1. Mɛni hewɔ ŋmɛnɛ lɛ, ewa kɛhã mɛi pii akɛ amɛbaahe mɛi amɛye lɛ?

 ŊMƐNƐ lɛ, ewa kɛhã mɛi pii ni yɔɔ je lɛ mli lɛ akɛ amɛbaahe mɔ ko amɛye. Bɔ ni jarayelɔi kɛ nitsumɔtsɛmɛi, maŋ onukpai, kɛ jamɔŋ hiɛnyiɛlɔi feɔ amɛnii amɛhãa hewɔ lɛ, amɛheee amɛ amɛyeee. Mɛi komɛi heee amɛnanemɛi, amɛkutsoŋbii, kɛ amɛwekumɛi po amɛyeee. Shi esaaa akɛ enɛ feɔ wɔ naakpɛɛ, ejaakɛ Biblia lɛ gba akɛ, ‘naagbee gbii lɛ amli lɛ, gbɔmɛi baatsɔmɔ mɛi ni yeee anɔkwa, mɛi ni wieɔ mɛi krokomɛi ahe efɔŋ, kɛ mɛi ni jieɔ mɛi amɛhãa.’ Ŋmalɛ nɛɛ tsɔɔ akɛ, mɛi baakase Satan, je nɛɛ nyɔŋmɔ lɛ ni yeee anɔkwa ni anyɛŋ ahe lɛ aye lɛ.​—2 Tim. 3:1-4; 2 Kor. 4:4.

2. (a) Namɛi esa akɛ wɔhe amɛ wɔye kɛ wɔtsui muu fɛɛ? (b) Mɛɛ sane ekolɛ mɛi komɛi baabi?

² Shi wɔ, ni ji Yehowa tsuji lɛ, wɔle akɛ wɔbaanyɛ wɔhe Yehowa wɔye kɛ wɔtsui muu fɛɛ. (Yer. 17:7, 8) Wɔle akɛ Yehowa sumɔɔ wɔ, ebuɔ wɔ akɛ enanemɛi, ni ‘ekwaŋ wɔ kɔkɔɔkɔ.’ (Lala 9:10) Wɔbaanyɛ wɔhe Kristo Yesu hu wɔye, ejaakɛ ekɛ ewala shã afɔle ehã wɔ. (1 Pet. 3:18) Nibii ni wɔna yɛ wɔshihilɛ mli lɛ hu ahewɔ lɛ, wɔle akɛ wɔbaanyɛ wɔmu wɔfɔ̃ ŋaawoi ni yɔɔ Biblia lɛ mli lɛ anɔ. (2 Tim. 3:16, 17) Hɛɛ, wɔbaanyɛ wɔhe Yehowa, Yesu, kɛ Biblia lɛ wɔye. Shi ekolɛ, mɔ ko baabi akɛ, ‘Ni minyɛmimɛi Kristofoi lɛ hu, ani esa akɛ mahe amɛ maye be fɛɛ be?’ Kɛ́ hetoo lɛ ji hɛɛ lɛ, mɛni hewɔ?

3. Mɛɛ hegbɛ ni nɔ bɛ wɔná? (Marko 10:29, 30)

³ Yehowa eŋmɛ wɔ gbɛ ni wɔbafata ewebii ni yɔɔ jeŋ fɛɛ ni efee ekome akɛ weku kɛmiijá lɛ lɛ ahe. Enɛ jeee hegbɛ bibioo kwraa, ni ehãa wɔnáa jɔɔmɔi pii. (Kanemɔ Marko 10:29, 30.) Wɔyɛ nyɛmimɛi yɛ je lɛŋ fɛɛ ni sumɔɔ Yehowa tamɔ bɔ ni wɔ hu wɔsumɔɔ lɛ lɛ ni miibɔ mɔdɛŋ akɛ amɛbaahi shi yɛ emlai kɛ eshishitoo  mlai lɛ anaa. Eyɛ mli akɛ bei komɛi lɛ, esoro wɔwiemɔ, bɔ ni wɔhiɔ shi wɔhãa, loo wɔhesaamɔ yɛ amɛnɔ lɛ he moŋ, shi kɛ́ wɔkɛ amɛ kpe nɔŋŋ lɛ, wɔnuɔ he akɛ wɔnyɛmimɛi ji amɛ ni wɔsumɔɔ amɛ kɛ́ no ji klɛŋklɛŋ be ni wɔkɛ amɛ kpeɔ po. Ni wɔnáa miishɛɛ waa kɛ́ wɔkɛ amɛ fee ekome kɛjie Yehowa, wɔ-Tsɛ ni yɔɔ ŋwɛi ni sumɔɔ wɔ lɛ yi ni wɔjá lɛ.​—Lala 133:1.

4. Mɛni hewɔ ehe miihia ni wɔkɛ wɔnyɛmimɛi lɛ afee ekome?

⁴ Ehe miihia ni wɔkɛ wɔnyɛmimɛi lɛ afee ekome bianɛ fe bei fɛɛ ni eho. Mɛni hewɔ? Ejaakɛ bei komɛi lɛ, amɛkpeɔ wɔ kɛtereɔ wɔjatsui ni tsii lɛ. (Rom. 15:1; Gal. 6:2) Agbɛnɛ hu, amɛwoɔ wɔ hewalɛ ni wɔya nɔ wɔsɔmɔ Yehowa kɛ ekãa ni wɔkahã nɔ ko nɔ ko fite wɔ kɛ lɛ teŋ. (1 Tes. 5:11; Heb. 10:23-25) Eji wɔbɛ nyɛmimɛi ni baaye abua wɔ ni wɔwu wɔshi Satan Abonsam kɛ jeŋ fɔŋ nɛɛ kulɛ, wɔnii baafee mɔbɔ waa, aloo jeee nakai? Etsɛŋ, Satan kɛ esamaŋfoi lɛ baatutua Nyɔŋmɔ tsuji, shi wɔnyɛmimɛi lɛ baahi wɔmasɛi ni amɛbaaye amɛbua wɔ. Kwɛ bɔ ni enɛ baahã wɔmii ashɛ wɔhe waa wɔhã!

5. Mɛni hewɔ ewa kɛhã nyɛmimɛi komɛi akɛ amɛbaahe amɛnyɛmimɛi Kristofoi lɛ amɛye?

⁵ Shi nyɛmimɛi komɛi yɛ ni ewa kɛhã amɛ akɛ amɛbaahe amɛnyɛmimɛi Kristofoi lɛ amɛye. Ekolɛ amɛgba nyɛmi ko amɛteemɔŋ sane ni nyɛmi lɛ yagba mɛi krokomɛi, loo nyɛmi ko wo amɛ shi ni eyeee eshiwoo lɛ nɔ, loo ekolɛ nyɛmi ko wie nɔ ko loo efee nɔ ko ni dɔ amɛ waa. Kɛ́ wɔkɛ shihilɛi ni tamɔ nɛkɛ kpe lɛ, ebaanyɛ ehã ewa kɛhã wɔ akɛ wɔbaahe wɔnyɛmimɛi lɛ wɔye. No hewɔ lɛ, mɛni baaye abua wɔ ni wɔhe wɔnyɛmimɛi lɛ wɔye waa?

6. Kɛ́ wɔsumɔɔ wɔnyɛmimɛi lɛ, mɛɛ gbɛ nɔ no baaye abua wɔ ni wɔhe amɛ wɔye? (1 Korintobii 13:4-8)

⁶ Ja wɔsumɔɔ mɔ ko dani wɔbaahe lɛ wɔye. Klɛŋklɛŋ Korintobii yitso 13 lɛ tsɔɔ sui kpakpai  pii ni kɛ́ wɔyɛ suɔmɔ lɛ wɔbaajie lɛ kpo. Sui kpakpai nɛɛ baaye abua wɔ ni wɔhe wɔnyɛmimɛi lɛ wɔye kɛ́ amɛhã wɔnine nyɛ shi po. (Kanemɔ 1 Korintobii 13:4-8.) Akɛ nɔkwɛmɔnɔ lɛ, kuku 4 lɛ kɛɔ akɛ: “Suɔmɔ toɔ etsui shi ni emli hi.” Yehowa náa wɔhe tsui kɛ́ wɔtɔ̃ enɔ po. No hewɔ lɛ, kɛ́ wɔnyɛmimɛi lɛ wie nɔ ko loo amɛfee nɔ ko ni egba wɔnaa lɛ, esa akɛ wɔ hu wɔná amɛhe tsui. Kuku 5 lɛ kɛfata he akɛ: ‘Suɔmɔ mli wooo la. Ekɛ efɔŋ etooo emli.’ No hewɔ lɛ, esaaa akɛ wɔkɛ ‘efɔŋ toɔ wɔmli,’ ni tsɔɔ akɛ, kɛ́ wɔnyɛmimɛi lɛ fee nɔ ko ni egba wɔnaa lɛ, esa akɛ wɔjie kɛjɛ wɔjwɛŋmɔ mli. Jajelɔ 7:9 lɛ kɛɔ akɛ, ‘wɔkahã wɔmli fu oya.’ Esa akɛ wɔkɛ ŋaa ni awo yɛ Efesobii 4:26 lɛ atsu nii. Jɛmɛ kɛɔ akɛ: “Nyɛkahãa hulu nyɔa shi be mli ni nyɛmli efu lolo.”

7. Mɛɛ gbɛ nɔ shishitoo mlai ni yɔɔ Mateo 7:1-5 lɛ baanyɛ aye abua wɔ ni wɔhe wɔnyɛmimɛi lɛ wɔye?

⁷ Nɔ kroko ni baahã wɔhe wɔnyɛmimɛi lɛ wɔye ji, ni wɔbaana amɛ tamɔ bɔ ni Yehowa naa amɛ lɛ. Yehowa sumɔɔ wɔnyɛmimɛi lɛ, ni ekɛ ejwɛŋmɔ emaaa amɛtɔmɔi anɔ. No hewɔ lɛ, wɔ hu esaaa akɛ wɔkɛ wɔjwɛŋmɔ maa amɛtɔmɔi anɔ. (Lala 130:3) Moŋ lɛ, esa akɛ wɔbɔ mɔdɛŋ wɔkɛ wɔjwɛŋmɔ aya sui kpakpai ni amɛyɔɔ lɛ anɔ, ni wɔhe wɔye akɛ amɛbaanyɛ amɛfee nibii kpakpai. (Kanemɔ Mateo 7:1-5.) Kɛ́ wɔnyɛmimɛi lɛ fee nɔ ko ni edɔ wɔ ni amɛkɛɛ amɛjeee gbɛ lɛ, esa akɛ wɔhe wɔye, ejaakɛ Biblia lɛ kɛɛ, ‘suɔmɔ heɔ nibii fɛɛ eyeɔ.’ (1 Kor. 13:7) Kɛ́ Biblia lɛ kɛɛ, ‘suɔmɔ heɔ nibii fɛɛ eyeɔ’ lɛ, no etsɔɔɔ akɛ Yehowa miitao ni wɔhe mɔ fɛɛ mɔ wɔye kɛkɛ. Nɔ moŋ ni etsɔɔ ji akɛ, kɛ́ mɔ ko kɛ ewiemɔ kɛ enifeemɔ hã wɔna akɛ wɔbaanyɛ wɔmu wɔfɔ̃ enɔ lɛ, kɛ́ ewie nɔ ko lɛ esa akɛ wɔhe wɔye. b

8. Mɛni kɛ́ wɔfee lɛ ebaahã wɔhe wɔnyɛmimɛi lɛ wɔye?

⁸ Eheɔ be dani anyɛɔ aheɔ mɔ ko ayeɔ. Mɛni kɛ́ ofee lɛ, ebaahã ohe onyɛmimɛi lɛ oye? Bɔɔ mɔdɛŋ ni ole amɛ jogbaŋŋ. Kɛ́ atee asafoŋ kpeei lɛ, okɛ amɛ agba sane. Too gbɛjianɔ ni okɛ amɛ atsu nii yɛ shiɛmɔ nitsumɔ lɛ mli. Too otsui shi ohã amɛ ni okɛ ohiɛ afɔ̃ shi okwɛ akɛ mɛɛ nibii nɛkɛ amɛfeɔ ni tsɔɔ akɛ obaanyɛ ohe amɛ oye. Ekolɛ shishijee mli lɛ, obaanyɛ ogba amɛ ohe saji fioo pɛ dã. Sɛɛ mli kɛ́ agbɛnɛ ona akɛ nyɛnaanyobɔɔ lɛ mli miiwa lɛ, obaanyɛ ogba amɛ nibii krokomɛi hu. (Luka 16:10) Shi kɛ́ nyɛmi ko yajie oteemɔŋ sane ko kpo loo ehã onine nyɛ shi hu? Kaaye ohe oyai ni okɛ lɛ kpa naanyobɔɔ; too otsui shi. Ni kaahã nyɛmimɛi fioo komɛi anifeemɔ hã onu he akɛ onyɛŋ ohe nyɛmi ko kwraa oye. He ni wɔshɛ nɛɛ, wɔbaakwɛ Yehowa tsuji anɔkwafoi komɛi ni mɛi hã amɛnine nyɛ shi shi no hãaa amɛnu he akɛ amɛnyɛŋ amɛhe mɔ ko mɔ ko amɛye.

9. (a) Mɛni Hana fee ni tsɔɔ akɛ ehãaa Yehowa tsuji komɛi anifeemɔ atɔ̃tɔ enane? (b) Mɛni okaseɔ yɛ Hana sane lɛ mli? (Kwɛmɔ mfoniri lɛ.)

⁹ Ani nyɛmi ko ni yɔɔ sɔɔmɔ hegbɛ lɛ efee nɔ ko ni edɔ bo waa pɛŋ? Kɛ́ nakai lɛ, Hana sane lɛ baanyɛ aye abua bo. Yɛ Hana beiaŋ lɛ, Osɔfonukpa Eli ji mɔ ni kwɛɔ nibii fɛɛ ni kɔɔ Yehowa jamɔ he lɛ nɔ yɛ Israel. Shi Eli weku lɛ mli bii lɛ baaa amɛjeŋ jogbaŋŋ. No mli lɛ, ebihii lɛ miisɔmɔ akɛ osɔfoi, shi amɛjeŋba ekpɔtɔ ni amɛpapa ejajeee amɛ kɛ hiɛdɔɔ. Kulɛ Yehowa baanyɛ ahã Eli akpa osɔfonukpa lɛ yeli amrɔ nɔŋŋ, shi efeee nakai. Fɛɛ sɛɛ lɛ, Hana tee nɔ eyajá Yehowa yɛ sɔlemɔ buu lɛ mli. Be ni Eli na Hana ni ehao waa ni eesɔle lɛ, enáaa tsui ni ebaatao sane lɛ mli ekwɛ akɛ mɛni feɔ lɛ, shi nɔŋŋ lɛ, ekɛɛ etɔ dãa. (1 Sam. 1:12-16) Enɛ fɛɛ sɛɛ lɛ, Hana wo Yehowa shi akɛ kɛ́ ehã lɛ binuu lɛ,  ebaahã ebasɔmɔ yɛ kpee buu lɛ mli, ni tsɔɔ akɛ, ekɛ lɛ baaba he ni Eli yɔɔ lɛ, ni Eli baakwɛ enɔ. (1 Sam. 1:11) Ani enɛ tsɔɔ akɛ no mli lɛ nɔ ni Eli bihii lɛ feɔ lɛ bɛ hiɛdɔɔ tsɔ? Dabi kwraa, etsɔɔɔ nakai, ni sɛɛ mli lɛ, Yehowa gbala amɛtoi yɛ he. (1 Sam. 4:17) Shi be ni Yehowa dro Hana binuu, ni ji Samuel lɛ, no mli lɛ, Eli bihii lɛ yɛ jɛmɛ lolo.​—1 Sam. 1:17-20.

10. Mɛni Maŋtsɛ David fee ni tsɔɔ akɛ ehãaa mɛi komɛi anifeemɔ ahã emu sane naa akɛ enyɛŋ ehe mɔ ko mɔ ko eye?

¹⁰ Ani onaanyo ko ni osumɔɔ esane waa lɛ ekpa yɛ osɛɛ pɛŋ? Kɛ́ nɔ ko nakai enina bo pɛŋ lɛ, obaanyɛ okase nii yɛ Maŋtsɛ David nɔkwɛmɔnɔ lɛ mli. No mli lɛ David yɛ naanyo ko ni atsɛɔ lɛ Ahitofel. Shi be ni David binuu Absalom ka akɛ ebaashɔ̃ maŋtsɛyeli lɛ yɛ epapa dɛŋ lɛ, Ahitofel yafata Absalom kɛ ewebii lɛ ahe. Ekã shi faŋŋ akɛ, David tsui kumɔ akɛ ebinuu kɛ mɔ ko ni ebuɔ lɛ akɛ enaanyo lɛ fɛɛ ete shi amɛwo lɛ. Shi enɛ hãaa emu sane naa akɛ enyɛŋ ehe mɔ ko mɔ ko eye dɔŋŋ. Ehe enaanyo anɔkwafo ko ni atsɛɔ lɛ Hushai ni eyafataaa atuatselɔi lɛ ahe lɛ eye, ni Hushai hãaa David nine anyɛ shi. Ekɛ ewala wo oshãra mli ni efee nɔ ko kɛye ebua David, ni enɛ tsɔɔ akɛ naanyo kpakpa ji lɛ.​—2 Sam. 17:1-16.

11. Mɛni Nabal tsuji lɛ ateŋ mɔ kome fee ni tsɔɔ akɛ eheɔ Abigail eyeɔ?

¹¹ Israelnyo niiatsɛ ko ni atsɛɔ lɛ Nabal lɛ tsuji lɛ ateŋ mɔ kome hu fee nɔkwɛmɔnɔ kpakpa. David kɛ ewebii lɛ bu Nabal tsuji lɛ ahe. No hewɔ lɛ sɛɛ mli lɛ, David tsu kɛtee Nabal ŋɔɔ koni ehã lɛ kɛ ewebii lɛ nɔ fɛɛ nɔ ni ebaaná ehã amɛ ni amɛye, shi Nabal hãaa amɛ. Enɛ hã David mli fu aahu akɛ, ekpɛ eyiŋ akɛ ebaagbe hii fɛɛ ni yɔɔ Nabal shĩa lɛ. Nabal tsuji lɛ ateŋ mɔ kome na nɔ ni baa lɛ ni eyabɔ Nabal ŋa Abigail amaniɛ. Yɛ gbɛ ko nɔ lɛ, tsulɔ nɛɛ kɛ ewala wo Abigail dɛŋ, ejaakɛ nɔ najiaŋ ni ebaajo foi lɛ, ekɛ ehiɛ fɔ̃ Abigail nɔ akɛ ebaatsu saji ahe nii koni akabagbe amɛ. Mɔ fɛɛ mɔ le akɛ Abigail hiɛ kã shi, ni enɛ ji nɔ ni hã tsulɔ lɛ he lɛ eye lɛ. Bɔ ni nibii anaa yakpa hã lɛ hãa wɔnaa akɛ, Abigail hãaa tsulɔ nɛɛ nine anyɛ shi. Abigail fee ekãa ni ekɛ David yawie koni etsake ejwɛŋmɔ. (1 Sam. 25:2-35) Ehe eye akɛ, David baabo lɛ toi ni efee nɔ ni ja.

12. Mɛni Yesu fee ni tsɔɔ akɛ yɛ tɔmɔi ni ekaselɔi lɛ tɔ̃ lɛ fɛɛ sɛɛ lɛ, eheɔ amɛ eyeɔ?

¹² Yesu he ekaselɔi lɛ eye yɛ tɔmɔi pii ni amɛtɔ̃  lɛ fɛɛ sɛɛ. (Yoh. 15:15, 16) Akɛ nɔkwɛmɔnɔ lɛ, be ni Yakobo kɛ Yohane kɛɛ Yesu akɛ ehã amɛ gbɛhe krɛdɛɛ yɛ Maŋtsɛyeli lɛ mli lɛ, Yesu eshwieee amɛ yɛ ebɔfoi lɛ ateŋ, ni emuuu sane naa akɛ nɔ ko ni amɛtaoɔ amɛná lɛ hewɔ amɛjáa Yehowa. (Mar. 10:35-40) Sɛɛ mli be ni amɔ Yesu gbi gbɛkɛ ni enɔ jetsɛremɔ lɛ abaagbe lɛ lɛ, ekaselɔi lɛ fɛɛ jo foi amɛshi lɛ. (Mat. 26:56) Shi Yesu nuuu he akɛ enyɛŋ ehe amɛ eye dɔŋŋ. Yɛ tɔmɔi ni amɛtɔ̃ lɛ fɛɛ sɛɛ lɛ, “esumɔ amɛ aahu kɛyashi naagbee.” (Yoh. 13:1) Be ni atee Yesu shi lɛ, ekɛ nitsumɔ ni tsĩi wo ebɔfoi anɔkwafoi 11 lɛ adɛŋ akɛ, amɛnyiɛ hiɛ yɛ kaselɔfeemɔ nitsumɔ lɛ mli ni amɛkwɛ etsuji ni eshwɛɛɛ amɛhe kwraa lɛ. (Mat. 28:19, 20; Yoh. 21:15-17) Yɛ emuu ni bɔfoi nɛɛ yeee lɛ fɛɛ sɛɛ lɛ, amɛhãaa Yesu nine anyɛ shi. Amɛ fɛɛ amɛye Yehowa anɔkwa kɛtee gbele mli tɔ̃ɔ. Hana, David, Nabal tsulɔ lɛ, Abigail, kɛ Yesu fɛɛ he adesai ni yeee emuu amɛye, ni enɛ ji nɔkwɛmɔnɔ kpakpa kɛhã wɔ.

13. Mɛni baanyɛ ahã ewa kɛhã wɔ akɛ wɔbaahe mɛi wɔye?

¹³ Ani ogba nyɛmi ko oteemɔŋ sane ni sɛɛ mli lɛ, oyanu yɛ he ko? Kɛ́ eba lɛ nakai lɛ, eyɛ dɔlɛ waa. Nakai eba lɛ yɛ nyɛmi yoo ko gbɛfaŋ. Be ko lɛ, eyagba asafoŋ onukpa ko eteemɔŋ sane. Enɔ jetsɛremɔ lɛ, asafoŋ onukpa lɛ ŋa lɛ tswa nyɛmi yoo lɛ koni ewo lɛ hewalɛ. Nyɛmi yoo lɛ na faŋŋ akɛ, asafoŋ onukpa lɛ eyagba eŋa lɛ sane lɛ. Enɛ hã nyɛmi yoo lɛ nu he akɛ enyɛŋ emu efɔ̃ nakai asafoŋ onukpa lɛ nɔ. Shi efee nɔ ko ni hi waa. Eyagba asafoŋ onukpa kroko nɔ ni ba lɛ, ni asafoŋ onukpa nɛɛ ye ebua lɛ koni ena akɛ ebaanyɛ emu efɔ̃ nakai asafoŋ onukpa lɛ kɛ asafoŋ onukpai krokomɛi lɛ anɔ.

14. Mɛni ye ebua nyɛmi nuu ko ni enyɛ esaa ekɛ asafoŋ onukpai enyɔ komɛi ateŋ?

¹⁴ Nyɛmi nuu ko mli fu asafoŋ onukpai enyɔ komɛi be kplaŋŋ, ni enu he akɛ enyɛŋ emu efɔ̃ amɛnɔ. Shi nɔ ko ni nyɛmi nuu ko ni ebuɔ lɛ waa lɛ wie lɛ ná enɔ hewalɛ waa. Nɔ ni nyɛmi nuu lɛ wie ji akɛ: “Wɔnyɛmimɛi lɛ jeee wɔhenyɛlɔi, Satan moŋ ji wɔhenyɛlɔ.” Nyɛmi nuu lɛ susu sane nɛɛ he jogbaŋŋ ni ena nɔ ni esa akɛ efee. No hewɔ lɛ, esɔle ni Yehowa aye abua lɛ, ni etee eyana asafoŋ onukpai enyɔ lɛ ni esaa ekɛ amɛ teŋ.

15. Mɛni hewɔ ekolɛ ebaahe be dani nyɛmi ko baahe enyɛmimɛi Kristofoi lɛ eye ekoŋŋ? Gbaa niiashikpamɔ ko ni tsɔɔ nakai.

¹⁵ Ani ahe sɔɔmɔ hegbɛ ko yɛ odɛŋ? Kɛ́ eba lɛ nakai lɛ, eyɛ dɔlɛ waa. Naa nyɛmi yoo ko ni atsɛɔ lɛ Grete lɛ kɛ emami niiashikpamɔ ni kɔɔ enɛ he. Grete kɛ emami ji Odasefoi anɔkwafoi ni hi Germany be ni Nazi nɔyeli lɛ tsĩ wɔnitsumɔ lɛ naa yɛ jɛmɛ dani Jeŋ Ta Ni Ji Enyɔ lɛ je shishi lɛ. Nakai beiaŋ lɛ, efata mɛi ni ahãa amɛtaipiɔ Buu-Mɔɔ lɛ koni ayaja ahã nyɛmimɛi lɛ ahe. Shi be ni nyɛmimɛi lɛ ná amɛle akɛ epapa sumɔɔɔ anɔkwale lɛ, amɛshe gbeyei akɛ epapa baayajie nyɛmimɛi lɛ ehã, no hewɔ lɛ, amɛhe nakai hegbɛ lɛ yɛ edɛŋ. Shi jeee no pɛ ji naagba ni Grete kɛkpe. Kɛjɛ be ni abɔi Jeŋ Ta Ni Ji Enyɔ lɛ wu aahu kɛyashi agbe naa lɛ, nyɛmimɛi lɛ hãaa Grete kɛ emami magazin lɛ eko. Ni kɛ́ amɛkɛ amɛ kpe yɛ maŋ lɛ mli lɛ, amɛfooo amɛdaaŋ. Sane lɛ dɔ Grete waa! Grete kɛɛ ehe be kplaŋŋ dani enyɛ ekɛ nyɛmimɛi nɛɛ ahe ke amɛ ni enu he akɛ ebaanyɛ ehe amɛ eye ekoŋŋ. Nɔ ni ye ebua lɛ ni enyɛ efee nakai ji, ena akɛ Yehowa kɛ nyɛmimɛi lɛ ahe eshai eke amɛ ni no hewɔ lɛ esa akɛ lɛ hu ekɛke amɛ. c

16. Mɛni hewɔ esa akɛ wɔmia wɔhiɛ wɔfee nibii ni baahã wɔhe wɔnyɛmimɛi lɛ wɔye?

¹⁶ Kɛ́ ekolɛ okɛ shihilɛi ni wɔwie he kɛtsɔ hiɛ lɛ eko ekpe lɛ, bɔɔ mɔdɛŋ ni ofee nibii ni baahã  ohe onyɛmimɛi lɛ oye ekoŋŋ. Ekolɛ ebaahe be, shi kɛ́ omia ohiɛ ofee nakai lɛ, obaaná he sɛɛ. Etamɔ ni oyaye nɔ ko ni etsɔ bo. Ekolɛ kɛjɛ nakai be lɛ kɛyaa lɛ, obaakwɛ oniyeli jogbaŋŋ. Shi ani nakai niyenii kome lɛ ni oyaye ni etsɔ bo lɛ hewɔ lɛ, obaakpa niyeli kwraa? Dabi. Nakai nɔŋŋ esaaa akɛ wɔhãa nɔ ko ni nyɛmi ko efee wɔ lɛ hãa wɔnuɔ he akɛ wɔnyɛŋ wɔhe wɔnyɛmimɛi Kristofoi lɛ fɛɛ wɔye. Wɔle akɛ wɔ fɛɛ wɔyeee emuu. Kɛ́ wɔbɔ mɔdɛŋ wɔfee nibii ni baahã wɔhe wɔnyɛmimɛi lɛ wɔye ekoŋŋ lɛ, wɔbaaná miishɛɛ. Agbɛnɛ hu, no baahã wɔnyɛ wɔkɛ wɔjwɛŋmɔ ama nɔ ni wɔbaanyɛ wɔfee kɛye wɔbua mɛi krokomɛi ni yɔɔ wɔsafo lɛ mli lɛ nɔ koni amɛ hu amɛhe amɛnyɛmimɛi Kristofoi lɛ amɛye.

17. Mɛni hewɔ ehe miihia waa ni wɔhe wɔnyɛmimɛi lɛ wɔye? Ni mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁷ Yɛ Satan je lɛ mli lɛ, ewa akɛ abaahe mɛi aye. Shi wɔheɔ wɔnyɛmimɛi lɛ wɔyeɔ, ejaakɛ wɔsumɔɔ amɛ ni amɛ hu amɛsumɔɔ wɔ. Akɛni wɔheɔ wɔnyɛmimɛi lɛ wɔyeɔ hewɔ lɛ, wɔyɛ miishɛɛ ni ekomefeemɔ yɛ wɔteŋ, ni wɔle akɛ wɔsɛɛ lɛ, wɔnyɛmimɛi lɛ baaye amɛbua wɔ kɛ́ wɔkɛ naagbai kpe. Kɛ́ nyɛmi ko efee bo nɔ ko ni edɔ bo waa ni no hewɔ lɛ oheee lɛ oyeee dɔŋŋ lɛ, mɛni obaanyɛ ofee? Bɔɔ mɔdɛŋ ni ona sane lɛ tamɔ bɔ ni Yehowa naa lɛ lɛ, okɛ Biblia mli shishitoo mlai atsu nii, feemɔ nibii ni baahã osumɔ nyɛmimɛi lɛ waa, ni okase mɛi ni awie amɛhe yɛ Biblia lɛ mli ni fee nɔkwɛmɔnɔ kpakpa lɛ. Enɛ baaye abua bo ni okɛ onyɛmi lɛ he ake lɛ ni ohe lɛ oye ekoŋŋ. Kɛ́ ofee nakai lɛ, obaaná nanemɛi pii ni ‘baakpɛtɛ bo gbagbalii fe nyɛmi.’ (Abɛi 18:24) Ehi akɛ wɔbaahe wɔnyɛmimɛi lɛ wɔye, shi esa akɛ wɔ hu wɔfee nibii ni baahã amɛhe wɔ amɛye. Yɛ nikasemɔ ni nyiɛ sɛɛ lɛ mli lɛ, wɔbaakwɛ nibii komɛi ni kɛ́ wɔfee lɛ, ebaahã wɔnyɛmimɛi lɛ ahe wɔ aye.