Mɛi Heei ni Akɛ Amɛ Ebafata Nɔyeli Kuu lɛ He
Mɛi Heei ni Akɛ Amɛ Ebafata Nɔyeli Kuu lɛ He
YƐ Hɔɔ, October 2, 1999, beni agbe Watch Tower Bible and Tract Society of Pennsylvania Daa Afi Kpee lɛ naa lɛ, akɛ adafitswaa ko ni akpaaa gbɛ mu nifeemɔ lɛ naa. Mɛi ni ba kpee lɛ shishi lɛ kɛ mɛi ni akɛ tɛlifoŋ kpãai tsu nii koni amɛbo toi ni amɛ fɛɛ amɛyibɔ ji 10,594 lɛ, ná miishɛɛ waa beni amɛnu ákɛ akɛ mɛi heei ejwɛ ebafata Yehowa Odasefoi a-Nɔyeli Kuu lɛ he lɛ. Mɛi heei lɛ, ní amɛ fɛɛ amɛji Kristofoi ni afɔ amɛ mu lɛ ji Samuel F. Herd; M. Stephen Lett; Guy H. Pierce; kɛ David H. Splane.
• Samuel Herd bɔi gbɛgbamɔ nitsumɔ lɛ yɛ afi 1958, ni kɛjɛ afi 1965 kɛyashi afi 1997 lɛ, etsu nii akɛ kpokpaa nɔkwɛlɔ kɛ kpokpaa wulu nɔkwɛlɔ. No sɛɛ lɛ, lɛ kɛ eŋa Gloria etee nɔ amɛfata United States Betel weku lɛ he, ni Nyɛminuu Herd tsuɔ nii yɛ Sɔɔmɔ Nitsumɔhe lɛ. Eesɔmɔ hu akɛ yelikɛbualɔ kɛha Sɔɔmɔ Ajinafoi Akuu lɛ.
• Stephen Lett bɔi gbɛgbamɔ yɛ December afi 1966, ni kɛjɛ afi 1967 kɛyashi afi 1971 lɛ, esɔmɔ yɛ Betel yɛ United States. Yɛ October afi 1971 lɛ, ekɛ eŋa Susan bote gbalashihilɛ mli, ni esɔmɔ akɛ gbɛgbalɔ krɛdɛɛ. Kɛjɛ afi 1979 kɛyashi afi 1998 lɛ, esɔmɔ akɛ kpokpaa nɔkwɛlɔ. Kɛjɛ April afi 1998 lɛ, lɛ kɛ Susan etee nɔ amɛfata United States Betel weku lɛ he. Etsu nii yɛ Sɔɔmɔ Nitsumɔhe lɛ, ni etsu nii akɛ yelikɛbualɔ kɛha Nitsɔɔmɔ Ajinafoi Akuu lɛ.
• Guy Pierce fɔ́ bii, kɛkɛ ni ekɛ eŋa bɔi gbɛgbamɔ yɛ April afi 1982. Esɔmɔ akɛ kpokpaa nɔkwɛlɔ kɛjɛ afi 1986 kɛyashi afi 1997, ni no sɛɛ lɛ, lɛ kɛ eŋa Penny bafata Brooklyn Betel weku lɛ he. Nyɛminuu Pierce etee nɔ esɔmɔ akɛ yelikɛbualɔ kɛha Nitsulɔi Anɔkwɛmɔ Ajinafoi Akuu lɛ.
• David Splane bɔi gbɛgbamɔ yɛ September afi 1963. Egbe Gilead klas ni ji 42 lɛ naa, ni esɔmɔ akɛ maŋsɛɛ sanekpakpa shiɛlɔ yɛ Senegal yɛ Afrika, kɛkɛ ni ekɛ afii 19 tsu nii akɛ kpokpaa nɔkwɛlɔ yɛ Canada. Lɛ kɛ eŋa Linda ehi Betel yɛ United States kɛjɛ afi 1990 kɛyaa, ni Nyɛminuu Splane etsu nii yɛ Sɔɔmɔ kɛ Niŋmaa nitsumɔhei lɛ. Kɛjɛ afi 1998 kɛbaa lɛ, etee nɔ efee yelikɛbualɔ kɛha Niŋmaa Ajinafoi Akuu lɛ.
Amrɔ nɛɛ mɛi ni yɔɔ Nɔyeli Kuu lɛ mli kɛfata mɛi heei ejwɛ lɛ ahe ji C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, kɛ D. Sydlik. Eji mɔ fɛɛ mɔ sɔlemɔ akɛ Yehowa baaya nɔ ajɔɔ Nɔyeli Kuu ni aha emli bii efá amrɔ nɛɛ lɛ, ní ewo amɛ hewalɛ yɛ be mli ni amɛyaa nɔ amɛkwɛɔ Nyɔŋmɔ webii lɛ anitsumɔi anɔ yɛ jeŋ fɛɛ koni amɛtsu amɛ mumɔŋ hiamɔ nii ahe nii lɛ.