Bó Kɔkɔbɔɔ Lɛ Toi!

EGBƐƐ WAA! Yɛ June 3, 1991 lɛ, Mount Fugen ni yɔɔ Japan lɛ kɛ gbɛɛmɔ ni jijeɔ fɛ̃ kɔɔyɔɔ fɔŋ kɛ lamulu ni ji lasu gɔŋ mli nibii. Nɛkɛ nibii nɛɛ ni efutu ni mli edɔ waa tsɔ̃ fe nine ni jɛ gɔŋ lɛ nɔ lɛ shwie shi. Nii ni fɛ́ lɛ gbe mɛi 43. Mɛi babaoo ni yi ná wala lɛ shã waa diɛŋtsɛ. Mɛi komɛi bolɔ akɛ: “Nyɛfainɛ, nyɛkɛ nu abaa, nyɛkɛ nu abaa.” La gbelɔi kɛ polisifoi kɛ oyaiyeli kɛ ekãa jo foi kɛtee koni amɛyaye amɛbua amɛ.

AAAFEE otsii enyɔ ni tsɔ hiɛ lɛ mli lɛ, ana lasu gɔŋ mli lamulu ni efũ kɛtee ŋwɛi yɛ Mount Fugen yiteŋ tuuntu, no hewɔ lɛ mɛi ni tsuɔ enɛ he nii lɛ kɛ maŋbii lɛ ahiɛ yɛ amɛhe nɔ. Aaafee nɔ ni fe otsi dani nibii ahiɛkpatamɔ lɛ aaaba lɛ, akɛ ŋaawoo ha koni ashi akutso lɛ mli. Beni eshwɛ gbi kome pɛ ni lasu gɔŋ lɛ aaafɛ́ lɛ, polisifoi lɛ kɛɛ adafitswaa nitsumɔhe lɛ mli bii akɛ amɛkaya he ni atsɔɔ akɛ mɛi akaya jɛmɛ lɛ. Ni kɛlɛ, nakai shwane ni ehiii kwraa lɛ, mɛi 43 gboi yɛ he ni oshara lɛ yɔɔ lɛ.

Mɛni hewɔ mɛi babaoo nɛkɛ kɛ amɛhe yawo oshara mli yɛ jɛmɛ loo amɛkã he amɛhi jɛmɛ lolo lɛ? Okwaafoi komɛi ni amɛshi amɛshiai lɛ ku amɛsɛɛ amɛtee koni amɛyakwɛ bɔ ni amɛ nibii kɛ amɛshikpɔji lɛ yɔɔ. Lasu gɔŋ he nikaselɔi etɛ bɔ mɔdɛŋ koni amɛbɛŋkɛ lasu gɔŋ lɛ bɔ ni amɛaanyɛ ní amɛná nɔ ni amɛkaseɔ lɛ he nilee babaoo. Adafitswalɔi kɛ mfonirishalɔi komɛi ka akɛ amɛaateke husu ni afo lɛ, ejaakɛ amɛmiisumɔ ni amɛna bɔ ni lasu gɔŋ lɛ fɛ́mɔ yɔɔ ha jogbaŋŋ diɛŋtsɛ. Taksi draivafoi etɛ ni adafitswaa nitsulɔi lɛ hai amɛ lɛ ba jɛmɛ. No mli lɛ polisifoi kɛ la gbelɔi ni etu amɛhe eha eba nitsumɔ yɛ jɛmɛ. Amɛteŋ mɔ fɛɛ mɔ yɛ lɛ diɛŋtsɛ eyiŋtoo hewɔ ni eyaa he ni oshara lɛ yɔɔ lɛ—ni nɔ ni jɛ mli ba ji akɛ amɛgboi.

Ani Oyɛ He ko ni Yɔɔ Oshara?

Ekolɛ wɔ fɛɛ wɔhiŋ lasu gɔŋ ni baafɛ́ masɛi. Ni kɛlɛ, kɛ́ wɔkɛ jeŋ muu fɛɛ hiɛkpatamɔ ko miikpe, ní kɛ wɔ fɛɛ miiwo oshara ko ni baa je lɛ fɛɛ nɔ lɛ mli hu? Wolo ko ni anyɛɔ akɛ he fɔ̃ɔ nɔ, ni gbalɛ mli saji yɔɔ mli lɛ bɔɔ wɔ jeŋ muu fɛɛ hiɛkpatamɔ ko ni baa lɛ he kɔkɔ, ni ewieɔ he yɛ nɛkɛ gbɛ nɔ akɛ: “Hulu aaawo duŋ, ni nyɔɔŋtsere kpɛŋ dɔŋŋ, ni ŋulamii aaatserɛ kɛaajɛ ŋwɛi atswia shi, ni ŋwɛi hewalɛi lɛ aaahoso. . . . Shikpɔŋ lɛ  nɔ akutsei lɛ fɛɛ aaawo yara.” (Mateo 24:29, 30) Atsɔɔ bɔ ni nibii ni baaya nɔ yɛ ŋwɛi aha yɛ jeŋ fɛɛ yɛ biɛ akɛ ebaasa “shikpɔŋ lɛ nɔ akutsei lɛ fɛɛ” he. Yɛ gbɛ kroko nɔ lɛ, nɛkɛ gbalɛ nɛɛ gbaa hiɛkpatamɔ ko ni baasa wɔteŋ mɔ fɛɛ mɔ he.

Wolo kɛ emli gbalɛ ni akɛ he fɔ̃ɔ nɔ nɛɛ ji Biblia lɛ. Miishɛɛ sane ji akɛ, ŋmalɛ ni atsɔɔ yɛ yiteŋgbɛ lɛ shishinumɔ lɛ kɛ nibii ni kɛ jeŋ fɛɛ hiɛkpatamɔ baaba lɛ mlitsɔɔmɔ fitsofitso haa.

Taakɛ lasu gɔŋ mli nu ni efũ kɛtee ŋwɛi kɛ nibii krokomɛi ni tsɔɔ akɛ lasu gɔŋ baaba lɛ ha Shimabara maŋtiase lɛ mli onukpai lɛ ná nɔ ni amɛaadamɔ nɔ amɛkadi he ko ni oshara yɔɔ lɛ, nakai nɔŋŋ Biblia lɛ haa wɔleɔ nɔ hewɔ ni wɔɔha wɔhiɛ ahi wɔhe nɔ ni wɔsaa wɔhe kɛha yibaamɔ. Wɔbaanyɛ wɔkase nɔ ko kɛjɛ oshara ni ba Mount Fugen lɛ mli ni wɔyɔse bɔ ni nɔ ni kã wɔhiɛ lɛ mli wa ha.

 [He ni Mfoniri ni yɔɔ baafa 2 lɛ Jɛ]

COVER: Yomiuri/Orion Press/Sipa Press

[He ni Mfoniri ni yɔɔ baafa 3 lɛ Jɛ]

Yomiuri/Orion Press/Sipa Press