1-2. (a) Be ni bɔfo Paulo ŋma wolo eyahã Kristofoi ni yɔɔ Yudea lɛ, no mli lɛ mɛɛ shihilɛ mli amɛyɔɔ? (b) Mɛni hewɔ wɔbaanyɛ wɔkɛɛ akɛ nakai wolo lɛ ba yɛ be naa lɛ?

 YƐ Yesu gbele sɛɛ yɛ afi 33 Ŋ.B. lɛ, Kristofoi ni yɔɔ Yerusalem kɛ Yudea lɛ kɛ shihilɛi ni mli wawai srɔtoi babaoo kpe. Be ni atse Kristofoi asafo lɛ sɛɛ etsɛɛɛ lɛ, ate shi awo amɛ waa. (Bɔf. 8:1) No sɛɛ aaafee afii 20 lɛ, Kristo sɛɛnyiɛlɔi lɛ kɛ shika he naagbai kpe waa. Nɔ ni kɛ enɛ ba ji hɔmɔ ko ni ba he ni amɛyɔɔ lɛ. (Bɔf. 11:​27-30) Shi naagbai ni amɛkɛkpe yɛ aaafee afi 61 Ŋ.B. lɛ, jeee nɔ ko kwraa kɛ́ akɛto naagbai ni amɛkɛkpe yɛ no sɛɛ etsɛɛɛ lɛ he. Yɛ nakai afi lɛ mli nɔŋŋ lɛ, Yehowa kɛ emumɔ lɛ tsirɛ bɔfo Paulo ni eŋma wolo eyahã Kristofoi nɛɛ ni yɔɔ Yerusalem kɛ Yudea lɛ. Wolo nɛɛ, ni atsɛɔ lɛ Hebribii Awolo lɛ, saa amɛ eto nibii ni etsɛɛɛ tsɔ ni amɛkɛkpe lɛ.

² Wolo nɛɛ ba yɛ be naa waa, ejaakɛ etsɛɛɛ tsɔ ni toiŋjɔlɛ ni nakai Kristofoi lɛ yɔɔ lɛ sɛɛ fo. No mli lɛ nɔ ni Yesu gba akɛ abaakpãtã Yerusalem hiɛ lɛ miibɛŋkɛ. No hewɔ lɛ, ŋaa ni Paulo wo amɛ yɛ nakai wolo lɛ mli lɛ ye ebua amɛ koni amɛnyɛ amɛfi shi yɛ nakai amanehulu lɛ mli. (Luka 21:20) Be ni Paulo ŋma wolo nɛɛ, no mli lɛ, lɛ kɛ Kristofoi ni yɔɔ Yudea lɛ fɛɛ leee be tuuntu ni hiɛkpatamɔ nɛɛ baaba. Fɛɛ sɛɛ lɛ, Kristofoi nɛɛ baanyɛ amɛkɛ be ni kã amɛhiɛ dani amanehulu nɛɛ baaba lɛ atsu nii koni amɛkɛtswa amɛhe amɛma shi ni amɛná hemɔkɛyeli ni mli wa ni amɛnyɛ amɛfi shi.—Heb. 10:25; 12:​1, 2.

3. Mɛni hewɔ esa akɛ Kristofoi ni yɔɔ ŋmɛnɛ lɛ ana saji ni yɔɔ Hebribii Awolo lɛ mli lɛ akɛ ehe hiaa amɛ waa lɛ?

 ³ Wɔ hu etsɛŋ ni wɔkɛ amanehulu ko ni naa wa waa fe nɔ ni Kristofoi ni yɔɔ Yudea lɛ kɛkpe lɛ baakpe. (Mat. 24:21; Kpo. 16:​14, 16) No hewɔ lɛ, nyɛhãa wɔsusua ŋaawoi komɛi ni Yehowa kɛhã amɛ ni ye ebua amɛ ni ebaanyɛ eye ebua wɔ hu lɛ ahe.

“NYƐHÃA WƆYAA HIƐ KƐSHƐA DALƐ HE”

4. Mɛɛ tsakemɔi wuji komɛi ehe bahia ni Yudafoi ni ebatsɔmɔ Kristofoi lɛ afee? (Kwɛmɔ mfoniri lɛ hu.)

⁴ Ehe bahia ni Yudafoi ni ebatsɔmɔ Kristofoi lɛ afee tsakemɔi wuji komɛi, ni amɛnáaa enɛ feemɔ mlɛo kwraa. Be ko ni eho lɛ, Yudafoi nɛɛ ji Nyɔŋmɔ webii ni ehala amɛ. No mli lɛ, Yerusalem ji he ko ni he hiaa waa, ejaakɛ jɛmɛ maŋtsɛ ni yeɔ nɔ yɛ Yehowa najiaŋ lɛ yeɔ nɔ kɛjɛɔ. Ni agbɛnɛ hu, kɛ́ mɔ ko miitao ni ejá Yehowa lɛ, ja eba sɔlemɔ shĩa ni yɔɔ Yerusalem lɛ. Yudafoi anɔkwafoi lɛ fɛɛ yeɔ Mose Mla lɛ nɔ ni amɛkɛ nibii ni Yudafoi ajamɔŋ hiɛnyiɛlɔi lɛ tsɔɔ amɛ lɛ tsuɔ nii. Mlai nɛɛ ekomɛi kɔɔ niyenii, ketiafoo, kɛ bɔ ni esa akɛ amɛkɛ mɛi ni jɛ maji krokomɛi anɔ aye ahã lɛ he. Shi yɛ Yesu gbele sɛɛ lɛ, Yehowa biii ni etsuji anɔkwafoi ashã afɔlei yɛ sɔlemɔ shĩa lɛ dɔŋŋ. Enɛ bafee kaa wulu diɛŋtsɛ kɛhã Yudafoi ni ebatsɔmɔ Kristofoi ni amɛye Mose Mla lɛ nɔ afii babaoo lɛ. (Heb. 10:​1, 4, 10) Ebawa kɛhã Kristofoi ni he wa yɛ hemɔkɛyeli lɛ mli, tamɔ bɔfo Petro po, akɛ amɛkɛ tsakemɔi nɛɛ baatsu nii. (Bɔf. 10:​9-14; Gal. 2:​11-14) Tsakemɔi nɛɛ ahewɔ lɛ, jamɔŋ hiɛnyiɛlɔi lɛ wa Kristofoi nɛɛ ayi.

5. Mɛɛ shihilɛ Yudafoi ni ebatsɔmɔ Kristofoi lɛ kɛkpe ni baanyɛ ahã ewa kɛhã amɛ akɛ amɛbaaya nɔ amɛye Yehowa anɔkwa?

⁵ Kui srɔtoi enyɔ te shi amɛwo Yudafoi ni ebatsɔmɔ Kristofoi lɛ. Klɛŋklɛŋ kuu lɛ ji Yudafoi ajamɔŋ hiɛnyiɛlɔi lɛ. Amɛnu he akɛ Kristofoi nɛɛ ekwa Yuda jamɔ lɛ, no hewɔ lɛ amɛkɛ amɛ ye tamɔ jamɔkwalɔi. Kuu ni ji enyɔ lɛ ji Yudafoi ni ebatsɔmɔ Kristofoi lɛ nɔŋŋ ateŋ mɛi komɛi. Amɛnu he akɛ esa akɛ Kristofoi lɛ aya nɔ aye Mose Mla lɛ nɔ koni akawa amɛ yi. (Gal. 6:12) Mɛni baaye abua Kristofoi anɔkwafoi lɛ koni amɛya nɔ amɛye Yehowa anɔkwa?

6. Mɛni Paulo wo enyɛmimɛi Kristofoi lɛ hewalɛ ni amɛfee? (Hebribii 5:14–6:1)

 ⁶ Yɛ Hebribii Awolo lɛ mli lɛ, Paulo wo enyɛmimɛi Kristofoi lɛ hewalɛ koni amɛkase Nyɔŋmɔ Wiemɔ lɛ jogbaŋŋ ni amɛjwɛŋ nɔ. (Kanemɔ Hebribii 5:14–6:1.) Paulo tsɛ ŋmalɛi ayisɛɛ kɛjɛ Hebri Ŋmalɛ lɛ mli ni ekɛye ebua enyɛmimɛi Kristofoi lɛ koni amɛna akɛ, Kristofoi ajamɔ lɛ hi kwraa fe Yudafoi ajamɔ lɛ. a Ewo amɛ hewalɛ ni amɛkase ŋmalɛi lɛ jogbaŋŋ bɔ ni afee ni amɛnu anɔkwale lɛ shishi ni no aye abua amɛ ni amɛnyɛ amɛyɔse tsɔɔmɔi ni ejaaa ni amɛkpoo.

7. Mɛɛ shihilɛi wɔkɛkpeɔ ŋmɛnɛ ni baanyɛ ahã ewa kɛhã wɔ akɛ wɔbaasɔmɔ Yehowa jogbaŋŋ?

⁷ Tamɔ eba lɛ yɛ Yudafoi ni batsɔmɔ Kristofoi lɛ agbɛfaŋ lɛ, wɔ hu ŋmɛnɛ lɛ, mɛi wieɔ amɛshiɔ wɔ yɛ nibii ni Yehowa etsɔɔ wɔ akɛ eja kɛ nɔ ni ejaaa ni wɔhiɔ shi yɛ naa lɛ hewɔ. Mɛi wieɔ amɛshiɔ wɔ yɛ gbɛtsɔɔmɔ ni Biblia lɛ kɛhã yɛ bɔlɛnamɔ he ni wɔboɔ toi lɛ hewɔ. Bɔ ni mɛi susuɔ nii ahe yɛ je lɛ mli lɛ kɛ Yehowa susumɔi yɛ saji ahe lɛ kpãaa gbee kwraa. (Abɛi 17:15) Enɛ hewɔ lɛ, ehe miihia waa ni wɔyɔse susumɔi gbohii nɛɛ ni wɔtsi wɔhe kɛje he kwraa, kɛjeee nakai lɛ, ekãa ni wɔkɛsɔmɔɔ Yehowa lɛ naa baaba shi loo wɔbaakpa lɛ sɔɔmɔ kwraa.—Heb. 13:9.

8. Mɛni kɛ́ wɔfee lɛ, ebaahã wɔya wɔhiɛ kɛshɛ dalɛ he?

⁸ Ehe miihia waa ni wɔbo ŋaa ni Paulo wo Yudafoi ni ebatsɔmɔ Kristofoi lɛ toi, ni wɔ hu wɔya wɔhiɛ kɛshɛ dalɛ he. Enɛ biɔ ni wɔkase Biblia lɛ jogbaŋŋ koni wɔle Yehowa ni wɔsusu nii ahe tamɔ lɛ. Ni esa akɛ wɔya nɔ wɔfee enɛ be ni wɔjɔɔ wɔhe nɔ wɔhã Yehowa ni abaptisi wɔ lɛ sɛɛ po. Ekɔɔɔ he eko afii abɔ ni wɔkɛsɔmɔ Yehowa lɛ, esa akɛ wɔya nɔ wɔkane Nyɔŋmɔ Wiemɔ lɛ daa gbi ni wɔjwɛŋ nɔ. (Lala 1:2) Kɛ́ wɔfee nakai lɛ, ebaaye ebua wɔ ni wɔná su ko ni Paulo wie he waa yɛ wolo ni eŋma eyahã Kristofoi ni yɔɔ Yudea kɛ Yerusalem lɛ mli; nakai su lɛ ji, hemɔkɛyeli.—Heb. 11:​1, 6.

“WƆJI MƐI NI YƆƆ HEMƆKƐYELI NI HÃA ABAA AMƐWALA YI”

9. Mɛni hewɔ ehe bahia ni Kristofoi ni yɔɔ Yudea kɛ Yerusalem lɛ aná hemɔkɛyeli ni mli wa lɛ?

⁹ Ehe bahia ni Kristofoi ni yɔɔ Yudea lɛ aná hemɔkɛyeli ni mli wa waa koni amɛnyɛ amɛdamɔ amanehulu ni baaba Yudea nɔ lɛ naa. (Heb. 10:​37-39) Mɛni hewɔ? Nɔ hewɔ lɛ ji akɛ, Yesu bɔ esɛɛnyiɛlɔi lɛ kɔkɔ akɛ, kɛ́ amɛna akɛ asraafoi ebɔ nsara ewo Yerusalem he lɛ, amɛjo foi kɛya gɔji lɛ anɔ. Kɔkɔbɔɔ nɛɛ kɔɔɔ Kristofoi ni yɔɔ Yerusalem maŋ lɛ mli lɛ pɛ ahe, shi ekɔɔ mɛi hu ni yɔɔ Yudea akrowai lɛ amli lɛ hu ahe. (Luka 21:​20-24) Yɛ nakai beiaŋ lɛ, kɛ́ asraafoi yatutua akrowai lɛ, mɛi ni yɔɔ akrowai lɛ amli lɛ joɔ foi kɛyaa maji ni atswa gbogboi awo amɛhe, tamɔ Yerusalem nɛkɛ lɛ amli. No hewɔ lɛ, ebafee tamɔ nɔ ni nilee bɛ kɔkɔ ni Yesu bɔ Kristofoi ni yɔɔ Yerusalem lɛ akɛ amɛshi maŋ lɛ mli kɛya gɔji lɛ anɔ lɛ mli, ni ehe bahia ni amɛná hemɔkɛyeli ni mli wa waa dani amɛbo Yesu toi.

10. Kɛ́ Kristofoi lɛ ná hemɔkɛyeli ni mli wa lɛ, mɛni no baatsirɛ amɛ ni amɛfee? (Hebribii 13:17)

¹⁰ Agbɛnɛ hu, ehe bahia ni Yudafoi ni ebatsɔmɔ Kristofoi lɛ ahe mɛi ni Yesu ehala ni amɛnyiɛ hiɛ yɛ asafo lɛ mli lɛ amɛye waa. Ekã shi faŋŋ akɛ, mɛi ni nyiɛɔ hiɛ yɛ asafo lɛ mli yɛ nakai beiaŋ lɛ kɛ gbɛtsɔɔmɔi pɔtɛi hã nyɛmimɛi lɛ koni amɛle be ni esa akɛ amɛshi kɛ bɔ ni esa akɛ amɛya lɛ amɛhã. (Kanemɔ Hebribii 13:17.) Greek wiemɔ ni akɛtsu nii yɛ  Hebribii 13:17 akɛ ‘nyɛboa toi’ lɛ kɔɔ mɔ ko ni boɔ gbɛtsɔɔmɔ ko toi akɛni eheɔ mɔ ni kɛ gbɛtsɔɔmɔ lɛ hãa lɛ lɛ eyeɔ lɛ hewɔ. No hewɔ lɛ, jeee hegbɛ ni mɔ ni kɛ gbɛtsɔɔmɔ lɛ hãa lɛ lɛ yɔɔ lɛ hewɔ eboɔ lɛ toi lɛ, shi he ni eheɔ lɛ eyeɔ lɛ moŋ hewɔ. Enɛ hewɔ lɛ, ehe bahia ni Kristofoi ni yɔɔ Yudea kɛ Yerusalem lɛ ahe asafoŋ onukpai lɛ amɛye dani amanehulu lɛ aje shishi. Kɛ́ amɛboɔ asafoŋ onukpai lɛ agbɛtsɔɔmɔ toi be ni amanehulu lɛ bako lɛ, ebaafee mlɛo kɛhã amɛ akɛ amɛbaafee nakai kɛ́ amanehulu lɛ ba.

11. Mɛni hewɔ ehe miihia ni ŋmɛnɛ lɛ, wɔná hemɔkɛyeli ni mli wa lɛ?

¹¹ Wɔ hu ŋmɛnɛ lɛ, ehe miihia ni wɔná hemɔkɛyeli ni mli wa waa. Ŋmɛnɛ lɛ, mɛi pii heee amɛyeee akɛ jeŋ fɔŋ nɛɛ naagbee ebɛŋkɛ, ni amɛyeɔ wɔhe fɛo po akɛ wɔheɔ enɛ wɔyeɔ. (2 Pet. 3:​3, 4) Agbɛnɛ hu, eyɛ mli akɛ Biblia lɛ etsɔɔ bɔ ni nibii baaya lɛ yɛ amanehulu kpeteŋkpele lɛ mli moŋ, shi nibii babaoo yɛ ni wɔleee lolo. Esa akɛ wɔná hemɔkɛyeli ni mli wa akɛ, jeŋ fɔŋ nɛɛ naagbee lɛ baaba yɛ be ni Yehowa eto lɛ naa pɛpɛɛpɛ, ni agbɛnɛ hu, Yehowa baabu wɔhe yɛ nakai be lɛ mli.—Hab. 2:3.

12. Mɛni baaye abua wɔ ni wɔtsɔ amanehulu kpeteŋkpele lɛ mli shweshweeshwe?

¹² Esa akɛ wɔhe mɛi ni Yehowa tsɔɔ amɛnɔ etsɔɔ wɔ gbɛ, ni ji “nyɔŋ anɔkwafo kɛ hiɛshikalɔ lɛ” wɔye waa. (Mat. 24:45) Bɔ ni eeenyɛ efee akɛ akɛ gbɛtsɔɔmɔi pɔtɛi hã Kristofoi ni yɔɔ Yudea kɛ Yerusalem be ni Roma asraafoi lɛ babɔle Yerusalem he kɛkpe lɛ, nakai nɔŋŋ ekolɛ akɛ gbɛtsɔɔmɔi pɔtɛi komɛi baahã wɔ ni baabaa wɔyi kɛ́ amanehulu kpeteŋkpele lɛ je shishi. Bianɛ ji be ni esa akɛ wɔhe mɛi ni Yehowa ehala ni amɛnyiɛ hiɛ yɛ asafo lɛ mli lɛ wɔye waa ni wɔbo amɛgbɛtsɔɔmɔi toi. Kɛ́ bianɛ lɛ, ewa kɛhã wɔ akɛ wɔbaabo amɛgbɛtsɔɔmɔi toi lɛ, nakai nɔŋŋ ebaawa kɛhã wɔ yɛ amanehulu kpeteŋkpele lɛ mli.

13. Mɛni hewɔ ehi waa akɛ Paulo ŋma sane ni yɔɔ Hebribii 13:5 lɛ ehã Kristofoi ni yɔɔ Yerusalem kɛ Yudea lɛ?

¹³ Ehe bahia ni Yudafoi ni ebatsɔmɔ Kristofoi lɛ akwɛ amɛhe nɔ jogbaŋŋ koni ‘shikasuɔmɔ akaba amɛshihilɛ mli’ be ni amanehulu ni agba akɛ ebaaba lɛ bako lɛ. (Kanemɔ Hebribii 13:5.) Yɛ nɛkɛ be nɛɛ mli lɛ, amɛteŋ mɛi komɛi miiye ohia, ni amɛteŋ mɛi komɛi hu epiŋ waa yɛ hɔmɔ hewɔ. (Heb. 10:​32-34) Eyɛ mli akɛ be ko ni eho lɛ, amɛfi shi yɛ sane kpakpa lɛ hewɔ moŋ, shi yɛ nɛkɛ be nɛɛ mli lɛ, amɛteŋ mɛi komɛi ebɔi shika sɛɛtiumɔ bɔ ni afee ni wɔsɛɛ lɛ amɛkaye ohia. Shi kɛ́ abakpãtã Yerusalem hiɛ lɛ, shika abɔ ko bɛ ni baanyɛ abaa amɛwala yi. (Yak. 5:3) Anɔkwa, ebaawa kɛhã mɛi ni miitiu heloonaa nibii asɛɛ lɛ akɛ amɛbaajo foi amɛshi amɛshĩai kɛ nibii ni amɛyɔɔ lɛ kɛ́ Roma asraafoi lɛ babɔle Yerusalem he kɛkpe.

14. Kɛ́ wɔyɛ hemɔkɛyeli ni mli wa lɛ, mɛɛ gbɛ nɔ no baaye abua wɔ ni wɔkpɛ yiŋ kpakpa yɛ heloonaa nibii ahe?

¹⁴ Kɛ́ wɔheɔ wɔyeɔ waa akɛ jeŋ fɔŋ nɛɛ naagbee ebɛŋkɛ lɛ, wɔtiuŋ heloonaa nibii asɛɛ. Yɛ amanehulu kpeteŋkpele lɛ mli lɛ, mɛi ‘baashɛrɛ amɛjwiɛtɛi lɛ amɛshwie gbɛjegbɛi lɛ anɔ.’ Nɔ hewɔ lɛ ji, amɛbaayɔse akɛ “amɛjwiɛtɛi kɛ amɛshika tsuru lɛ nyɛŋ ahere amɛ yɛ Yehowa mlifu gbi lɛ nɔ.” (Eze. 7:19) Nɔ najiaŋ ni wɔkɛ wɔjwɛŋmɔ baama shika babaoo taomɔ nɔ lɛ, esa akɛ wɔfee nibii ni baahã wɔná be babaoo kɛsɔmɔ Yehowa, ni yɛ nakai beiaŋ nɔŋŋ lɛ, wɔnyɛ wɔkwɛ wɔhe kɛ wɔweku lɛ. Agbɛnɛ hu, esa akɛ wɔkwɛ jogbaŋŋ koni wɔkafili nii loo wɔyafee nibii ni baahã wɔmɔ nyɔmɔ bɔ ni esaaa, ni esa akɛ wɔkwɛ jogbaŋŋ koni heloonaa nibii ni wɔyɔɔ lɛ hu akuramɔ akahe wɔbe fɛɛ. Kɛfata he lɛ, esa akɛ wɔkwɛ jogbaŋŋ koni heloonaa nibii ni wɔyɔɔ lɛ akahe wɔtsui fɛɛ. (Mat. 6:​19, 24) Be ni naagbee lɛ bɛŋkɛɔ nɛɛ, kɛ́ wɔkwɛɛɛ ni ahi lɛ, heloonaa nibii  asɛɛtiumɔ baahã ewa kɛhã wɔ akɛ wɔkɛ wɔhiɛ baafɔ̃ Yehowa nɔ.

“SHIFIMƆ HE EHIA NYƐ”

15. Mɛni hewɔ ehe bahia ni Kristofoi ni yɔɔ Yudea lɛ afi shi waa lɛ?

¹⁵ Ehe bahia ni Kristofoi ni yɔɔ Yudea lɛ afi shi waa be ni Yerusalem hiɛkpatamɔ lɛ bɛŋkɛɔ lɛ. (Heb. 10:36) Eyɛ mli akɛ awa amɛteŋ mɛi komɛi ayi waa moŋ, shi amɛteŋ mɛi babaoo kɛ nakai shihilɛ lɛ eko ekpeee. No hewɔ lɛ, Paulo wo amɛ ŋaa ni amɛsaa amɛjwɛŋmɔ amɛto yiwaa, ni amɛtswa amɛfai shi akɛ amɛbaaye anɔkwa kɛyashi gbele mli tamɔ Yesu fee lɛ. (Heb. 12:4) Akɛni mɛi babaoo miitsɔmɔ Kristofoi hewɔ lɛ, Yudafoi lɛ ateŋ mɛi babaoo amli efu ni amɛmiitao ni amɛwa Kristofoi lɛ ayi waa. Afii fioo komɛi ni tsɔ be nɛɛ hiɛ lɛ, Yudafoi komɛi te shi amɛwo Paulo waa yɛ shiɛmɔ ni eshiɛɔ yɛ Yerusalem lɛ hewɔ. Yudafoi 40 kɛ sɛɛ kã “amɛhe kitã kɛ loomɔ akɛ, amɛyeŋ nii ni amɛnuŋ nɔ ko ja amɛgbe Paulo.” (Bɔf. 22:22; 23:​12-14) Yɛ bɔ ni anyɛɔ Kristofoi lɛ ni awaa amɛ yi lɛ fɛɛ sɛɛ lɛ, esa akɛ amɛya nɔ amɛkpe kɛjá Nyɔŋmɔ, amɛshiɛ sane kpakpa lɛ, ni amɛfee nibii ni baahã amɛhemɔkɛyeli lɛ mli awa.

16. Mɛɛ gbɛ nɔ wolo ni Paulo ŋma eyahã Kristofoi ni yɔɔ Yudea lɛ baanyɛ aye abua wɔ ni wɔna akɛ, kɛ́ aawa wɔ yi ni wɔfi shi lɛ nɔ ko kpakpa baanyɛ ajɛ mli kɛba? (Hebribii 12:7)

¹⁶ Mɛni baaye abua Kristofoi ni yɔɔ Yudea lɛ ni amɛfi shi yɛ shi ni ateɔ awoɔ amɛ lɛ fɛɛ sɛɛ? Paulo miitao ni Kristofoi lɛ ana akɛ, kɛ́ amɛfi shi lɛ, amɛbaaná he sɛɛ. No hewɔ lɛ, ehã amɛna akɛ, Nyɔŋmɔ baanyɛ atsɔ shihilɛi ni mli wawai ni amɛkɛkpeɔ lɛ anɔ etsɔse amɛ koni amɛhe awa yɛ hemɔkɛyeli lɛ mli. (Kanemɔ Hebribii 12:7.) Tsɔsemɔ ni tamɔ nɛkɛ baanyɛ aye abua amɛ ni amɛná sui kpakpai ni baahã Yehowa aná amɛhe miishɛɛ. Kɛ́ Kristofoi nɛɛ kɛ amɛjwɛŋmɔ ma nibii kpakpai ni baanyɛ ajɛ amɛshifimɔ lɛ mli kɛba lɛ anɔ lɛ, no baaye abua amɛ ni amɛya nɔ amɛfi shi.—Heb. 12:11.

17. Mɛni Paulo ekase yɛ bɔ ni afeɔ afiɔ shi yɛ yiwaa mli lɛ he?

 ¹⁷ Paulo wo Kristofoi ni yɔɔ Yudea lɛ hewalɛ koni kɛ́ amɛkɛ kaa kpe lɛ, amɛmia amɛhiɛ amɛfi shi. Eji mɔ ko ni sa waa ni baanyɛ ewo Kristofoi nɛkɛ ŋaa. Mɛni hewɔ? Ejaakɛ ewa Kristofoi lɛ ayi pɛŋ, ni ele bɔ ni mɛi feɔ Kristofoi lɛ niseniianii amɛhãa. Agbɛnɛ hu, be ni ebatsɔ Kristofonyo lɛ, ate shi awo lɛ waa ni awa lɛ yi yɛ gbɛi srɔtoi anɔ. No hewɔ lɛ, ele bɔ ni afiɔ shi kɛ́ aawa mɔ ko yi. (2 Kor. 11:​23-25) Paulo le nɔ ni baanyɛ aye abua mɔ ko ni enyɛ efi shi. Ekɛɛ Kristofoi lɛ akɛ, kɛ́ amɛmiitao amɛfi shi yɛ shihilɛi ni mli wawai amli lɛ, esaaa akɛ amɛkɛ amɛhe fɔ̃ɔ amɛhe nɔ, shi moŋ esa akɛ amɛkɛ amɛhe afɔ̃ Yehowa nɔ. Enɛ ni Paulo fee lɛ ni hã ená ekãa ni ekɛɛ akɛ: “Yehowa ji miyelikɛbualɔ; misheee gbeyei” lɛ.—Heb. 13:6.

18. Mɛni wɔ fɛɛ wɔbaanyɛ wɔkɛkpe wɔsɛɛ? Ni mɛni esa akɛ wɔfee bianɛ kɛsaa wɔhe wɔto?

¹⁸ Bianɛ lɛ, aawa wɔnyɛmimɛi lɛ ekomɛi ayi, ni amɛmiimia amɛhiɛ amɛmiifi shi. Nɔ kome ni wɔbaanyɛ wɔfee kɛtsɔɔ akɛ wɔsumɔɔ amɛ ji, ni wɔbaasɔle wɔhã amɛ, ni agbɛnɛ hu, wɔhã amɛ nibii ni he hiaa amɛ lɛ. (Heb. 10:33) Shi Biblia lɛ hãa wɔleɔ faŋŋ akɛ, “mɛi fɛɛ ni taoɔ akɛ amɛhi shi yɛ Nyɔŋmɔjamɔ naa yɛ Kristo Yesu mli lɛ, abaawa amɛ hu yi.” (2 Tim. 3:12) Enɛ hewɔ lɛ, esa akɛ wɔ fɛɛ wɔsaa wɔhe wɔto yiwaa. Nyɛhãa wɔyaa nɔ wɔkɛ wɔhiɛ afɔ̃a Yehowa nɔ kwraa, ni wɔhe wɔye akɛ ekɔɔɔ he eko shihilɛ ni wɔkɛbaakpe lɛ, ebaaye ebua wɔ ni wɔfi shi. Etsɛŋ tsɔ, ebaahã mɛi fɛɛ ni yeɔ lɛ anɔkwa lɛ ahe ajɔ amɛ.—2 Tes. 1:​7, 8. 

19. Mɛɛ nibii kɛ́ wɔfee lɛ ebaaye ebua wɔ ni wɔsaa wɔhe wɔto amanehulu kpeteŋkpele lɛ? (Kwɛmɔ mfoniri lɛ hu.)

¹⁹ Ŋwanejee ko bɛ he akɛ, Hebribii Awolo lɛ ni Paulo ŋma lɛ ye ebua blema Kristofoi lɛ ni amɛsaa amɛhe amɛto amanehulu ni kã amɛhiɛ lɛ. Paulo wo enyɛmimɛi Kristofoi lɛ hewalɛ ni amɛkase Biblia lɛ jogbaŋŋ koni amɛnyɛ amɛnu anɔkwale lɛ shishi. Kɛ́ amɛfee nakai lɛ, no baaye abua amɛ ni amɛyɔse tsɔɔmɔi ni baanyɛ ahã amɛhemɔkɛyeli lɛ mli agbɔjɔ lɛ koni amɛkpoo. Agbɛnɛ hu, ewo amɛ hewalɛ ni amɛfee nibii ni baahã amɛhemɔkɛyeli lɛ mli awa, bɔ ni afee ni amɛbo gbɛtsɔɔmɔi ni Yesu kɛhã kɛ gbɛtsɔɔmɔi ni mɛi ni nyiɛɔ hiɛ yɛ asafo lɛ mli lɛ kɛhãa lɛ toi oya. Ni eye ebua enyɛmimɛi Kristofoi lɛ koni amɛfi shi kɛ́ amɛkɛ shihilɛ ni mli wa kpe, ni amɛna shihilɛi nɛɛ akɛ gbɛ ni Yehowa, amɛ-Tsɛ ni sumɔɔ amɛ lɛ, miitsɔ nɔ eetsɔse amɛ. Nyɛhãa wɔ hu wɔkɛ ŋaawoi nɛɛ ni jɛ Biblia lɛ mli lɛ atsua nii. Kɛ́ wɔfee nakai lɛ, no baaye abua wɔ ni wɔfi shi kɛyashi naagbee.—Heb. 3:14.