1. Te Petro fee enii ehã tɛŋŋ be ni Yesu tsɔ naakpɛɛ gbɛ nɔ ehã egbe loi babaoo lɛ?

 PETRO etee wuo jenamɔ muu fɛɛ, shi enáaa nɔ ko. Shi Yesu kɛɛ lɛ nɔ ko ni hã ehiɛ fee lɛ yaa fioo. Ekɛɛ lɛ akɛ: “Nyɛtsia lɛlɛ lɛ kɛyaa he ni mli kwɔ lɛ, ni nyɛkɛ nyɛyai lɛ awo nu lɛ mli ni nyɛgbe loo.” (Luka 5:4) Petro heee eyeee akɛ amɛbaagbe loo ko, shi efee nɔ ni Yesu kɛɛ lɛ lɛ. Be ni amɛfee nakai lɛ, amɛgbe loi babaoo aahu akɛ amɛyai lɛ bɔi gbálamɔ. Petro kɛ wolɛi ni fata ehe lɛ na akɛ enɛ lɛ naakpɛɛ nii ni, ni no hã amɛhe jɔ̃ amɛhe naakpa. Petro kɛɛ Yesu akɛ: “Nuŋtsɔ, jee mimasɛi ni oya, ejaakɛ nuu eshafeelɔ ji mi.” (Luka 5:​6-9) Eeenyɛ efee akɛ, Petro nu he akɛ esaaa mɔ ni bɛŋkɛɔ Yesu po.

2. Kɛ́ wɔkase Petro he sane lɛ, mɛɛ gbɛ nɔ wɔbaaná he sɛɛ?

² Nɔ ni Petro wie lɛ ja; ‘eshafeelɔ ji lɛ’ lɛɛlɛŋ. Biblia lɛ hãa wɔnaa akɛ, bei komɛi lɛ, ewie nibii loo efee nibii ni sɛɛ mli lɛ eshwa ehe. Ani bei komɛi lɛ, bo hu onuɔ he tamɔ bɔ ni Petro nu he lɛ? Ani su gbonyo ko yɛ ohe ni oobɔ mɔdɛŋ ni otsake shi etamɔ nɔ ni esumɔɔɔ ni eyaa? Kɛ́ nakai ni lɛ, Petro sane lɛ baanyɛ aye abua bo. Mɛni hewɔ wɔkɛɔ nakai? Bo lɛ, susumɔ enɛ he okwɛ. Kulɛ Yehowa baanyɛ ehã aŋma Biblia lɛ ni atsĩii Petro fãtɔi lɛ atã kwraa yɛ mli, shi ehã aŋmala yɛ mli koni wɔkase nii kɛjɛ mli. (2 Tim. 3:​16, 17) Kɛ́ wɔkase Petro he nii lɛ, wɔbaana akɛ eyɛ fãtɔi kɛ henumɔi tamɔ wɔ nɔŋŋ, ni no baaye abua wɔ ni wɔna akɛ, Yehowa le akɛ wɔyeee emuu  ni no hewɔ lɛ bei komɛi lɛ wɔbaanyɛ wɔtɔ̃. Shi nɔ ni etaoɔ ji, ni wɔmia wɔhiɛ wɔsɔmɔ lɛ yɛ wɔfãtɔi lɛ fɛɛ sɛɛ, ni wɔnijiaŋ akaje wui.

3. Mɛni hewɔ esaaa akɛ wɔhãa wɔnijiaŋ jeɔ wui lɛ?

³ Mɛni hewɔ esaaa akɛ wɔhãa wɔnijiaŋ jeɔ wui lɛ? Ejaakɛ kɛ́ wɔnijiaŋ ejeee wui lɛ, wɔbaaye omanye. Akɛ nɔkwɛmɔnɔ lɛ, kɛ́ mɔ ko miitao ele saŋkutswaa waa lɛ, ja etswa afii abɔ. Be ni ekaseɔ lɛ, ebaatɔ̃ shii abɔ, shi kɛ́ ekpaaa tswaa lɛ, ehe baasa. Ni be ni ehe ebasa po lɛ, kɛ́ eyɛ mli aahu lɛ ebaatɔ̃. Shi no hãaa ekpa tswaa. Ebaaya nɔ etswa koni ehe asa fe tsutsu lɛ po. Nakai nɔŋŋ kɛ́ wɔnuɔ he akɛ wɔye wɔgbɔjɔmɔ ko nɔ po lɛ, nakai gbɔjɔmɔ lɛ baanyɛ ajie ehiɛ kpo ekoŋŋ. Shi kɛ́ eba lɛ nakai po lɛ, esa akɛ wɔya nɔ wɔtsu he nii. Wɔ fɛɛ wɔwieɔ nibii loo wɔfeɔ nibii ni sɛɛ mli lɛ wɔshwaa wɔhe. Shi kɛ́ wɔhãaa no aje wɔnijiaŋ wui ni wɔkpa Yehowa sɔɔmɔ lɛ, Yehowa baaye ebua wɔ ni wɔya wɔhiɛ. (1 Pet. 5:10) Nyɛhãa wɔsusua nɔkwɛmɔnɔ kpakpa ni Petro fee yɛ enɛ gbɛfaŋ lɛ he. Bɔ ni Yesu ná ehe tsui yɛ efãtɔi lɛ fɛɛ sɛɛ lɛ baanyɛ awo wɔ hewalɛ ni wɔya nɔ wɔsɔmɔ Yehowa.

4. Tamɔ bɔ ni awie yɛ Luka 5:​5-10 lɛ, te Petro na ehe ehã tɛŋŋ? Ni mɛni Yesu fee kɛshɛje emii?

⁴ Biblia lɛ etsɔɔɔ wɔ nɔ hewɔ ni Petro kɛɛ ‘eshafeelɔ ji lɛ’ loo eshai ni no mli lɛ eyɔɔ ejwɛŋmɔ mli. (Kanemɔ Luka 5:​5-10.) Shi eeenyɛ efee akɛ, no mli lɛ etɔ̃ tɔmɔi komɛi ni yɔɔ hiɛdɔɔ waa. Yesu na akɛ Petro tsui efã, ekolɛ akɛni eenu he akɛ esaaa lɛ hewɔ. Shi ele hu akɛ, Petro baanyɛ eya nɔ eye Yehowa anɔkwa. No hewɔ lɛ, Yesu kɛɛ lɛ akɛ: “Kpa gbeyeishemɔ lɛ.” Petro na akɛ Yesu miina nɔ ko kpakpa ko yɛ emli, ni no ye ebua lɛ ni etsake. Sɛɛ mli lɛ, Petro kɛ enyɛmi nuu Andrea shi amɛwuoyaa nitsumɔ lɛ ni amɛkɛ amɛbe fɛɛ banyiɛ Mesia lɛ sɛɛ, ni enɛ hã amɛná jɔɔmɔi babaoo.—Mar. 1:​16-18.

5. Mɛɛ jɔɔmɔi Petro ná akɛni ehãaa bɔ ni enuɔ he akɛ esaaa lɛ agbala esɛɛ ni ekanyiɛ Yesu sɛɛ lɛ hewɔ?

⁵ Be ni Petro banyiɛ Yesu sɛɛ lɛ, ená jɔɔmɔi babaoo. Ena ni Yesu miitsa helai, eefamɔ daimonioi, ni eetee gbohii ashi po. b (Mat. 8:​14-17; Mar. 5:​37, 41, 42) Agbɛnɛ hu, Petro na Yesu ni awo ehiɛ nyam yɛ e-Maŋtsɛyeli lɛ mli lɛ he ninaa, ni ehiɛ kpaaa enɛ nɔ kɔkɔɔkɔ. (Mar. 9:​1-8; 2 Pet. 1:​16-18) Petro na nibii pii ni eji ebanyiɛɛɛ Yesu sɛɛ kulɛ, enaŋ. Ŋwanejee ko bɛ he akɛ, jɔɔmɔi ni ená nɛɛ baahã ená miishɛɛ waa akɛ ehãaa bɔ ni enuɔ he akɛ esaaa lɛ agbala esɛɛ ni ekanyiɛ Yesu sɛɛ!

6. Ani Petro ye egbɔjɔmɔi lɛ anɔ nɔŋŋ? Mɛni hewɔ okɛɔ nakai?

 ⁶ Yɛ nibii ni Petro na ni enu lɛ fɛɛ sɛɛ lɛ, egbɔjɔmɔi lɛ jie amɛhiɛ kpo lolo. Akɛ nɔkwɛmɔnɔ lɛ, be ni Yesu wie akɛ esa akɛ ena nɔ ni egbo ni no ahã nɔ ni agba lɛ aba mli lɛ, Petro kã ehiɛ. (Mar. 8:​31-33) Agbɛnɛ hu, bɔfoi lɛ, ni Petro hu fata he lɛ, taa naa shii abɔ yɛ mɔ ni ji agbo fe fɛɛ yɛ amɛteŋ lɛ he. (Mar. 9:​33, 34) Ni gbi gbɛkɛ ni enɔ jetsɛremɔ lɛ Yesu baagbo lɛ, Petro fo nuu ko toi. (Yoh. 18:10) Nakai gbɛkɛ lɛ nɔŋŋ lɛ, gbeyei mɔ lɛ ni ekwa Yesu shii etɛ. (Mar. 14:​66-72) Enɛ hã Petro fó waa.—Mat. 26:75.

7. Be ni atee Yesu shi lɛ, mɛɛ nitsumɔ ekɛwo Petro dɛŋ?

⁷ Yesu kwaaa ekaselɔ ni tsui ekumɔ nɛɛ. Be ni atee Yesu shi lɛ, ehã Petro hegbɛ koni etsɔɔ akɛ esumɔɔ lɛ Yesu lɛ lolo. Yesu kɛ nitsumɔ wo Petro dɛŋ akɛ ekwɛ etoi lɛ anɔ. (Yoh. 21:​15-17) Petro mɔ nitsumɔ nɛɛ mli oya nɔŋŋ. Enɛ hewɔ lɛ, be ni mumɔ krɔŋkrɔŋ lɛ ba kaselɔi lɛ anɔ yɛ Pentekoste gbi lɛ nɔ yɛ Yerusalem lɛ, no mli lɛ Petro fata amɛhe.

8. Mɛɛ tɔmɔ ni yɔɔ hiɛdɔɔ Petro tɔ̃ be ni eyɔɔ Antiokia lɛ?

⁸ Be ni afɔ Petro mu lɛ sɛɛ po lɛ, egbɔjɔmɔi lɛ eyaaa. Yɛ afi 36 Ŋ.B. be ni afɔ Jeŋmajiaŋnyo ko ni atsɛɔ lɛ Kornelio lɛ mu lɛ, no mli lɛ Petro yɛ jɛmɛ, ni enɛ hã ena faŋŋ akɛ “Nyɔŋmɔ kwɛɛɛ mɛi ahiɛiaŋ,” ni agbɛnɛ hu, Jeŋmajiaŋbii baanyɛ abafata Kristofoi asafo lɛ he. (Bɔf. 10:​34, 44, 45) Enɛ hewɔ lɛ, Petro kɛ Jeŋmajiaŋbii lɛ ye nii, nɔ ko ni tsutsu ko lɛ efeŋ kɔkɔɔkɔ. (Gal. 2:12) Shi no mli lɛ, Yudafoi komɛi ni ebatsɔmɔ Kristofoi lɛ nuɔ he akɛ esaaa akɛ Yudafoi kɛ Jeŋmajiaŋbii feɔ ekome kɛyeɔ nii. Be ni Kristofoi komɛi ni hiɛ susumɔ nɛɛ ba Antiokia lɛ, Petro she gbeyei akɛ amɛbaana lɛ ni ekɛ Jeŋmajiaŋbii lɛ miiye nii, ni no hewɔ lɛ, ekɛ amɛ kpa niyeli. Bɔfo Paulo kã Petro hiɛ yɛ mɛi ahiɛ yɛ osatofeemɔ nɛɛ hewɔ. (Gal. 2:​13, 14) Shi yɛ enɛ fɛɛ sɛɛ lɛ, Petro nijiaŋ ejeee wui. Mɛni ye ebua lɛ?

9. Mɛɛ gbɛ nɔ sane ni awie yɛ Yohane 6:​68, 69 lɛ hãa wɔnaa akɛ Petro yeɔ anɔkwa?

⁹ Petro ye anɔkwa; ehãaa nɔ ko nɔ ko aje enijiaŋ wui ni ekpa Yesu sɛɛnyiɛmɔ. Be ko lɛ, nɔ ko ba ni hã ana akɛ Petro yeɔ anɔkwa. Yesu wie nɔ ko ni ekaselɔi lɛ nuuu shishi, ni nɔ najiaŋ ni amɛbaamɛ ni Yesu agbála mli etsɔɔ amɛ loo amɛbaabi lɛ he sane lɛ, amɛkpa esɛɛnyiɛmɔ. (Kanemɔ Yohane 6:​68, 69.) Shi Petro efeee nakai, ejaakɛ eyɔse akɛ Yesu pɛ yɔɔ “naanɔ wala wiemɔi lɛ.”

10. Mɛni Yesu fee kɛtsɔɔ akɛ eheɔ eyeɔ akɛ Petro baaya nɔ eye lɛ anɔkwa? (Kwɛmɔ mfoniri lɛ hu.)

¹⁰ Yesu hu kwaaa Petro. Gbi gbɛkɛ ni enɔ jetsɛremɔ lɛ abaagbe Yesu lɛ, Yesu le akɛ Petro kɛ bɔfoi krokomɛi lɛ baakwa lɛ. Fɛɛ sɛɛ lɛ, Yesu ná nɔmimaa akɛ Petro baaku esɛɛ, ni ebaaya nɔ eye lɛ anɔkwa. (Luka 22:​31, 32) Yesu le akɛ “mumɔ lɛ miisumɔ waa, shi heloo lɛ egbede.” (Mar. 14:38) No hewɔ lɛ, be ni Petro kwa Yesu po lɛ, Yesu kwaaa lɛ. Be ni atee Yesu shi lɛ, ejie ehe kpo etsɔɔ Petro. Eeenyɛ efee akɛ, no mli lɛ mɔ ko mɔ ko bɛ jɛmɛ. (Mar. 16:7; Luka 24:34; 1 Kor. 15:5) Ŋwanejee ko bɛ he akɛ, enɛ wo Petro hewalɛ waa, ejaakɛ no mli lɛ etsui ekumɔ.

11. Mɛni Yesu fee ni hã Petro na akɛ Yehowa baaye ebua lɛ?

¹¹ Yesu hã Petro na akɛ Yehowa baaye ebua lɛ. Be ni atee Yesu shi lɛ sɛɛ lɛ, etsɔ naakpɛɛ gbɛ nɔ ehã Petro kɛ bɔfoi krokomɛi lɛ  gbe loo ekoŋŋ. (Yoh. 21:​4-6) Ekã shi faŋŋ akɛ, naakpɛɛ nii nɛɛ ni Yesu fee lɛ hã Petro na akɛ, Yehowa baanyɛ ehã lɛ heloonaa nibii aahu. Ekolɛ enɛ hã Petro kai nɔ ni Yesu wie akɛ Yehowa baahã mɛi ni taoɔ Maŋtsɛyeli lɛ klɛŋklɛŋ lɛ amɛhiamɔ nii lɛ. (Mat. 6:33) Enɛ hewɔ lɛ, Petro kɛ shiɛmɔ nitsumɔ lɛ fee enitsumɔ titri, moŋ fe wuoyaa. Yɛ afi 33 Ŋ.B. Pentekoste gbi lɛ nɔ lɛ, ekɛ ekãa shiɛ waa, ni eye ebua mɛi akpei abɔ ni amɛkpɛlɛ sane kpakpa lɛ nɔ. (Bɔf. 2:​14, 37-41) No sɛɛ lɛ, eye ebua Samariabii kɛ Jeŋmajiaŋbii ni amɛbanyiɛ Kristo sɛɛ. (Bɔf. 8:​14-17; 10:​44-48) Ŋwanejee ko bɛ he akɛ, Yehowa ye ebua Petro ni enyɛ eye ebua mɛi srɔtoi kɛba asafo lɛ mli.

12. Kɛ́ wɔyɛ gbɔjɔmɔ ko ni wɔmiimia wɔhiɛ akɛ wɔye nɔ shi wɔnáaa lɛ mlɛo lɛ, mɛɛ gbɛ nɔ Petro sane lɛ baanyɛ aye abua wɔ?

¹² Yehowa baanyɛ eye ebua wɔ ni wɔya nɔ wɔsɔmɔ lɛ. Jeee be fɛɛ be wɔbaaná lɛ mlɛo, titri lɛ, kɛ́ wɔyɛ gbɔjɔmɔi komɛi ni wɔmiibɔ he mɔdɛŋ shi eyako. Ebaanyɛ eba lɛ akɛ wɔgbɔjɔmɔ lɛ mli wa fe Petro nɔ lɛ po. Shi Yehowa baanyɛ eye ebua wɔ ni wɔnijiaŋ akaje wui. (Lala 94:​17-19) Akɛ nɔkwɛmɔnɔ lɛ, afii babaoo dani nyɛmi nuu ko baaba asafo lɛ mli lɛ, no mli lɛ ekɛ hii náa bɔlɛ. Emia ehiɛ waa ekpa su nɛɛ, shi bei komɛi lɛ, enáa nakai akɔnɔ lɛ ekoŋŋ. Mɛni ye ebua lɛ ni enijiaŋ ejeee wui lɛ? Ewie akɛ: “Yehowa wajeɔ wɔ.” Ekɛfata he akɛ: “Yehowa mumɔ lɛ ni ekɛyeɔ ebuaa mi hewɔ lɛ, mile akɛ manyɛ maya nɔ manyiɛ anɔkwale lɛ mli. Yehowa kɛ mi etsu nibii babaoo yɛ asafo lɛ mli, ni yɛ migbɔjɔmɔ lɛ fɛɛ sɛɛ lɛ, eyaa nɔ ewajeɔ mi.”

13. Te wɔbaafee tɛŋŋ wɔkase nɔ ni Petro fee ni abɔ he amaniɛ yɛ Bɔfoi 4:​13, 29, 31 lɛ? (Kwɛmɔ mfoniri lɛ hu.)

¹³ Tamɔ bɔ ni wɔna lɛ, gbɔmɔ gbeyeishemɔ hã Petro tɔ̃ tɔmɔi komɛi ni yɔɔ hiɛdɔɔ. Shi be ni esɔle ni Yehowa ahã lɛ ekãa lɛ, Yehowa ye ebua lɛ ni enyɛ efee ekãa. (Kanemɔ Bɔfoi 4:​13, 29, 31.) Wɔ hu wɔbaanyɛ wɔfee ekãa ni wɔkashe gbeyei. Naa nɔ ko ni ba nyɛmi nuu ko ni atsɛɔ lɛ Horst ni hi shi yɛ Germany be ni Nazi nɔyeli lɛ yeɔ nɔ lɛ nɔ ni hãa wɔnaa nakai. Be ni eji oblanyo fioo lɛ, no mli lɛ, nɔyeli lɛ bi ni mɔ fɛɛ mɔ aŋa ŋamɔ ko ni tsɔɔ akɛ Hitler ni baahere amɛyiwala. Eyɛ mli akɛ Horst le akɛ esaaa akɛ eŋaa ŋamɔ nɛɛ eko moŋ, shi gbɔmɔ gbeyeishemɔ hewɔ lɛ, bei komɛi lɛ eŋaa. Yɛ nɔ najiaŋ ni  efɔlɔi baawie ehiɛ nyanyaanya lɛ, amɛkɛ lɛ fee ekome kɛsɔle ni amɛbi Yehowa koni ehã efee ekãa. Horst fɔlɔi ye amɛbua lɛ, ni lɛ hu ekɛ ehiɛ fɔ̃ Yehowa nɔ, ni no hã efee ekãa, ni fiofio lɛ eŋaaa nakai ŋamɔ lɛ dɔŋŋ. Sɛɛ mli lɛ, ewie akɛ: “Yehowa kwaaa mi kɔkɔɔkɔ.” c

14. Mɛni asafoŋ onukpai baanyɛ afee kɛwo mɛi ni nijiaŋ eje wui lɛ hewalɛ?

¹⁴ Yehowa kɛ Yesu kwaŋ wɔ kɔkɔɔkɔ. Be ni Petro kwa Yesu lɛ, ehe bahia ni ekpɛ yiŋ ko ni he hiaa waa, no ji: Ani ebaahã bɔ ni enuɔ he ehãa yɛ nɔ ni efee lɛ he lɛ aje enijiaŋ wui ni ekpa Yesu sɛɛnyiɛmɔ, aloo ebaaya nɔ enyiɛ esɛɛ? No mli lɛ, Yesu etsɔ hiɛ ekpa Yehowa fai ni eye ebua Petro koni ehemɔkɛyeli lɛ akatã. Yesu hã Petro le po akɛ, esɔle ehã lɛ, ni eyɛ nɔmimaa akɛ kɛ́ ehemɔkɛyeli lɛ mli wa lɛ, ebaawo enyɛmimɛi lɛ hewalɛ. (Luka 22:​31, 32) Ŋwanejee ko bɛ he akɛ, be ni Petro kai Yesu wiemɔi nɛɛ, ewo lɛ hewalɛ waa. Wɔ hu kɛ́ wɔnijiaŋ je wui lɛ, Yehowa baanyɛ etsɔ asafoŋ onukpai ni susuɔ mɔ he lɛ anɔ eshɛje wɔmii koni wɔya nɔ wɔye lɛ anɔkwa. (Efe. 4:​8, 11) Nyɛmi nuu ko ni atsɛɔ lɛ Paul ni esɔmɔ akɛ asafoŋ onukpa afii babaoo lɛ bɔɔ mɔdɛŋ yɛ enɛ he. Kɛ́ ekɛ mɛi ni nijiaŋ eje wui lɛ miigba sane lɛ, ewoɔ amɛ hewalɛ ni amɛkai bɔ ni fe ni Yehowa gbala amɛ kɛba anɔkwale lɛ mli. No sɛɛ lɛ, ehãa amɛleɔ akɛ, suɔmɔ ni tsakeee ni Yehowa yɔɔ kɛhã amɛ lɛ hewɔ lɛ, ekwaŋ amɛ kɔkɔɔkɔ. Ewie akɛ: “Mina mɛi pii ni kulɛ amɛnijiaŋ eje wui, shi Yehowa eye ebua amɛ ni amɛmiiya nɔ amɛmiisɔmɔ lɛ.”

15. Mɛɛ gbɛ nɔ Petro sane lɛ kɛ Horst niiashikpamɔ lɛ hãa wɔnaa akɛ nɔ ni awie yɛ Mateo 6:33 lɛ ji anɔkwale?

¹⁵ Bɔ ni Yehowa dro Petro kɛ bɔfoi krokomɛi lɛ amɛheloonaa hiamɔ nii lɛ, nakai  nɔŋŋ ebaadro wɔ hu wɔheloonaa hiamɔ nii kɛ́ wɔhã esɔɔmɔ lɛ he hiaa wɔ fe nɔ fɛɛ nɔ. (Mat. 6:33) Be ni awu Jeŋ Ta II lɛ agbe naa lɛ, Horst ni wɔtsĩ etã kɛtsɔ hiɛ lɛ susu he kɛji ebaanyɛ etsu gbɛgbamɔ nitsumɔ lɛ. Shi no mli lɛ, eeye ohia futaa, ni no hewɔ lɛ esusu akɛ enyɛŋ etsu gbɛgbamɔ nitsumɔ lɛ ni yɛ nakai beiaŋ nɔŋŋ lɛ ekwɛ ehe. Mɛni ebaafee? Ekpɛ eyiŋ akɛ ebaaka Yehowa ekwɛ. No hewɔ lɛ, be ni kpokpaa nɔkwɛlɔ lɛ basara amɛ lɛ, etee shiɛmɔ nakai otsi lɛ fɛɛ. Be ni kpokpaa nɔkwɛlɔ lɛ gbe esɔɔmɔ lɛ naa lɛ, ehã Horst ɛnvilop ko, shi etsɔɔɔ lɛ mɔ ni ŋɔɔ ni ejɛ. Be ni egbele ɛnvilop lɛ naa lɛ, naa shika pii ni ebaanyɛ ekɛkwɛ ehe nyɔji babaoo kɛ́ eetsu gbɛgbamɔ nitsumɔ lɛ. Horst na nikeenii nɛɛ akɛ okadi ko ni Yehowa kɛmiima nɔ mi eehã lɛ akɛ ebaakwɛ lɛ, ni kɛjɛ nakai beiaŋ kɛyaa lɛ, ehãaa nɔ ko nɔ ko he ahia lɛ fe Yehowa sɔɔmɔ.—Mal. 3:10.

16. Mɛni hewɔ esa akɛ wɔkase woji ni Petro ŋmala lɛ kɛ ewala shihilɛ he sane lɛ?

¹⁶ Ŋwanejee ko bɛ he akɛ, Petro ná miishɛɛ waa akɛ be ni ekɛɛ Yesu akɛ eje emasɛi lɛ Yesu efeee nakai. Kristo tee nɔ eye ebua Petro ni ebatsɔ bɔfo ni yeɔ anɔkwa ni Kristofoi fɛɛ baanyɛ akase lɛ. Nibii pii yɛ ni wɔ fɛɛ wɔbaanyɛ wɔkase yɛ bɔ ni Yesu tsɔse lɛ lɛ mli ni baanyɛ aye abua wɔ. Petro wie nibii nɛɛ ekomɛi kɛ nibii krokomɛi hu ni baanyɛ aye abua wɔ yɛ woji enyɔ ni Yehowa mumɔ lɛ tsirɛ lɛ ni eŋmala eyahã Kristofoi ni hi shi yɛ blema lɛ amli. Yɛ nikasemɔ ni nyiɛ sɛɛ mli lɛ, wɔbaasusu saji nɛɛ ekomɛi ahe ni wɔkwɛ bɔ ni wɔbaafee wɔkɛtsu nii ŋmɛnɛ.