Maŋtsɛyeli Jajelɔi Bɔ Amaniɛ

Gbɔmɛi Srɔtoi Fɛɛ ni Yɔɔ Netherlands lɛ ni Aaaye Abua Amɛ

ABRAHAM ji nuu ni yɔɔ hemɔkɛyeli ko ni yɔɔ srɔto waa. Bɔfo Paulo kɛɛ akɛ: “Beni atsɛ lɛ lɛ,” Abraham bo Nyɔŋmɔ gbee toi ni “eyiŋ etee, tsɛ eleee heni eyaa.” Be mli ni eha eweku muu lɛ fɛɛ efã sɛɛ lɛ, Abraham kɛ ewala shihilɛ mli afii oha ni eshwɛ lɛ “yato gbɔ yɛ shiwoo shikpɔŋ lɛ nɔ tamɔ mɔkpɔŋ.”— Hebribii 11:8, 9.

Nakai nɔŋŋ ŋmɛnɛ, Yehowa Odasefoi ateŋ mɛi babaoo ekpɛlɛ nitsumɔ ni wa ni ji fã ni aaafã kɛya maŋ kroko nɔ koni amɛyasɔmɔ yɛ heni hiamɔ lɛ da yɛ lɛ. Mɛi krokomɛi ekase wiemɔ kroko, bɔni afee ni amɛnyɛ amɛye gbɔi ni efã kɛba amɛmaŋ lɛ mli lɛ odase. Taakɛ nɔkwɛmɔnɔ ni nyiɛ sɛɛ lɛ tsɔɔ lɛ, mumɔ kpakpa ni ajie lɛ kpo nɛɛ egbele “shinaa kpeteŋkpele ko ni nitsumɔ yɔɔ mli naa” yɛ Netherlands, heni maŋbii ayifalɛ ni ji akpekpei 15 lɛ ateŋ mɛi akpekpe kome jɛ maji krokomɛi anɔ lɛ. —1 Korintobii 16:9.

□ Bahram, ni ji tsutsu Kung Fu tsɔɔlɔ ko lɛ, jɛ maŋ ko ni yɔɔ Middle East lɛ mli. Enine shɛ Biblia lɛ eko kɛ Buu Mɔɔ Asafo lɛ woji lɛ ekomɛi anɔ. Yɛ nyɔŋ kome pɛ mli lɛ, Bahram yɔse akɛ ena anɔkwale lɛ. Akɛ lɛ kɛ eŋa je nikasemɔ shishi, shi naagba ko yɛ—amɛ Biblia tsɔɔlɔ lɛ ewieee amɛ wiemɔ lɛ. Amɛkaiɔ akɛ amɛtsɔɔ amɛnijifɔɔ nɔ amɛwieɔ, “amɛkɛ amɛniji kɛ amɛnaji” wieɔ. Yɛ be ni sa mli lɛ, Bahram kɛ eŋa lɛ nyɛ amɛkɛ asafo ko ni wieɔ amɛmaŋ wiemɔ lɛ bɔ, ni yɛ no sɛɛ lɛ amɛtee hiɛ oyayaayai. Amrɔ nɛɛ Bahram ji shiɛlɔ ni abaptisi lɛ.

□ Gbɛgbalɔi enyɔ ni ji gbalashihilɛ mli hefatalɔi komɛi ni jɛ Netherlands lɛ tsi amɛbɛŋkɛ Indonesia nuu ko ni damɔ shi yɛ shwapo wulu ko naa lɛ. Efee lɛ naakpɛɛ kɛ miishɛɛ beni gbalashihilɛ mli hefatalɔi lɛ kɛlɛ wie yɛ lɛ diɛŋtsɛ ewiemɔ mli lɛ. Ato gbɛjianɔ koni ayasara lɛ yɛ eshia. Nɔ ni ayɔse ji akɛ ekɛ nɔ ni fe afii 20 ehi Russia, ni nakai beaŋ ebatsɔ datrɛfonyo ni kwɛɔ yei ahela. Ekɛɛ akɛ eji mɔ ko ni heee eyeee akɛ Nyɔŋmɔ ko yɛ, shi ekpɛlɛ nɔ akɛ be fɛɛ be ni efɔɔ abifao ko lɛ, enaaa bɔ ni efeɔ ehe fe akɛ ehiɛ feɔ lɛ yaa, “Yɛ bɔ ni adesa gbɔmɔtso lɛ eye emuu lɛ he! Mɛɛ naakpɛɛ sane nɛ!” Ekpɛlɛ akɛ ebaakase Biblia lɛ ni etsɛɛɛ ni ebahe eye akɛ Bɔlɔ ko yɛ ni susuɔ adesa weku lɛ he. (1 Petro 5:6, 7) Amrɔ nɛɛ eji nyɛmi nuu ni abaptisi lɛ ni eesɔmɔ yɛ Indonesiabii asafo ko ni yɔɔ Amsterdam lɛ mli.

□ Yɛ Rotterdam, ni ji jeŋ muu fɛɛ lɛjiadaamɔhe ni da fe fɛɛ lɛ ateŋ ekome lɛ, gbɛgbalɔi akuu ko ebatsɔ mɛi ni he esa waa yɛ shiɛmɔ ni amɛshiɔ amɛtsɔɔ wiemɔ kui srɔtoi ni baa ŋshɔ lɛ naa daa gbi lɛ hewɔ. Nɔ ni jɛ nɛkɛ shiɛlɔi akuu ni yɔɔ miishɛɛ nɛɛ anitsumɔ lɛ mli ba ji akɛ, amlakui babaoo, ni lɛlɛtsɛ, onukpa ko ni kwɛɔ lɛji anɔ, kɛ tsutsu bulɔ ko fata he lɛ, ebakpɛlɛ anɔkwale lɛ nɔ. Amrɔ nɛɛ amɛ hu amɛmiiye kɛmiibua koni akɛgbɛ Nyɔŋmɔ Maŋtsɛyeli lɛ he sanekpakpa lɛ ashwã yɛ jeŋ fɛɛ.—Mateo 24:14.

Taakɛ eji yɛ je lɛŋ hei krokomɛi lɛ, Yehowa Odasefoi ni yɔɔ Netherlands lɛ etswa amɛfai shi akɛ amɛbaatsu amɛgbɛfaŋnɔ yɛ naanɔ sanekpakpa ni ajajeɔ atsɔɔ jeŋmaŋ fɛɛ jeŋmaŋ, akutso fɛɛ akutso, majianɔ wiemɔi, kɛ maŋ fɛɛ maŋ lɛ mli lɛ he nii.—Kpojiemɔ 14:6.