Paul: Wɔmii eshɛ wɔhe waa! Ekolɛ obaabi akɛ, mɛni hewɔ wɔmii eshɛ wɔhe waa lɛ? Wɔmiifã gbɛ kɛmiiya Liberia yɛ Afrika Anaigbɛ, ni ji he ni ahã wɔyatsu nii yɛ klɛŋklɛŋ kwraa akɛ maŋsɛɛ sɔɔlɔi lɛ. Wɔfã gbɛ nɛɛ yɛ November 1985. Plen ni wɔta mli lɛ yawa yɛ Senegal. Anne wie akɛ, “Yɛ ŋmɛlɛtswaa kome pɛ mli lɛ, wɔbaayashɛ Liberia!” Shi wɔnu ni aatswa adafi akɛ: “Mɛi fɛɛ ni miiya Liberia lɛ ayi shi yɛ biɛ. Afee coup yɛ jɛmɛ, hewɔ lɛ wɔyaŋ jɛmɛ.” Wɔhi Senegal gbii nyɔŋma yɛ maŋsɛɛ sɔɔlɔi ni yɔɔ jɛmɛ lɛ amasɛi. Wɔnu akɛ agbe mɛi babaoo yɛ Liberia, ni amralofoi lɛ eŋmɛɛɛ gbɛ ni mɛi aje kpo gbɛkɛ kɛjeee nakai lɛ abaagbe amɛ.

Anne: Wɔjeee mɛi ni jeɔ shi. Yɛ anɔkwale mli lɛ, be ni miji gbekɛ lɛ, atsɛɔ mi Annie Gbeyeilɔ. Kɛ́ miifo gbɛ mli po lɛ, mitsui fãa! Shi wɔtswa wɔfai shi akɛ wɔbaaya Liberia, tsɛbelɛ jɛmɛ yɛ oshãra.

Paul: Mi kɛ Anne fɛɛ da yɛ kpokpaa kome nɔ yɛ England anaigbɛ. Be ni wɔji gbekɛbii lɛ, mifɔlɔi kɛ Anne mami woɔ wɔ hewalɛ ni wɔkɛ wɔhe awo gbɛgbamɔ nitsumɔ lɛ mli. No hewɔ lɛ, be ni wɔgbe sɛkɛndre skul naa nɔŋŋ lɛ, wɔbɔi gbɛgbamɔ nitsumɔ lɛ. Eŋɔɔ amɛnáa waa akɛ wɔmiisumɔ ni wɔkɛ be fɛɛ sɔɔmɔ nitsumɔ lɛ afee wɔnitsumɔ. Be ni miye afii 19 lɛ, afɔ̃ mi nine koni mibatsu nii yɛ Betel, ni be ni wɔbote gbãla mli yɛ afi 1982 lɛ, Anne bafata mihe yɛ jɛmɛ.

Anne: Wɔsumɔɔ Betel, shi wɔná kulɛ wɔmiisɔmɔ yɛ he ni hiamɔ lɛ da yɛ. Wɔkɛ nyɛmimɛi ni kulɛ amɛji maŋsɛɛ sɔɔlɔi lɛ tsu nii yɛ Betel, ni amɛnɔkwɛmɔnɔ kpakpa lɛ kɛ amɛniiashikpamɔi lɛ hã wɔ hu wɔshwe akɛ wɔsɔmɔ akɛ maŋsɛɛ sɔɔlɔi. Wɔsɔle yɛ enɛ he daa gbɛkɛ afii etɛ sɔŋŋ. No hewɔ lɛ, be ni afɔ̃ wɔ nine ni wɔya Gilead skul lɛ yɛ 1985 lɛ, wɔná miishɛɛ waa! Wɔklas lɛ ji klas ni ji 79 lɛ. Be ni wɔgbe skul lɛ naa lɛ, akɛɛ wɔyasɔmɔ yɛ Liberia, yɛ Afrika Anaigbɛ.

Paul: Be ni aŋmɛ gbɛ ni plen ashi Senegal kɛya Liberia lɛ, wɔyata klɛŋklɛŋ plen ni miiya Liberia lɛ mli. Be ni wɔyashɛ lɛ, wɔna akɛ mɛi atsui efã ni aŋmɛɛɛ gbɛ lolo ni mɛi aje kpo gbɛkɛ. Mɛi miishe gbeyei waa aahu akɛ, kɛ́ mɔ ko fã etsɔne ni egbɛɛ waa lɛ, amɛtsui fãa ni amɛbolɔɔ ni amɛjoɔ foi. Wɔkaneɔ Lala wolo lɛ fãi komɛi daa gbɛkɛ koni wɔkaye wɔtsui tsɔ. Yɛ bɔ ni shihilɛ lɛ wa yɛ Liberia lɛ fɛɛ sɛɛ lɛ, wɔsumɔɔ nitsumɔ ni wɔtsuɔ lɛ waa. Anne yashiɛɔ  daa gbi, ni mi kɛ John Charuk tsuɔ nii yɛ Betel. a Mikase nii babaoo yɛ Nyɛminuu Charuk ŋɔɔ ejaakɛ no mli lɛ ehi Liberia etsɛ ni ele naagbai kɛ shihilɛi ni nyɛmimɛi lɛ tsɔɔ mli lɛ jogbaŋŋ.

Anne: Mɛni hã yɛ be kukuoo mli lɛ wɔbasumɔ nitsumɔ ni wɔtsuɔ yɛ Liberia lɛ waa lɛ? Wɔnyɛmimɛi hii kɛ yei lɛ hewɔ. Amɛyɛ suɔmɔ, amɛhe yɛ miishɛɛ, ni amɛyeɔ anɔkwa. Amɛbatsɔmɔ wɔnanemɛi kpaakpai kɛ wɔweku hee. Amɛwo wɔ ŋaa kpakpai ni amɛwo wɔ hewalɛ hu koni wɔfi shi yɛ anɔkwale lɛ mli. Shiɛmɔ ŋɔɔ yɛ jɛmɛ waa. Kɛ́ oshiɛ ohã amɛ ni ooshi kɛmiiya he kroko lɛ, amɛsumɔɔɔ kwraa! He fɛɛ he ni obaana mɛi yɛ lɛ amɛmiigba Biblia mli sane. Ewaaa akɛ obaayafata he ni agba sane. Wɔná Biblia mli nikaselɔi pii, ni wɔnine nyɛɛɛ akple amɛhe po. Shikpɔŋkuku lɛ mli ŋɔɔ naakpa!

Paul: Afii ejwɛ ho ni efee tamɔ nɔ ni toiŋjɔlɛ yɛ Liberia. Shi trukaa yɛ afi 1989 lɛ nibii tsake kwraa, abɔi ta gbeyeigbeyei ko wuu. Yɛ July 2, 1990 lɛ, mɛi ni miiwu amɛmiishi nɔyeli ni yeɔ nɔ yɛ nakai beiaŋ lɛ ŋɔ he ko ni bɛŋkɛ Betel. Nyɔji etɛ ho ni wɔnyɛɛɛ wɔkɛ mɛi ni yɔɔ maŋsɛɛ lɛ ashãra yɛ gbɛ ko kwraa nɔ, ni wɔwekumɛi kɛ nitsumɔhe yitso lɛ hu fata he. Basabasafeemɔ tee nɔ yɛ he fɛɛ he, anáaa niyenii, ni ato yei babaoo kabonaa. Naagbai nɛɛ tee nɔ afii 14 sɔŋŋ yɛ maŋ muu lɛ fɛɛ nɔ.

Anne: Mɛi kɛ mɛi ni kɛ amɛ jɛɛɛ weku kome mli lɛ wu ta ni amɛgbegbee amɛhe. Tawulɔi gbɛ amɛshwã he fɛɛ he. Amɛhiɛ tawuu nii babaoo, amɛhesaamɔ lɛ yɛ nɔ ko ko, ni amɛyaa shĩa fɛɛ shĩa amɛyaloɔ nɔ fɛɛ nɔ ni amɛsumɔɔ. Tawulɔi lɛ ekomɛi lɛ, kɛ́ amɛmiigbe mɛi lɛ, amɛnaa lɛ tamɔ nɔ ni amɛmiigbe wuɔi. Tawulɔi lɛ tsĩɔ gbɛjegbɛi lɛ, ni bei pii lɛ amɛgbeɔ mɛi ni miitao atsɔ jɛmɛ lɛ. No sɛɛ lɛ, amɛbuaa gbohii lɛ anaa ni amɛshɔ̃ɔ amɛ gɔŋ. Ni afee enɛ po yɛ he ko ni bɛŋkɛ Betel hu. Agbe wɔnyɛmimɛi Odasefoi lɛ ateŋ ekomɛi ni maŋsɛɛ sɔɔlɔi enyɔ komɛi ni wɔshwɛɛɛ amɛhe lɛ po fata he.

Nyɛmimɛi lɛ kɛ amɛwala wo oshãra mli, ni amɛkɛ nyɛmimɛi ni jɛ wekui krokomɛi amli ni aatao amɛ agbe lɛ to. Maŋsɛɛ sɔɔlɔi kɛ Betelbii hu kɛ nyɛmimɛi to. Yɛ Betel lɛ, nyɛmimɛi komɛi ni ejo foi yɛ ta lɛ naa lɛ ateŋ mɛi komɛi kɛ wɔ kɛ Betelbii krokomɛi hi wɔtsũi lɛ amli yɛ ŋwɛitsũ lɛ nɔ, ni amɛteŋ mɛi komɛi kɛ Betelbii krokomɛi hu hi ŋwɛitsũ lɛ shishi. Wɔkɛ weku ko ni amɛyi kpawo lɛ hi wɔtsũ lɛ mli.

Paul: Daa gbi lɛ, tawulɔi lɛ baa Betel shĩa lɛ koni amɛbakwɛ kɛji wɔkɛ mɛi eto jɛmɛ lo. Be fɛɛ be ni amɛbaaba lɛ, mɛi enyɔ kɛ amɛyawieɔ yɛ Betel geeti lɛ naa, ni mɛi enyɔ hu kwɛɔ nɔ ni yaa nɔ lɛ kɛjɛɔ samfɛlɛ ko mli. Kɛ́ nyɛmimɛi ni kɛ tawulɔi lɛ wieɔ lɛ kɛ amɛniji tsɔɔ amɛhiɛ gbɛ lɛ, belɛ toiŋjɔlɛ yɛ. Shi kɛ́ amɛkɛ amɛniji wo amɛsɛɛ pɛ, belɛ no tsɔɔ akɛ  tawulɔi lɛ amli efũ, ni no hewɔ lɛ, nyɛmimɛi ni miikwɛ nɔ ni yaa nɔ yɛ samfɛlɛ ko naa lɛ feɔ oya nɔŋŋ koni amɛkɛ wɔnyɛmimɛi lɛ ayato.

Anne: Gbi ko lɛ, akɛni nyɛmimɛi lɛ nyɛɛɛ atsĩ tawulɔi ni mli efũ lɛ anaa hewɔ lɛ, amɛbote Betel shĩa lɛ mli. Mikɛ nyɛmi yoo ko bote hejuuhe ko ni wɔŋa wɔyi wɔwo jɛmɛ. Kabɔdi ko yɛ hejuuhe lɛ ni adeka ko ni yɔɔ eshishigbɛ lɛ anaaa. Nyɛmi yoo lɛ tee ehe yɛ adeka ni mli edaaa nɛɛ mli. Tawulɔi lɛ kwɔ kɛba ŋwɛitsũ lɛ nɔ ni amɛhiɛ tui. Amɛshimɔ wɔshinaa lɛ kɛ mlifu. Paul kpa amɛ fai ni ekɛɛ amɛ akɛ, “Miŋa etee hejuuhe lɛ fioo.” Be ni miiŋa he ni nyɛmi yoo lɛ etee ehe yɛ lɛ, adeka lɛ gbɛɛ fioo. Kɛkɛ ni mito nibii lɛ fɛɛ miwo kabɔdi lɛ mli ni enɛ he mi be ko. Miyasusu akɛ ekolɛ tawulɔi lɛ miibi amɛhe akɛ mɛni mifeɔ yɛ jɛmɛ lɛ, ni no hã mishe gbeyei aahu akɛ mikpokpo waa. Kɛ́ migbele shinaa lɛ ni tawulɔi lɛ na akɛ miikpokpo lɛ, amɛbaakɔ sɛɛ akɛ miifee nɔ ko ni misumɔɔɔ ni amɛleɔ. No hewɔ lɛ, mɛni mafee? Misɔle yɛ miyitsoŋ ni mikpa Yehowa fai ni ewa mi. Kɛkɛ ni migbele shinaa lɛ, ni miŋa amɛ ni mikpokpooo. Amɛteŋ mɔ kome tsi mi yɛ shinaa lɛ naa, ni ebote hejuuhe lɛ, ni egbele kabɔdi lɛ, ni ejiejie nibii ni yɔɔ mli lɛ eshwie. Enaa kpɛ ehe akɛ enaaa mɔ ko yɛ mli. Ekɛ hii krokomɛi lɛ tee tsũi krokomɛi lɛ amli, ni amɛkwɔ ceiling lɛ koni amɛyatao mɛi. Shi amɛnaaa mɔ ko mɔ ko yɛ hei nɛɛ hu.

Paul: Nyɔji saŋŋ ho ni niyenii fioo ko pɛ wɔnáa wɔyeɔ. Shi mumɔŋ niyenii ji nɔ ni wa wɔ ni wɔnyɛ wɔfi shi. Kɛ́ wɔɔkɛɛ lɛ, Betel leebi jamɔ lɛ ji “wɔleebi niyenii” ni wɔyeɔ, ni wɔ fɛɛ wɔhiɛ sɔ bɔ ni ewajeɔ wɔ lɛ waa.

Wɔle akɛ kɛ́ wɔje kpo koni wɔyatao niyenii loo nu lɛ, wɔnyɛŋ wɔbu mɛi ni wɔkɛto lɛ ahe, ni abaanyɛ agbe amɛ. Bei babaoo lɛ, Yehowa hãa wɔ nibii ni he hiaa wɔ lɛ yɛ be ni sa mli kɛ yɛ naakpɛɛ gbɛ nɔ. Yehowa kwɛ wɔ ni ewa wɔ ni wɔkaye wɔtsui tsɔ.

Bɔ ni shihilɛ lɛ tee nɔ efite yɛ maŋ lɛ mli lɛ hã maŋbii lɛ jijaa shi anɔkwale lɛ waje wɔ fɛɛ. Wɔnyɛmimɛi lɛ jo foi shii abɔ koni amɛkɛbaa amɛwala yi, shi amɛŋmɛɛɛ amɛhemɔkɛyeli lɛ he, ni amɛyeee amɛtsui hu tsɔ. Nyɛmimɛi lɛ ekomɛi wie akɛ bɔ ni amɛmiifi shi yɛ shihilɛi ni mli wawai ni amɛkɛkpeɔ lɛ amli lɛ “miisaa amɛ eeto amanehulu kpeteŋkpele lɛ.” Asafoŋ onukpai lɛ, kɛ nyɛmimɛi oblahii lɛ fee ekãa ni amɛfee bɔ fɛɛ bɔ ni amɛbaanyɛ kɛye amɛbua amɛnyɛmimɛi lɛ. Nyɛmimɛi hii kɛ yei ni jo foi kɛtee hei krokomɛi lɛ ye amɛbua amɛhe, ni amɛbɔi shiɛmɔ yɛ hei ni amɛtee lɛ. Amɛkɛ nibii ni amɛná yɛ koo lɛ mli lɛ ma Maŋtsɛyeli Asai ni amɛfee asafoŋ kpeei yɛ jɛmɛ. Shihilɛi ni nyɛmimɛi lɛ kɛkpe lɛ mli wala waa, shi asafoŋ kpeei ni amɛtee kɛ shiɛmɔ ni amɛshiɛ lɛ waje amɛ waa ni ehãaa amɛhiɛnɔkamɔ atã. Kɛ́ wɔmiija niyenii, atadei kɛ nibii krokomɛi wɔmiihã wɔnyɛmimɛi lɛ, amɛteŋ mɛi babaoo biɔ ni ahã amɛ shiɛmɔyaa baagii moŋ fe atadei, ni enɛ ta wɔtsuiŋ waa. Shihilɛi gbeyeigbeyei ni mɛi tsɔ mli kɛ nibii gbohii ni amɛna lɛ hã amɛnya sane kpakpa lɛ he. Amɛyɔse akɛ Odasefoi lɛ yɛ miishɛɛ ni amɛyeee amɛtsui tsɔ, ni enɛ hã amɛnaa kpɛ amɛhe waa. Nyɛmimɛi lɛ tamɔ la yɛ duŋ kpii mli. (Mat. 5:​14-16) Bɔ  ni wɔnyɛmimɛi lɛ fee ekãa waa lɛ hã tawulɔi ni yitseiaŋ wala waa lɛ ateŋ mɛi komɛi po batsɔmɔ Odasefoi.

Paul: Bei komɛi lɛ, ehe bahiaa ni wɔshi Liberia. Wɔfee nakai shii enumɔ, ni emli etɛ lɛ wɔyaye be kukuoo ko, shi wɔyaye afi muu shii enyɔ. Sane ko ni nyɛmi yoo maŋsɛɛ sɔɔlɔ ko wie lɛ tsɔɔ bɔ ni wɔnuɔ he wɔhãa be fɛɛ be ni ehe bahiaa ni wɔshi lɛ mli jogbaŋŋ. Ewie akɛ: “Yɛ Gilead lɛ, atsɔɔ wɔ akɛ he fɛɛ ni abaahã wɔyasɔmɔ yɛ lɛ, esa akɛ wɔsumɔ wɔnyɛmimɛi lɛ kɛ wɔtsui muu fɛɛ, ni nakai pɛpɛɛpɛ wɔfeɔ. Hewɔ lɛ, kɛ́ nyɛmimɛi lɛ yɛ shihilɛ ni mli wa mli, ni ehe bahia ni wɔshi lɛ, efeɔ tamɔ nɔ ni atse wɔtsui yɛ wɔmli.” Shi be fɛɛ be ni ebaaba lɛ nakai lɛ, wɔnyɛɔ wɔyeɔ wɔbuaa wɔnyɛmimɛi ni yɔɔ Liberia lɛ kɛjɛɔ maŋ nɔ ni wɔyaje lɛ nɔ, ni enɛ hãa wɔnáa miishɛɛ.

Anne: Gbi ko yɛ May 1996 lɛ, ehe bahia ni mi kɛ Paul kɛ nyɛmimɛi enyɔ komɛi kɛ woji komɛi ni Liberia shiɛmɔ nitsumɔ lɛ he saji yɔɔ mli lɛ awo Betel tsɔji lɛ eko mli ni wɔshi kɛya he ko ni yɔɔ shweshweeshwe. He ni wɔmiitao wɔya lɛ kɛ Betel teŋ jekɛmɔ ji kilomitai 16. Wɔshɛɛɛ he ko kwraa ni tawulɔi batutua mɛi yɛ he ni wɔshɛ lɛ. Tawulɔi ni mli efu nɛɛ tswara tui amɛwo kɔɔyɔɔ lɛ mli, amɛwa wɔtsɔne lɛ, ni amɛgbala mi kɛ nyɛmimɛi enyɔ lɛ kɛyi shi, ni amɛfã tsɔne lɛ be mli ni Paul ta mli lolo. Wɔdamɔ shi ni wɔnaa ekpɛ wɔhe. Trukaa lɛ, naa Paul ni efã kpo kɛjɛ mɛi lɛ ateŋ ni lá miiho yɛ ehiɛnaa! Akɛni wɔyiŋ efutu wɔ hewɔ lɛ, wɔyasusu akɛ atswa lɛ tu, shi wɔkɔ sɛɛ akɛ eji nakai kulɛ, enyɛŋ enyiɛ. Nɔ ni ba ji tawulɔi lɛ ateŋ mɔ kome ma lɛ atswɛrɛ kɛtsi lɛ kɛje tsɔne lɛ mli. Dromɔ naa lɛ, epilaaa waa.

No mli lɛ, sojafoi atsɔne ko ma jɛmɛ gbɛ ni eyi kɛ mɛi ni tsui efã. Wɔkpɛ mli akɛ wɔbaayata mli, shi akɛni wɔnáaa gbɛ yɛ mli hewɔ lɛ, wɔkɛ wɔwaobii mɔmɔ tsɔne lɛ mli kɛkpɛtɛ he. Draiva lɛ fã tsɔne lɛ kɛ foi waa, ni shwɛ fioo kulɛ wɔgbee shi. Hewɔ lɛ, wɔbolɔ kɛkpa lɛ fai ni ewa tsɔne lɛ, shi lɛ diɛŋtsɛ lɛ etsui efã, hewɔ lɛ efooo wɔdaaŋ. Wɔmia wɔhiɛ kɛkpɛtɛ tsɔne lɛ he koni wɔkagbee shi aahu kɛyashi tsɔne lɛ yashɛ he ni eyaa lɛ. Be ni wɔyi shi lɛ, wɔtsui efã aahu akɛ wɔkpokpo ni etɔ wɔ bliboo.

Paul: Kɛkɛ ni wɔteŋ mɔ fɛɛ mɔ kwɛ enyɛmi hiɛ, ni wɔkwɛ bɔ ni wɔhe ewo muji ni wɔtadei lɛ etserɛ lɛ, ni efee wɔ naakpɛɛ akɛ wɔyɛ wala mli lolo. No mli lɛ, hɛlikɔpta ko ma wɔmasɛi ni atswara lɛ tui babaoo aahu akɛ etamɔ nɔ ni ebaagbɛ; hɛlikɔpta nɛɛ kɛ wɔ baaya Sierra Leone enɔ jetsɛremɔ, hewɔ lɛ wɔkã he ko yɛ emasɛi wɔwɔ. Be ni wɔyashɛ Sierra Leone lɛ, eŋɔɔ wɔnaa akɛ wɔyɛ wala mli, shi wɔye wɔtsui waa yɛ wɔnyɛmimɛi ni yɔɔ Liberia lɛ hewɔ.

Anne: Wɔyashɛ Sierra Leone Betel ni yɔɔ Freetown lɛ shweshweeshwe, ni nyɛmimɛi lɛ kwɛ wɔ jogbaŋŋ. Shi nɔ ko ni mikpaaa gbɛ bɔi mi feemɔ. Kɛfee lɛ, nibii gbeyeigbeyei ni mina yɛ Liberia lɛ tɛŋɔ yɛ mihiɛ tamɔ fim ko ni miikwɛ. Daa gbi lɛ misheɔ gbeyei akɛ nɔ ko fɔŋ baanyɛ aba, ni minyɛɛɛ majwɛŋ jogbaŋŋ; efee tamɔ nɔ ni nibii ni minaa yɛ Sierra Leone lɛ ji lamɔ. Kɛ́ miyakã shi miwɔ gbɛkɛ lɛ, bei pii lɛ mihiɛ tsɛ̃ɔ trukaa ni mifɔ tsɔɔ kɛ latsa ni mikpokpoɔ, ni mitsui fãa akɛ nɔ ko gbeyeigbeyei baaba. Mimumɔ shɛɛɛ shi. Paul fuaa mi ni ekɛ mi sɔleɔ. Wɔlaa Maŋtsɛyeli lalai kɛyashiɔ kpokpomɔ lɛ sɛɛ foɔ. Efee mi tamɔ miiye sɛkɛ, ni minu he akɛ minyɛŋ masɔmɔ akɛ maŋsɛɛ sɔɔlɔ dɔŋŋ.

Mihiɛ kpaŋ nɔ ni ba sɛɛ mli lɛ nɔ kɔkɔɔkɔ. Nakai otsi lɛ mli nɔŋŋ lɛ, wɔnine shɛ magazin srɔtoi enyɔ komɛi anɔ. Ekome ji June 8, 1996 Blɔfo Awake! lɛ. Sane ko yɛ mli ni yitso ji “Coping With Panic Attacks.” Enɛ hã mibanu nɔ ni feɔ mi lɛ shishi. Magazin kroko lɛ ji May 15, 1996 Buu-Mɔɔ lɛ, ni sane ko yɛ mli ni yitso ji, “Nɛgbɛ Amɛnaa Amɛ Hewalɛ Kɛjɛɔ?” Abɛi ko ni efine kome efite lɛ he mfoniri yɛ Buu-Mɔɔ lɛ mli. Nakai sane lɛ tsɔɔ mli akɛ, bɔ ni abɛi ko nyɛɔ eyeɔ nii ni efilikiɔ yɛ efine kome ni efite lɛ fɛɛ sɛɛ lɛ, wɔ hu kɛ́ wɔfee gbedee yɛ nibii gbeyeigbeyei ni wɔtsɔmɔ mli lɛ ahewɔ lɛ, Yehowa mumɔ lɛ baanyɛ awa wɔ ni wɔya nɔ wɔye wɔbua mɛi. Yehowa tsɔ saji enyɔ nɛɛ anɔ ewaje mi yɛ be ni sa mli. (Mat. 24:45) Mitao saji krokomɛi ni wieɔ minaagba lɛ he, ni mibua fɛɛ naa miwo wolo ko mli, ni amɛwa mi waa diɛŋtsɛ. Fiofio lɛ, nɔ ni feɔ mi lɛ sɛɛ fo.

Paul: Be fɛɛ be ni wɔbaaku wɔsɛɛ wɔya Liberia lɛ, wɔmii shɛɔ wɔhe waa. Be ni shɛɔ afi 2004 naagbee gbɛ lɛ, no mli lɛ wɔsɔmɔ yɛ Liberia aaafee afii 20 sɔŋŋ. Ta lɛ sɛɛ efo. No mli lɛ, aato gbɛjianɔ ni agbele  nitsumɔhe nine lɛ mli. Shi trukaa lɛ akɛɛ wɔ koni wɔyasɔmɔ yɛ he kroko.

Ebawa waa kɛhã wɔ akɛ wɔbaashi. Wɔbasumɔ wɔnyɛmimɛi ni yɔɔ Liberia lɛ waa. Amɛtamɔ weku kɛhã wɔ, ni wɔsumɔɔɔ ni wɔshiɔ amɛ. Shi be ni wɔshi wɔ diɛŋtsɛ wɔwekumɛi ni wɔtee Gilead lɛ, wɔna bɔ ni Yehowa jɔɔ wɔ lɛ, hewɔ lɛ, wɔkpɛlɛ akɛ wɔbaaya. Maŋ ni akɛɛ wɔyasɔmɔ yɛ nɔ lɛ ji Ghana, ni ji maŋ ko ni bɛŋkɛ Liberia.

Anne: Be ni wɔshiɔ Liberia lɛ wɔfó aahu. Nyɛmi nuu onukpa ko ni hiɛ kã shi waa ni atsɛɔ lɛ Frank lɛ kɛɛ wɔ akɛ: “Esa akɛ nyɛjie nyɛjwɛŋmɔ yɛ wɔnɔ!” Nɔ ni ewie lɛ hã wɔnaa kpɛ wɔhe. Shi etsɔɔ mli akɛ: “Wɔle akɛ nyɛhiɛ kpaŋ wɔnɔ kɔkɔɔkɔ, shi esa akɛ nyɛsumɔ nyɛmimɛi ni yɔɔ Ghana lɛ kɛ nyɛtsui muu fɛɛ. Yehowa ni kɛɛ nyɛya jɛmɛ, hewɔ lɛ, nyɛkɛ nyɛjwɛŋmɔ ayaa nyɛmimɛi ni yɔɔ jɛmɛ lɛ anɔ.” Eyɛ mli akɛ mɛi fioo ko pɛ wɔle yɛ Ghana, ni wɔleee maŋ lɛ he nɔ ko tsɔ moŋ, shi nɔ ni Frank wie nɛɛ wo wɔ hewalɛ ni wɔsaa wɔjwɛŋmɔ koni wɔná nanemɛi hei yɛ jɛmɛ.

Paul: Etsɛɛɛ ni wɔbasumɔ wɔnyɛmimɛi ni yɔɔ Ghana lɛ waa. Odasefoi ni yɔɔ jɛmɛ lɛ ayi fa waa! Wɔkase nii yɛ bɔ ni amɛyeɔ Yehowa anɔkwa kɛ bɔ ni amɛhemɔkɛyeli lɛ mli wa waa lɛ mli. Be ni wɔsɔmɔ yɛ Ghana afii 13 lɛ, akɛɛ wɔ nɔ ko ni hã wɔnaa kpɛ wɔhe. Akɛɛ wɔyasɔmɔ yɛ Afrika Bokãgbɛ nitsumɔhe nine ni yɔɔ Kenya lɛ. Wɔhiɛ tse wɔnyɛmimɛi ni yɔɔ Ghana kɛ Liberia lɛ waa, shi etsɛɛɛ nɔŋŋ ni wɔbasumɔ nyɛmimɛi ni yɔɔ Kenya lɛ hu waa. Wɔmiisɔmɔ lolo yɛ Kenya, ni hiamɔ lɛ da yɛ biɛ tamɔ bɔ ni eji yɛ Ghana kɛ Liberia lɛ nɔŋŋ.

Anne: Yɛ afii ni eho lɛ amli lɛ, mitsɔ shihilɛi ni mli wawai amli, ni bei komɛi lɛ, ehãa misheɔ gbeyei waa. Kɛ́ wɔhi hei ni bɛ shweshweeshwe kwraa ni wɔkɛ naagbai wujiwuji kpe lɛ, ebaanyɛ ehã hela amɔ wɔ, ni wɔhao ni wɔtsui afã waa. Yehowa ebuuu wɔhe kɛjeee nibii nɛɛ amli yɛ naakpɛɛ gbɛ nɔ. Kɛ́ minu ni aatswa tu lɛ, mitsui naa funtãa mi ni minijiaŋ jɔɔ. Shi mitsɔɔ nibii fɛɛ ni Yehowa kɛhãa wɔ koni ekɛwaje wɔ lɛ nɔ miwajeɔ mihe. Nibii nɛɛ eko ji wɔnyɛmimɛi hii kɛ yei lɛ. Ni mina akɛ kɛ́ wɔtee nɔ wɔfee nibii ni baahã wekukpaa ni yɔɔ wɔ kɛ Yehowa teŋ lɛ mli awa lɛ, ebaawa wɔ ni wɔnyɛ wɔtsu nitsumɔ fɛɛ nitsumɔ ni akɛbaawo wɔdɛŋ lɛ.

Paul: Bei komɛi lɛ, mɛi biɔ wɔ akɛ, “Ani nyɛsumɔɔ nyɛnitsumɔ lɛ waa?” Maŋ ko nɔ shihilɛ baanyɛ aŋɔɔ waa, shi nɔ ko baanyɛ aba trukaa ni baafite toiŋjɔlɛ ni yɔɔ jɛmɛ lɛ. Hewɔ lɛ, nɔ ko yɛ ni wɔsumɔɔ waa fe nakai maŋ lɛ diɛŋtsɛ po. No ji wɔnyɛmimɛi hii kɛ yei ni wɔshwɛɛɛ amɛhe kwraa, ni ji wɔmumɔŋ weku lɛ. Eyɛ mli akɛ wɔjɛ je lɛŋ hei srɔtoi moŋ, shi wɔ fɛɛ wɔsumɔɔ Yehowa waa. Wɔsusuɔ akɛ atsuɔ wɔ ni wɔyawo amɛ hewalɛ, shi yɛ anɔkwale mli lɛ, amɛ moŋ amɛwoɔ wɔ hewalɛ.

Yehowa efee naakpɛɛ nɔ ko, no ji ekome ni wɔnyɛmimɛi lɛ efee yɛ jeŋ fɛɛ lɛ. He fɛɛ he ni wɔbaaya lɛ, wɔyɛ weku yɛ jɛmɛ. Bei abɔ ni wɔyɛ asafo ko mli nɛɛ, wɔyɛ shweshweeshwe. Wɔheɔ wɔyeɔ waa akɛ kɛ́ wɔtee nɔ wɔkɛ wɔhiɛ fɔ̃ Yehowa nɔ lɛ, ebaawaje wɔ koni wɔnyɛ wɔdamɔ naagba fɛɛ naagba ni wɔkɛbaakpe lɛ naa.—Fip. 4:13.