NIKASEMƆ 39
Ani Ogbɛ́i Yɛ “Wala Wolo Lɛ” Mli?
‘Aŋma kaimɔ wolo yɛ Yehowa hiɛ ahã mɛi ni sheɔ lɛ gbeyei lɛ.’—MAL. 3:16.
LALA 61 Odasefoi, Nyɛyaa Nyɛhiɛ!
NƆ NI ABAASUSU HE a
Kɛjɛ Habel beiaŋ kɛbashi ŋmɛnɛ fɛɛ lɛ, Yehowa miiŋma mɛi agbɛ́i yɛ “wala wolo lɛ” mli (Kwɛmɔ kuku 1-2)
1. Yɛ nɔ ni aŋma yɛ Maleaki 3:16 lɛ naa lɛ, mɛɛ wolo Yehowa ŋmaa? Ni mɛni yɔɔ mli?
YEHOWA miiŋma wolo krɛdɛɛ ko. Eje wolo nɛɛ ŋmaa shishi afii akpei abɔ ni eho nɛ, ni gbɛ́ii sɔŋŋ yɔɔ mli. Habel, ni ji odasefonyo anɔkwafo lɛ gbɛ́i ji klɛŋklɛŋ gbɛ́i ni Yehowa ŋma yɛ wolo nɛɛ mli, ni kɛjɛ enɔ kɛbaa nɛɛ, Yehowa eŋmala gbɛ́ii pii efata he. b (Luka 11:50, 51) Ŋmɛnɛ lɛ, gbɛ́ii akpekpei abɔ ni yɔɔ wolo nɛɛ mli. Yɛ Biblia lɛ mli lɛ, atsɛɔ wolo nɛɛ akɛ “kaimɔ wolo,” “wala wolo lɛ,” kɛ “wala wolokpo lɛ.” Shi yɛ nikasemɔ nɛɛ mli lɛ, wɔkɛ gbɛ́i ni ji “wala wolo lɛ” ni baatsu nii.—Kanemɔ Maleaki 3:16; Kpo. 3:5; 17:8.
2. Namɛi agbɛ́i aŋmaa yɛ wala wolo lɛ mli? Ni kɛ́ wɔmiitao aŋma wɔgbɛ́i yɛ mli lɛ, mɛni esa akɛ wɔfee?
2 Mɛi fɛɛ ni jáa Yehowa ni amɛsheɔ lɛ gbeyei loo amɛbuɔ lɛ waa ni amɛshwɛɛɛ egbɛ́i lɛ he lɛ agbɛ́i yɛ wolo krɛdɛɛ nɛɛ mli, ni wɔsɛɛ lɛ amɛbaanyɛ amɛná naanɔ wala. Ŋmɛnɛ lɛ, kɛ́ wɔhe wɔye akɛ Yesu Kristo kɛ ewala bashã afɔle ehã wɔ, ni wɔfee nibii ni baahã wɔbatsɔmɔ Yehowa nanemɛi lɛ, wɔ hu abaaŋma wɔgbɛ́i yɛ wolo nɛɛ mli. (Yoh. 3:16, 36) Kɛ́ wɔhiɛnɔkamɔ ji akɛ wɔbaaya ŋwɛi jio, wɔbaahi shikpɔŋ lɛ nɔ jio lɛ, wɔ fɛɛ wɔmiisumɔ ni wɔgbɛ́i ahi wala wolo lɛ mli.
3-4. (a) Kɛ́ wɔgbɛ́i yɛ wala wolo lɛ mli amrɔ nɛɛ, ani no tsɔɔ akɛ wɔbaahi shi kɛya naanɔ? Mɛni hewɔ wɔkɛɔ nakai? (b) Mɛni he wɔbaasusu yɛ nikasemɔ nɛɛ kɛ nɔ ni nyiɛ sɛɛ lɛ mli?
3 Ani enɛ tsɔɔ akɛ bɔ fɛɛ bɔ ni fee lɛ, mɛi fɛɛ ni aŋma amɛgbɛ́i yɛ wala wolo lɛ mli lɛ baaná naanɔ wala? Nɔ ni Yehowa kɛɛ Mose yɛ 2 Mose 32:33 lɛ hãa sanebimɔ nɛɛ hetoo. Yehowa kɛɛ lɛ akɛ: “Mɔ fɛɛ mɔ ni efee esha eshi mi lɛ, lɛ egbɛ́i magbe yɛ miwolo lɛ mli.” Enɛ tsɔɔ akɛ, abaanyɛ agbe loo atsumɔ gbɛ́ii ni yɔɔ wolo lɛ mli lɛ, oookɛɛ nɔ ni Yehowa kɛ pɛnsil ni eŋma gbɛ́ii lɛ. (Kpo. 3:5, shn.) No hewɔ lɛ, esa akɛ wɔfee nibii ni baahã wɔgbɛ́i aya nɔ ahi wolo lɛ mli kɛyashi kɛ́ wɔɔwie lɛ, akɛ pɛn baaŋma, ni tsɔɔ akɛ, ebaaka mli kwraa.
4 Enɛ baanyɛ ahã wɔbi saji komɛi. Sanebimɔi nɛɛ ekomɛi ji, “Mɛni Biblia lɛ kɛɔ yɛ mɛi ni aŋma amɛgbɛ́i yɛ wala wolo lɛ mli kɛ mɛi ni aŋmako amɛgbɛ́i yɛ mli lɛ ahe? Mɛɛ be mɛi ni gbɛ́i yɔɔ wala wolo lɛ mli lɛ baaná naanɔ wala? Ni mɛi ni náaa hegbɛ amɛle Yehowa dani amɛgboi lɛ hu? Ani abaanyɛ aŋma amɛgbɛ́i yɛ wala wolo lɛ mli? Abaahã sanebimɔi nɛɛ ahetoo yɛ nikasemɔ nɛɛ kɛ nɔ ni nyiɛ sɛɛ lɛ mli.
NAMƐI AGBƐ́I YƆƆ WOLO LƐ MLI?
5-6. (a) Yɛ nɔ ni awie yɛ Filipibii 4:3 lɛ naa lɛ, namɛi agbɛ́i fata gbɛ́ii ni yɔɔ wala wolo lɛ mli lɛ ahe? (b) Mɛɛ be amɛgbɛ́i baaka wolo lɛ mli kwraa?
5 Namɛi agbɛ́i yɔɔ wala wolo lɛ mli? Wɔbaasusu kui loo mɛi srɔtoi enumɔ ahe koni no aye abua wɔ ni wɔhã sanebimɔ nɛɛ hetoo. Mɛi nɛɛ ateŋ mɛi komɛi agbɛ́i yɛ wala wolo lɛ mli, ni amɛteŋ mɛi komɛi hu agbɛ́i bɛ mli.
6 Klɛŋklɛŋ kuu lɛ ji mɛi ni ahala amɛ akɛ amɛbaafata Yesu he kɛye nɔ yɛ ŋwɛi lɛ. Ani amrɔ nɛɛ, aŋma amɛgbɛ́i yɛ wala wolo lɛ mli? Hɛɛ. Sane ko ni bɔfo Paulo ŋma eyahã ‘enanemɛi nitsulɔi’ ni yɔɔ Filipi lɛ hãa wɔnaa akɛ, mɛi ni afɔ amɛ mu lɛ, ni ji mɛi ni yɔɔ hiɛnɔkamɔ akɛ amɛbaafata Yesu he kɛye nɔ yɛ ŋwɛi lɛ agbɛ́i yɛ wala wolo lɛ mli. (Kanemɔ Filipibii 4:3.) Shi kɛ́ amɛmiitao amɛgbɛ́i aya nɔ ahi wolo lɛ mli lɛ, belɛ esa akɛ amɛye Yehowa anɔkwa. Kɛkɛ lɛ, kɛ́ asɔ̃o amɛnaa nɔ ni ji naagbee nɔ lɛ, amɛgbɛ́i baaka wolo lɛ mli kwraa agbɛnɛ. Enɛ baaba kɛ́ eshwɛ fioo ni amɛbaagboi loo kɛ́ eshwɛ fioo ni amanehulu kpeteŋkpele lɛ baaje shishi.—Kpo. 7:3.
7. Yɛ nɔ ni awie yɛ Kpojiemɔ 7:16, 17 lɛ naa lɛ, mɛɛ be asafoku babaoo lɛ agbɛ́i baaka wala wolo lɛ mli kwraa?
7 Kuu ni ji enyɔ lɛ ji asafoku babaoo lɛ. Ani amrɔ nɛɛ amɛgbɛ́i yɛ wala wolo lɛ mli? Hɛɛ. Kɛ́ amɛfo Harmagedon lɛ, ani amɛgbɛ́i baahi wala wolo lɛ mli lolo? Hɛɛ. (Kpo. 7:14) Yesu kɛɛ mɛi nɛɛ ‘baaya naanɔ wala mli.’ (Mat. 25:46) Shi amɛnáŋ naanɔ wala nɛɛ yɛ Harmagedon sɛɛ nɔŋŋ, ejaakɛ kɛ́ wɔɔwie lɛ, akɛ pɛnsil ni eŋma amɛgbɛ́i yɛ wala wolo lɛ mli. Yɛ Afii Akpe Nɔyeli lɛ mli lɛ, Yesu ‘baatsɔɔ amɛ gbɛ kɛya wala nuhiŋmɛii ahe.’ Mɛi ni baabo Kristo toi ni amɛbaaye Yehowa anɔkwa yɛ naagbee kaa lɛ mli lɛ, kɛ́ wɔɔwie lɛ, akɛ pɛn baaŋma amɛgbɛ́i yɛ wala wolo lɛ mli agbɛnɛ, ni tsɔɔ akɛ, amɛgbɛ́i baaka mli kwraa.—Kanemɔ Kpojiemɔ 7:16, 17.
8. Namɛi agbɛ́i bɛ wala wolo lɛ mli? Ni mɛni baaba amɛnɔ?
8 Kuu ni ji etɛ lɛ ji abotiai lɛ, ni ji mɛi ni abaakpãtã amɛhiɛ yɛ Harmagedon lɛ. Amɛgbɛ́i bɛ wala wolo lɛ mli ejaakɛ Yesu kɛɛ, “amɛbaaya naanɔ hiɛkpatamɔ mli.” (Mat. 25:46) Yehowa mumɔ lɛ tsirɛ Paulo ni ewie akɛ: “Mɛi nɛɛ baaná toigbalamɔ ni ji naanɔ hiɛkpatamɔ.” (2 Tes. 1:9; 2 Pet. 2:9) Agbɛnɛ hu, mɛi fɛɛ ni hi shi yɛ blema kɛ mɛi ni yɔɔ ŋmɛnɛ ni eje gbɛ efee esha amɛshi mumɔ krɔŋkrɔŋ lɛ náŋ naanɔ wala, shi moŋ abaakpãtã amɛhiɛ kɛya naanɔ. Ateŋ amɛ shi. (Mat. 12:32; Mar. 3:28, 29; Heb. 6:4-6) Bianɛ lɛ, nyɛhãa wɔsusua kuu ni ji ejwɛ kɛ kuu ni ji enumɔ lɛ he. Amɛji mɛi ni abaatee amɛ shi kɛba shikpɔŋ lɛ nɔ lɛ.
MƐI NI ABAATEE AMƐ SHI LƐ
9. Tamɔ bɔ ni awie yɛ Bɔfoi 24:15 lɛ, namɛi kɛ namɛi abaatee amɛ shi kɛba shikpɔŋ lɛ nɔ? Ni mɛɛ srɔto yɔɔ amɛteŋ?
9 Biblia lɛ wieɔ kui loo mɛi srɔtoi enyɔ ni abaatee amɛ shi kɛba shikpɔŋ lɛ nɔ lɛ ahe. Amɛji “jalɔi” kɛ “mɛi ni ejaaa” lɛ. (Kanemɔ Bɔfoi 24:15.) “Jalɔi” lɛ ji mɛi ni sɔmɔ Yehowa be ni amɛyɔɔ wala mli lɛ. Shi “mɛi ni ejaaa” lɛ ji mɛi ni sɔmɔɔɔ Yehowa be ni amɛyɔɔ wala mli lɛ. Anɔkwa, amɛteŋ mɛi pii po fee nibii ni ehiii kwraa. Ani wɔbaanyɛ wɔwie akɛ, akɛni abaatee kui loo mɛi srɔtoi enyɔ nɛɛ fɛɛ shi hewɔ lɛ aŋma amɛ fɛɛ amɛgbɛ́i yɛ wala wolo lɛ mli? Nyɛhãa wɔsusua kui nɛɛ ahe ekomekomei koni no aye abua wɔ ni wɔhã sanebimɔ nɛɛ hetoo.
10. Mɛni hewɔ abaatee “jalɔi” lɛ ashi? Ni mɛɛ hegbɛ amɛteŋ mɛi komɛi baaná? (Kwɛmɔ “Sanebimɔi Ni Jɛ Kanelɔi Adɛŋ” ni yɔɔ Buu-Mɔɔ nɛɛ mli lɛ hu. Ekɔɔ mɛi ni abaatee amɛ shi kɛba shikpɔŋ lɛ nɔ lɛ ahe.)
10 Kuu ni ji ejwɛ lɛ ji “jalɔi” lɛ. Dani amɛbaagboi lɛ, no mli lɛ, amɛgbɛ́i yɛ wala wolo lɛ mli. Shi ani ajie amɛgbɛ́i yɛ wala wolo lɛ mli be ni amɛgboi lɛ? Dabi, ejaakɛ Yehowa kaiɔ amɛ lolo. Yehowa lɛ, “jeee gbohii a-Nyɔŋmɔ ni, shi moŋ, hiɛkãalɔi a-Nyɔŋmɔ ni, ejaakɛ yɛ ehiɛ lɛ, amɛ fɛɛ amɛhiɛ kamɔ.” (Luka 20:38) Enɛ tsɔɔ akɛ, be ni abaatee amɛ shi kɛba shikpɔŋ lɛ nɔ lɛ, amɛgbɛ́i yɛ wala wolo lɛ mli momo. Shi kɛ́ wɔɔwie lɛ, akɛ pɛnsil ni eŋma. (Luka 14:14) Ŋwanejee ko bɛ he akɛ, jalɔi nɛɛ ni abaatee amɛ shi lɛ ateŋ mɛi komɛi baaná hegbɛ amɛsɔmɔ akɛ “lumɛi yɛ shikpɔŋ lɛ nɔ fɛɛ.”—Lala 45:16.
11. Mɛni ehe baahia ni atsɔɔ “mɛi ni ejaaa” lɛ koni anyɛ aŋma amɛgbɛ́i yɛ wala wolo lɛ mli?
11 Kuu ni ji enumɔ lɛ, ni ji naagbee kuu lɛ ji, “mɛi ni ejaaa” lɛ. Mɛi nɛɛ efeee nɔ ni ja yɛ Yehowa hiɛ dani amɛgboi, ekolɛ akɛni amɛleee emlai kɛ eshishitoo mlai lɛ hewɔ. Enɛ hewɔ lɛ, amɛgbɛ́i bɛ wala wolo lɛ mli. Shi Nyɔŋmɔ baatee amɛ shi koni amɛná hegbɛ amɛtsɔɔ kɛji amɛbaasumɔ ni amɛgbɛ́i ahi wala wolo lɛ mli. Ehe baahia ni aye abua “mɛi ni ejaaa” nɛɛ waa. Dani amɛbaagboi lɛ, amɛteŋ mɛi komɛi fee nibii gbohii ni ehiii kwraa. No hewɔ lɛ, ehe baahia ni atsɔɔ amɛ Yehowa mlai kɛ eshishitoo mlai lɛ. Nyɔŋmɔ Maŋtsɛyeli lɛ baato gbɛjianɔ ni atsɔɔ amɛ nii, ni enɛ baafee nitsɔɔmɔ nitsumɔ ni fe fɛɛ ni atsu pɛŋ yɛ shikpɔŋ lɛ nɔ.
12. (a) Namɛi baatsɔɔ mɛi nii ejaaa lɛ nii? (b) Mɛni baaba mɛi ni ehiŋ shi yɛ nibii ni abaatsɔɔ amɛ lɛ anaa lɛ anɔ?
12 Namɛi baatsɔɔ mɛi ni ejaaa lɛ nii? Asafoku babaoo lɛ kɛ mɛi ni abaatee amɛ shi lɛ ateŋ mɛi ni ji jalɔi lɛ. Dani abaaŋma mɛi ni ejaaa lɛ agbɛ́i yɛ wala wolo lɛ mli lɛ, ja amɛbatsɔmɔ Yehowa nanemɛi ni amɛjɔɔ amɛhe nɔ amɛhã lɛ. Yesu Kristo kɛ mɛi ni afɔ amɛ mu lɛ ahiŋmɛi baahi mɛi ni ejaaa nɛɛ ahe waa ni amɛkwɛ bɔ ni amɛbaafee amɛnii amɛhã yɛ nibii ni atsɔɔ amɛ lɛ ahe. (Kpo. 20:4) Aŋmɛŋ mɛi ni ehiŋ shi yɛ nibii ni atsɔɔ amɛ lɛ anaa lɛ gbɛ ni amɛya nɔ amɛhi jeŋ hee lɛ mli kɛ́ amɛye afii 100 po. (Yes. 65:20) Yehowa kɛ Yesu naa tsui lɛ mli, ni no hewɔ lɛ, amɛŋmɛŋ mɔ ko ni baanyɛ afite nii yɛ jeŋ hee lɛ mli lɛ gbɛ ni ehi jɛmɛ.—Yes. 11:9; 60:18; 65:25; Yoh. 2:25.
MƐI NI BAATE SHI KƐYA WALA MLI KƐ MƐI NI BAATE SHI KƐYA KOJOMƆ MLI
13-14. (a) Be ko ni eho lɛ, te wɔnuɔ Yesu wiemɔi ni yɔɔ Yohane 5:29 lɛ shishi wɔhãa tɛŋŋ? (b) Shi mɛni esa akɛ wɔkadi yɛ nɔ ni Yesu wie lɛ he?
13 Yesu hu wie mɛi ni abaatee amɛ shi kɛba shikpɔŋ lɛ nɔ lɛ ahe. Akɛ nɔkwɛmɔnɔ lɛ, ewie akɛ: “Ŋmɛlɛtswaa lɛ miiba, be mli ni mɛi fɛɛ ni yɔɔ gbohii abui lɛ amli lɛ baanu egbee ni amɛbaaje kpo, mɛi ni fee nibii kpakpai lɛ baate shi kɛya wala mli, ni mɛi ni fee nibii gbohii lɛ baate shi kɛya kojomɔ mli.” (Yoh. 5:28, 29) Mɛni nɔ ni Yesu wie nɛɛ tsɔɔ?
14 Be ko ni eho lɛ, wɔwie akɛ nɔ ni Yesu wie nɛɛ kɔɔ nibii ni mɛi ni atee amɛ shi lɛ baafee yɛ amɛshitee lɛ sɛɛ lɛ he. Wɔtsɔɔ mli akɛ kɛ́ atee amɛ shi lɛ, amɛteŋ mɛi komɛi baafee nibii kpakpai ni amɛteŋ mɛi komɛi hu baafee nibii gbohii. Shi kadimɔ akɛ, Yesu ewieee akɛ mɛi ni baaje kpo kɛjɛ gbohii abui lɛ amli lɛ baafee nibii kpakpai loo amɛbaafee nibii gbohii. Moŋ lɛ, ewie akɛ amɛteŋ mɛi komɛi “fee nibii kpakpai” ni amɛteŋ mɛi komɛi “fee nibii gbohii,” ni tsɔɔ akɛ, amɛfee nibii nɛɛ dani amɛgboi. Nilee yɛ mli akɛ wɔbaamu sane naa nakai, ejaakɛ Yehowa eŋmɛŋ gbɛ ni mɔ ko afee nibii gbohii yɛ jeŋ hee lɛ mli. No hewɔ lɛ, eyɛ faŋŋ akɛ nibii gbohii ni akɛɛ mɛi ni ejaaa lɛ fee lɛ, amɛfee dani amɛgboi. Kɛ́ nakai ni lɛ, mɛni Yesu tsɔɔ be ni ewie akɛ mɛi komɛi “baate shi kɛya wala mli,” ni mɛi komɛi “baate shi kɛya kojomɔ mli” lɛ?
15. Namɛi “baate shi kɛya wala mli”? Ni mɛni hewɔ?
15 Jalɔi lɛ, ni ji mɛi ni fee nibii kpakpai dani amɛgboi lɛ, “baate shi kɛya wala mli” ejaakɛ amɛgbɛ́i yɛ wala wolo lɛ mli momo. Enɛ tsɔɔ akɛ, “mɛi ni fee nibii kpakpai” ni awie amɛhe yɛ Yohane 5:29 lɛ, nɔŋŋ ji “jalɔi” lɛ ni awie amɛhe yɛ Bɔfoi 24:15 lɛ. Shishinumɔ hee ni wɔná nɛɛ kɛ sane ni awie yɛ Romabii 6:7 lɛ kpãa gbee. Jɛmɛ kɛɔ akɛ: “Kɛ́ mɔ ko gbo lɛ, abuɔ lɛ bem kɛjeɔ ehe esha lɛ mli.” Be ni jalɔi nɛɛ gboi lɛ, Yehowa kɛ amɛhe eshai fɛɛ ke amɛ, shi ehiɛ kpaaa nibii kpakpai ni amɛfee lɛ anɔ. (Heb. 6:10) Ehe baahia ni jalɔi nɛɛ ni atee amɛ shi lɛ aye Yehowa anɔkwa koni amɛgbɛ́i aya nɔ ahi wala wolo lɛ mli.
16. Kɛ́ akɛɛ abaatee mɛi ni ejaaa lɛ ashi “kɛya kojomɔ mli” lɛ, te atsɔɔ tɛŋŋ?
16 Ni mɛi ni fee nibii gbohii dani amɛgboi lɛ hu? Eyɛ mli akɛ be ni amɛgboi lɛ akɛ amɛhe eshai ke amɛ moŋ, shi be ni amɛyɔɔ wala mli lɛ, amɛsɔmɔɔɔ Yehowa. Enɛ hewɔ lɛ, amɛgbɛ́i bɛ wala wolo lɛ mli. Mɛi nɛɛ, ni ji “mɛi ni fee nibii gbohii” lɛ, nɔŋŋ ji “mɛi ni ejaaa” ni awie amɛhe yɛ Bɔfoi 24:15 lɛ, ni ‘amɛbaate shi kɛya kojomɔ mli.’ c Kɛ́ akɛɛ amɛbaate shi kɛya kojomɔ mli lɛ, te etsɔɔ tɛŋŋ? (Luka 22:30) Etsɔɔ akɛ, Yesu baakwɛ bɔ ni amɛbaafee amɛnii amɛhã. Ebaahe be dani abaana kɛji amɛsa mɛi ni aŋmaa amɛgbɛ́i yɛ wala wolo lɛ mli. Kɛ́ mɛi ni ejaaa nɛɛ tsake amɛtsui yɛ nibii gbohii ni amɛfee dani amɛgboi lɛ ahe ni amɛjɔɔ amɛhe nɔ amɛhã Yehowa lɛ, ebaaŋma amɛgbɛ́i yɛ wala wolo lɛ mli.
17-18. Mɛni ehe baahia ni mɛi fɛɛ ni abaatee amɛ shi kɛba wala mli yɛ shikpɔŋ lɛ nɔ lɛ afee? Ni mɛɛ ‘nifeemɔi’ Kpojiemɔ 20:12, 13 lɛ wieɔ he lɛ?
17 Ehe baahia ni jalɔi kɛ mɛi ni ejaaa ni abaatee amɛ shi lɛ fɛɛ aye mlai ni yɔɔ wolokpoi hei ni abaagbele naa yɛ Afii Akpe lɛ mli lɛ amli lɛ anɔ. Yɛ ninaa ko ni ajie kpo atsɔɔ bɔfo Yohane lɛ mli lɛ, ena “gbohii lɛ, mɛi wuji kɛ mɛi bibii, damɔ maŋtsɛ sɛi lɛ hiɛ, ni agbele wolokpoi anaa. Shi agbele wolokpo kroko naa; no ji wala wolokpo lɛ. Adamɔ nibii ni aŋmala yɛ wolokpoi lɛ amli lɛ anɔ akojo gbohii lɛ yɛ amɛnifeemɔi lɛ anaa.”—Kpo. 20:12, 13.
18 Mɛɛ ‘nifeemɔi’ anɔ abaadamɔ akojo mɛi ni abaatee amɛ shi lɛ? Ani nibii ni amɛfee dani amɛgboi lɛ anɔ abaadamɔ akojo amɛ? Dabi! Kaimɔ akɛ, akɛ amɛhe eshai lɛ fɛɛ ke amɛ be ni amɛgboi lɛ. No hewɔ lɛ, “amɛnifeemɔi” ni atsĩ tã yɛ biɛ lɛ kɔɔɔ nibii ni amɛfee dani amɛgboi lɛ ahe. Moŋ lɛ, eyɛ faŋŋ akɛ ekɔɔ bɔ ni amɛbaafee amɛnii amɛhã yɛ nibii ni abaatsɔɔ amɛ yɛ jeŋ hee lɛ mli lɛ ahe lɛ he. Yɛ jeŋ hee lɛ mli lɛ, ehe baahia ni hii anɔkwafoi tamɔ Noa, Samuel, David, kɛ Daniel, akase Yesu Kristo he nii ni amɛkɛ amɛnifeemɔ atsɔɔ akɛ amɛheɔ amɛyeɔ akɛ ekɛ ewala baashã afɔle kɛkpɔ̃ adesai. Kɛ́ ehe baahia ni atsɔɔ hii nɛɛ po nii lɛ, enyiɛ nɔŋŋ mɛi ni ejaaa lɛ!
19. Mɛni baaba mɛi ni mɔŋ hegbɛ fɛfɛo nɛɛ mli lɛ anɔ?
19 Mɛni baaba mɛi ni mɔŋ hegbɛ fɛfɛo nɛɛ mli lɛ anɔ? Kpojiemɔ 20:15 lɛ kɛɔ akɛ: “Mɔ fɛɛ mɔ ni anaaa akɛ aŋma egbɛ́i yɛ wala wolo lɛ mli lɛ, ashɛ lɛ afɔ̃ la kpaakpo lɛ mli.” Abaakpãtã amɛhiɛ kwraa ni anaŋ amɛ dɔŋŋ. No hewɔ lɛ, esa akɛ wɔfee bɔ fɛɛ bɔ ni wɔbaanyɛ koni aŋma wɔgbɛ́i yɛ wala wolo lɛ mli ni akagbe!
Nyɛmi nuu ko miitsu nitsɔɔmɔ nitsumɔ kpele ni abaatsu yɛ Afii Akpe lɛ mli lɛ eko (Kwɛmɔ kuku 20)
20. Mɛɛ nitsumɔ ni sa kadimɔ waa abaatsu yɛ Afii Akpe lɛ mli? (Kwɛmɔ mfoniri ni yɔɔ wolo lɛ hiɛ lɛ.)
20 Afii Akpe lɛ baafee be ni sa kadimɔ waa! Nyɔŋmɔ webii lɛ baatsɔɔ mɛi nii waa bɔ ni anako enɔ pɛŋ yɛ shikpɔŋ lɛ nɔ. Shi ebaafee be hu ni akɛbaakwɛ bɔ ni mɛi ni ja kɛ mɛi ni ejaaa lɛ baaba amɛjeŋ amɛhã. (Yes. 26:9; Bɔf. 17:31) Te abaato nitsɔɔmɔ nitsumɔ nɛɛ he gbɛjianɔ ahã tɛŋŋ? Nikasemɔ ni nyiɛ sɛɛ lɛ baahã wɔna bɔ ni ebaaya lɛ ehã, ni ebaahã wɔshwe nakai be lɛ waa.
LALA 147 Naanɔ Wala He Shiwoo
a Yɛ nikasemɔ nɛɛ mli lɛ, abaahã wɔle shishinumɔ hee ni wɔná yɛ Yesu wiemɔi ni yɔɔ Yohane 5:28, 29 lɛ he. Yɛ nakai ŋmalɛ lɛ mli lɛ, Yesu kɛɛ mɛi komɛi “baate shi kɛya wala mli” ni mɛi komɛi hu “baate shi kɛya kojomɔ mli.” Abaagbála gbohiiashitei enyɔ nɛɛ amli ahã wɔ ni atsɔɔ wɔ mɛi ni baate shi kɛya wala mli kɛ mɛi ni baate shi kɛya kojomɔ mli.
b Abɔi wala wolo lɛ ŋmaa “kɛjɛ be ni ato je lɛ shishi,” ni tsɔɔ akɛ, abɔi ŋmaa kɛjɛ be ni aná mɛi ni Nyɔŋmɔ buɔ amɛ akɛ amɛbaaná Yesu kpɔmɔ afɔleshaa lɛ he sɛɛ. (Mat. 25:34; Kpo. 17:8) No hewɔ lɛ, etamɔ nɔ ni Habel ji klɛŋklɛŋ mɔ ni aŋma egbɛ́i yɛ wolo nɛɛ mli, ejaakɛ Yehowa bu lɛ jalɔ.
c Be ko ni eho lɛ, wɔwie akɛ wiemɔ ni ji “kojomɔ” ni akɛtsu nii yɛ biɛ lɛ tsɔɔ akɛ, abaabu amɛ fɔ loo abaabu amɛ akɛ amɛsa hiɛkpatamɔ. Bei komɛi lɛ, wiemɔ ni ji “kojomɔ” lɛ baanyɛ atsɔɔ nakai. Shi etamɔ nɔ ni yɛ ŋmalɛ nɛɛ mli lɛ, wiemɔ “kojomɔ” ni Yesu kɛtsu nii lɛ kɔɔ nɔ kroko he. Ekɔɔ bɔ ni abaahã hiŋmɛi ahi mɔ ko he ni akwɛ nɔ fɛɛ nɔ ni efeɔ lɛ jogbaŋŋ lɛ he, loo tamɔ bɔ ni Greek dishinari ko tsɔɔ lɛ, ka ni abaaka mɔ ko akwɛ akɛ te ebaaba ejeŋ ehã tɛŋŋ.
