ANI ewa kɛhã bo akɛ obaafee aŋkro nikasemɔ daa otsi? Wɔteŋ mɔ fɛɛ mɔ nuɔ he nakai bei komɛi. Shi bo lɛ, susumɔ nibii komɛi ni wɔfeɔ daa tamɔ hejuu nɛkɛ lɛ he okwɛ. Hejuu heɔ wɔbe kɛ wɔhewalɛ, shi kɛ́ wɔju wɔhe lɛ, wɔhe jɔɔ wɔ diɛŋtsɛ! Biblia lɛ kasemɔ hu tamɔ nɔ ni wɔkɛ “hejuu nu ni ji wiemɔ lɛ” miiju wɔhe, ni ebaahã wɔhe ajɔ wɔ. (Efe. 5:26) Naa nibii komɛi ni obaanyɛ ofee koni onyɛ ofee aŋkro nikasemɔ daa otsi:

• Too be. Aŋkro nikasemɔ ji “nibii ni he hiaa waa” ni esaaa akɛ Kristofonyo kuɔ ehiɛ eshwieɔ amɛnɔ lɛ ateŋ ekome. (Fip. 1:10) Bɔ ni afee ni onyɛ okai be ni oto ni okɛbaakase nii lɛ, obaanyɛ oŋma ni okɛfɔ̃ he ko loo okɛkpɛtɛ he ko ni ewaaa akɛ obaana, tamɔ oshinaa loo ofriji he nɛkɛ. Aloo obaanyɛ osɛɛti alarm yɛ ofoŋ lɛ nɔ koni kɛ́ eshwɛ fioo ni be ni oto lɛ baashɛ lɛ, ekai bo.

• Kasemɔ nii lɛ yɛ onyɛmɔ naa. Mɛi komɛi yɛ ni amɛbaanyɛ amɛkase nii be kplaŋŋ ni etɔɔɔ amɛ, ni mɛi komɛi hu yɛ ni amɛnyɛɛɛ nakai amɛfee, no hewɔ lɛ, amɛfeɔ lɛ fiofio. Bo ole ohe. No hewɔ lɛ, too onikasemɔ lɛ he gbɛjianɔ yɛ onyɛmɔ naa. Kɛ́ be ni oto lɛ shɛ, ni nikasemɔ lɛ bɛ ohiɛ lɛ, obaanyɛ omia ohiɛ ni okase nii lɛ minitii 10 ko pɛ. Ehi akɛ obaakase nii minitii 10 fe ni okaseee kwraa. Ni ekolɛ, be ni okase nii lɛ minitii 10 sɛɛ lɛ, obaana akɛ nikasemɔ lɛ eŋɔɔ onaa aahu akɛ obaasumɔ ni otsa nɔ.—Fip. 2:13.

• Tsɔ hiɛ ohala nɔ ni obaakase lɛ. Kɛ́ omɛ aahu kɛyashi be ni oto lɛ shɛ dani okpɛ oyiŋ yɛ nɔ ni obaakase lɛ he lɛ, no lɛ, ekolɛ anyɛŋ akɛɛ akɛ ‘okɛ obe miitsu nii jogbaŋŋ.’ (Efe. 5:16) No hewɔ lɛ, obaanyɛ oŋmala nibii ni obaasumɔ ni okase lɛ oshwie shi. Kɛ́ nɔ ko ba ojwɛŋmɔ mli ni obaasumɔ ni okase lɛ, ŋmaa ofɔ̃ shi. Ni be fɛɛ be ni obaakase nii otã lɛ, obaanyɛ oŋma nɔ kroko ni eba ojwɛŋmɔ mli ni obaasumɔ ni okase lɛ ofata nɔ ni oŋma momo lɛ he.

• Kaafee kpɛŋŋ. Yɛ anɔkwale mli lɛ, nɔ ni he hiaa ji ni obaakase nii lɛ daa otsi. No hewɔ lɛ, kaafee kpɛŋŋ. Kɛ́ ehe bahia lɛ, tsakemɔ gbi kɛ be ni oto ni okɛkaseɔ nii lɛ, ŋmɛlɛtswai abɔ ni oto akɛ okɛbaakase nii lɛ, loo nibii ni okaseɔ lɛ.

Kɛ́ wɔkase nii daa otsi lɛ, wɔbaaná he sɛɛ. No ji akɛ, wɔkɛ Yehowa teŋ naanyobɔɔ lɛ mli baawa, wɔbaakpɛ yiŋ kpakpai, ni wɔhe baajɔ wɔ hu.—Yos. 1:8.