1. Te mɛi pii feɔ amɛnii amɛhãa tɛŋŋ yɛ ŋaawoi kpakpai ni yɔɔ Biblia lɛ mli ni hãa mɔ hiɛ kãa shi lɛ ahe? (Abɛi 1:20, 21)

 ANI ona nyɛmimɛi kɛ amɛhiɛ ŋmɔlɔŋmɔlɔ damɔ gbɛjegbɛi ahe ni amɛmiihã mɛi woji pɛŋ? Ani otsu nitsumɔ nɛɛ eko pɛŋ? Kɛ́ otsu eko pɛŋ lɛ, ŋwanejee ko bɛ he akɛ ekaiɔ bo nɔkwɛmɔnɔ ko ni yɔɔ Abɛi awolo lɛ mli lɛ. Awie akɛ, hiɛshikamɔ miibo waa yɛ maŋjaanɔ koni mɛi abo lɛ toi. (Kanemɔ Abɛi 1:20, 21.) Biblia lɛ kɛ asafo lɛ woji lɛ hãa mɔ ‘hiɛ kãa shi’ ejaakɛ nibii ni Yehowa tsɔɔ wɔ lɛ ni yɔɔ mli. Ni wɔle akɛ, nibii ni Yehowa tsɔɔ mɛi lɛ ni baaye abua amɛ ni amɛná naanɔ wala. Enɛ hewɔ lɛ, kɛ́ wɔhã mɔ ko wɔwoji lɛ eko ni ehe lɛ, wɔnáa miishɛɛ waa. Shi dɔlɛ sane ji, jeee mɛi fɛɛ heɔ wɔwoji lɛ. Mɛi komɛi sumɔɔɔ ni amɛleɔ nɔ ni Biblia lɛ yɔɔ kɛɛmɔ. Mɛi komɛi hu ŋmɔɔ wɔ ejaakɛ amɛsusuɔ akɛ saji ni yɔɔ Biblia lɛ mli lɛ be eho ni no hewɔ lɛ kɛ́ akɛtsu nii lɛ, eyeŋ omanye. Dani ayɛ mɛi komɛi hu ni nuɔ he akɛ bɔ ni Biblia lɛ etsɔɔ akɛ wɔhi shi wɔhã lɛ ehiii, ejaakɛ ehãa wɔfeɔ kpɛŋŋ ni wɔwieɔ wɔshiɔ mɛi po. Shi fɛɛ sɛɛ lɛ, Yehowa eto gbɛjianɔ koni mɛi fɛɛ ni miisumɔ ni amɛkase ehe nii ni amɛhiɛ akã shi lɛ anyɛ afee nakai ejaakɛ eyɛ suɔmɔ. Mɛɛ gbɛjianɔ eto?

2. Mɛɛ gbɛjianɔ Yehowa eto koni mɔ fɛɛ mɔ aná anɔkwa hiɛshikamɔ? Shi mɛni mɛi pii ehala akɛ amɛbaafee?

² Nɔ kome ni Yehowa efee koni no aye abua wɔ ni wɔhiɛ akã shi ji, ehã wɔ e-Wiemɔ, ni ji Biblia lɛ. Mɔ fɛɛ mɔ ni miitao Biblia lɛ eko lɛ nine baanyɛ ashɛ eko nɔ. Ni asafo lɛ woji lɛ hu? Woji nɛɛ gbalaa Biblia lɛ mli, ni ŋmɛnɛ lɛ, Yehowa dromɔ naa lɛ, atsɔɔ woji nɛɛ ashishi kɛtee wiemɔi ni fa fe 1,000 mli. No hewɔ lɛ, wɔbaanyɛ wɔkɛɛ akɛ, “anɔkwa hiɛshikamɔ miibo waa.” Mɛi ni boɔ lɛ toi, ni ji mɛi ni kaneɔ Biblia lɛ kɛ asafo lɛ woji lɛ ni amɛkɛ nɔ ni amɛkaseɔ yɛ mli lɛ tsuɔ nii lɛ náa he sɛɛ. Shi mɛi pii etsimɔ  amɛtoi koni amɛkanu bo ni anɔkwa hiɛshikamɔ boɔ lɛ. Kɛ́ amɛyaakpɛ amɛyiŋ yɛ sane ko he lɛ, amɛfeɔ nɔ ni amɛ diɛŋtsɛ amɛsumɔɔ loo amɛhãa mɛi krokomɛi tsɔɔ amɛ nɔ ni amɛfee. Amɛteŋ mɛi komɛi po ebuuu wɔ akɛni wɔhala akɛ wɔkɛ nɔ ni Biblia lɛ kɛɔ lɛ baatsu nii lɛ hewɔ. Yɛ nikasemɔ nɛɛ mli lɛ, abaatsɔɔ wɔ nɔ hewɔ ni mɛi feɔ nakai. Shi klɛŋklɛŋ lɛ, nyɛhãa wɔkwɛa bɔ ni wɔbaafee wɔná hiɛshikamɔ ni Yehowa hãa anáa lɛ.

3. Mɛni kɛ́ wɔfee lɛ, no baatsɔɔ akɛ wɔyɛ anɔkwa hiɛshikamɔ?

³ Kɛ́ mɔ ko damɔ nibii ni ele lɛ anɔ ekpɛ yiŋ kpakpai lɛ, abaanyɛ akɛɛ akɛ ehiɛ kã shi. Shi no etsɔɔɔ doo akɛ eyɛ anɔkwa hiɛshikamɔ. Mɛni hewɔ? Biblia lɛ kɛɛ: “Yehowa gbeyeishemɔ ji nɔ klɛŋklɛŋ ni hãa mɔ náa hiɛshikamɔ, ni Mɔ Krɔŋkrɔŋ Fe Fɛɛ lɛ ni aaale lɛ ji niiashishinumɔ.” (Abɛi 9:10) No hewɔ lɛ, kɛ́ wɔyaakpɛ yiŋ ko ni he hiaa waa lɛ, esa akɛ wɔtao Yehowa susumɔ yɛ nakai sane lɛ he koni wɔdamɔ no nɔ wɔkpɛ wɔyiŋ, ni no baahã ana akɛ wɔle “Mɔ Krɔŋkrɔŋ Fe Fɛɛ lɛ.” Kɛ́ wɔkase Biblia lɛ kɛ asafo lɛ woji lɛ, ebaahã wɔle Yehowa susumɔi yɛ saji ahe ni no baatsɔɔ akɛ wɔyɛ anɔkwa hiɛshikamɔ.​—Abɛi 2:5-7.

4. Mɛni hewɔ Yehowa pɛ ji mɔ ni baanyɛ ahã wɔná anɔkwa hiɛshikamɔ?

⁴ Yehowa pɛ baanyɛ ahã wɔná anɔkwa hiɛshikamɔ. (Rom. 16:27) Mɛni hewɔ? Ejaakɛ klɛŋklɛŋ lɛ, Yehowa ji mɔ ni bɔ nibii fɛɛ ni ele nibii ni ebɔ lɛ jogbaŋŋ fe mɔ fɛɛ mɔ. (Lala 104:24) Nɔ ni ji enyɔ lɛ, nibii fɛɛ ni Yehowa feɔ lɛ hãa anaa akɛ ehiɛ kã shi. (Rom. 11:33) Nɔ ni ji etɛ lɛ, mɛi ni kɛ Yehowa ŋaawoi tsuɔ nii lɛ náa he sɛɛ be fɛɛ be. (Abɛi 2:10-12) No hewɔ lɛ, kɛ́ wɔmiitao wɔhiɛ akã shi be fɛɛ be lɛ, esa akɛ wɔhã anɔkwa saji etɛ nɛɛ ahi wɔjwɛŋmɔŋ ni ekudɔ wɔ be fɛɛ be ni wɔmiikpɛ wɔyiŋ loo wɔmiifee nɔ ko.

5. Mɛni ejɛ Nyɔŋmɔ hiɛshikamɔ ni mɛi kɛtsuuu nii lɛ mli kɛba?

⁵ Mɛi pii anaa kpɛɔ amɛhe yɛ adebɔɔ nibii ahe, shi kɛ̃lɛ, amɛheee amɛyeee akɛ mɔ ko ni bɔ nibii nɛɛ. Amɛsusuɔ akɛ nibii lɛ ba kɛkɛ. Mɛi komɛi hu kɛɔ akɛ amɛheɔ amɛyeɔ akɛ Nyɔŋmɔ yɛ, shi yɛ nakai beiaŋ nɔŋŋ lɛ, amɛnuɔ he akɛ nibii ni yɔɔ Biblia lɛ mli lɛ be eho, no hewɔ lɛ, amɛkɛtsuuu nii. Mɛni ejɛ enɛ mli kɛba? Akɛni mɛi kɛ́ hiɛshikamɔ ni jɛ Nyɔŋmɔ ŋɔɔ lɛ tsuuu nii hewɔ lɛ, nibii efite waa yɛ je lɛ mli fe tsutsu lɛ. Mɛi pii bɛ miishɛɛ kɛ hiɛnɔkamɔ kpakpa. Nibii ni yaa nɔ lɛ hãa wɔnaa akɛ nɔ ni Biblia lɛ wie lɛ ji anɔkwale. Ewie akɛ: “Hiɛshikamɔ ko loo sanesɛɛkɔmɔ ko loo ŋaawoo ko bɛ ni teɔ shi eshiɔ Yehowa.” (Abɛi 21:30) Esa akɛ enɛ ni wɔle lɛ atsirɛ wɔ ni wɔya nɔ wɔbi Yehowa ni ehã wɔ anɔkwa hiɛshikamɔ. Dɔlɛ sane ji, mɛi pii efeee nakai. Mɛni hewɔ?

6. Yɛ nɔ ni awie yɛ Abɛi 1:22-25 lɛ naa lɛ, namɛi booo anɔkwa hiɛshikamɔ toi?

⁶ Mɛi babaoo yɛ ni kɛ́ amɛnu ni anɔkwa hiɛshikamɔ “miibo waa yɛ gbɛjegbɛ lɛ nɔ” lɛ, amɛbooo toi. Biblia lɛ hãa wɔleɔ akɛ, kui etɛ komɛi yɛ ni booo anɔkwa hiɛshikamɔ toi. Amɛji, ‘mɛi ni jwɛŋmɔ esako,’ “hefɛoyelɔi,” kɛ “kwashiai.” (Kanemɔ Abɛi 1:22-25.) Nyɛhãa wɔkwɛa nɔ hewɔ ni mɛi nɛɛ booo hiɛshikamɔ toi lɛ, kɛ agbɛnɛ hu, nɔ ni wɔbaafee koni wɔkatamɔ amɛ.

7. Mɛni hewɔ mɛi komɛi sumɔɔɔ ni amɛnáa jwɛŋmɔ lɛ?

⁷ ‘Mɛi ni jwɛŋmɔ esako’ loo mɛi ni nako jwɛŋmɔ lɛ ji, mɛi ni ewaaa akɛ abaalaka amɛ loo mɛi ni heɔ nɔ fɛɛ nɔ ni amɛnuɔ lɛ amɛyeɔ kɛkɛ ni amɛjwɛŋŋ he. (Abɛi 14:15) Bei pii lɛ, wɔkɛ mɛi nɛɛ ekomɛi kpeɔ yɛ shiɛmɔ nitsumɔ lɛ mli. Ŋmɛnɛ lɛ, mɛi pii yɛ ni amɛjamɔŋ  hiɛnyiɛlɔi loo maŋ onukpai elaka amɛ. Mɛi nɛɛ ateŋ mɛi komɛi yɛ ni kɛ́ amɛná amɛle akɛ alaka amɛ lɛ, edɔɔ amɛ waa. Jeee mɛi ni tamɔ nɛkɛ ahe awieɔ yɛ Abɛi 1:22 lɛ. Mɛi ni awieɔ amɛhe yɛ biɛ lɛ, amɛjwɛŋmɔ esako, ejaakɛ amɛ diɛŋtsɛ amɛsumɔɔɔ ni amɛnáa jwɛŋmɔ. (Yer. 5:31) Amɛsumɔɔ ni amɛfee nɔ ni amɛ diɛŋtsɛ amɛsumɔɔ, ni amɛsumɔɔɔ ni amɛkaseɔ Biblia lɛ loo amɛhiɔ shi yɛ Nyɔŋmɔ gbɛtsɔɔmɔi anaa. Amɛteŋ mɛi pii anifeemɔ tamɔ yoo ko ni sumɔɔ sɔlemɔ yaa waa ni yɔɔ Quebec, yɛ Canada lɛ. Be ko ni Odasefonyo ko ba eŋɔɔ yɛ shĩa lɛ, ekɛɛ lɛ akɛ: “Kɛ́ wɔsɔfo lɛ elaka wɔ lɛ, lɛ esane ni, jeee wɔ wɔsane ni!” Wɔsumɔŋ ni wɔfee wɔnii tamɔ mɛi ni jwɛŋmɔ esako lɛ, aloo jeee nakai?​—Abɛi 1:32; 27:12.

8. Kɛ́ wɔmiitao wɔjwɛŋmɔ asa lɛ, mɛni esa akɛ wɔfee?

⁸ Ekã shi faŋŋ akɛ, wɔsumɔŋ ni wɔtsɔmɔ mɛi ni jwɛŋmɔ esako. Enɛ hewɔ Biblia lɛ woɔ wɔ ŋaa ni ‘wɔtsɔmɔ mɛi ni edara yɛ wɔniiashishinumɔ gbɛfaŋ’ lɛ. (1 Kor. 14:20) Mɛi ni edara yɛ amɛniiashishinumɔ gbɛfaŋ lɛ ajwɛŋmɔ esa ejaakɛ amɛkɛ Biblia mli shishitoo mlai tsuɔ nii yɛ amɛshihilɛ mli. Kɛ́ wɔkɛ Biblia mli shishitoo mlai tsu nii yɛ wɔshihilɛ mli lɛ, wɔbaana akɛ shishitoo mlai nɛɛ hãa wɔhiɛ kãa shi ni amɛyeɔ amɛbuaa wɔ ni wɔkpɛɔ yiŋ kpakpai ni wɔnáaa naagbai pii. Yɛ be kɛ beiaŋ lɛ, ehi akɛ wɔbaasusu yiŋ srɔtoi ni wɔkpɛ lɛ ahe. Kɛ́ akɛ wɔ ekase Biblia lɛ be saŋŋ nɛ ni wɔyaa asafoŋ kpeei hu lɛ, wɔbaanyɛ wɔbi wɔhe nɔ hewɔ ni wɔjɔko wɔhe nɔ wɔhãko Yehowa ni wɔbaahã abaptisi wɔ lɛ. Ni kɛ́ abaptisi wɔ lɛ, wɔbaanyɛ wɔbi wɔhe akɛ, ‘Ani miiya mihiɛ yɛ shiɛmɔ kɛ nitsɔɔmɔ nitsumɔ lɛ mli? Ani yiŋ srɔtoi ni mikpɛɔ yɛ shihilɛ mli lɛ hãa anaa akɛ mikɛ nibii ni mikase yɛ Biblia lɛ mli lɛ miitsu nii? Ani miikase Yesu ni mikɛ mɛi miiye jogbaŋŋ tamɔ bɔ ni ekɛ amɛ baaye ehã lɛ?’ Kɛ́ wɔmiina akɛ eshwɛɔ wɔ fioo yɛ nibii nɛɛ eko mli lɛ, esa akɛ wɔjwɛŋ Yehowa kaimɔi lɛ ahe ejaakɛ ‘amɛhãa mɔ ni jwɛŋmɔ esako lɛ hiɛ kãa shi.’​—Lala 19:7.

9. Mɛni “hefɛoyelɔi” lɛ feɔ ni hãa wɔnaa akɛ amɛsumɔɔɔ ni amɛhiɛ kãa shi?

⁹ Kuu ni ji enyɔ ni booo hiɛshikamɔ toi lɛ ji, “hefɛoyelɔi.” Bei komɛi lɛ, wɔkɛ mɛi nɛɛ ekomɛi kpeɔ yɛ shiɛmɔ nitsumɔ lɛ mli. Nɔ ni eshwɛ amɛ nɔŋŋ ji ni amɛbaaye mɛi ahe fɛo. (Lala 123:4) Biblia lɛ bɔ kɔkɔ akɛ, yɛ naagbee gbii lɛ amli lɛ hefɛoyelɔi pii baaba. (2 Pet. 3:3, 4) Bɔ ni Lot, mɔ ni Biblia lɛ tsɛ lɛ jalɔ lɛ, shaahiimɛi lɛ booo kɔkɔ ni ebɔ amɛ lɛ toi lɛ, nakai nɔŋŋ ŋmɛnɛ lɛ, mɛi komɛi booo kɔkɔ ni wɔbɔɔ amɛ lɛ toi. (1 Mo. 19:14) Mɛi pii ŋmɔɔ mɛi ni hiɔ shi yɛ Biblia mli shishitoo mlai anaa lɛ ni amɛyeɔ amɛhe fɛo. Hefɛoyelɔi nɛɛ sumɔɔ ni amɛnyiɛ “nibii fɔji ni amɛ diɛŋtsɛ amɛshweɔ lɛ asɛɛ” ni no hewɔ amɛfeɔ nakai lɛ. (Yuda 7, 17, 18) Bɔ ni Biblia lɛ etsɔɔ akɛ hefɛoyelɔi baafee amɛnii amɛhã lɛ, nakai pɛpɛɛpɛ mɛi ni ekwa anɔkwa jamɔ lɛ kɛ mɛi krokomɛi ni booo Yehowa toi lɛ feɔ amɛnii amɛhãa!

10. Yɛ nɔ ni aŋma yɛ Lala 1:1 lɛ naa lɛ, mɛni baaye abua wɔ ni wɔkafee wɔnii tamɔ hefɛoyelɔi lɛ?

¹⁰ Mɛni baaye abua wɔ ni wɔkafee wɔnii tamɔ hefɛoyelɔi lɛ? Nɔ kome ni baanyɛ aye abua wɔ ji, ni wɔbaatsi wɔhe kɛje mɛi ni wieɔ nɔ fɛɛ nɔ he nyanyaanya lɛ ahe. (Kanemɔ Lala 1:1.) Nɔ ni enɛ tsɔɔ ji akɛ, esaaa akɛ wɔboɔ mɛi ni ekwa anɔkwa jamɔ lɛ toi loo wɔkaneɔ amɛwoji kɛ saji krokomɛi ni amɛŋmala lɛ. Agbɛnɛ hu, esa akɛ wɔkwɛ jogbaŋŋ ni wɔkatsɔmɔ mɛi ni wieɔ nii ahe nyanyaanya loo mɛi ni yiŋ feɔ amɛ enyɔnyɔɔnyɔ yɛ nibii ni Yehowa ewie kɛ gbɛtsɔɔmɔi ni ekɛhãa wɔ kɛtsɔɔ esafo lɛ nɔ lɛ ahe. No hewɔ lɛ, obaanyɛ obi ohe akɛ: ‘Ani be fɛɛ be ni akɛ gbɛtsɔɔmɔ hee ko baahã loo abaahã wɔle shishinumɔ hee ko ni wɔná lɛ, minaa tɔmɔ yɛ he? Ani mitaoɔ tɔmɔ yɛ mɛi ni nyiɛɔ hiɛ lɛ ahe?’ Kɛ́ wɔna akɛ sui ni tamɔ nɛkɛ miijie amɛhiɛ kpo bibioo po yɛ wɔmli lɛ, esa akɛ wɔfee  oya ni wɔtsake koni Yehowa aná wɔhe miishɛɛ.​—Abɛi 3:34, 35.

11. Te “kwashiai” lɛ naa Yehowa jeŋba he mlai lɛ amɛhãa tɛŋŋ?

¹¹ Kuu ni ji etɛ ni sumɔɔɔ ni amɛboɔ hiɛshikamɔ toi ji, “kwashiai” lɛ. Biblia lɛ tsɛɔ amɛ kwashiai ejaakɛ amɛsumɔɔɔ ni amɛhiɔ shi yɛ Yehowa jeŋba he mlai lɛ anaa. Moŋ lɛ, amɛfeɔ nɔ ni ja yɛ amɛ diɛŋtsɛ amɛhiɛ. (Abɛi 12:15) Mɛi ni tamɔ nakai lɛ booo Yehowa, ni ji hiɛshikamɔ Jɛɛhe lɛ toi. (Lala 53:1) Kɛ́ wɔkɛ amɛ kpe yɛ shiɛmɔ nɔ lɛ, amɛwieɔ amɛshiɔ wɔ waa yɛ Biblia mli shishitoo mlai ni wɔmiibɔ mɔdɛŋ akɛ wɔbaahi shi yɛ naa lɛ hewɔ. Shi amɛbɛ nɔ ko kpakpa ko ni amɛbaakɛɛ wɔ ni wɔhi shi yɛ naa. Biblia lɛ kɛɛ: “Buulu nyɛŋ aná anɔkwa hiɛshikamɔ; ebɛ nɔ ko ni ebaakɛɛ yɛ maŋ lɛ agbó lɛ mli.” (Abɛi 24:7) Buului loo kwashiai lɛ bɛ nɔ kpakpa ko ni amɛbaakɛɛ wɔ. Enɛ hewɔ Yehowa bɔɔ wɔ kɔkɔ akɛ ‘wɔtsi wɔhe kɛje buului ahe’ lɛ!​—Abɛi 14:7.

12. Mɛni baaye abua wɔ ni wɔkafee wɔnii tamɔ kwashiai lɛ?

¹² Wɔfeee wɔnii tamɔ mɛi ni sumɔɔɔ ni amɛboɔ Nyɔŋmɔ ŋaawoo toi lɛ. Moŋ lɛ, wɔsumɔɔ ni wɔle Yehowa susumɔi yɛ saji ahe ni wɔhi shi yɛ naa, ni no hewɔ wɔyeɔ emlai fɛɛ anɔ lɛ. Nɔ kome ni baahã wɔná he miishɛɛ waa akɛ wɔhi shi yɛ Yehowa gbɛtsɔɔmɔi anaa ji, ni wɔkɛ mɛi ni boɔ lɛ toi lɛ ashihilɛ baato mɛi ni booo lɛ toi lɛ anɔ he. Mɛi ni booo Yehowa toi lɛ ashihilɛ feɔ basaa ni amɛnáa naagbai pii. Shi wɔ lɛ, wɔyɛ miishɛɛ ejaakɛ wɔboɔ Nyɔŋmɔ toi.​—Lala 32:8, 10.

13. Ani Yehowa nyɛɔ wɔnɔ doo akɛ wɔbo eŋaawoo toi ni wɔkɛtsu nii?

¹³ Yehowa eto gbɛjianɔ koni mɛi fɛɛ ni miisumɔ ni amɛkase ehe nii ni amɛhiɛ akã shi lɛ anyɛ afee nakai. Shi ekɛfiii mɔ ko mɔ ko nɔ, nɔ moŋ ni efeɔ ji, ehãa wɔleɔ naagbai ni wɔbaaná kɛ́ wɔbooo lɛ toi. (Abɛi 1:29-32) Mɛi ni ekpiliŋ amɛtsui akɛ amɛboŋ Yehowa toi lɛ baakpa gbɛ gbonyo ni amɛkɔ lɛ mli yibii lɛ. Bɔ ni amɛhiɔ shi amɛhãa lɛ hewɔ lɛ, amɛbaaná naagbai kɛ amanei sɔŋŋ, ni naagbee kwraa lɛ, Yehowa baakpãtã amɛhiɛ. Shi mɛi ni boɔ Yehowa ŋaawoo toi ni amɛkɛtsuɔ nii lɛ, naa nɔ ni Yehowa ewie yɛ amɛhe. Ewie akɛ: “Mɔ ni boɔ mi toi lɛ baahi shi shweshweeshwe, ni esheŋ sane fɔŋ ko kwraa gbeyei.”​—Abɛi 1:33.

14-15. Mɛni wɔkaseɔ yɛ Abɛi 4:23 lɛ mli?

¹⁴ Mɛi ni boɔ anɔkwa hiɛshikamɔ toi, ni ji mɛi ni boɔ Nyɔŋmɔ ŋaawoo toi ni amɛkɛtsuɔ nii lɛ náa he sɛɛ be fɛɛ be. Tamɔ wɔna lɛ, Yehowa eto gbɛjianɔ koni mɛi fɛɛ ni miitao amɛnu ewiemɔi ni hãa mɔ hiɛ kãa shi lɛ, anyɛ afee nakai ni etɔɔɔ amɛ. Akɛ nɔkwɛmɔnɔ lɛ, yɛ Abɛi awolo lɛ mli fɛɛ lɛ, etsɔɔ wɔ nibii ni kɛ́ wɔfee lɛ wɔbaaná shihilɛ kpakpa be fɛɛ be. Nyɛhãa wɔsusua enɛ he nɔkwɛmɔnii ejwɛ ahe wɔkwɛa.

¹⁵ Ohiɛ akã ofonirifeemɔŋ tsui lɛ he. Biblia lɛ kɛɔ akɛ: “Ohiɛ akã otsui he fe nibii fɛɛ, ejaakɛ no mli wala nuhiŋmɛii lɛ yɔɔ.” (Abɛi 4:23)  Mɛɛ nibii nɛkɛ wɔfeɔ koni wɔtsui lɛ anyɛ atsu nii jogbaŋŋ be fɛɛ be? Wɔyeɔ niyenii kpakpai, wɔgbɔleɔ wɔkpɔiaŋ, ni wɔfeee nibii ni baawo wɔ hela. Nɔ ko nɛkɛ nɔŋŋ esa akɛ wɔfee kɛ́ wɔsumɔɔɔ ni naagba baa wɔfonirifeemɔŋ tsui lɛ he. Esa akɛ wɔkɛ Nyɔŋmɔ Wiemɔ lɛ alɛ wɔhe daa. Gbɛ kome ni wɔbaanyɛ wɔtsɔ nɔ wɔfee nakai ji, ni wɔbaasaa wɔhe kɛhã asafoŋ kpeei lɛ ni wɔya, ni kɛ́ wɔtee hu lɛ wɔkɛ wɔhe awo mli jogbaŋŋ. Agbɛnɛ hu, esa akɛ wɔgbɔle wɔkpɔiaŋ daa kɛtsɔ shiɛmɔ nitsumɔ lɛ ni wɔkɛ wɔhe baawo mli jogbaŋŋ lɛ nɔ. Naagbee kwraa lɛ, esa akɛ wɔtsi wɔhe kɛje hiɛtserɛjiemɔi gbohii, nanemɛi gbohii, kɛ nibii krokomɛi ni tamɔ nakai ni baanyɛ afite wɔjwɛŋmɔ loo kɛ́ wɔɔwie lɛ, ewo wɔ hela yɛ mfonirifeemɔŋ lɛ ahe.

16. Ŋmɛnɛ lɛ, mɛni hewɔ ehe miihia waa ni wɔbo ŋaa ni awo yɛ Abɛi 23:4, 5 lɛ toi?

¹⁶ Omii ashɛ nii ni oyɔɔ lɛ he. Biblia lɛ kɛɔ akɛ: “Kaahã etɔ bo yɛ ninámɔ he. . . . Be ni obaana lɛ, ebɛ dɔŋŋ, ejaakɛ ekwɛ̃ɔ fiji tamɔ okropɔŋ ni efilikiɔ kɛyaa ŋwɛi.” (Abɛi 23:4, 5) Shika kɛ heloonaa nibii ni wɔyɔɔ lɛ fɛɛ baanyɛ aje wɔdɛŋ shwiaa. Fɛɛ sɛɛ lɛ ŋmɛnɛ lɛ, shikatsɛmɛi kɛ ohiafoi fɛɛ miifee bɔ fɛɛ bɔ ni amɛbaanyɛ koni amɛná shika. Enɛ hewɔ lɛ, amɛteŋ mɛi pii efite amɛgbɛ́i kpakpa lɛ, amɛfite amɛ kɛ mɛi ateŋ, ni amɛwo amɛhe hela po. (Abɛi 28:20; 1 Tim. 6:9, 10) Shi kɛ́ wɔhiɛ kã shi lɛ, wɔyeŋ wɔtsui fe nine yɛ shika he. Ni kɛ́ wɔyeee wɔtsui fe nine yɛ shika he lɛ, wɔbaaná miishɛɛ ejaakɛ wɔhiɛ ekɔŋ nii anɔ shi moŋ, wɔmii baashɛ nii ni wɔyɔɔ lɛ ahe.​—Jaj. 7:12.

17. Mɛni kɛ́ wɔfee lɛ, wɔbaaná hiɛshikalɔi alilɛi ni awie he yɛ Abɛi 12:18 lɛ?

¹⁷ Jwɛŋmɔ nii ahe jogbaŋŋ dani owie. Kɛ́ wɔkwɛɛɛ wɔwiemɔ jogbaŋŋ lɛ, ebaaye mɛi awui waa. Biblia lɛ kɛɔ akɛ: “Wiemɔ ni awieɔ ni asusuuu he lɛ, etamɔ nɔ ni aabamɔ klante, shi hiɛshikalɔi alilɛi tsaa mɔ.” (Abɛi 12:18) Esaaa akɛ wɔyeɔ mɛi ahe osheku ejaakɛ efiteɔ mɛi ateŋ. (Abɛi 20:19) Kɛ́ wɔmiisumɔ ni wɔwiemɔ atswa mɛi ama shi moŋ fe ni ebaaye amɛ awui lɛ, belɛ esa akɛ wɔkane Nyɔŋmɔ Wiemɔ lɛ daa ni wɔjwɛŋ nɔ. (Luka 6:45) Kɛ́ wɔjwɛŋ nibii ni Biblia lɛ ewie lɛ anɔ lɛ, wɔwiemɔ baafee tamɔ “hiɛshikamɔ nuhiŋmɛi” ni hãa mɛi atsui nyɔɔ amɛmli.​—Abɛi 18:4.

18. Kɛ́ wɔkɛ ŋaa ni awo yɛ Abɛi 24:6 lɛ tsu nii lɛ, mɛɛ gbɛ nɔ ebaaye ebua wɔ ni wɔya wɔhiɛ yɛ shiɛmɔ nitsumɔ lɛ mli?

 ¹⁸ Okɛ gbɛtsɔɔmɔi ni asafo lɛ kɛhãa lɛ atsu nii. Biblia lɛ ewo wɔ ŋaa kpakpa ko ni kɛ́ wɔkɛtsu nii lɛ ebaahi ehã wɔ. Ekɛɛ: “Okɛ ŋaawoo kpakpa baawu ota lɛ, ni kɛ́ ŋaawolɔi pii yɛ lɛ, ayeɔ kunim.” (Abɛi 24:6) Mɛɛ gbɛ nɔ ŋaawoo nɛɛ baanyɛ aye abua wɔ ni wɔya wɔhiɛ yɛ shiɛmɔ kɛ nitsɔɔmɔ nitsumɔ lɛ mli? Nɔ najiaŋ ni wɔbaatsu shiɛmɔ nitsumɔ lɛ bɔ ni wɔ diɛŋtsɛ wɔsumɔɔ lɛ, esa akɛ wɔmia wɔhiɛ ni wɔkɛ ŋaawoi ni akɛhã wɔ yɛ he lɛ atsu nii. Agbɛnɛ hu, kɛ́ wɔtee asafoŋ kpeei lɛ, nyɛmimɛi ni he esa jɛɔ Biblia lɛ mli amɛhãa wiemɔi ni amɛfeɔ nɔkwɛmɔnii, ni wɔbaanyɛ wɔkase bɔ ni amɛtsɔɔ nii amɛhãa lɛ. Yehowa asafo lɛ ehã wɔ woji kɛ vidioi hu ni wɔbaanyɛ wɔkɛye wɔbua mɛi koni amɛnu Biblia lɛ shishi jogbaŋŋ. Esa akɛ wɔ fɛɛ wɔbɔ mɔdɛŋ wɔkase bɔ ni akɛ nibii nɛɛ tsuɔ nii ahãa lɛ jogbaŋŋ.

19. Te onaa ŋaawoi kpakpai ni Yehowa kɛhãa lɛ ohãa tɛŋŋ? (Abɛi 3:13-18)

¹⁹ Kanemɔ Abɛi 3:13-18. Wɔhiɛ sɔɔ ŋaawoi kpakpai ni yɔɔ Nyɔŋmɔ Wiemɔ lɛ mli lɛ waa. Eji Nyɔŋmɔ kɛ ŋaawoi kpakpai nɛɛ wooo e-Wiemɔ lɛ mli kulɛ, benɛ nɛɛ nɛgbɛ wɔyɔɔ? Yɛ nikasemɔ nɛɛ mli lɛ, wɔsusu ŋaawoi kpakpai komɛi ni hãa mɔ hiɛ kãa shi ni yɔɔ Abɛi awolo lɛ mli lɛ ahe. Shi wɔle akɛ, ŋaawoi kpakpai yɛ Biblia lɛ mli woji krokomɛi lɛ hu amli. Nyɛhãa wɔtswaa wɔfai shi akɛ, wɔbaabo ŋaawoi kpakpai ni Yehowa kɛhãa lɛ toi be fɛɛ be ni wɔkɛtsu nii. Je lɛ buɔ ŋaawoi kpakpai nɛɛ akɛ kwashiai asane, shi egbaaa wɔnaa ejaakɛ wɔle akɛ, ‘mɛi ni hiɛɔ hiɛshikamɔ mli kpɛŋŋ lɛ, abaabu amɛ akɛ amɛyɛ miishɛɛ.’