NIKASEMƆ 39
LALA 125 “Mɛi Ni Naa Mɔbɔ Lɛ Yɛ Miishɛɛ”
Kɛ́ Wɔfee Mɛi Ejurɔ Lɛ, Wɔbaaná Miishɛɛ Waa
“Nɔhãmɔ hãa mɔ náa miishɛɛ fe hemɔ.”—BƆF. 20:35.
NƆ NI WƆBAAKASE
Wɔbaana gbɛi srɔtoi anɔ ni wɔbaanyɛ wɔtsɔ wɔhã mɔ nɔ, kɛ nɔ hewɔ ni enɛ baahã wɔná miishɛɛ lɛ.
1-2. Mɛni hewɔ ehi waa akɛ Yehowa bɔ wɔ bɔ ni kɛ́ wɔfee mɛi ejurɔ lɛ, no hãa wɔnáa miishɛɛ waa moŋ fe kɛ́ mɛi fee wɔ ejurɔ?
BƆ NI Yehowa bɔ wɔ ehã lɛ hewɔ lɛ, kɛ́ wɔfee mɛi ejurɔ lɛ, no hãa wɔnáa miishɛɛ waa fe kɛ́ mɛi fee wɔ ejurɔ. (Bɔf. 20:35) Ani enɛ tsɔɔ akɛ kɛ́ mɛi fee wɔ ejurɔ lɛ, wɔnáaa miishɛɛ ko kwraa? Dabi, etsɔɔɔ nakai. Bei pii lɛ, kɛ́ mɛi ke wɔ nii lɛ, wɔnáa miishɛɛ, shi kɛ́ wɔke mɛi nii lɛ, wɔnáa miishɛɛ kwraa fe nakai. Ni ehi waa akɛ Yehowa bɔ wɔ yɛ nakai gbɛ nɔ. Mɛni hewɔ wɔkɛɔ nakai?
2 Bɔ ni Yehowa bɔ wɔ ehã lɛ hewɔ lɛ, wɔ diɛŋtsɛ wɔbaanyɛ wɔfee nibii ni baahã wɔná miishɛɛ. Enɛ hewɔ lɛ, kɛ́ wɔsusu gbɛi komɛi ni wɔbaanyɛ wɔtsɔ nɔ wɔfee mɛi ejurɔ lɛ ahe ni wɔfee lɛ, wɔbaaná miishɛɛ waa. Ani enɛ hãaa ona akɛ bɔ ni Yehowa bɔ wɔ ehã lɛ nɔ bɛ kwraa?—Lala 139:14.
3. Mɛni hewɔ Biblia lɛ tsɛɔ Yehowa akɛ “miishɛɛ Nyɔŋmɔ lɛ”?
3 Biblia lɛ kɛɛ kɛ́ wɔfee mɛi ejurɔ lɛ, no hãa wɔnáa miishɛɛ, no hewɔ lɛ ebɛ naakpɛɛ kwraa akɛ yɛ Biblia lɛ mli lɛ, atsɛɔ Yehowa akɛ “miishɛɛ Nyɔŋmɔ.” (1 Tim. 1:11) Lɛ ji mɔ klɛŋklɛŋ ni fee ejurɔ, ni efeɔ ejurɔ fe mɔ fɛɛ mɔ hu. Bɔfo Paulo wie akɛ, lɛ ehewɔ “wɔyɔɔ wala ni wɔtsiɔ wɔhe ni wɔyɔɔ shihilɛ mli.” (Bɔf. 17:28) Anɔkwa, “nikeenii kpakpai fɛɛ kɛ nikeenii ni hi kɛwula shi fɛɛ lɛ,” Yehowa ŋɔɔ ejɛɔ.—Yak. 1:17.
4. Mɛni kɛ́ wɔfee lɛ ebaahã wɔná miishɛɛ waa? Ni mɛni he wɔbaasusu yɛ nikasemɔ nɛɛ mli ni baaye abua wɔ ni wɔfee nakai?
4 Ekã shi faŋŋ akɛ, wɔ fɛɛ wɔbaasumɔ ni wɔfee mɛi ejurɔ koni wɔná miishɛɛ waa. Nɔ ni baawa wɔ ni wɔnyɛ wɔfee nakai ji, ni wɔbaakase bɔ ni Yehowa feɔ ejurɔ lɛ. (Efe. 5:1) Wɔbaasusu enɛ he yɛ nikasemɔ nɛɛ mli. Agbɛnɛ hu, kɛ́ bei komɛi lɛ, wɔnuɔ he akɛ kɛ́ wɔfee mɛi ejurɔ lɛ amɛjieee hiɛsɔɔ kpo lɛ, nikasemɔ nɛɛ baaye abua wɔ ni wɔna nɔ ni wɔbaanyɛ wɔfee. Saji nɛɛ baaye abua wɔ koni wɔya nɔ wɔfee mɛi ejurɔ ni wɔná miishɛɛ waa.
KASEMƆ BƆ NI YEHOWA FEƆ EJURƆ LƐ
5. Mɛɛ nibii komɛi Yehowa hãa wɔ?
5 Mɛɛ nibii komɛi Yehowa hãa wɔ? Hã wɔsusu ekomɛi ahe wɔkwɛ. Yehowa hãa wɔ nibii ni he hiaa wɔ. Jeee be fɛɛ be ehãa wɔ nibii ni baahã wɔshihilɛ afee ogbɔjɔ, shi be fɛɛ be lɛ, ehãa wɔ nibii ni he hiaa wɔ. Akɛ nɔkwɛmɔnɔ lɛ, ehãa wɔ niyenii, atade, kɛ wɔɔhe. (Lala 4:8; Mat. 6:31-33; 1 Tim. 6:6-8) Ani Yehowa hãa wɔ nibii nɛɛ akɛni eji esɔ̃ akɛ ehã wɔ lɛ kɛkɛ hewɔ? Dabi kwraa! Belɛ, mɛni hewɔ ehãa wɔ mɔ?
6. Mɛni wɔkaseɔ yɛ Mateo 6:25, 26 lɛ mli?
6 Yɛ kukufoo mli lɛ, Yehowa sumɔɔ wɔ, no hewɔ ni ehãa wɔ nibii ni he hiaa wɔ lɛ. Yesu wie nɔ ko yɛ Mateo 6:25, 26 ni sa kadimɔ waa. (Kanemɔ.) Ekɛ nibii ni Yehowa ebɔ lɛ ekomɛi fee nɔkwɛmɔnɔ. Nibii nɛɛ eko ji loofɔji. Yesu wie yɛ amɛhe akɛ: “Amɛduuu nii, amɛkpaaa nii, ni amɛbuaaa nii anaa amɛwooo nitoohei.” Shi kadimɔ nɔ ni ewie kɛtsa nɔ lɛ. Ewie akɛ: “Nyɛŋwɛi Tsɛ lɛ lɛɔ amɛ kɛ̃.” Kɛkɛ ni Yesu bi akɛ: “Ani nyɛjara waaa kwraa fe amɛ?” Mɛni Yesu taoɔ etsɔɔ wɔ lɛ? No ji, Yehowa naa mɛi ni jáa lɛ lɛ akɛ amɛhe hiaa kwraa fe kooloi ni ebɔ lɛ. No hewɔ lɛ, kɛ́ Yehowa kwɛɔ kooloi lɛ, ŋwanejee ko bɛ he akɛ, ebaakwɛ wɔ hu! Bɔ ni tsɛ ko hãa eweku lɛ nibii ni he hiaa amɛ ejaakɛ esumɔɔ amɛ lɛ, nakai nɔŋŋ Yehowa hu hãa wɔ nibii ni he hiaa wɔ lɛ, ejaakɛ esumɔɔ wɔ.—Lala 145:16; Mat. 6:32.
7. Mɛni ji gbɛ kome ni wɔbaanyɛ wɔtsɔ nɔ wɔkase bɔ ni Yehowa feɔ ejurɔ lɛ? (Kwɛmɔ mfoniri lɛ hu.)
7 Wɔ hu wɔbaanyɛ wɔhã wɔnyɛmimɛi lɛ nibii ni he hiaa amɛ lɛ, yɛ suɔmɔ ni wɔsumɔɔ amɛ lɛ hewɔ. Akɛ nɔkwɛmɔnɔ lɛ, ani ole nyɛmi ko ni niyenii loo atade he miihia lɛ? Yehowa baanyɛ atsɔ onɔ ni eye ebua nakai mɔ lɛ koni ená nɔ ni he hiaa lɛ lɛ. Kɛ́ oshãra ba nɛkɛ lɛ, Yehowa webii lɛ yeɔ amɛbuaa amɛnyɛmimɛi lɛ waa. Akɛ nɔkwɛmɔnɔ lɛ, be ni COVID-19 lɛ ba lɛ, nyɛmimɛi lɛ hã amɛnyɛmimɛi ni he efi amɛ lɛ, niyenii, atade, kɛ nibii krokomɛi ni he hia amɛ lɛ. Nyɛmimɛi babaoo hu tsu onia kɛfi jeŋ muu fɛɛ nitsumɔ lɛ sɛɛ. Enɛ hã aná shika kɛye abua nyɛmimɛi ni yɔɔ je lɛŋ he fɛɛ he ni he efi amɛ lɛ. Wiemɔi ni yɔɔ Hebribii 13:16 lɛ ni tsirɛ amɛ ni amɛfee nakai. Jɛmɛ kɛɛ: “Nyɛhiɛ akakpaa ekpakpafeemɔ nɔ, ni nyɛhiɛ akakpaa nɔ hu akɛ nyɛkɛ mɛi baaja nii ni nyɛyɔɔ lɛ, ejaakɛ afɔlei ni tamɔ nɛkɛ saa Nyɔŋmɔ hiɛ jogbaŋŋ.”
Wɔ fɛɛ wɔbaanyɛ wɔkase Yehowa ni wɔfee mɛi ejurɔ (Kwɛmɔ kuku 7)
8. Mɛni hewalɛ ni Yehowa hãa wɔ lɛ yeɔ ebuaa wɔ ni wɔfeɔ? (Filipibii 2:13)
8 Yehowa hãa wɔ hewalɛ. Yehowa yɛ hewalɛ waa, ni eyɛ he miishɛɛ akɛ ebaahã etsuji anɔkwafoi lɛ eko. (Kanemɔ Filipibii 2:13.) Ani okɛ kaa ko ekpe ni osɔle obi Yehowa ni ewa bo koni onyɛ odamɔ naa? Loo ani okɛ shihilɛ ni mli wa ko ekpe ni osɔle obi Yehowa ni ehã bo hewalɛ ni onyɛ okɛfi shi pɛŋ? Loo ani osɔle obi Yehowa ni ehã bo hewalɛ ni onyɛ okɛtsu nibii ni esa akɛ otsu yɛ gbi lɛ mli lɛ ahe nii pɛŋ? Be ni Yehowa bo nakai sɔlemɔ lɛ toi ni ehã bo hewalɛ lɛ, ŋwanejee ko bɛ he akɛ, onu he tamɔ bɔ ni bɔfo Paulo nu he lɛ nɔŋŋ. Paulo wie akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.”—Fip. 4:13.
9. Mɛɛ gbɛ nɔ wɔbaanyɛ wɔkase Yehowa ni wɔkɛ wɔhewalɛ atsu nii kɛye wɔbua mɛi krokomɛi? (Kwɛmɔ mfoniri lɛ hu.)
9 Eyɛ mli akɛ wɔji adesai ni yeee emuu moŋ, shi wɔbaanyɛ wɔkase bɔ ni Yehowa hãa mɛi krokomɛi hewalɛ lɛ. Akɛni wɔji adesai hewɔ lɛ, wɔ lɛ wɔnyɛŋ wɔhã mɛi krokomɛi hewalɛ, shi wɔbaanyɛ wɔkɛ hewalɛ ni wɔyɔɔ lɛ afee nibii kɛye abua mɛi krokomɛi. Akɛ nɔkwɛmɔnɔ lɛ, wɔbaanyɛ wɔyaye jara loo wɔyatsu shĩa nii wɔhã nyɛmimɛi ni egbɔlɔ loo nyɛmimɛi ni bɛ hewalɛ lɛ. Agbɛnɛ hu, kɛ́ aasaa Maŋtsɛyeli Asa lɛ nɔ loo aakura jɛmɛ ni wɔshihilɛ baaŋmɛ wɔ gbɛ lɛ, wɔbaanyɛ wɔyaye wɔbua. Kɛ́ wɔkɛ wɔhewalɛ tsu nii yɛ gbɛi ni tamɔ nɛkɛ anɔ lɛ, Nyɔŋmɔ webii lɛ náa he sɛɛ waa.
Wɔbaanyɛ wɔkɛ hewalɛ ni wɔyɔɔ lɛ aye abua mɛi (Kwɛmɔ kuku 9)
10. Mɛɛ gbɛ nɔ wɔbaanyɛ wɔtsɔ wɔwiemɔ nɔ wɔwo mɛi hewalɛ?
10 Agbɛnɛ hu, hã ehi ojwɛŋmɔ mli akɛ wiemɔi baanyɛ aná mɛi anɔ hewalɛ. No hewɔ lɛ, mɛɛ gbɛ nɔ obaanyɛ otsɔ owiemɔ nɔ owo mɛi hewalɛ? Eko ji, ni obaajɛ otsui mli ojie mɔ ko yi yɛ nɔ ko ni efeɔ ni ohiɛ sɔɔ waa lɛ he. Agbɛnɛ hu, obaanyɛ oshɛje mɔ ko ni miishɛjemɔ he miihia lɛ lɛ mii. Obaanyɛ ofee enɛ be ni oyasara mɔ lɛ loo be ni otswa lɛ, loo obaanyɛ osɛndi lɛ kaadi, email, loo tɛs mɛseji. Ehe ehiaaa ni oyeɔ otsui babaoo yɛ nɔ ni obaawie he. Nɔ ko fioo ni obaajɛ otsui mli owie lɛ baanyɛ aye abua onyɛmi lɛ ni eya nɔ ekɛ ehiɛ afɔ̃ Yehowa nɔ ni eye lɛ anɔkwa.—Abɛi 12:25; Efe. 4:29.
11. Mɛɛ gbɛ nɔ Yehowa kɛ ehiɛshikamɔ lɛ droɔ mɛi?
11 Yehowa hãa mɔ hiɛ kãa shi. Yakobo wie akɛ: “Kɛ́ hiɛshikamɔ ehia nyɛteŋ mɔ ko lɛ, eya nɔ ebi Nyɔŋmɔ, ejaakɛ ejɛɔ etsui mli ekɛhãa mɛi fɛɛ ni etekeɔ nɔ, ni etaooo tɔmɔ yɛ mɔ he.” (Yak. 1:5; shn.) Wiemɔi nɛɛ hãa wɔnaa akɛ, Yehowa efeee kpɛkpɛi. Ehãa mɔ fɛɛ mɔ ni biɔ lɛ hiɛshikamɔ lɛ eko. Agbɛnɛ hu, kadimɔ akɛ, kɛ́ Yehowa hã mɔ ko hiɛshikamɔ lɛ, ‘ewieee mɔ lɛ hiɛ,’ loo ‘etaooo tɔmɔ yɛ mɔ lɛ he.’ Enɛ hewɔ lɛ, kɛ́ wɔbi lɛ gbɛtsɔɔmɔ lɛ, ewooo wɔ hiɛgbele. Anɔkwa, eesumɔ ni wɔbi edɛŋ gbɛtsɔɔmɔ moŋ.—Abɛi 2:1-6.
12. Mɛɛ hegbɛi wɔnáa ni wɔbaanyɛ wɔkɛtsɔɔ mɛi nibii ni wɔle?
12 Ni wɔ hu? Mɛɛ gbɛ nɔ wɔbaanyɛ wɔkase Yehowa? (Lala 32:8) Akɛ Yehowa webii lɛ, wɔyɛ hegbɛi babaoo ni wɔbaanyɛ wɔhã mɛi ale nibii ni wɔle lɛ. Akɛ nɔkwɛmɔnɔ lɛ, bei pii lɛ wɔyeɔ wɔbuaa mɛi hei ni ebatsɔmɔ shiɛlɔi lɛ koni amɛle bɔ ni ashiɛɔ jogbaŋŋ. Agbɛnɛ hu, asafoŋ onukpai lɛ toɔ amɛtsui shi ni amɛyeɔ amɛbuaa asafoŋ sɔɔlɔi kɛ nyɛmimɛi hii ni abaptisi amɛ lɛ koni amɛnyɛ amɛtsu nitsumɔi ni akɛwo amɛdɛŋ yɛ asafo lɛ mli lɛ. Kɛfata he lɛ, nyɛmimɛi ni le tsumaa kɛ ekuramɔ lɛ yeɔ amɛbuaa nyɛmimɛi ni he esako tsɔ lɛ koni amɛnyɛ amɛye amɛbua kɛmamɔ asafo lɛ tsũi.
13. Kɛ́ wɔmiitsɔɔ mɔ ko nɔ ko lɛ, mɛɛ gbɛ nɔ wɔbaanyɛ wɔkase Yehowa?
13 Kɛ́ ootsɔɔ mɔ ko nɔ ko lɛ, bɔɔ mɔdɛŋ ni okase Yehowa. Kaimɔ akɛ, Yehowa kɛ ehiɛshikamɔ lɛ efeee kpɛkpɛi, shi ekɛhãa mɔ fɛɛ mɔ ni biɔ lɛ lɛ. No hewɔ lɛ, wɔ hu kɛ́ wɔmiitsɔɔ mɔ ko nɔ ko lɛ, wɔkɛ nɔ ko eteee lɛ; wɔtsɔɔ lɛ nɔ fɛɛ nɔ ni wɔle. Esaaa akɛ wɔnuɔ he akɛ kɛ́ mɔ lɛ le lɛ, wɔsɛɛ lɛ ebaaba ebahe wɔgbɛhe lɛ. Ni esaaa akɛ wɔnáa jwɛŋmɔ lɛ akɛ, akɛni wɔ diɛŋtsɛ wɔkase ni wɔle hewɔ lɛ, lɛ hu lɛ diɛŋtsɛ ekase ni ele. Yehowa webii efeee nakai. Moŋ lɛ, wɔtsɔɔ amɛ nɔ fɛɛ nɔ ni wɔle, ni wɔfeɔ bɔ fɛɛ bɔ ni wɔbaanyɛ koni amɛná nɔ ni wɔtsɔɔ amɛ lɛ he sɛɛ. (1 Tes. 2:8) Wɔshwelɛ ji, “amɛ hu amɛfee mɛi ni sa jogbaŋŋ akɛ amɛtsɔɔ mɛi krokomɛi.” (2 Tim. 2:1, 2) Kɛ́ eba lɛ nakai lɛ, amɛkɛ nɔ ni wɔkɛfee amɛ ejurɔ lɛ baafee mɛi krokomɛi hu ejurɔ, ni wɔ fɛɛ wɔbaaná miishɛɛ.
KƐ́ MƐI AHIƐ ESƆƆƆ EJURƆ NI WƆFEE AMƐ
14. Kɛ́ wɔfee mɛi ejurɔ lɛ, bei pii lɛ, mɛni amɛfeɔ?
14 Kɛ́ wɔfee mɛi, titri lɛ, wɔnyɛmimɛi lɛ ejurɔ lɛ, bei pii lɛ amɛfeɔ nɔ ko kɛjieɔ hiɛsɔɔ kpo. Ekolɛ amɛsɛndiɔ wɔ kaadi kɛdaa wɔ shi loo amɛdaa wɔ shi yɛ gbɛi krokomɛi anɔ. (Kol. 3:15) Enɛ hu hãa wɔnáa miishɛɛ waa.
15. Kɛ́ wɔfee mɛi ejurɔ ni amɛjieee hiɛsɔɔ kpo lɛ, mɛni esa akɛ wɔkai?
15 Shi yɛ anɔkwale mli lɛ, jeee mɔ fɛɛ mɔ kɛ́ wɔfee lɛ ejurɔ lɛ ejieɔ hiɛsɔɔ kpo. Bei komɛi lɛ, kɛ́ wɔfee mɛi ejurɔ lɛ, amɛjwɛŋŋ wɔbe, wɔhewalɛ, kɛ nibii ni wɔkɛshã afɔle kɛfee amɛ ejurɔ lɛ he po. Kɛ́ eba lɛ nakai lɛ, mɛni wɔbaanyɛ wɔfee koni no akafite wɔmiishɛɛ? Kaimɔ nɔ ni Bɔfoi 20:35, ni ji ŋmalɛ ni wɔnikasemɔ lɛ damɔ nɔ lɛ kɛɛ lɛ. Jeee bɔ ni mɛi feɔ amɛnii amɛhãa kɛ́ wɔfee amɛ ejurɔ lɛ ni hãa wɔnáa miishɛɛ. Kɛ́ mɛi ahiɛ esɔɔɔ ejurɔ ni wɔfee amɛ lɛ po lɛ, esa akɛ wɔya nɔ wɔfee ejurɔ ni no baahã wɔná miishɛɛ. Mɛni baaye abua wɔ ni wɔfee nakai? Naa nibii komɛi ni baaye abua wɔ.
16. Mɛni baaye abua wɔ ni wɔya nɔ wɔfee mɛi ejurɔ?
16 Hã ehi ojwɛŋmɔŋ akɛ ookase Yehowa. Yehowa hãa mɛi fɛɛ nibii kpakpai kɛ́ amɛjie hiɛsɔɔ kpo jio, amɛjieee hiɛsɔɔ kpo jio. (Mat. 5:43-48) Ewo shi akɛ, kɛ́ wɔfee mɛi ejurɔ ni ‘wɔhiɛ kãaa nɔ akɛ wɔnine baasaa ashɛ nɔ ko nɔ lɛ, wɔjweremɔnɔ lɛ baafa babaoo.’ (Luka 6:35) “Nɔ ko” ni awie he yɛ ŋmalɛ nɛɛ mli lɛ baanyɛ akɔ hiɛsɔɔ ni mɛi jieɔ kpo amɛtsɔɔ wɔ lɛ he. Kɛ́ mɛi jie hiɛsɔɔ kpo jio, amɛjieee hiɛsɔɔ kpo jio, kaimɔ akɛ, Yehowa baajwere bo yɛ ekpakpa ni ofeɔ kɛyeɔ obuaa mɛi lɛ, ejaakɛ ‘ohãa kɛ miishɛɛ.’—Abɛi 19:17; 2 Kor. 9:7.
17. Mɛni esa akɛ wɔhã ehi wɔjwɛŋmɔ mli kɛ́ wɔmiifee mɛi ejurɔ? (Luka 14:12-14)
17 Gbɛ kroko ni wɔbaanyɛ wɔtsɔ nɔ wɔkase Yehowa kɛ́ wɔmiifee mɛi ejurɔ ji, ni wɔkɛ Yesu wiemɔi ni yɔɔ Luka 14:12-14 lɛ baatsu nii. (Kanemɔ.) Naagba bɛ he akɛ wɔbaafee mɛi ni wɔle akɛ amɛbaanyɛ amɛfee wɔ ejurɔ lɛ ejurɔ. Shi kɛ́ wɔyɔse akɛ bei pii lɛ, wɔfeɔ mɛi ejurɔ akɛni wɔmiikpa gbɛ akɛ amɛbaafee wɔ eko kɛto najiaŋ hu? Belɛ no lɛ, esa akɛ wɔkɛ ŋaa ni Yesu wo lɛ atsu nii. Wɔbaanyɛ wɔfee mɔ ko ni wɔle akɛ enyɛŋ efee wɔ ejurɔ kɛto najiaŋ lɛ ejurɔ. Kɛ́ wɔfee nakai lɛ, wɔbaaná miishɛɛ ejaakɛ wɔmiikase Yehowa. Kɛ́ wɔhã enɛ hi wɔjwɛŋmɔ mli lɛ, ebaanyɛ eye ebua wɔ ni wɔná miishɛɛ kɛ́ mɛi ejieee hiɛsɔɔ kpo po.
18. Mɛni esaaa akɛ wɔfeɔ? Ni mɛni hewɔ?
18 Kaamu sane naa oya. (1 Kor. 13:7) Kɛ́ mɔ ko ejieee hiɛsɔɔ kpo lɛ, obaanyɛ obi ohe akɛ: ‘Ani ehiɛ kã he, aloo ejwɛŋmɔ ni eje nɔ kɛkɛ?’ Ekolɛ yiŋtoo kroko hu hewɔ ni mɔ lɛ ebadako wɔ shi bɔ ni wɔkpaa gbɛ akɛ ebada wɔ shi lɛ. Mɔ ko yɛ ni ehiɛ esɔ nɔ ni ofee ohã lɛ lɛ waa, shi ewa kɛhã lɛ akɛ ebaajie hiɛsɔɔ kpo. Ekolɛ ehiɛ miigbo, ejaakɛ be ko ni eho lɛ, eyeɔ ebuaa mɛi shi bianɛ lɛ enyɛɛɛ efee nakai. Ekɔɔɔ he eko bɔ ni sane lɛ ji lɛ, kɛ́ wɔsumɔɔ wɔnyɛmimɛi lɛ lɛɛlɛŋ lɛ, wɔnáŋ amɛhe jwɛŋmɔ ni ejaaa, ni wɔbaaya nɔ wɔfee amɛ ejurɔ.—Efe. 4:2.
19-20. Mɛni hewɔ ebiɔ ni wɔto wɔtsui shi be ni wɔfee mɛi ejurɔ sɛɛ lɛ? (Kwɛmɔ mfoniri lɛ hu.)
19 Too otsui shi. Maŋtsɛ Solomon ni hiɛ kã shi waa lɛ wie akɛ: “Shɛ oblodo lɛ ofɔ̃ nui lɛ ahiɛ, ejaakɛ gbii babaoo sɛɛ lɛ, onine baashɛ nɔ ekoŋŋ.” (Jaj. 11:1) Ŋmalɛ nɛɛ hãa wɔnaa akɛ, bei komɛi lɛ kɛ́ wɔfee mɛi ejurɔ lɛ, “gbii babaoo sɛɛ” dani amɛbaajie hiɛsɔɔ kpo. Naa niiashikpamɔ ko ni hãa wɔnaa akɛ enɛ ji anɔkwale.
20 Afii babaoo ni eho nɛ lɛ, kpokpaa nɔkwɛlɔ ko ŋa ŋma wolo eyahã nyɛmi yoo ko ni no mli lɛ kpaako abaptisi lɛ. Ewo lɛ hewalɛ koni eya nɔ esɔmɔ Yehowa. Afii kpaanyɔ sɛɛ lɛ, nyɛmi yoo lɛ ŋma kpokpaa nɔkwɛlɔ lɛ ŋa lɛ wolo ni ekɛɛ lɛ akɛ: “Ekolɛ bo lɛ oleee, shi miitao maŋma bo wolo nɛɛ ni mahã ole bɔ ni oye obua mi waa ohã yɛ afii nɛɛ fɛɛ amli.” Ekɛfata he akɛ: “Nibii ni owie yɛ wolo lɛ mli lɛ ta mitsuiŋ waa, shi nɔ ni ta mitsuiŋ fe fɛɛ ji ŋmalɛ lɛ, ni mihiɛ kpako nɔ kɛbashi bianɛ.” a Nyɛmi yoo lɛ wie naagbai ni ekɛkpe yɛ afii nɛɛ fɛɛ amli lɛ ahe ni etsa nɔ akɛ: “Bei komɛi lɛ, minuɔ he akɛ mishi nɔ fɛɛ nɔ, mishi anɔkwale lɛ, nitsumɔi ni jwere minɔ lɛ—mishi nɔ fɛɛ nɔ kɛkɛ ni miya. Shi be fɛɛ be lɛ, mikaiɔ nakai ŋmalɛ lɛ, ni no woɔ mi hewalɛ ni miyaa nɔ misɔmɔɔ Yehowa.” Ewie hu akɛ: “Owolo lɛ kɛ nakai ŋmalɛ lɛ ji nɔ ni ehiɛ mimli yɛ afii nɛɛ fɛɛ amli.” Kɛ́ okwɛ lɛ, te kpokpaa nɔkwɛlɔ lɛ ŋa lɛ nu he ehã tɛŋŋ be ni enine shɛ wolo nɛɛ nɔ yɛ “gbii babaoo sɛɛ lɛ”? Ŋwanejee ko bɛ he akɛ, ená miishɛɛ waa! Nakai nɔŋŋ mɔ ko baanyɛ ejie hiɛsɔɔ kpo etsɔɔ wɔ be ni wɔfee lɛ ejurɔ be kplaŋŋ sɛɛ.
Kɛ́ wɔfee mɔ ko ejurɔ lɛ, ekolɛ be kplaŋŋ sɛɛ dani ebaajie hiɛsɔɔ kpo (Kwɛmɔ kuku 20) b
21. Mɛni hewɔ otswa ofai shi akɛ obaaya nɔ okase Yehowa ni ofee mɛi ejurɔ lɛ?
21 Tamɔ bɔ ni awie yɛ nikasemɔ nɛɛ shishijee lɛ, Yehowa bɔ wɔ bɔ ni kɛ́ wɔfee mɛi ejurɔ lɛ wɔnáa miishɛɛ waa fe kɛ́ mɛi fee wɔ ejurɔ. Kɛ́ wɔnyɛ wɔye wɔbua wɔnyɛmi Kristofonyo ko lɛ, wɔnáa miishɛɛ waa. Ni wɔnáa miishɛɛ hu kɛ́ amɛjie hiɛsɔɔ kpo. Shi kɛ́ amɛjie hiɛsɔɔ kpo jio, amɛjieee lɛ kpo jio, wɔnáa miishɛɛ waa, ejaakɛ wɔle akɛ wɔfee nɔ ni ja. Be fɛɛ be lɛ, kaimɔ akɛ ekɔɔɔ he eko nɔ ni okɛbaafee mɛi ejurɔ lɛ, “Yehowa baanyɛ ahã bo nɔ ni fe nakai aahu.” (2 Kro. 25:9) Wɔnyɛŋ wɔfee mɛi ejurɔ fe bɔ ni Yehowa baafee wɔ ejurɔ. Ni kɛ́ Yehowa jwere wɔ lɛ, nɔ ko nɔ ko bɛ ni fe no. No hewɔ lɛ, nyɛhãa wɔtswaa wɔfai shi akɛ, wɔbaaya nɔ wɔkase Yehowa, wɔ-Tsɛ ni yɔɔ ŋwɛi lɛ, ni wɔfee mɛi ejurɔ.
LALA 17 “Miisumɔ”
a Ŋmalɛ ni kpokpaa nɔkwɛlɔ lɛ ŋa lɛ ŋma ehã nyɛmi yoo lɛ ji 2 Yohane 8 lɛ. Jɛmɛ kɛɛ: “Nyɛkwɛa nyɛhe nɔ jogbaŋŋ, koni nibii ni wɔtsu nii wɔná lɛ akaŋmɛɛ nyɛ, shi moŋ nyɛná jweremɔnɔ muu lɛ fɛɛ.”
b NƆ NI WƆNAA YƐ MFONIRI LƐ MLI: Akɛ mfonirii nɛɛ miitsɔɔ nɔ ni kpokpaa nɔkwɛlɔ lɛ ŋa lɛ ni awie ehe yɛ kuku 20 lɛ mli lɛ fee lɛ. Eŋma wolo eyahã nyɛmi yoo ko kɛwo lɛ hewalɛ. Afii komɛi asɛɛ lɛ, nyɛmi yoo lɛ ŋma lɛ wolo kɛda lɛ shi.
