Aha Anu Daniel Wolo lɛ Shishi!

MƐI ni ba kpee lɛ kɛ hehiamɔ kwɛ gbɛ akɛ amɛnine aaashɛ amɛ wolo ni hiɛ baafai 320 ni ajie lɛ kpo ehee, ni ji Bó Daniel Gbalɛ Wiemɔ lɛ Toi! lɛ nɔ. Te amɛnu he yɛ wolo lɛ he amɛha tɛŋŋ? Susumɔ nɔ ni amɛteŋ mɛi komɛi kɛɛ lɛ he okwɛ.

“Taakɛ eji yɛ mɛi babaoo ni yeko afii nyɔŋmai enyɔ lɛ agbɛfaŋ lɛ, ewaa kɛhaa mi akɛ maná blema yinɔsane he nikasemɔ he miishɛɛ. No hewɔ lɛ, beni minine shɛ mi diɛŋtsɛ mi wolo hee ni ji Bó Daniel Gbalɛ Wiemɔ lɛ Toi! lɛ nɔ lɛ, eŋɔɔɔ minaa tsɔ̃ akɛ makane, shi mika mikwɛ kɛkɛ. Shi kwɛmɔ, mijieko su ni ja yɛ he lɛ kpo! Enɛ ji woji ni hi fe fɛɛ lɛ eko ni mina pɛŋ. Eji wolo ko ni teeɔ mɔ miishɛɛ shi waa diɛŋtsɛ! Minuuu he dɔŋŋ akɛ miikane sane ko ni ba mli afii akpei abɔ ni eho nɛ. Enɛ ji klɛŋklɛŋ kwraa ni minuɔ he akɛ manyɛ mikɛ mihe awo Daniel shihilɛ mli. Manyɛ mafee bɔ ni eji diɛŋtsɛ eha lɛ he mfoniri akɛ aaaŋɔ bo kɛjɛ oweku mli bii ateŋ kɛya, koni akɛ bo aya maŋsɛɛ shikpɔŋ nɔ, ni aka onɔkwayeli akwɛ shii abɔ. Miida nyɛ shi ojogbaŋŋ diɛŋtsɛ yɛ wolo nɛɛ hewɔ.”—Anya.

“Nɔ ni ye ebua mi fe fɛɛ ji shɛɛ sane ni tɔ̃mɔ ko bɛ mli ni tsɔɔ akɛ Yehowa ji mɔ ni kwɛɔ saji ni ewebii kɛkpeɔ lɛ anɔ kwraa lɛ. Kɛtsɔ Daniel ninaai kɛ lamɔi kɛ mɛi krokomɛi anɔ̃ ni etsɔɔ shishi lɛ anɔ lɛ, eyɛ faŋŋ akɛ wɔ-Nyɔŋmɔ lɛ eŋmɛŋ gbɛ kɔkɔɔkɔ ni saji afee nɔ ni fe bɔ ni eto yiŋ lɛ loo nɔ ni shɛɛɛ nakai. Enɛ haa hiɛnɔkamɔ ni wɔyɔɔ yɛ gbalɛ he mfonirifeemɔi ni anaa yɛ Biblia lɛ mli ni kɔɔ jeŋ hee ni etoɔ he gbɛjianɔ lɛ he lɛ mli bawaa waa.”—Chester.

“Miná bɔ ni nyɛha Daniel wolo lɛ fee tamɔ nɔ ko ni miiya nɔ amrɔ nɛɛ lɛ he miishɛɛ. Míle lɛ ojogbaŋŋ yɛ bɔ ni nyɛma bɔ ni esusuɔ mɔ he lɛ kɛ esusumɔi anɔ mi lɛ hewɔ. Minyɛɔ minuɔ nɔ hewɔ ni Yehowa ná ehe miishɛɛ waa lɛ shishi. Yɛ ekaai kɛ yiwaai lɛ fɛɛ sɛɛ lɛ, esusuuu lɛ pɛ ehe. Nɔ ni esusuɔ he fe fɛɛ ji Yehowa kɛ Egbɛi ni hi jogbaŋŋ lɛ. Miida nyɛ shi akɛ nyɛha saji otii nɛɛ efee faŋŋ.”—Joy.

“Enɛ ji nɔ ni wɔmɛɔ lɛ! Atsɔɔko bɔ ni Daniel wolo lɛ fãi komɛi kɔɔ wɔteŋ mɔ fɛɛ mɔ he diɛŋtsɛ nɛkɛ pɛŋ. Beni mikane wolo hee lɛ hei srɔtoi babaoo gbɛkɛ beni minine eshɛ nɔ lɛ, ehe bahia ni mamɛ ni mada Yehowa shi yɛ sɔlemɔ mli.”—Mark.

“Nɔ ni wɔkpaaa gbɛ ji hewalɛ ni ebaaná yɛ wɔbii anɔ lɛ. Afii ni amɛye ji enumɔ kɛ etɛ. . . . Yɛ be mli ni saji ni kɔɔ Daniel, Hanania, Mishael, kɛ Azaria he lɛ ji saji ni amɛsumɔɔ waa yɛ Mi-Wolo ni Gbaa Biblia Mli Saji lɛ mli be fɛɛ be lɛ, bɔ ni atsɔɔ saji amli yɛ Daniel Gbalɛ Wiemɔ wolo lɛ mli lɛ ekanya amɛ yɛ gbɛ ni wɔkpaaa gbɛ nɔ. Yɛ bɔ ni amɛdarako nɛɛ fɛɛ sɛɛ po lɛ, etamɔ nɔ ni amɛnyɛɔ amɛwieɔ saji nɛɛ ahe kɛkɔɔ oblahii jalɔi nɛɛ ahe. Mɛɛ nɔkwɛmɔnii ni yɔɔ naakpɛɛ amɛji kɛha wɔbii lɛ nɛkɛ! Mɛɛ dɛŋdade ni yɔɔ naakpɛɛ nyɛkɛha wɔ nɛkɛ! Miida nyɛ shi, miida nyɛ shi waa diɛŋtsɛ!”—Bethel.

“Efee mi tamɔ nɔ ni mifata Hebri gbekɛbii hii ni darako ni aka amɛ yɛ amɛhemɔkɛyeli hewɔ lɛ ahe yɛ jɛmɛ nɔŋŋ; ni no ye ebua mi koni mapɛi mi diɛŋtsɛ mihemɔkɛyeli lɛ mli makwɛ. Akrabatsa ni akɛtĩɔ sane mli ni ji “Mɛni Oyɔse?” lɛ nyɛɔ yitso lɛ mli saji anɔ ewoɔ tsui lɛ mli. Miida nyɛ shi ekoŋŋ yɛ wolo kroko hu ni akɛ nilee babaoo fee nɛɛ hewɔ.”—Lydia.