Obaanyɛ Ole Nɔ ni Baaba Wɔsɛɛ!

Mɛi babaoo susuɔ wɔsɛɛ be he waa diɛŋtsɛ. Amɛsumɔɔ ni amɛto gbɛjianɔ, ní amɛkɛ shika awo nitsumɔ mli yɛ nilee mli, ní amɛnu he akɛ amɛyɛ shweshweeshwe. Shi gbɛ ko yɛ ni baaha aná nɔmimaa yɛ nɔ ni baaba wɔ́ lɛ he?

ADESAI eka nibii srɔtoi fɛɛ amɛkwɛ bɔni afee ni amɛkɛbɔ mɔdɛŋ ni amɛkɛle nɔ ni baaba wɔsɛɛ. Jeŋ nilelɔi ni ekase shihilɛ he nii ni gbaa wɔsɛɛ be mli nibii lɛ pɛiɔ nibii ni yaa nɔ ŋmɛnɛ lɛ mli ni amɛdamɔɔ enɛɛmɛi anɔ amɛkɛgbaa nibii ni baaba wɔsɛɛ. Mɛi ni ekase shika helɛtemɔ nitsumɔi ahe nii hu feɔ nakai nɔŋŋ yɛ amɛ diɛŋtsɛ amɛ nitsumɔ nɛɛ hu mli. Ŋulamiiaŋkwɛlɔi kɛ klamɔi kɛ amɛhe fɔ̃ɔ nitɛŋmɔi ni tsɔɔ mɔ lɛ su kɛ baŋ kɛ ewɔsɛɛ, kuloi, kɛ ŋkunyaai anɔ, ni mɛi babaoo banyiɛɔ amɛsɛɛ. Ákɛ nɔkwɛmɔnɔ lɛ, France ŋulamiiaŋkwɛlɔ Nostradamus tee nɔ ehé gbɛi, tsɛbelɛ egbo afii ohai abɔ ni eho nɛ.

Nɛkɛ mɛi ni tsɛ́ɔ amɛhe gbalɔi nɛɛ fɛɛ efee mɛi ni anyɛɛɛ akɛ he afɔ̃ amɛnɔ kwraa kɛ mɛi ni jeɔ mɔ nijiaŋ wui fe fɛɛ. Mɛni hewɔ? Ejaakɛ amɛkpoɔ Yehowa Nyɔŋmɔ kɛ e-Wiemɔ ni ji Biblia lɛ. Yɛ enɛ hewɔ lɛ, amɛhaaa shishijee sanebimɔi ni tamɔ nɛkɛ lɛ ahetoo: ‘Te mafee tɛŋŋ maná nɔmimaa akɛ nibii ni agbaa afɔ̃ɔ shi yɛ Biblia lɛ mli lɛ baaba mli? Te enɛɛmɛi baa mli yɛ Nyɔŋmɔ yiŋtoo mli kɛha adesai amɛhaa tɛŋŋ? Yɛ mɛɛ gbɛ nɔ mi kɛ miweku lɛ baaná gbalɛi nɛɛ ahe sɛɛ?’ Biblia lɛ haa sanebimɔi nɛɛ ahetoo.

Biblia gbalɛ hu nɔ kwɔlɔ yɛ gbɛi krokomɛi babaoo nɔ. Ákɛ nɔ ni tamɔɔɔ saji ni ŋulamiiaŋkwɛlɔi gbaa amɛfɔ̃ɔ shi lɛ, ehaa mɔ lɛ náa lɛ diɛŋtsɛ eheyeli hegbɛ. Enɛ hewɔ lɛ, mɔ ko mɔ ko kwraa ebajeee shɛɛ mli sane kudɔmɔ shishi. (5 Mose 30:19) Niŋmaai tamɔ Nostradamus nɔ̃ lɛ fiteɔ mɔ jeŋba, ni niŋmaai nɛɛ kɛ teemɔŋ nifeemɔnii kɛ nibii ni akɛteeɔ henumɔi ashi tsuɔ nii koni mɛi kɛ jeŋba fitemɔ nifeemɔnii nɛɛ atsu nii. Shi Biblia gbalɛ yɛ jeŋba he shishitoo kpakpa. Etsɔɔ nɔ hewɔ ni Nyɔŋmɔ baafee taakɛ eto eyiŋ lɛ. (2 Kronika 36:15) Ni Yehowa gbalɛi lɛ efeee efolo kɔkɔɔkɔ, ejaakɛ “Nyɔŋmɔ . . . maleee.” (Tito 1:2) No hewɔ lɛ, aŋkroaŋkroi ni Nyɔŋmɔ Wiemɔ lɛ kudɔɔ amɛ lɛ náa nilee, yiŋtoo kɛ miishɛɛ yɛ shihilɛ mli yɛ be mli ni amɛfiteee amɛbe kɛ nibii ni he yɔɔ sɛɛnamɔ lɛ yɛ yaka nitsumɔi ahe.—Lala 25:12, 13.

Asusu enɛɛmɛi kɛ saji otii krokomɛi babaoo ahe yɛ Yehowa Odasefoi afi 1999/2000 “Nyɔŋmɔ Gbalɛ Wiemɔ” Kpokpaa Wulu nɔ Kpeei ni afee yɛ jeŋ fɛɛ lɛ shishi. Wiemɔi, saji ni abiɔ, nɔkwɛmɔnii, kɛ Biblia mli drama egbala toibolɔi ajwɛŋmɔ kɛtee mumɔŋ gboshinii ni yɔɔ naakpɛɛ ni mɛi ni kaseɔ Nyɔŋmɔ gbalɛ wiemɔ lɛ kɛtsuɔ nii lɛ anɔ. Sane ni nyiɛ sɛɛ lɛ baatĩ kpee lɛ shishi saji otii lɛ ekomɛi amli.