Hewalɛ ni Sɔlemɔ Yɔɔ

Hulu lɛ miinyɔ shi yɛ Nahor maŋtiase lɛ yɛ Boka Teŋgbɛ. Siria nuu ko ni atsɛɔ lɛ Eliezer kɛ yomai nyɔŋma ni eto sɛrɛnɛɛ bashɛ nubu ko he yɛ maŋtiase lɛ sɛɛ. Eyɛ mli akɛ etɔ Eliezer ni kumai miiye lɛ moŋ, shi eesusu mɛi krokomɛi ahiamɔ nii ahe waa. Ejɛ maŋsɛɛ eba koni ebatao ŋa eha enuntsɔ lɛ binuu. Kɛfata he lɛ, esa akɛ etao ŋa nɛɛ yɛ enuntsɔ lɛ wekumɛi ateŋ. Te ebaafee tɛŋŋ etsu nitsumɔ ni wa nɛɛ he nii?

ELIEZER heɔ eyeɔ akɛ sɔlemɔ yɛ hewalɛ. Ekɛ hemɔkɛyeli ni sa kadimɔ, ní tamɔ gbekɛ nɔ̃ lɛ bi yɛ heshibaa mli akɛ: “Yehowa, minuntsɔ Abraham Nyɔŋmɔ! Miikpao fai ni oha mihe aba nii ŋmɛnɛ gbi nɛɛ, ni omli ahi yɛ minuntsɔ Abraham nɔ. Naa, midamɔ nubu nɛɛ he, ni maŋ lɛŋ bii abiyei lɛ miije kpo miiba nuyɛɛ: ni ha aba mli akɛ oblayoo mɔ ni makɛɛ lɛ akɛ: Miikpao fai, too ogbɛ́ lɛ kɛba shi, ní manu nu lɛ eko, ní eeekɛɛ akɛ: Nuu, ni maha oyomai lɛ hu eko amɛnu lɛ, ha lɛ nɔŋŋ etsɔ mɔ ni ojie oha otsulɔ Isak, ni no maŋɔle akɛ omli ehi yɛ minuntsɔ nɔ.”—1 Mose 24:12-14.

Hekɛnɔfɔɔ ni Eliezer yɔɔ yɛ hewalɛ ni sɔlemɔ yɔɔ lɛ mli lɛ efeee efolo. Naakpɛɛ sane ji akɛ, klɛŋklɛŋ yoo lɛ ni ba nubu lɛ he lɛ ji Abraham nyɛmi nuu nabi! Egbɛi ji Rebeka, ni eji oshijafonyo, ehe tse yɛ jeŋba gbɛfaŋ, ni ehe yɛ fɛo. Nɔ ni sa kadimɔ ji akɛ, jeee akɛ eha Eliezer nu kɛkɛ, shi ekɛ mlihilɛ ha yomai ni kumai yeɔ amɛ lɛ fɛɛ nu ni amɛnu. Sɛɛ mli beni akɛ weku lɛ egba sane lɛ, Rebeka jɛ suɔmɔ mli ekpɛlɛ koni ekɛ Eliezer aku sɛɛ kɛya maŋsɛɛ shɔŋŋ he ko koni eyatsɔ Abraham binuu Isak ŋa. Kwɛ bɔ ni aha Eliezer sɔlemɔ lɛ hetoo yɛ gbɛ ni sa kadimɔ ni yɔɔ faŋŋ nɔ ahã, yɛ be mli ni Nyɔŋmɔ kɛ ehe woɔ saji amli bei komɛi yɛ naakpɛɛ gbɛ nɔ lɛ!

Wɔbaanyɛ wɔkase babaoo kɛjɛ Eliezer sɔlemɔ lɛ mli. Etsɔɔ bɔ ni eyɔɔ hemɔkɛyeli, heshibaa kɛ mɛi krokomɛi ahiamɔ nii ahesusumɔ ni mli wa yɛ gbɛ ni pɛsɛmkunya bɛ mli nɔ. Eliezer sɔlemɔ lɛ hu tsɔɔ bɔ ni ebaa ehe shi ehaa gbɛ ni Yehowa tsɔɔ nɔ ekɛ adesai yeɔ ehaa. Ŋwanejee ko bɛ he akɛ, ele bɔ ni Nyɔŋmɔ sumɔɔ Abraham sane waa diɛŋtsɛ kɛ agbɛnɛ shiwoo ni E-kɛha akɛ abaajɔɔ adesai fɛɛ wɔsɛɛ kɛtsɔ Abraham nɔ lɛ. (1 Mose 12:3) No hewɔ lɛ, Eliezer je esɔlemɔ lɛ shishi kɛ wiemɔi ni ji: “Yehowa, minuntsɔ Abraham Nyɔŋmɔ!”

Yesu Kristo ji seshi kɛha Abraham ni baafee mɔ ni abaatsɔ enɔ ajɔɔ adesai fɛɛ ni feɔ toiboo lɛ. (1 Mose 22:18) Kɛ wɔmiisumɔ ni aha wɔsɔlemɔi ahetoo ŋmɛnɛ lɛ, ehe miihia ni wɔkɛ heshibaa ayɔse gbɛ ni Nyɔŋmɔ tsɔɔ nɔ ekɛ adesai yeɔ kɛtsɔɔ e-Bi lɛ nɔ lɛ. Yesu Kristo kɛɛ: “Kɛji nyɛhi mimli ni miwiemɔi lɛ hi nyɛmli lɛ, nyɛaakpa  nɔ fɛɛ nɔ ni nyɛtaoɔ he fai, ni aaafee aaaha nyɛ.”—Yohane 15:7.

Kristo sɛɛnyiɛlɔ ni na bɔ ni Yesu wiemɔi nɛɛ ji anɔkwale ha lɛ ji bɔfo Paulo. Eka shi faŋŋ akɛ hemɔkɛyeli ni eyɔɔ yɛ hewalɛ ni sɔlemɔ yɔɔ lɛ mli lɛ efeee efolo. Ewo nanemɛi Kristofoi hewalɛ ni amɛtsɔ sɔlemɔ nɔ amɛshɛ amɛjatsui fɛɛ amɛfɔ̃ Nyɔŋmɔ nɔ, ni ewie kɛ nɔmimaa akɛ: “Minyɛɔ nii fɛɛ mifeɔ yɛ mɔ ni wajeɔ mi . . . lɛ mli.” (Filipibii 4:6, 7, 13) Ani enɛ tsɔɔ akɛ abo sɔlemɔi fɛɛ ni Paulo kɛbi Nyɔŋmɔ nii lɛ toi? Nyɛhaa wɔkwɛa.

Ahaaa Nɔ Fɛɛ Nɔ ni Abiɔ lɛ Hetoo

Paulo na nɔ ni etsɔɔ mli akɛ eji ‘heloo mli ŋmei’ lɛ mli amanehulu yɛ esɔɔmɔ nitsumɔ ni pɛsɛmkunya bɛ mli lɛ mli. (2 Korintobii 12:7) Enɛ baanyɛ afee jwɛŋmɔŋ kɛ henumɔŋ piŋmɔ ni shitee-kɛ-wolɔi kɛ “amale nyɛmimɛi” kɛba lɛ. (2 Korintobii 11:26; Galatabii 2:4) Aloo ebaanyɛ efee piŋmɔ ni enáa yɛ hiŋmɛi hela ni ehiii tsamɔ lɛ hewɔ. (Galatabii 4:15) Bɔ fɛɛ bɔ ni sane lɛ ji lɛ, nɛkɛ ‘heloo mli ŋmei’ nɛɛ gbɔjɔɔ Paulo. Eŋma akɛ: “Mikpa Nuntsɔ lɛ fai shii etɛ sɔŋŋ, koni eje minɔ.” Shi kɛlɛ, atsuuu nɔ ni Paulo biɔ lɛ he nii ahaaa lɛ. Atsɔɔ mli aha Paulo akɛ, mumɔŋ sɛɛnamɔi ni enine eshɛ nɔ kɛjɛ Nyɔŋmɔ ŋɔɔ momo tamɔ hewalɛ ni ekɛŋmɛɔ etsui shi yɛ kaai amli lɛ kɛkɛ fá. Kɛfata he lɛ, Nyɔŋmɔ kɛɛ: “Mihewalɛ lɛ, gbedeefeemɔ mli eyeɔ emuu yɛ.”—2 Korintobii 12:8, 9.

Mɛni wɔkaseɔ kɛjɛɔ Eliezer kɛ Paulo nɔkwɛmɔnii lɛ amli? Lɛɛlɛŋ, Yehowa Nyɔŋmɔ boɔ mɛi ni kɛ heshibaa taoɔ akɛ amɛaasɔmɔ lɛ lɛ sɔlemɔi atoi. Shi enɛ etsɔɔɔ akɛ efeɔ nɔ ni amɛbiɔ lɛ lɛ ehaa amɛ be fɛɛ be ejaakɛ Nyɔŋmɔ susuɔ saji ahe kɛyaa shɔŋŋ. Ele nɔ ni hi fe fɛɛ kɛha wɔ fe bɔ ni wɔle. Nɔ ni fe fɛɛ lɛ, efeɔ enii yɛ eyiŋtoo ni atsɔɔ yɛ Biblia lɛ mli lɛ kɛ gbeekpamɔ naa be fɛɛ be.

Be Kɛha Mumɔŋ Tsamɔ

Nyɔŋmɔ wo shi akɛ ebaatsa adesai agbɔmɔtsoŋ, jwɛŋmɔŋ, kɛ henumɔŋ helai fɛɛ yɛ Afii Akpe Nɔyeli ni e-Bi lɛ kɛbaaye shikpɔŋ nɔ lɛ mli. (Kpojiemɔ 20:1-3; 21:3-5) Anɔkwa Kristofoi kɛ ekãa mɛɔ nɛkɛ wɔsɛɛ be ni awo shi yɛ he lɛ kɛ Nyɔŋmɔ hewalɛ lɛ mli hemɔkɛyeli kwraa akɛ ebaaha eba mli. Yɛ be mli ni amɛkpaaa gbɛ akɛ abaatsa amɛ yɛ naakpɛɛ gbɛ nɔ amrɔ nɛɛ lɛ, amɛsɔleɔ amɛhaa Nyɔŋmɔ koni eha amɛná miishɛɛ kɛ hewalɛ ni amɛkɛkpee kaai anaa. (Lala 55:23) Kɛ hela mɔ amɛ lɛ, ekolɛ amɛbaasɔle amɛha Nyɔŋmɔ kɛha gbɛtsɔɔmɔ koni amɛná tsofafeemɔ ni hi fe fɛɛ ni baahi bɔ ni amɛhewalɛ yɔɔ yɛ shika gbɛfaŋ.

Jamɔi komɛi woɔ helatsɛmɛi lɛ hewalɛ koni amɛsɔle ni amɛná tsamɔ bianɛ, ni amɛgbalaa jwɛŋmɔ kɛyaa naakpɛɛ tsamɔi ni Yesu kɛ ebɔfoi lɛ tsu he nii lɛ nɔ. Shi atsu naakpɛɛ tsamɔi nɛɛ ahe nii yɛ yiŋtoo pɔtɛɛ ko hewɔ. Amɛtsɔɔ akɛ Yesu Kristo ji anɔkwa Mesia lɛ koni amɛtsɔɔ hu akɛ Nyɔŋmɔ ejie mɔbɔnalɛ kɛjɛ Yuda maŋ lɛ nɔ kɛtee Kristofoi asafo ni aje shishi etsɛko lɛ nɔ. Yɛ no bei amli lɛ, naakpɛɛ nikeenii ahe bahia koni akɛha Kristofoi asafo ni ato shishi ehee lɛ hemɔkɛyeli mli awa. Kɛ wɔɔkɛɛ lɛ, beni asafo ni aje shishi etsɛko lɛ badamɔ enaji anaa lɛ, ní ebada lɛ, ‘afo’ naakpɛɛ nikeenii lɛ ‘sɛɛ.’—1 Korintobii 13:8, 11.

Yɛ be ni he hiaa nɛɛ mli lɛ, Yehowa Nyɔŋmɔ miikudɔ ejálɔi lɛ yɛ mumɔŋ tsamɔ nitsumɔ ni he hiaa babaoo lɛ mli. Yɛ be mli ni amɛyɔɔ be lolo lɛ, ehe miihia waa koni mɛi afee tsɛmɔ nɛɛ he nɔ ko, ni ji: “Nyɛtaoa Yehowa, be mli ní eeeha ana lɛ, nyɛtsɛ́a lɛ, be mli ní ebɛŋkɛ! Ha ní mɔ fɔŋ akwa egbɛ̀i lɛ, ni nɔ̃ sha feelɔ akwa ejwɛŋmɔi lɛ, ní eku esɛɛ kɛba Yehowa ŋɔɔ, ni emusuŋ aaatsɔ lɛ yɛ ehewɔ, kɛ wɔ-Nyɔŋmɔ lɛ ŋɔɔ, shi ekɛaafa lɛ aahu!”—Yesaia 55:6, 7. Aatsu eshafeelɔi ni etsake amɛtsui lɛ amumɔŋ tsamɔ nɛɛ he nii kɛtsɔ Nyɔŋmɔ Maŋtsɛyeli lɛ he sanekpakpa lɛ shiɛmɔ nɔ. (Mateo 24:14) Yɛ be mli ni Yehowa Nyɔŋmɔ woɔ esɔɔlɔi ahewalɛ koni amɛya nɔ amɛtsu yiwalaheremɔ nitsumɔ nɛɛ, eeye eebua gbɔmɛi akpekpei abɔ ni jɛ maji fɛɛ amli lɛ ni amɛtsake amɛtsui yɛ amɛhe eshai lɛ amli koni amɛbaná amɛ kɛ lɛ teŋ wekukpaa kpakpa dani gbɛjianɔtoo fɔŋ nɛɛ aba naagbee. Lɛɛlɛŋ, aaha mɛi fɛɛ ni kɛ anɔkwayeli sɔleɔ kɛha mumɔŋ tsamɔ ni tamɔ nɛkɛ kɛ mɛi fɛɛ ni sɔleɔ koni aye abua amɛ kɛtsu helatsamɔ nitsumɔ nɛɛ asɔlemɔi ahetoo.

[He ni Mfoniri ni yɔɔ baafa 3 lɛ Jɛ]

Eliezer kɛ Rebeka/The Doré Bible Illustrations/Dover Publications