1. Mɛɛ gbɛ nɔ 2 Korintobii 3:1-3 lɛ yeɔ ebuaa wɔ ni wɔnaa akɛ, eji hegbɛ kpele akɛ wɔkɛ mɔ ko baakase Biblia lɛ ni eya ehiɛ ni abaptisi lɛ? (Kwɛmɔ mfoniri ni yɔɔ wolo lɛ hiɛ lɛ.)

KƐ́ AKƐ mɔ ko ni yɔɔ nyɛsafo lɛ shikpɔŋkuku lɛ mli lɛ kase nii, ni etee ehiɛ ni abaptisi lɛ lɛ, te onuɔ he ohãa tɛŋŋ? Ŋwanejee ko bɛ he akɛ, onáa miishɛɛ waa. (Mat. 28:19) Ni kɛ́ bo okɛ mɔ lɛ kase nii hu? No lɛ, omiishɛɛ lɛ daa naakpa! (1 Tes. 2:19, 20) Kaselɔi hei ni abaptisi nɛɛ batsɔmɔɔ tamɔ “yijiemɔ woji” kɛhã mɛi ni kɛ amɛ kase nii lɛ, kɛ agbɛnɛ hu, asafo muu lɛ fɛɛ.​—Kanemɔ 2 Korintobii 3:1-3.

2. (a) Mɛɛ sanebimɔ ni he hiaa waa esa akɛ wɔsusu he? Ni mɛni hewɔ? (b) Kɛ́ akɛɛ akɛ mɔ ko miifee Biblia mli nikasemɔ lɛ, te atsɔɔ tɛŋŋ? (Kwɛmɔ shishigbɛ niŋmaa lɛ.)

² Yɛ afii ejwɛ ni eho nɛɛ amli lɛ, daa nyɔɔŋ nɔ lɛ, yɛ jeŋ fɛɛ lɛ, wɔkɛ mɛi aaafee 10,000,000 feɔ Biblia mli nikasemɔ, * ni enɛ hi waa. Shi ani ole mɛi abɔ ni abaptisi daa afi yɛ nakai afii ejwɛ lɛ amli? Abaptisi mɛi fe 280,000. Mɛni wɔbaanyɛ wɔfee kɛye wɔbua mɛi ni wɔkɛkaseɔ nii lɛ koni amɛteŋ mɛi pii aya amɛhiɛ ni abaptisi amɛ? Sanebimɔ nɛɛ hetoo lɛ he miihia, ejaakɛ be ni eshwɛ lɛ faaa dɔŋŋ. Amrɔ nɛɛ ni Yehowa tsuishitoo lɛ bako naagbee nɛɛ, esa akɛ wɔŋɔ hegbɛ lɛ kɛye wɔbua mɛi koni amɛya amɛhiɛ oyayaayai ni amɛbatsɔmɔ Kristo kaselɔi ni abaptisi amɛ.​—1 Kor. 7:29a; 1 Pet. 4:7.

3. Mɛni he wɔbaasusu yɛ nikasemɔ nɛɛ mli?

 ³ Ŋmɛnɛ lɛ, ehe miihia waa ni wɔfee mɛi kaselɔi fe bei fɛɛ ni eho. Enɛ hewɔ lɛ, Gbɛtsɔɔmɔ Kuu lɛ bi nitsumɔhe niji srɔtoi ni amɛtsɔɔ nɔ ni wɔbaanyɛ wɔfee kɛye wɔbua wɔ-Biblia mli nikaselɔi babaoo koni amɛya amɛhiɛ ni abaptisi amɛ. Yɛ nikasemɔ nɛɛ kɛ nɔ ni nyiɛ sɛɛ lɛ mli lɛ, wɔbaakwɛ nɔ ni gbɛgbalɔi, maŋsɛɛ sɔɔlɔi, kɛ kpokpaa nɔkwɛlɔi komɛi ni he esa lɛ etsɔɔ akɛ Biblia mli nikaselɔi kɛ mɛi ni kɛ amɛ kaseɔ nii lɛ baanyɛ afee koni Biblia mli nikasemɔ lɛ amɔ shi jogbaŋŋ. * (Abɛi 11:14; 15:22) Yɛ nikasemɔ nɛɛ mli lɛ, wɔbaasusu nibii enumɔ ni esa akɛ Biblia mli nikaselɔi afee koni amɛya amɛhiɛ ni abaptisi amɛ lɛ ahe.

4. Mɛni hewɔ esa akɛ Biblia mli nikaselɔi aná be ni fa bɔ ni sa koni anyɛ akɛ amɛ akase nii jogbaŋŋ?

⁴ Nyɛmimɛi pii yɛ Biblia mli nikaselɔi ni kɛ́ amɛtee amɛŋɔɔ lɛ amɛtsɛɛɛ, loo amɛkɛ amɛ kaseɔ nii lɛ ni amɛtaaa shi. Kɛ́ kpaako akɛ mɔ lɛ ebɔi Biblia lɛ kasemɔ lɛ, bei pii lɛ, kɛ́ afee lɛ nɛkɛ lɛ, ehi, ejaakɛ ehãa mɔ lɛ nyaa Biblia lɛ kasemɔ he. Shi akɛni nikasemɔ lɛ sɛɛ etsɛɛɛ, ni bei komɛi po lɛ, jeee daa otsi nikaselɔ lɛ náa dekã ni akɛ lɛ kaseɔ nii hewɔ lɛ, nyɛmimɛi komɛi heɔ nikaselɔ lɛ tɛlifoŋ nɔmba koni amɛtswa lɛ loo amɛsɛndi lɛ mɛseji ni amɛkɛ lɛ asusu ŋmalɛ ko he dani amɛkpe ekoŋŋ. Mɛi komɛi yɛ ni akɛ amɛ kaseɔ nii lɛ nɛkɛ nyɔji abɔ. Shi kɛ́ nɛkɛ sɔŋŋ akɛ mɔ lɛ baakase nii, ni enyɛɛɛ ená dekã ni etse ehe ekase Nyɔŋmɔ Wiemɔ lɛ jogbaŋŋ lɛ, kɛ́ okwɛ lɛ, ani ebaanyɛ eya ehiɛ ni ejɔɔ ehe nɔ ni abaptisi lɛ? Ebaawa.

5. Mɛni Yesu wie yɛ Luka 14:27-33? Ni mɛɛ gbɛ nɔ wɔbaanyɛ wɔkɛ enɛ aye abua wɔ-Biblia mli nikaselɔi?

⁵ Be ko lɛ, Yesu kɛ nɔkwɛmɔnɔ ko tsu nii kɛtsɔɔ nɔ ni esa akɛ mɔ ko afee kɛ́ eetao ebatsɔ ekaselɔ. Yɛ nɔkwɛmɔnɔ lɛ mli lɛ, ewie mɔ ko ni miitao ema mɔɔ kɛ maŋtsɛ ko ni miitao eya ta lɛ he. Yesu wie akɛ, esa akɛ mɔ ni miitao ema mɔɔ lɛ ‘ata shi ni ebu naa ekwɛ’ akɛ eyɛ nii ni fa bɔ ni sa ni ekɛbaagbe naa lo, ni esa akɛ maŋtsɛ lɛ hu kɛ ‘eŋaawolɔi asusu nii ahe’ ekwɛ kɛji esraafoi lɛ baanyɛ ta lɛ naa amɛdamɔ. (Kanemɔ Luka 14:27-33.) Nɔkwɛmɔnɔ nɛɛ hãa wɔnaa akɛ, Yesu le akɛ, kɛ́ mɔ ko miitao atsɔ ekaselɔ lɛ, esa akɛ mɔ lɛ asusu nɔ ni enɛ baabi ni efee lɛ he jogbaŋŋ. Enɛ hewɔ lɛ, kɛ́ wɔkɛ mɔ ko bɔi Biblia lɛ kasemɔ lɛ, esa akɛ wɔwo lɛ hewalɛ ni ekase nii lɛ daa otsi. Te wɔbaafee tɛŋŋ wɔfee nakai?

6. Mɛni wɔbaanyɛ wɔfee koni wɔnyɛ wɔkɛ mɔ ko akase nii bɔ ni ebaaya ehiɛ?

⁶ Klɛŋklɛŋ lɛ, bɔɔ mɔdɛŋ ni okɛ lɛ akase nii  ni etsɛ fioo fe bɔ ni nyɛfeɔ daa lɛ. Ekolɛ nɔ najiaŋ ni okɛ lɛ baasusu ŋmalɛ kome pɛ he lɛ, okɛ lɛ asusu ŋmalɛi enyɔ ahe. Kɛ́ shĩatsɛ lɛ bale akɛ kɛ́ nyɛba lɛ nyɛtsɛɔ fioo, ni egbaaa enaa lɛ, obaanyɛ obi lɛ kɛji ebaaná be fioo efata he koni nyɛkɔ sane pɔtɛɛ ko ni nyɛkwɛ nɔ ni Biblia lɛ kɛɔ yɛ he. Kɛ́ nyɛdamɔɔ shi lɛ, obaanyɛ obi lɛ kɛji he ko yɛ ni nyɛbaanyɛ nyɛta ni nyɛkase nii lɛ. Hetoo ni ebaahã lɛ baahã ona kɛji lɛɛlɛŋ ehiɛ edɔ akɛ ebaakase Biblia lɛ. Sɛɛ mli po lɛ, obaanyɛ obi lɛ kɛji ebaasumɔ ni nyɛkase nii shii enyɔ yɛ otsi lɛ mli, ejaakɛ no baaye abua lɛ ni eya ehiɛ oyayaayai. Kɛ̃lɛ, jeee shii abɔ ni wɔkɛ mɔ ko kaseɔ nii yɛ otsi lɛ mli lɛ pɛ ni baatsɔɔ kɛji ebaaya ehiɛ ni ebatsɔ kaselɔ.

7. Kɛ́ okɛ mɔ ko yaakase nii lɛ, te obaafee tɛŋŋ osaa ohe jogbaŋŋ dani oya?

⁷ Be fɛɛ be lɛ, esa akɛ bo, ni ji tsɔɔlɔ lɛ, osaa ohe jogbaŋŋ kɛhã nikasemɔ lɛ. Te obaafee tɛŋŋ ofee nakai? Klɛŋklɛŋ lɛ, kanemɔ nii muu lɛ fɛɛ mli ni okwɛ ŋmalɛi lɛ koni onu emli otii lɛ ashishi jogbaŋŋ. Susumɔ nikasemɔ lɛ saneyitso lɛ, saneyitsei bibii lɛ, sanebimɔi lɛ, ŋmalɛi ni akadi amɛ akɛ “kanemɔ” lɛ, kɛ mfonirii ni yɔɔ mli lɛ ahe. Agbɛnɛ hu, kwɛmɔ akɛ vidio ko yɛ ni gbalaa nakai sane lɛ mli lo. Kɛ́ ofee enɛ fɛɛ ogbe naa lɛ, agbɛnɛ susumɔ mɔ ni okɛkaseɔ nii lɛ he, ni okwɛ bɔ ni obaafee ogbala saji amli bɔ ni emli baakã shi faŋŋ, koni enyɛ enu shishi oya ni ekɛtsu nii.​—Neh. 8:8; Abɛi 15:28a.

8. Mɛɛ gbɛ nɔ sane ni bɔfo Paulo wie yɛ Kolosebii 1:9, 10 lɛ hãa wɔnaa nɔ hewɔ ni ehe miihia ni wɔsɔle wɔhã wɔ-Biblia mli nikaselɔi lɛ?

⁸ Be ni osaa ohe lɛ, sɔlemɔ ohã Yehowa ni otsĩ nikaselɔ lɛ kɛ ehiamɔ nii lɛ atã otsɔɔ lɛ. Kpa lɛ fai ni eye ebua bo ni onyɛ ojɛ Biblia lɛ mli otsɔɔ lɛ nii bɔ ni ebaanu shishi jogbaŋŋ ni ekɛtsu nii. (Kanemɔ Kolosebii 1:9, 10.) Bi ohe akɛ, ‘Mɛɛ nibii ekolɛ ebaawa kɛhã lɛ akɛ ebaanu shishi loo ekpɛlɛ nɔ?’ Hã ehi ojwɛŋmɔ mli akɛ, oti ni ma ohiɛ ji, ni oye obua nikaselɔ lɛ ni eya ehiɛ koni abaptisi lɛ.

9. Mɛni obaanyɛ ofee kɛye obua mɔ ni okɛkaseɔ nii lɛ ni ele bɔ ni ebaafee esaa ehe kɛhã nikasemɔ lɛ? Ni te obaafee lɛ tɛŋŋ?

⁹ Kɛ́ wɔkɛ mɔ ko bɔi Biblia lɛ kasemɔ ni eetsara nɔ lɛ, wɔmiikpa gbɛ akɛ no baahã ehiɛ asɔ nɔ ni Yehowa kɛ Yesu efee ehã lɛ lɛ, koni no ahã eshwe akɛ ele nibii babaoo yɛ Biblia lɛ mli. (Mat. 5:3, 6) Shi dani nikaselɔ lɛ baaná nɔ ni ekaseɔ lɛ he sɛɛ jogbaŋŋ kɛmɔ shi lɛ, esa akɛ ejwɛŋmɔ ahi nɔ ni ekaseɔ lɛ nɔ. Nɔ kome  ni baaye abua lɛ ni enyɛ efee nakai ji, ni ebaatsɔ hiɛ ekane nikasemɔ lɛ mli ni ekwɛ bɔ ni ebaanyɛ ekɛtsu nii ehã, dani nyɛkase. No hewɔ lɛ, hã ena akɛ enɛ feemɔ he miihia. Mɛni obaanyɛ ofee kɛye obua lɛ yɛ enɛ gbɛfaŋ? Obaanyɛ okɔ nikasemɔ lɛ eko ni okɛ lɛ afee ekome ni nyɛsaa nyɛhe, koni ele bɔ ni afeɔ lɛ ahãa. * Tsɔɔmɔ lɛ bɔ ni ebaafee ena sanebimɔi lɛ ahetoo, ni ohã ele akɛ, kɛ́ efolɔ wiemɔi fioo komɛi ashishi lɛ, no baaye abua lɛ ni ekai hetoo lɛ. Agbɛnɛ lɛ, tsɔɔmɔ lɛ bɔ ni ebaafee ehã sanebimɔi lɛ ahetoo ni ekaneee lɛ tɛ̃ɛ yɛ wolo lɛ mli. Kɛ́ ehã sanebimɔi lɛ hetoo nakai lɛ, no baaye abua bo ni ona kɛji enu nɔ ni nyɛkaseɔ lɛ shishi jogbaŋŋ. Shi nɔ kroko hu yɛ ni obaanyɛ owo nikaselɔ lɛ hewalɛ ni efee.

10. Mɛni hewɔ ehe miihia ni nikaselɔ lɛ akane Biblia lɛ daa? Ni dani ebaaná Biblia lɛ ni ekaneɔ lɛ he sɛɛ jogbaŋŋ lɛ, mɛni esa akɛ efee?

¹⁰ Eyɛ mli akɛ okɛ nikaselɔ lɛ kaseɔ nii daa otsi moŋ, shi nibii komɛi yɛ ni esa akɛ lɛ diɛŋtsɛ efee daa gbi. Eko ji, ni ekɛ Yehowa baagba sane. Enɛ baabi ni ebo Yehowa toi, ni agbɛnɛ hu, ekɛ lɛ awie. Kɛ́ ekane Biblia lɛ daa lɛ, no baatsɔɔ akɛ eebo Yehowa toi. (Yos. 1:8; Lala 1:1-3) Tsɔɔmɔ lɛ bɔ ni ebaafee ekɛ “Biblia Kanemɔ He Gbɛjianɔtoo” ni yɔɔ jw.org lɛ nɔ lɛ atsu nii ahã; kɛ́ eesumɔ lɛ, ebaanyɛ eprinti. * Wo lɛ hewalɛ ni kɛ́ ekane Biblia lɛ fã ko lɛ, esusu nɔ ni etsɔɔ lɛ yɛ Yehowa he kɛ bɔ ni ebaafee ekɛtsu nii yɛ eshihilɛ mli lɛ he, ejaakɛ no dani ebaaná Biblia lɛ ni ekaneɔ lɛ he sɛɛ jogbaŋŋ kɛmɔ shi.​—Bɔf. 17:11; Yak. 1:25.

11. Mɛni kɛ́ ofee lɛ, no baaye abua nikaselɔ lɛ ni ele bɔ ni asɔleɔ? Ni mɛni hewɔ ehe miihia ni esɔle ehã Yehowa daa?

¹¹ Wo o-Biblia mli nikaselɔ lɛ hewalɛ ni ekɛ Yehowa awie daa, no ji, esɔle daa. Kɛ́ nyɛyaakase nii lɛ, jɛɛ otsuiŋ osɔle kɛje shishi, ni kɛ́ nyɛgbe naa hu, feemɔ nakai nɔŋŋ, ni kɛ́ oosɔle lɛ, tsĩi nikaselɔ lɛ tã. Kɛ́ nikaselɔ lɛ nu ni oosɔle nɛkɛ lɛ, no baaye abua lɛ ni ejɛ etsuiŋ esɔle ehã Yehowa Nyɔŋmɔ, ni efee nakai kɛtsɔ Yesu Kristo gbɛ́i mli. (Mat. 6:9; Yoh. 15:16) Kɛ́ o-Biblia mli nikaselɔ lɛ nyɛɔ ekaneɔ Biblia lɛ daa (eboɔ Yehowa toi), ni esɔleɔ daa (ekɛ Yehowa wieɔ) lɛ, wekukpaa ni yɔɔ ekɛ lɛ teŋ lɛ mli baawa waa, ni no baaye abua lɛ ni eya ehiɛ ni ejɔɔ ehe nɔ ehã lɛ koni abaptisi lɛ. (Yak. 4:8) Mɛni ekoŋŋ baaye abua nikaselɔ lɛ?

12. Te obaafee tɛŋŋ oye obua mɔ ni okɛkaseɔ nii lɛ koni ekɛ Yehowa abɔ naanyo?

¹² Esa akɛ nikaselɔ lɛ anu nɔ ni ekaseɔ lɛ shishi, ni agbɛnɛ hu, eta etsuiŋ. Mɛni hewɔ? Ejaakɛ kɛ́ nɔ ni ekaseɔ lɛ ta etsuiŋ lɛ, no baatsirɛ lɛ ni ekɛtsu nii. Yesu kɛ mɛi susu nii ahe, ni no hã amɛnya nibii ni etsɔɔ amɛ lɛ ahe. Shi nɔ ni hã amɛnyiɛ esɛɛ ji akɛ, nibii ni etsɔɔ amɛ lɛ ta amɛtsuiŋ. (Luka 24:15, 27, 32) Esa akɛ o-Biblia mli nikaselɔ lɛ ana Yehowa akɛ mɔ ko ni yɔɔ diɛŋtsɛ, ni enu shishi akɛ Yehowa baanyɛ abatsɔ e-Tsɛ, e-Nyɔŋmɔ, kɛ e-Naanyo. (Lala 25:4, 5) No hewɔ lɛ, be ni okɛ lɛ kaseɔ nii lɛ, gbalamɔ ejwɛŋmɔ kɛya Yehowa sui lɛ anɔ. (2 Mo. 34:5, 6; 1 Pet. 5:6, 7) Obaanyɛ ofee nakai, ekɔɔɔ he eko sane ni nyɛsusuɔ he. Ye obua lɛ ni ena akɛ Yehowa sumɔɔ wɔ, emli hi, ni emusuŋ tsɔɔ lɛ yɛ wɔhe. Yesu wie akɛ, “klɛŋklɛŋ kitã, kɛ nɔ ni he hiaa fe fɛɛ” ji, ni ‘wɔbaasumɔ Yehowa wɔ-Nyɔŋmɔ lɛ.’ (Mat. 22:37, 38) No hewɔ lɛ, ye obua o-Biblia mli nikaselɔ lɛ ni esumɔ Yehowa kɛ etsui muu fɛɛ.

13. Mɛni ji nɔ kome ni obaanyɛ ofee kɛye obua o-Biblia mli nikaselɔ lɛ koni ebale Yehowa sui lɛ jogbaŋŋ?

¹³ Hã o-Biblia mli nikaselɔ lɛ ana yɛ owiemɔ mli akɛ osumɔɔ Yehowa. Ekolɛ enɛ baaye abua lɛ ni ena akɛ esa akɛ lɛ hu ekɛ Yehowa abɔ naanyo, ni esumɔ lɛ waa. (Lala 73:28) Akɛ nɔkwɛmɔnɔ lɛ, ani sane ko ni awie yɛ wolo ni nyɛkaseɔ lɛ loo ŋmalɛ ko ni nyɛkane lɛ mli lɛ hãa anaa akɛ Yehowa yɛ suɔmɔ, ehiɛ kã shi, eyeɔ jalɛ sane, ni eyɛ hewalɛ? Ani nakai sane lɛ eta otsuiŋ waa? Tsĩi tã otsɔɔ o-Biblia mli nikaselɔ lɛ, ni ohã ele akɛ no fata yiŋtoi pii ahewɔ ni osumɔɔ Yehowa, wɔ-Tsɛ ni yɔɔ ŋwɛi lɛ waa lɛ ahe. Naa nɔ kroko hu ni esa akɛ mɔ fɛɛ mɔ ni akɛ lɛ kaseɔ Biblia lɛ afee koni eya ehiɛ ni abaptisi lɛ.

14. Mɛni Hebribii 10:24, 25 lɛ hãa wɔleɔ yɛ asafoŋ kpeei ahe? Ni mɛɛ gbɛ nɔ obaanyɛ okɛ ŋmalɛ nɛɛ aye abua o-Biblia mli nikaselɔ lɛ koni eya ehiɛ?

¹⁴ Wɔ fɛɛ wɔmiisumɔ ni wɔ-Biblia mli nikaselɔi lɛ aya amɛhiɛ koni abaptisi amɛ. Nɔ kome ni he hiaa waa ni wɔbaanyɛ wɔfee kɛye wɔbua amɛ ni amɛshɛ oti nɛɛ he ji, ni wɔbaawo amɛ hewalɛ ni amɛba asafoŋ kpeei. Nyɛmimɛi komɛi kɛɛ nɔ ni ye ebua amɛ-Biblia mli nikaselɔi lɛ koni amɛya amɛhiɛ oyayaayai ni abaptisi amɛ ji akɛ, amɛbɔi asafoŋ kpeei baa be ni amɛkɛ amɛ bɔi nikasemɔ lɛ nɔŋŋ. (Lala 111:1) Te obaafee tɛŋŋ oye obua o-Biblia mli nikaselɔ lɛ ni ebɔi asafoŋ kpeei baa? Nyɛmimɛi komɛi kɛɔ amɛ-Biblia mli nikaselɔi akɛ, yɛ nibii ni amɛkɛ amɛ kaseɔ lɛ sɛɛ lɛ, nibii pii hu yɛ ni amɛbaakase kɛji amɛba asafoŋ kpeei.  Okɛ o-Biblia mli nikaselɔ lɛ akane Hebribii 10:24, 25 lɛ, ni oye obua lɛ ni ena nɔ hewɔ ni ehi akɛ ebaaba asafoŋ kpeei. (Kanemɔ.) Jiemɔ vidio ni ji, Mɛni Yaa Nɔ Yɛ Maŋtsɛyeli Asa Lɛ Nɔ? * lɛ ohã lɛ, ni oye obua lɛ ni ekɛfee oti ni ma ehiɛ akɛ, efolɔŋ asafoŋ kpeei amli kɔkɔɔkɔ.

15. Mɛni obaanyɛ ofee kɛye obua o-Biblia mli nikaselɔ lɛ koni ekafolɔ asafoŋ kpeei amli?

¹⁵ Kɛ́ o-Biblia mli nikaselɔ lɛ baaa asafoŋ kpeei loo efolɔɔ asafoŋ kpeei amli lɛ, mɛni obaanyɛ ofee kɛye obua lɛ? Okɛ miishɛɛ agba lɛ nɔ ko ni okase yɛ asafoŋ kpeei lɛ eko shishi nyɛsɛɛ nɛɛ. Kɛ́ ena bɔ ni oná asafoŋ kpeei lɛ he miishɛɛ lɛ, ekolɛ no baawo lɛ hewalɛ ni lɛ hu eba. Hã lɛ Buu-Mɔɔ ni akaseɔ lɛ loo Wɔshiɛmɔ Kɛ Wɔshihilɛ Kpee Nifeemɔ Wolo kɛhã nakai nyɔɔŋ lɛ, ni otsɔɔ lɛ nɔ ni abaakase yɛ asafoŋ kpee ni nyiɛ sɛɛ lɛ shishi. No sɛɛ lɛ, bi lɛ nibii ni abaakase lɛ ateŋ nɔ ni eena akɛ ebaaye ebua lɛ waa. Klɛŋklɛŋ be ni o-Biblia mli nikaselɔ lɛ baaba asafoŋ kpeei lɛ, ebaana akɛ, jamɔŋ henaabuamɔ ko bɛ ni hi fe no. (1 Kor. 14:24, 25) Kɛ́ eba asafoŋ kpeei lɛ, ebaakase nibii kpakpai pii yɛ nyɛmimɛi lɛ ahe, ni no baaye abua lɛ ni eya ehiɛ ni abaptisi lɛ.

16. Mɛni esa akɛ mɛi ni wɔkɛkaseɔ Biblia lɛ afee koni amɛya amɛhiɛ ni abaptisi amɛ? Ni mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁶ Mɛni obaanyɛ ofee kɛye obua o-Biblia mli nikaselɔ lɛ koni eya ehiɛ ni abaptisi lɛ? Ye obua lɛ ni ehiɛ adɔ kɛ Biblia lɛ kasemɔ; wo lɛ hewalɛ ni eto gbɛjianɔ koni nyɛkase nii lɛ daa otsi, ni esaa ehe hu dani oba. Agbɛnɛ hu, ye obua lɛ ni ekɛ Yehowa agba sane daa gbi, ni ekɛ lɛ abɔ naanyo. Wo lɛ hewalɛ ni eba asafoŋ kpeei. (Kwɛmɔ akrabatsa ni yɔɔ baafa 12, ni yitso ji, “ Nɔ Ni Bo, Nikaselɔ Lɛ, Obaanyɛ Ofee Koni Oya Ohiɛ Ni Abaptisi Bo.”) Shi tamɔ bɔ ni wɔbaana yɛ nikasemɔ ni nyiɛ sɛɛ lɛ mli lɛ, nibii enumɔ krokomɛi yɛ ni esa akɛ wɔ mɛi ni wɔkɛ mɛi kaseɔ Biblia lɛ wɔfee kɛye wɔbua amɛ koni amɛya amɛhiɛ ni abaptisi amɛ.