Naa bɔ ni Biblia lɛ hãa sanebimɔi nɛɛ hetoo.

Bɔfoi 24:15 lɛ kɛɔ wɔ akɛ “abaatee jalɔi kɛ mɛi ni ejaaa fɛɛ shi.” Mɛi ni ja lɛ ji mɛi ni bo Yehowa toi dani amɛgboi, no hewɔ lɛ amɛgbɛ́i yɛ wala wolo lɛ mli. (Mal. 3:16) Shi mɛi ni ejaaa lɛ ateŋ mɛi komɛi ji mɛi ni náaa hegbɛ loo be ni fa bɔ ni sa ni amɛkɛbaakase Yehowa he nii dani amɛgboi, ni no hewɔ lɛ, aŋmako amɛgbɛ́i yɛ wala wolo lɛ mli.

Yohane 5:28, 29 lɛ kɔɔ kui enyɔ ni atsĩ amɛtã yɛ Bɔfoi 24:15 lɛ nɔŋŋ ahe. Yesu wie yɛ jɛmɛ akɛ, “mɛi ni fee nibii kpakpai lɛ baate shi kɛya wala mli, ni mɛi ni fee nibii gbohii lɛ baate shi kɛya kojomɔ mli.” Mɛi ni ja lɛ fee nibii kpakpai dani amɛgboi. Amɛbaate shi kɛba wala mli, ejaakɛ amɛgbɛ́i yɛ wala wolo lɛ mli lolo. Shi mɛi ni ejaaa lɛ fee nibii gbohii dani amɛgboi. No hewɔ lɛ, amɛbaate shi kɛya kojomɔ mli. Amɛgbɛ́i bɛ wala wolo lɛ mli, ni no hewɔ lɛ abaakojo amɛ, ni tsɔɔ akɛ, abaahã amɛbe ni akɛkwɛ akɛ te amɛbaafee amɛnii amɛhã tɛŋŋ. Yɛ nɛkɛ be nɛɛ mli lɛ, amɛbaaná hegbɛ amɛkase Yehowa he nii, ni kɛ́ amɛbo lɛ toi lɛ, abaaŋma amɛgbɛ́i yɛ wala wolo lɛ mli.

Kpojiemɔ 20:12, 13 lɛ hãa wɔnaa akɛ, ehe baahia ni mɛi fɛɛ ni abaatee amɛ shi lɛ aye “nibii ni aŋmala yɛ wolokpoi lɛ amli lɛ,” ni ji mlai hei ni akɛbaahã yɛ jeŋ hee lɛ mli lɛ anɔ. Yehowa hãŋ mɛi ni yeŋ mlai nɛɛ anɔ lɛ aya nɔ ahi wala mli.​—Yes. 65:20.

Daniel 12:2 lɛ gba akɛ, mɛi ni egboi lɛ ateŋ mɛi komɛi baate shi kɛya “naanɔ wala mli,” ni amɛteŋ mɛi komɛi hu baate shi kɛya “hiɛgbele kɛ naanɔ nyaŋemɔ” mli. Ŋmalɛ nɛɛ kɔɔ nɔ ni baaba mɛi ni abaatee amɛ shi lɛ anɔ yɛ naagbee kwraa lɛ he. Amɛteŋ mɛi komɛi baaná “naanɔ wala,” ni amɛteŋ mɛi komɛi baaya “naanɔ nyaŋemɔ” mli. No hewɔ lɛ, yɛ Afii Akpe lɛ sɛɛ lɛ, mɛi komɛi baaná naanɔ wala, shi abaakpãtã mɛi komɛi hu ahiɛ kɛya naanɔ.​—Kpo. 20:15; 21:3, 4.

Hã wɔkɛ nɔkwɛmɔnɔ ko atsɔɔ enɛ mli. Wɔbaanyɛ wɔkɛ jalɔi kɛ mɛi ni ejaaa ni abaatee amɛ shi lɛ ato mɛi ni efã gbɛ kɛtee maŋ ko nɔ lɛ ahe. Jalɔi lɛ tamɔ mɛi ni ahã amɛ visa ni amɛbaanyɛ amɛkɛtsu nii loo amɛhi maŋ lɛ nɔ kwraa. Visa nɛɛ hãa amɛnáa hegbɛi komɛi ni gbɔi krokomɛi náaa. Mɛi ni ejaaa lɛ tamɔ gbɔi ni ahã amɛ shisharalɔi a-visa loo visa ni baahã amɛhi maŋ lɛ nɔ be kukuoo. Bɔ ni gbɔi nɛɛ baafee amɛnii amɛhã lɛ ni baahã aŋmɛ amɛ gbɛ ni amɛya nɔ amɛhi maŋ lɛ nɔ. Nakai nɔŋŋ ehe baahia ni mɛi ni ejaaa ni abaatee amɛ shi lɛ aye Yehowa mlai lɛ anɔ ni amɛfee nɔ ni ja yɛ ehiɛ dani abaaŋmɛ amɛ gbɛ ni amɛya nɔ amɛhi Paradeiso lɛ mli. Agbɛnɛ hu, ekɔɔɔ he eko visa ni akɛbaahã mɔ ko ni etee maŋ ko nɔ ehee lɛ, bɔ ni ebaafee enii ehã lɛ ni baahã afee lɛ nakai maŋ lɛ nɔ nyo loo ashwie lɛ kɛje maŋ lɛ nɔ. Nakai nɔŋŋ anɔkwa ni mɛi fɛɛ ni abaatee amɛ shi lɛ baaye kɛ bɔ ni amɛbaaba amɛjeŋ amɛhã lɛ ni baatsɔɔ nɔ ni baaba amɛnɔ naagbee kwraa.

Yehowa Nyɔŋmɔ yɛ suɔmɔ; shi eyeɔ jalɛ sane hu. (5 Mo. 32:4; Lala 33:5) Suɔmɔ ni eyɔɔ lɛ hewɔ lɛ, ebaatee jalɔi kɛ mɛi ni ejaaa fɛɛ shi. Shi yɛ nakai beiaŋ nɔŋŋ lɛ, ebaakpa gbɛ akɛ amɛ fɛɛ amɛbaahi shi yɛ emlai kɛ eshishitoo mlai lɛ anaa. Mɛi ni baasumɔ Yehowa ni amɛbaahi shi yɛ emlai kɛ eshishitoo mlai lɛ anaa lɛ pɛ ji mɛi ni ebaaŋmɛ amɛ gbɛ ni amɛya nɔ amɛhi jeŋ hee lɛ mli.