Wala Shihilɛ He Sane

Ni Wɔɔkai Wɔ Bɔlɔ lɛ Kɛjɛ Wɔgbekɛbiiashi

TAAKƐ DAVID Z. HIBSHMAN GBA

“Kɛ migbo ŋmɛnɛ po lɛ, mile diɛŋtsɛ akɛ miye Yehowa anɔkwa. Miikpa lɛ fai koni ekwɛ David nɔ eha mi. Yehowa, miida bo shi akɛ okwɛ enɔ, kɛ wɔgbalashihilɛ lɛ. Eyɛ naakpɛɛ kɛ miishɛɛ waa diɛŋtsɛ!”

SUSUMƆ bɔ ni minu he miha beni miyafu miŋa miba sɛɛ mli yɛ March 1992 mli ni mibana nɛkɛ naagbee niŋmaa nɛɛ yɛ ewolo ni eŋmalaa saji ewoɔ mli lɛ mli lɛ. Nyɔji enumɔ pɛ nɛ ni wɔye Helen be-fɛɛ sɔɔmɔ nitsumɔ lɛ he gbi jurɔ ni ji afii 60 lɛ.

Mikaiɔ gbi ni mikɛ Helen ta shi yɛ Columbus, Ohio, U.S.A. kpee lɛ shishi yɛ afi 1931 mli lɛ jogbaŋŋ diɛŋtsɛ. No mli lɛ Helen yeko afii 14 moŋ shi ehiɛ sɔ sɛɛnamɔi ni yɔɔ nakai nifeemɔ ni tee nɔ lɛ mli kwraa po fe mi. Ekãa ni Helen yɔɔ yɛ sɔɔmɔ nitsumɔ lɛ mli lɛ bafee faŋŋ yɛ no sɛɛ nɔŋŋ beni ekɛ emami ni ji okulafo lɛ batsɔmɔ daa gbɛgbalɔi taakɛ ale shiɛlɔi ni kɛ amɛbe fɛɛ sɔmɔɔ yɛ Yehowa Odasefoi ateŋ lɛ. Amɛhɔɔ amɛshia fɛfɛo lɛ ni amɛyashiɛ yɛ akrowai ni yɔɔ United States wuoyigbɛ lɛ.

Mi Kristofoi a-Gboshinii Lɛ

Yɛ afi 1910 mli lɛ, mifɔlɔi kɛ minyɛmimɛi bibii enyɔ lɛ fã kɛtee Pennsylvania bokagbɛ kɛtee Grove Maŋtiase ni yɔɔ maŋ lɛ anaigbɛ lɛ. Jɛmɛ amɛyahai tsũ ko ni bɛ fɛo ni aheee nyɔmɔwoo babaoo yɛ, ni amɛbatsɔmɔ Reformed Church lɛ mli bii ni yɔɔ ekãa. Etsɛɛɛ ni William Evans, ni ji Biblia Kaselɔ taakɛ atsɛɔ Yehowa Odasefoi yɛ nakai beaŋ lɛ basara amɛ. No mli lɛ, Ataa ni eye afii 20 kɛyaa lɛ kɛ Awo ni Ataa ye lɛ onukpa afii enumɔ lɛ bo nɛkɛ Welshnyo ni yɔɔ amɛhe miishɛɛ lɛ toi ni amɛfɔ̃ lɛ nine kɛha niyeli. Etsɛɛɛ ni amɛkpɛlɛ Biblia mli anɔkwalei ní amɛkaseɔ lɛ nɔ.

Bɔni afee ni weku lɛ kɛ asafo lɛ teŋ akajɛkɛ tsɔ lɛ, Ataa ha weku lɛ fã kɛtee Sharon maŋ ni kɛ jɛmɛ jɛkɛmɔ aaafee kilomitai 40 lɛ mli. Nyɔji fioo komɛi asɛɛ lɛ, yɛ afi 1911 loo afi 1912 mli lɛ, abaptisi  Ataa kɛ Awo fɛɛ. Charles Taze Russell ni ji Buu Mɔɔ Asafo lɛ klɛŋklɛŋ sɛinɔtalɔ lɛ ji mɔ ni ha baptisimɔ wiemɔ lɛ. Mifɔlɔi yɛ bii ejwɛ momo dani afɔ mi yɛ December 4, 1916. Beni afɔ mi lɛ atswa adafi akɛ: “Naa nyɛmi kroko ni wɔbaasumɔ esane.” Enɛ hewɔ lɛ, awo mi gbɛi akɛ David ni eshishi ji, “Mɔ ni Asumɔɔ.”

Akɛ mi tee miklɛŋklɛŋ kpee wulu shishi beni miná otsii ejwɛ. Yɛ nakai mra bei lɛ amli lɛ, ataa kɛ minyɛmimɛi hii onukpai lɛ nyiɛɔ kilomitai abɔ kɛyaa asafoŋ kpeei ashishi, shi Awo haa mi kɛ minyɛmi yoo lɛ taa tsɔne mli kɛyaa. Afeɔ leebi kɛ shwane kpeei fɛɛ. Bei pii lɛ kɛ wɔyɛ shia lɛ, sane fɛɛ ni wɔgbaa lɛ damɔɔ saji ni yɔɔ The Watchtower kɛ The Golden Age, ni ji gbɛi ni akɛtsɛɔ Awake! lɛ yɛ mra beaŋ lɛ anɔ.

Nɔkwɛmɔnii Kpakpai ni Afee lɛ He Sɛɛ ni Miná

Mɛi ni fãa gbɛ kɛyahaa maŋshiɛmɔ lɛ ateŋ mɛi pii basaraa wɔ asafo lɛ. Bei pii lɛ amɛyeɔ gbi kome aloo enyɔ yɛ wɔŋɔɔ. Walter J. Thorn ji wielɔi lɛ ateŋ mɔ kome ni mikaiɔ waa diɛŋtsɛ, ni kai e-Bɔlɔ Kpeteŋkpele lɛ kɛjɛ ‘eblahiaŋ gbii lɛ amli.’ (Jajelɔ 12:1) Beni miji gbekɛ lɛ, mifataa Ataa he, ni wɔyajieɔ “Photo Drama of Creation,” ni hiɛ fai ejwɛ lɛ, nɔ ni akwɛɔ, kɛ nɔ ni aboɔ toi, nibii ni kɔɔ adesa yinɔsane he.

Eyɛ mli akɛ Nyɛminuu Evans kɛ eŋa Miriam bɛ bii moŋ, shi amɛbatsɔmɔ mumɔŋ fɔlɔi kɛ niimɛi kɛ naamɛi amɛha wɔ weku lɛ. William tsɛɔ Ataa be fɛɛ be akɛ “mi-Bi,” ni lɛ kɛ Miriam ji mɛi ni dũ sanekpakpa shiɛmɔ mumɔ lɛ amɛwo wɔ weku lɛ mli. Yɛ afii ohai 20 lɛ shishijee mli lɛ, Nyɛminuu Evans ku esɛɛ kɛtee Wales ni eyatsɔɔ mɛi ni yɔɔ Swansea niiaŋ lɛ Biblia mli anɔkwale lɛ. Ale lɛ yɛ jɛmɛ akɛ, shiɛlɔ ni jɛ Amerika.

Yɛ afi 1928 mli lɛ, Nyɛminuu Evans shi eheloonaa nitsumɔ lɛ ni eje shiɛmɔ nistsumɔ lɛ shishi yɛ West Virginia gɔji lɛ anɔ. Minyɛmimɛi hii onukpai enyɔ lɛ, Clarence ni eye afii 21 lɛ kɛ Carl ni eye afii 19 lɛ fata ehe kɛtee. Wɔ, ni ji gbekɛbii hii ejwɛ lɛ fɛɛ kɛ bei babaoo sɔmɔ yɛ be-fɛɛ sɔɔmɔ nitsumɔ lɛ mli. Yɛ anɔkwale mli lɛ, wɔ fɛɛ wɔsɔmɔ akɛ Yehowa Odasefoi anɔkwɛlɔi gbɛfalɔi beni wɔji oblahii. Etsɛko tsɔ ni mi-Mami nyɛmi yoo fioo Mary ni amrɔ nɛɛ eye kɛjɛ afii 90 kɛyaa lɛ ŋma mi wolo akɛ: “Kwɛ bɔ ni wɔ fɛɛ wɔdaa shi akɛ Nyɛminuu Evans kɛ ekãa sɔmɔ ni ebasara Grove City lɛ!” Wɔnyɛkwɛ Mary ji mɔ ko ni lɛ hu ekai e-Bɔlɔ lɛ kɛjɛ beni eji oblayoo tɔ̃ɔ.

Kpee Wuji Yaa

Ataa kɛ Clarence pɛ nyɛ amɛtee Cedar Point, Ohio kpee ni sa kadimɔ waa ni afee yɛ afi 1922 mli lɛ. Shi kɛlɛ, beni shɛɔ afi 1924 lɛ, no mli lɛ wɔná tsɔne, ni wɔ weku muu lɛ fɛɛ ta mli kɛtee kpee wulu ni afee yɛ Columbus, Ohio lɛ. Akpaa gbɛ akɛ wɔ gbekɛbii lɛ diɛŋtsɛ kɛ wɔkotokuŋ shika baakwɛ wɔhe yɛ gbii kpaanyɔ lɛ fɛɛ mli. Jwɛŋmɔ ni wɔfɔlɔi lɛ hiɛ ji akɛ, esa akɛ weku lɛ mli bii lɛ fɛɛ akase bɔ ni mɔ diɛŋtsɛ nyɛɔ ekwɛɔ ehe. Enɛ hewɔ lɛ, wɔlɛ wuɔ kɛ adanko kɛ wobii, ni wɔ gbekɛbii hii lɛ, wɔ fɛɛ wɔyɛ mɛi ni wɔkɛ adafitswaa woji yahaa amɛ.

Beni Toronto, Canada kpee wulu lɛ shɛ yɛ afi 1927 mli lɛ, no mli lɛ afɔ nyɛmi nuu ni atsɛɔ lɛ Paul aha wɔ, ni eye nyɔji ekpaa. Aha mi kɛ minyɛkwɛ ko ni ebote gbalashihilɛ mli kwɛ Paul yɛ shia, yɛ be mli ni mifɔlɔi kɛ gbekɛbii krokomɛi lɛ tee Toronto lɛ. Ake mi dɔlai nyɔŋma, ni mikɛhe kootu hee miha mihe. Atsɔse wɔ koni wɔsaa wɔhe jogbaŋŋ kɛya kpeei ni wɔfɔ wɔtadei lɛ ahe.

 Dani aaafee kpee wulu ni sa kadimɔ waa lɛ yɛ afi 1931 yɛ Columbus, Ohio lɛ, no mli lɛ, Clarence kɛ Carl ebote gbalashihilɛ mli ni amɛkɛ amɛŋamɛi lɛ miisɔmɔ akɛ daa gbɛgbalɔi. Amɛteŋ mɔ fɛɛ mɔ hi tsũ ni amɛ diɛŋtsɛ amɛfee ni tsɔne gbalaa lɛ lɛ mli. No mli lɛ, Carl kɛ Claire Houston ni jɛ Wheeling, West Virginia lɛ ebote gbalashihilɛ mli, ni no hewɔ ni mita Claire nyɛmi yoo fioo Helen masɛi yɛ Columbus kpee lɛ shishi lɛ.

Be-Fɛɛ Sɔɔmɔ Nitsumɔ Lɛ

Migbe nɔtsamɔ skul naa yɛ afi1932 mli beni miye afii 15, ni yɛ afi ni nyiɛ sɛɛ lɛ mli lɛ, mituu kar momo ko miwo Clarence, mɔ ni miisɔmɔ akɛ gbɛgbalɔ yɛ South Carolina lɛ dɛŋ. Mibi koni mikɛ mihe awo gbɛgbamɔ sɔɔmɔ nitsumɔ lɛ mli, ni mikɛ Clarence kɛ eŋa je nitsumɔ shishi. No mli lɛ, Helen miisɔmɔ akɛ gbɛgbalɔ yɛ Hopkinsville, Kentucky, ni miŋma lɛ klɛŋklɛŋ wolo. Beni lɛ hu eŋmaa mi lɛ ebi akɛ: “Ani gbɛgbalɔ ji bo?”

Miŋma lɛ ni miha lɛ hetoo akɛ: “Hɛɛ, gbɛgbalɔ ji mi, ni miisumɔ ni makã he mafee nakai daa gbi—Helen kɛ enɛ to aahu kɛyashi egbo nɔ ni miihe ashɛ afii 60 sɛɛ. Yɛ nakai wolo ni miŋma lɛ lɛ mli lɛ, migba Helen bɔ ni mijaa wolo bibioo ni ji, The Kingdom, the Hope of the World ni mikɛhaa osɔfoi kɛ kojolɔi yɛ mishiɛmɔ nitsumɔ lɛ mli lɛ he sane.

Yɛ afi 1933 mli lɛ, Ataa fee agba shwiili ni akɛ abalaa eha he fɛɛ ni samfɛlɛ yɛ ehiɛ kɛ esɛɛ ni tsɔne gbalaa eha mi—ekɛlɛ ji mitai 2.4, ni elɛɛmɔ ji mitai 2. No bafee tsũ bibioo ni mahi mli yɛ afii ejwɛ ni baanyiɛ sɛɛ ni mikɛbaatsu gbɛgbamɔ nitsumɔ lɛ mli.

Yɛ March 1934 mli lɛ, Clarence kɛ Carl, kɛ amɛŋamɛi, Helen kɛ emami, Clarence ŋa fioo lɛ kɛ mi ni wɔyi feɔ kpaanyɔ lɛ tsɔ anaigbɛ kɛtee kpee yɛ Los Angeles, California. Mɛi komɛi hi agba ni tsɔne gbalaa lɛ mli, ni amɛwɔ mli hu. Miwɔ kar lɛ mli, shi mɛi krokomɛi lɛ yahai tsũ ni amɛwɔ mli. Akɛni wɔkar lɛ gba wɔnaa yɛ gbɛ lɛ nɔ hewɔ lɛ, wɔyashɛ Los Angeles beni eshwɛ gbii ejwɛ ni akɛbaagbe gbii ekpaa kpee lɛ naa lɛ. Yɛ March 26 lɛ mi kɛ Helen nyɛ wɔkɛ nu mli baptisimɔ fee wɔhenɔjɔɔmɔ kɛha Yehowa lɛ he okadi yɛ jɛmɛ.

Yɛ kpee wulu lɛ shishi lɛ, Joseph F. Rutherford, ni no mli lɛ eji Buu Mɔɔ Asafo lɛ sɛinɔtalɔ lɛ kɛ gbɛgbalɔi lɛ fɛɛ bua amɛhe naa. Ewo wɔ hewalɛ, ni ekɛɛ wɔ akɛ, wɔ ji Biblia mli anɔkwale lɛ he tabilɔi ni yɔɔ ekãa. Yɛ nakai be lɛ mli lɛ, ato gbɛjianɔ aha gbɛgbalɔi koni akɛ shika aye abua amɛ bɔni afee ni amɛnyɛ amɛya nɔ amɛtsu sɔɔmɔ nitsumɔ lɛ he nii.

Tsɔsemɔ Kɛha Wala

Beni wɔku wɔsɛɛ kɛjɛ Los Angeles kpee lɛ shishi kɛba lɛ, wɔ fɛɛ wɔgba mɛi krokomɛi Maŋtsɛyeli shɛɛ sane lɛ yɛ kpokpai ni ji South Carolina, Virginia, West Virginia, kɛ Kentucky lɛ fɛɛ nɔ. Afii komɛi asɛɛ lɛ Helen ŋma nakai be lɛ he wolo: “No mli lɛ, asafo ko bɛ ni wɔkɛ amɛ baabɔ, asaŋ nanemɛi bɛ ni baaye ebua wɔ ejaakɛ wɔ ji gbɔi diɛŋtsɛ yɛ maŋsɛɛ shikpɔŋ nɔ. Shi amrɔ nɛɛ mile akɛ no mli lɛ aatsɔse mi. No mli lɛ miitsɔ niiatsɛ.”

Ebi akɛ: “Mɛni gbekɛ yoo fioo kɛ ebe baatsu kɛji akɛ eshi enanemɛi kɛ eshia? Ojogbaŋŋ, ehi bɔ ni sa. Mikaiii akɛ be ko ba ni mibɛ miishɛɛ. Mifɔɔ nikanemɔ waa. Be ko bɛ ni wɔkaneee aloo wɔkaseee wɔ Biblia he woji lɛ. Mikɛ mimami hi shi ni mikase bɔ ni alɛteɔ shika ni wɔyɔɔ lɛ he, bɔ ni ayayeɔ jara, lɔle tai ni eba shi tsakemɔ, nihoomɔ, nikpɛɛ, kɛ shiɛmɔ. Mishwaaa mihe, ni masumɔ ni mikɛ miishɛɛ afee daa gbi.”

Eyɛ mli akɛ no mli lɛ Helen mami yɛ lɛ diɛŋtsɛ eshia fɛfɛo moŋ, shi amɛná he miishɛɛ akɛ  amɛaahi agba shwiili bibioo mli. Beni wɔjɛ Columbus, Ohio, kpee ni afee yɛ afi 1937 mli lɛ wɔba sɛɛ lɛ, Helen mami hela lɛ mli bawa, ni ayatsĩ enaa yɛ helatsamɔhe. Egbó yɛ esɔɔmɔ nitsumɔ lɛ mli, yɛ Philippi, West Virginia, yɛ November 1937 mli.

Gbalashihilɛ Mlibotemɔ kɛ Sɔɔmɔ Nitsumɔ lɛ Nɔtsamɔ

Mikɛ Helen bote gbalashihilɛ mli yɛ June 10, 1938, wɔfeee lɛ haŋtsii, wɔfee yɛ shia he ni afɔ lɛ yɛ, yɛ Elm Grove, yɛ Wheeling masɛi yɛ West Virginia. Wɔnyɛmi nuu ni wɔsumɔɔ ni ji Nyɛminuu Evans, mɔ ni ha wɔweku lɛ le anɔkwale lɛ afii abɔ ni eho nɛɛ dani afɔ mi lɛ ji mɔ ni ha yookpeemɔ he wiemɔ lɛ. Yɛ yookpeemɔ lɛ sɛɛ lɛ, mi kɛ Helen to gbɛjianɔ koni wɔku sɛɛ kɛyatsa gbɛgbamɔ nitsumɔ lɛ nɔ yɛ Kentucky bokagbɛ, shi wɔnaa kpɛ wɔhe waa diɛŋtsɛ beni afɔ̃ wɔ nine ni wɔyatsu nii akɛ mɛi ni yasaraa maji maji lɛ. Nɔ ni fata nitsumɔ nɛɛ he ji, ni wɔɔyasara Yehowa Odasefoi ni yɔɔ Kentucky anaigbɛ kɛ Tennessee hei krokomɛi lɛ, koni wɔyaye wɔbua amɛ yɛ sɔɔmɔ nitsumɔ lɛ mli. Nakai beaŋ lɛ, Maŋtsɛyeli jajelɔi 75 pɛ yɔɔ hei nɛɛ fɛɛ ni wɔyasaraa lɛ.

Nakai beaŋ lɛ, maŋhedɔɔ etsake bɔ ni mɛi pii susuɔ nii ahe amɛhaa, ni mikpa gbɛ akɛ etsɛŋ ni abaawo mi tsuŋ yɛ Kristofonyo ni mi ji ni mikɛ mihe wooo maŋ saji amli lɛ hewɔ. (Yesaia 2:4) Shi kɛlɛ, mishiɛmɔ nitsumɔ lɛ he saji ni mihiɛ hewɔ lɛ, nitsumɔhe ni heɔ mɛi ewoɔ asraafoi anitsumɔ mli lɛ ŋmɛ mi gbɛ koni maya nɔ matsu be-fɛɛ sɔɔmɔ nitsumɔ lɛ he nii.

Beni wɔje gbɛfaa sɔɔmɔ nitsumɔ lɛ shishi lɛ, etamɔ nɔ ni mɔ fɛɛ mɔ wieɔ ekãa ni wɔyɔɔ akɛ oblahii lɛ he. Beni wɔyɔɔ Hopkinsville, Kentucky lɛ, nyɛmi yoo Kristofonyo ko bafua Helen waa ni ebi lɛ akɛ: “Okaiɔ mi?” Yɛ afi 1933 mli lɛ, Helen shiɛ etsɔɔ lɛ yɛ maŋ lɛ mli shwapo ko ni ewu kwɛɔ nɔ lɛ naa. No mli lɛ, Gbekɛbii a-Sɔlemɔ mli nitsulɔ ji lɛ, shi beni ekane wolo ni Helen shi eha lɛ lɛ sɛɛ lɛ, eyadamɔ gbekɛbii ni eba sɔlemɔ lɛ ahiɛ ni ekpa amɛ fai yɛ nibii ni etsɔɔ amɛ ní bɛ Biblia lɛ mli lɛ hewɔ. Ekpa esɔlemɔ lɛ yaa, ni ebɔi Biblia mli anɔkwalei lɛ jajemɔ kɛ ekutsoŋbii lɛ tsɔɔmɔ. Mi kɛ Helen kɛ afii etɛ sɔmɔ yɛ Kentucky anaigbɛ, ni nakai nyɛmi yoo lɛ kɛ ewu ha wɔyahi amɛshia mli.

Yɛ nakai be lɛ mli lɛ, wɔfeɔ kpeei bibii ni A. H. Macmillan bakwɛ enɛɛmɛi ateŋ ekome nɔ. Ekɛ Helen fɔlɔi yahi shi beni Helen ji gbekɛ lɛ, no hewɔ lɛ beni afeɔ kpee lɛ, ehala akɛ ebaafata wɔhe kɛhi tsũ ni tsɔne gbalaa ni kɛlɛ ji mitai enumɔ ni sɛɛtsu kome kã shi efolo yɛ mli lɛ mli. Lɛ hu ekai e-Bɔlɔ Kpeteŋkpele lɛ yɛ eblahiaŋ, ejaakɛ ejɔɔ ewala nɔ eha Yehowa yɛ afi 1900 mli, beni eye afii 23 lɛ.

Yɛ November 1941 lɛ atsĩ nyɛmimɛi gbɛfalɔi lɛ anitsumɔ lɛ naa fioo, ni aha mi nitsumɔ akɛ gbɛgbalɔ yɛ Hazard, yɛ Kentucky. Shikome ekoŋŋ lɛ, wɔkɛ minyɛmi nuu Carl kɛ eŋa Claire yatsu nii. Joseph Houston ni ji Helen nyɛmi bi lɛ bafata wɔhe yɛ gbɛgbamɔ nitsumɔ lɛ mli. Etee nɔ esɔmɔ yɛ be-fɛɛ sɔɔmɔ nitsumɔ lɛ mli nɔ ni miihe ashɛ afii 50, ni tsui hela gbe lɛ trukaa yɛ afi 1992 mli be mli ni esɔmɔɔ yɛ anɔkwayeli mli yɛ Yehowa Odasefoi ajeŋ fɛɛ nitsumɔhe yitso yɛ Brooklyn, New York lɛ.

Yɛ afi 1943 mli lɛ, aha wɔ nitsumɔ yɛ Rockville, yɛ Connecticut. Enɛ bafee he ko ni yɔɔ srɔto kwraa kɛha mi kɛ Helen ejaakɛ wuoyigbɛ titri wɔfɔɔ shiɛmɔ yɛ. Beni wɔyɔɔ Rockville lɛ, Helen feɔ shia Biblia mli nikasemɔi ni fa fe 20 daa otsi. Yɛ naagbee lɛ, wɔyahai tsũ bibioo ko ni wɔkɛfee Maŋtsɛyeli Asa, nɔ ni bafee he ni ajɛ ato asafo bibioo ko he gbɛjianɔ kɛjɛ lɛ.

Beni wɔsɔmɔɔ yɛ Rockville lɛ, afɔ̃ wɔ nine koni wɔya Buu Mɔɔ Biblia Gilead Skul klas ni ji enumɔ yɛ South Lansing, New York. Miishɛɛ sane ji akɛ, wɔná wɔle akɛ Aubrey kɛ Bertha Bivens, ni ji wɔnanemɛi ni wɔkɛ amɛ sɔmɔ yɛ Kentucky beni wɔji gbɛgbalɔi lɛ ji wɔklasbii.

Skul lɛ kɛ Nitsumɔ Hee ni Akɛha Wɔ Lɛ

Eyɛ mli akɛ etamɔ nɔ ni wɔdarako lolo moŋ, shi wɔye wɔklasbii lɛ pii onukpa. Hɛɛ, amɛmiikai amɛ-Bɔlɔ Kpeteŋkpele lɛ yɛ amɛblahiaŋ. Wɔskul naagbee he nifeemɔ lɛ ba nɔ yɛ July 1945, beni eshwɛ fioo ni jeŋ Ta II baaba enaagbee. Yɛ be mli ni wɔmɛɔ koni aha wɔ wɔmaŋsɛɛ sanekpakpa shiɛmɔ nitsumɔ lɛ, wɔkɛ Flatbush Asafo lɛ ni yɔɔ  Brooklyn, New York lɛ bɔ. Yɛ naagbee lɛ, wɔkɛ wɔklasbii krokomɛi ekpaa ni mɛi ni atsɛɔ amɛ Bivens lɛ fata he lɛ ta kɔɔyɔŋ lɛlɛ mli yɛ October 1, 1946 kɛtee Guatemala City yɛ Guatemala. No mli lɛ, Yehowa Odasefoi ni yɔɔ Central America maŋ muu lɛ fɛɛ mli lɛ ayifalɛ shɛɛɛ 50.

Yɛ April 1949 mli lɛ, afa wɔteŋ maŋsɛɛ sanekpakpa shiɛlɔi lɛ fioo ko kɛtee Quetzaltenango, ni ji maŋtiase ni nyiɛ nɔ ni da fe fɛɛ ni he hiaa waa lɛ sɛɛ yɛ maŋ lɛ mli. Nɛkɛ maŋtiase nɛɛ yɛ he ko ni kwɔ fe ŋshɔ hiɛ kwɔlɛ aaafee mitai 2,300, ni kɔɔyɔɔ ni tswaa kɛjɛɔ gɔŋ lɛ nɔ kɛbaa lɛ mli ŋɔɔ, ni emli tse. Helen mu nii ni wɔtsuɔ yɛ biɛ lɛ naa yɛ wiemɔi ni eŋma nɛɛ mli akɛ: “Eji hegbɛ ni wɔná akɛ wɔshiɛ yɛ maji kɛ akrowai nyɔŋmai abɔ mli. Wɔteɔ shi ŋmɛji ejwɛ daa leebi ni wɔwoɔ bɔɔs (ni bei pii lɛ mamai ji nɔ ni akɛfee ehe samfɛji lɛ) kɛyaa he ko shɔŋŋ. Wɔkɛ nɔ ni miihe ashɛ ŋmɛlɛtswai kpaanyɔ shiɛɔ yɛ jɛmɛ dani wɔkuɔ wɔsɛɛ kɛbaa shia gbɛkɛ.” Ŋmɛnɛ, ayɛ asafoi babaoo yɛ hei nɛɛ pii, ni ekpaa yɛ Quetzaltenango.

Etsɛɛɛ ni atsɛ maŋsɛɛ sanekpakpa shiɛlɔi koni amɛyasɔmɔ yɛ Puerto Barrios yɛ Caribbean Ŋshɔnaagbɛ, maŋtiase ni ji etɛ ni da fe fɛɛ yɛ Guatemala lɛ mli. Wɔnanemɛi ni wɔsumɔɔ, ni Bivens weku lɛ ni wɔkɛ amɛ ésɔmɔ afii enumɔ yɛ Guatemala lɛ fata mɛi ni aha amɛ nitsumɔ hee nɛɛ he. Wɔteŋ ni agbala lɛ bafee dɔlɛ sane waa diɛŋtsɛ, ni efee tamɔ nɔ ni wɔfee shwɛm yɛ shihilɛ mli. Akɛni eshwɛ mi kɛ Helen pɛ yɛ maŋsɛɛ sanekpakpa shiɛlɔi ashia lɛ hewɔ lɛ, wɔfã kɛtee shia bibioo ko mli. Yɛ afi 1955 mli lɛ, mi kɛ Helen kpɛlɛ nitsumɔ hee ni akɛha wɔ yɛ Mazatenango maŋtiase ni hulu tsoɔ yɛ jɛmɛ waa lɛ nɔ. No mli lɛ, minyɛmi nuu fioo Paul kɛ eŋa Dolores ni gbe Gilead naa yɛ afi 1953 mli lɛ kɛ be fioo ko esɔmɔ yɛ jɛmɛ momo dani wɔyashɛ.

Beni afi 1958 shɛɔ lɛ no mli lɛ Odasefoi 700, asafoi 20 kɛ kpokpai etɛ yɛ Guatemala. Mi kɛ Helen sɔmɔ yɛ gbɛfaa nitsumɔ lɛ mli ekoŋŋ, ni wɔyasaraa Odasefoi lɛ akui bibii kɛ asafoi babaoo, ni nɔ ni yɔɔ Quetzaltenango lɛ hu fata he. Kɛkɛ ni yɛ August 1959 mli lɛ, afɔ wɔ nine koni wɔku wɔsɛɛ kɛya Guatemala Maŋtiase lɛ, ni wɔyahi asafo lɛ nitsumɔhe nine lɛ. Aha mitsu nii yɛ nitsumɔhe nine lɛ, ni Helen hu tsa maŋsɛɛ sanekpakpa shiɛmɔ nitsumɔ lɛ nɔ kɛ afii 16 kroko. Kɛkɛ ni lɛ hu ebabɔi nitsumɔ yɛ nitsumɔhe nine lɛ.

Jɔɔmɔi Krokomɛi

Yɛ afii ni eho nɛɛ fɛɛ mli lɛ, efeɔ mi akɛ miji gbekɛ fe fɛɛ yɛ mɛi ni sɔmɔɔ Yehowa lɛ ateŋ. Amrɔ nɛɛ lɛ mibatsɔ mɔ ni ye mɛi lɛ fɛɛ onukpa, taakɛ eji beni mitee nitsumɔhe nine skul ni afee yɛ Patterson, yɛ New York, yɛ afi 1996 mli lɛ. Taakɛ onukpai ye ebua mi beni miji oblanyo lɛ, mi hu miná hegbɛ yɛ nyɛsɛɛ afii babaoo nɛɛ mli akɛ maye mabua oblahii kɛ oblayei pii ni sumɔɔ akɛ amɛkai amɛ-Bɔlɔ lɛ yɛ amɛblahiaŋ lɛ.

Yehowa miiya nɔ eenɛ jɔɔmɔi eeshwie ewebii lɛ anɔ yɛ biɛ yɛ Guatemala. Yɛ afi 1999 mli lɛ, no mli lɛ ayɛ asafoi ni fa fe 60 yɛ Guatemala Maŋtiase lɛ. Ni kɛmiiya kooyigbɛ, wuoyigbɛ, bokagbɛ kɛ anaigbɛ fɛɛ lɛ, ayɛ asafoi babaoo kɛ Nyɔŋmɔ Maŋtsɛyeli sanekpakpa jajelɔi akpei abɔ. Maŋtsɛyeli jajelɔi ni yifalɛ shɛɛɛ 50 ni yɔɔ jɛmɛ dani wɔtee jɛmɛ aaafee afii 53 ni eho nɛɛ etee hiɛ kɛho 19,000!

Nibii Pii yɛ ni Esa akɛ Mada Shi yɛ He

Mɔ ko mɔ ko bɛ ni kɛ naagbai ekpeee yɛ eshihilɛ mli, shi wɔbaanyɛ wɔshɛ ‘wɔjatsu lɛ wɔfɔ Yehowa nɔ’ be fɛɛ be. (Lala 55:23) Bei pii lɛ etsɔɔ wɔsuɔmɔ nanemɛi anɔ ni ewajeɔ wɔ. Ákɛ nɔkwɛmɔnɔ lɛ, beni eshwɛ fioo ni Helen baagbo lɛ, eha mi tao bibioo ko ni aŋmala Biblia ŋmalɛ ni yɔɔ Hebribii 6:10 lɛ yɛ nɔ, nɔ ni kɛɔ akɛ: “Nyɔŋmɔ jeee mɔ ni yeɔ sane ni ejaaa ni esusuuu deŋme ni ogbo kɛ suɔmɔ kpo ni ojie otsɔɔ Lɛ yɛ be mli ni  osɔmɔɔ E-webii lɛ he, ni oyaa nɔ osɔmɔɔ amɛ lolo lɛ.”—Weymouth.

Nɔ ni eŋma kɛfata he lɛ kaneɔ akɛ: “Misuɔlɔ ni mishwɛɛɛ ohe, mibɛ nɔ ko kwraa ni mikɛbaaha bo, FE SUƆMƆ PƐ . . . Ŋmalɛ nɛɛ hi waa kɛha bo, ni miisumɔ ni okɛma o-ɔfis okplɔ lɛ nɔ, jeee akɛ ni mi mikɛha bo hewɔ, shi moŋ akɛni ekɔɔ bo kɛ obe kakadaŋŋ sɔɔmɔ nitsumɔ lɛ he hewɔ.” Nɛkɛ tao kɛ enɔ niŋmaa nɛɛ ma mi-ɔfis okplɔ lɛ nɔ lolo kɛbashi ŋmɛnɛ yɛ Guatemala nitsumɔhe nine lɛ.

Mijɛ miblahiaŋ misɔmɔ Yehowa, ni amrɔ nɛɛ miida Yehowa shi akɛ ehaa mi hewalɛ yɛ migbɔlɛ afii nɛɛ amli bɔni afee ni manyɛ matsu nitsumɔ ni akɛwo midɛŋ lɛ he nii. Kɛ miifee midaa gbi Biblia kanemɔ lɛ, bei pii lɛ mikɛ ŋmalɛi komɛi kpeɔ ni misusuɔ akɛ misuɔlɔ Helen baafolɔ amɛshishi yɛ e-Biblia lɛ mli. Mikai enɛ beni misaa mikane Lala 48:15: “Nɛkɛ Nyɔŋmɔ nɛɛ ji wɔ-Nyɔŋmɔ kɛyaa naanɔ; lɛ nɔŋŋ eeetsɔɔ wɔ gbɛ kɛaatee naanɔ.”

Miyɛ he miishɛɛ akɛ magba mɛi krokomɛi gbohiiashitee gbi lɛ he ninaa ni tsɔɔ be ni gbɔmɛi ni jɛ tsutsu maji srɔtoi amli ni miikpee amɛsuɔlɔi ni egboi lɛ kɛmiiba jeŋ hee lɛ mli lɛ he sane. Mɛɛ gbɛkpamɔ po nɛ! Kwɛ miishɛɛ yaafo ni abaafo yɛ nakai beaŋ, yɛ be mli ni wɔkaiɔ akɛ Yehowa ji Nyɔŋmɔ ni “shɛjeɔ mɛi ni baa amɛhe shi lɛ amii” lɛɛlɛŋ lɛ!—2 Korintobii 7:6.

[Mfoniri ni yɔɔ baafa 25]

Kɛjɛ ninejurɔgbɛ ŋwɛigbɛ kɛmiiya abɛkugbɛ: Awo, Ataa, Minyɛkwɛ Eva, kɛ minyɛmimɛi hii Carl kɛ Clarence, afi 1910

[Mfonirii ni yɔɔ baafa 26]

Mi kɛ Helen yɛ afi 1947 kɛ afi 1992