1-2. Mɛni hewɔ ehi akɛ wɔbaakase Samson he sane ni yɔɔ Biblia lɛ mli lɛ?

 MƐNI okaiɔ yɛ mɔ ni atsɛɔ lɛ Samson yɛ Biblia lɛ mli lɛ he? Ekolɛ nɔ ni okaiɔ waa ji, bɔ ni ehe wa waa lɛ. Ni lɛɛlɛŋ, ehe wa waa. Shi wɔle hu akɛ, Samson kpɛ yiŋ gbonyo ko ni hã ená naagbai babaoo. Fɛɛ sɛɛ lɛ, Yehowa kɛ ejwɛŋmɔ ma nibii kpakpai ni Samson fee yɛ esɔɔmɔ lɛ mli lɛ anɔ, ni ehã aŋmala nibii nɛɛ ashwie shi yɛ Biblia lɛ mli koni wɔkase nii yɛ mli.

² Yehowa kɛ Samson tsu nibii wuji kɛye ebua Nyɔŋmɔ webii lɛ, ni ji, Israelbii lɛ. Samson gbele sɛɛ afii pii lɛ, Yehowa kɛ emumɔ lɛ tsirɛ bɔfo Paulo ni etsĩ Samson gbɛ́i tã be ni etsĩɔ hii kɛ yei ni yɔɔ hemɔkɛyeli waa lɛ atã lɛ. (Heb. 11:​32-34) Samson he sane ni yɔɔ Biblia lɛ mli lɛ baanyɛ awo wɔ hewalɛ waa. Ekɛ ehiɛ fɔ̃ Yehowa nɔ yɛ shihilɛi ni mli wawai po amli. Yɛ nikasemɔ nɛɛ mli lɛ, wɔbaakwɛ nɔ ni wɔbaanyɛ wɔkase yɛ Samson sane lɛ mli kɛ bɔ ni ehe sane lɛ baanyɛ awo wɔ hewalɛ.

3. Mɛɛ nitsumɔ Yehowa kɛwo Samson dɛŋ?

³ Be ni afɔ Samson lɛ, no mli lɛ, Filistibii lɛ ni yeɔ Israel maŋ lɛ nɔ, ni amɛhãaa Israelbii lɛ ahe ajɔ amɛ kwraa. (Koj. 13:1) Akɛni Filistibii lɛ ayitsoŋ wa hewɔ lɛ, Israelbii lɛ piŋ  waa. Yehowa hala Samson akɛ ‘enyiɛ hiɛ kɛhere Israelbii lɛ kɛje Filistibii lɛ adɛŋ.’ (Koj. 13:5) Nitsumɔ nɛɛ jeee nitsumɔ bibioo! Ehe bahia ni Samson kɛ ehiɛ afɔ̃ Yehowa nɔ koni enyɛ etsu nitsumɔ ni wa nɛɛ.

4. Mɛɛ gbɛ nɔ Yehowa ye ebua Samson ni ehere ehe kɛje Filistibii lɛ adɛŋ? (Kojolɔi 15:​14-16)

⁴ Naa sane ko ni ba ni tsɔɔ akɛ Samson kɛ ehiɛ fɔ̃ Yehowa nɔ ni Yehowa ye ebua lɛ. Be ko lɛ, Filistibii lɛ asraafoi komɛi ba Lehi, ni eeenyɛ efee akɛ eyɔɔ Yuda kpokpaa lɛ nɔ lɛ, koni amɛbamɔ Samson. No mli lɛ, Yuda hii lɛ miishe gbeyei, no hewɔ lɛ, amɛkpɛ amɛyiŋ akɛ amɛbaamɔ Samson ni amɛkɛ lɛ ahã Filistibii lɛ. Amɛfĩmɔ lɛ kɛ kpãi hei enyɔ ni amɛkɛ lɛ yahã Filistibii lɛ. (Koj. 15:​9-13) Shi ‘Yehowa mumɔ lɛ ba Samson nɔ’ ni etserɛ kpãi lɛ yɛ eniji ahe. “Ena tejinuu ko ni gbo etsɛko kadaa wu,” ni ekɔ ni ekɛgbe Filisti hii 1,000!—Kanemɔ Kojolɔi 15:​14-16.

5. Mɛɛ gbɛ nɔ teji kadaa wu ni Samson kɛtsu nii lɛ hãa wɔnaa akɛ ekɛ ehiɛ fɔ̃ Yehowa nɔ?

⁵ Wɔle akɛ, akɛ teji kadaa wu eyaaa ta. No hewɔ lɛ, mɛni hewɔ Samson kɛ teji kadaa wu ni tsu nii lɛ? Ekã shi faŋŋ akɛ, Samson le akɛ, Yehowa baaye ebua lɛ ni eye kunim ekɔɔɔ he eko nɔ ni ehiɛ kɛwuɔ ta lɛ. Samson kɛ nɔ ni enine shɛ nɔ lɛ tsu nɔ ni Yehowa taoɔ ni etsu lɛ. Ehiɛ ni ekɛfɔ̃ Yehowa nɔ lɛ hewɔ lɛ, Yehowa hã eye kunim.

6. Kɛ́ akɛ nitsumɔ ko wo wɔdɛŋ yɛ asafo lɛ mli lɛ, mɛɛ gbɛ nɔ Samson sane lɛ baanyɛ aye abua wɔ?

⁶ Yehowa baaye ebua wɔ hu ni wɔtsu nitsumɔ fɛɛ nitsumɔ ni ekɛbaawo wɔdɛŋ lɛ, kɛ́ wɔnuɔ he akɛ nitsumɔ lɛ da fe wɔ po. Ni bei komɛi po lɛ, gbɛ ni ebaatsɔ nɔ efee nakai lɛ baahã wɔnaa akpɛ wɔhe. Hemɔ oye akɛ, Yehowa, mɔ ni ye ebua Samson lɛ, baaye ebua bo ni otsu nitsumɔ ni ekɛwo odɛŋ lɛ kɛ́ okɛ ohiɛ fɔ̃ enɔ kɛhã yelikɛbuamɔ.—Abɛi 16:3.

7. Gbaa nɔkwɛmɔnɔ ko ni tsɔɔ akɛ ehe miihia waa ni wɔtao Yehowa dɛŋ gbɛtsɔɔmɔ.

⁷ Nyɛmimɛi ni yeɔ amɛbuaa kɛmamɔɔ asafo lɛ tsũi lɛ ateŋ mɛi babaoo etsɔɔ akɛ, amɛkɛ amɛhiɛ fɔ̃ɔ Yehowa nɔ. Be ko ni eho lɛ, Maŋtsɛyeli Asai hei kɛ Teokrase tsũi  krokomɛi pii yɛ ni wɔnyɛmimɛi lɛ ekomɛi nɔŋŋ ni tɛŋɔ ni amɛmamɔɔ. Shi ebashɛ he ko ni bɔ ni mɛi baa asafo lɛ mli oyayaayai lɛ hewɔ lɛ, ehe bahia ni afee tsakemɔi yɛ gbɛjianɔtoo nɛɛ mli. Nyɛmimɛi ni kwɛɔ nitsumɔ lɛ nɔ lɛ sɔle amɛbi Yehowa ni etsɔɔ amɛ gbɛ, ni amɛka gbɛi hei komɛi amɛkwɛ. Gbɛi nɛɛ ekome ji, ni amɛbaahé tsũi ni amɛtsake nibii yɛ he koni amɛkɛtsu nɔ ni amɛtaoɔ amɛkɛtsu lɛ. Nyɛmi nuu ko ni atsɛɔ lɛ Robert ni nyɛsɛɛ nɛɛ eye ebua kɛmamɔ asafo lɛ tsũi babaoo yɛ je lɛŋ hei srɔtoi lɛ wie akɛ: “Be ni akɛ gbɛ hee nɛɛ bɔi nitsumɔ lɛ, nyɛmimɛi lɛ ekomɛi eyanyaaa he.” Ewie kɛfata he akɛ: “Esoro enɛ kwraa yɛ nɔ ni nyɛmimɛi lɛ le lɛ he. Shi nyɛmimɛi lɛ kɛ gbɛ hee lɛ bɔi nitsumɔ, ni amrɔ nɛɛ, aana faŋŋ akɛ Yehowa ejɔɔ tsakemɔ nɛɛ nɔ.” Enɛ fata nɔkwɛmɔnii ni tsɔɔ akɛ Yehowa miitsɔɔ ewebii lɛ gbɛ koni amɛfee esuɔmɔnaa nii lɛ ahe. No hewɔ lɛ, yɛ be kɛ beiaŋ lɛ, esa akɛ wɔbi wɔhe akɛ, ‘Ani mitaoɔ Yehowa dɛŋ gbɛtsɔɔmɔ yɛ misɔɔmɔ lɛ mli? Ni ani mimɔɔ tsakemɔi ni Yehowa asafo lɛ kɛbaa lɛ amli koni manyɛ masɔmɔ lɛ jogbaŋŋ?’

8. Be ko be ni kumai ye Samson waa lɛ, mɛni efee?

⁸ Ekolɛ okaiɔ nibii krokomɛi ni yɔɔ naakpɛɛ ni Samson fee. Akɛ nɔkwɛmɔnɔ lɛ, ekome egbe jata, ni sɛɛ mli lɛ, egbe hii 30 yɛ Filistibii amaŋ ni ji Ashkelon lɛ mli. (Koj. 14:​5, 6, 19) Samson le akɛ, Yehowa ni ye ebua lɛ ni enyɛ efee nibii nɛɛ. Nɔ ko ni ba be ko be ni egbe Filistibii 1,000 ni no sɛɛ lɛ kumai ye lɛ waa lɛ hãa wɔnaa enɛ faŋŋ. Mɛni efee? Yɛ nɔ najiaŋ ni lɛ diɛŋtsɛ ebaayatao nu enu lɛ, ebo etsɛ Yehowa ni eye ebua lɛ.—Koj. 15:18.

9. Be ni Samson bo etsɛ Yehowa lɛ, mɛni Yehowa fee? (Kojolɔi 15:19)

⁹ Yehowa bo Samson toi ni etsɔ naakpɛɛ gbɛ nɔ ehã nu ko tue ehã lɛ. Be ni Samson nu nu lɛ, “ená hewalɛ ekoŋŋ ni ehiɛ tserɛ lɛ.” (Kanemɔ Kojolɔi 15:19.) Eeenyɛ efee akɛ, afii komɛi asɛɛ be ni Yehowa tsɔ emumɔ lɛ nɔ ehã gbalɔ Samuel ŋma Kojolɔi awolo lɛ, no mli lɛ nuhiŋmɛi nɛɛ yɛ. Ekolɛ, be fɛɛ be ni Israelbii lɛ baana nuhiŋmɛi nɛɛ, ehãa amɛkaiɔ akɛ, kɛ́ amɛyaje fimɔ ko mli ni amɛkɛ amɛhiɛ fɔ̃ Yehowa nɔ lɛ, ebaaye ebua amɛ.

10. Mɛni kɛ́ wɔfee lɛ, no baahã Yehowa aye ebua wɔ? (Kwɛmɔ mfoniri lɛ hu.)

¹⁰ Ekɔɔɔ he eko nyɛmɔi loo hesai ni wɔyɔɔ loo nɔ ni wɔnyɛ wɔtsu yɛ Yehowa sɔɔmɔ lɛ mli lɛ, esa akɛ wɔkɛ wɔhiɛ afɔ̃ Yehowa nɔ kɛhã yelikɛbuamɔ. Esa akɛ wɔba wɔhe shi ni wɔhã ehi wɔjwɛŋmɔ mli akɛ, ja Yehowa eye ebua wɔ dani wɔbaaye omanye yɛ nɔ fɛɛ nɔ ni wɔtsuɔ yɛ esɔɔmɔ lɛ mli lɛ mli. Bɔ ni nu ni Yehowa hã Samson lɛ hã ená hewalɛ lɛ, nakai nɔŋŋ wɔ hu kɛ́ wɔkɛ nibii ni Yehowa edro wɔ lɛ fɛɛ tsu nii lɛ, ebaaye ebua wɔ ni wɔya nɔ wɔye lɛ anɔkwa.—Mat. 11:28.

11. Mɛɛ nibii esa akɛ wɔfee koni no ahã Yehowa aye ebua wɔ? Gbaa niiashikpamɔ ko ni tsɔɔ nakai.

¹¹ Naa nɔkwɛmɔnɔ ko ni tsɔɔ nakai. Aawa nyɛmi nuu ko ni yɔɔ Russia ni atsɛɔ lɛ Aleksey yi waa. Mɛni eye ebua lɛ yɛ shihilɛ ni mli wa waa nɛɛ mli? Ekɛ eŋa eto gbɛjianɔ ni amɛkaseɔ Biblia lɛ daa gbi. Ewie akɛ: “Mimiaa mihiɛ akɛ mafee aŋkro nikasemɔ ni makane Biblia lɛ daa. Daa leebi lɛ, mikɛ miŋa feɔ daa gbi ŋmalɛ lɛ ni wɔfeɔ ekome kɛsɔleɔ.” Mɛni wɔkaseɔ yɛ esane lɛ mli? Esa akɛ wɔkɛ wɔhiɛ afɔ̃ Yehowa nɔ, moŋ fe ni wɔkɛ wɔhiɛ baafɔ̃ wɔ diɛŋtsɛ wɔhe nɔ. Te wɔbaafee tɛŋŋ wɔfee enɛ? Esa akɛ wɔfee nibii  ni baahã wɔhemɔkɛyeli lɛ mli awa. Nibii nɛɛ ekomɛi ji, ni wɔkase Biblia lɛ, wɔsɔle, wɔya asafoŋ kpeei, ni wɔkɛ wɔhe awo shiɛmɔ nitsumɔ lɛ mli hu. Kɛ́ wɔfee nibii nɛɛ, Yehowa baaye ebua wɔ ni wɔya nɔ wɔsɔmɔ lɛ. Bɔ ni ehã Samson ná hewalɛ lɛ, nakai nɔŋŋ ebaahã wɔ hu wɔná hewalɛ.

12. Mɛɛ yiŋ gbonyo Samson kpɛ? Ni mɛɛ gbɛ nɔ esoro shihilɛi enyɔ ni tsɔ hiɛ lɛ yɛ Delila nɔ lɛ he?

¹² Samson yeee emuu tamɔ bɔ ni wɔ hu wɔyeee emuu lɛ. Enɛ hewɔ lɛ, ekpɛ yiŋ komɛi ni ejaaa. Yiŋ ko ni ekpɛ lɛ hã ekɛ naagbai pii kpe. Be ni Samson esɔmɔ akɛ kojolɔ be saŋŋ lɛ, “eyasumɔ yoo ko ni atsɛɔ lɛ Delila ni yɔɔ Sorek Jɔɔ lɛ mli lɛ.” (Koj. 16:4) Dani yoo nɛɛ sane lɛ baaba lɛ, no mli lɛ, Samson kɛ Filisti yoo ko yaahi shi. Yehowa ni fã lɛ akɛ efee nakai bɔ ni afee ni enyɛ ená “Filistibii lɛ ahe gbɛ.” Agbɛnɛ hu, be ko lɛ, Samson tee yoo ashawo ko shĩa yɛ Filistibii amaŋ ni ji Gaza lɛ mli. Enɛ hã Samson ná hegbɛ efã nakai maŋ lɛ agbo lɛ naa shinai lɛ yɛ Yehowa yelikɛbuamɔ naa, ni no hã maŋ lɛ naa bakã. (Koj. 14:​1-4; 16:​1-3) Shi esoro Delila sane lɛ kwraa ejaakɛ eeenyɛ efee akɛ Delila lɛ Israelnyo ni. No hewɔ lɛ, jeee hegbɛ ko ni Samson baaná ni ekɛwu eshi Filistibii lɛ hewɔ etaoɔ ekɛ Delila ahi shi lɛ. Yiŋ nɛɛ ni ekpɛ lɛ kɛ nitsumɔ ni Yehowa kɛwo edɛŋ lɛ eyaaa.

13. Mɛni Delila fee Samson?

¹³ Delila kpɛlɛ nɔ akɛ ebaajie Samson ehã Filistibii lɛ koni amɛhã lɛ shika wulu ko. Eeenyɛ efee akɛ, suɔmɔ ni Samson sumɔɔ Delila sɔŋŋ hewɔ lɛ, eyɔseee akɛ Delila miitao ejie lɛ ehã. Delila gba Samson naa aahu kɛyashi Samson tsɔɔ lɛ nɔ hewɔ ni ehe wa  waa nakai lɛ. Dɔlɛ sane ji, enɛ ni Samson fee lɛ hã ehewalɛ lɛ je emli ni Yehowa mli fu lɛ be fioo.—Koj. 16:​16-20.

14. Mɛɛ amane Samson na akɛni eŋmɛ gbɛ ni Delila laka lɛ lɛ hewɔ?

¹⁴ Samson shwe akɛ ebu wekukpaa ni yɔɔ ekɛ Delila teŋ lɛ he moŋ fe wekukpaa ni yɔɔ ekɛ Yehowa teŋ lɛ he, ni enɛ hã ena nɔ waa. Filistibii lɛ mɔ Samson ni amɛfamɔ ehiŋmɛii, kɛkɛ ni amɛyawo lɛ tsuŋ yɛ Gaza, ni ji maŋ lɛ ni efã egbo lɛ naa shinai lɛ, ni amɛhã etsɔ nyɔŋ ni gbɛlɛɔ nii. Kɛkɛ ni amɛshwie ehiɛ shi yɛ gbi jurɔ ko ni amɛye lɛ shishi. Amɛshã afɔle kpele amɛhã amɛnyɔŋmɔ ni atsɛɔ lɛ Dagon lɛ, ejaakɛ amɛsusu akɛ lɛ ehã amɛnine shɛ Samson nɔ. Amɛhã akɛ Samson jɛ tsuŋwoohe lɛ kɛba ‘koni amɛŋmɔ lɛ.’—Koj. 16:​21-25.

15. Mɛni Samson fee kɛtsɔɔ akɛ ekɛ ehiɛ fɔ̃ɔ Yehowa nɔ lolo? (Kojolɔi 16:​28-30) (Kwɛmɔ mfoniri ni yɔɔ wolo lɛ hiɛ lɛ.)

¹⁵ Eyɛ mli akɛ Samson etɔ̃ tɔmɔ ni yɔɔ hiɛdɔɔ moŋ, shi enijiaŋ ejeee wui. Yɛ nakai shihilɛ lɛ mli po lɛ, etao hegbɛ ni ekɛtsu nitsumɔ ni Yehowa kɛwo edɛŋ akɛ ewu eshi Filistibii lɛ. (Kanemɔ Kojolɔi 16:​28-30.) Samson kpa Yehowa fai ni ehã ‘etɔ ehe owele yɛ Filistibii lɛ anɔ.’ Yehowa hã Samson sɔlemɔ lɛ hetoo ni ehã ená hewalɛ kpele ekoŋŋ ni egbe Filistibii lɛ. Filistibii abɔ ni Samson gbe nakai gbi lɛ fa fe Filistibii ni egbe be fɛɛ ni eho.

16. Mɛni wɔkaseɔ yɛ tɔ̃ ni Samson tɔ̃ lɛ mli?

¹⁶ Eyɛ mli akɛ tɔ̃ ni Samson tɔ̃ lɛ hã epiŋ waa moŋ, shi enijiaŋ ejeee wui. Emia ehiɛ efee nɔ ni Yehowa sumɔɔ. Kɛ́ wɔtɔ̃ ni ajaje wɔ loo sɔɔmɔ hegbɛ ko ŋmɛɛ wɔ lɛ, esaaa akɛ wɔnijiaŋ jeɔ wui. Esa akɛ wɔya nɔ wɔmia wɔhiɛ wɔfee Yehowa suɔmɔnaa nii. Esa akɛ wɔhã ehi wɔjwɛŋmɔ mli akɛ, Yehowa efee klalo akɛ ekɛ wɔhe eshai baake wɔ. (Lala 103:​8-10) No hewɔ lɛ kɛ́ wɔtɔ̃ po lɛ, Yehowa baanyɛ eya nɔ ekɛ wɔ atsu nii tamɔ ekɛ Samson tsu nii lɛ.

17-18. Mɛɛ gbɛ nɔ Michael sane lɛ woɔ bo hewalɛ? (Kwɛmɔ mfoniri lɛ hu.)

¹⁷ Naa nyɛmi nuu oblanyo ko ni atsɛɔ lɛ Michael lɛ niiashikpamɔ. No mli lɛ, eji asafoŋ sɔɔlɔ kɛ daa gbɛgbalɔ ni hiɛ dɔɔ waa yɛ Yehowa sɔɔmɔ lɛ mli. Shi dɔlɛ sane ji akɛ etɔ̃, ni enɛ hã sɔɔmɔ hegbɛi ni eyɔɔ yɛ asafo lɛ mli lɛ ŋmɛɛ lɛ. Ewie akɛ: “No mli lɛ, nɔ fɛɛ nɔ miiya lɛ jogbaŋŋ eehã mi yɛ Yehowa sɔɔmɔ lɛ mli. Shi nɔŋŋ kɛkɛ ni efee tamɔ nɔ ni  mikɛ mihiɛ eyashi. Mile akɛ Yehowa kwaŋ mi kɔkɔɔkɔ, shi mibi mihe akɛ, ‘Ani mi kɛ Yehowa teŋ wekukpaa lɛ mli baawa tamɔ bɔ ni eyɔɔ tsutsu lɛ? Ani manyɛ matsu babaoo yɛ esɔɔmɔ lɛ mli tamɔ bɔ ni mifeɔ tsutsu lɛ?’”

¹⁸ Miishɛɛ sane ji, Michael nijiaŋ ejeee wui. Ewie akɛ: “Mimia mihiɛ waa mifee nibii ni baahã mi kɛ Yehowa teŋ wekukpaa lɛ mli awa. Misɔle daa, mikase nii, ni mijwɛŋ nii anɔ.” Sɛɛ mli lɛ, Michael ná sɔɔmɔ hegbɛi ekoŋŋ yɛ asafo lɛ mli. Bianɛ lɛ, eesɔmɔ akɛ asafoŋ onukpa kɛ daa gbɛgbalɔ. Ewie akɛ: “Nyɛmimɛi lɛ ye amɛbua mi ni amɛwo mi hewalɛ, titri lɛ, asafoŋ onukpai lɛ, ni amɛhã mina akɛ Yehowa sumɔɔ mi lolo. Amrɔ nɛɛ miisɔmɔ Yehowa, ni mihenilee gbaaa minaa. Shihilɛ nɛɛ ni mitsɔ mli lɛ ehã mina akɛ, kɛ́ mɔ ko fee esha ni etsake etsui lɛ, Yehowa kɛbaake lɛ.” Kɛ́ wɔ hu wɔtɔ̃ ni wɔtsake wɔtsui ni wɔtee nɔ wɔkɛ wɔhiɛ fɔ̃ Yehowa nɔ lɛ, ebaaya nɔ ekɛ wɔ atsu nii, ni ebaajɔɔ wɔ.—Lala 86:5; Abɛi 28:13.

19. Mɛɛ gbɛ nɔ Samson sane lɛ ewo bo hewalɛ?

¹⁹ Yɛ nikasemɔ nɛɛ mli lɛ, wɔsusu nibii ni tee nɔ yɛ Samson shihilɛ mli lɛ fioo ahe. Eyeee emuu, shi be ni etɔ̃ po lɛ, enijiaŋ ejeee wui. Etee nɔ emia ehiɛ akɛ ebaafee Yehowa suɔmɔnaa nii. Yehowa hu kwaaa lɛ, etee nɔ ekɛ lɛ tsu nii. Ehã akɛ egbɛ́i fata hii kɛ yei anɔkwafoi ni atsĩ amɛtã yɛ Hebribii yitso 11 lɛ mli lɛ ahe, ejaakɛ ena lɛ akɛ mɔ ko ni hemɔkɛyeli mli wa. Samson sane lɛ hãa wɔnaa akɛ, Yehowa, wɔ-Tsɛ ni yɔɔ ŋwɛi lɛ, sumɔɔ wɔ, ni eesumɔ ni ewaje wɔ, titri lɛ, kɛ́ wɔgbɔjɔ. No hewɔ lɛ, tamɔ bɔ ni Samson fee lɛ, nyɛhãa wɔ hu wɔkpaa Yehowa fai akɛ: “Ofainɛ, kaimɔ mi, ni ohã mi hewalɛ.”—Koj. 16:28.