Kaaya He ni Oshara lɛ Yɔɔ Lɛ!

MƐI ni ekase lasu gɔŋ he nii jogbaŋŋ lɛ anitsumɔ ji ni amɛŋmala nɔ ni amɛna lɛ he saji ni amɛpɛi odaseyeli ni tsɔɔ nii ni baaba lɛ mli koni sɛɛ mli lɛ amɛbɔ lasu gɔŋ ni baafɛ́ lɛ he kɔkɔ. (Beni Mount Fugen fɛ́ nɔŋŋ pɛ lɛ, ehe bahia ni polisifoi lɛ aha gbɔmɛi ashi he ni oshara lɛ eba yɛ lɛ.) Nakai nɔŋŋ Biblia kaselɔi naa “je nɛŋ naagbee lɛ” he okadi lɛ ni amɛbɔɔ mɛi krokomɛi oshara ni baa lɛ he kɔkɔ.—Mateo 24:3.

Wɔbaanyɛ wɔkane bɔ ni awie nibii ni baaba nɛɛ he sane kɛ bɔ ni ebaaje shishi eha yɛ Biblia lɛ mli yitso ni bɔɔ jeŋ muu fɛɛ hiɛkpatamɔ ni baa lɛ he kɔkɔ lɛ nɔŋŋ mli akɛ: “Maŋtsɛyeli aaate shi awo maŋtsɛyeli; ni hɔ̃ji kɛ tsɛŋemɔ-helai kɛ shikpɔŋhosomɔi aaaba hei srɔtoi fɛɛ. . . . Amale gbalɔi pii aaate shi, ni amɛaalaka mɛi pii. Ni nɔ ni mlakwamɔ baafá hewɔ lɛ, mɛi pii asuɔmɔ lɛ he aaajɔ. . . . Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:7-14.

Ehe ehiaaa ni wɔtsɔmɔ adafitswaa saji amlipɛilɔi dani wɔyoo gbalɛ nɛɛ ni baa mli ŋmɛnɛŋmɛnɛ lɛ sɛɛ. Titri lɛ, kɛjɛ afi 1914 lɛ, wɔná emlibaa mli niiashikpamɔ. Awuu jeŋ tai enyɔ, maŋ tai babaoo, ta ni awuɔ yɛ hei srɔtoi, kɛ hewolonɔ su kɛ jamɔŋ tai yɛ afii oha nɛɛ mli. Hɔmɔ eye adesai yɛ tai ni tamɔ enɛɛmɛi ahewɔ, ni ohia ni adebɔɔ mli osharai kɛbaa lɛ kɛ eko efata he. Shikpɔŋhosomɔi egbe gbɔmɛi babaoo diɛŋtsɛ. Jamɔi kɛ amɛmli hiɛnyiɛlɔi ni yiŋkɔshikɔshifeemɔ yɔɔ amɛhe kɛ amɛ sɛɛnyiɛlɔi ni feɔ ekãa waa lɛ ebahe shi. ‘Mlakwamɔ ni fáa lɛ’ haaa mɛi ajie suɔmɔ kpo amɛtsɔɔ, ni naanyobɔɔ jeee shishitoo mla ni akɛtsuɔ nii dɔŋŋ.

Eyɛ faŋŋ akɛ, aatsu jeŋ muu fɛɛ shiɛmɔ nitsumɔ ni ji okadi lɛ fã kroko hu lɛ he nii. Bó lɛ kwɛmɔ wolo tɛtrɛɛ nɛɛ hiɛgbɛ, ni obaana akɛ wiemɔi ni ji “Eetswa Yehowa Maŋtsɛyeli He Adafi” lɛ fata saneyitso lɛ he. Buu-Mɔɔ ni akalaa yɛ wiemɔi 132 mli ni ajaa nɔ ni fá fe akpekpei 22 lɛ ji dɛŋdade wulu ko kɛha mɛi ni jajeɔ “maŋtsɛyeli lɛ he sanekpakpa nɛɛ” yɛ shikpɔŋ lɛ nɔ fɛɛ.  Nɔ ni fata nakai sanekpakpa lɛ he ji shɛɛ sane ni tsɔɔ akɛ, jeŋ muu fɛɛ Bɔlɔ ni ji Yehowa Nyɔŋmɔ eto ŋwɛi Maŋtsɛyeli ni baakpata nibii agbɛjianɔtoo fɔŋ lɛ hiɛ ni ekɛ paradeiso shikpɔŋ aba lɛ shishi. Lɛɛlɛŋ, okadi ni tsɔɔ akɛ etsɛŋ ni Nyɔŋmɔ baafee nii lɛ sa kadimɔ amrɔ nɛɛ, ní tsɔɔ akɛ gbɔmɛi ni yɔɔ nibii agbɛjianɔtoo nɛɛ mli lɛ awala yɛ oshara mli.—Okɛto 2 Timoteo 3:1-5; 2 Petro 3:3, 4; Kpojiemɔ 6:1-8 he.

Yehowa Gbi ni He Yɔɔ Gbeyei Lɛ

Mɛni baaba kɛ́ be shɛ ni Yehowa kɛ kojomɔ baaba lɛ? Bó bɔ ni lɛ diɛŋtsɛ etsɔɔ nɔ ni baaba yɛ nakai beaŋ lɛ toi: “Maha ana naakpɛɛ nii yɛ ŋwɛi kɛ shikpɔŋ lɛ nɔ: lá kɛ la kɛ lasũ kutuu. Hulu aaatsɔ̃ duŋ, ni nyɔɔŋtsere aaatsɔ̃ lá, dani Yehowa gbi wulu ni he yɔɔ gbeyei lɛ aaaba.”—Yoel 3:3, 4.

Nakai gbi lɛ, nɔ ko ni yɔɔ gbeyei ni fiteɔ nii babaoo fe lasu gɔŋ fɛɛ lasu gɔŋ loo shikpɔŋhosomɔ ni fɛ́ɔ lɛ baaba. Gbalɔ Zefania kɛɛ: “Yehowa gbi wulu lɛ ebɛŋkɛ, ebɛŋkɛ, ni eeye oyai naakpa. . . . Shi ewuŋayeli la lɛ aaashã shikpɔŋ muu lɛ fɛɛ; ejaakɛ ekɛ pleneemɔ ni baa trukaa aaaplenee shikpɔŋ lɛ nɔ bii lɛ fɛɛ.” Eyɛ mli akɛ “amɛjwiɛtɛi kɛ amɛshika fɛɛ nyɛŋ amɛ ajie yɛ Yehowa mlifu gbi lɛ nɔ” moŋ, shi gbɛ ko yɛ ni abaanyɛ atsɔ nɔ aje nakai gbi ni he yɔɔ gbeyei lɛ mli.—Zefania 1:14-18.

Zefania tsɔɔ bɔ ni ebaa lɛ ehaa lɛ akɛ: “Dani Yehowa mlifu ni naa wa lɛ aba nyɛnɔ, dani Yehowa mlifu gbi lɛ aba nyɛnɔ! Nyɛtaoa Yehowa sɛɛgbɛ, nyɛ shikpɔŋ lɛ nɔ heshibalɔi fɛɛ . . . Nyɛtaoa jalɛ sɛɛgbɛ, nyɛtaoa heshibaa sɛɛgbɛ: ekolɛ aaaŋɔ nyɛ atee yɛ Yehowa mlifu gbi lɛ nɔ!” (Zefania 2:2, 3) Wɔbaanyɛ wɔtao abobaahe kɛtsɔ ni ‘wɔɔtao Yehowa sɛɛgbɛ, wɔɔtao jalɛ sɛɛgbɛ, wɔɔtao heshibaa sɛɛgbɛ’ lɛ nɔ. Namɛi taoɔ Yehowa sɛɛgbɛ ŋmɛnɛ?

Ŋwanejee ko bɛ he akɛ okɛ wiemɔ “Yehowa” lɛ toɔ Yehowa Odasefoi ahe yɛ amɛshiɛmɔ nitsumɔ lɛ hewɔ. Ekolɛ onine shɛ wolo tɛtrɛɛ nɛɛ nɔ kɛjɛ amɛteŋ mɔ kome dɛŋ. Ale amɛ akɛ maŋbii ni baa amɛjeŋ ojogbaŋŋ. Amɛbɔɔ mɔdɛŋ koni amɛwo “gbɔmɔ hee” ní heshibaa ni aaaná lɛ fata he lɛ. (Kolosebii 3:8-10) Amɛkpɛlɛɔ nɔ akɛ, enɛ jɛɔ Yehowa gbɛjianɔtoo ni anaa ni tsɔɔ mɔ nii, ni feɔ Yehowa Odasefoi asafoi ni yɔɔ jeŋ fɛɛ lɛ. Hɛɛ, obaanyɛ okɛ ‘nyɛmimɛi lɛ fɛɛ’ ayaba abo yɛ Yehowa Odasefoi ni yɔɔ jeŋ fɛɛ lɛ ateŋ.—1 Petro 5:9.

Yaaba Abo Bianɛ

Kɛ wɔbaayaba abo kɛtsɔ Yehowa sɛɛgbɛ ni wɔɔtao lɛ nɔ lɛ, no lɛ esa akɛ wɔfee enanemɛi. Mɛni no tsɔɔ? Biblia lɛ haa hetoo akɛ: “Nyɛleee akɛ je nɛɛ hedɔɔ lɛ Nyɔŋmɔ nyɛ̃ɛ ni lo? No hewɔ lɛ mɔ fɛɛ mɔ ni sumɔɔ akɛ etsɔ je nɛɛ hedɔlɔ lɛ etsɔ Nyɔŋmɔ henyɛlɔ.” (Yakobo 4:4) Kɛ wɔɔfee Nyɔŋmɔ nanemɛi lɛ, esa akɛ wɔtsi wɔhe kɛjɛ naanyobɔɔ fɛɛ ni wɔkɛ ŋmɛnɛŋmɛnɛ jeŋ fɔŋ nɛɛ ni atuatsemɔ nifeemɔ ni akɛshiɔ Nyɔŋmɔ lɛ kadiɔ lɛ lɛ he.

Biblia lɛ woɔ wɔ ŋaa akɛ: “Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ tsɛ lɛ suɔmɔ lɛ bɛ emli; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ tsɛ lɛ mli, shi moŋ je lɛ mli ejɛ; ni je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:15-17) Nɔ ni tsirɛɔ mɛi babaoo ji heloonaa akɔnɔi—bɔlɛnamɔ mli akɔnɔ fɔŋ ni anyɛɛɛ akudɔ, shika suɔmɔ ni naa wa, kɛ hewalɛ ni akɛtsuɔ nii yɛ gbɛ fɔŋ nɔ. Shi esa akɛ mɔ aye akɔnɔi ni tamɔ nɛkɛ nɔ dani ehi Yehowa gbɛfaŋ.—Kolosebii 3:5-8.

Ekolɛ okaneɔ wolo tɛtrɛɛ nɛɛ bei komɛi, ni ekolɛ okɛ bɔ ni ekɛ Biblia mli gbalɛi tsuɔ nii haa lɛ kpãa gbee. Ni kɛlɛ, ekolɛ obaashashao shi akɛ oooya ohiɛ ni okɛ Yehowa Odasefoi abɔ. Shi kɛlɛ, kɛ́ wɔkɛ oshara ko kpe lɛ, ani efá kɛkɛ akɛ wɔɔnu ni akɛ kɔkɔbɔɔ lɛ miiha? Taakɛ wɔbaanyɛ wɔna kɛjɛ Mount Fugen fɛ́mɔ lɛ mli lɛ, ehe miihia ni wɔtsu kɔkɔbɔɔ lɛ he nii. Kaimɔ akɛ, kɛ hoo lɛ, saji ahe adafitswalɔi 15 kɛ mfonirishalɔi ni amɛyiŋtoo ji koni amɛná nɔ ni yaa nɔ lɛ he nilee ojogbaŋŋ lɛ gboi. Yɛ anɔkwale mli lɛ, mfonirishalɔ ko gbo yɛ be mli ni ewao yɔɔ nɔ ni haa hulu kpɛmɔ boteɔ ekamera lɛ mli lɛ nɔ lɛ. Mɔ ni  ekase lasu gɔŋ he nii jogbaŋŋ—ní kɛɛ akɛ, “Kɛ́ ehe baahia ni magbo gbi ko lɛ, no lɛ masumɔ ni enɛ aba yɛ lasu gɔŋ ko masɛi” lɛ—gbo taakɛ esumɔɔ ni eba lɛ eha lɛ pɛpɛɛpɛ. Amɛ fɛɛ amɛtuu amɛhe kwraa amɛha amɛnitsumɔ lɛ kɛ otii ni amɛkɛmamɔ amɛhiɛ lɛ. Ni kɛlɛ, amɛkɛ amɛwala tsé—gbele ni jɛ hiɛ ni akuɔ ashwieɔ kɔkɔbɔɔ lɛ nɔ lɛ mli kɛbaa.

Ŋmɛnɛ, gbɔmɛi pii nuɔ shɛɛ sane ni tsɔɔ akɛ Nyɔŋmɔ ekpɛ eyiŋ akɛ ebaakpata nibii agbɛjianɔtoo fɔŋ nɛɛ hiɛ lɛ ni amɛyɔseɔ bɔ ni kɔkɔbɔɔ lɛ ja ha lɛ kɛyashiɔ he ko. Ekolɛ amɛbaasusu akɛ: ‘Ebaanyɛ eba kɛ̃, shi jeee ŋmɛnɛ.’ Amɛtsiɔ Yehowa gbi lɛ amɛtoɔ sɛɛ bɔ ni amɛsumɔɔ ní haaa amɛnyɛ amɛjie amɛjwɛŋmɔ kɛjɛ nɔ ni tamɔ nɔ ko ni he hiaa yɛ amɛhiɛ bianɛ lɛ nɔ.

Baruk yɛ naagba ni tamɔ nakai. Akɛni Baruk ji blematsɛ gbalɔ Yeremia woloŋmalɔ hewɔ lɛ, ekɛ ekãa bɔ Israelbii lɛ kɔkɔ yɛ Yerusalem hiɛkpatamɔ ni baa lɛ he. Ni kɛlɛ, nitsumɔ ni etsuɔ lɛ je etsine be ko. Kɛkɛ ni Yehowa jaje lɛ akɛ: “Ni bo lɛ nii wuji otaoɔ oha ohe? Kaatao!” Kɛ́ eji nínamɔ, gbɛihemɔ, loo heloonaa nibii lɛ, esaaa akɛ Baruk ‘taoɔ nii wuji ehaa ehe.’ Esa akɛ ená nɔ̃ kome he miishɛɛ, ni no ji ni efee Nyɔŋmɔ suɔmɔnaa nii ni eye ebua mɛi koni amɛkɔ shidaamɔ yɛ E-gbɛfaŋ. Nɔ ni baajɛ mli aba ji akɛ, enine baashɛ ‘esusuma nɔ akɛ haanɔ̃.’ (Yeremia 45:1-5) Kɛ wɔkɛaato he lɛ, yɛ nɔ najiaŋ ni ‘wɔɔtao nii wuji wɔha wɔhe’ lɛ, esa akɛ wɔtao Yehowa, ni enɛ feemɔ baanyɛ eha wɔhere wɔ diɛŋtsɛ wɔyiwala.

Polisifoi ni fá fe nyɔŋma kɛ enyɔ kɛ lagbelɔi ni etu amɛhe amɛha eba nitsumɔ yɛ Mount Fugen, beni lasu gɔŋ ni edɔ waa tsɔ̃ fe nine lɛ fɛ́ kɛnina amɛ lɛ. No mli lɛ amɛmiibɔ mɔdɛŋ ni amɛye amɛbua mɛi ni ebote oshara mli lɛ ní amɛbu amɛhe. Etamɔ nɔ ni amɛji hii kɛ yei ni hiɛ jwɛŋmɔ ni ja ni miitsu nii koni amɛha nibii ni yaa nɔ yɛ je nɛŋ lɛ ahi. Eyɛ mli akɛ ekolɛ amɛhiɛ jwɛŋmɔ ni ja jogbaŋŋ moŋ, shi “nɔ ni ekɔ̃dɔ̃ lɛ, anyɛɛɛ ajaje.” (Jajelɔ 1:15) Anyɛŋ ajaje nibii agbɛjianɔtoo ni ekɔ̃dɔ̃ lɛ. Ani nilee yɛ mli akɛ mɔ aaafee ehe “je nɛɛ hedɔlɔ” kɛtsɔ ni eeebɔ mɔdɛŋ ni ejie jeŋ muu fɛɛ gbɛjianɔtoo ni Nyɔŋmɔ etswa efai shi akɛ ebaajie kɛya lɛ kɛjɛ oshara mli?

Akɛni Ojo Oshara lɛ Naa Foi Hewɔ lɛ, Kaaya Jɛmɛ

Eji nɔ kome akɛ aaajo gbɛjianɔtoo ko ni oshara yɔɔ he lɛ naa foi, shi eji nɔ kroko hu kwraa akɛ aaahi ‘nyɛmimɛi lɛ fɛɛ’ hebuu shishi. (1 Petro 2:17) Nyɛkahaa wɔhiɛ kpaa okwaafoi ni beni ajie amɛ kɛjɛ he ni oshara lɛ yɔɔ lɛ sɛɛ lɛ, amɛku amɛ sɛɛ amɛtee koni amɛyakwɛ bɔ ni amɛshikpɔji ni bɛŋkɛ Mount Fugen lɛ yɔɔ ha lɛ anɔ. Ekolɛ, amɛmiishwe waa koni amɛku amɛ sɛɛ kɛya “daa gbi” shihilɛ ni amɛyɔɔ mli tsutsu ko lɛ mli. Shi obaana akɛ nilee bɛ yiŋ ni amɛkpɛ akɛ amɛbaaku amɛ sɛɛ kɛya jɛmɛ lɛ mli. Ekolɛ jeee enɛ ji klɛŋklɛŋ be ni amɛka akɛ amɛaaya he ni oshara lɛ yɔɔ lɛ. Ekolɛ amɛbote he ni oshara lɛ yɔɔ lɛ fioo ni nɔ ko kwraa baaa. Ekolɛ, amɛhi jɛmɛ be fioo ko yɛ be kroko mli ní nɔ ko kwraa baaa lolo. Ekolɛ, etsɛɛɛ ni amɛbafee mɛi ni yaa he ni oshara lɛ yɔɔ lɛ nɔtonɔto ni amɛná ekãa akɛ amɛaashashao shi kɛnyiɛ he ni oshara lɛ eba lɛ.

Yesu Kristo wie shihilɛ ni tamɔ nakai ni baaba yɛ “je nɛŋ naagbee” lɛ he. Ekɛɛ: “Bɔ ni yɔɔ yɛ gbii ni nyiɛ nu afua lɛ hiɛ lɛ amli, ni mɛi lɛ hiɛ niyeli kɛ ninumɔ kɛ yoowɛɛ kɛ gbalahamɔ mli aahu kɛyashi gbi ni Noa yabote adeka lɛ mli, ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee lɛ, nakai nɔŋŋ gbɔmɔ bi lɛ baa lɛ aaatamɔ.”—Mateo 24:3, 38, 39.

Kadimɔ akɛ Yesu tsĩ niyeli, ninumɔ, kɛ gbalashihilɛ mlibotemɔ tã. Nakai nibii lɛ eko diɛŋtsɛ kwraa jeee tɔ̃mɔ yɛ Yehowa hiɛ. Belɛ mɛni ji tɔ̃mɔ lɛ mɔ? Gbɔmɛi ni yɔɔ yɛ Noa gbii lɛ amli lɛ ‘ahiɛ bɛ amɛhe nɔ,’ ni amɛkɛ amɛhe wo shihilɛ ni kɔɔ amɛ daa gbi shihilɛ he lɛ mli. Kɛ oshara ba lɛ, anyɛŋ akɛ bɔ ni ahiɔ shi “daa gbi” lɛ atsu nii. Kɛ oná oshi ŋmɛnɛŋmɛnɛ jeŋ ni hiɛ ekpata lɛ, aloo otsi ohe kɛjɛ he lɛ, esa akɛ owu oshi nɔ fɛɛ nɔ ni baakanya bo koni okɛ nɔ fɛɛ nɔ ni obaanyɛ oná kɛjɛ mli lɛ atsu nii lɛ. (1 Korintobii 7:31) Ekolɛ obaanyɛ oshi ni oyashara  shi yɛ he ni bɛ shweshweeshwe yɛ mumɔŋ gbɛfaŋ lɛ ni oku osɛɛ oba ni nɔ ko kwraa yeko bo awui ni mɔ ko hu yɔseee po. Shi kɛlɛ, ekolɛ no baaha ofee ekãa koni eha oku osɛɛ oya je lɛ mli ekoŋŋ, ní okɛ shishashaomɔ ashara shi yɛ jɛmɛ koni otsɛ fioo. Etsɛɛɛ nɔŋŋ ni obaanyɛ osusu akɛ: “Naagbee lɛ baŋ ŋmɛnɛ.”

Agbɛnɛ, susumɔ taksi draivafoi etɛ ni amɛwala ŋmɛɛ amɛ beni amɛmɛɔ saji ahe adafitswalɔi kɛ mfonirishalɔi lɛ beni lasu gɔŋ lɛ mli nii tsɔ̃ɔ kɛshwieɔ gɔŋ lɛ shishigbɛ lɛ he okwɛ. Ekolɛ ŋmɛnɛ, mɛi komɛi baafata mɛi krokomɛi ni kaa akɛ amɛaaku amɛ sɛɛ kɛaaya je lɛ mli lɛ ahe. Bɔ fɛɛ bɔ ni yiŋtoo lɛ ji fɛɛ sɛɛ lɛ, eyɛ faŋŋ akɛ esaaa akɛ lakamɔ ni aaalaka mɔ koni eku esɛɛ kɛya he ni oshara lɛ yɔɔ lɛ haa mɔ lɛ kɛ ehe yawoɔ oshara lɛ mli.

Mɛi ni Mount Fugen fɛ́mɔ lɛ sa amɛhe lɛ fɛɛ shi he ni yɔɔ shweshweeshwe lɛ kɛtee he ni oshara lɛ yɔɔ lɛ. Eyɛ mli akɛ amɛkpa gbɛ akɛ gɔŋ lɛ baafɛ́ gbi ko moŋ, shi amɛteŋ mɔ ko kwraa susuuu akɛ ebaaba yɛ nakai gbi lɛ nɔ. Akɛni mɛi babaoo naa nibii agbɛjianɔtoo lɛ naagbee lɛ he okadi hewɔ lɛ, amɛkpaa gbɛ akɛ Yehowa gbi lɛ baaba be ko shi ekolɛ ebaŋ mra. Mɛi komɛi susuɔ po akɛ gbi lɛ nyɛŋ afee “ŋmɛnɛ” kwraa. Eka shi faŋŋ akɛ subaŋ ni tamɔ nɛkɛ lɛ yɛ oshara.

Bɔfo Petro bɔ kɔkɔ akɛ: “[Yehowa, NW] gbi lɛ baaba tamɔ julɔ baa.” Ehe miihia ni wɔhiɛ ahi wɔhe nɔ, ‘ni wɔkwɛ Yehowa gbi lɛ baa lɛ gbɛ ni wɔjwɛŋmɔ ahi nɔ,’ ni ‘wɔbɔ mɔdɛŋ, koni ana wɔ ní muji loo kpa ko bɛ wɔhe yɛ ehiɛ, yɛ hejɔlɛ mli.’ (2 Petro 3:10-14) Kɛ akpata ŋmɛnɛŋmɛnɛ nibii agbɛjianɔtoo lɛ hiɛ lɛ, paradeiso shikpɔŋ ni yɔɔ Nyɔŋmɔ Maŋtsɛyeli lɛ shishi lɛ yɛ. Ekaba kɔkɔɔkɔ akɛ aaaka wɔ kɛbote he ni oshara lɛ yɔɔ lɛ yɛ yiŋtoo fɛɛ yiŋtoo ni baanyɛ aba wɔjwɛŋmɔ mli lɛ hewɔ, ejaakɛ gbi ni wɔɔshi kɛku sɛɛ kɛya je lɛ mli ekoŋŋ lɛ baanyɛ afee Yehowa gbi lɛ.

Okɛ Yehowa webii lɛ ayaba abo ni okɛ amɛ ahi shi.

[Mfonirii ni yɔɔ baafa 7]

Okɛ Yehowa webii lɛ ayaba abo ni okɛ amɛ ahi shi

[He ni Mfoniri ni yɔɔ baafa 4 lɛ Jɛ]

Iwasa/Sipa Press