1. Mɛɛ be awó Yehoash, Uzia, kɛ Yosia maŋtsɛ? Ni mɛni hewɔ enɛ baanyɛ afee nɔ ko ni wa waa kɛhã amɛ lɛ?

 TE OBAANU he ohã tɛŋŋ kɛ́ oji gbekɛ loo oblanyo ni awó bo Nyɔŋmɔ webii lɛ anɔ maŋtsɛ? Te okɛ hegbɛ ni ahã bo nɛɛ baatsu nii ohã tɛŋŋ? Biblia lɛ wieɔ oblahii babaoo ni batsɔmɔ Yuda maŋtsɛmɛi lɛ ahe. Akɛ nɔkwɛmɔnɔ lɛ, Yehoash batsɔ maŋtsɛ be ni eye afii 7 pɛ, Uzia batsɔ maŋtsɛ be ni eye afii 16, ni Yosia batsɔ maŋtsɛ be ni eye afii 8. Ekã shi faŋŋ akɛ, amɛnáaa enɛ mlɛo kwraa. Fɛɛ sɛɛ lɛ, Yehowa kɛ mɛi krokomɛi ye amɛbua amɛ ni amɛfee nibii kpakpai babaoo.

2. Mɛni hewɔ ehe miihia ni wɔkase Yehoash, Uzia, kɛ Yosia he sane lɛ?

² Jeee maŋtsɛmɛi loo maŋnyɛmɛi ji wɔ, shi wɔbaanyɛ wɔkase nibii babaoo kɛjɛ oblahii etɛ nɛɛ ahe sane lɛ mli. Amɛkpɛ yiŋ kpakpai, shi amɛkpɛ yiŋ gbohii hu. Amɛhe sane lɛ baahã wɔna akɛ, ehe miihia waa ni wɔhala nanemɛi kpakpai, wɔya nɔ wɔba wɔhe shi, ni wɔya nɔ wɔtao Yehowa sɛɛgbɛ.

3. Te Maŋtsɛ Yehoash fee enii ehã tɛŋŋ yɛ gbɛtsɔɔmɔi ni Osɔfonukpa Yehoiada kɛhã lɛ lɛ ahe?

³ Kasemɔ yiŋ kpakpai ni Yehoash kpɛ lɛ. Yehoash papa gbo be ni eji gbekɛ fioo. No hewɔ lɛ, Osɔfonukpa Yehoiada mɔ lɛ ni etsɔse lɛ tamɔ lɛ diɛŋtsɛ emusuŋ bi, ni etsɔɔ lɛ Yehowa he nii. Yehoash bo gbɛtsɔɔmɔi ni Yehoiada kɛhã lɛ lɛ toi, no hewɔ lɛ, ebatsɔ mɔ ko ni hiɛ kã shi waa. Enɛ hewɔ lɛ, Yehoash kpɛ eyiŋ akɛ ebaasɔmɔ Yehowa, ni eye ebua maŋbii lɛ ni amɛ hu amɛfee nakai. Eto gbɛjianɔ ni ehã asaa Yehowa sɔlemɔ shĩa lɛ po.—2 Kro. 24:​1, 2, 4, 13, 14.

4. Kɛ́ wɔsumɔɔ Yehowa mlai lɛ ni wɔboɔ toi lɛ, mɛɛ gbɛ nɔ wɔbaaná he sɛɛ? (Abɛi 2:​1, 10-12)

 ⁴ Kɛ́ ofɔlɔi loo mɔ kroko miitsɔɔ bo ni osumɔ Yehowa ni ohi shi yɛ eshishitoo mlai lɛ anaa lɛ, belɛ aahã bo nɔ ko ni jara wa waa. (Kanemɔ Abɛi 2:​1, 10-12.) Fɔlɔi baanyɛ atsɔ gbɛi srɔtoi anɔ amɛtsɔse amɛbii. Naa bɔ ni nyɛmi yoo ko ni atsɛɔ lɛ Katya lɛ papa ye ebua lɛ koni enyɛ ekpɛ yiŋ kpakpai. Daa gbi kɛ́ epapa kɛ lɛ miiya skul lɛ, epapa kɛ lɛ susuɔ daa gbi ŋmalɛ lɛ he. Katya wie akɛ: “Nibii ni ekɛ mi susu he nɛɛ ye ebua mi ni minyɛ mitsu shihilɛi srɔtoi ni mikɛkpe yɛ gbi lɛ mli lɛ ahe nii jogbaŋŋ.” Shi kɛ́ onuɔ he akɛ mlai ni ofɔlɔi edamɔ Biblia lɛ nɔ amɛwo bo lɛ hãaa ohe ajɔ bo hu? Mɛni baaye abua bo ni obo amɛgbɛtsɔɔmɔ lɛ toi? Nyɛmi yoo ko ni atsɛɔ lɛ Anastasia lɛ fɔlɔi he be ni amɛgbála nɔ hewɔ ni amɛwo mlai komɛi lɛ amli amɛtsɔɔ lɛ. Ewie akɛ: “Enɛ ye ebua mi ni mibo mlai ni amɛwo mi lɛ toi, ejaakɛ mina akɛ jeee ni amɛsumɔɔɔ ni maná miishɛɛ, shi moŋ amɛmiitao amɛbu mihe ejaakɛ amɛsumɔɔ mi.”

5. Kɛ́ okɛ gbɛtsɔɔmɔi ni ofɔlɔi kɛhãa bo lɛ tsu nii lɛ, te obaahã amɛ kɛ Yehowa anu he amɛhã tɛŋŋ? (Abɛi 22:6; 23:​15, 24, 25)

⁵ Kɛ́ obo gbɛtsɔɔmɔi ni ofɔlɔi damɔɔ Biblia lɛ nɔ amɛkɛhãa bo lɛ toi lɛ, obaahã amɛná miishɛɛ waa. Nɔ ni fe fɛɛ lɛ, obaahã Nyɔŋmɔ aná miishɛɛ, ni okɛ lɛ teŋ naanyobɔɔ lɛ mli baawa. (Kanemɔ Abɛi 22:6; 23:​15, 24, 25.) Enɛɛmɛi ji yiŋtoi kpakpai ahewɔ ni esa akɛ okase nɔkwɛmɔnɔ kpakpa ni Yehoash fee be ni edako lɛ.

6. Yɛ Yehoiada gbele sɛɛ lɛ, namɛi toi Yehoash bo? Ni mɛni jɛ mli kɛba? (2 Kronika 24:​17, 18)

⁶ Kasemɔ nii kɛjɛ yiŋ gbohii ni Yehoash kpɛ lɛ amli. Be ni Yehoiada gbo lɛ, Yehoash kɛ nanemɛi gbohii bɔi bɔɔ. (Kanemɔ 2 Kronika 24:​17, 18.) Ebo Yuda lumɛi ni sumɔɔɔ Yehowa lɛ toi. Kɛ́ okwɛ lɛ, ani esa akɛ Yehoash kɛ mɛi ni feɔ nibii gbohii tamɔ nɛkɛ abɔ? Dabi kwraa. (Abɛi 1:10) Shi amɛ moŋ amɛŋaawoi gbohii lɛ atoi ebo. Anɔkwa, be ni ewekunyo ko ni atsɛɔ lɛ Zakaria lɛ bɔ mɔdɛŋ akɛ ebaajaje lɛ lɛ, ehã agbe lɛ. (2 Kro. 24:​20, 21; Mat. 23:35) Nɔ ni efee lɛ ehiii kwraa! Yehoash je shishi jogbaŋŋ, shi dɔlɛ sane ji, sɛɛ mli lɛ ebatsɔ jamɔ kwalɔ kɛ gbɔmɔgbelɔ. Naagbee lɛ, lɛ diɛŋtsɛ etsuji gbe lɛ. (2 Kro. 24:​22-25) Eji etee nɔ ebo Yehowa kɛ mɛi ni sumɔɔ Yehowa toi kulɛ, eyagbeŋ naa nakai. Mɛni okaseɔ yɛ esane lɛ mli?

7. Namɛi esa akɛ okɛbɔ naanyo? (Kwɛmɔ mfoniri lɛ hu.)

⁷ Nɔ kome ni wɔkaseɔ kɛjɛɔ yiŋ gbonyo ni Yehoash kpɛ lɛ mli ji, esa akɛ wɔhala nanemɛi ni sumɔɔ Yehowa ni baaye abua wɔ ni wɔfee nibii ni baahã Yehowa aná miishɛɛ. Wɔbaanyɛ wɔkɛ mɛi ni wɔye amɛ onukpa kɛ mɛi ni ye wɔ onukpa fɛɛ abɔ naanyo. Kaimɔ akɛ, Yehoiada ye  Yehoash onukpa kwraa, shi ekɛ lɛ bɔ. No hewɔ lɛ, kwɛmɔ mɛi ni okɛbɔɔ naanyo lɛ, ni obi ohe akɛ: ‘Ani amɛyeɔ amɛbuaa mi koni hemɔkɛyeli ni miyɔɔ yɛ Yehowa mli lɛ mli awa? Ani amɛwoɔ mi hewalɛ ni mihi shi yɛ Yehowa shishitoo mlai lɛ anaa? Ani amɛfɔɔ Yehowa kɛ nibii ni amɛkaseɔ yɛ Biblia lɛ mli lɛ ahe wiemɔ? Ani amɛhiɔ shi yɛ Yehowa shishitoo mlai lɛ anaa? Kɛ́ miifee nɔ ko ni ejaaa lɛ, ani amɛnáa ekãa amɛkɛ mi wieɔ he, aloo amɛkɛɔ mi nɔ ni baaŋɔɔ mitoi naa kɛkɛ?’ (Abɛi 27:​5, 6, 17) Yɛ anɔkwale mli lɛ, kɛ́ mɛi ni okɛbɔɔ naanyo lɛ sumɔɔɔ Yehowa lɛ, esaaa akɛ okɛ amɛ bɔɔ. Shi kɛ́ amɛsumɔɔ Yehowa lɛ, yaa nɔ okɛ amɛ abɔ, ejaakɛ amɛbaaye amɛbua bo.—Abɛi 13:20.

8. Kɛ́ wɔkɛ social media tsuɔ nii lɛ, mɛɛ saji esa akɛ wɔbi wɔhe?

⁸ Ŋmɛnɛ lɛ, wɔnyɛɔ wɔtsɔɔ social media nɔ wɔkɛ wɔnanemɛi kɛ wɔwekumɛi gbaa sane. Shi esoro bɔ ni mɛi komɛi kɛ social media tsuɔ nii amɛhãa lɛ kwraa. Mɛi komɛi kɛ nibii ni amɛnyɛ amɛfee loo nibii ni amɛnyɛ amɛhé lɛ ahe mfonirii kɛ vidioi woɔ nɔ koni mɛi ana. Kɛ́ okɛ social media tsuɔ nii lɛ, bi ohe akɛ: ‘Ani miifee nakai koni mikɛgbala mɛi ajwɛŋmɔ kɛba minɔ? Ani oti ni ma mihiɛ ji, ni mikɛtswa mɛi mama shi, aloo ni mikɛhã mɛi ajie miyi? Ani bɔ ni mɛi feɔ amɛnii yɛ social media nɔ lɛ miiná bɔ ni misusuɔ nii ahe mihãa, miwiemɔ, kɛ minifeemɔ nɔ hewalɛ gbonyo?’ Nyɛminuu Nathan Knorr, ni sɔmɔ akɛ Gbɛtsɔɔmɔ Kuu lɛ mli nyo lɛ, wo ŋaa akɛ: “Kaabɔ mɔdɛŋ akɛ obaasa gbɔmɛi ahiɛ. Yɛ naagbee lɛ osaŋ mɔ ko mɔ ko hiɛ. Feemɔ nɔ ni sa Yehowa hiɛ, ni obaasa mɛi fɛɛ ni sumɔɔ Yehowa lɛ ahiɛ.”

9. Mɛni Yehowa ye ebua Uzia ni enyɛ efee? (2 Kronika 26:​1-5)

⁹ Kasemɔ yiŋ kpakpai ni Uzia kpɛ lɛ. Be ni Maŋtsɛ Uzia ji oblanyo lɛ, ebaa ehe shi. “Eshe anɔkwa Nyɔŋmɔ lɛ gbeyei.” Uzia hi shi afii 68 dani egbo. Yehowa jɔɔ lɛ yɛ afii nɛɛ babaoo amli. (Kanemɔ 2 Kronika 26:​1-5.) Uzia ye maji ni nyɛɔ Yehowa webii lɛ babaoo anɔ kunim, ni efee nibii kɛbu Yerusalem maŋ lɛ he waa. (2 Kro. 26:​6-15) Ekã shi faŋŋ akɛ, Uzia ná miishɛɛ waa yɛ nibii fɛɛ ni Yehowa ye ebua lɛ ni enyɛ efee lɛ ahewɔ.—Jaj. 3:​12, 13.

10. Te Uzia yagbe naa ehã tɛŋŋ?

¹⁰ Kasemɔ nii kɛjɛ yiŋ gbohii ni Uzia kpɛ lɛ amli. Akɛ maŋtsɛ lɛ, Uzia nyɛɔ ekɛɔ mɛi nɔ fɛɛ nɔ ni eesumɔ ni amɛfee lɛ, ni amɛfeɔ. Ani eeenyɛ efee akɛ, enɛ hewɔ lɛ eyasusu akɛ ebaanyɛ efee nɔ fɛɛ nɔ ni esumɔɔ? Gbi ko lɛ, Uzia tee Yehowa sɔlemɔ shĩa lɛ koni eyashã tsofa-kɛ-ŋma. Enɛ ni efee lɛ tsɔɔ akɛ, ewó ehe nɔ, ejaakɛ maŋtsɛmɛi bɛ hegbɛ ni amɛshãa tsofa-kɛ-ŋma yɛ afɔleshaa latɛ lɛ nɔ. (2 Kro. 26:​16-18) Osɔfonukpa Azaria bɔ mɔdɛŋ akɛ ebaasa enaa, shi Uzia mli fu lɛ waa. Enɛ ni Uzia fee lɛ hã efite gbɛ́i kpakpa ni eyɔɔ yɛ Yehowa hiɛ lɛ, ni Yehowa hã kpiti shwie lɛ. (2 Kro. 26:​19-21) Ŋwanejee ko bɛ he akɛ, eji etee nɔ eba ehe shi kulɛ, nɔ ko nɛkɛ baŋ enɔ!

11. Mɛɛ nibii kɛ́ wɔfee lɛ, no baatsɔɔ akɛ wɔbaa wɔhe shi? (Kwɛmɔ mfoniri lɛ hu.)

¹¹ Be ni nibii tee nɔ jogbaŋŋ ehã Uzia sɛɛ lɛ, ehiɛ je ehe nɔ akɛ Yehowa ji mɔ ni hã ená hewalɛ kɛ nibii kpakpai babaoo ni eyɔɔ lɛ. Mɛni wɔkaseɔ yɛ enɛ mli? Esa akɛ wɔkai be fɛɛ be akɛ, jɔɔmɔi kɛ nibii kpakpai fɛɛ ni wɔyɔɔ lɛ, Yehowa ni hã wɔná. Esaaa akɛ wɔkɛ nibii ni wɔnyɛɔ wɔfeɔ lɛ shwãa. Moŋ lɛ, esa akɛ wɔda Yehowa shi akɛ eye ebua wɔ ni wɔnyɛ wɔfee nibii nɛɛ fɛɛ. b (1 Kor. 4:7) Esa akɛ wɔyɔse akɛ wɔyeee emuu, ni enɛ hewɔ lɛ bei komɛi lɛ ehe baahia ni atsɔse wɔ. Nyɛmi nuu ko ni eye  aaafee afii 60 lɛ wie akɛ: “Nɔ ko ni mikase ji, kɛ́ mɔ ko tsɛ mitoi yisɛɛ yɛ nɔ ko ni miyafeee lɛ jogbaŋŋ lɛ he lɛ, esaaa akɛ mimli fuɔ loo minijiaŋ jeɔ wui. Kɛ́ atsɔse mi yɛ nibii komɛi ni miyajwɛŋŋ he jogbaŋŋ ni mifee lɛ ahe lɛ, mimɔɔ tsɔsemɔ lɛ mli, ni miyaa nɔ mikɛ minyɛmɔ fɛɛ sɔmɔɔ Yehowa.” Anɔkwa sane ji akɛ, kɛ́ wɔbo Yehowa toi ni wɔtee nɔ wɔba wɔhe shi lɛ, nibii baaya lɛ jogbaŋŋ ahã wɔ yɛ wɔshihilɛ mli.—Abɛi 22:4.

12. Be ni Yosia ji oblanyo lɛ, mɛɛ gbɛ nɔ etao Yehowa sɛɛgbɛ? (2 Kronika 34:​1-3)

¹² Kasemɔ yiŋ kpakpai ni Yosia kpɛ lɛ. Be ni Yosia bɔi Yehowa sɛɛgbɛ taomɔ lɛ, no mli lɛ eye afii 16 pɛ. Oti ni ekɛma ehiɛ ji, ebaakase Yehowa he nii ni efee esuɔmɔnaa nii. Shi oblanyo nɛɛ náaa nibii mlɛo be ni eyeɔ maŋtsɛ lɛ. No mli lɛ, emaŋbii lɛ babaoo jáa amale nyɔŋmɔi, no hewɔ lɛ, ehe bahia ni efee ekãa koni ehã amɛkpa. Ni nakai pɛpɛɛpɛ efee. Be ni eshwɛ fioo ni ebaaye afii 20 lɛ, ebɔi amale nyɔŋmɔi lɛ jiemɔ yɛ maŋ lɛ mli.—2 Kronika 34:​1-3.

13. Kɛ́ ojɔɔ ohe nɔ ohã Yehowa lɛ, te no baabi ni ohi shi ohã tɛŋŋ?

¹³ Kɛ́ odako po lɛ, obaanyɛ okpɛ oyiŋ akɛ obaakase Yehowa kɛ esui lɛ ahe nii, tamɔ Yosia fee lɛ. Enɛ baatsirɛ bo ni ojɔɔ ohe nɔ ohã lɛ. Kɛ́ ojɔɔ ohe nɔ ohã Yehowa lɛ, te no baabi ni ohi shi ohã tɛŋŋ? Be ni abaptisi oblanyo ko ni atsɛɔ lɛ Luke lɛ, no mli lɛ, eye afii 14. Gbi ni ejɔɔ ehe nɔ ehã Yehowa lɛ, ewie akɛ: “Kɛjɛ ŋmɛnɛ nɔ kɛyaa lɛ, mahã Yehowa sɔɔmɔ afee nɔ ni he hiaa mi yɛ mishihilɛ mli fe nɔ fɛɛ nɔ, ni mamia mihiɛ akɛ mahã Yehowa aná miishɛɛ.” (Mar. 12:30) Kɛ́ bo hu otswa ofai shi akɛ obaafee nakai lɛ, Yehowa baajɔɔ bo waa!

14. Mɛni oblahii kɛ oblayei komɛi efee ni tsɔɔ akɛ amɛmiikase Maŋtsɛ Yosia?

¹⁴ Kɛ́ oji oblanyo loo oblayoo ni miisɔmɔ Yehowa lɛ, mɛɛ naagbai okɛkpeɔ? Naa naagbai komɛi ni oblahii kɛ oblayei kɛkpɛɔ. Abaptisi oblanyo ko ni atsɛɔ lɛ Johan lɛ be ni eye afii 12. Naagba ni ekɛkpe ji akɛ, eklasbii lɛ nyɛ enɔ ni eshɛre zigareti he nɔ ko ni atsaagiɔ ni mɛi pii tsɛɔ lɛ vape loo shisha pɛn lɛ. Nɔ ni ye ebua Johan ni enyɛ edamɔ naagba nɛɛ naa ji, ekai akɛ kɛ́ eshɛre nɔ ko ni tamɔ nakai lɛ, ebaanyɛ ewo  lɛ hela, ni ebaafite ekɛ Yehowa teŋ. Nyɛmi yoo ko ni atsɛɔ lɛ Rachel ni abaptisi lɛ be ni eye afii 14 lɛ tsɔɔ nɔ ni yeɔ ebuaa lɛ ni enyɛɔ edamɔɔ shihilɛi ni ekɛkpeɔ yɛ skul lɛ anaa. Ewie akɛ: “Kɛ́ mikɛ shihilɛ ko kpe lɛ, mibɔɔ mɔdɛŋ akɛ makai nɔ ko yɛ Biblia lɛ mli ni kɔɔ nakai shihilɛ lɛ he. Akɛ nɔkwɛmɔnɔ lɛ, kɛ́ aatsɔɔ wɔ yinɔsaji ahe nii lɛ, mikɛ mijwɛŋmɔ yaa nɔ ko ni Biblia lɛ ewie loo gbalɛ ko ni kɔɔ nakai sane lɛ he lɛ nɔ. Aloo kɛ́ mikɛ mɔ ko miigba sane lɛ, mikwɛɔ akɛ mɛɛ ŋmalɛ manyɛ mikɛ lɛ agba he sane.” Ekolɛ esoro naagbai ni okɛkpeɔ lɛ yɛ Maŋtsɛ Yosia nɔ lɛ he moŋ, shi bo hu obaanyɛ otsɔɔ akɛ ohiɛ kã shi ni oyeɔ anɔkwa. Kɛ́ onyɛ odamɔ naagbai ni okɛkpeɔ yɛ oblahiiaŋ loo oblayeiaŋ lɛ anaa lɛ, no baaye abua bo ni onyɛ odamɔ naagbai ni okɛbaakpe wɔsɛɛ lɛ anaa.

15. Mɛni ye ebua Yosia ni esɔmɔ Yehowa jogbaŋŋ? (2 Kronika 34:​14, 18-21)

¹⁵ Be ni Maŋtsɛ Yosia ye afii 26 lɛ, ehã abɔi sɔlemɔ shĩa lɛ saamɔ. Be ni asaa lɛ, ana “Yehowa Mla wolo lɛ ni etsɔ Mose nine nɔ ekɛhã lɛ.” Be ni abɔi Mla wolo lɛ kanemɔ ni maŋtsɛ lɛ nu emli wiemɔi lɛ, oya nɔŋŋ ni efã akɛ afee nibii ni aŋmala yɛ mli lɛ. (Kanemɔ 2 Kronika 34:​14, 18-21.) Ani oosumɔ ni okane Biblia lɛ daa gbi? Kɛ́ oobɔ mɔdɛŋ ni ofee nakai lɛ, te eyaa lɛ tɛŋŋ? Ani ookadi ŋmalɛi ni baanyɛ aye abua bo? Luke, ni wɔtsĩ etã kɛtsɔ hiɛ lɛ, ŋmalaa ŋmalɛi kɛ nibii ni baanyɛ aye abua lɛ lɛ eshwieɔ shi. Kɛ́ bo hu ofee nakai lɛ, no baaye abua bo ni okai ŋmalɛi kɛ otii komɛi ni baanyɛ aye abua bo. Kɛ́ obale Biblia lɛ mli saji jogbaŋŋ, ni obasumɔ ekanemɔ lɛ, no baaye abua bo ni osɔmɔ Yehowa jogbaŋŋ. Ni agbɛnɛ hu, ebaatsirɛ bo ni ofee nɔ ni ja, tamɔ Maŋtsɛ Yosia fee lɛ.

16. Mɛni hã Yosia tɔ̃ tɔmɔ ko ni kɛ lɛ tee gbele mli? Ni mɛni wɔkaseɔ yɛ mli?

¹⁶ Kasemɔ nii kɛjɛ yiŋ gbonyo ni Yosia kpɛ lɛ mli. Be ni Yosia ye aaafee afii 39 lɛ, ekpɛ yiŋ gbonyo ko, ni no kɛ lɛ tee gbele mli. Efee nɔ ni lɛ esusuɔ akɛ no ja, moŋ fe ni ebaatao gbɛtsɔɔmɔ kɛjɛ Yehowa dɛŋ. (2 Kro. 35:​20-25) Mɛni  wɔkaseɔ yɛ enɛ mli? Ekɔɔɔ he eko afii ni wɔye loo afii abɔ ni wɔkɛkase Biblia lɛ, esa akɛ wɔya nɔ wɔtao Yehowa dɛŋ gbɛtsɔɔmɔ. Bɔ ni wɔbaafee wɔfee enɛ ji, ni wɔbaasɔle wɔbi Yehowa dɛŋ gbɛtsɔɔmɔ be fɛɛ be, wɔkase e-Wiemɔ lɛ, ni wɔbi ŋaawoo kɛjɛ mɛi ni kɛ Yehowa shishitoo mlai etsu nii afii abɔ ni amɛfeɔ nɔkwɛmɔnɔ kpakpa lɛ adɛŋ. Enɛ baaye abua wɔ ni wɔkatɔ̃ tɔmɔi ni yɔɔ hiɛdɔɔ, ni wɔná miishɛɛ yɛ shihilɛ mli.—Yak. 1:25.

17. Mɛni wɔkaseɔ yɛ Yuda maŋtsɛmɛi etɛ nɛɛ asane lɛ mli?

¹⁷ Oblahii kɛ oblayei, nibii kpakpai pii yɛ ni nyɛbaanyɛ nyɛfee yɛ shihilɛ mli. Yehoash, Uzia, kɛ Yosia sane lɛ hãa wɔnaa akɛ, nyɛbaanyɛ nyɛkpɛ yiŋ kpakpai ni nyɛfee nɔ ni Yehowa sumɔɔ. Shi tamɔ bɔ ni nikasemɔ nɛɛ ehã wɔna lɛ, sɛɛ mli lɛ maŋtsɛmɛi etɛ nɛɛ kpɛ yiŋ komɛi ni hã amɛná naagbai. Fɛɛ mli lɛ, nyɛbaanyɛ nyɛkase nibii kpakpai ni maŋtsɛmɛi nɛɛ fee lɛ ni nyɛkatɔ̃ tɔmɔi ni amɛtɔ̃ lɛ. Kɛ́ nyɛfee enɛ lɛ, nyɛbaanyɛ nyɛná miishɛɛ yɛ shihilɛ mli.

18. Namɛi hu awie amɛhe yɛ Biblia lɛ mli ni hãa onaa akɛ obaanyɛ oná miishɛɛ yɛ shihilɛ mli? (Kwɛmɔ mfoniri lɛ hu.)

¹⁸ Awie oblahii kɛ oblayei krokomɛi hu ni sumɔɔ Yehowa ni amɛná ehiɛ dromɔ ni amɛná miishɛɛ yɛ shihilɛ mli lɛ ahe yɛ Biblia lɛ mli. Amɛteŋ mɔ kome ji, David. David gbekɛbiiashi tɔ̃ɔ ni ehala akɛ ebaasɔmɔ Yehowa, ni sɛɛ mli lɛ, ebatsɔ maŋtsɛ kpakpa. Eyɛ mli akɛ lɛ hu etɔ̃ tɔmɔi komɛi moŋ, shi Yehowa ná ehe miishɛɛ. (1 Maŋ. 3:6; 9:​4, 5; 14:8) Kɛ́ okase David he nii ni ona bɔ ni eye Yehowa anɔkwa lɛ, no baatsirɛ bo ni bo hu ofee nakai nɔŋŋ. Kɛ́ oosumɔ hu lɛ, obaanyɛ okase Marko loo Timoteo he nii. Obaana akɛ amɛ hu amɛsɔmɔ Yehowa kɛjɛ amɛgbekɛbiiashi; Yehowa ná amɛhe miishɛɛ, ni amɛ hu amɛná miishɛɛ yɛ shihilɛ mli.

19. Mɛni baaye abua bo ni oná miishɛɛ yɛ oshihilɛ mli?

¹⁹ Nibii ni ofeɔ bianɛ lɛ ni baatsɔɔ bɔ ni nibii anaa baayakpa ahã bo wɔsɛɛ. Kɛ́ okɛ ohiɛ fɔ̃ Yehowa nɔ shi jeee bo diɛŋtsɛ osusumɔi anɔ lɛ, no baaye abua bo ni okpɛ yiŋ kpakpai yɛ shihilɛ mli. (Abɛi 20:24) Obaaná miishɛɛ, ni otsui baanyɔ omli. Kaahã ohiɛ kpa nɔ kɔkɔɔkɔ akɛ, Yehowa hiɛ sɔɔ nɔ ni otsuɔ yɛ esɔɔmɔ lɛ mli lɛ waa. Nɔ ko nɔ ko bɛ ni hi fe ni wɔkɛ wɔwala baasɔmɔ wɔ-Tsɛ ni yɔɔ ŋwɛi ni sumɔɔ wɔ lɛ!