‘Nibii ni Jara Wa’ lɛ Miiyi Yehowa Shia lɛ obɔ
‘Nibii ni Jara Wa’ lɛ Miiyi Yehowa Shia lɛ obɔ
“Ni [mi Yehowa] mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ.”—HAGAI 2:7.
1. Mɛni hewɔ wɔsusuɔ wɔsuɔlɔi ahe klɛŋklɛŋ yɛ hiamɔ be mli lɛ?
MƐƐ nibii ni asumɔɔ yiɔ oshia mli obɔ? Ani oyɛ tsũ mli sɛii fɛfɛji, kɔmpiuta ni hi fe fɛɛ, kar hee ni ma otsɔnei atsũ mli? Kɛji akɛ oyɛ nɛkɛ nibii nɛɛ fɛɛ po lɛ, ani okpɛlɛŋ nɔ akɛ nibii ni jara wa fe fɛɛ ni yɔɔ oshia lɛ mli ji gbɔmɛi lɛ—oweku lɛ mli bii lɛ? Susumɔ he akɛ lasu ko ha ote shi nyɔɔŋteŋ. Oshia lɛ miishã, ni minitii fioo ko pɛ oyɔɔ ni okɛbaajo foi! Mɛni ji klɛŋklɛŋ nii ni he hiaa bo? Otsũ mli sɛii? Okɔmpiuta? O-kar? Ani osusuŋ osuɔlɔi lɛ ahe moŋ? Hɛɛ, nakai obaafee, ejaakɛ gbɔmɛi ajara wa kwraa fe nibii.
2. Te Yehowa nibɔɔ lɛ da ha tɛŋŋ, ni te nɔ ni ji efa ni Yesu mii shɛɔ he waa lɛ?
2 Agbɛnɛ susumɔ Yehowa Nyɔŋmɔ kɛ e-Bi, Yesu Kristo he. Yehowa ji Mɔ ni “fee ŋwɛi kɛ shikpɔŋ kɛ ŋshɔ kɛ nii fiaa ni yɔɔ amɛmli” lɛ. (Bɔfoi lɛ Asaji 4:24) E-Binuu ni ji ‘nitsulɔ ŋaalɔ’ lɛ ji mɔ ni Yehowa tsɔ enɔ efee nibii krokomɛi fɛɛ. (Abɛi 8:30, 31; Yohane 1:3; Kolosebii 1:15-17) Yɛ anɔkwale mli lɛ Yehowa kɛ Yesu fɛɛ buɔ nibii ni abɔ lɛ fɛɛ akɛ amɛjara wa. (Okɛto 1 Mose 1:31 he.) Shi te nibɔɔ lɛ ateŋ nɔ ni osusuɔ akɛ etsɔɔ babaoo kɛhaa amɛ—nibii loo gbɔmɛi? Yɛ nilee ni ejie ehe kpo yɛ gbɔmɔtso mli lɛ nitsumɔ gbɛfaŋ lɛ, Yesu jaje akɛ: “Mináa gbɔmɛi abii ahe miishɛɛ,” aloo taakɛ William F. Beck shishitsɔɔmɔ lɛ kɛba lɛ, Yesu “mii shɛɔ gbɔmɛi adesai ahe.”
3. Mɛɛ gbalɛ Yehowa jaje kɛtsɔ Hagai nɔ?
3 Ŋwanejee ko bɛ he akɛ Yehowa buɔ gbɔmɛi akɛ amɛjara wa waa. Anaa nibii ni tsɔɔ enɛ lɛ ateŋ ekome yɛ gbalɛ wiemɔi ni ewie kɛtsɔ egbalɔ Hagai nɔ yɛ afi 520 D.Ŋ.B. lɛ mli. Yehowa jaje akɛ: “Mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ. . . . Shia nɛɛ sɛɛkpee anunyam lɛ aaada fe tsutsu nɔ̃ lɛ.”—Hagai 2: 7, 9.
4, 5. (a) Mɛni hewɔ efeŋ nɔ ni shishinumɔ yɔɔ mli akɛ aaamu sane naa akɛ wiemɔ ni ji “nii ni jara wa” lɛ kɔɔ heloo naa nibii ni yɔɔ fɛo he? (b) Te obaatsɔɔ “nii ni jara wa” lɛ amli oha tɛŋŋ, ni mɛni hewɔ?
4 Mɛɛ “nii ni jara wa” baayi Yehowa shia lɛ obɔ ní ekɛ anunyam ni eko tamɔɔɔ lɛ abaha lɛ lɛ? Nibii ni ákɛwo mli obɔ ni akɛwula mli kpɛŋshɛŋŋ? Shika, jwiɛtɛi, kɛ ojarawa tɛi? Enɛɛmɛi efeŋ nibii ni shishinumɔ yɔɔ mli. Kaimɔ akɛ, tsutsu sɔlemɔtsu lɛ ni agbele naa aaafee afii ohai enumɔ kɛtsɔ hiɛ lɛ ji tsũ ní jara shɛɔ dɔlai akpekpei toi akpei abɔ! * Yɛ anɔkwale mli lɛ, Yehowa kpaŋ gbɛ akɛ sɔlemɔtsu ni Yudafoi akuu fioo ni amɛjɛ gbɛfaa mli amɛba lɛ ma lɛ baafe Salomo sɔlemɔtsu lɛ yɛ emli nibii afalɛ kɛ efɛo mli!
5 Belɛ, mɛni ji “nii ni jara wa lɛ” ni akɛaawo Yehowa shia lɛ obɔ lɛ? Eyɛ faŋŋ akɛ esa akɛ amɛfee gbɔmɛi. Yɛ fɛɛ sɛɛ lɛ, nɔ ni haa Yehowa tsui nyaa lɛ jeee jwiɛtɛi kɛ shika, shi gbɔmɛi ni jɛɔ amɛsuɔmɔ mli amɛsɔmɔɔ lɛ lɛ. (Abɛi 27:11; 1 Korintobii 10:26) Hɛɛ, Yehowa buɔ hii, yei, kɛ gbekɛbii fɛɛ ni jáa lɛ yɛ nɔkpɛlɛmɔ mli lɛ akɛ amɛjara wa. (Yohane 4:23, 24) Mɛnɛɛmɛi ji “nii ni jara wa” lɛ, ni amɛjara wa kwraa kɛha Yehowa fe nibii fɛfɛji ni akɛwula Salomo sɔlemɔtsu lɛ fɛɛ.
6. Nyɔŋmɔ blema sɔlemɔtsu lɛ tsu mɛɛ yiŋtoo he nii?
6 Yɛ shitee-kɛ-woo ni baaa shi lɛ fɛɛ sɛɛ lɛ, agbe sɔlemɔtsu lɛ naa yɛ afi 515 D.Ŋ.B. Yerusalem sɔlemɔtsu lɛ tee nɔ ehi shi akɛ jamɔ krɔŋŋ shikwɛɛhe kɛha “nii ni jara wa” ni feɔ heloo naa Yudafoi kɛ Jeŋmajiaŋbii ni atsake amɛ lɛ babaoo dani Yesu kɛ ehe shã afɔle. Shi sɔlemɔtsu lɛ damɔ shi kɛha nɔ ko ni da kwraa, taakɛ wɔbaana lɛ.
Emlibaa yɛ Klɛŋklɛŋ Afii Oha lɛ Mli
7. (a) Nyɔŋmɔ blema sɔlemɔtsu ni yɔɔ Yerusalem lɛ fee mɛni he mfoniri? (b) Tsɔɔmɔ nɔ ni osɔfonukpa lɛ feɔ yɛ Kpatamɔ Gbi lɛ nɔ lɛ mli.
7 Yerusalem sɔlemɔtsu lɛ fee gbɛjianɔtoo ni da kɛha jamɔ he mfoniri. No ji Nyɔŋmɔ mumɔŋ sɔlemɔtsu lɛ, ní Yehowa to kɛ Yesu akɛ Osɔfonukpa yɛ afi 29 Ŋ.B. lɛ. (Hebribii 5:4-10; 9:11, 12) Susumɔ nibii ni je amɛhe ni kã Israel osɔfonukpa lɛ nitsumɔi lɛ kɛ Yesu nifeemɔi lɛ ateŋ lɛ he okwɛ. Daa afi yɛ Kpatamɔ Gbi lɛ nɔ lɛ, osɔfonukpa lɛ yaa afɔleshaa latɛ ni yɔɔ sɔlemɔtsu lɛ kpo lɛ nɔ lɛ he, ni ekɛ tsina nuu yashãa afɔle kɛhaa osɔfoi lɛ ahe eshai. Sɛɛ mli lɛ, eboteɔ sɔlemɔtsu lɛ mli kɛ tsina nuu lɛ lá, ni efoɔ mli kɛtsɔɔ shinaai ni gbálaa kpo lɛ kɛ He Krɔŋkrɔŋ lɛ teŋ lɛ mli, kɛkɛ lɛ etsɔ muhɔɔ ni gbálaa He Krɔŋkrɔŋ lɛ kɛ He Krɔŋkrɔŋ Fe Fɛɛ lɛ teŋ lɛ mli. Beni osɔfonukpa lɛ eyashɛ He Krɔŋkrɔŋ Fe Fɛɛ lɛ, etsɔɔ̀ lá lɛ eko eshwãa kpaŋmɔ adeka lɛ hiɛ. Efeɔ nakai nɔŋŋ beni ekɛ too kpakpo shãa afɔle kɛhaa Israel akutsei 12 ni jeee osɔfoi lɛ. (3 Mose 16:5-15) Te nifeemɔ nɛɛ kɔɔ Nyɔŋmɔ mumɔŋ sɔlemɔtsu lɛ he ehaa tɛŋŋ?
8. (a) Mɛɛ shishinumɔ naa akɛ Yesu ha yɛ kɛjɛ afi 29 Ŋ.B. lɛ shishijee mli? (b) Mɛɛ wekukpaa krɛdɛɛ mli ŋɔɔmɔ Yesu kɛ Yehowa ná yɛ eshikpɔŋ nɔ sɔɔmɔ be lɛ fɛɛ mli?
8 Enɛ tsɔɔ ákɛ akɛ Yesu ha yɛ Nyɔŋmɔ suɔmɔnaa nifeemɔ afɔleshaa latɛ lɛ nɔ yɛ be mli ni abaptisi lɛ ni akɛ Nyɔŋmɔ mumɔ krɔŋkrɔŋ lɛ fɔ lɛ mu yɛ afi 29 Ŋ.B. lɛ. (Luka 3:21, 22) Yɛ anɔkwale mli lɛ, nɛkɛ be nɛɛ kadi afɔleshaa shihilɛ gbɛ kɛha Yesu ni ye afii etɛ kɛ fa lɛ shishijee. (Hebribii 10:5-10) Yesu ná mumɔŋ bitsɔmɔ mli ŋɔɔmɔ yɛ ekɛ Nyɔŋmɔ teŋ yɛ nakai be lɛ mli. Adesai krokomɛi nyɛŋ anu shidaamɔ ni ekaaa ni Yesu kɛ eŋwɛi Tsɛ lɛ ná nɛɛ shishi jogbaŋŋ. Efee tamɔ nɔ ni akɛ mama ko eha amɛshishinumɔ hiŋmɛi nɔ, tamɔ bɔ ni akɛ mama ha He Krɔŋkrɔŋ lɛ hiɛ koni mɛi ni yɔɔ kpeebuu lɛ kpo lɛ nɔ lɛ akana jɛmɛ lɛ.—2 Mose 40:28.
9. Mɛni hewɔ Yesu nyɛɛɛ abote ŋwɛi akɛ adesa, ni mɛɛ gbɛ nɔ atsɔ asaa shihilɛ nɛɛ?
9 Yɛ Nyɔŋmɔ mumɔŋ Bi ni afɔ lɛ mu ni eji lɛ fɛɛ sɛɛ lɛ, gbɔmɔ ni ji Yesu lɛ nine nyɛŋ ashɛ wala nɔ yɛ ŋwɛi. Mɛni hewɔ? Ejaakɛ heloo kɛ lá nine shɛŋ Nyɔŋmɔ ŋwɛi Maŋtsɛyeli lɛ nɔ. (1 Korintobii 15:44, 50) Akɛni Yesu adesa heloo lɛ ji gbɛtsii nii hewɔ lɛ, akɛ muhɔɔ ni gbála He Krɔŋkrɔŋ lɛ kɛjɛ He Krɔŋkrɔŋ Fe Fɛɛ ni yɔɔ Nyɔŋmɔ blema sɔlemɔtsu lɛ mli lɛ teŋ lɛ fee he mfoniri yɛ gbɛ ni mɔɔ shi jogbaŋŋ nɔ. (Hebribii 10:20) Shi egbele sɛɛ gbii etɛ lɛ, Nyɔŋmɔ tée Yesu shi akɛ mumɔ. (1 Petro 3:18) Kɛkɛ lɛ ebaanyɛ ebote Nyɔŋmɔ mumɔŋ sɔlemɔtsu lɛ mlijaa ni ji He Krɔŋkrɔŋ Fe Fɛɛ—ni ji ŋwɛi diɛŋtsɛ lɛ mli. Ni eba mli nakai pɛpɛɛpɛ. Paulo ŋma akɛ: “Jeee he krɔŋkrɔŋ [eyɛ faŋŋ akɛ eetsɔɔ He Krɔŋkrɔŋ Fe Fɛɛ lɛ] ni akɛ niji fee, ni ji nii lɛ diɛŋtsɛ lɛ ahenɔ kɛkɛ lɛ mli Kristo yabote lɛ; shi moŋ ŋwɛi diɛŋtsɛ eyabote, koni agbɛnɛ eyapue yɛ Nyɔŋmɔ hiɛ eha wɔ.”—Hebribii 9:24.
10. Mɛni Yesu fee beni eku esɛɛ kɛtee ŋwɛi lɛ?
10 Yesu ‘tsɔ̀ efɔleshaa lá lɛ eshwã’ yɛ ŋwɛi kɛtsɔ elá ni kpɔɔ mɔ lɛ jara ni ekɛyaha Yehowa lɛ nɔ. Kɛlɛ, Yesu fee babaoo. Ekɛɛ ekaselɔi lɛ beni eshwɛ fioo ni ebaagbo lɛ akɛ: “Miiya ni miyasaa gbɛhe mato nyɛ. Ni kɛji mitee ni miyasaa gbɛhe mito nyɛ lɛ, mibaba ekoŋŋ ni mibabaŋɔ nyɛ kɛya he ni mi diɛŋtsɛ miyɔɔ lɛ, koni he ni miyɔɔ lɛ, nyɛ hu nyɛhi jɛi.” (Yohane 14:2, 3) No hewɔ lɛ, akɛni Yesu ná hegbɛ ebote He Krɔŋkrɔŋ Fe Fɛɛ, loo ŋwɛi hewɔ lɛ, egbele gbɛ koni mɛi krokomɛi anyiɛ sɛɛ. (Hebribii 6:19, 20) Nɛkɛ aŋkroaŋkroi, ni amɛyibɔ baafee 144,000 nɛɛ baasɔmɔ akɛ osɔfoi bibii yɛ Nyɔŋmɔ mumɔŋ sɔlemɔtsu gbɛjianɔtoo lɛ mli. (Kpojiemɔ 7:4; 14:1; 20:6) Taakɛ bɔ ni klɛŋklɛŋ lɛ Israel osɔfonukpa lɛ ŋɔɔ tsina nuu lɛ lá kɛyaa He Krɔŋkrɔŋ Fe Fɛɛ lɛ koni ekɛyakpata eha osɔfoi lɛ ahe eshai lɛ, nakai akɛ Yesu lá ni efɔse eshwie shi lɛ jara kpata aha nɛkɛ osɔfoi bibii 144,000 nɛɛ klɛŋklɛŋ. *
Ŋmɛnɛŋmɛnɛ Beaŋ “Nii ni Jara Wa”
11. Namɛi ahewɔ Israel osɔfonukpa lɛ kɛ too kpakpo shãa afɔle lɛ, ni mɛni he mfoniri enɛ fee?
11 Etamɔ nɔ ni beni afi 1935 shɛɔ lɛ, no mli lɛ ágbe mɛi ni afɔ amɛ mu lɛ anaabuamɔ diɛŋtsɛ lɛ naa. * Shi Yehowa egbeko ewe lɛ hiɛ nyam ni ewoɔ lɛ naa. Dabi, “nii ni jara wa” lɛ baaba mli lolo. Kaimɔ akɛ Israel osɔfonukpa lɛ kɛ kooloi enyɔ shãa afɔle—tsina nuu kɛha osɔfoi lɛ ahe eshai kɛ too kpakpo kɛha akutsei ni yeee osɔfoi lɛ. Akɛni osɔfoi lɛ feɔ mɛi ni afɔ amɛ mu lɛ ni kɛ Yesu baahi ŋwɛi Maŋtsɛyeli lɛ mli lɛ ahe mfoniri hewɔ lɛ, akutsei ni yeee osɔfoi lɛ damɔ shi kɛha namɛi? Anaa hetoo lɛ yɛ Yesu wiemɔi ni aŋma afɔ̃ shi yɛ Yohane 10:16 lɛ mli, akɛ: “Miyɛ tooi krokomɛi ni jɛɛɛ toi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni tooi lɛ fee kuu kome kɛ kwɛlɔ kome.” No hewɔ lɛ, Yesu lá ni efɔse eshwie shi lɛ he baa sɛɛnamɔ kɛhaa gbɔmɛi akui enyɔ—klɛŋklɛŋ lɛ, nakai Kristofoi ni amɛ hiɛnɔkamɔ ji ni amɛkɛ Yesu aye maŋtsɛ yɛ ŋwɛi lɛ, ni nɔ ni ji enyɔ lɛ, mɛi ni kwɛɔ naanɔ wala gbɛ yɛ paradeiso shikpɔŋ nɔ lɛ. Eyɛ faŋŋ akɛ, nɛkɛ kuu ni ji enyɔ nɛɛ ji mɛi ni Hagai gbalɛ lɛ mli “nii ni jara wa” lɛ feɔ amɛhe mfoniri lɛ.—Mika 4:1, 2; 1 Yohane 2:1, 2.
12. Aabua “nii ni jara wa” lɛ babaoo anaa kɛmiiba Nyɔŋmɔ shia lɛ ŋmɛnɛ yɛ mɛɛ gbɛ nɔ?
12 Nɛkɛ “nii ni jara wa” nɛɛ miiba Yehowa shia lɛ lolo. Ájie naatsii ni akɛba amɛnɔ yɛ Europa Bokagbɛ, Afrika hei komɛi, kɛ shikpɔji krokomɛi anɔ lɛ yɛ nyɛsɛɛ afii nɛɛ amli, ni enɛ eha Nyɔŋmɔ Maŋtsɛyeli ni ato ama shi lɛ he sanekpakpa lɛ eshwere yɛ tsutsu shikpɔŋkukuji ni atsuko mli nii lɛ amli. Yɛ be mli ni mɛi ni jara wa lɛ baa Nyɔŋmɔ sɔlemɔtsu gbɛjianɔtoo lɛ mli lɛ, amɛ hu amɛbɔɔ mɔdɛŋ ni amɛfee mɛi krokomɛi kaselɔi, yɛ Yesu famɔ lɛ toiboo mli. (Mateo 28:19, 20) Yɛ be mli ni amɛfeɔ nakai lɛ, amɛkɛ aŋkroaŋkroi pii kpeɔ, gbekɛbii kɛ onukpai ni baanyɛ atsɔmɔ “nii ni jara wa” ni baawo Yehowa shia lɛ hiɛ nyam. Susumɔ nɔkwɛmɔnii fioo komɛi ni tsɔɔ bɔ ni enɛ yaa nɔ ehaa lɛ he okwɛ.
13. Gbekɛ yoo fioo ko ni yɔɔ Bolivia lɛ fee ekãa ni eyɔɔ kɛha Maŋtsɛyeli shɛɛ sane lɛ gbɛɛ kɛ shwamɔ he nɔkwɛmɔnɔ yɛ mɛɛ gbɛ nɔ?
13 Yɛ Bolivia lɛ, gbekɛ yoo ko ni eye afii 5 ni efɔlɔi ni ji Odasefoi miitsɔse lɛ lɛ kɛɛ etsɔɔlɔ lɛ akɛ eŋmɛ lɛ gbɛ koni ekaba skul yɛ otsi ni kpokpaa nɔkwɛlɔ lɛ saraa amɛ lɛ mli. Mɛni hewɔ? Eesumɔ ni ekɛ ehe awo sɔɔmɔ lɛ mli yɛ otsi krɛdɛɛ nɛɛ mli nitsumɔ lɛ mli. Enɛ ha efɔlɔi lɛ anaa kpɛ amɛhe, ni kɛlɛ amɛná miishɛɛ akɛ amɛbi lɛ hiɛ subaŋ kpakpa ni tamɔ nɛkɛ. Amrɔ nɛɛ gbekɛ yoo fioo lɛ miifee shia Biblia mli nikasemɔi enumɔ, ni skul nikaselɔi nɛɛ ateŋ mɛi komɛi yaa Kristofoi akpeei. Ekɛ eskul tsɔɔlɔ lɛ po eba Maŋtsɛyeli Asa lɛ nɔ pɛŋ. Ekolɛ yɛ be ni sa mli lɛ, e-Biblia kaselɔi lɛ ateŋ mɛi komɛi baajie amɛhe kpo akɛ “nii ni jara wa” ni baawo Yehowa shia lɛ hiɛ nyam.
14. Yɛ mɛɛ gbɛ nɔ awo nyɛmi yoo ko hiɛmiamɔ yɛ mɔ ko ni tamɔ mɔ ni bɛ wiemɔ lɛ he miishɛɛ lɛ he lɛ he nyɔmɔ yɛ Korea?
14 Beni Kristofonyo yoo ko ni yɔɔ Korea lɛ mɛɔ yɛ oketeke shidaamɔhe ko lɛ, etsi ebɛŋkɛ skul nikaselɔ ko ní kɛ nɔ ko ebu etoi kɛmiibo lalai atoi. Nyɛmi yoo lɛ bi lɛ akɛ: “Ani oyɛ jamɔ ko mli?” Skul nikaselɔ lɛ ha lɛ hetoo akɛ: “Mibɛ jamɔ he miishɛɛ.” Nyɛmi yoo lɛ nijiaŋ ejeee wui. Etee nɔ akɛ: “Beni be shwieɔ mli lɛ, ekolɛ mɔ ko baasumɔ ni ebote jamɔ ko mli. Shi kɛji akɛ ebɛ jamɔ he nilee ko kwraa lɛ, ebaahala jamɔ ni ejaaa lɛ.” Skul nikaselɔ lɛ wiemɔ tsake, ni ekɛ miishɛɛ bɔi wɔnyɛmi yoo lɛ toiboo. Nyɛmi yoo lɛ kɛ Is There a Creator Who Cares About You? wolo lɛ ha lɛ, ni ekɛɛ lɛ akɛ, kɛji akɛ be shɛ ni ebaahala jamɔ ko lɛ nɛkɛ wolo nɛɛ baaye abua lɛ waa. Ehe wolo lɛ amrɔ nɔŋŋ. Ekɛ Yehowa Odasefoi bɔi Biblia lɛ kasemɔ enɔ otsi lɛ, ni amrɔ nɛɛ ebaa asafoŋ kpeei fɛɛ.
15. Mɛɛ gbɛ nɔ gbekɛ yoo fioo ko ni yɔɔ Japan lɛ tsɔɔ ejeɔ Biblia mli nikasemɔi ashishi, ni awo emɔdɛŋbɔi lɛ ahe nyɔmɔ yɛ mɛɛ gbɛ nɔ?
15 Yɛ Japan lɛ, Megumi ni eye afii 12 lɛ buɔ eskul lɛ akɛ he ni hi jogbaŋŋ kɛha shiɛmɔ kɛ nitsɔɔmɔ. Ényɛ eje Biblia mli nikasemɔi babaoo po shishi. Te Megumi feɔ enɛ ehaa tɛŋŋ? Akɛni ekaneɔ Biblia lɛ loo esaa ehe kɛhaa kpeei beni akpa shwane hewɔ lɛ, eklasbii lɛ fɔɔ lɛ nɔ ni efeɔ lɛ he sanebimɔ. Mɛi komɛi biɔ Megumi nɔ hewɔ ni ekɛ ehe wooo skul nifeemɔi komɛi amli. Megumi haa amɛ sanebimɔi lɛ ahetoo ni ekɛɔ amɛ akɛ Nyɔŋmɔ yɛ gbɛi. Bei pii lɛ enɛ kaanyaa etoibolɔi lɛ amiishɛɛ. Kɛkɛ lɛ ekɛ Biblia lɛ kasemɔ he hegbɛ eha amɛ. Megumi feɔ nikasemɔi 20 bianɛ—ni ekɛ eklaasbii lɛ feɔ emli 18.
16. Te nyɛmi nuu ko ni yɔɔ Cameroon lɛ fee tɛŋŋ ni ekɛ mɛi komɛi ni yɔɔ hefɛoyelɔi akuu ko mli lɛ je Biblia mli nikasemɔi ashishi?
16 Yɛ Cameroon lɛ, hii kpaanyɔ ko ni miitsu nii yɛ he ko tsɛ nyɛmi nuu ko ni kɛ Biblia kasemɔ he woji miiha mɛi ni yaa kɛ baa lɛ. Akɛni amɛmiitao ni amɛye nyɛmi nuu lɛ he fɛo hewɔ lɛ, amɛbi lɛ nɔ hewɔ ni eheee Triniti, hɛl la, loo susuma ni gbooo lɛ eyeee. Wɔ nyɛmi nuu lɛ kɛ Biblia lɛ tsu nii ni ekɛha amɛ sanebimɔi lɛ ahetoo. Yɛ enɛ hewɔ lɛ, hii lɛ ateŋ mɛi etɛ kpɛlɛ ni akɛ amɛ akase Biblia lɛ. Amɛteŋ mɔ kome, ni atsɛɔ lɛ Daniel je kpee baa shishi ni ekpata enibii fɛɛ ni kɔɔ mumɔi atsɛmɔ he lɛ hiɛ. (Kpojiemɔ 21:8) Eshɛɛɛ afi ni abaptisi lɛ.
17. Yɛ mɛɛ gbɛ nɔ nyɛmimɛi komɛi ni yɔɔ El Salvador lɛ kɛ hiɛtɛɛ tsu nii ni amɛkɛshiɛ amɛha nuu ko ni klɛŋklɛŋ lɛ esumɔɔɔ ni eboɔ Maŋtsɛyeli shɛɛ sane lɛ toi lɛ?
17 Yɛ El Salvador lɛ, nuu ko fiɔ egbee ni hiɛ yɔɔ la lɛ yɛ eshinaa naa be fɛɛ be ni eeena akɛ Yehowa Odasefoi eba ekutso lɛ mli. Nuu lɛ mɛɔ kɛyashiɔ be mli ni Odasefoi lɛ aaashi jɛmɛ, kɛkɛ lɛ ekɛ gbee lɛ etee shia lɛ mli ekoŋŋ. Nyɛmimɛi lɛ nyɛɛɛ amɛkɛ nuu lɛ awie gbi ko gbi ko. No hewɔ lɛ, amɛkpɛ amɛyiŋ gbi ko akɛ amɛbaabɔ nɔ kroko feemɔ he mɔdɛŋ. Akɛni amɛle akɛ nuu lɛ baanyɛ anu nɔ ni amɛwieɔ lɛ hewɔ lɛ, amɛkpɛ amɛyiŋ akɛ amɛbaashiɛ amɛha gbee lɛ. Amɛba shia lɛ, ni amɛŋa gbee lɛ, ni amɛkɛɛ amɛyɛ miishɛɛ waa ejaakɛ amɛná hegbɛ akɛ amɛaawie amɛtsɔɔ lɛ. Amɛwie be mli ni paradeiso baaba shikpɔŋ nɔ, be mli ni mɔ ko mɔ ko mli fuuu mɔ ko—hɛɛ, be mli ni kooloi po ahe baajɔ amɛ lɛ he. Kɛkɛ ni amɛkɛ bulɛ shɛ gbee lɛ ni amɛyi gbɛ akɛ amɛmiiya. Nɔ ni ha amɛnaa kpɛ amɛhe ji akɛ, nuu lɛ fã kpo kɛjɛ shia lɛ mli ni ekpa fai akɛ ehako Odasefoi lɛ hegbɛ koni amɛkɛ lɛ awie dã. Ehe woji tɛtrɛbii lɛ, ni akɛ lɛ je Biblia lɛ kasemɔ shishi. Nuu nɛɛ ebatsɔ wɔnyɛmi bianɛ—“nii ni jara wa” lɛ ateŋ mɔ kome!
“Nyɛkashea Gbeyei!”
18. Mɛɛ kaai Kristofoi pii kɛkpeɔ, shi te Yehowa buɔ mɛi ni jaa lɛ lɛ tɛŋŋ?
18 Ani ooná gbɛfaŋnɔ yɛ Maŋtsɛyeli shiɛmɔ kɛ kaselɔi afeemɔ nitsumɔ ni he hiaa waa lɛ mli? Kɛji nakai ni lɛ, belɛ oná hegbɛ diɛŋtsɛ. Yɛ anɔkwale mli lɛ, nɛkɛ nitsumɔ nɛɛ nɔ Yehowa tsɔɔ egbalaa “nii ni jara wa” lɛ kɛbaa eshia lɛ. (Yohane 6:44) Eji anɔkwale akɛ, etɔɔ bo fioo loo onijiaŋ jeɔ wui yɛ bei komɛi amli. Yɛ bei komɛi amli lɛ, mɛi komɛi—ni yɔɔ Yehowa tsuji anɔkwafoi lɛ ateŋ po—kɛ henumɔ ko ni tsɔɔ akɛ sɛɛnamɔ ko bɛ amɛhe lɛ shiɔ mple. Shi kɛlɛ, ná tsui! Yehowa buɔ ejálɔi lɛ ateŋ mɔ fɛɛ mɔ akɛ nɔ̃ ni jara wa, ni eyɛ oyiwalaheremɔ he miishɛɛ waa.—2 Petro 3:9.
19. Mɛɛ hewalɛwoo Yehowa tsɔ Hagai nɔ ekɛha, ni wiemɔi nɛɛ baanyɛ afee hewalɛwoo jɛɛhe kɛha wɔ yɛ mɛɛ gbɛ nɔ?
19 Kɛji akɛ wɔnuɔ he akɛ wɔnijiaŋ eje wui, yɛ shitee-kɛ-woo loo shihilɛi komɛi ni eŋɔɔɔ hewɔ lɛ, Yehowa wiemɔi ni ekɛha Yudafoi ni akɛ amɛ eba amɛmaŋ ekoŋŋ lɛ baanyɛ afee hewalɛwoo jɛɛhe. Wɔkaneɔ yɛ Hagai 2:4-6 akɛ: “Shi kɛlɛ agbɛnɛ, wajemɔ ohe ko, Zerubabel! Yehowa kɛɛ, ni wajemɔ ohe, Yoshua, Yehozadak bi, ni oji osɔfonukpa! Ni wajemɔ ohe, bo shikpɔŋ lɛ nɔ maŋ lɛ fɛɛ! Yehowa kɛɛ, ni nyɛtsua nii; ejaakɛ mikɛ nyɛ yɛ, Yehowa Zebaot kɛɛ. Wiemɔ ni miwie ni mikɛ nyɛ kpaŋ, beni nyɛje Mizraim lɛ, ni Mimumɔ hu hiɔ nyɛteŋ. Nyɛkashea gbeyei! Shi bɔ ni Yehowa Zebaot kɛɛ nɛ: Eshwɛ be, be kukuoo kɛkɛ, ni mahoso ŋwɛi kɛ shikpɔŋ, kɛ ŋshɔ kɛ shikpɔŋ gbiŋ.” Kadimɔ akɛ jeee akɛ Yehowa woɔ wɔ ŋaa ni wɔwaje wɔhe kɛkɛ, shi ekɛ nɔ ni wɔɔtsɔ nɔ wɔná hewalɛ hu haa wɔ. Yɛ mɛɛ gbɛ nɔ? Kadimɔ wiemɔi ni maa nɔ aduatsɔ nɛɛ: “Mikɛ nyɛ yɛ.” Kwɛ bɔ ni ewoɔ hemɔkɛyeli hewalɛ ehaa akɛ aaayoo akɛ, yɛ gbɛtsii nii ni wɔkɛkpeɔ lɛ fɛɛ sɛɛ lɛ, Yehowa kɛ wɔ yɛ!—Romabii 8:31.
20. Anunyam ni anako eko ni tamɔ nakai dã miiyi Yehowa shia lɛ obɔ ŋmɛnɛ yɛ mɛɛ gbɛ nɔ?
20 Yehowa etsɔɔ lɛɛlɛŋ akɛ ekɛ ewebii lɛ yɛ. Yɛ anɔkwale mli lɛ, etamɔ bɔ pɛ ni ewie kɛtsɔ gbalɔ Hagai nɔ lɛ: “Shia nɛɛ sɛɛkpee anunyam lɛ aaada fe tsutsu nɔ̃ lɛ, . . . ni biɛ nɛɛ maha hejɔlɛ yɛ.” (Hagai 2:9) Eji anɔkwale akɛ, anaa anunyam ni da fe fɛɛ ŋmɛnɛ lɛ yɛ Yehowa mumɔŋ sɔlemɔtsu lɛ mli. Ejaakɛ gbɔmɛi akpei ohai abɔ keɔ yuu kɛbaa anɔkwa jamɔ he daa afi. Aalɛ mɛnɛɛmɛi jogbaŋŋ yɛ mumɔŋ yɛ jeŋ ni mli efee basabasa nɛɛ po mli, ni amɛnáa toiŋjɔlɛ mli ŋɔɔmɔ, ni nɔ̃ pɛ ni baafe enɛ ji nɔ ni abaaná yɛ Nyɔŋmɔ jeŋ hee lɛ mli lɛ.—Yesaia 9:5, 6; Luka 12:42.
21. Mɛni esa akɛ efee wɔfaishitswaa?
21 Jeŋmaji lɛ ni Yehowa baahoso amɛ yɛ Harmagedon lɛ kã wɔhiɛ kpaakpa. (Kpojiemɔ 16:14, 16) Belɛ nyɛhaa wɔkɛ be ni eshwɛ lɛ atsua nii ni wɔkɛye wɔbua ni ahere mɛi pii ayiwala. Eba akɛ wɔɔha wɔhe awa ni wɔná hekɛnɔfɔɔ kwraa yɛ Yehowa mli. Nyɛhaa efea wɔfaishitswaa akɛ wɔɔya nɔ wɔjá yɛ emumɔŋ sɔlemɔtsu kpeteŋkpele lɛ mli, ni wɔkɛ “nii ni jara wa” lɛ babaoo awo mli obɔ kɛyashi be mli ni Yehowa aaakɛɛ akɛ wɔgbe wɔnitsumɔ lɛ naa.
[Shishigbɛ niŋmai]
^ kk. 4 Onia ni atsu kɛha Salomo sɔlemɔtsu lɛ maa lɛ baatamɔ nɔ ni miihe ashɛ dɔlai akpekpei toi akpei 40 yɛ ŋmɛnɛŋmɛnɛ shika jara naa. Akɛ nɔ fɛɛ nɔ ni shwɛ ni akɛtsuuu sɔlemɔtsu lɛ maa he nii lɛ to sɔlemɔwe lɛ nitoohe lɛ.—1 Maŋtsɛmɛi 7:51.
^ kk. 10 Ákɛ mɔ ni tamɔɔɔ Israel osɔfonukpa lɛ, Yesu bɛ esha ko ni baaha kpatamɔ he ahia lɛ. Shi kɛlɛ, eshai yɛ ehefatalɔi osɔfoi lɛ ahe ejaakɛ ahe amɛ kɛjɛ adesai eshafeelɔi ateŋ.—Kpojiemɔ 5:9, 10.
^ kk. 11 Kwɛmɔ February 15, 1998 Buu-Mɔɔ lɛ baafa 17-22.
Ani Okaiɔ?
• Mɛni jara wa waa kɛha Yehowa fe heloo naa nibii?
• Yesu lá ni efɔse eshwie shi lɛ he baa sɛɛnamɔ kɛhaa mɛɛ gbɔmɛi akui enyɔ?
• Namɛi ji “nii ni jara wa” lɛ ni kɛ anunyam baawo Yehowa shia lɛ obɔ lɛ?
• Mɛɛ odaseyeli wɔyɔɔ ni tsɔɔ akɛ Hagai gbalɛ lɛ miiba mli ŋmɛnɛ?
[Nikasemɔ lɛ he Sanebimɔi]
[Nitɛŋmɔ ni akɛmiitsɔɔ nɔ ko mli ni yɔɔ baafa 16]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Ani ole nɔ ni Yehowa blema sɔlemɔtsu lɛ damɔ shi kɛha yɛ okadi gbɛ nɔ?
Muhɔɔ
Krɔŋkrɔŋ
Afɔleshaa latɛ
He Krɔŋkrɔŋ Fe Fɛɛ
Koishi
Kpo nɔ
[Mfoniri ni yɔɔ baafa 17]
Osɔfonukpa lɛ kɛ tsina nuu shãa afɔle kɛhaa Levibii lɛ ahe eshai, kɛ too kpakpo kɛha Israel akutsei ni jeee osɔfoi lɛ ahe eshai
[Mfoniri ni yɔɔ baafa 18]
Jeŋ muu fɛɛ Maŋtsɛyeli shiɛmɔ nitsumɔ lɛ miigbala gbɔmɛi asafoi babaoo kɛmiiba Yehowa shia lɛ