1. Mɛni etsɛŋ Yesu baafee?

 NIBII ni sa kadimɔ waa baaya nɔ yɛ wɔbei nɛɛ amli! Etsɛŋ, Yesu baakojo mɛi fɛɛ ni yɔɔ shikpɔŋ lɛ nɔ. Yesu hã wɔle nibii ni baaya nɔ yɛ je lɛ mli be ni eshwɛ fioo ni kojomɔ be nɛɛ baashɛ. Ehã ekaselɔi lɛ le akɛ, nibii nɛɛ baafee ‘be ni eba lɛ’ kɛ “je lɛ naagbee gbii lɛ” he “okadi.” (Mat. 24:3) Abɔ nibii ni Yesu wie akɛ ebaaba lɛ ahe amaniɛ yɛ Mateo yitso 24 kɛ 25, Marko yitso 13, kɛ Luka yitso 21.

2. Mɛni he wɔbaasusu yɛ nikasemɔ nɛɛ mli? Ni mɛɛ gbɛ nɔ enɛ baaye abua wɔ?

² Yesu tsɔ nɔkwɛmɔnii etɛ komɛi anɔ eye ebua wɔ koni wɔna nibii ni wɔbaanyɛ wɔfee kɛsaa wɔhe wɔto be ni ebaaba ebakojo lɛ. Nɔkwɛmɔnii nɛɛ ji, gwantɛŋi lɛ kɛ abotiai lɛ ahe nɔkwɛmɔnɔ lɛ, oblayei froi ni hiɛ kã shi kɛ oblayei froi kwashiai lɛ ahe nɔkwɛmɔnɔ lɛ, kɛ talɛntai lɛ ahe nɔkwɛmɔnɔ lɛ. Nɔkwɛmɔnii nɛɛ ji kɔkɔbɔɔ kɛhã wɔ, ni amɛhãa wɔnaa akɛ, wɔnifeemɔi anɔ Yesu baadamɔ ekojo wɔ. Yɛ nikasemɔ nɛɛ mli lɛ, wɔbaasusu nɔkwɛmɔnii nɛɛ ahe ni wɔkwɛ akɛ mɛni wɔbaanyɛ wɔkase yɛ eko fɛɛ eko mli. Hã wɔje shishi kɛ gwantɛŋi lɛ kɛ abotiai lɛ ahe nɔkwɛmɔnɔ lɛ.

GWANTƐŊI LƐ KƐ ABOTIAI LƐ

3. Mɛɛ be Yesu baakojo mɛi?

³ Yɛ gwantɛŋi lɛ kɛ abotiai lɛ ahe nɔkwɛmɔnɔ lɛ mli lɛ, Yesu hã efee faŋŋ akɛ, ebaadamɔ bɔ ni mɛi baafee amɛnii amɛhã yɛ sane kpakpa lɛ kɛ enyɛmimɛi ni afɔ amɛ mu lɛ ahe lɛ nɔ ekojo amɛ. (Mat. 25:​31-46) Ebaakojo mɛi nɛɛ yɛ “amanehulu kpeteŋkpele” lɛ mli, be ni eshwɛ fioo ni ebaawu Harmagedon ta  lɛ. (Mat. 24:21) Bɔ ni tookwɛlɔ tseɔ gwantɛŋi kɛjeɔ abotiai ahe lɛ, nakai nɔŋŋ Yesu baatse mɛi ni yeɔ amɛbuaa esɛɛnyiɛlɔi ni afɔ amɛ mu lɛ kɛje mɛi ni efeee nakai lɛ ahe.

4. Yɛ nɔ ni awie yɛ Yesaia 11:​3, 4 lɛ naa lɛ, mɛni hewɔ wɔbaanyɛ wɔhe wɔye akɛ Yesu baakojo mɛi yɛ jalɛ naa? (Kwɛmɔ mfoniri lɛ hu.)

⁴ Biblia lɛ hãa wɔnaa akɛ, Yesu ji mɔ ni Yehowa ehala akɛ ekojo, ni ebaakojo yɛ jalɛ naa. (Kanemɔ Yesaia 11:​3, 4.) Yesu kwɛɔ bɔ ni mɛi feɔ amɛnii amɛhãa, nibii ni amɛsusuɔ he, nibii ni amɛwieɔ, kɛ agbɛnɛ hu, bɔ ni amɛkɛ enyɛmimɛi ni afɔ amɛ mu lɛ yeɔ ehãa lɛ, ni no nɔ ebaadamɔ ekojo amɛ. (Mat. 12:​36, 37; 25:40) Bɔ fɛɛ bɔ ni fee lɛ, Yesu baana mɛi ni ye amɛbua enyɛmimɛi ni afɔ amɛ mu lɛ ni amɛwa amɛ kɛtsu nitsumɔ ni akɛwo amɛdɛŋ lɛ. a Nɔ kome ni he hiaa waa ni mɛi ni feɔ amɛnii tamɔ gwantɛŋi lɛ tsuɔ kɛyeɔ amɛbuaa Kristo nyɛmimɛi ni afɔ amɛ mu lɛ ji, shiɛmɔ nitsumɔ lɛ. Yɛ kojomɔ lɛ mli lɛ, Yesu baabu mɛi ni yeɔ amɛbuaa enyɛmimɛi lɛ akɛ “jalɔi,” ni amɛbaaná hiɛnɔkamɔ akɛ amɛbaahi shi kɛya “naanɔ” yɛ shikpɔŋ lɛ nɔ. (Mat. 25:46; Kpo. 7:​16, 17) Jweremɔnɔ nɛɛ nɔ bɛ kwraa! Kɛ́ amɛtee nɔ amɛye anɔkwa yɛ amanehulu kpeteŋkpele lɛ mli kɛ no sɛɛ lɛ, agbeŋ amɛgbɛ́i yɛ “wala wolo lɛ mli.”—Kpo. 20:15.

5. Mɛni wɔkaseɔ yɛ nɔkwɛmɔnɔ ni kɔɔ gwantɛŋi lɛ kɛ abotiai lɛ ahe lɛ mli? Ni namɛi baanyɛ aná nakai nɔkwɛmɔnɔ lɛ he sɛɛ?

⁵ Ye anɔkwa. Yesu nɔkwɛmɔnɔ ni kɔɔ gwantɛŋi lɛ kɛ abotiai lɛ ahe lɛ kɔɔ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ ahe titri. Nɔ ni mɛi nɛɛ feɔ kɛtsɔɔ akɛ amɛyeɔ anɔkwa ji, amɛyeɔ amɛbuaa Kristo nyɛmimɛi lɛ kɛtsuɔ shiɛmɔ nitsumɔ lɛ, ni agbɛnɛ hu, amɛkɛ gbɛtsɔɔmɔi fɛɛ ni “nyɔŋ anɔkwafo kɛ hiɛshikalɔ lɛ” kɛhãa amɛ lɛ tsuɔ nii be fɛɛ be. (Mat. 24:45) Shi esa akɛ mɛi ni yɔɔ hiɛnɔkamɔ akɛ amɛbaaya ŋwɛi lɛ hu abo kɔkɔbɔɔ ni yɔɔ nɔkwɛmɔnɔ nɛɛ mli lɛ toi. Mɛni hewɔ? Ejaakɛ amɛ hu Yesu miikwɛ bɔ ni amɛfeɔ amɛnii amɛhãa, susumɔ ni amɛhiɛ yɛ saji ahe, kɛ nibii ni amɛwieɔ lɛ jogbaŋŋ. No hewɔ lɛ, esa akɛ amɛ hu amɛye anɔkwa. Yesu gba nɔkwɛmɔnii enyɔ krokomɛi hu ni ekɛbɔ mɛi ni afɔ amɛ mu lɛ kɔkɔ. Nɔkwɛmɔnii nɛɛ hu yɛ Mateo yitso 25 lɛ. Nyɛhãa wɔsusua amɛteŋ ekome he, no ji nɔ ni kɔɔ oblayei froi ni hiɛ kã shi kɛ oblayei froi kwashiai lɛ ahe lɛ.

OBLAYEI FROI NI HIƐ KÃ SHI KƐ OBLAYEI FROI KWASHIAI LƐ

6. Mɛni oblayei froi lɛ ateŋ mɛi enumɔ fee ni hãa wɔnaa akɛ amɛhiɛ kã shi? (Mateo 25:​6-10)

⁶ Yɛ nɔkwɛmɔnɔ ni kɔɔ oblayei froi lɛ ahe lɛ mli lɛ, Yesu wie akɛ oblayei froi nyɔŋma tee koni amɛkɛ ayemforo wu ko ayakpe. (Mat. 25:​1-4) No mli lɛ, amɛ fɛɛ amɛmiishwe ni amɛfata ayemforo wu lɛ he kɛya eyookpeemɔ okpɔlɔŋmɛɛ lɛ shishi. Yesu wie akɛ oblayei froi lɛ ateŋ mɛi enumɔ lɛ, “hiɛshikalɔi” ji amɛ, shi mɛi enumɔ lɛ, “kwashiai” ji amɛ. Oblayei froi ni hiɛ kã shi lɛ saa amɛhe amɛto ni amɛhã amɛhiɛ hi amɛhe nɔ. Amɛto amɛnibii ahe gbɛjianɔ bɔ ni kɛ́ ayemforo wu lɛ sɛɛ tsɛ po lɛ, amɛbaanyɛ amɛmɛ lɛ ni amɛfata ehe kɛya okpɔlɔŋmɛɛ lɛ shishi. Amɛkɛ kanei ni akɛ mu woɔ mli ba koni amɛsu kɛ́ duŋ wo. Amɛkɛ mu lɛ eko po wo tɔi amli kɛba, koni aleenɔ, kɛ́ ayemforo wu lɛ sɛɛ yagbala shi lɛ, amɛná eko kɛwo amɛkanei lɛ amli. (Kanemɔ Mateo 25:​6-10.) Be ni ayemforo wu lɛ bashɛ shi lɛ, oblayei froi ni hiɛ kã shi lɛ kɛ lɛ tee yookpeemɔ okpɔlɔŋmɛɛ lɛ shishi. Nakai nɔŋŋ kɛ́ Yesu, ni ji Ayemforo Wu lɛ ba lɛ, Kristofoi ni afɔ amɛ mu ni kɛ amɛnifeemɔ tsɔɔ akɛ amɛhiɛ yɛ amɛhe nɔ ni amɛyeɔ lɛ anɔkwa lɛ anine baashɛ amɛjweremɔnɔ lɛ nɔ; amɛbaayafata Yesu he  yɛ ŋwɛi yɛ e-Maŋtsɛyeli lɛ mli. b (Kpo. 7:​1-3) Agbɛnɛ, hã wɔsusu oblayei froi enumɔ ni ji kwashiai lɛ ahe.

7. Mɛni ba oblayei froi kwashiai lɛ anɔ? Ni mɛni hã eba lɛ nakai?

⁷ Oblayei froi enumɔ ni ji kwashiai lɛ efeee amɛnii tamɔ oblayei froi hiɛshikalɔi lɛ; amɛ lɛ, amɛsaaa amɛhe amɛtooo. No hewɔ lɛ, be ni abo akɛ ayemforo wu lɛ miiba lɛ, amɛkanei lɛ miihe agboi, ni amɛbɛ mu ni amɛkɛbaawo mli. Enɛ hewɔ lɛ, amɛje kpo koni amɛyahé mu. Shi be ni amɛyaa amɛyahé mu lɛ, ayemforo wu lɛ ba, ni “oblayei froi ni esaa amɛhe amɛto lɛ kɛ lɛ tee yookpeemɔ okpɔlɔŋmɛɛ lɛ shishi, ni aŋa shinaa lɛ.” (Mat. 25:10) Sɛɛ mli be ni oblayei froi kwashiai lɛ ku amɛsɛɛ amɛba lɛ, amɛbi ni agbele amɛ koni amɛ hu amɛba yookpeemɔ okpɔlɔŋmɛɛ lɛ shishi, shi ayemforo wu lɛ kɛɛ amɛ akɛ: “Mileee nyɛ.” (Mat. 25:​11, 12) Oblayei froi kwashiai lɛ esaaa amɛhe amɛtooo bɔ ni kɛ́ ayemforo wu lɛ sɛɛ gbala shi po lɛ, amɛbaanyɛ amɛmɛ lɛ. Mɛni mɛi ni afɔ amɛ mu lɛ baanyɛ akase yɛ nɔkwɛmɔnɔ nɛɛ mli?

8-9. Mɛni mɛi ni afɔ amɛ mu lɛ baanyɛ akase yɛ nɔkwɛmɔnɔ ni kɔɔ oblayei froi lɛ ahe lɛ mli? (Kwɛmɔ mfoniri lɛ hu.)

⁸ Saamɔ ohe oto, ni ohã ohiɛ ahi ohe nɔ. Nɔkwɛmɔnɔ nɛɛ ni Yesu gba lɛ etsɔɔɔ akɛ abaaná mɛi ni afɔ amɛ mu kui enyɔ, ni akɛ, kuu kome baasaa amɛhe amɛto ni amɛmɛ kɛyashi jeŋ fɔŋ nɛɛ baaba naagbee, shi kuu kroko lɛ efeŋ nakai. Moŋ lɛ, eyeɔ ebuaa wɔ ni wɔnaa nɔ ni baaba mɛi ni afɔ amɛ mu lɛ anɔ kɛ́ amɛhiɛɛɛ amɛhemɔkɛyeli lɛ mli kɛyawulaaa shi; no ji, amɛjweremɔnɔ lɛ baaŋmɛɛ amɛ. (Yoh. 14:​3, 4) Sane nɛɛ yɛ hiɛdɔɔ waa! Kɛ́ wɔhiɛnɔkamɔ ji wɔbaaya ŋwɛi jio, wɔbaahi shikpɔŋ lɛ nɔ jio, nɔkwɛmɔnɔ ni kɔɔ oblayei froi lɛ ahe lɛ ji kɔkɔbɔɔ kɛhã wɔ. Esa akɛ wɔteŋ mɔ fɛɛ mɔ ahã ehiɛ ahi ehe nɔ ni esaa ehe eto, koni enyɛ efi shi kɛyashi naagbee.—Mat. 24:13.

⁹ Tamɔ bɔ ni wɔna lɛ, Yesu gba nɔkwɛmɔnɔ ni kɔɔ oblayei froi lɛ ahe koni ekɛye ebua  ekaselɔi lɛ ni amɛna akɛ, ehe miihia waa ni amɛsaa amɛhe amɛto ni amɛhã amɛhiɛ ahi amɛhe nɔ. Yɛ nɔkwɛmɔnɔ nɛɛ sɛɛ lɛ, egba amɛ nɔkwɛmɔnɔ kroko. No ji nɔkwɛmɔnɔ ni kɔɔ talɛntai lɛ ahe lɛ. Egba nakai nɔkwɛmɔnɔ lɛ koni ekɛtsɔɔ ekaselɔi lɛ akɛ, esaaa akɛ amɛfeɔ anihao.

TALƐNTAI LƐ

10. Mɛni nyɔji enyɔ lɛ fee ni hãa wɔnaa akɛ amɛye anɔkwa? (Mateo 25:​19-23)

¹⁰ Yɛ nɔkwɛmɔnɔ ni kɔɔ talɛntai lɛ ahe lɛ mli lɛ, Yesu wie nyɔji etɛ ahe. Amɛteŋ mɛi enyɔ ye amɛnuŋtsɔ lɛ anɔkwa, shi mɔ kome eyafeee nakai. (Mat. 25:​14-18) Nɔ ni amɛfee ni hãa wɔnaa akɛ amɛye anɔkwa ji, amɛtsu nii waa koni amɛnuŋtsɔ lɛ aná shika pii. Dani nyɔji nɛɛ anuŋtsɔ lɛ baafã gbɛ lɛ, ehã amɛ shika pii, nɔ ni Biblia lɛ tsɛɔ lɛ talɛntai lɛ. Nyɔji anɔkwafoi lɛ kɛ shika ni ahã amɛ lɛ tsu nii jogbaŋŋ; amɛfeee anihao. Enɛ hewɔ lɛ, be ni amɛnuŋtsɔ lɛ ku esɛɛ eba lɛ, amɛná shika ni ehã amɛ lɛ toi enyɔ. Amɛnuŋtsɔ lɛ jie amɛyi, ni ‘amɛbote emiishɛɛ lɛ mli.’ (Kanemɔ Mateo 25:​19-23.) Ni nyɔŋ ni ji etɛ lɛ hu? Mɛni ekɛ shika ni enuŋtsɔ lɛ hã lɛ lɛ fee?

11. Mɛni afee nyɔŋ “anihaolɔ” lɛ? Ni mɛni hewɔ?

¹¹ Ahã nyɔŋ ni ji etɛ lɛ talɛnta kome, shi efee ‘anihao.’ Kulɛ, enuŋtsɔ lɛ miikpa gbɛ akɛ ekɛ talɛnta lɛ baatsu nii jogbaŋŋ, shi efeee nakai. Moŋ lɛ, etsa shi ni ekɛto. No hewɔ lɛ, be ni enuŋtsɔ lɛ ku esɛɛ eba lɛ, eyakɔ etalɛnta ewo edɛŋ ni nɔ ko nɔ ko fataaa he. Nyɔŋ nɛɛ bɛ subaŋ. Nɔ najiaŋ ni ebaakpa enuŋtsɔ lɛ fai akɛ enáaa nɔ ko efataaa eshika lɛ he ehãaa lɛ lɛ, ekɛɛ enuŋtsɔ lɛ ‘sane wa.’ Enuŋtsɔ lɛ náaa nɔ ni efee lɛ he miishɛɛ kwraa. Ehã ahe talɛnta lɛ yɛ edɛŋ ni ashɛ lɛ afɔ̃ agbo lɛ naa.—Mat. 25:​24, 26-30.

12. Namɛi nyɔji anɔkwafoi enyɔ lɛ damɔ shi kɛhã?

¹² Nyɔji anɔkwafoi enyɔ lɛ damɔ shi kɛhã Kristofoi ni afɔ amɛ mu ni yeɔ anɔkwa lɛ. Yesu, ni ji amɛ-Nuŋtsɔ lɛ, hãa ‘amɛboteɔ emiishɛɛ lɛ mli.’ Amɛnáa klɛŋklɛŋ gbohiiashitee lɛ mli gbɛfaŋnɔ, ni tsɔɔ akɛ, ateɔ amɛ shi kɛyaa ŋwɛi. (Mat. 25:​21, 23; Kpo. 20:5b) Shi nɔ ni ba nyɔŋ fɔŋ anihaolɔ lɛ nɔ lɛ ji kɔkɔbɔɔ kɛhã mɛi ni afɔ amɛ mu lɛ. Mɛni hewɔ wɔkɛɔ nakai?

13-14. Mɛni mɛi ni afɔ amɛ mu lɛ baanyɛ akase yɛ talɛntai lɛ ahe nɔkwɛmɔnɔ lɛ mli? (Kwɛmɔ mfoniri lɛ hu.)

 ¹³ Tsu sɔɔmɔ nitsumɔ lɛ kɛ ekãa, ni kaafee anihao. Tamɔ wɔna yɛ nɔkwɛmɔnɔ ni kɔɔ oblayei froi lɛ ahe lɛ mli lɛ, talɛntai lɛ ahe nɔkwɛmɔnɔ ni Yesu gba lɛ hu etsɔɔɔ akɛ wɔsɛɛ lɛ mɛi ni afɔ amɛ mu lɛ baafee anihao. Moŋ lɛ, ehãa wɔnaa nɔ ni baaba mɛi ni afɔ amɛ mu lɛ anɔ kɛ́ ekãa ni amɛkɛsɔmɔɔ Yehowa lɛ naa ba shi. Kɛ́ ekãa ni amɛkɛsɔmɔɔ lɛ naa ba shi lɛ, amɛnyɛŋ ‘amɛhã amɛtsɛmɔ kɛ amɛhalamɔ lɛ afee nɔ ni ama nɔ mi ahã amɛ,’ ni aŋmɛŋ amɛ gbɛ ni amɛbote ŋwɛi Maŋtsɛyeli lɛ mli.—2 Pet. 1:10.

¹⁴ Nɔkwɛmɔnɔ ni kɔɔ oblayei froi lɛ ahe lɛ kɛ talɛntai lɛ ahe nɔkwɛmɔnɔ lɛ ni Yesu gba lɛ hãa wɔnaa faŋŋ akɛ, esa akɛ Kristofoi fɛɛ ni afɔ amɛ mu lɛ asaa amɛhe amɛto ni amɛhã amɛhiɛ ahi amɛhe nɔ, ni agbɛnɛ hu, amɛtsu sɔɔmɔ nitsumɔ lɛ kɛ ekãa ni amɛkafee anihao. Shi ani nɔ kroko hu yɛ ni Yesu wie ni baanyɛ afee kɔkɔbɔɔ kɛhã mɛi ni afɔ amɛ mu lɛ? Hɛɛ, nɔ kroko yɛ. No ji Yesu wiemɔi ni yɔɔ Mateo 24:​40, 41 lɛ.

NAMƐI ‘AKƐBAAYA’?

15-16. Mɛɛ gbɛ nɔ Mateo 24:​40, 41 lɛ yeɔ ebuaa mɛi ni afɔ amɛ mu lɛ ni amɛna nɔ hewɔ ni esa akɛ amɛya nɔ amɛbu?

¹⁵ Dani Yesu baagba nɔkwɛmɔnii etɛ ni wɔsusu he lɛ, ewie mɛi ni afɔ amɛ mu lɛ akojomɔ ni baahã ana amɛteŋ mɛi ni asɔo amɛnaa nɔ ni ji naagbee nɔ kwraa lɛ he. Ewie hii enyɔ ni miitsu nii yɛ ŋmɔ mli kɛ yei enyɔ ni miiwiɛ nii yɛ wiɛtɛ nɔ lɛ ahe. Etamɔ nɔ ni hii enyɔ lɛ miitsu nitsumɔ kome too lɛ nɔŋŋ, ni yei enyɔ lɛ hu miitsu nitsumɔ kome too lɛ nɔŋŋ, shi Yesu kɛɛ “akɛ mɔ kome baaya ni abaashi mɔ kroko lɛ.” (Kanemɔ Mateo 24:​40, 41.) Kɛkɛ ni ekɛɛ esɛɛnyiɛlɔi lɛ akɛ: “No hewɔ lɛ, nyɛyaa nɔ nyɛbua, ejaakɛ nyɛleee gbi nɔ ni nyɛ-Nuŋtsɔ lɛ baaba.” (Mat. 24:42) Yesu wie nɔ ko ni tamɔ nakai nɔŋŋ be ni egba nɔkwɛmɔnɔ ni kɔɔ oblayei froi lɛ ahe lɛ egbe naa lɛ. (Mat. 25:13) Ani tsakpaa yɛ saji enyɔ nɛɛ ni Yesu wie lɛ ateŋ? Hɛɛ, etamɔ nɔ ni tsakpaa yɛ amɛteŋ. No ji, mɛi ni afɔ amɛ mu lɛɛlɛŋ ni baaye Yehowa anɔkwa lɛ, amɛ pɛ Yesu baaŋɔ kɛya ŋwɛi Maŋtsɛyeli lɛ mli.—Yoh. 14:3.

¹⁶ Yaa nɔ obu. Kɛ́ mɛi ni afɔ amɛ mu lɛ ateŋ mɔ ko eyaaa nɔ ebuuu lɛ, no lɛ, kɛ́ Yesu ba ni ebabua “ehalamɔbii lɛ” anaa lɛ, akɛ lɛ fataŋ he. (Mat. 24:31) Nakai nɔŋŋ hu esa akɛ Nyɔŋmɔ webii ni yɔɔ hiɛnɔkamɔ akɛ amɛbaahi shikpɔŋ lɛ nɔ kɛya naanɔ lɛ abo Yesu kɔkɔbɔɔ lɛ toi, ni amɛya nɔ amɛbu ni amɛye Yehowa anɔkwa.

17. Kɛ́ Yehowa fɔ mɛi komɛi mu yɛ wɔbei nɛɛ amli lɛ, mɛni hewɔ esaaa akɛ wɔhãa no gbaa wɔnaa?

¹⁷ Wɔle akɛ, nɔ fɛɛ nɔ ni Yehowa feɔ lɛ ja. No hewɔ lɛ, kɛ́ Yehowa ekpɛ mli akɛ ebaafɔ mɛi komɛi mu yɛ wɔbei nɛɛ amli lɛ, wɔhãaa no agba wɔnaa. c Wɔkaiɔ Yesu nɔkwɛmɔnɔ ni kɔɔ nitsulɔi ni abɔ amɛ apaa yɛ ŋmɛlɛtswaa ni ji 11 lɛ nɔ lɛ ahe lɛ. (Mat. 20:​1-16) Sɛɛkpeebii nɛɛ kɛ mɛi ni tsu nii yɛ ŋmɔ lɛ mli kɛjɛ leebi lɛ fɛɛ ná nyɔmɔwoo kome. Nakai nɔŋŋ mɛi fɛɛ ni afɔ amɛ mu lɛ baaya ŋwɛi kɛ́ amɛye Yehowa anɔkwa, ekɔɔɔ he eko be ni afɔ amɛ mu.

BO KƆKƆBƆƆ LƐ TOI

18-19. Mɛni wɔkase yɛ nɔkwɛmɔnii ni Yesu gba lɛ amli?

¹⁸ Mɛni wɔkase? Wɔkase akɛ, nɔkwɛmɔnɔ ni kɔɔ gwantɛŋi lɛ kɛ abotiai lɛ ahe lɛ hãa mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ kɛya naanɔ lɛ naa akɛ, ehe miihia ni amɛye anɔkwa bianɛ, kɛ agbɛnɛ hu, yɛ amanehulu kpeteŋkpele ni baa lɛ mli. Kɛ́ amɛfee nakai lɛ, no lɛ, yɛ amanehulu kpeteŋkpele lɛ mli lɛ, Yesu baabu amɛ akɛ mɛi ni sa akɛ ‘amɛya naanɔ wala mli.’—Mat. 25:46.

 ¹⁹ Agbɛnɛ hu, wɔsusu nɔkwɛmɔnii enyɔ ni Yesu tsɔ nɔ ebɔ mɛi ni afɔ amɛ mu lɛ kɔkɔ lɛ ahe. Yɛ Yesu nɔkwɛmɔnɔ ni kɔɔ oblayei froi nyɔŋma lɛ ahe lɛ mli lɛ, oblayei lɛ ateŋ mɛi enumɔ tsɔɔ akɛ amɛhiɛ kã shi. Amɛsaa amɛhe amɛto ni amɛhã amɛhiɛ hi amɛhe nɔ, bɔ ni kɛ́ ayemforo wu lɛ sɛɛ tsɛ po lɛ, amɛbaanyɛ amɛmɛ lɛ. Shi oblayei froi kwashiai lɛ efeee nakai. Enɛ hewɔ lɛ, ayemforo wu lɛ eŋmɛɛɛ amɛ gbɛ ni amɛba eyookpeemɔ okpɔlɔŋmɛɛ lɛ shishi. Wɔ hu esa akɛ wɔsaa wɔhe wɔto koni wɔnyɛ wɔmɛ Yesu kɛyashi ebaakpãtã je fɔŋ nɛɛ hiɛ, ekɔɔɔ he eko be abɔ ni ebaaye. Agbɛnɛ hu, yɛ Yesu nɔkwɛmɔnɔ ni kɔɔ talɛntai lɛ ahe lɛ mli lɛ, wɔna akɛ nyɔji anɔkwafoi enyɔ lɛ tsu nii waa, ni amɛfeee anihao. Amɛtsu nii waa amɛhã amɛnuŋtsɔ lɛ, ni ená amɛhe miishɛɛ. Shi nuŋtsɔ lɛ náaa nyɔŋ anihaolɔ lɛ he miishɛɛ. Nɔkwɛmɔnɔ nɛɛ tsɔɔ wɔ akɛ, esa akɛ wɔkɛ ekãa asɔmɔ Yehowa kɛyashi naagbee. Naagbee kwraa lɛ, wɔbana akɛ, mɛi ni afɔ amɛ mu ni baaya nɔ abu lɛ, Yesu kɛ amɛ baaya ŋwɛi. Mɛi nɛɛ miikpa be ni ‘abaabua amɛnaa’ kɛya Yesu ŋɔɔ yɛ ŋwɛi lɛ gbɛ waa. Yɛ Harmagedon ta lɛ sɛɛ lɛ, amɛbaatsɔ Gwantɛŋbi lɛ, ni ji Yesu, ayemforo.—2 Tes. 2:1; Kpo. 19:9.

20. Mɛni Yehowa baafee ehã mɛi ni boɔ kɔkɔ ni ebɔɔ wɔ lɛ toi?

²⁰ Be ni Yesu baakojo adesai fɛɛ lɛ miibɛŋkɛ oyayaayai, shi esaaa akɛ wɔsheɔ gbeyei. Kɛ́ wɔtee nɔ wɔye Yehowa, wɔ-Tsɛ ni yɔɔ ŋwɛi ni sumɔɔ wɔ waa lɛ anɔkwa lɛ, ebaahã wɔ “hewalɛ ni fa kɛteke nɔ lɛ” koni ‘wɔnyɛ gbɔmɔ Bi lɛ hiɛ wɔdamɔ.’ (2 Kor. 4:7; Luka 21:36) Kɛ́ wɔhiɛnɔkamɔ ji wɔbaaya ŋwɛi jio, wɔbaahi shikpɔŋ lɛ nɔ jio, esa akɛ wɔbo kɔkɔ ni Yesu tsɔ nɔkwɛmɔnii ni egba lɛ anɔ ebɔ wɔ lɛ toi. Kɛ́ wɔfee nakai lɛ, Yehowa baaná miishɛɛ, ni edromɔ ni fa babaoo lɛ hewɔ lɛ, ‘ebaaŋma wɔgbɛ́i yɛ wala wolo lɛ mli.’—Dan. 12:1; Kpo. 3:5.