Gbɔmɛi Tɛkɛbii, Shi Amɛyɛ Mlihilɛ Tsuii

TE SHIHILƐ lɛ baatamɔ aha tɛŋŋ kɛji okɛ gbɔi aaagba Nyɔŋmɔ Maŋtsɛyeli lɛ he sane beni okɛlɛ pɛ ji waotalɔi 30 lɛ? Laura baanyɛ akɛɛ bo. Beni eye afii 33 lɛ, no mli lɛ nakai ji bɔ ni ekɛlɛ ji, waotalɔi 30 pɛ. Ekɛ enyɛmi yoo, María, ni eye afii 24, ni ekɛlɛ ji waotalɔi 34 lɛ, hi Quito, yɛ Ecuador. Ha amɛtsɔɔ gbɛtsii nii ni amɛkɛkpeɔ yɛ amɛ Kristofoi asɔɔmɔ nitsumɔ lɛ mli lɛ mli.

“Kɛ́ wɔmiiya wɔshiɛmɔ shikpɔŋkuku lɛ mli kɛ Kristofoi akpeei lɛ, wɔnyiɛɔ aaafee kilomita fã kɛyafoɔ bɔs. Wɔtsáa nɔ wɔnyiɛɔ kilomita fã kroko kɛjɛɔ he ni bɔs lɛ yayiɔ wɔ shi yɛ lɛ kɛyafoɔ bɔs ni ji enyɔ. Mɔbɔ sane ji akɛ, gbeei enumɔ ni hiɛ yɔɔ la waa yɛ gbɛ nɛɛ nɔ. Wɔsheɔ gbeei gbeyei waa ejaakɛ wɔnyɛɔ wɔnaa amɛ agboi tamɔ okpɔŋɔi. Bɔni afee ni wɔshwie amɛ, kɛ́ eeehi lɛ, wɔhiɛɔ tso, ni wɔkɛtoɔ he ko dani wɔyakwɔɔ bɔs lɛ bɔni afee ni kɛ wɔmiiya shia lɛ, wɔnine ashɛ nɔ.

“Bɔs lɛ kwɔɔ ji nifeemɔ ni wa diɛŋtsɛ kɛha wɔ. Wɔdamɔɔ ŋmeŋme ko nɔ yɛ he ni bɔs lɛ baawa yɛ lɛ bɔni afee ni wɔnyɛ wɔkwɔ ni ekatɔ wɔ. Tsɔne kudɔlɔi komɛi tsiɔ kɛbaa ŋmeŋme lɛ he, shi ekomɛi efeee nakai. Kɛ eba lɛ nɛkɛ lɛ, wɔteŋ mɔ ni kɛ lɛ yeɔ ebuaa mɔ ni kɛɛɛ lɛ ni ekwɔɔ. Bɔs ni ji enyɔ lɛ kwɔɔ biɔ ní wɔfo gbɛ wulu ko mli—eji mɔdɛŋbɔɔ diɛŋtsɛ kɛha wɔnaji tɛkɛbii lɛ. Yɛ bɔ ni wɔyɔɔ tɛkɛbii lɛ hewɔ lɛ, woji abaagi ni tsii lɛ kɛ kaa kroko baa. Bɔni afee ni baagi lɛ akatsii tsɔ lɛ, wɔhiɛɔ Biblia ni akɛwoɔ kotoku mli lɛ kɛ woji fioo pɛ wɔfataa he.

“Kɛjɛ wɔgbekɛbiiashi fɛɛ lɛ wɔyi enyɔ lɛ fɛɛ gbalaa wɔjwɛŋmɔ kɛbaa wɔhe nɔ waa diɛŋtsɛ. Wɔkutsoŋbii lɛ le akɛ, gbɔi ni wɔkɛaawie lɛ ji niiashikpamɔ ni woɔ wɔhe gbeyei waa be fɛɛ be. No hewɔ lɛ, amɛnaa kpɛɔ amɛhe kɛji amɛna akɛ wɔmiishi amɛshinaai lɛ, ni enáa amɛnɔ hewalɛ, ni bei pii lɛ amɛboɔ wɔ toi. Shi yɛ hei ni aleee wɔ tsɔ lɛ, bei pii lɛ, mɛi naa wɔ akɛ wɔyɛ tɛkɛbii tsɔ; no hewɔ lɛ, jeee be fɛɛ be amɛkɛ hiɛdɔɔ ni sa wɔshɛɛ sane lɛ boɔ wɔ toi. Shi kɛlɛ, Yehowa suɔmɔ ni wɔnuɔ he lɛ shɛjeɔ wɔmii ni ehaa wɔtsaa sanekpakpa jajemɔ nitsumɔ lɛ nɔ. Abɛi 3:5, 6 lɛ nɔ jwɛŋmɔ hu haa wɔnaa ekãa.”

Taakɛ Laura kɛ María etsɔɔ lɛ, hiɛ ni aaamia yɛ gbɔmɔtsoŋ gbɛtsii nii fɛɛ sɛɛ lɛ baanyɛ awo Nyɔŋmɔ hiɛ nyam. Bɔfo Paulo sɔle ni ajie ‘ŋmei ni yɔɔ eheloo lɛ mli,’ ni baanyɛ afee gbɔmɔtsoŋ piŋmɔ lɛ kɛya. Shi Nyɔŋmɔ kɛɛ lɛ akɛ: “Miduromɔ lɛ fá hao, ejaakɛ mihewalɛ lɛ, gbedeefeemɔ mli eyeɔ emuu yɛ.” Hɛɛ, ehe ehiaaa ni ajie gbɔmɔtsoŋ fatɔɔ ko kɛya dani wɔnyɛ wɔsɔmɔ Nyɔŋmɔ.  Hekɛnɔfɔɔ ni wɔɔná yɛ Nyɔŋmɔ mli kwraa lɛ baanyɛ aye abua koni wɔfee nɔ ni hi fe fɛɛ yɛ wɔshihilɛi amli. Akɛni Paulo bu ‘ŋmei ni yɔɔ eheloo lɛ mli’ nɛkɛ hewɔ lɛ, enyɛ ekɛɛ akɛ: “Kɛ mifee gbedee lɛ, no moŋ mináa hewalɛ.” (2 Korintobii 12:7, 9, 10) Afii komɛi asɛɛ lɛ, Paulo ŋma akɛ: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.”—Filipibii 4:13.

Yɛ ŋmɛnɛŋmɛnɛ beaŋ lɛ, Nyɔŋmɔ miitsu nitsumɔi wuji kɛmiitsɔ hii, yei, kɛ gbekɛbii ni etuu amɛhe amɛha lɛ kwraa lɛ anɔ. Amɛteŋ mɛi babaoo yɛ naatsii nii ko yɛ gbɛ ko nɔ. Eyɛ mli akɛ amɛ fɛɛ amɛmiikpa ŋwɛi tsamɔ gbɛ yɛ Nyɔŋmɔ Maŋtsɛyeli lɛ shishi moŋ, shi amɛmɛɛɛ kɛyashi beni Nyɔŋmɔ baajie amɛ kɛjɛ amɛnaagbai lɛ amli dani amɛbɔ mɔdɛŋ ni amɛfee nɔ ko yɛ esɔɔmɔ mli.

Ani oona nɔ yɛ gbɔmɔtsoŋ gbɔjɔmɔ ko mli? Ná tsui! Kɛtsɔ ohemɔkɛyeli lɛ nɔ lɛ, obaanyɛ ofata mɛi tamɔ Paulo, Laura, kɛ María he. Abaanyɛ akɛɛ yɛ amɛhe taakɛ eji yɛ hii kɛ yei anɔkwafoi ni hi shi yɛ blema beaŋ lɛ agbɛfaŋ lɛ akɛ: “Amɛná hewalɛ kɛjɛ gbedemɔ mli.”—Hebribii 11:34.

[Mfoniri ni yɔɔ baafa 8]

María

Laura

[Mfoniri ni yɔɔ baafa 9]

María miiye eebua Laura koni ekwɔ bɔs lɛ

[Mfonirii ni yɔɔ baafa 9]

“Wɔsheɔ gbeei gbeyei waa ejaakɛ wɔnyɛɔ wɔnaa amɛ agboi tamɔ okpɔŋɔi”

Shishigbɛ: Laura kɛ María kɛ mɛi ni kɛ amɛ kaseɔ Biblia lɛ