“Nyɛsaraa”
“Nyɛsaraa”
“No hewɔ lɛ nyɛsaraa, ejaakɛ nyɛleee nɔ ŋmɛlɛtswaa nɔ ni nyɛ-nuntsɔ lɛ baa.”—MATEO 24:42.
1. Te Yehowa tsuji ni kɛ be kakadaŋŋ esɔmɔ lɛ nuɔ afii pii ni amɛkɛsɔmɔ yɛ henɔjɔɔmɔ mli lɛ he amɛhaa tɛŋŋ? Tsĩi nɔkwɛmɔnɔ ko tã.
YEHOWA tsuji anɔkwafoi pii ní kɛ be kakadaŋŋ esɔmɔ lɛ kase anɔkwale lɛ yɛ be mli ni amɛji oblahii kɛ oblayei. Taakɛ nuu ni yana adiagba kome ni jara wa waa ni ehɔ̃ɔ enibii ni eyɔɔ lɛ fɛɛ bɔni afee ni ehe enɛ lɛ ji lɛ, nakai nɔŋŋ Biblia kaselɔi ni he tswaa shi lɛ kwá amɛhe, ni amɛjɔɔ amɛwala nɔ amɛha Yehowa. (Mateo 13:45, 46; Marko 8:34) Te amɛnuɔ bɔ ni esa akɛ amɛmɛ be kakadaŋŋ lolo fe bɔ ni amɛkpa gbɛ akɛ amɛaana ni Nyɔŋmɔ yiŋtoi eba mli yɛ shikpɔŋ lɛ nɔ lɛ he amɛhaa tɛŋŋ? Amɛshwaaa amɛhe! Amɛkɛ Nyɛminuu A. H. Macmillan kpãa gbee, mɔ ni yɛ nɔ ni miihe ashɛ afii 60 sɔɔmɔ kɛ henɔjɔɔmɔ kɛha Nyɔŋmɔ lɛ sɛɛ lɛ, ekɛɛ akɛ: “Mitswa mifai shi fe bei fɛɛ akɛ maya nɔ mahiɛ mihemɔkɛyeli mli. Eha shihilɛ efee nɔ ni sɛɛnamɔ yɔɔ he kɛha mi. Eeye eebua mi lolo koni makpee wɔsɛɛ be ni gbeyeishemɔ bɛ mli lɛ naa.”
2. (a) Mɛɛ ŋaawoo ni ba yɛ ebe naa pɛpɛɛpɛ Yesu kɛha esɛɛnyiɛlɔi lɛ? (b) Mɛɛ sanebimɔi wɔbaasusu he yɛ nikasemɔ nɛɛ mli?
2 Shi bo hu? Bɔ fɛɛ bɔ ni afii abɔ ni oye lɛ ji lɛ, susumɔ Yesu wiemɔi nɛɛ ahe: “No hewɔ lɛ nyɛsaraa, ejaakɛ nyɛleee nɔ ŋmɛlɛtswaa nɔ ni nyɛ-nuntsɔ lɛ baa.” (Mateo 24:42) Anɔkwale ko ni mli kwɔ waa yɛ nakai wiemɔ kuku lɛ mli. Wɔleee nɔ gbi nɔ ni Nuntsɔ lɛ baaba koni ekɛ fɔbuu kojomɔ aba yiwalɛ gbɛjianɔtoo nɛɛ nɔ, ni ehe ehiaaa ni wɔle. Shi ehe miihia ni wɔhi shi yɛ gbɛ ni kɛji akɛ ená eba lɛ, wɔshwaŋ wɔhe lɛ nɔ. Yɛ enɛ gbɛfaŋ lɛ, mɛɛ nɔkwɛmɔnii wɔnaa yɛ Biblia lɛ mli ni baaye abua wɔ ni wɔsara? Mɛɛ gbɛ nɔ Yesu tsɔ efee enɛ he nɔkwɛmɔnɔ yɛ? Ni mɛɛ odaseyeli wɔyɔɔ ŋmɛnɛ ni tsɔɔ akɛ jeŋ ni leee Nyɔŋmɔ nɛɛ naagbee gbii lɛ amli wɔyɔɔ lɛ?
Kɔkɔbɔɔ He Nɔkwɛmɔnɔ
3. Mɛi pii tamɔ Noa gbii lɛ amli gbɔmɛi lɛ yɛ mɛɛ gbɛ nɔ?
3 Gbɔmɛi ni yɔɔ shihilɛ mli ŋmɛnɛ lɛ tamɔ hii kɛ yei ni hi shi yɛ Noa gbii lɛ amli lɛ yɛ gbɛ̀i pii anɔ. Yiwalɛ yi shikpɔŋ lɛ nɔ obɔ yɛ nakai be lɛ mli, ni gbɔmɔ tsuiŋ susumɔi “ajwɛŋmɔ fɛɛ lɛ efɔŋ kɛkɛ ji daa nɛɛ.” (1 Mose 6:5) Nɔ ni amɛjwɛŋɔ he pɛ ji daa gbi shihilɛ mli nibii. Shi, dani Yehowa kɛ Nu Afua kpeteŋkpele lɛ aaaba lɛ, ekɛ hegbɛ ha gbɔmɛi ni amɛtsake amɛtsui. Ekɛ nitsumɔ wo Noa dɛŋ akɛ eshiɛ, ni Noa bo toi—esɔmɔ akɛ “jalɛ shiɛlɔ,” ekolɛ afii 40 loo 50 loo nɔ ni fe nakai. (2 Petro 2:5) Shi kɛlɛ, gbɔmɛi lɛ ku amɛhiɛ amɛshwie Noa kɔkɔbɔɔ shɛɛ sane lɛ nɔ. Amɛsaraaa. No hewɔ lɛ, yɛ naagbee lɛ, Noa kɛ eweku lɛ pɛ je Yehowa fɔbuu kojomɔ lɛ mli shweshweeshwe.—Mateo 24:37-39.
4. Abaanyɛ atsɛ Noa sɔɔmɔ nitsumɔ lɛ akɛ omanyeyeli yɛ mɛɛ shishinumɔ naa, ni te aaafee tɛŋŋ awie nakai nɔŋŋ yɛ oshiɛmɔ nitsumɔ lɛ he?
4 Ani Noa sɔɔmɔ nitsumɔ lɛ ye omanye? Kaadamɔ gbɔmɛi fioo ni bo toi lɛ nɔ okojo. Yɛ anɔkwale mli lɛ, Noa shiɛmɔ lɛ tsu eyiŋtoo lɛ he nii yɛ bɔ ni amɛhere nɔ amɛha lɛ fɛɛ sɛɛ. Mɛni hewɔ? Ejaakɛ ekɛ hegbɛ ni fa ha gbɔmɛi lɛ koni amɛhala akɛ amɛaasɔmɔ Yehowa loo amɛfeŋ nakai. Te shikpɔŋkuku ni oshiɛɔ yɛ mli ŋmɛnɛ lɛ yɔɔ ha tɛŋŋ? Kɛji akɛ mɛi fioo ko po boɔ toi lɛ, ooye omanye babaoo. Mɛni hewɔ? Ejaakɛ okɛ Nyɔŋmɔ kɔkɔbɔɔ lɛ miiha kɛtsɔ shiɛmɔ ni oshiɛɔ lɛ nɔ, ni etsɔɔ akɛ ootsu nitsumɔ ni Yesu kɛwo esɛɛnyiɛlɔi lɛ adɛŋ lɛ he nii.—Mateo 24:14; 28:19, 20.
Nyɔŋmɔ Gbalɔi ni Abooo Amɛ Toi
5. (a) Mɛɛ shihilɛi egbɛ eshwã Yuda yɛ Habakuk gbii lɛ amli, ni te gbɔmɛi lɛ here egbalɛ shɛɛ sane lɛ nɔ amɛha tɛŋŋ? (b) Gbɔmɛi ni yɔɔ Yuda lɛ kɛ basabasafeemɔ ko kpee Yehowa gbalɔi lɛ yɛ mɛɛ gbɛ nɔ?
5 Nu Afua lɛ sɛɛ afii ohai abɔ lɛ, shihilɛ ni yɔɔ Yuda maŋtsɛyeli lɛ mli lɛ bafee nɔ ni hiɛdɔɔ yɔɔ mli waa. Wɔŋjamɔ, jalɛ sane ni ayeee, yiwaa, kɛ gbɔmɔgbee po egbɛ eshwã. Yehowa tée gbalɔ Habakuk shi koni ebɔ gbɔmɛi lɛ kɔkɔ akɛ, kɛji akɛ amɛtsakeee amɛtsui lɛ, amɛbaana amanehulu yɛ Kaldeabii loo Babiloniabii lɛ adɛŋ. (Habakuk 1:5-7) Shi gbɔmɛi lɛ booo toi. Ekolɛ amɛsusu akɛ, ‘Kwɛmɔ, nɔ ni fe afii oha nɛ ni gbalɔ Yesaia bɔ kɔkɔ ko ni tamɔ nakai nɔŋŋ, ni kɛlɛ nɔ ko bako lolo!’ (Yesaia 39:6, 7) Jeee shikpilikpii pɛ Yuda abladei lɛ ateŋ mɛi pii efee yɛ kɔkɔbɔi ni ajajeɔ lɛ ahe, shi amɛnyɛ̃ɔ bɔfoi ni atsuɔ amɛ lɛ hu. Be ko lɛ, amɛka akɛ amɛaagbe gbalɔ Yeremia, ni eji jeee Ahikam ni kɛ ehe wo mli kulɛ amɛye omanye. Akɛni gbalɛ shɛɛ sane kroko wo Maŋtsɛ Yehoiakim mli la hewɔ lɛ, eha agbe gbalɔ Uria.—Yeremia 26:21-24.
6. Yehowa waje Habakuk yɛ mɛɛ gbɛ nɔ?
6 Habakuk shɛɛ sane lɛ hu mli wa, ni asumɔɔɔ ni aboɔ toi hu tamɔ bɔ ni abooo Yeremia ni akɛ mumɔ tsirɛ lɛ koni egba Yuda amaŋfɔfeemɔ afii 70 lɛ efɔ̃ shi lɛ shɛɛ sane lɛ ji lɛ. (Yeremia 25:8-11) No hewɔ lɛ, wɔbaanyɛ wɔnu bɔ ni Habakuk ehao eha lɛ shishi beni ebolɔ akɛ: “Mɛɛ beyinɔ nɔŋŋ mabolɔ kɛyashi, ni oboŋ toi? Ni mabo matsɛo yɛ yiwalɛ hewɔ, ni ohereŋ miyiwala?” (Habakuk 1:2) Yehowa kɛ mlihilɛ hã Habakuk hetoo kɛ wiemɔi ni woɔ mɔ hemɔkɛyeli hewalɛ nɛɛ akɛ: “Ninaa lɛ yɛ ha be ni ato lɛ kɛ̃, ni eeye oyai ni eshɛ naagbee, ni emaleŋ; kɛ eshashao shi hu jiŋŋ, mɛɛ lɛ kɛ̃; ejaakɛ ebaaba lɛɛlɛŋ, ekpeŋ sɛɛ.” (Habakuk 2:3) No hewɔ lɛ, Yehowa ‘eto be’ ni ekɛ jalɛ sane ni ayeee kɛ nɔnyɛɛ baaba naagbee. Kɛji akɛ etamɔ nɔ ni eeshashao shi lɛ, Habakuk nijiaŋ akaje wui, ni asaŋ ekaba enitsumɔ lɛ shi. Yɛ no najiaŋ lɛ, esa akɛ ‘eya nɔ emɛ lɛ,’ ní ekɛ hehiamɔ henumɔ ahi shi daa gbi. Yehowa gbi lɛ ekpeŋ sɛɛ!
7. Mɛni hewɔ ato ni hiɛkpatamɔ kroko aba Yerusalem nɔ yɛ Ŋ.B. klɛŋklɛŋ afii oha lɛ mli lɛ?
7 Beni Yehowa ewie etsɔɔ Habakuk lɛ sɛɛ aaafee afii 20 lɛ, akpata Yuda maŋtiase ni ji Yerusalem hiɛ. Aku sɛɛ atswa Yerusalem ama shi ekoŋŋ yɛ sɛɛ mli, ni ajaje nibii ni ejaaa ni hao Habakuk lɛ mli babaoo. Shi kɛlɛ, ato akɛ abaakpata maŋtiase lɛ hiɛ ekoŋŋ yɛ Ŋ.B. klɛŋklɛŋ afii oha lɛ mli, yɛ emli bii lɛ ni yeee anɔkwa lɛ hewɔ. Yehowa kɛ mɔbɔnalɛ to gbɛjianɔ koni mɛi ni yɔɔ tsuijurɔ lɛ aje mli shweshweeshwe. Yɛ nɛkɛ be nɛɛ mli lɛ, ekɛ gbalɔ ni fe fɛɛ ni ji Yesu Kristo tsu nii koni ekɛ shɛɛ sane lɛ aha. Yesu kɛɛ esɛɛnyiɛlɔi lɛ yɛ afi 33 Ŋ.B. akɛ: “Kɛ nyɛna akɛ abɔ nsara awo Yerusalem he lɛ, belɛ nyɛnáa nyɛlea akɛ efitemɔ lɛ eshɛ. No mli lɛ mɛi ni yɔɔ Yudea lɛ ajo foi aya gɔji lɛ anɔ.”—Luka 21:20, 21.
8. (a) Mɛni ekolɛ eba Kristofoi komɛi anɔ beni be eshwie mli yɛ Yesu gbele sɛɛ lɛ? (b) Yesu gbalɛ wiemɔi ni kɔɔ Yerusalem he lɛ ba mli yɛ mɛɛ gbɛ nɔ?
8 Beni afii lɛ hoɔ kɛyaa lɛ, ekolɛ Kristofoi ni yɔɔ Yerusalem lɛ ateŋ mɛi komɛi baasusu be mli ni Yesu gbalɛ lɛ baaba mli lɛ he. Fɛɛ sɛɛ lɛ, susumɔ afɔlei ni ŋwanejee ko bɛ he akɛ ehe bahia ni nakai Kristofoi lɛ ateŋ mɛi komɛi ashã lɛ he okwɛ. Ekolɛ ehe bahia ni amɛŋmɛɛ nitsumɔ mli hegbɛi ni hi jogbaŋŋ lɛ ahe yɛ bɔ ni amɛtswa amɛfai shi akɛ amɛbaaya nɔ amɛsara lɛ hewɔ. Beni be shwieɔ mli lɛ, ani amɛteŋ mɛi komɛi fee mɛi ni etɔ amɛ? Ani amɛmu sane naa akɛ amɛmiifite amɛbe, ni amɛsusu akɛ Yesu gbalɛ lɛ kɔɔ wɔsɛɛ be mli yinɔ ko he, shi jeee amɛnɔ̃ lɛ? Yesu gbalɛ lɛ mlibaa je shishi yɛ afi 66 Ŋ.B., beni Roma asraafoi lɛ bɔle Yerusalem he kɛkpe lɛ. Mɛi ni tee nɔ amɛsara lɛ yɔse okadi lɛ, amɛjo foi kɛjɛ maŋtiase lɛ mli, ni abaa amɛyi kɛjɛ Yerusalem amaŋfɔfeemɔ lɛ mli.
Bɔ ni Ehe Hiaa akɛ Asara lɛ He Nɔkwɛmɔnɔ
9, 10. (a) Te obaamua Yesu nɔkwɛmɔnɔ ni kɔɔ tsuji ni mɛ amɛnuntsɔ lɛ sɛɛkuu kɛmiijɛ egbalashihilɛ mlibotemɔ lɛ mli lɛ he lɛ naa oha tɛŋŋ? (b) Mɛni hewɔ ekolɛ amɛnuntsɔ lɛ ni amɛmɛɔ lɛ lɛ fee nɔ ko ni wa kɛha tsuji lɛ? (d) Mɛni hewɔ sɛɛnamɔ yɔɔ tsuishitoo ni tsuji lɛ aaana lɛ he lɛ?
9 Beni emaa bɔ ni ehe hiaa akɛ asara lɛ nɔ mi lɛ, Yesu kɛ ekaselɔi lɛ to tsuji ni miimɛ amɛ-nuntsɔ lɛ sɛɛkuu kɛmiijɛ egbalashihilɛ mlibotemɔ mli lɛ ahe. Amɛle akɛ ebaaku esɛɛ eba gbɛkɛ ko—shi yɛ mɛɛ ŋmɛlɛtswaa pɔtɛɛ nɔ? Yɛ klɛŋklɛŋ buu be lɛ mli? Nɔ ni ji enyɔ lɛ mli? Nɔ ni ji etɛ lɛ mli? Amɛleee. Yesu kɛɛ: “Ni kɛji [nuntsɔ lɛ] ba yɛ buu be ni ji enyɔ aloo nɔ ni ji etɛ lɛ mli ni ebanina amɛ nakai [ni amɛmiisara] lɛ, ajɔɔ nakai tsuji lɛ!” (Luka 12:35-38) Susumɔ tsuji nɛɛ agbɛkpamɔ lɛ he okwɛ. Gbɛɛmɔ fɛɛ gbɛɛmɔ, susuma fɛɛ susuma ni baaho lɛ baaha amɛ hiɛnɔkamɔ lɛ aya hiɛ: ‘Ani enɛ baanyɛ afee wɔ-nuntsɔ lɛ?’
10 Shi kɛji akɛ nuntsɔ lɛ ba yɛ gbɛkɛ buu be ni ji enyɔ, ní jeɔ shishi kɛjɛɔ gbɛkɛ ŋmɛji nɛɛhu aahu kɛyashiɔ nyɔɔŋteŋ ŋmɛlɛ nyɔŋma kɛ enyɔ lɛ mli hu? Ani etsuji lɛ fɛɛ, ni mɛi po ni etsu nii waa kɛjɛ leebi maŋkpa lɛ fata he lɛ baafee klalo kɛha ekpeemɔ, aloo mɛi komɛi baafee mɛi ni ewɔ? Shi kɛji akɛ nuntsɔ lɛ ba yɛ gbɛkɛ buu be ni ji etɛ—ni jeɔ shishi kɛjɛɔ nyɔɔŋteŋ aahu kɛyashiɔ aaafee maŋkɛ ŋmɛji etɛ lɛ mli hu? Ani etsuji lɛ ateŋ mɛi komɛi anijiaŋ baaje wui, ni amɛmii shɛŋ amɛhe po yɛ nɔ ni tamɔ eshishashaomɔ lɛ hewɔ? * Tsuji pɛ ni ana akɛ amɛmiisara beni nuntsɔ lɛ bashɛ shi lɛ ji mɛi ni abaatsɛ́ amɛ akɛ mɛi ni ajɔɔ. Amɛji mɛi ni wiemɔi ni yɔɔ Abɛi 13:12 lɛ baakɔ amɛhe diɛŋtsɛ, akɛ: “Hiɛnɔkamɔ ni baaa mli mra lɛ, ewoɔ mɔ tsui hela; shi kɛ nɔ ni ashweɔ lɛ ba lɛ, walatso ni.”
11. Yɛ mɛɛ gbɛ nɔ sɔlemɔ baanyɛ aye abua wɔ ni wɔsara?
11 Mɛni baaye abua Yesu kaselɔi lɛ koni amɛya nɔ amɛsara yɛ be ni tamɔ nɔ ni eshashaoɔ shi lɛ mli? Yesu kɛɛ ebɔfoi etɛ lɛ yɛ be mli ni eyɔɔ Getsemane abɔɔ lɛ mli ni no sɛɛ etsɛɛɛ ni amɔ lɛ lɛ akɛ: “Nyɛshia kpe ni nyɛsɔlea, koni nyɛkabote kaa mli.” (Mateo 26:41) Afii komɛi asɛɛ lɛ, Petro ni yɔɔ jɛmɛ yɛ nakai be lɛ mli lɛ kɛ ŋaawoo ni tamɔ nakai nɔŋŋ ha nanemɛi Kristofoi lɛ. Eŋma akɛ: “Nibii fɛɛ anaagbee lɛ eshɛ etã. Hewɔ lɛ nyɛjwɛŋmɔ mli atsea ni nyɛhiɛ akãa shi ahãa sɔlemɔi.” (1 Petro 4:7) Eyɛ faŋŋ akɛ, esa akɛ wɔha sɔlemɔ ni hiɛdɔɔ yɔɔ mli afee wɔ daa Kristofoi anifeemɔ lɛ fã. Yɛ anɔkwale mli lɛ, ehe miihia ni wɔya nɔ wɔkpa Yehowa fai daa koni eye ebua wɔ ni wɔsara.—Romabii 12:12; 1 Tesalonikabii 5:17.
12. Mɛni ji srɔtofeemɔ ni kã yiŋsusumɔ kɛ saramɔ teŋ?
12 Kadimɔ akɛ Petro kɛɛ hu akɛ: “Nibii fɛɛ anaagbee eshɛ etã.” Te eshɛ etã eha tɛŋŋ? Gbɛ ko bɛ ni adesai aaatsɔ nɔ atsɔɔ gbi kɛ ŋmɛlɛtswaa pɔtɛɛ lɛ. (Mateo 24:36) Shi kɛlɛ, srɔtofeemɔ yɛ hiɛ ni akaa awieɔ ni akɛ he woɔ mli vii ni Biblia lɛ wooo hewalɛ yɛ he lɛ, kɛ je lɛ naagbee lɛ gbɛ ni akpaa, ni Biblia lɛ woɔ he hewalɛ lɛ teŋ. (Okɛ 2 Timoteo 4:3, 4; ato Tito 3:9 he.) Mɛni ji gbɛ kome ni wɔbaanyɛ wɔtsɔ nɔ wɔkpa naagbee lɛ gbɛ? No ji kɛtsɔ odaseyeli ni tsɔɔ akɛ naagbee lɛ ebɛŋkɛ lɛ ni wɔɔha ehi wɔjwɛŋmɔ mli jogbaŋŋ lɛ nɔ. Belɛ nyɛhaa wɔtĩa odaseyelii srɔtoi ekpaa ni haa wɔyiŋ tsɔɔ akɛ jeŋ ni leee Nyɔŋmɔ nɛɛ naagbee gbii lɛ amli wɔyɔɔ lɛ amli.
Odaseyelii Ekpaa ni Tsɔɔ Mɔ Yiŋ
13. Yɛ mɛɛ gbɛ nɔ Paulo gbalɛ ni aŋma afɔ̃ shi yɛ 2 Timoteo yitso 3 lɛ tsɔɔ oyiŋ akɛ “naagbee gbii” lɛ amli wɔyɔɔ lɛ?
13 Klɛŋklɛŋ lɛ, wɔnaa bɔfo Paulo gbalɛ ni kɔɔ “naagbee gbii” lɛ ahe lɛ mlibaa. Paulo ŋma akɛ: “Naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, shikasuɔlɔi, shwalɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ lɛ; tsi ohe kɛjɛ nɛkɛ gbɔmɛi ahe. Shi gbɔmɛi fɔji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.” (2 Timoteo 3:1-5, 13) Ani wɔnaaa akɛ nɛkɛ gbalɛ nɛɛ miiba mli yɛ wɔgbii nɛɛ amli? Mɛi ni kuɔ amɛhiɛ amɛshwieɔ anɔkwa saji lɛ anɔ lɛ pɛ baakpoo enɛ! *
14. Wiemɔi ni yɔɔ Kpojiemɔ 12:9 ni kɔɔ Abonsam he lɛ miiba mli ŋmɛnɛ yɛ mɛɛ gbɛ nɔ, ni mɛni etsɛŋ kwraa ni ebaaba enɔ?
14 Nɔ ni ji enyɔ lɛ, wɔnaa nɔ ni ejɛ Satan kɛ edaimonioi lɛ ni ashwie amɛ kɛjɛ ŋwɛi lɛ mli eba, ni haa Kpojiemɔ 12:9 baa mli lɛ. Wɔkaneɔ yɛ jɛmɛ akɛ: “Ni ashɛ drako kpeteŋkpele lɛ afɔ̃, mɔ ni ji blema onufu lɛ ni atsɛɔ lɛ diabolo (naafolɔlɔ loo abonsam) lɛ kɛ satan (henyɛlɔ) lɛ ni shishiuɔ jeŋ muu lɛ fɛɛ lɛ, ashɛ lɛ afɔ̃ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.” Nɔ ni ejɛ enɛ mli eba ji kpoo kpeteŋkpele kɛha shikpɔŋ lɛ. Yɛ anɔkwale mli lɛ amanehulu babaoo eba adesai anɔ, titri lɛ kɛjɛ afi 1914 kɛbaa nɛɛ. Shi gbalɛ ni yɔɔ Kpojiemɔ lɛ kɛfataa he akɛ, beni ashɛ Abonsam afɔ̃ shikpɔŋ lɛ nɔ lɛ, ele akɛ “be fioo kɛkɛ eyɔɔ.” (Kpojiemɔ 12:12) Satan wuɔ ta eshiɔ Kristo sɛɛnyiɛlɔi ni afɔ amɛ mu lɛ yɛ nɛkɛ be nɛɛ mli. (Kpojiemɔ 12:17) Wɔna nɔ ni ejɛ etutuamɔ lɛ mli eba yɛ wɔbe nɛɛ mli lɛ. * Shi etsɛŋ ni abaatsĩ Satan naa awo bu kwɔŋkwɔŋ lɛ mli “koni ekashishiu jeŋmaji lɛ dɔŋŋ.”—Kpojiemɔ 20:1-3.
15. Yɛ mɛɛ gbɛ nɔ Kpojiemɔ 17:9-11 kɛ odaseyeli ni tsɔɔ akɛ naagbee be lɛ mli wɔyɔɔ lɛ haa wɔ?
15 Nɔ ni ji etɛ lɛ, naagbee “maŋtsɛ” ni gbeɔ yi feɔ kpaanyɔ lɛ ni atsĩ etã yɛ gbalɛ ni aŋma afɔ̃ shi yɛ Kpojiemɔ 17:9-11 lɛ be lɛ mli wɔyɔɔ lɛ. Bɔfo Yohane tsĩ maŋtsɛmɛi kpawo, ni damɔ shi kɛha jeŋ hewalɛi kpawo—Mizraim, Ashur, Babilon, Medo-Persia, Hela, Roma, kɛ Anglo-Amerika jeŋ hewalɛ ni bɔ he enyɔ lɛ atã. Ena ‘maŋtsɛ ni ji kpaanyɔ, ni jɛ kpawo lɛ mli’ lɛ. Nɛkɛ maŋtsɛ ni ji kpaanyɔ nɛɛ—naagbee maŋtsɛ ni Yohane na yɛ ninaa mli lɛ—damɔ shi kɛha Jeŋmaji Ekomefeemɔ lɛ. Yohane kɛɔ akɛ maŋtsɛ ni ji kpaanyɔ nɛɛ “yaa hiɛkpatamɔ mli.” ni yɛ no sɛɛ lɛ atsĩii shikpɔŋ nɔ maŋtsɛmɛi ata dɔŋŋ. *
16. Yɛ mɛɛ gbɛ nɔ anɔkwalei ni yɔɔ Nebukadnezar lamɔ amaga lɛ mli lɛ mlibaa tsɔɔ akɛ naagbee gbii lɛ amli wɔyɔɔ lɛ?
16 Nɔ ni ji ejwɛ lɛ, be ni akɛ Nebukadnezar lamɔ mli amaga lɛ naji lɛ fee he mfoniri lɛ mli wɔyɔɔ lɛ. Gbalɔ Daniel tsɔɔ nɛkɛ naakpɛɛ lamɔ ni kɔɔ adesa he amaga ko ni da naakpa lɛ he lɛ shishi. (Daniel 2:36-43) Sũ mli nibii ejwɛ ni feɔ amaga lɛ fai lɛ damɔ shi kɛha jeŋ hewalɛi srɔtoi, ni ejeɔ shishi kɛjɛɔ yitso lɛ (Babilonia Maŋtsɛyeli lɛ) nɔ ni eyaa nɔ kɛyashɛɔ naji kɛ waobii (ni ji nɔyelii ni yeɔ nɔ ŋmɛnɛ) lɛ anɔ. Jeŋ hewalɛi fɛɛ ni amaga lɛ feɔ amɛhe mfoniri lɛ ejie amɛhe kpo. Be ni amaga lɛ naji lɛ fee he mfoniri lɛ mli wɔyɔɔ bianɛ lɛ. Atsĩii hewalɛi krokomɛi ni baaba tã. *
17. Yɛ mɛɛ gbɛ nɔ wɔ Maŋtsɛyeli shiɛmɔ nitsumɔ lɛ kɛ odaseyeli kroko haa akɛ naagbee be lɛ mli wɔyɔɔ lɛ?
17 Nɔ ni ji enumɔ lɛ, wɔnaa ni aatsu jeŋ muu fɛɛ shiɛmɔ nitsumɔ ko ni Yesu kɛɛ ebaaya nɔ dani gbɛjianɔtoo nɛɛ aba naagbee lɛ he nii. Yesu kɛɛ akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Ŋmɛnɛ, nakai gbalɛ lɛ miiba mli yɛ gbɛ ni afeko eko ni dã tamɔ nɛkɛ nɔ. Eji anɔkwale akɛ shikpɔŋkukuji komɛi yɛ ni atsuko amɛmli nii lolo, ni ekolɛ yɛ Yehowa be ni sa mli lɛ, abaagbele shinaa ko ni da ni kɛ mɔ yaa nitsumɔ babaoo mli lɛ naa. (1 Korintobii 16:9) Shi kɛlɛ, Biblia lɛ etsɔɔɔ akɛ Yehowa baamɛ kɛyashi be mli ni aaaye mɔ fɛɛ mɔ ni yɔɔ shikpɔŋ lɛ nɔ lɛ odase dã. Yɛ no najiaŋ lɛ, esa akɛ ashiɛ sanekpakpa lɛ kɛyashi Yehowa tsui aaanyɔ emli. Kɛkɛ lɛ naagbee lɛ baaba.—Okɛto Mateo 10:23 he.
18. Eyɛ faŋŋ akɛ, mɛni baafee anɔkwale yɛ mɛi ni afɔ amɛ mu lɛ ateŋ mɛi komɛi ahe beni amanehulu kpeteŋkpele lɛ jeɔ shishi lɛ, ni mɛɛ gbɛ nɔ aaatsɔ ale enɛ?
18 Nɔ ni ji ekpaa lɛ, Kristo kaselɔi ni afɔ amɛ mu diɛŋtsɛ lɛ ayifalɛ nɔ miigbɔ, eyɛ mli akɛ eka shi faŋŋ akɛ amɛteŋ mɛi komɛi baahi shikpɔŋ nɔ lolo beni amanehulu kpeteŋkpele lɛ jeɔ shishi lɛ. Shwɛɛnii lɛ ateŋ mɛi ni fa egbɔlɔ, ni mɛi ni afɔ amɛ mu lɛɛlɛŋ lɛ ayifalɛ miita beni afii lɛ hoɔ lɛ. Kɛlɛ, beni Yesu wieɔ amanehulu kpeteŋkpele lɛ he lɛ, ekɛɛ akɛ: “Kɛ afooo no gbii lɛ anɔ kpitioo lɛ, kulɛ ahereŋ heloo ko heloo ko yiwala; shi mɛi ni ahala lɛ ahewɔ lɛ aaafo no gbii lɛ anɔ kpitioo.” (Mateo 24:21, 22) No hewɔ lɛ, eka shi faŋŋ akɛ, mɛi ni Kristo ‘ehala’ lɛ ateŋ mɛi komɛi baahi shikpɔŋ lɛ nɔ lolo beni amanehulu kpeteŋkpele lɛ jeɔ shishi lɛ. *
Mɛni Kã Wɔhiɛ?
19, 20. Mɛni hewɔ ehe hiaa waa kɛha wɔ bianɛ fe bei fɛɛ agbɛnɛ akɛ wɔshi kpe ni wɔsara lɛ?
19 Mɛni wɔsɛɛ be yɔɔ kɛha wɔ? Bei ni kanyaa mɔ yɛ ni baaba. Paulo bɔ kɔkɔ akɛ: “[Yehowa, NW] gbi lɛ baaba tamɔ julɔ baa nyɔɔŋ lɛ.” Beni ewieɔ gbɔmɛi ni feɔ amɛhe tamɔ nilelɔi yɛ je lɛŋ lɛ ahe lɛ, ekɛɛ akɛ: “Ejaakɛ be mli ni amɛaakɛɛ akɛ: Hejɔlɛ yɛ ni wɔyɛ shweshweeshwe! lɛ, no mli nɔŋŋ hiɛkpatamɔ aaabatua amɛ trukaa.” No hewɔ lɛ Paulo woɔ mɛi ni kaneɔ ewolo lɛ hewalɛ akɛ: “Nyɛkahaa wɔmiiwɔa tamɔ mɛi ni eshwɛ lɛ, shi moŋ nyɛhaa wɔshia kpe ni wɔhiɛ akãa shi.” (1 Tesalonikabii 5:2, 3, 6) Yɛ anɔkwale mli lɛ, mɛi ni kɛ amɛhiɛ fɔ̃ɔ adesai agbɛjianɔtoi anɔ koni amɛkɛ toiŋjɔlɛ kɛ shweshweeshwe shihilɛ aba lɛ miiku amɛhiɛ amɛmiishwie bɔ ni shihilɛ lɛ ji diɛŋtsɛ lɛ nɔ. Aŋkroaŋkroi ni tamɔ nɛkɛ ewɔ vii diɛŋtsɛ!
20 Nibii agbɛjianɔtoo nɛɛ hiɛkpatamɔ baaba trukaa yɛ gbɛ ni hɛleɔ mɔ shi nɔ. No hewɔ lɛ, nyɛyaa nɔ nyɛkpaa Yehowa gbi lɛ gbɛ. Nyɔŋmɔ diɛŋtsɛ kɛɛ Habakuk akɛ: “Ekpeŋ sɛɛ”! Yɛ anɔkwale mli lɛ, saramɔ ni esa akɛ wɔya nɔ wɔsara lɛ efeko nɔ ni he hiaa waa tamɔ nɛkɛ dã.
[Shishigbɛ niŋmai]
^ kk. 10 Nuntsɔ lɛ kɛ etsuji lɛ etoko be he gbɛjianɔ ko. No hewɔ lɛ, esaaa akɛ ebuɔ ebaa loo eyaa he akɔntaa etsɔɔ amɛ, ni asaŋ gbɛnaa nii ko kãaa enɔ akɛ etsɔɔ nɔ ni tamɔ esɛɛkpee lɛ mli etsɔɔ etsuji lɛ.
^ kk. 13 Kɛha gbalɛ nɛɛ mlitsɔɔmɔ fitsofitso lɛ, kwɛmɔ Nilee Ni Kɛ Mɔ Yaa Naanɔ Wala Mli wolo lɛ ni Watchtower Bible and Tract Society of New York, Inc. fee lɛ yitso 11.
^ kk. 14 Kɛha emlitsɔɔmɔ babaoo lɛ, kwɛmɔ Kpojiemɔ—Enaagbee Kwraa lɛ Ebɛŋkɛ! wolo lɛ ni Watchtower Bible and Tract Society of New York, Inc. fee lɛ baafa 180 kɛyashi 186.
^ kk. 15 Kwɛmɔ Kpojiemɔ—Enaagbee Kwraa lɛ Ebɛŋkɛ! wolo lɛ baafa 251 kɛyashi 254.
^ kk. 16 Kwɛmɔ, Bó Daniel Gbalɛ lɛ Toi! wolo lɛ ni Watchtower Bible and Tract Society of New York, Inc. fee lɛ yitso 4.
^ kk. 18 Yɛ gwantɛŋi lɛ kɛ abotiai lɛ ahe abɛbua lɛ mli lɛ, gbɔmɔ Bi lɛ baaba enunyam mli yɛ amanehulu kpeteŋkpele lɛ be lɛ mli, ni etaa shi kɛhaa kojomɔ. Edamɔɔ yelikɛbuamɔ ni amɛkɛha Kristo nyɛmimɛi ni afɔ amɛ mu lɛ loo nakai ni amɛfeee lɛ nɔ ekojoɔ gbɔmɛi. Nɔdaamɔ nɔ kɛha kojomɔ nɛɛ baafee nɔ ni shishinumɔ bɛ mli, kɛji akɛ beni kojomɔ lɛ yaa nɔ lɛ, no mli lɛ Kristo nyɛmimɛi ni afɔ amɛ mu lɛ fɛɛ eshĩ shikpɔŋ lɛ nɔ.—Mateo 25:31-46.
Ani Okaiɔ?
• Mɛɛ Ŋmalɛ mli nɔkwɛmɔnii baanyɛ aye abua wɔ ni wɔya nɔ wɔsara?
• Te Yesu fee bɔ ni ehe hiaa ni asara lɛ he nɔkwɛmɔnɔ eha tɛŋŋ?
• Mɛɛ odaseyelii srɔtoi ekpaa tsɔɔ akɛ naagbee gbii lɛ amli wɔyɔɔ lɛ?
[Nikasemɔ lɛ he Sanebimɔi]
[Mfonirii ni yɔɔ baafa 9]
A. H. Macmillan sɔmɔ Yehowa yɛ anɔkwayeli mli aaafee afii nyɔŋmai ekpaa
[Mfoniri ni yɔɔ baafa 10]
Yesu kɛ ekaselɔi lɛ to tsuji ni yaa nɔ amɛsaraa lɛ ahe