Wɔji Mɛi ni Yɔɔ Hemɔkɛyeli

Shɛɛ Sane ni Shɛjeɔ Mɔ Mii ni Akɛhaa yɛ Italy

YEHOWA ji “miishɛjemɔ fɛɛ Nyɔŋmɔ lɛ.” Kɛtsɔ kasemɔ ni etsuji kaseɔ lɛ lɛ nɔ lɛ, amɛnyɛɔ ‘amɛshɛjeɔ mɛi amii yɛ amanehului fɛɛ mli.’ (2 Korintobii 1:3, 4; Efesobii 5:1) Enɛ ji Yehowa Odasefoi ashiɛmɔ nitsumɔ ni amɛtsuɔ lɛ amli otii titrii lɛ ateŋ ekome.

Aye Abua Yoo ko ni Ehia Lɛ

Titri lɛ, yɛ nyɛsɛɛ afii nɛɛ amli lɛ, ohia, ta, kɛ bɔ ni ashweɔ ní aná shihilɛ kpakpa lɛ eha mɛi babaoo efã kɛtee maji ni etee ehiɛ babaoo yɛ amɛshihilɛ mli lɛ mli. Shi ebɛ mlɛo akɛ aaatsake he awo shihilɛ heei nɛɛ amli. Manjola kɛ nanemɛi Albaniabii hi Borgomanero. Akɛni eyɛ Italy bɔ ni mla eŋmɛɛɛ gbɛ hewɔ lɛ, eshashao shi akɛ ekɛ Wanda, ni ji Yehowa Odasefoi ateŋ mɔ kome lɛ aaagba sane. Shi kɛlɛ, naagbee mli lɛ, Wanda kɛ Manjola, ní jie miishɛɛ babaoo kpo akɛ eeekase Nyɔŋmɔ Wiemɔ lɛ to gbɛjianɔ, eyɛ mli akɛ wiemɔ ni enuuu shishi lɛ bafee gbɛtsii nii. Shi kɛlɛ, yɛ saramɔi fioo komɛi asɛɛ lɛ, Wanda enaaa mɔ ko yɛ shia lɛ dɔŋŋ. Mɛni eba? Wanda na ele akɛ mɛi ni yɔɔ shia lɛ mli lɛ fɛɛ ejo foi ejaakɛ aatao amɛteŋ mɔ kome—Manjola naanyo nuu lɛ—yɛ gbɔmɔgbee hewɔ!

Yɛ nyɔji ejwɛ sɛɛ lɛ, Wanda kɛ Manjola kpe ekoŋŋ. Wanda kaiɔ akɛ: “Ehiɛ eshale ni etã loo tamɔ mɔ ko ni etɔ lɛ waa yɛ shihilɛ mli.” Manjola tsɔɔ mli akɛ, etsutsu naanyo nuu lɛ yɛ gboklɛfoi atsuŋ, ni akɛ, nanemɛi ni etee amɛ ŋɔɔ kɛha yelikɛbuamɔ lɛ eha enine enyɛ shi. Akɛni enijiaŋ eje wui hewɔ lɛ, esɔle eha Nyɔŋmɔ koni eye ebua lɛ. Kɛkɛ ni ekai Wanda, mɔ ni gba lɛ Biblia mli sane lɛ. Kwɛ miishɛɛ ni Manjola ná akɛ eeena lɛ ekoŋŋ!

Aje Biblia mli nikasemɔ shishi ekoŋŋ, ni etsɛɛɛ kɛkɛ ni Manjola bɔi Kristofoi akpeei yaa. Enine shɛ mla naa gbɛŋmɛɛ wolo nɔ akɛ ehi Italy. Afi kome sɛɛ lɛ, Manjola batsɔ Odasefonyo ni abaptisi lɛ. Akɛni shiwoi ni ajɛ ŋwɛi akɛha lɛ eshɛje emii hewɔ lɛ, eku esɛɛ kɛtee Albania koni eyagba Biblia mli shɛɛ sane ni shɛjeɔ mɔ mii lɛ etsɔɔ emaŋ bii lɛ.

Odase ni Ayeɔ yɛ Mɛi ni Efa Kɛyahi Maji Krokomɛi Amli lɛ Nsrai Amli

Asafoi ni yɔɔ Italy lɛ amli babaoo eto gbɛjianɔ koni amɛyaye mɛi ni efa kɛbahi amɛmaŋ lɛ mli, tamɔ Manjola lɛ odase. Ákɛ nɔkwɛmɔnɔ lɛ, asafo ko ni yɔɔ Florence lɛ to gbɛjianɔ koni eyasara nsrai ni mɛi ni efa kɛbahi amɛmaŋ lɛ yɔɔ mli lɛ daa. Mɛi babaoo ni yɔɔ nsrai lɛ amli—ní amɛteŋ mɛi babaoo jɛ Europa Bokagbɛ, Macedonia, kɛ Kosovo lɛ—kɛ shihilɛi  ni mli wa waa miikpe. Mɛi komɛi yɛ tsofai fɔji ni akɛtsuɔ nii loo dãa ni wa he naagbai. Mɛi komɛi hu yeɔ buaa amɛhe kɛtsɔ juu bibii anɔ.

Shiɛmɔ yɛ akutsei nɛɛ amli lɛ ji kaa. Ni kɛlɛ, naagbee mli lɛ, be-fɛɛ sanekpakpa jajelɔ ko ni atsɛɔ lɛ Paola kɛ Jaklina, ni ji Macedonia yoo ko kpe. Yɛ sanegbai fioo komɛi asɛɛ lɛ, Jaklina wo enaanyo Susanna hewalɛ koni epɛi Biblia lɛ mli. Enɛ hewɔ lɛ, Susanna kɛ wekumɛi krokomɛi hu gba sane. Etsɛɛɛ ni weku lɛ mli bii enumɔ bɔi Biblia lɛ kasemɔ daa, amɛbɔi Kristofoi akpeei yaa, ni amɛkɛ nɔ ni amɛkaseɔ lɛ bɔi nitsumɔ. Yɛ naagbai ni amɛkɛkpeɔ lɛ fɛɛ sɛɛ lɛ, amɛnáa miishɛjemɔ kɛjɛɔ Yehowa kɛ e-Wiemɔ lɛ mli.

Yoo Mɔ Kome Shihilɔ ko Ná Miishɛjemɔ Kɛjɛ Yehowa Ŋɔɔ

Yɛ maŋ ni ji Formia lɛ mli lɛ, be-fɛɛ sanekpakpa jajelɔ ko ni atsɛɔ lɛ Assunta kɛ yoo ko ni miipiŋ yɛ enyiɛmɔ mli lɛ gba sane. Yoo lɛ ji yoo mɔ kome shihilɔ ko ni yɔɔ jamɔ kuu ko ni kɛ yelikɛbuamɔ haa helatsɛmɛi kɛ mɛi ni bɛ gbɔmɔtsoŋ hewalɛ yɛ helatsamɔhei kɛ mɛi aŋkroaŋkroi ashiai amli.

Assunta kɛɛ yoo mɔ kome shihilɔ lɛ akɛ: “Bo hu oona nɔ, aloo jeee nakai? Mɔbɔ sane ji akɛ, wɔ fɛɛ wɔyɛ naagbai ni esa akɛ wɔkpee naa.” Yɛ hetoo hamɔ mli lɛ, yoo mɔ kome shihilɔ lɛ jwa yaafo ni etsɔɔ mli akɛ eyɛ gbɔmɔtsoŋ hewalɛnamɔ mli naagbai ni hiɛdɔɔ yɔɔ mli. Assunta wo lɛ hewalɛ, ni ekɛɛ lɛ akɛ Nyɔŋmɔ ni Biblia lɛ wieɔ ehe lɛ baanyɛ ashɛje emii. Yoo mɔ kome shihilɔ lɛ hé woji tɛtrɛbii ni damɔ Biblia lɛ nɔ ni Assunta kɛha lɛ lɛ.

Yɛ amɛsanegbaa ni nyiɛ sɛɛ lɛ mli lɛ, yoo mɔ kome shihilɔ, ni atsɛɔ lɛ Palmira lɛ kpɛlɛ nɔ akɛ eena nɔ babaoo diɛŋtsɛ. Ekɛ be babaoo ehi shi yɛ nitsumɔ ko ni mɔ kome shihilɔi kwɛɔ nɔ lɛ mli. Beni eba lɛ akɛ esa akɛ eshi be fioo yɛ gbɔmɔtsoŋ hewalɛ ni ebɛ lɛ hewɔ lɛ, aŋmɛɛɛ lɛ gbɛ ni eku esɛɛ dɔŋŋ. Shi kɛlɛ, Palmira nu he akɛ, akɛni ekã Nyɔŋmɔ kita akɛ mɔ kome shihilɔ hewɔ lɛ, mla efi lɛ. Ekɛ ehe yaha tsofatsɛmɛi koni ‘amɛtsa’ lɛ, shi ená jwɛŋmɔŋ nɔnyɛɛ yɛ nakai nifeemɔ lɛ mli. Palmira kpɛlɛ Biblia mli nikasemɔ nɔ, ni etee Kristofoi akpeei afi kome. Kɛkɛ ni eshi kɛtee he kroko, ni Odasefonyo lɛ nyɛɛɛ ana lɛ dɔŋŋ. Afii enyɔ ho dani Assunta na yoo lɛ ekoŋŋ. Palmira ná shitee-kɛ-woo kɛjɛ ewekumɛi kɛ osɔfoi lɛ adɛŋ. Shi fɛɛ sɛɛ lɛ, eje e-Biblia mli nikasemɔ lɛ shishi ekoŋŋ, ni ená mumɔŋ hiɛyaa, ni abaptisi lɛ akɛ Yehowa Odasefoi ateŋ mɔ kome.

Hɛɛ, ‘Nyɔŋmɔ ni shɛjeɔ mɔ mii lɛ’ he shɛɛ sane lɛ woɔ mɛi babaoo hewalɛ. (Romabii 15:4, 5) No hewɔ lɛ, Yehowa Odasefoi ni yɔɔ Italy lɛ etswa amɛfai shi akɛ amɛbaaya nɔ amɛkase Nyɔŋmɔ kɛtsɔ eshɛɛ sane ni yɔɔ naakpɛɛ ni shɛjeɔ mɔ mii lɛ ni amɛkɛaaha mɛi krokomɛi lɛ nɔ.