Ani Ohiɛ “Kristo Jwɛŋmɔ” Lɛ?
Ani Ohiɛ “Kristo Jwɛŋmɔ” Lɛ?
“Tsuishiŋmɛɛ kɛ miishɛjemɔ Nyɔŋmɔ lɛ aha nyɛná jwɛŋmɔ kome yɛ nyɛteŋ tamɔ Kristo Yesu.”—ROMABII 15:5.
1. Te átsɔɔ bɔ ni Yesu tamɔ ha yɛ Kristendom nitɛŋmɔi pii amli áha tɛŋŋ, ni mɛni hewɔ enɛ jeee bɔ ni Yesu tamɔ ha yɛ gbɛ ni ŋmɛɔ pɛpɛɛpɛ nɔ lɛ?
“ANAKO ni eeŋmɔ shikome po dã.” Nakai ji bɔ ni atsɔɔ akɛ Yesu ji yɛ wolo ko ni akɛ amale kɛɛ akɛ blema Roma nɔyeli lɛ mli onukpa ko ŋma lɛ mli. Akɛɛ wolo nɛɛ, ni ale bɔ ni eji bianɛ kɛjɛ afii ohai 11 lɛ mli lɛ ená nitɛŋlɔi babaoo nɔ hewalɛ. * Anaa Yesu yɛ nitɛŋmɔi pii amli akɛ mɔ ni efɔɔɔ ŋmɔɔ, kɛ́ eŋmɔ gbi ko po. Shi enɛ nyɛŋ afee bɔ ni Yesu, ni Sanekpakpai lɛ wieɔ ehe akɛ mɔ ni yɔɔ miishɛɛ, nuu ni mli hi ni ehenumɔi amli wa lɛ tamɔ ha lɛ kwraa.
2. Te wɔɔfee tɛŋŋ wɔná ‘jwɛŋmɔ kome yɛ wɔteŋ tamɔ Kristo Yesu,’ ni enɛ baawula wɔ ni wɔfee mɛni?
2 Eyɛ faŋŋ akɛ, kɛji akɛ wɔɔle mɔ diɛŋtsɛ ni Yesu ji lɛ, belɛ esa akɛ wɔkɛ mɔ ni Yesu diɛŋtsɛ ji yɛ be mli ni eyɔɔ shikpɔŋ nɛɛ nɔ lɛ he anɔkwale nilee awo wɔjwɛŋmɔi kɛ wɔtsuii amli. Belɛ nyɛhaa wɔpɛia Sanekpakpai lɛ amli saji komɛi ni haa wɔnaa “Kristo jwɛŋmɔ” lɛ mli diɛŋtsɛ—ni ji akɛ, ehenumɔi, esɛɛyoomɔi, ejwɛŋmɔi, kɛ esusumɔi lɛ. (1 Korintobii 2:16) Yɛ be mli ni wɔfeɔ nakai lɛ, nyɛhaa wɔsusua bɔ ni wɔɔfee wɔná ‘jwɛŋmɔ kome yɛ wɔteŋ tamɔ Kristo Yesu’ lɛ he. (Romabii 15:5) Kɛkɛ lɛ enɛ baawula wɔ jogbaŋŋ yɛ wɔshihilɛi amli kɛ agbɛnɛ yɛ gbɛ ni wɔtsɔɔ nɔ wɔkɛ mɛi krokomɛi yeɔ haa lɛ mli, koni wɔnyiɛ okadi ni eto kɛha wɔ lɛ sɛɛ.—Yohane 13:15.
Ewaaa akɛ Aaabɛŋkɛ Lɛ
3, 4. (a) Mɛni sane ni aŋma afɔ̃ shi yɛ Marko 10:13-16 lɛ wieɔ he? (b) Te Yesu fee enii eha tɛŋŋ beni ekaselɔi lɛ bɔ mɔdɛŋ ni amɛtsĩ gbekɛbii lɛ agbɛ koni amɛkaba eŋɔɔ lɛ?
3 Gbɔmɛi nuɔ he akɛ esa akɛ amɛbɛŋkɛ Yesu. Aŋkroaŋkroi ni amɛye afii srɔtoi ni jɛ shihilɛi srɔtoi amli jɛ amɛsuɔmɔ mli amɛtee eŋɔɔ yɛ bei srɔtoi amli. Susumɔ sane ni aŋma afɔ̃ shi yɛ Marko 10:13-16 lɛ he. Eba kɛmiibɛŋkɛ esɔɔmɔ nitsumɔ lɛ naagbee gbɛ, yɛ be mli ni enyiɛ gbɛ kɛyaa Yerusalem ákɛ naagbee be ni ekɛaaya jɛmɛ, koni ekɛ piŋmɔ gbele ayakpe lɛ.—Marko 10:32-34.
4 Feemɔ nɔ ni ba lɛ he mfoniri okwɛ. Gbɔmɛi je shishi amɛkɛ amɛbii, ni fufɔbii fata he ba Yesu ŋɔɔ koni ejɔɔ amɛ. * Shi kaselɔi lɛ bɔ mɔdɛŋ ni amɛtsĩ gbekɛbii lɛ anaa koni amɛkaba Yesu ŋɔɔ. Ekolɛ kaselɔi lɛ nu he akɛ Yesu sumɔɔɔ ni akɛ gbekɛbii bagbaa enaa yɛ otsii ni hiɛdɔɔ yɔɔ mli waa nɛɛ amli. Shi amɛtɔ̃ kwraa. Beni Yesu yoo nɔ ni kaselɔi lɛ feɔ lɛ, eŋɔɔɔ enaa. Yesu tsɛ́ gbekɛbii lɛ kɛba eŋɔɔ, ni ekɛɛ akɛ: “Nyɛhaa gbekɛbii lɛ abaa miŋɔɔ, ni nyɛkatsia amɛ gbɛ.” (Marko 10:14) Kɛkɛ ni efee nɔ ko ni jieɔ mlijɔlɛ kɛ suɔmɔ su diɛŋtsɛ kpo. Sane lɛ kɛɔ akɛ: “Ni eloo amɛ atuu, ni eŋɔ eniji eshwie amɛnɔ, ni ejɔɔ amɛ.” (Marko 10:16) Eka shi faŋŋ akɛ gbekɛbii lɛ atsuii nyɔ amɛmli, beni Yesu loo amɛ atuu ewo edɛŋ lɛ.
5. Mɛni sane ni yɔɔ Marko 10:13-16 lɛ kɛɔ wɔ yɛ nɔ̃ gbɔmɔ ni Yesu ji he?
5 Nakai sane kuku lɛ gbaa wɔ nibii babaoo ni kɔɔ nɔ gbɔmɔ ni Yesu ji lɛ he. Kadimɔ akɛ anyɛɔ abɛŋkɛɔ lɛ. Eyɛ mli akɛ ehi gbɛhe ko ni kwɔ grɔŋŋ mli yɛ ŋwɛi moŋ, shi ewooo adesai ni yeee emuu lɛ ahe gbeyei ni asaŋ ekwɛɛɛ amɛ yɛ shikpɔŋ. (Yohane 17:5) Ani ejeee nɔ ni sa kadimɔ hu akɛ gbekɛbii po amii shɛɔ amɛhe yɛ emasɛi? Yɛ anɔkwale mli lɛ, amɛbɛŋkɛŋ mɔ ko ni yɔɔ shikpilikpii, gbɔmɔ ni bɛ miishɛɛ ni ehiɛ bɛ ŋmɔlɔŋmɔlɔ loo eŋmɔɔɔ kwraa! Gbɔmɛi ni eye afii srɔtoi fɛɛ ba Yesu ŋɔɔ ejaakɛ amɛnu he akɛ ehereɔ mɔ, esusuɔ mɔ he, ni amɛyɛ hekɛnɔfɔɔ akɛ eshwieŋ amɛ.
6. Te onukpai lɛ baafee tɛŋŋ koni amɛha anyɛ abɛŋkɛ amɛ babaoo?
6 Yɛ be mli ni wɔsusuɔ sane nɛɛ he lɛ, wɔ hu wɔbaanyɛ wɔbi wɔhe akɛ, ‘Ani miyɛ Kristo jwɛŋmɔ lɛ? Ani anyɛɔ abɛŋkɛɔ mi?’ Tookwɛlɔi ni anyɛɔ abɛŋkɛɔ amɛ, hii ni tamɔ “abobaahe yɛ kɔɔyɔɔ naa” ahe miihia Nyɔŋmɔ tooi lɛ yɛ jaramɔ bei nɛɛ amli. (Yesaia 32:1, 2; 2 Timoteo 3:1) Onukpai, kɛji akɛ nyɛjɛ nyɛtsuiŋ nyɛná nyɛnyɛmimɛi lɛ ahe miishɛɛ diɛŋtsɛ, ni nyɛjɛ nyɛsuɔmɔ mli nyɛkɛ nyɛhe fɔ̃ shi nyɛha amɛ lɛ, amɛbaanu bɔ ni nyɛjwɛŋɔ amɛhe nyɛhaa lɛ he. Amɛbaana yɛ bɔ ni nyɛfeɔ nyɛhiɛ nyɛhaa lɛ mli, amɛbaanu he yɛ nyɛgbeei amli, ni amɛbaana yɛ nyɛ mlihilɛ nifeemɔi amli. Anɔkwa miishɛɛ kɛ mɔ he susumɔ ni tamɔ nɛkɛ lɛ baatee hekɛnɔfɔɔ shihilɛ ko ni baaha efee mlɛo kɛha mɛi krokomɛi, ni gbekɛbii po fata he lɛ shi, koni amɛbɛŋkɛ nyɛ. Kristofonyo yoo ko wie nɔ hewɔ ni egba onukpa ko eteemɔŋ sane lɛ he, akɛ: “Ekɛ mi wie yɛ mlihilɛ kɛ mɔbɔnamɔ naa. Eji jeee nakai kulɛ, ekolɛ mitswaŋ misɛŋ. Eha minu he akɛ miyɛ shweshweeshwe.”
Esusuɔ Mɛi Krokomɛi Ahe
7. (a) Mɛɛ gbɛ nɔ Yesu tsɔɔ yɛ akɛ esusuɔ mɛi krokomɛi ahe? (b) Mɛni ekolɛ no ha Yesu tsa shwilafo ko fiofio lɛ?
7 Yesu susuɔ mɛi krokomɛi ahe. Enuɔ mɛi krokomɛi ahenumɔi ahe. Emusuŋ tsɔ lɛ waa yɛ mɛi ni piŋɔ ni enaa amɛ lɛ ahe aahu akɛ etsirɛ lɛ koni etsa amɛ. (Mateo 14:14) Esusu mɛi krokomɛi afatɔɔi kɛ hiamɔ nii hu he. (Yohane 16:12) Be ko lɛ, gbɔmɛi kɛ nuu shwilafo ko ba eŋɔɔ ni amɛkpa Yesu fai koni etsa lɛ. Yesu ha nuu lɛ na nii ekoŋŋ, shi efee lɛ fiofio. Klɛŋklɛŋ lɛ, nuu lɛ na gbɔmɛi aŋkroŋkroi lɛ kusuu—“tamɔ tsei ni nyiɛɔ.” No sɛɛ lɛ Yesu ha ena nii kwraa. Mɛni hewɔ eha nuu lɛ na nii fiofio lɛ? Enɛ baanyɛ afee akɛ, bɔni afee ni eha mɔ ni ehi duŋ mli aahu lɛ anyɛ adamɔ hejɔmɔ yɛ na ni eeena hulu kpɛmɔ kɛ jeŋ ni yɔɔ hwanyaŋŋ lɛ ni baa trukaa lɛ naa.—Marko 8:22-26.
8, 9. (a) Mɛni ba beni Yesu kɛ ekaselɔi lɛ bote Dekapoli kpokpaa lɛ nɔ lɛ sɛɛ nɔŋŋ lɛ? (b) Tsɔɔmɔ bɔ ni fee ni Yesu tsa nuu mumui lɛ.
8 Agbɛnɛ hu susumɔ sane ko ni ba yɛ afi 32 Ŋ.B. Hehoo lɛ sɛɛ lɛ he okwɛ. Yesu kɛ ekaselɔi lɛ eba Dekapoli kpokpai lɛ anɔ, yɛ Galilea Ŋshɔ lɛ bokagbɛ. Etsɛɛɛ ni asafoi babaoo ko na amɛ yɛ jɛmɛ, ni amɛkɛ helatsɛmɛi kɛ kpajelɔi pii ba Yesu ŋɔɔ, ni etsa amɛ fɛɛ. (Mateo 15:29, 30) Miishɛɛ sane ko ji akɛ, Yesu hala nuu ko koni eje gbɛ esusu ehe. Sanekpakpa ŋmalɔ Marko, mɔ kome pɛ ni ŋma nɔ ni tee nɔ lɛ bɔ he amaniɛ.—Marko 7:31-35.
9 Nuu lɛ emũ toi ni enyɛɛɛ ewie. Yesu baanyɛ anu nuu nɛɛ gbeyeishemɔ loo ehiɛgbele krɛdɛɛ lɛ he. Kɛkɛ ni Yesu fee nɔ ko ni yɔɔ srɔto fioo. Ekɛ nuu lɛ tee afã gbɛ, kɛjɛ asafo lɛ teŋ kɛtee teemɔhe ko. Kɛkɛ ni Yesu fee okadii komɛi etsɔɔ nuu lɛ ni ekɛtsɔɔ lɛ nɔ ni ebaafee. “Eŋɔ ewaobii ewo etoii amli, ni etsɛ̃ lajɔ̃ ekɛsa elilɛi he.” (Marko 7:33) No sɛɛ lɛ Yesu kwɛ ŋwɛi ni efee sɔlemɔ he okadi ko. Nɛkɛ nɔkwɛmɔnii ni afeɔ atsɔɔ nɛɛ baakɛɛ nuu lɛ akɛ, ‘Nɔ ni mibafee maha bo lɛ jɛ hewalɛ ni jɛ Nyɔŋmɔ ŋɔɔ.’ Yɛ naagbee lɛ Yesu kɛɛ: “Gbelemɔ.” (Marko 7:34) Kɛkɛ ni nuu lɛ toii gbele, ni enyɛ ewie.
10, 11. Mɛɛ gbɛ nɔ wɔɔtsɔ wɔsusu mɛi krokomɛi ahenumɔi ahe yɛ asafo lɛ mli? yɛ weku lɛ mli?
10 Kwɛ bɔ ni Yesu susu mɛi krokomɛi ahe eha! Enuɔ amɛhenumɔi ahe, ni musuŋtsɔlɛ kɛha mɛi krokomɛi nɛɛ hu tsirɛ lɛ ni efee nii yɛ gbɛ̀i ni jɔɔ mɛi krokomɛi ahenumɔi ahe lɛ nɔ. Ákɛ Kristofoi lɛ, wɔɔfee jogbaŋŋ akɛ wɔɔná ni wɔjie Kristo jwɛŋmɔ lɛ kpo yɛ enɛ gbɛfaŋ. Biblia lɛ woɔ wɔ ŋaa akɛ: “Nyɛ fɛɛ nyɛhiɛa jwɛŋmɔ kome, nyɛnanaa nyɛhaa nyɛhe, nyɛdɔa nyɛhe akɛ nyɛmimɛi, nyɛmli ajɔa ahaa nyɛhe, nyɛjwɛŋa heshibaa jwɛŋmɔ.” (1 Petro 3:8) Lɛɛlɛŋ enɛ biɔ ni wɔwie ni wɔfee wɔnii yɛ gbɛ̀i ni susuɔ mɛi krokomɛi ahenumɔi ahe lɛ nɔ.
11 Wɔbaanyɛ wɔsusu mɛi krokomɛi ahenumɔi ahe yɛ asafo lɛ mli kɛtsɔ woo ni wɔkɛaaha amɛ, ni wɔkɛ amɛ aye yɛ gbɛ ni wɔɔsumɔ ni akɛ wɔ aye yɛ nɔ lɛ nɔ. (Mateo 7:12) Nɔ ni baafata enɛ he ji ni wɔɔkwɛ nɔ ni wɔwieɔ kɛ bɔ ni wɔwieɔ sane ko he wɔhaa lɛ jogbaŋŋ. (Kolosebii 4:6) Kaimɔ akɛ ‘wiemɔi ni awieɔ kɛkɛ ni asusuuu he lɛ baanyɛ abamɔ mɔ tamɔ klante.’ (Abɛi 12:18) Ni weku lɛ mli hu? Wu kɛ ŋa ni sumɔɔ amɛhe lɛɛlɛŋ lɛ nuɔ amɛhenumɔi ahe. (Efesobii 5:33) Amɛwieee wiemɔi ni wa, amɛwieee dɔlɛ wiemɔi amɛshiii amɛhe be fɛɛ be, kɛ wiemɔi ni woɔ mɔ mlila—ni fɛɛ baanyɛ aye henumɔŋ awui ni esaamɔ bɛ mlɛo lɛ. Gbekɛbii hu yɛ henumɔi, ni fɔlɔi ni yɔɔ suɔmɔ lɛ susuɔ enɛɛmɛi ahe. Kɛji akɛ tsɔsemɔ he miihia lɛ, fɔlɔi ni tamɔ nɛkɛ lɛ kɛ tsɔsemɔ lɛ haa yɛ gbɛ̀i ni kɛ bulɛ haa woo ni amɛbii lɛ yɔɔ lɛ nɔ, ni enɛ wooo amɛ hiɛgbele babaoo. * (Kolosebii 3:21) No hewɔ lɛ, kɛ wɔsusu mɛi krokomɛi ahe nɛkɛ lɛ, wɔtsɔɔ akɛ wɔhiɛ Kristo jwɛŋmɔ lɛ eko.
Eesumɔ ni Ená Hekɛnɔfɔɔ yɛ Mɛi Krokomɛi Amli
12. Yesu susu ekaselɔi lɛ ahe diɛŋtsɛ yɛ gbɛ ni ŋmɛɔ pɛpɛɛpɛ nɔ yɛ mɛɛ gbɛ nɔ?
12 Yesu yɛ ekaselɔi lɛ ahe jwɛŋmɔ kpakpa ni ŋmɛɔ pɛpɛɛpɛ. Ele jogbaŋŋ akɛ amɛyeee emuu. Fɛɛ sɛɛ lɛ ebaanyɛ ele gbɔmɛi atsuii amli saji. (Yohane 2:24, 25) Kɛji nakai ni po lɛ, jeee emuu ni amɛyeee lɛ nɔ edamɔɔ ekwɛɔ amɛ, shi moŋ amɛsui kpakpai lɛ anɔ edamɔɔ. Agbɛnɛ hu ena nyɛmɔ ni hii ni Yehowa egbala amɛ nɛɛ yɔɔ lɛ. (Yohane 6:44) Jwɛŋmɔ kpakpa ni Yesu hiɛ yɛ ekaselɔi lɛ ahe lɛ je kpo yɛ gbɛ ni etsɔ nɔ ekɛ amɛ ye ha kɛ bɔ ni efee amɛ lɛ nɔ. Nɔ kome ji akɛ, ejie lɛ kpo akɛ eesumɔ ni ekɛ ehe afɔ̃ amɛnɔ.
13. Mɛɛ gbɛ nɔ Yesu fee bɔ ni ekɛ ehe fɔ̃ɔ ekaselɔi lɛ anɔ lɛ he nɔkwɛmɔnɔ yɛ?
13 Te Yesu jie nɛkɛ hekɛnɔfɔɔ nɛɛ kpo eha tɛŋŋ? Beni eshi shikpɔŋ nɔ lɛ, ekɛ gbɛnaa nii ni tsii wo ekaselɔi ni afɔ amɛ mu lɛ adɛŋ. Ekɛ e-Maŋtsɛyeli lɛ he nibii ni yɔɔ shikpɔŋ muu lɛ fɛɛ nɔ lɛ nɔkwɛmɔ wo amɛdɛŋ. (Mateo 25:14, 15; Luka 12:42-44) Ejie lɛ kpo yɛ nibii bibii ni bɛ tɛ̃ɛ po mli akɛ ekɛ ehe fɔ̃ɔ amɛnɔ yɛ esɔɔmɔ nitsumɔ be lɛ mli. Beni etsɔ naakpɛɛ gbɛ nɔ eha niyenii fa babaoo koni akɛlɛ asafoi lɛ, ekɛ niyenii lɛ jaa he gbɛnaa nii wo ekaselɔi lɛ adɛŋ.—Mateo 14:15-21; 15:32-37.
14. Te obaamu sane ni aŋma afɔ̃ shi yɛ Marko 4:35-41 lɛ naa oha tɛŋŋ?
14 Agbɛnɛ hu, susumɔ sane ni aŋma afɔ̃ shi yɛ Marko 4:35-41 lɛ he. Yesu kɛ ekaselɔi lɛ yata lɛlɛ mli yɛ nɛkɛ be nɛɛ mli kɛtee bokagbɛ kɛfo Galilea Ŋshɔ lɛ. Beni amɛtsi lɛlɛ lɛ kɛtee ŋshɔ lɛ hiɛ lɛ sɛɛ etsɛɛɛ ni Yesu yakã shi ni ewɔ vii. Shi etsɛɛɛ ni “ahum babaoo batswa.” Asɛ̃ɛɛ ahumii ni tamɔ nɛkɛ he yɛ Galilea Ŋshɔ lɛ hiɛ. Akɛni ebaa shi (aaafee ninetalɔi 700 fe ŋshɔ hiɛ ŋɛlɛ nɔ) hewɔ lɛ, kɔɔyɔŋ dɔɔ yɛ jɛmɛ fe shikpɔŋ ni ebɔle jɛmɛ lɛ anɔ, ni enɛ haa kɔɔyɔŋ feɔ basabasa. Kɛfata enɛ he lɛ, kɔɔyɔi ni naa wa tswaa kɛjɛɔ Hermon Gɔŋ ni yɔɔ kooyigbɛ lɛ nɔ kɛbaa Yordan Jɔɔ lɛ mli. Kɛ jɛmɛ fee dioo fioo lɛ etsɛɛɛ kɛkɛ lɛ jɛmɛ etsɔ he ni ahumii tswaa waa yɛ. Susumɔ enɛ he: Ŋwanejee ko bɛ he akɛ Yesu le ahumii ni tswaa kpitiokpitio lɛ, ejaakɛ alɛ lɛ yɛ Galilea. Ni kɛlɛ, ewɔ yɛ toiŋjɔlɛ mli, ekɛ ehe fɔ̃ ekaselɔi ni amɛteaŋ mɛi komɛi ji wolɛi lɛ ahesaai anɔ.—Mateo 4:18, 19.
15. Mɛɛ gbɛ nɔ wɔɔtsɔ wɔkase bɔ ni Yesu sumɔɔ ni ekɛ ehe afɔ̃ ekaselɔi lɛ anɔ lɛ yɛ?
15 Ani wɔbaanyɛ wɔkase bɔ ni Yesu sumɔɔ ni ekɛ ehe afɔ̃ ekaselɔi lɛ anɔ lɛ? Ewa kɛha mɛi komɛi akɛ amɛkɛ gbɛnaa nii aaawo mɛi krokomɛi adɛŋ. Esa akɛ amɛkudɔ nɔ fɛɛ nɔ, kɛ wɔɔwie he nakai. Ekolɛ amɛbaasusu akɛ, ‘Kɛji akɛ miisumɔ ni afee nɔ ko ni ja lɛ, no lɛ esa akɛ mi diɛŋtsɛ mafee!’ Shi kɛji akɛ esa akɛ wɔ diɛŋtsɛ wɔfee nɔ fɛɛ nɔ lɛ, no lɛ oshara yɛ akɛ wɔbaagbede, ni ekolɛ wɔbaaŋɔ be ni he ehiaaa kɛjɛ wɔwekui lɛ adɛŋ. Kɛfata he lɛ, kɛji akɛ wɔkɛ nitsumɔi ni sa kɛ gbɛnaa nii wooo mɛi krokomɛi adɛŋ lɛ, ekolɛ wɔmiishɔ niiashikpamɔ kɛ tsɔsemɔ ni he hiaa lɛ kɛmiijɛ amɛdɛŋ. Ebaafee nilee gbɛ akɛ wɔɔkase bɔ ni wɔɔfee ni wɔkɛ wɔhe afɔ̃ mɛi krokomɛi anɔ koni wɔkɛ saji awo amɛdɛŋ. Wɔɔfee jogbaŋŋ akɛ wɔkɛ anɔkwayeli aaabi wɔhe akɛ, ‘Ani miyɛ Kristo jwɛŋmɔ lɛ eko yɛ nɛkɛ sane nɛɛ he? Ani mijɛɔ suɔmɔ mli mikɛ nitsumɔi komɛi woɔ mɛi krokomɛi adɛŋ, kɛ hekɛnɔfɔɔ akɛ amɛbaafee nɔ ni hi fe fɛɛ ni amɛaanyɛ?’
Ejie Bɔ ni Ehéɔ Ekaselɔi lɛ Eyeɔ lɛ Kpo
16, 17. Eyɛ mli akɛ Yesu le akɛ ebɔfoi lɛ baakwa lɛ yɛ eshikpɔŋ nɔ shihilɛ lɛ naagbee gbɛkɛ lɛ moŋ, shi mɛni nɔ mi ema kɛha amɛ?
16 Yesu fee bɔ ni ekɛ jwɛŋmɔ kpakpa susuɔ ekaselɔi lɛ ahe lɛ he nɔkwɛmɔnɔ yɛ gbɛ kroko ni he hiaa nɔ. Eha amɛle akɛ eyɛ hekɛnɔfɔɔ yɛ amɛmli. Enɛ je kpo faŋŋ yɛ wiemɔi ni ekɛshɛje ebɔfoi lɛ amii yɛ eshikpɔŋ nɔ shihilɛ lɛ naagbee gbɛkɛ lɛ mli. Kadimɔ nɔ ni ba lɛ.
17 Eji gbɛkɛ muu kɛha Yesu. Ekɛ nɔkwɛmɔnɔ ko ni amɛbaanyɛ amɛkase ni kɔɔ heshibaa he ha ebɔfoi lɛ kɛtsɔ amɛnaji ahe ni efɔfɔi lɛ nɔ. Yɛ no sɛɛ lɛ eto gbɛkɛnaashi niyenii lɛ ni baafee egbele lɛ kaimɔ lɛ he gbɛjianɔ. Kɛkɛ ni bɔfoi lɛ kɛ amɛhe wo naataomɔ ni naa wa ni kɔɔ amɛteŋ mɔ ni da fe fɛɛ he lɛ mli ekoŋŋ. Akɛni Yesu yɔɔ tsuishitoo daa hewɔ lɛ, ekãaa amɛhiɛ, shi moŋ ekɛ amɛ susu saji ahe. Ekɛɛ amɛ nɔ ni kã amɛhiɛ lɛ, akɛ: “Nyɔɔŋ nɛɛŋ lɛ mihe sane baaha nyɛ fɛɛ nyɛnane atɔtɔ; ejaakɛ aŋma akɛ: ‘Matswa tookwɛlɔ lɛ nɔ, ni tookuu lɛ aaagbɛ ashwã.’” (Mateo 26:31; Zakaria 13:7) Ele akɛ enanemɛi ni bɛŋkɛ lɛ kpaakpa lɛ baakwa lɛ yɛ be ni amɛhe hiaa lɛ lɛ mli. Kɛlɛ, ebuuu amɛ fɔ. Nɔ ni tamɔɔɔ nakai lɛ, ekɛɛ amɛ akɛ: “Shi mishitee lɛ sɛɛ lɛ matsɔ nyɛhiɛ kɛaatee Galilea.” (Mateo 26:32) Hɛɛ, ema nɔ mi kɛha amɛ akɛ, amɛbaakwa lɛ moŋ, shi lɛ lɛ ekwaŋ amɛ. Beni piŋmɔ ni naa wa waa nɛɛ eho lɛ, ekɛ amɛ baakpe ekoŋŋ.
18. Mɛɛ nitsumɔ ni tsii Yesu kɛwo ekaselɔi lɛ adɛŋ yɛ Galilea, ni bɔfoi lɛ tsu enɛ he nii yɛ mɛɛ gbɛ nɔ?
18 Yesu ye ewiemɔ lɛ nɔ. Sɛɛ mli, yɛ Galilea lɛ, Yesu ni átee lɛ shi lɛ jie ehe kpo etsɔɔ bɔfoi anɔkwafoi 11 lɛ, ní eka shi faŋŋ akɛ amɛkɛ mɛi krokomɛi babaoo ebua amɛhe naa lɛ. (Mateo 28:16, 17; 1 Korintobii 15:6) Yesu kɛ nitsumɔ ko ni tsii ha amɛ yɛ jɛmɛ, akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mateo 28:19, 20) Bɔfoi lɛ Asaji awolo lɛ kɛ odaseyeli ni mli ka shi faŋŋ haa wɔ akɛ bɔfoi lɛ tsu nakai nitsumɔ lɛ he nii. Amɛkɛ anɔkwayeli nyiɛ sanekpakpa shiɛmɔ nitsumɔ lɛ hiɛ yɛ klɛŋklɛŋ afii oha lɛ mli.—Bɔfoi lɛ Asaji 2:41, 42; 4:33; 5:27-32.
19. Mɛni Yesu nifeemɔi yɛ eshitee lɛ sɛɛ lɛ tsɔɔ wɔ yɛ Kristo jwɛŋmɔ lɛ he?
19 Mɛni sane ni jieɔ nibii akpo nɛɛ tsɔɔ wɔ yɛ Kristo jwɛŋmɔ lɛ he? Yesu ena bɔ ni ebɔfoi lɛ ebɔɔɔ mɔdɛŋ kwraa ha lɛ, ni kɛlɛ “esumɔ amɛ kɛwula shi.” (Yohane 13:1) Yɛ amɛfatɔɔi lɛ fɛɛ sɛɛ lɛ, eha amɛle akɛ eheɔ amɛ eyeɔ. Kadimɔ akɛ Yesu hekɛnɔfɔɔ lɛ efeee efolo. Ŋwanejee ko bɛ he akɛ hekɛnɔfɔɔ kɛ hemɔkɛyeli ni etsɔɔ akɛ eyɔɔ yɛ amɛmli lɛ wo amɛ hewalɛ koni amɛtswa amɛfai shi yɛ amɛtsui mli akɛ amɛbaaatsu nitsumɔ ni efã amɛ akɛ amɛtsu lɛ.
20, 21. Te wɔɔfee tɛŋŋ wɔjie jwɛŋmɔ kpakpa kpo yɛ wɔnanemɛi heyelilɔi lɛ ahe?
20 Te wɔɔfee tɛŋŋ wɔjie Kristo jwɛŋmɔ lɛ kpo yɛ enɛ gbɛfaŋ? Kaaná nanemɛi heyelilɔi ahe jwɛŋmɔ fɔŋ. Kɛji akɛ osusu nɔ ni ehiii he lɛ, ekolɛ owiemɔi kɛ onifeemɔi baajie lɛ kpo. (Luka 6:45) Shi, Biblia lɛ kɛɔ wɔ akɛ suɔmɔ ‘heɔ nii fɛɛ eyeɔ.’ (1 Korintobii 13:7) Suɔmɔ diɔ nɔ kpakpa sɛɛ, jeee nɔ fɔŋ. Etswaa mɔ emaa shi moŋ fe ni eeekumɔ mɔ. Gbɔmɛi hereɔ suɔmɔ kɛ hewalɛwoo nɔ oya fe hegbeyeiwoo. Wɔbaanyɛ wɔtswa mɛi krokomɛi wɔma shi ni wɔwo amɛ hewalɛ kɛtsɔ kɛɛmɔ ni wɔɔkɛɛ amɛ akɛ wɔyɛ hekɛnɔfɔɔ yɛ amɛmli lɛ nɔ. (1 Tesalonikabii 5:11) Kɛji akɛ taakɛ Kristo ji lɛ, wɔyɛ wɔnyɛmimɛi ahe jwɛŋmɔ kpakpa lɛ, wɔkɛ amɛ baaye yɛ gbɛ̀i ni tswaa amɛ emaa shi, ni jieɔ nɔ kpakpa ni fe fɛɛ ni yɔɔ amɛmli lɛ kpo lɛ nɔ.
21 Kristo jwɛŋmɔ lɛ ni wɔɔná ni wɔjie lɛ kpo lɛ yaa shɔŋŋ fe nibii komɛi ni Yesu fee lɛ ni wɔɔkase kɛkɛ. Taakɛ atsĩ tã yɛ nikasemɔ ni tsɔ hiɛ lɛ mli lɛ, kɛ wɔɔfee wɔnii tamɔ Yesu fee lɛɛlɛŋ lɛ, belɛ esa akɛ klɛŋklɛŋ lɛ wɔkase bɔ ni wɔɔsusu nibii ahe taakɛ efee lɛ. Sanekpakpai lɛ yeɔ buaa wɔ ni wɔnaa esu kɛ baŋ, esusumɔi kɛ henumɔi yɛ nitsumɔ ni akɛwo edɛŋ lɛ he yɛ gbɛ kroko nɔ, taakɛ nikasemɔ ni nyiɛ sɛɛ lɛ baatsɔɔ mli lɛ.
[Shishigbɛ niŋmai]
^ kk. 1 Shishiulɔ lɛ tsɔɔ bɔ ni akɛɛ Yesu gbɔmɔtso ji ha, kɛ bɔ ni eyitsɔi, etsɛŋ kɛ ehiŋmɛii yɔɔ ha lɛ mli yɛ nakai wolo lɛ mli. Biblia shishitsɔɔlɔ Edgar J. Goodspeed tsɔɔ mli akɛ ‘ato nɛkɛ shishiumɔ nɛɛ he gbɛjianɔ koni akpɛlɛ bɔ ni nitɛŋlɔi lɛ tsɔɔ yɛ amɛwoji amli akɛ nakai Yesu su kɛ baŋ ji lɛ nɔ.’
^ kk. 4 Eka shi faŋŋ akɛ gbekɛbii lɛ eye afii srɔtoi. Akɛ wiemɔ ni akɛtsu nii yɛ biɛ akɛ “gbekɛbii” lɛ nɔŋŋ tsu nii yɛ Yairo biyoo ni eye afii 12 lɛ he. (Marko 5:39, 42; 10:13) Shi yɛ sane ni tamɔ nakai nɔŋŋ mli lɛ, Luka kɛ wiemɔ ni akɛtsuɔ nii ahaa fufɔbii tsu nii.—Luka 1:41; 2:12; 18:15.
^ kk. 11 Kwɛmɔ saneyitso ni ji “Ani Okɛ Bulɛ Haa Amɛ Gbɛhe Lɛ?” ni yɔɔ April 1, 1998, Buu-Mɔɔ lɛ mli lɛ.
Ani Obaanyɛ Otsɔɔ Mli?
• Te Yesu fee enii eha tɛŋŋ beni ekaselɔi lɛ ka akɛ amɛaatsĩ gbekɛbii lɛ agbɛ koni amɛkaba eŋɔɔ lɛ?
• Mɛɛ gbɛ̀i anɔ Yesu tsɔ ejie mɛi krokomɛi ahesusumɔ kpo yɛ?
• Te wɔɔfee tɛŋŋ wɔkase bɔ ni Yesu sumɔɔ ni ekɛ ehe afɔ̃ ekaselɔi lɛ anɔ lɛ?
• Te wɔɔfee tɛŋŋ wɔkase hekɛnɔfɔɔ ni Yesu jie lɛ kpo yɛ ebɔfoi lɛ amli lɛ?
[Nikasemɔ lɛ he Sanebimɔi]
[Mfoniri ni yɔɔ baafa 16]
Gbekɛbii nuɔ hejɔlɛ he kɛ amɛyɛ Yesu masɛi
[Mfoniri ni yɔɔ baafa 17]
Yesu kɛ mɛi krokomɛi ye yɛ musuŋtsɔlɛ naa
[Mfoniri ni yɔɔ baafa 18]
Onukpai ni anyɛɔ abɛŋkɛɔ amɛ lɛ ji jɔɔmɔ