1. Mɛɛ shwelɛ akɛbɔ adesai? Ni mɛni hewɔ enɛ baanyɛ ahã wɔná miishɛɛ lɛ?

 ESORO miishɛɛ diɛŋtsɛ yɛ miishɛɛ ni mɛi náa be kukuoo kɛkɛ lɛ esɛɛ efo lɛ he. Mɔ ko baanyɛ aná miishɛɛ diɛŋtsɛ ewala gbii abɔ fɛɛ. Mɛni hewɔ wɔkɛɔ nakai? Yesu tsɔɔ sane nɛɛ mli yɛ e-Gɔŋ Nɔ Shiɛmɔ lɛ mli. Ewie akɛ: “Mɛi ni le akɛ Nyɔŋmɔ he miihia amɛ lɛ yɛ miishɛɛ.” (Mat. 5:3) Yesu le akɛ, Yehowa bɔ adesai kɛ shwelɛ lɛ akɛ amɛle lɛ, Yehowa lɛ, ni amɛjá lɛ. Akɛni Yehowa ji “miishɛɛ Nyɔŋmɔ” hewɔ lɛ, mɛi ni jáa lɛ lɛ hu baanyɛ aná miishɛɛ.​—1 Tim. 1:11.

2-3. (a) Yɛ nɔ ni Yesu wie lɛ naa lɛ, namɛi hu baanyɛ aná miishɛɛ? (b) Mɛni he wɔbaasusu yɛ nikasemɔ nɛɛ mli? Ni mɛni hewɔ?

² Shi ani ja nɔ fɛɛ nɔ miiya nɔ jogbaŋŋ yɛ wɔshihilɛ mli dani wɔbaanyɛ wɔná miishɛɛ nɛɛ? Dabi. Yesu wie nɔ ko yɛ e-Gɔŋ Nɔ Shiɛmɔ lɛ mli ni tsɔɔ nakai. Ewie akɛ, “mɛi ni yeɔ awerɛho,” yɛ ekolɛ esha ko ni amɛfee ni ehã amɛtsui ekumɔ loo yɛ shihilɛ ko ni ehã amɛhao waa lɛ hewɔ lɛ, “yɛ miishɛɛ.” Nakai nɔŋŋ ewie yɛ “mɛi ni awaa amɛ yi yɛ jalɛ hewɔ” kɛ mɛi ni ‘ajɛɔ amɛ’ yɛ Kristo sɛɛnyiɛlɔi ni amɛji lɛ hewɔ lɛ hu ahe. (Mat. 5:4, 10, 11) Shi te ebaafee tɛŋŋ mɔ ko aná miishɛɛ yɛ shihilɛi ni tamɔ nɛkɛ lɛ amli lɛ?

³ No mli lɛ, nɔ ni Yesu tsɔɔ ji, jeee ja nɔ fɛɛ nɔ miiya nɔ jogbaŋŋ yɛ wɔshihilɛ mli dani wɔbaanyɛ wɔná miishɛɛ. Shi kɛ́ wɔhã Nyɔŋmɔ he hia wɔ, ni wɔtsi wɔbɛŋkɛ lɛ lɛ, no ji nɔ ni baahã wɔná miishɛɛ diɛŋtsɛ. (Yak. 4:8) Te wɔbaafee tɛŋŋ wɔfee nakai? Yɛ nikasemɔ nɛɛ mli lɛ, wɔbaasusu nibii etɛ komɛi  ni kɛ́ wɔfee lɛ, ebaahã wɔná miishɛɛ diɛŋtsɛ lɛ ahe.

4. Kɛ́ ootao oná miishɛɛ lɛ, mɛni ji nɔ klɛŋklɛŋ ni esa akɛ ofee? (Lala 1:1-3)

⁴ KLƐŊKLƐŊ NƆ: Kɛ́ wɔmiitao wɔná miishɛɛ diɛŋtsɛ lɛ, esa akɛ wɔkane Nyɔŋmɔ Wiemɔ lɛ ni wɔkase daa. Yesu kɛ Nyɔŋmɔ Wiemɔ lɛ to niyenii he. Adesai kɛ kooloi fɛɛ yeɔ nii koni amɛhi wala mli. Shi kooloi nyɛŋ akase Nyɔŋmɔ Wiemɔ lɛ. Adesai pɛ baanyɛ afee nakai, ni ehe miihia waa ni wɔfee nakai. Enɛ hewɔ lɛ, Yesu wie akɛ: “Jeee niyenii pɛ naa esa akɛ gbɔmɔ ahi wala mli yɛ, shi moŋ, yɛ wiemɔ fɛɛ wiemɔ ni jɛɔ Yehowa daaŋ lɛ naa.” (Mat. 4:4) No hewɔ lɛ, esaaa akɛ wɔhãa gbi kome po hoɔ ni wɔkaneee Nyɔŋmɔ Wiemɔ, ni ji Biblia lɛ. Mɔ ni ŋma Lala 1 lɛ wie akɛ, kɛ́ mɔ ko ‘mii shɛɔ Yehowa mla lɛ he ni ekaneɔ jetsɛremɔ kɛ jenamɔ’ lɛ, ebaaná miishɛɛ.​—Kanemɔ Lala 1:1-3.

5-6. (a) Kɛ́ wɔkane Biblia lɛ, mɛɛ nibii wɔbaana? (b) Kɛ́ wɔkane Biblia lɛ, mɛɛ gbɛ nɔ ebaaye ebua wɔ?

⁵ Yehowa sumɔɔ wɔ. Etsɔ Biblia lɛ nɔ ehã wɔle nibii komɛi ni kɛ́ wɔfee lɛ wɔbaaná miishɛɛ. Etsɔɔ wɔ nɔ hewɔ ni ebɔ wɔ. Ehã wɔle nɔ ni kɛ́ wɔfee lɛ wɔbaatsɔmɔ enanemɛi, kɛ nɔ ni kɛ́ wɔtɔ̃ lɛ esa akɛ wɔfee koni ekɛ wɔhe eshai lɛ ake wɔ, ni ehã wɔle jɔɔmɔi ni wɔsɛɛ lɛ wɔnine baashɛ nɔ. (Yer. 29:11) Kɛ́ wɔkase Biblia lɛ, wɔbaale nibii nɛɛ fɛɛ ni ebaahã wɔná miishɛɛ!

⁶ Agbɛnɛ hu, wɔle akɛ ŋaawoi kpakpai pii yɛ Biblia lɛ mli. Kɛ́ wɔkɛ ŋaawoi nɛɛ tsu nii lɛ, wɔbaaná miishɛɛ. Be fɛɛ be ni obaanu he akɛ  onaagbai lɛ miisu otsui lɛ, hemɔ be ni okane Biblia lɛ waa fe bɔ ni ofeɔ momo lɛ ni ojwɛŋ nɔ. Yesu kɛɛ: “Mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ yɛ miishɛɛ!”​—Luka 11:28.

7. Mɛni baaye abua bo ni oná be ni okɛkaneɔ Nyɔŋmɔ Wiemɔ lɛ he sɛɛ waa?

⁷ Kɛ́ ookane Nyɔŋmɔ Wiemɔ lɛ, too otsui shi ni okane lɛ bɔ ni baahã oná nɔ ni okaneɔ lɛ he miishɛɛ. Naa nɔkwɛmɔnɔ ko ni baaye abua bo ni onu enɛ shishi jogbaŋŋ. Ŋɔɔ lɛ akɛ, mɔ ko ehoo niyenii ko ni osumɔɔ waa ehã bo. Shi akɛni ooye oyai loo ojwɛŋmɔ yɛ nɔ ko nɔ hewɔ lɛ, oye lɛ hwaŋhwaŋ ni no hewɔ lɛ, onuuu eŋɔɔmɔ po. Be ni oye ogbe naa lɛ, edɔ bo waa akɛ oye lɛ oyayaayai. Bei komɛi lɛ, nakai wɔkaneɔ Biblia lɛ. Wɔkaneɔ lɛ oyayaayai aahu akɛ, wɔnuuu nɔ ni wɔkaneɔ lɛ shishi, ni no hewɔ lɛ, eŋɔɔɔ wɔnaa. Kɛ́ ookane Nyɔŋmɔ Wiemɔ lɛ, too otsui shi koni oná nɔ ni okaneɔ lɛ he miishɛɛ. Feemɔ nɔ ni okaneɔ lɛ he mfoniri. Ŋɔɔ lɛ akɛ oonu mɛi lɛ agbee, ni ojwɛŋ nɔ ni okaneɔ lɛ nɔ. Kɛ́ ofee nakai lɛ, obaaná miishɛɛ waa.

8. Mɛni hãa wɔnaa akɛ “nyɔŋ anɔkwafo kɛ hiɛshikalɔ lɛ” miitsu enitsumɔ lɛ jogbaŋŋ? (Kwɛmɔ shishigbɛ niŋmaa lɛ hu.)

⁸ Yesu ehala “nyɔŋ anɔkwafo kɛ hiɛshikalɔ lɛ” eto wɔnɔ koni ehã wɔ niyenii yɛ be ni sa mli, ni nyɔŋ lɛ miilɛ wɔ jogbaŋŋ. b (Mat. 24:45) Nibii ni nyɔŋ lɛ tsɔɔ wɔ lɛ fɛɛ damɔ Biblia lɛ nɔ. (1 Tes. 2:13) Nibii nɛɛ yeɔ amɛbuaa wɔ ni wɔleɔ Yehowa susumɔ yɛ saji ahe. Enɛ hewɔ wɔkaneɔ Buu-Mɔɔ kɛ Awake! lɛ kɛ saji ni akɛwoɔ jw.org lɛ nɔ lɛ. Ni no nɔŋŋ hewɔ wɔsaa wɔhe kɛhã otsi teŋ kpee lɛ kɛ otsi naagbee kpee lɛ, ni wɔkwɛɔ daa nyɔɔŋ nɔ nifeemɔ lɛ yɛ JW Broadcasting^® lɛ nɔ kɛ́ wɔnine shɛ nɔ lɛ. Kɛ́ wɔkase Yehowa he nii jogbaŋŋ kɛjɛ Biblia lɛ mli lɛ, no baaye abua wɔ ni wɔfee nɔ ni ji enyɔ ni baahã wɔná miishɛɛ.

9. Mɛni ji nɔ ni ji enyɔ ni kɛ́ wɔfee lɛ wɔbaaná miishɛɛ?

⁹ NƆ NI JI ENYƆ: Kɛ́ wɔmiitao wɔná miishɛɛ lɛɛlɛŋ lɛ, esa akɛ wɔhi shi yɛ Yehowa gbɛtsɔɔmɔi lɛ anaa. Mɔ ni ŋma Lala 128 lɛ wie akɛ: “Mɔ fɛɛ mɔ ni sheɔ Yehowa gbeyei lɛ yɛ miishɛɛ, mɔ ni nyiɛɔ yɛ egbɛi anɔ lɛ.” (Lala 128:1) Kɛ́ akɛɛ mɔ ko sheɔ Yehowa gbeyei lɛ, etsɔɔ akɛ ebuɔ Yehowa aahu akɛ esumɔɔɔ ni efeɔ nɔ ko ni Yehowa sumɔɔɔ. (Abɛi 16:6) No hewɔ lɛ, kɛ́ wɔsheɔ Yehowa gbeyei lɛ, wɔbaabɔ mɔdɛŋ waa ni wɔhi shi yɛ gbɛtsɔɔmɔi ni ekɛhã wɔ yɛ Biblia lɛ mli lɛ anaa be fɛɛ be. (2 Kor. 7:1) Kɛ́ wɔmia wɔhiɛ wɔfee nibii ni Yehowa sumɔɔ, ni wɔtsi wɔhe kɛje nibii ni enyɛɔ lɛ ahe lɛ, wɔbaaná miishɛɛ.​—Lala 37:27; 97:10; Rom. 12:9.

10. Yɛ nɔ ni awie yɛ Romabii 12:2 lɛ naa lɛ, mɛni esa akɛ wɔfee?

¹⁰ Kanemɔ Romabii 12:2. Wɔle akɛ Yehowa yɛ hegbɛ ni etsɔɔ wɔ nɔ ni ja kɛ nɔ ni ejaaa. Shi no pɛ kɛkɛ faaa. Esa akɛ wɔhi shi yɛ gbɛtsɔɔmɔi ni ekɛhã yɛ nɔ ni ja kɛ nɔ ni ejaaa he lɛ anaa. Akɛ nɔkwɛmɔnɔ lɛ, mɛi le akɛ amralo lɛ yɛ hegbɛ ni etsɔɔ foi ni abaanyɛ aya yɛ lɔle gbɛ nɔ. Shi mɛi pii sumɔɔɔ ni amɛkɛ gbɛtsɔɔmɔ nɛɛ tsuɔ nii, ni no hewɔ lɛ amɛwoɔ foi fe bɔ ni atsɔɔ lɛ. Nakai nɔŋŋ bɔ ni wɔbaa wɔjeŋ wɔhãa lɛ ni hãa anaa kɛji yɛ wɔtsuiŋ tɔ̃ɔ lɛ wɔheɔ wɔyeɔ akɛ, kɛ́ wɔkɛ Yehowa gbɛtsɔɔmɔi tsu nii lɛ, ebaahi ehã wɔ. (Abɛi 12:28) David he eye akɛ Yehowa gbɛtsɔɔmɔi lɛ anɔ bɛ. No hewɔ lɛ, ekɛɛ Yehowa akɛ: “Ohã mina wala gbɛ lɛ. Miishɛɛ babaoo yɛ ohiɛ; miishɛɛ yɛ oninejurɔ nɔ kɛmiiya naanɔ.”​—Lala 16:11.

11-12. (a) Kɛ́ wɔmiinu he akɛ wɔfee nɔ ko kɛjie wɔjwɛŋmɔ kɛje wɔnaagbai lɛ anɔ lɛ, mɛni esa akɛ wɔkwɛ jogbaŋŋ yɛ he? (b) Mɛɛ gbɛ nɔ Filipibii 4:8 lɛ mli wiemɔi lɛ baanyɛ aye abua wɔ ni wɔkɛ nɔ ko ni Yehowa sumɔɔɔ akajie wɔhiɛtserɛ?

 ¹¹ Kɛ́ nɔ ko ehã ohao loo ooye otsui lɛ, ekolɛ obaasumɔ ni ofee nɔ ko ni okɛjie ojwɛŋmɔ kɛje nɔ ni haoɔ bo lɛ nɔ, ni naagba ko bɛ enɛ he. Shi esa akɛ okwɛ jogbaŋŋ ni okayafee nɔ ko ni Yehowa sumɔɔɔ.​—Efe. 5:10-12, 15-17.

¹² Yɛ wolo ni bɔfo Paulo ŋma emaje Kristofoi ni yɔɔ Filipi lɛ mli lɛ, ewo amɛ ŋaa ni amɛsusu ‘nɔ fɛɛ nɔ ni ja, nɔ fɛɛ nɔ ni he tse, nɔ fɛɛ nɔ ni hãa ajieɔ suɔmɔ kpo, kɛ nɔ fɛɛ nɔ ni hi jogbaŋŋ’ lɛ ahe. (Kanemɔ Filipibii 4:8.) Eyɛ mli akɛ be ni Paulo wie sane nɛɛ jeee hiɛtserɛjiemɔ he ewieɔ moŋ, shi esa akɛ nɔ ni ewie lɛ aye abua wɔ kɛ́ wɔmiihala nɔ ni wɔkɛbaajie wɔhiɛtserɛ. No hewɔ lɛ, kaa enɛ okwɛ: He fɛɛ he ni wiemɔ ni ji, “nɔ fɛɛ nɔ” lɛ jeɔ kpo yɛ yɛ ŋmalɛ nɛɛ mli lɛ, tsakemɔ ni okɛ wiemɔ ko tamɔ “lalai,” “sinii,” “woji,” loo “vidio gemisii” awo jɛmɛ. Kɛ́ ofee enɛ lɛ, ebaaye ebua bo ni ona nibii ni kɛ́ okɛjie ohiɛtserɛ lɛ, eteŋ shi ewoŋ Yehowa shishitoo mlai lɛ. Wɔ fɛɛ wɔmiisumɔ ni wɔhi shi yɛ Yehowa shishitoo mlai ni nɔ bɛ lɛ anaa, aloo jeee nakai? (Lala 119:1-3) Kɛ́ wɔhi shi yɛ Yehowa gbɛtsɔɔmɔi anaa lɛ, wɔbaaná henilee ni he tse, ni no baaye abua wɔ ni wɔfee nɔ ni ji etɛ ni baahã wɔná miishɛɛ diɛŋtsɛ.​—Bɔf. 23:1.

13. Mɛni ji nɔ ni ji etɛ ni kɛ́ wɔfee lɛ wɔbaaná miishɛɛ? (Yohane 4:23, 24)

¹³ NƆ NI JI ETƐ: Hã Yehowa sɔɔmɔ he ahia bo fe nɔ fɛɛ nɔ yɛ oshihilɛ mli. Yehowa ni bɔ wɔ, no hewɔ lɛ, esa akɛ wɔjá lɛ. (Kpo. 4:11; 14:6, 7) Esaaa akɛ wɔhãa nɔ ko nɔ ko he hiaa wɔ fe ni wɔbaajá Yehowa yɛ gbɛ ni etsɔɔ akɛ wɔjá lɛ lɛ nɔ. Eesumɔ ni wɔkɛ “mumɔ kɛ anɔkwale” ajá lɛ. (Kanemɔ Yohane 4:23, 24.) Nɔ ni enɛ tsɔɔ ji akɛ, esa akɛ wɔhã Yehowa mumɔ krɔŋkrɔŋ lɛ aye abua wɔ koni gbɛ ni wɔtsɔɔ nɔ wɔjáa lɛ lɛ kɛ nɔ ni etsɔɔ yɛ e-Wiemɔ, ni ji Biblia lɛ mli lɛ akpã gbee. Kɛ́ atsĩ wɔnitsumɔ lɛ naa loo aŋmɛɛɛ wɔ gbɛ ni wɔtsu lɛ bɔ ni wɔtsui shweɔ po lɛ, esa akɛ wɔhã Nyɔŋmɔjamɔ he ahia wɔ fe nɔ fɛɛ nɔ yɛ wɔshihilɛ mli. Bianɛ lɛ, awo wɔnyɛmimɛi fe 100 tsuŋ yɛ Yehowa Odasefoi ni amɛji lɛ pɛ kɛkɛ hewɔ. c Fɛɛ sɛɛ lɛ, amɛyɛ miishɛɛ ejaakɛ amɛmiifee bɔ fɛɛ bɔ ni amɛbaanyɛ ni amɛsɔle, amɛkase nii, ni amɛgba mɛi wɔ-Nyɔŋmɔ lɛ kɛ e-Maŋtsɛyeli lɛ he sane. Kɛ́ ajɛ wɔ loo awa wɔ yi po lɛ, wɔnáa miishɛɛ ejaakɛ wɔle akɛ Yehowa baaye ebua wɔ ni ebaajwere wɔ.​—Yak. 1:12; 1 Pet. 4:14.

14. Mɛni afee nyɛmi nuu ko ni yɔɔ Tajikistan lɛ, ni mɛni hewɔ?

¹⁴ Wɔnyɛmimɛi komɛi aniiashikpamɔ hãa wɔnaa akɛ, ekɔɔɔ he eko shihilɛ ni mɔ ko kɛbaakpe lɛ, kɛ́ efee nibii etɛ ni wɔtsɔɔ yɛ nikasemɔ nɛɛ mli lɛ, ebaaná miishɛɛ. Nyɛmimɛi nɛɛ ateŋ mɔ kome ji, Nyɛminuu Jovidon Bobojonov ni jɛ Tajikistan lɛ. Akɛni ekpoo akɛ ekɛ ehe baawo asraafoi anitsumɔ mli hewɔ lɛ, yɛ October 4, 2019 lɛ, amɔ lɛ kɛjɛ eshĩa, awo lɛ tsuŋ nyɔji abɔ be ni ayeko esane, ni akɛ lɛ ye tamɔ mɔ ko ni efee efɔŋ. No mli lɛ eye afii 19 pɛ. Maji srɔtoi wie niseniianii ni afee lɛ lɛ he yɛ amɛmaniɛbɔi amli. Amɛbɔ amaniɛ akɛ, ayi lɛ koni no ahã ekã kitã akɛ ebaatsɔ asraafonyo. No sɛɛ lɛ, abu lɛ fɔ ni ayawo lɛ tsuŋ. Ehi jɛmɛ aahu kɛyashi maŋ lɛ nɔyelɔ lɛ  na lɛ mɔbɔ ni ehã aŋmɛɛ ehe. Be ni Jovidon tsɔɔ nibii nɛɛ fɛɛ mli lɛ, eŋmɛɛɛ enɔkwayeli lɛ he ni emiishɛɛ hu etãaa. Mɛni ye ebua lɛ? Ehã jamɔ ni ebaajá Nyɔŋmɔ lɛ he hia lɛ be fɛɛ be.

15. Te fee tɛŋŋ Jovidon kase Nyɔŋmɔ Wiemɔ lɛ be ni eyɔɔ tsuŋwoo mli lɛ?

¹⁵ Be ni awo Jovidon tsuŋ lɛ, eyɛ mli akɛ no mli lɛ ehiɛɛɛ Biblia lɛ kɛ asafo lɛ woji lɛ eko yɛ ehe moŋ, shi ekase Nyɔŋmɔ Wiemɔ lɛ daa gbi. Te efee tɛŋŋ efee nakai lɛ? Nyɛmimɛi lɛ bahãa lɛ niyenii daa gbi. Kɛ́ amɛmiiba lɛ, amɛŋmalaa daa gbi ŋmalɛ lɛ mli wiemɔi lɛ amɛwoɔ baagi ni niyenii lɛ yɔɔ mli lɛ he. Enɛ hewɔ lɛ, enyɛɔ ekaneɔ Biblia lɛ daa gbi ni ejwɛŋɔ nɔ. Be ni ajie lɛ kɛjɛ tsuŋwoo mli lɛ, naa ŋaa ni ewo nyɛmimɛi ni kɛ yiwaa loo shihilɛi ni mli wawai ekpeko lɛ. Ewie akɛ: “Ehe miihia ni okɛ be ni oyɔɔ bianɛ lɛ akase Biblia lɛ kɛ asafo lɛ woji lɛ waa koni ole Yehowa jogbaŋŋ.”

16. Mɛni nɔ Jovidon kɛ ejwɛŋmɔ ma?

¹⁶ Wɔnyɛmi nuu lɛ hi shi yɛ Yehowa gbɛtsɔɔmɔi anaa. Jovidon kɛ ejwɛŋmɔ ma Yehowa kɛ nibii ni esumɔɔ lɛ anɔ moŋ fe ni ebaajwɛŋ nibii ni esaaa lɛ ahe ni no ahã eyafee nibii ni Yehowa sumɔɔɔ. Esusu Yehowa adebɔɔ nibii lɛ ahe. Daa leebi kɛ́ ete shi lɛ, enuɔ ni loofɔji lɛ miilá, ni kɛ́ eshɛ gbɛkɛ lɛ,  ewoɔ ehiɛ nɔ ekwɛɔ ŋulamii lɛ kɛ nyɔɔŋtsere lɛ. Ewie akɛ: “Nibii nɛɛ ji nikeenii ni jɛ Yehowa ŋɔɔ ni amɛwo mi hewalɛ ni amɛhã miná miishɛɛ.” Kɛ́ wɔnya nibii ni wɔkaseɔ yɛ Nyɔŋmɔ Wiemɔ lɛ mli lɛ ahe ni wɔhiɛ sɔ nibii ni ekɛdro wɔ yɛ shihilɛ mli lɛ, wɔbaaná miishɛɛ ni nakai miishɛɛ lɛ baawaje wɔ ni wɔnyɛ wɔfi shi.

17. Kɛ́ mɔ ko kɛ shihilɛ ko ni tamɔ Jovidon nɔ lɛ kpe lɛ, mɛɛ gbɛ nɔ wiemɔi ni yɔɔ 1 Petro 1:6, 7 lɛ baaba mli yɛ egbɛfaŋ?

¹⁷ Jovidon hã Yehowa jamɔ lɛ he hia lɛ fe nɔ fɛɛ nɔ. Eyɔse akɛ, ehe miihia waa ni eye Yehowa anɔkwa. Yesu wie akɛ: “Yehowa, o-Nyɔŋmɔ lɛ, esa akɛ ojá, ni lɛ pɛ esa akɛ okɛ sɔɔmɔ krɔŋŋ ahã.” (Luka 4:8) Asraafoi onukpai kɛ asraafoi krokomɛi lɛ ka akɛ amɛbaahã Jovidon akpa Yehowa jamɔ, shi ekpaaa. Moŋ lɛ, ekɛ hiɛdɔɔ sɔleɔ ehãa Yehowa yɛ gbi lɛ mli, ni gbɛkɛ hu lɛ, efeɔ nakai. Ebiɔ Yehowa ni eye ebua lɛ ni ekaŋmɛɛ ehemɔkɛyeli lɛ he. Yɛ niseniianii ni afee Jovidon lɛ fɛɛ sɛɛ lɛ, eŋmɛɛɛ ehemɔkɛyeli lɛ he. Enɛ hewɔ lɛ, eyɛ miishɛɛ waa ejaakɛ mɔ ni amɔ lɛ, yi ni ayi lɛ, kɛ tsuŋ ni awo lɛ lɛ eka ehemɔkɛyeli lɛ ekwɛ ni ehã ehemɔkɛyeli lɛ mli ewa fe be ni amɔ lɛ lɛ.​—Kanemɔ 1 Petro 1:6, 7.

18. Mɛni kɛ́ wɔfee lɛ wɔmiishɛɛ etãŋ?

¹⁸ Yehowa le nɔ ni kɛ́ wɔfee lɛ wɔbaaná miishɛɛ diɛŋtsɛ. Kɛ́ ofee nibii etɛ ni atsɔɔ akɛ kɛ́ wɔfee lɛ wɔbaaná miishɛɛ lɛ, omiishɛɛ etãŋ ekɔɔɔ he eko naagbai ni okɛkpeɔ. Kɛkɛ lɛ, bo hu obaanyɛ owie akɛ: “Maŋ ni Yehowa ji amɛ-Nyɔŋmɔ lɛ yɛ miishɛɛ!”​—Lala 144:15.