Nyɔŋmɔ Gbalɛ Wiemɔ Haa Anáa Wɔsɛɛ Be He Hiɛnɔkamɔ

YƐ NYƆŊMƆ Wiemɔ ni ji Ŋmalɛ Krɔŋkrɔŋ lɛ hewɔ lɛ, anɔkwa Kristofoi kɛ hemɔkɛyeli, hiɛnɔkamɔ, kɛ nɔkpakpa gbɛkpamɔ kwɛɔ wɔsɛɛ be gbɛ. Akɛni wekukpaa ni yɔɔ amɛ kɛ Yehowa Nyɔŋmɔ teŋ lɛ eha amɛfee shweshweeshwe hewɔ lɛ, amɛkpáa nɔ ni baaba wɔ́ gbɛ. Taakɛ “Nyɔŋmɔ Gbalɛ Wiemɔ” Kpokpaa Wulu nɔ Kpeei lɛ shishijee wiemɔ lɛ tsɔɔ mli lɛ, Yehowa Odasefoi etee nɔ amɛfee mɛi ni kɛ afii babaoo ekase Biblia mli gbalɛ lɛ waa diɛŋtsɛ. No hewɔ lɛ, mɛni Yehowa saa eto ewebii yɛ nɛkɛ kpeei nɛɛ ashishi? Akɛni mɛi fɛɛ ni ba lɛ fee amɛ Bibliai lɛ klalo hewɔ lɛ, amɛshwe akɛ amɛaatao mli koni amɛle. Ato yitso kɛha kpee gbi lɛ eko fɛɛ eko he gbɛjianɔ akɛ saneyitso bibioo.

KLƐŊKLƐŊ GBI: Nyɔŋmɔ Wiemɔ lɛ La lɛ Mli Nyiɛmɔ

Wiemɔ ni ji “Nyɔŋmɔ Wiemɔ lɛ Enyiɛ Wɔhiɛ” lɛ tsɔɔ akɛ Yehowa webii tamɔ nuu ko ni jeɔ gbɛfãa shishi yɛ nyɔɔŋ loo duŋ mli. Beni hulu lɛ jeɔ fiofio lɛ, enaa nibii asusuma, shi enaa nii yɛ faŋŋ mli agbɛnɛ beni hulu lɛ eje ni etsoɔ waa lɛ. Taakɛ agba afɔ̃ shi yɛ Abɛi 4:18 lɛ, kɛtsɔ anɔkwale ni jɛɔ Nyɔŋmɔ gbalɛ wiemɔ lɛ mli hulu la ni kpɛ́ɔ lɛ nɔ lɛ, Yehowa webii lɛ ebana amɛgbɛ lɛ nɔ jogbaŋŋ. Ashiii amɛ ni amɛnane atɔ̃tɔ̃ yɛ mumɔŋ duŋ mli.

Wiemɔ krɛdɛɛ ni ji, “Bó Nyɔŋmɔ Gbalɛ Wiemɔ lɛ Toi” lɛ, kai toibolɔi lɛ akɛ ahaa mɛi ni kwɛɔ Yehowa gbɛ lɛ yeɔ amɛhe kɛjɛɔ nijiaŋwujee kɛ shihɛlemɔ ni mɛi ni nyiɛɔ apasa mesiai kɛ amale gbalɔi asɛɛ lɛ kɛkpeɔ lɛ mli. Nɔ ni tamɔɔɔ nakai kwraa lɛ, nibii ni tsɔɔ akɛ anɔkwa Mesia ni ji Yesu Kristo yɛ hesaai lɛ fá waa diɛŋtsɛ! Ákɛ nɔkwɛmɔnɔ lɛ, Yesu naakpɛɛ tsakemɔ lɛ feɔ Nyɔŋmɔ Maŋtsɛyeli lɛ nɔ Maŋtsɛ ni awo lɛ lɛ he mfoniri. Akɛni Yesu miiba Maŋtsɛyeli hewalɛ mli yɛ afi 1914 hewɔ lɛ, lɛ ji “toloo” ni atsĩ tã yɛ 2 Petro 1:19 lɛ hu. Wielɔ lɛ kɛɛ akɛ: “Ákɛ Mesia Toloo lɛ, etswaa gbi, loo yinɔ hee, ní jetsɛremɔ kɛbaa kɛha adesai toibolɔi fɛɛ lɛ he adafi.”

Beni wiemɔ ni yitso ji “Ní Wɔɔkpɛ́lɛ Tamɔ Kanei” lɛ kpáa shwane wiemɔ he gbɛjianɔtoo lɛ hiɛ lɛ, etsɔɔ Efesobii 5:8 lɛ mli, he ni bɔfo Paulo wo wɔ ŋaa koni ‘wɔnyiɛ tamɔ la bii’ lɛ. Kanei ji  Kristofoi, jeee kɛtsɔ Nyɔŋmɔ Wiemɔ lɛ he sane ni amɛgbaa mɛi krokomɛi lɛ nɔ kɛkɛ, shi kɛtsɔ Biblia lɛ ni amɛkɛtsuɔ nii yɛ amɛshihilɛi amli kɛkaseɔ Yesu lɛ hu nɔ.

Kɛ wɔɔtsɔmɔ kane ni tamɔ nɛkɛ lɛ, esa akɛ ‘Wɔná Nyɔŋmɔ Wiemɔ lɛ Kanemɔ He Miishɛɛ.’ Aha saneyitso nɛɛ he wiemɔ lɛ yɛ wiemɔ ni ahaa kɛtsaraa nɔ lɛ mli fãi srɔtoi etɛ mli. Beni klɛŋklɛŋ wielɔ lɛ etsɛ́ Abraham Lincoln ni tsɛ́ Biblia lɛ akɛ “nikeenii ni fe fɛɛ ni Nyɔŋmɔ kɛha gbɔmɔ” lɛ wiemɔ sɛɛ egbe naa lɛ, ebi toibolɔi lɛ nɔ ni amɛnikanemɔ sui lɛ tsɔɔ yɛ bɔ ni amɛhiɛ sɔɔ Yehowa Wiemɔ lɛ amɛhaa lɛ he. Awo toibolɔi ahewalɛ ni amɛkane Biblia lɛ ojogbaŋŋ, koni amɛtao be ni amɛkɛfee Ŋmalɛ mli saji lɛ ahe mfoniri yɛ amɛjwɛŋmɔ mli ni amɛkɛ saji otii heei afata nibii ni amɛkase momo lɛ ahe.

Wiemɔ ni ahaa kɛtsaraa nɔ lɛ fã ni nyiɛ sɛɛ lɛ ma bɔ ni ehe hiaa ni wɔkase nii lɛ nɔ mi, kɛ́ wɔbaaye “niyenii kpakpa” lɛ, shi jeee nii kɛkɛ ni akaneɔ. (Hebribii 5:13, 14) Wielɔ lɛ kɛɛ akɛ, nikasemɔ he baa sɛɛnamɔ ojogbaŋŋ, kɛ́ ‘wɔkɛ wɔtsui fɔ̃ nɔ’ kɛtsɔ hiɛ taakɛ Israel osɔfo Ezra fee lɛ. (Ezra 7:10) Shi mɛni hewɔ nikasemɔ he hiaa waa nɛkɛ lɛ? Ejaakɛ ekɔɔ wɔ kɛ Yehowa teŋ wekukpaa lɛ he tɛ̃ɛ. No hewɔ lɛ, esa akɛ Biblia mli nikasemɔ afee nɔ ni jara wa, ní ŋɔɔ, ní haa tsui nyɔɔ mɔ mli, eyɛ mli kɛ ebiɔ jwɛŋmɔ lɛ tsɔsemɔ kɛ mɔdɛŋbɔɔ. Te wɔɔfee tɛŋŋ wɔná be wɔha nikasemɔ ni he yɔɔ sɛɛnamɔ? Wiemɔ ni ahaa kɛtsaraa nɔ lɛ naagbee wielɔ lɛ kɛɛ akɛ, kɛtsɔ ni “wɔɔhé be ni hi jogbaŋŋ” lɛ kɛjɛ nitsumɔi ni he ehiaaa tsɔ̃ lɛ amli lɛ nɔ. (Efesobii 5:16, NW) Hɛɛ, bɔ ni wɔɔfee wɔná be ji ni wɔkɛ be ni wɔyɔɔ lɛ aaatsu nii jogbaŋŋ kɛmɔ shi.

Wiemɔ ni ji “Nyɔŋmɔ Kɛ Hewalɛ Haa Mɔ ni Etɔ Lɛ Lɛ” ha ale akɛ étɔ mɛi babaoo gbii-etɛ nɛɛ. Bɔni afee ni wɔnyɛ wɔná “hewalɛ ni fá kɛteke nɔ” kɛha Kristofoi asɔɔmɔ nitsumɔ lɛ, ehe miihia ni wɔkɛ wɔhe afɔ̃ Yehowa ni ‘haa mɔ ni egbɔjɔ lɛ hewalɛ’ lɛ nɔ. (2 Korintobii 4:7; Yesaia 40:29) Ekãawoo nibii lɛ ekomɛi ji Nyɔŋmɔ Wiemɔ lɛ, sɔlemɔ, Kristofoi asafo lɛ, shiɛmɔ nitsumɔ lɛ ni akɛ he woɔ mli daa, Kristofoi nɔkwɛlɔi, kɛ nɔkwɛmɔnɔ ni mɛi krokomɛi fee yɛ anɔkwayeli mli lɛ. Saneyitso ni ji “Nyɛtsɔmɔa Tsɔɔlɔi yɛ Be lɛ Naa” lɛ ma nɔ mi etsɔɔ bɔ ni ehe hiaa ni Kristofoi afee tsɔɔlɔi kɛ shiɛlɔi hu koni amɛtsu nii waa koni amɛná “nitsɔɔmɔ he ŋaa” lɛ.—2 Timoteo 4:2, NW.

Gbi lɛ naagbee wiemɔ ni ji, “Mɛi ni Wuɔ Shiɔ Nyɔŋmɔ lɛ Yeŋ Kunim” lɛ, tsĩ tã etsɔɔ bɔ ni mɔdɛŋ ni abɔ nyɛsɛɛ nɛɛ akɛ abaawo Yehowa Odasefoi gbɛi yɛ shikpɔji komɛi anɔ akɛ kuu-fã ni he yɔɔ oshara lɛ yeee omanye ha. Shi ehe ehiaaa ni wɔshe gbeyei, ejaakɛ Yesaia 54:17 kɛɔ akɛ: “Tawuu nii ní asɔ̃ɔ ashiɔo lɛ eko eko nyɛŋ nɔ ko afee, ni lilɛi fɛɛ lilɛi ní aaate shi ní ekɛo akojo lɛ, ooobu lɛ fɔ́. Enɛ ji Yehowa tsuji lɛ agboshinii, kɛ amɛjalɛ ní jɛ midɛŋ, Yehowa kɛɛ!”

GBI NI JI ENYƆ: Nibii ni Aha Ale Kɛtsɔ Gbalɛi Amli Ŋmalɛi lɛ Anɔ

Yɛ gbi lɛ Biblia mli ŋmalɛ lɛ hesusumɔ sɛɛ lɛ, mɛi ni ebua amɛhe naa lɛ ná kpee lɛ shishi wiemɔ ni ahaa kɛtsaraa nɔ lɛ mli nɔ ni ji enyɔ lɛ mli ŋɔɔmɔ, ni eyitso ji “Ní Wɔɔwo Yehowa Hiɛ  Nyam akɛ La Hiɛlɔi.” Klɛŋklɛŋ wiemɔ lɛ tsɔɔ akɛ oti ni ma Kristofonyo hiɛ ji ní ewo Yehowa hiɛ nyam kɛtsɔ shiɛmɔ nitsumɔ lɛ nɔ yɛ he fɛɛ he. Fã ni nyiɛ sɛɛ lɛ tsĩ tã etsɔɔ bɔ ni ehe hiaa ni atsɔɔ mɛi ni hereɔ wiemɔ lɛ nɔ lɛ agbɛ kɛba Nyɔŋmɔ gbɛjianɔtoo lɛ mli. Yɛ mɛɛ gbɛ nɔ? Kɛtsɔ ni wɔɔŋɔ minitii enumɔ loo nyɔŋma dani Biblia mli nikasemɔ fɛɛ nikasemɔ aje shishi loo yɛ ekpamɔ sɛɛ, ní wɔkɛtsɔɔ bɔ ni Nyɔŋmɔ gbɛjianɔtoo lɛ tsuɔ nii ehaa. Wiemɔ ni ahaa kɛtsaraa nɔ nɛɛ mli nɔ ni ji etɛ lɛ ma bɔ ni ehe hiaa ni awo Nyɔŋmɔ hiɛ nyam kɛtsɔ nitsumɔi kpakpai anɔ lɛ nɔ mi.

Wiemɔ ni ji “Ná Yehowa Kaimɔi lɛ Ahe Miishɛɛ Naakpa” lɛ wie kukuji ni ahala yɛ Lala 119 mli lɛ ahe. Eka shi faŋŋ akɛ, kaimɔi he miihia wɔ, ejaakɛ wɔ fɛɛ wɔhiɛ nyɛɔ ekpaa nii anɔ. Belɛ kwɛ bɔ ni ehe hiaa akɛ wɔɔná Yehowa kaimɔi lɛ ahe miishɛɛ taakɛ lalatsɛ lɛ fee lɛ!

No sɛɛ lɛ aha wiemɔ oti krɛdɛɛ ko—baptisimɔ wiemɔ ni yitso ji “Gbalɛ Wiemɔ lɛ Toiboo Kɛ Mɔ Yaa Baptisimɔ Mli.” Akai mɛi ni abaabaptisi amɛ lɛ akɛ amɛkai Kristo ni jeee akɛ aabaptisi amɛ kɛkɛ shi agbɛnɛ ni amɛnyiɛ enajifamɔi asɛɛ kpaakpa. (1 Petro 2:21) Mɛɛ hegbɛ mɛi heei nɛɛ yɔɔ nɛkɛ akɛ amɛaaná Yohane 10:16 lɛ mlibaa mli gbɛfaŋnɔ, he ni Yesu gba efɔ̃ shi yɛ akɛ ebaabua “tooi krokomɛi” lɛ anaa koni amɛfata ekaselɔi ni akɛ mumɔ efɔ amɛ mu lɛ ahe kɛsɔmɔ lɛ!

Wiemɔ ni ji “Bó Nɔ ni Mumɔ lɛ Yɔɔ Kɛɛmɔ lɛ Toi” ni je shwane wiemɔ he gbɛjianɔtoo lɛ shishi lɛ, tsɔɔ mli akɛ Yehowa mumɔ lɛ kɛ wɔ wieɔ kɛtsɔɔ Biblia lɛ, “tsulɔ anɔkwafo kɛ nilelɔ” lɛ kɛ wɔ henilee ni Biblia lɛ etsɔse lɛ lɛ nɔ. (Mateo 24:45) No hewɔ lɛ, ehe ehiaaa ni Kristofoi anu gbee diɛŋtsɛ ko kɛjɛ ŋwɛi bɔni afee ni amɛle bɔ ni amɛaafee amɛsa Nyɔŋmɔ hiɛ. Sanegbaa ni nyiɛ sɛɛ ni ji, “Nyɛfea Shiŋŋ Kɛha Nitsɔɔmɔ ni Kɛ Nyɔŋmɔ Jamɔ Hetuu-Kɛhamɔ Kpãa Gbee” lɛ wo Kristofoi hewalɛ koni amɛkatao akɛ amɛaale susumɔi ni fiteɔ mɔ jeŋba ni je nɛɛ gbɛɔ eshwãa lɛ mli. Lɛɛlɛŋ, nii ni ashweɔ waa diɛŋtsɛ koni ale lɛ baanyɛ eha wɔnine ashɛ saji ni yeɔ mɔ awui ni hemɔkɛyeli kwalɔi kɛ Satan samaŋfoi lɛ eto he gbɛjianɔ lɛ nɔ. Kwɛ bɔ ni ehi jogbaŋŋ daa nɛɛ akɛ wɔɔkane Biblia lɛ kɛ saji fɛɛ ni yɔɔ Buu-Mɔɔ kɛ Awake! lɛ mli lɛ.

Wiemɔ ni nyiɛ sɛɛ ni yitso ji “Yaa nɔ Ohiɛ Tsamɔ Wiemɔi lɛ Amli” lɛ ma bɔ ni ehe hiaa ni ale anɔkwale lɛ Ŋmalɛ naa ‘okadi’ loo eshishitoo nii lɛ ojogbaŋŋ kɛmɔ shi lɛ nɔ mi. (2 Timoteo 1:13) Nɛkɛ okadi nɛɛ shishi ni wɔɔnu lɛ jeee gbɛ ni atsɔɔ nɔ anáa Nyɔŋmɔjamɔ hetuu-kɛhamɔ kɛkɛ, shi ni wɔyɔse nɔ ni kɛ anɔkwale lɛ kpãaa gbee lɛ hu.

Ŋɔɔ lɛ akɛ Yehowa miibu bo akɛ ojara wa. Mɛɛ woo enɛ ji nɛkɛ! Wiemɔ ni ji “‘Nii ni Jara Wa’ lɛ Miiyi Yehowa We lɛ Obɔ” lɛ ni akɛdamɔ Hagai gbalɛ lɛ nɔ lɛ ji nɔ ni woɔ mɔ hewalɛ fe fɛɛ ejaakɛ eha toibolɔi lɛ ná nɔmimaa akɛ “asafo babaoo” lɛ ateŋ mɔ fɛɛ mɔ ji mɔ ni jara wa lɛɛlɛŋ yɛ Yehowa hiɛ. (Kpojiemɔ 7:9) No hewɔ lɛ, Yehowa baahere amɛyiwala kɛtsɔ naagbee ‘hosomɔ’ ni ekɛaaba maji lɛ anɔ yɛ “amanehulu babaoo” ni baa lɛ mli lɛ mli. (Hagai 2:7, 21, 22; Mateo 24:21) Shi amrɔ nɛɛ, esa akɛ Yehowa webii aya nɔ abu yɛ mumɔŋ, taakɛ atsɔɔ mli yɛ fã ni ji “Gbalɛ Mli Ŋmalɛi Hɛleɔ Wɔ Shi Koni Wɔsara” lɛ mli lɛ. Wielɔ lɛ tsɛ́ Yesu wiemɔi lɛ sɛɛ, nɔ ni ji: “No hewɔ lɛ nyɛsaraa, ejaakɛ nyɛleee nɔ ŋmɛlɛtswaa nɔ ni nyɛ-nuntsɔ lɛ baa” lɛ. (Mateo 24:42) Yɛ mɛɛ gbɛ nɔ wɔhaa wɔhiɛ hiɔ wɔhe nɔ daa yɛ mumɔŋ? Kɛtsɔ ni wɔɔtsu nii daa yɛ Yehowa sɔɔmɔ mli, ní wɔɔsɔle daa, ní wɔya nɔ wɔkpá Yehowa gbi wulu lɛ gbɛ lɛ nɔ.

Gbi lɛ naagbee wiemɔ lɛ yitso ji “Gbalɛ Wiemɔ lɛ yɛ Naagbee Be lɛ Mli.” Abaakai yɛ afii ni baaba lɛ amli. Mɛni hewɔ? Ejaakɛ wielɔ lɛ tswa wolo hee ni ajie lɛ kpo—Bó Daniel Gbalɛ Wiemɔ lɛ Toi! lɛ he adafi. Wielɔ lɛ kɛɛ akɛ, “Wolo ni hiɛ baafai 320 kɛ emli mfonirii fɛfɛji nɛɛ wieɔ Daniel wolo lɛ fãi lɛ fɛɛ he.” Mɛɛ odaseyeli ni woɔ mɔ hemɔkɛyeli hewalɛ eji nɛkɛ akɛ Yehowa miiha aanu egbalɛ Wiemɔ lɛ shishi!

GBI NI JI ETƐ: Nyɔŋmɔ Gbalɛ Wiemɔ lɛ Efeee Efolo

Kpee lɛ naagbee gbi lɛ kɛ wiemɔ ni ahaa kɛtsaraa nɔ, ni ji “Gbalɛ Wiemɔi Kɛha Be ni Ato Lɛ”  je shishi. Fãi etɛ lɛ pɛi Habakuk sanejajemɔi etɛ ni feɔ kojomɔi ni baatsɔɔ hiɛkpatamɔ ni Yehowa kɛha lɛ mli. Awie klɛŋklɛŋ nɔ̃ lɛ ashi Yuda ni edu gbɛ lɛ, ni awie nɔ ni ji enyɔ lɛ ashi Babilon ni teɔ shi woɔ mɔ lɛ. Naagbee nɔ̃ ni yɔɔ ni baaba mli lɛ kɔɔ hiɛkpatamɔ ni baa ni akɛbaaba mɛi fɔji fɛɛ anɔ lɛ ahe. Beni nyɛmi nuu ni kɛ wiemɔ ni ahaa kɛtsaraa nɔ lɛ naagbee nɔ̃ lɛ haa lɛ wieɔ Harmagedon he lɛ, etée Nyɔŋmɔ jamɔ mli gbeyeishemɔ shi yɛ etoibolɔi lɛ amli, beni ekɛɛ: “Lɛɛlɛŋ, ebaafee gbeyei waa kɛ Yehowa ŋmɛɛ ehewalɛ kpeteŋkpele lɛ fɛɛ he lɛ.”

“Hiɛsɔɔ ní Wɔɔná Wɔha Wɔmumɔŋ Gboshinii Lɛ” ji saneyitso kɛha kpee lɛ shishi Biblia drama ni afee lɛ. Akɛ nɛkɛ drama ni taoɔ susuma mli nɛɛ to bɔ ni Yakob kɛ Esau fee amɛnii amɛha yɛ mumɔŋ nibii ahe lɛ he. Esau ebuuu emumɔŋ gboshinii lɛ, ni no hewɔ lɛ akɛha Yakob, mɔ ni bu enɛ akɛ ejara wa waa lɛ. Abi mɛi ni ba kpee lɛ akɛ: “Mɛɛ [mumɔŋ gboshinii] Yehowa kɛha wɔ?” Wielɔ lɛ ha hetoo akɛ: “E-Wiemɔ lɛ ni ji anɔkwale lɛ, Biblia lɛ; naanɔ wala he hiɛnɔkamɔ lɛ; kɛ woo ni yɔɔ akɛ aaadamɔ enajiaŋ akɛ sanekpakpa lɛ jajelɔi.”

Fã ni nyiɛ sɛɛ lɛ yitso ji “Mɛni Ji Nɔ ni Wɔ Gboshinii ni Jara Wa lɛ Tsɔ̃ɔ Kɛha Bo?” Wɔtsɔɔ Yehowa sɔɔmɔ kɛ mumɔŋ hegbɛi ni wɔkɛyeɔ nibii ni wɔsumɔɔ loo heloonaa nibii ahiɛ lɛ anɔ wɔkɛtsɔɔ akɛ wɔjieɔ su ni ja lɛ kpo yɛ wɔ mumɔŋ gboshinii lɛ ahe. Kɛtsɔ nɛkɛ gbɛ nɔ lɛ, wɔtswaa wɔ kɛ Yehowa teŋ wekukpaa lɛ wɔmaa shi, nɔ ni tamɔɔɔ nɔ ni Adam, Esau, kɛ Israelbii ni yeee anɔkwa lɛ fee lɛ kwraa.

Maŋshiɛmɔ ni ji, “Nibii Fɛɛ ni Aaafee lɛ Ehee—Taakɛ Agba Afɔ̃ Shi Lɛ” tsɔɔ gbalɛi otii ejwɛ ni kɔɔ “ŋwɛi hee” kɛ “shikpɔŋ hee” lɛ he lɛ fɛɛ mli shikome. (Yesaia 65:17-25; 66:22-24; 2 Petro 3:13; Kpojiemɔ 21:1, 3-5) Eyɛ faŋŋ akɛ, nɔ ni yɔɔ Yehowa jwɛŋmɔ mli ji nɛkɛ gbalɛi nɛɛ amlibaa ni da waa fe nɔ ni ba ewebii ni akɛ amɛ eba ekoŋŋ lɛ anɔ yɛ afi 537 D.Ŋ.B. lɛ. Hɛɛ, e-Maŋtsɛyeli ni ji (“ŋwɛi hee” lɛ) kɛ ehe shikpɔŋ nɔ bii (“shikpɔŋ hee” lɛ) ni baahi jeŋ muu fɛɛ paradeiso ni yɔɔ nyam mli lɛ yɛ ejwɛŋmɔ mli.

Wiemɔ ni ji “Nibii ni Wɔkpáa Gbɛ Beni Nyɔŋmɔ Wiemɔ lɛ Tsɔɔ Wɔ Gbɛ Lɛ” ji nɔ ni kɛ kpee lɛ ba naagbee yɛ miishɛɛ mli kɛ gbɛ ni kanyaa mɔ mli. Ekai mɛi fɛɛ akɛ, “be lɛ faaa dɔŋŋ” kɛha Maŋtsɛyeli sanejajemɔ nitsumɔ lɛ naagbee. (1 Korintobii 7:29) Hɛɛ, wɔdamɔ akpɔ ni Yehowa ewo eshi Satan kɛ egbɛjianɔtoo fɔŋ lɛ fɛɛ lɛ mlibaa lɛ husui anaa kpaakpa. Eba akɛ wɔhenumɔi aaatamɔ lalatsɛ lɛ nɔ̃ lɛ, mɔ ni la akɛ: “Wɔsusuma miikwɛ Yehowa gbɛ; lɛ ji wɔbualɔ kɛ wɔtsɛŋ.” (Lala 33:20) Kwɛ gbɛkpamɔ ni yɔɔ nyam ni yɔɔ mɛi ni amɛgbɛkpamɔi damɔ Nyɔŋmɔ gbalɛ wiemɔ lɛ nɔ lɛ ahiɛ!

[Mfoniri ni yɔɔ baafa 7]

Drama ni kanyaa mɔ lɛ ha hiɛsɔɔ ni Yehowa tsuji yɔɔ yɛ mumɔŋ gboshinii lɛ ahe lɛ mli bawa waa diɛŋtsɛ

[Mfoniri ni yɔɔ baafa 7]

Abaptisi mɛi babaoo ni bo Nyɔŋmɔ gbalɛ wiemɔ lɛ toi lɛ