Maŋtsɛyeli Jajelɔi Bɔ Amaniɛ

Ena Yiŋtoo yɛ Shihilɛ Mli

YESU kɛɛ ele etooi lɛ. (Yohane 10:14) Kɛ mɔ ko yɛ tsui kpakpa, ni eyɛ suɔmɔ kɛha toiŋjɔlɛ kɛ jalɛ lɛ, no lɛ nakai mɔ lɛ baatsi ebɛŋkɛ Yesu sɛɛnyiɛlɔi lɛ. Gbɔmɔ ni tamɔ nɛkɛ lɛ baana yiŋtoo yɛ shihilɛ mli, taakɛ yoo ko fee yɛ Belgium lɛ. Esane lɛ nɛ:

“Beni Yehowa Odasefoi batswa mishinaa lɛ, no mli lɛ miyɛ jwɛŋmɔŋ nɔnyɛɛ shishi, ni miisusu akɛ mafo miwala sɛɛ kwraa. Mina nɔ ni Odasefoi lɛ wie yɛ nɛkɛ jeŋ fɔŋ nɛɛ mli naagbai anaa tsabaa namɔ he lɛ he miishɛɛ, shi misumɔɔɔ nɔ ni amɛkɛɛ, akɛ Nyɔŋmɔ yɛ gbɛfaŋnɔ yɛ mli lɛ kwraa. Mikpa sɔlemɔ yaa nɛɛ afii kpaanyɔ sɔŋŋ nɛ, ejaakɛ misumɔɔɔ osatofeemɔ ni minaa yɛ jɛmɛ lɛ. Shi, yɛ Odasefoi lɛ agbɛfaŋ lɛ, miyoo anɔkwale yɛ nɔ ni amɛkɛ mi wie lɛ mli, ni mibayoo akɛ, bɔ fɛɛ bɔ ni wɔɔfee lɛ, wɔnyɛŋ wɔhi shi kɔkɔɔkɔ ni Nyɔŋmɔ fataaa he.

“Shi dɔlɛ sane ji akɛ, yɛ saramɔ fioo ko sɛɛ lɛ, minaaa Odasefoi lɛ dɔŋŋ. Mibahao waa. Mishɛreɔ zigaret adekai enyɔ daa gbi, ni mibɔi tsofai fɔji po kɛ nitsumɔ. Akɛni miitao ni mikɛ minii ni egbo lɛ awie hewɔ lɛ, mikɛ mihe yawo mumɔi atsɛmɔ nifeemɔi amli. Kwɛ bɔ ni mitsui fa waa, beni mina akɛ daimonioi miitutua mi gbɛkɛ ko beni mikome pɛ miyɔɔ lɛ. Enɛ tee nɔ aahu nyɔji abɔ. Daa gbɛkɛ lɛ, misheɔ gbeyei waa akɛ mikome pɛ mahi shi.

“Kɛkɛ ni gbi ko lɛ, mije kpo akɛ miyashera shi, ni mitsɔ he kroko kwraa ni jeee jɛmɛ mitsɔɔ daa, ni mibashɛ tsu agbo ko ni aama he. Nɔ ni fee mi naakpɛɛ ji akɛ, mina akɛ mɛi babaoo yɛ jɛmɛ. Ní mibɛŋkɛ amɛ lɛ, mina akɛ Yehowa Odasefoi ni, ni amɛmiima Maŋtsɛyeli Asa. Mikai saramɔ ni Odaseioi basara mi gbi ko yɛ mi diɛŋtsɛ mishia lɛ, ni misusu bɔ ni eeefee miishɛɛ waa eha, kɛ je lɛ fɛɛ baahi shi tamɔ bɔ ni nɛkɛ gbɔmɛi nɛɛ yɔɔ lɛ he.

“Miitao waa diɛŋtsɛ ni Odasefoi abasara mi yɛ mishia lɛ ekoŋŋ, no hewɔ lɛ mikɛ mɛi ni maa tsu lɛ ateŋ mɛi komɛi wie. Misɔle miha Nyɔŋmɔ, ni gbii nyɔŋma sɛɛ lɛ, nuu ni ba miŋɔɔ klɛŋklɛŋ lɛ ba mishinaa lɛ naa. Ekɛɛ mi akɛ eesumɔ ni wɔtsa wɔ Biblia kasemɔ lɛ nɔ, ni mikɛ miishɛɛ kpɛlɛ nɔ. Amrɔ nɔŋŋ ni efɔ mi nine kɛtee kpeei ashishi yɛ Maŋtsɛyeli Asa lɛ nɔ. Mikpɛlɛ no hu nɔ. Minako nɔ ko ni tamɔ nakai da! Mitao gbɔmɛi ni sumɔɔ amɛhe ni amɛyɔɔ miishɛɛ hu lɛ aahu. Ni amrɔ nɛɛ naa amɛ!

“Kɛjɛ no sɛɛ lɛ, mitee kpeei lɛ eko fɛɛ eko. Aaafee otsii etɛ sɛɛ lɛ, mikpa zigaret shɛremɔ su gbonyo lɛ kwraa. Mishɛrɛ miwoji ni kɔɔ ŋulamiiaŋkwɛmɔ he lɛ kɛ lalai ni kɔɔ Satan jamɔ he lɛ fɛɛ mishwie, ni mibɔi henumɔ akɛ hewalɛ ni kulɛ daimonioi lɛ yɔɔ yɛ minɔ lɛ miiba shi. Mijaje mishihilɛ yɛ Yehowa Biblia shishitoo mlai lɛ anaa, ni yɛ nyɔji etɛ sɛɛ lɛ, mibɔi sanekpakpa lɛ shiɛmɔ. Yɛ nyɔji ekpaa sɛɛ lɛ, abaptisi mi. Mibaptisimɔ lɛ sɛɛ gbii enyɔ mli lɛ, mije gbɛgbalɔi awalɔi asɔɔmɔ lɛ shishi.

“Miida Yehowa shi yɛ nibii kpakpai fɛɛ ni efee eha mi lɛ he. Yiŋtoo eba mishihilɛ mli agbɛnɛ. Hɛɛ, mɔɔ ni wa ji Yehowa gbɛi lɛ, ni mina abobaa he kɛ hebuu yɛ mli. (Abɛi 18:10) Lɛlɛŋ, minuɔ he tamɔ lalatsɛ lɛ nu he beni eŋma Lala 84:11 lɛ, akɛ: ‘Gbi kometoo ni aaaye yɛ okpoi lɛ anɔ lɛ ehi fe gbii akpe; miisumɔ ni maka mi-Nyɔŋmɔ we lɛ shinaa lɛ shi moŋ fe nɔ ni mahi shi yɛ efɔŋfeemɔ buui lɛ amli.’”

Nɛkɛ yoo ni tsui mli jɔ nɛɛ na yiŋtoo yɛ shihilɛ mli. Ni nakai nɔŋŋ ji mɔ fɛɛ mɔ ni kɛ tsui kpakpa taoɔ Yehowa sɛɛ gbɛ.