɛ lɛ he lɛ, eeenyɛ efee akɛ ejeee oti ni obaanyɛ oshɛ he. No hewɔ lɛ, susumɔ oti ni okɛma ohiɛ lɛ he ekoŋŋ ni okwɛ akɛ, obaanyɛ oshɛ he lɛɛlɛŋ lo. d Kɛ́ ona akɛ onyɛŋ oshɛ nakai oti lɛ he ni no hewɔ lɛ otsake lɛ, Yehowa enaŋ bo akɛ mɔ ko ni ebɔɔɔ mɔdɛŋ.​—2 Kor. 8:12.

17. Mɛni hewɔ esaaa akɛ wɔhiɛ kpaa nibii ni wɔnyɛ wɔtsu momo lɛ anɔ?

¹⁷ Kaahã ohiɛ kpa nibii ni obɔ mɔdɛŋ oshɛ he lɛ anɔ. Biblia lɛ kɛɔ akɛ, ‘Nyɔŋmɔ jeee mɔ ni ejaaa ni ehiɛ baakpa nyɛnitsumɔ lɛ nɔ.’ (Heb. 6:10) No hewɔ lɛ, esaaa akɛ bo hu ohiɛ kpaa nɔ ni otsu lɛ nɔ. Ekolɛ, onyɛ okase Yehowa he nii ni obatsɔ enaanyo, loo ekolɛ ogbaa mɛi ehe sane, loo ekolɛ otee ohiɛ ni abaptisi bo. Jwɛŋmɔ nibii nɛɛ ahe. Bɔ ni onyɛ otee ohiɛ ni oshɛ otii nɛɛ ni okɛmamɔ ohiɛ be ko ni eho lɛ ahe lɛ, nakai nɔŋŋ obaanyɛ oya ohiɛ ni oshɛ oti ni okɛma ohiɛ bianɛ lɛ hu he.​—Fip. 3:16.

18. Be ni wɔbɔɔ mɔdɛŋ ni wɔshɛ oti ni ma wɔhiɛ lɛ he lɛ, mɛni esaaa akɛ wɔhiɛ kpaa nɔ? (Kwɛmɔ mfoniri lɛ hu.)

¹⁸ Kɛ́ ohã Yehowa ye ebua bo lɛ, obaanyɛ oshɛ oti ni ma ohiɛ lɛ he, tamɔ bɔ ni mɔ ko ni ta lɛlɛ mli nyɛɔ eyashɛɔ he ni eyaa lɛ shweshweeshwe lɛ. Kaimɔ akɛ, kɛ́ mɔ ko kɛ lɛlɛ miifã gbɛ lɛ, enaa nibii fɛfɛji pii dani eyashɛɔ he ni eyaa lɛ po. Nakai nɔŋŋ bo hu be ni oyaa nɔ ofeɔ nibii koni onyɛ oshɛ oti ni okɛma ohiɛ lɛ he lɛ, okɛ ohiɛ afɔ̃ shi koni ona gbɛi srɔtoi ni Yehowa yeɔ ebuaa bo kɛ bɔ ni ejɔɔ bo lɛ. (2 Kor. 4:7) Kɛ́ ohãaa onijiaŋ aje wui lɛ, obaaná jɔɔmɔi ni fe nɔ ni onáa bianɛ lɛ po.​—Gal. 6:9.