1-2. (a) Mɛni nɔyelɔi komɛi efee Yehowa webii? Shi te amɛfeɔ amɛnii yɛ he amɛhãa tɛŋŋ? (b) Mɛni hewɔ mɔ ko náa miishɛɛ kɛ́ aawa lɛ yi po? (Wiemɔ mfoniri ni yɔɔ wolo lɛ hiɛ lɛ hu he.)

 AMRƆ nɛɛ, atsĩ wɔnitsumɔ lɛ fã ko naa loo agu yɛ shikpɔji ni fa fe 30 anɔ yɛ jeŋ fɛɛ. Yɛ shikpɔji nɛɛ ekomɛi anɔ lɛ, amralofoi lɛ ewo wɔnyɛmimɛi lɛ tsuŋ. Mɛni efɔŋ amɛfee? Yɛ Yehowa hiɛ lɛ, wɔnyɛmimɛi lɛ efeko efɔŋ ko, shi aawa amɛ yi ejaakɛ amɛkaneɔ Biblia lɛ ni amɛkaseɔ, amɛkɛ mɛi gbaa amɛhemɔkɛyeli lɛ he sane, ni amɛkɛ amɛnyɛmimɛi lɛ yaa asafoŋ kpeei. Agbɛnɛ hu, amɛkɛ amɛhe wooo pɔlitis kɛ maŋ saji amli. Yɛ nibii ni afeɔ wɔnyɛmimɛi nɛɛ fɛɛ sɛɛ lɛ, amɛmiiya nɔ amɛmiiye Yehowa anɔkwa, b ni tsɔɔ akɛ, amɛkpaaa Yehowa jamɔ. Ni eŋɔɔ amɛnaa waa akɛ amɛmiifee nakai!

² Ekolɛ ona wɔnyɛmimɛi ni yɔɔ ekãa ni aawa amɛ yi nɛɛ ahe mfoniri ni ona akɛ amɛhiɛ yɛ ŋmɔlɔŋmɔlɔ. Mɛni hewɔ amɛyɔɔ miishɛɛ nakai lɛ? Ejaakɛ amɛle akɛ Yehowa yɛ amɛhe miishɛɛ yɛ anɔkwa ni amɛyeɔ lɛ lɛ hewɔ. (1 Kro. 29:17a) Yesu wie akɛ: “Mɛi ni awaa amɛ yi yɛ jalɛ hewɔ lɛ yɛ miishɛɛ.”  Ni ekɛfata he akɛ, “Nyɛnyaa ni nyɛmli afilia nyɛ, akɛni nyɛjweremɔnɔ lɛ fa babaoo” lɛ hewɔ.​—Mat. 5:10-12.

3. Tamɔ bɔ ni wɔnaa yɛ Bɔfoi 4:19, 20 lɛ, te bɔfoi lɛ fee amɛnii amɛhã tɛŋŋ be ni awa amɛ yi lɛ? Ni mɛni hewɔ amɛfee amɛnii nakai?

³ Nɔ ni wɔnyɛmimɛi lɛ kɛkpeɔ ŋmɛnɛ lɛ, no nɔŋŋ bɔfoi lɛ kɛkpe yɛ blema Kristofoi lɛ abeiaŋ. Awa amɛ yi yɛ Yesu he sane ni amɛshiɛɔ lɛ hewɔ. Yudafoi asaneyelihe wulu lɛ kojolɔi lɛ fã amɛ shii abɔ akɛ “amɛkpa wiemɔ yɛ Yesu gbɛ́i mli.” (Bɔf. 4:18; 5:27, 28, 40) Te bɔfoi lɛ fee amɛnii yɛ he amɛhã tɛŋŋ? (Kanemɔ Bɔfoi 4:19, 20.) Bɔfoi lɛ le akɛ, ‘mɔ ni fã amɛ akɛ amɛshiɛ amɛtsɔɔ maŋbii lɛ ni amɛye Kristo he odase fitsofitso’ lɛ nɔ kwɔ fe kojolɔi lɛ. (Bɔf. 10:42) Petro kɛ Yohane, ni ji amɛnaawielɔi lɛ kɛ ekãa kɛɛ kojolɔi lɛ akɛ, amɛbaabo Nyɔŋmɔ moŋ toi fe amɛ, ni amɛkpaŋ Yesu he odase yeli. Etamɔ nɔ ni amɛmiikɛɛ kojolɔi lɛ akɛ, ‘Namɛi ji nyɛ ni nyɛbaakɛɛ wɔ akɛ wɔbo nyɛ moŋ toi fe Nyɔŋmɔ?’

4. Tamɔ bɔ ni awie yɛ Bɔfoi 5:27-29 lɛ, mɛɛ nɔkwɛmɔnɔ kpakpa bɔfoi lɛ fee amɛhã anɔkwa Kristofoi fɛɛ? Ni te wɔbaafee tɛŋŋ wɔkase amɛ?

⁴ Bɔfoi lɛ bo “Nyɔŋmɔ moŋ toi akɛ nɔyelɔ fe gbɔmɛi.” (Kanemɔ Bɔfoi 5:27-29.) Ni anɔkwa Kristofoi fɛɛ ekase amɛnɔkwɛmɔnɔ kpakpa lɛ. Agwao bɔfoi lɛ yɛ anɔkwa ni amɛye ni amɛŋmɛɛɛ amɛhemɔkɛyeli lɛ he lɛ hewɔ. Shi amɛshi kojolɔi lɛ ahiɛ amɛtee kɛ ‘miishɛɛ ejaakɛ Yesu gbɛ́i lɛ hewɔ lɛ, abu amɛ akɛ mɛi ni esa akɛ ashwie amɛhiɛ shi,’ ni amɛtee nɔ amɛshiɛ!​—Bɔf. 5:40-42.

5. Mɛɛ sanebimɔi wɔbaahã hetoo?

⁵ Nɔ ni bɔfoi lɛ fee lɛ teɔ sanebimɔi komɛi ashi. Ekome ji, ‘Ani yiŋ ni bɔfoi lɛ kpɛ akɛ amɛbaabo Nyɔŋmɔ moŋ toi fe gbɔmɛi lɛ tsɔɔ akɛ, amɛbooo famɔ akɛ “mɔ fɛɛ mɔ aba ehe shi awo hegbɛi ni yeɔ nɔ lɛ ashishi” lɛ toi?’ (Rom. 13:1) Ni ŋmɛnɛ lɛ, te wɔbaafee tɛŋŋ ‘wɔba wɔhe shi wɔwo nɔyelii kɛ hegbɛi ashishi,’ tamɔ bɔ ni bɔfo Paulo kɛɛ lɛ, ni yɛ nakai beiaŋ nɔŋŋ lɛ wɔye Nyɔŋmɔ anɔkwa ni  wɔna lɛ akɛ wɔ-Nɔyelɔ ni fe fɛɛ ni esa akɛ wɔbo lɛ toi lɛ?​—Tito 3:1.

6. (a) Namɛi ji “hegbɛi ni yeɔ nɔ lɛ” ni atsĩ tã yɛ Romabii 13:1 lɛ? Ni te esa akɛ wɔkɛ amɛ aye ahã tɛŋŋ? (b) Mɛni wɔbaanyɛ wɔwie yɛ adesai nɔyelɔi fɛɛ ahe?

⁶ Kanemɔ Romabii 13:1. Wiemɔ ni ji, “hegbɛi ni yeɔ nɔ lɛ” ni akɛtsu nii yɛ ŋmalɛ nɛɛ mli lɛ kɔɔ adesai ni ji nɔyelɔi ni yɔɔ hewalɛ yɛ mɛi anɔ lɛ ahe. Esa akɛ Kristofoi aba amɛhe shi amɛhã nɔyelɔi nɛɛ. Nɔyelɔi nɛɛ kwɛɔ koni toiŋjɔlɛ ahi maŋ lɛ mli ni mɛi aye mlai ni awo lɛ anɔ. Ni bei komɛi po lɛ, amɛfãa Yehowa webii lɛ ahe. (Kpo. 12:16) Enɛ hewɔ Yehowa biɔ ni wɔshe amɛ gbeyei, wɔkɛ woo ahã amɛ, ni wɔwo toi kɛ shikai fɛɛ ni amɛbiɔ ni wɔwo lɛ. (Rom. 13:7) Shi hegbɛi ni nɔyelɔi nɛɛ yɔɔ lɛ fɛɛ lɛ, Yehowa ji mɔ ni ŋmɛ amɛ gbɛ ni amɛná. Yesu fee enɛ faŋŋ be ni ekɛ Roma Amralo Pontio Pilato wieɔ lɛ. Be ni Pilato kɛɛ Yesu akɛ, eyɛ hegbɛ akɛ eŋmɛɔ ehe, ni eyɛ hegbɛ hu akɛ egbeɔ lɛ lɛ, Yesu kɛɛ lɛ akɛ: “Onáŋ hegbɛ ko kwraa yɛ minɔ kɛjeee ŋwɛi ajɛ akɛhã bo.” (Yoh. 19:11) Nɔ ni Yesu wie nɛɛ kɔɔ nɔyelɔi fɛɛ ni yɔɔ ŋmɛnɛ lɛ ahe.

7. Mɛɛ shihilɛi amli nɛkɛ esaaa akɛ wɔboɔ nɔyelɔi lɛ toi? Ni kɛ́ amɛkɛ hegbɛ ni amɛyɔɔ lɛ tsuuu nii jogbaŋŋ lɛ, mɛni baaba amɛnɔ?

⁷ Kɛ́ nɔyelɔi lɛ wo mla ko ni mla lɛ eteee shi ewooo Nyɔŋmɔ mlai lɛ, esa akɛ Kristofoi aye nɔ. Shi kɛ́ nɔyelɔi lɛ bi ni wɔfee nɔ ko ni Nyɔŋmɔ kɛɛ wɔkafee loo amɛkɛɛ wɔkafee nɔ ko ni Nyɔŋmɔ efã wɔ akɛ wɔfee lɛ, wɔboŋ amɛ toi. Akɛ nɔkwɛmɔnɔ lɛ, yɛ maji komɛi anɔ lɛ, nɔyelɔi lɛ biɔ ni oblahii fɛɛ kɛ amɛhe awo asraafoi anitsumɔ mli. c Yɛ hei komɛi hu lɛ, amɛŋmɛɛɛ gbɛ ni wɔkɛ Jeŋ Hee Shishitsɔɔmɔ lɛ loo asafo lɛ woji lɛ aba maŋ lɛ mli loo wɔkɛtsu nii. Ni agbɛnɛ hu, amɛŋmɛɛɛ gbɛ ni wɔshiɛɔ loo wɔfeɔ asafoŋ kpeei. Kɛ́ nɔyelɔi lɛ wa Kristo kaselɔi ayi loo amɛfee nibii krokomɛi ni tamɔ nakai lɛ, belɛ amɛkɛ hegbɛ ni amɛyɔɔ lɛ tsuuu nii jogbaŋŋ, ni Nyɔŋmɔ baakojo amɛ. Eena nɔ ni amɛfeɔ lɛ fɛɛ!​—Jaj. 5:8.

8. Mɛɛ srɔto yɔɔ Yehowa kɛ je lɛ nɔyelɔi lɛ teŋ? Ni mɛni hewɔ ehe miihia ni wɔle enɛ?

⁸ Je lɛ nɔyelɔi lɛ anɔ kwɔlɔ, shi mɔ ko yɛ ni nɔ kwɔ fe amɛ. Lɛ ji Yehowa. Yɛ Biblia lɛ mli lɛ, atsɛ Yehowa akɛ “Ofe lɛ” shii abɔ ni enɛ tsɔɔ akɛ, lɛ ji mɔ ni nɔ kwɔ fe fɛɛ yɛ ŋwɛi kɛ shikpɔŋ.​—Dan. 7:18, 22, 25, 27.

9. Mɛni gbalɔ Daniel na yɛ ninai komɛi ni ajie kpo atsɔɔ lɛ lɛ mli?

⁹ Gbalɔ Daniel na ninai komɛi ni hãa wɔnaa faŋŋ akɛ, Yehowa nɔ kwɔ kwraa fe je lɛ nɔyelɔi lɛ fɛɛ. Yɛ klɛŋklɛŋ ninaa lɛ mli lɛ, Daniel na kooloi wuji ejwɛ komɛi ni damɔ shi kɛhã jeŋ hewalɛi ni eho, tamɔ Babilon, Medo-Persia, Grees, kɛ Roma, kɛ jeŋ hewalɛ ni yɔɔ bianɛ ni ji, Anglo-Amerika lɛ. (Dan. 7:1-3, 17) Kɛkɛ ni Daniel na Nyɔŋmɔ ta maŋtsɛ sɛi nɔ yɛ ŋwɛi ni efee klalo akɛ ebaakojo. (Dan. 7:9, 10) Esa akɛ nɔ ni Daniel na yɛ no sɛɛ lɛ ahɛle nɔyelɔi fɛɛ ni yɔɔ ŋmɛnɛ lɛ shi waa.

10. Yɛ nɔ ni aŋma yɛ Daniel 7:13, 14, 27 lɛ naa lɛ, namɛi Yehowa kɛ shikpɔŋ lɛ wo amɛdɛŋ akɛ amɛye nɔ? Ni mɛni no tsɔɔ wɔ yɛ ehe?

¹⁰ Kanemɔ Daniel 7:13, 14, 27. Nyɔŋmɔ he hewalɛ kɛ hegbɛ ni je lɛ nɔyelɔi lɛ yɔɔ akɛ amɛyeɔ nɔ lɛ kɛje amɛdɛŋ, ni ekɛhã mɛi krokomɛi ni nɔ kwɔlɔ fe amɛ ni nakai hegbɛ lɛ sa amɛ lɛ. Namɛi tuuntu ekɛhã lɛ? Ekɛhã  Yesu Kristo, mɔ ni awie ehe akɛ, “mɔ ko ni tamɔ gbɔmɔ bi” lɛ lɛ, kɛ “Ofe lɛ mɛi krɔŋkrɔŋi lɛ,” ni ji mɛi 144,000 ni baaye nɔ kɛya “naanɔi anaanɔ” lɛ. (Dan. 7:18) Eyɛ faŋŋ akɛ, Yehowa ji “Ofe lɛ,” ejaakɛ lɛ pɛ eyɔɔ hegbɛ akɛ efeɔ nɔ ko ni tamɔ nɛkɛ.

11. Mɛni ekoŋŋ Daniel ŋma ni hãa wɔnaa akɛ Yehowa nɔ kwɔ fe je lɛ nɔyelɔi lɛ?

¹¹ Nɔ ni Daniel na nɛɛ kɛ nɔ ko ni etsɔ hiɛ ewie lɛ yɛ tsakpaa. Ewie akɛ: “Nyɔŋmɔ ni yɔɔ ŋwɛi lɛ, lɛ ekpaa maŋtsɛmɛi ni ewoɔ maŋtsɛmɛi.” Ekɛfata he akɛ, “Mɔ Ni Nɔ Kwɔ Fe Fɛɛ lɛ ji Nɔyelɔ yɛ adesai amaŋtsɛyeli mli, ni lɛ ekɛhãa mɔ fɛɛ mɔ ni esumɔɔ.” (Dan. 2:19-21; 4:17) Ani Yehowa ekpa maŋtsɛ loo ewó maŋtsɛ pɛŋ? Hɛɛ, efee eko dã!

12. Tsɔɔmɔ maŋtsɛmɛi komɛi ni Yehowa kpa amɛ maŋtsɛ yeli yɛ blema. (Kwɛmɔ mfoniri lɛ.)

¹² Yehowa efee nibii ni hãa anaa faŋŋ akɛ enɔ kwɔ fe “hegbɛi ni yeɔ nɔ lɛ.” Hã wɔsusu emli etɛ ahe wɔkwɛ. Ejipt maŋtsɛ Farao ye Yehowa webii lɛ nyɔŋ, ni ewie shii abɔ akɛ eŋmɛŋ amɛhe. Shi Yehowa hã ewebii lɛ ye amɛhe, ni eshiu Farao yɛ Ŋshɔ Tsuru lɛ mli. (2 Mo. 14:26-28; Lala 136:15) Babilon maŋtsɛ Belshazar ŋmɛ okpɔlɔ ni ‘ewó ehe nɔ eshi ŋwɛi Nuŋtsɔ lɛ’ ni ‘ejie jwiɛtɛi kɛ shika tsuru nyɔŋmɔi lɛ ayi’ moŋ fe Yehowa. (Dan. 5:22, 23) Shi Nyɔŋmɔ hã nakai nuu henɔwolɔ lɛ na akɛ ejeee mɔ ko kwraa. “Nakai nyɔɔŋ lɛ mli nɔŋŋ lɛ,” agbe Belshazar ni akɛ emaŋtsɛyeli lɛ hã Mediabii lɛ kɛ Persiabii lɛ. (Dan. 5:28, 30, 31) Palestina maŋtsɛ Herode Agripa I lɛ hã agbe bɔfo Yakobo, ni no sɛɛ lɛ ehã awo bɔfo Petro tsuŋ kɛ jwɛŋmɔ lɛ akɛ ebaahã agbe lɛ hu. Shi Yehowa eŋmɛɛɛ Herode gbɛ ni etsu eyiŋtoo lɛ he nii. “Yehowa bɔfo tswa lɛ nɔ,” ni egbo.​—Bɔf. 12:1-5, 21-23.

13. Gbaa nɔkwɛmɔnɔ ko ni tsɔɔ akɛ, kɛ́ nɔyelɔi fee ekome akɛ kuu po lɛ Yehowa baanyɛ eye amɛnɔ kunim.

¹³ Agbɛnɛ hu, Yehowa etsɔɔ akɛ kɛ́ nɔyelɔi fee ekome akɛ kuu po lɛ, eyɛ hewalɛ fe amɛ. Akɛ nɔkwɛmɔnɔ lɛ, be ni Israelbii lɛ yaaŋɔ Shiwoo Shikpɔŋ lɛ, Kanaan maŋtsɛmɛi 31 fee ekome koni amɛkɛ amɛ awu. Shi Yehowa ye ebua Israelbii lɛ ni amɛye amɛnɔ kunim. (Yos. 11:4-6, 20; 12:1, 7, 24) Agbɛnɛ hu, be ko be ni Siria maŋtsɛ Ben-hadad kɛ Siria maŋtsɛmɛi bibii 32 fee ekome koni amɛkɛ  Israelbii lɛ ayawu lɛ, Yehowa ye ebua Israelbii lɛ ni amɛye amɛnɔ kunim.​—1 Maŋ. 20:1, 26-29.

14-15. (a) Mɛni Maŋtsɛ Nebukadnezar kɛ Maŋtsɛ Dario wie yɛ Yehowa nɔyeli lɛ he? (b) Mɛni lalatsɛ lɛ wie yɛ Yehowa kɛ emaŋ lɛ he?

¹⁴ Yehowa etsɔɔ shii abɔ akɛ lɛ ji Ofe lɛ. Be ni Babilon maŋtsɛ Nebukadnezar gbee fuu yɛ ehewalɛ, enyɛmɔ, kɛ egbojee lɛ he moŋ fe ni ebaaba ehe shi ni ejie Yehowa yi lɛ, Yehowa hã eye sɛkɛ. Be ni esɛkɛ lɛ tse yɛ enɔ lɛ, ‘ejie Mɔ Ni Nɔ Kwɔ Fe Fɛɛ lɛ yi’ ni ewie akɛ: ‘Yehowa nɔyeli lɛ, naanɔ nɔyeli ni.’ Ewie kɛfata he akɛ: “Mɔ ko mɔ ko bɛ ni baanyɛ atsĩ enaa.” (Dan. 4:30, 33-35) Be ni Daniel ye Yehowa anɔkwa ni Yehowa jie lɛ kɛje jatai lɛ adɛŋ lɛ, Maŋtsɛ Dario fã akɛ: “Mɛi ahe akpokpo kɛ gbeyeishemɔ yɛ Daniel Nyɔŋmɔ lɛ hiɛ. Ejaakɛ lɛ ji Nyɔŋmɔ hiɛkãalɔ lɛ, ni eyɛ kɛmiiya naanɔ. Akpãtãŋ emaŋtsɛyeli lɛ hiɛ kɔkɔɔkɔ, ni enɔyeli lɛ hiɔ shi kɛyaa naanɔ.”​—Dan. 6:7-10, 19-22, 26, 27.

¹⁵ Lalatsɛ lɛ wie akɛ: “Yehowa efite jeŋmaji lɛ aŋaatsɔi lɛ; etswa majimaji lɛ ayiŋtoi lɛ efɔ̃.” Ekɛfata he akɛ: “Jeŋmaŋ ni Yehowa ji e-Nyɔŋmɔ lɛ yɛ miishɛɛ, maŋ ni ehala akɛ lɛ diɛŋtsɛ enii lɛ.” (Lala 33:10, 12) Nɔ ni lalatsɛ lɛ wie nɛɛ woɔ wɔ hewalɛ ni wɔya nɔ wɔye Yehowa anɔkwa ni wɔkashe je lɛ nɔyelɔi lɛ gbeyei!

16. Mɛni Yehowa baafee yɛ “amanehulu kpeteŋkpele” lɛ mli? Ni mɛni hewɔ wɔheɔ wɔyeɔ akɛ ebaafee nakai? (Kwɛmɔ mfoniri lɛ.)

¹⁶ Wɔna nɔ ni Yehowa fee yɛ blema. Shi mɛni ebaafee wɔsɛɛ? Wɔsɛɛ lɛ, Yehowa baahere etsuji anɔkwafoi lɛ ayiwala yɛ “amanehulu kpeteŋkpele” lɛ mli. (Mat. 24:21; Dan. 12:1) Ebaafee nakai kɛ́ Gog ni jɛ Magog, ni ji majimaji akuu ko ni efee ekome lɛ, tutua ewebii ni yɔɔ jeŋ fɛɛ lɛ. Kɛ́ maji 193 ni feɔ Jeŋmaji Ekomefeemɔ lɛ fɛɛ fata he ni atse kuu nɛɛ po lɛ, amɛnyɛŋ Yehowa, Ofe lɛ, kɛ eŋwɛi asraafoi lɛ. Yehowa kɛɛ: “Mafee  mihe agbo, ni mafee mihe krɔŋkrɔŋ ni mahã ale mi yɛ jeŋmaji babaoo ahiɛ; ni amɛbaaná amɛle akɛ miji Yehowa.”​—Eze. 38:14-16, 23; Lala 46:10.

17. Wɔsɛɛ lɛ, mɛni Yehowa baafee shikpɔŋ lɛ nɔ maŋtsɛmɛi lɛ? Ni mɛni ebaafee ehã mɛi ni yeɔ lɛ anɔkwa lɛ?

¹⁷ Kɛ́ Gog tutua Yehowa webii lɛ, no baayatsɛ Harmagedon ta lɛ kɛba, ni Yehowa baakpãtã “shikpɔŋ muu lɛ fɛɛ nɔ maŋtsɛmɛi lɛ” ahiɛ yɛ nakai ta lɛ mli. (Kpo. 16:14, 16; 19:19-21) Shi “mɛi ni feɔ nɔ ni ja” kɛ “mɛi ni sane ko bɛ amɛhe” yɛ Yehowa hiɛ loo mɛi ni yeɔ lɛ anɔkwa lɛ ayi baaná wala.​—Abɛi 2:21.

18. Mɛni anɔkwa Kristofoi pii efee, ni mɛni hewɔ? (Daniel 3:28)

¹⁸ Kɛjɛ blema lɛ, anɔkwa Kristofoi pii eye Yehowa, Jeŋ Muu Fɛɛ Nɔyelɔ lɛ anɔkwa kɛ́ no baahã awo amɛ tsuŋ loo agbe amɛ po, ejaakɛ amɛsumɔɔ lɛ. Bɔ ni Hebri oblahii etɛ lɛ ni Yehowa jie kɛjɛ la frɔnɔɔ lɛ mli lɛ tswa amɛfai shi akɛ amɛbaaye Yehowa, Nyɔŋmɔ Ofe lɛ anɔkwa lɛ, nakai nɔŋŋ Kristofoi nɛɛ hu efee.​—Kanemɔ Daniel 3:28.

19. Mɛni nɔ Yehowa baadamɔ ekojo ewebii lɛ? Ni mɛni enɛ biɔ ni wɔfee bianɛ?

¹⁹ Maŋtsɛ David wie nɔ ko ni hãa wɔnaa nɔ hewɔ ni ehe miihia ni wɔye Nyɔŋmɔ anɔkwa. Ewie akɛ: “Yehowa baakojo maji lɛ. Ao Yehowa, kojomɔ mi yɛ mijalɛ lɛ kɛ minɔkwayeli lɛ naa.” (Lala 7:8) Eŋma hu akɛ: “Hã anɔkwayeli kɛ jalɛ abu mihe.” (Lala 25:21) Nɔ ko bɛ ni baahã wɔná miishɛɛ yɛ shihilɛ mli fe ni wɔbaaye Yehowa anɔkwa ekɔɔɔ he eko nɔ ni baaba. Kɛ́ wɔfee nakai lɛ, wɔbaanu he tamɔ bɔ ni lalatsɛ lɛ nu he lɛ. Ewie akɛ: “Mɛi ni yeɔ anɔkwa . . .  lɛ yɛ miishɛɛ, mɛi ni nyiɛɔ yɛ Yehowa mla lɛ mli lɛ.”​—Lala 119:1, shn.