Nyɔŋmɔ Haa Sɔlemɔi Ahetoo

Kornelio ji nuu ko ni tao Nyɔŋmɔ hiɛ duromɔ kɛtsɔ sɔlemɔi ni ejɛ etsuiŋ esɔle shii abɔ lɛ nɔ. Kɛfata he lɛ, ekɛ hegbɛ ni eyɔɔ akɛ asafoiatsɛ lɛ tsu nii jogbaŋŋ. Taakɛ Biblia lɛ tsɔɔ lɛ, “efeɔ” mɛi ni ehia amɛ lɛ “ejurɔ pii.”—Bɔfoi lɛ Asaji 10:1, 2.

NO MLI lɛ, mɛi ni yɔɔ Kristofoi asafo lɛ mli ji Yudafoi, mɛi ni atsake amɛ awo Yuda jamɔ mli kɛ Samariabii. Kornelio ji Jeŋmajiaŋnyo ni afoko lɛ ketia ni ejeee Kristofoi asafo lɛ mlinyo hu. Ani no tsɔɔ akɛ esɔlemɔi fee efolo? Dabi. Yehowa Nyɔŋmɔ yɔse Kornelio kɛ enitsumɔi ni sɔlemɔi fĩɔ sɛɛ lɛ.—Bɔfoi lɛ Asaji 10:4.

Kɛtsɔ ŋwɛibɔfoi agbɛtsɔɔmɔ nɔ lɛ, aha Kornelio kɛ Kristofoi asafo lɛ bɔi bɔɔ. (Bɔfoi lɛ Asaji 10:30-33) No hewɔ lɛ, lɛ kɛ eshiabii lɛ ná hegbɛ akɛ amɛaatsɔmɔ klɛŋklɛŋ Jeŋmajiaŋbii ni ji foolɔi ni akpɛlɛ amɛnɔ kɛba Kristofoi asafo lɛ mli. Yehowa Nyɔŋmɔ bu Kornelio niiashikpamɔ lɛ akɛ nɔ ni sa akɛ akɛfata Biblia lɛ mli saji ahe. Ŋwanejee ko bɛ he akɛ, efee tsakemɔi babaoo ni eha eshihilɛ kɛ tɛi ni Nyɔŋmɔ efolɔ eshwie shi lɛ akpã gbee. (Yesaia 2:2-4; Yohane 17:16) Esa akɛ Kornelio niiashikpamɔ lɛ afee hewalɛwoo kpele kɛha maji anɔ bii ni sumɔɔ ní amɛná Nyɔŋmɔ hiɛ duromɔ ŋmɛnɛ lɛ. Susumɔ nɔkwɛmɔnii komɛi ahe okwɛ.

Ŋmɛnɛŋmɛnɛ Beaŋ Nɔkwɛmɔnii

Miishɛjemɔ he bahia oblayoo ko ni yɔɔ India lɛ waa diɛŋtsɛ. Ebote gbalashihilɛ mli beni eye afii 21, ni efɔ́ bii enyɔ. Shi beni efɔ́ ebi ni ji enyɔ lɛ, etsɛɛɛ ni ewu gbo. Trukaa lɛ, ebatsɔ okulafo beni eye afii 24 yɛ be mli ní ebiyoo eye nyɔji 2 ní ebinuu hu eye nyɔji 22 lɛ. Ŋwanejee ko kwraa bɛ he akɛ, miishɛjemɔ he bahia lɛ! Nɛgbɛ ebaaya? Beni eyɔɔ nɔnyɛɛ shishi gbɛkɛ ko lɛ, esɔle akɛ, “Ŋwɛi Tsɛ, ofainɛ ni okɛ o-Wiemɔ lɛ ashɛje mimii.”

Enɔ leebi lɛ, ená gbɔ. Eji Yehowa Odasefoi lɛ ateŋ mɔ ko. Nakai gbi lɛ, eshia-kɛ-shia nitsumɔ lɛ bafee nɔ ni wa kɛha lɛ ejaakɛ mɛi fioo pɛ gbele amɛshinaa amɛha lɛ. Akɛni etɔ lɛ ni enijiaŋ eje wui hewɔ lɛ, efee ejwɛŋmɔ akɛ ebaaya shia, shi yɛ gbɛ ko nɔ lɛ, enu he waa akɛ esa akɛ eya shia kome pɛ mli kɛfata he. Jɛmɛ ji he ni ekɛ oblayoo okulafo lɛ kpe yɛ. Efɔ̃ lɛ nine kɛba mli ni ehe wolo ko ni tsɔɔ Biblia lɛ mli lɛ. Yoo lɛ ná miishɛjemɔ babaoo diɛŋtsɛ kɛjɛ nakai wolo lɛ kanemɔ mli kɛ saji ni ekɛ Odasefonyo lɛ gba lɛ mli. Ekase shiwoo ni Nyɔŋmɔ kɛha koni etee gbohii ashi lɛ kɛ Nyɔŋmɔ Maŋtsɛyeli  ni etsɛŋ ni ebaafee shikpɔŋ lɛ paradeiso lɛ he nii. Nɔ ni he hiaa fe fɛɛ lɛ, ebaná ele anɔkwa Nyɔŋmɔ Yehowa kome pɛ ni ha esɔlemɔ lɛ hetoo lɛ, ni esumɔ lɛ.

Nora ni yɔɔ George maŋtiase lɛ mli yɛ South Africa lɛ to nyɔŋ kome ema shi koni ekɛ ehe awo be-fɛɛ sanekpakpa jajemɔ nitsumɔ lɛ mli. Dani ebaaje nitsumɔ shishi lɛ, ekɛ ekãa sɔle eha Yehowa koni eye ebua lɛ ni ená mɔ ko ni yɔɔ wiemɔ lɛ he miishɛɛ jogbaŋŋ akɛ eeekase Biblia lɛ. Mɔ ko ni teɔ shi woɔ Nora waa diɛŋtsɛ beni eyaa eŋɔɔ tsutsu ko lɛ shia yɛ shikpɔŋkuku ni akɛha koni etsu nii yɛ mli lɛ mli. Nora fee ekãa, ni etee nakai shia lɛ ekoŋŋ. Nɔ ni fee lɛ naakpɛɛ ji akɛ, ena akɛ mɔ kroko ni gbɛi ji Noleen lɛ efã kɛbahi shia lɛ mli. Kɛfata he lɛ, Noleen kɛ enyɛ sɔleɔ amɛhaa Nyɔŋmɔ ni eye ebua amɛ koni amɛnu Biblia lɛ shishi. Nora tsɔɔ mli akɛ: “Beni mikɛɛ mikɛ amɛ baafee Biblia mli nikasemɔ lɛ, amɛná miishɛɛ waa.” Noleen kɛ enyɛ tee hiɛ oyayaayai. Etsɛɛɛ ni amɛyi enyɔ lɛ fɛɛ kɛ Nora kɛ amɛhe wo mumɔŋ tsamɔ nitsumɔ lɛ mli.

Nɔkwɛmɔnɔ kroko hu ni tsɔɔ hewalɛ ni sɔlemɔ yɔɔ ji nɔ ni kɔɔ gbalashihilɛ mli hefatalɔi komɛi ni yɔɔ South Africa maŋtiase Johannesburg lɛ mli lɛ he. Yɛ Hɔɔ gbɛkɛ ko yɛ afi 1996 lɛ, eshwɛ fioo ni Dennis kɛ Carol gbalashihilɛ lɛ mli atse. Nɔ ni amɛfee yɛ naagbee kwraa ji akɛ, amɛkpɛ amɛyiŋ akɛ amɛbaasɔle kɛha yelikɛbuamɔ, ni amɛsɔle aahu kɛbote nyɔɔŋ teŋ. Enɔ leebi, beni atswa ŋmɛji 11 lɛ, Yehowa Odasefoi enyɔ komɛi batswa amɛshinaa lɛ. Dennis bagbele shinaa lɛ ni ekɛɛ amɛ akɛ amɛmɛ kɛyashi beni eeetsɛ́ eŋa kɛba. Kɛkɛ ni Dennis bɔ Carol kɔkɔ akɛ kɛ́ efɔ̃ nine etsɛ́ Odasefoi lɛ, ebaawa akɛ eeeshwie amɛ. Carol kai Dennis akɛ amɛmiisɔle kɛha yelikɛbuamɔ ni ekɛɛ akɛ enɛ baanyɛ afee akɛ Nyɔŋmɔ miiha amɛsɔlemɔi lɛ ahetoo. No hewɔ lɛ afɔ̃ nine atsɛ́ Odasefoi lɛ kɛba mli, ni akɛ Nilee Ni Kɛ Mɔ Yaa Naanɔ Wala Mli wolo lɛ je Biblia mli nikasemɔ shishi. Dennis kɛ Carol ná nɔ ni amɛkase lɛ he miishɛɛ waa. Nakai shwane lɛ nɔŋŋ lɛ, amɛtee amɛ klɛŋklɛŋ kpee yɛ Yehowa Odasefoi a-Maŋtsɛyeli Asa ni yɔɔ jɛmɛ lɛ nɔ. Beni Dennis kɛ Carol kɛ nilee ni amɛná kɛjɛ Biblia lɛ mli lɛ tsu nii lɛ, amɛná amɛgbalashihilɛ mli naagbai anaa tsabaa. Amrɔ nɛɛ amɛji Yehowa yijielɔi ni abaptisi amɛ ni yɔɔ miishɛɛ, ni amɛgbaa amɛkutsoŋbii Biblia mli hemɔkɛyelii ni amɛná lɛ he sane.

Ni kɛ́ Osusuɔ akɛ Ojeee Mɔ ni Sa akɛ Osɔle Hu?

Ekolɛ anɔkwafoi komɛi baanu he akɛ amɛjeee mɛi ni sa akɛ amɛaasɔle yɛ amɛ shihilɛ gbɛ fɔŋ lɛ hewɔ. Yesu Kristo gba nuu ko ni tamɔ nakai ni ji toohelɔ ni abuuu lɛ kwraa lɛ he sane. Beni nuu nɛɛ boteɔ sɔlemɔwe lɛ kpo lɛ nɔ lɛ, enu he akɛ ejeee mɔ ni sa akɛ ebaa he ni abasɔleɔ yɛ daa lɛ. ‘Edamɔ shɔŋŋ, ni eshimɔ etsitsi ni ekɛɛ: Nyɔŋmɔ, okɛ mi ni ji eshafeelɔ lɛ akpãtã!’ (Luka 18:13) Taakɛ Yesu tsɔɔ lɛ, abo nɛkɛ nuu nɛɛ toi jogbaŋŋ. Enɛ tsɔɔ akɛ Yehowa Nyɔŋmɔ yɛ mlihilɛ lɛɛlɛŋ ni eesumɔ ni eye ebua eshafeelɔi ni kɛ anɔkwayeli tsakeɔ amɛtsui lɛ.

Susumɔ South Africa oblanyo ko ni gbɛi ji Paul lɛ he okwɛ. Ákɛ gbekɛ nuu lɛ, Paul kɛ enyɛ yaa Kristofoi akpeei. Shi beni shɛ afii ni ekɛyaa nɔtsamɔ skul lɛ, ebɔi oblahii kɛ oblayei komɛi ni  enyiɛɛɛ Nyɔŋmɔ gbɛ̀i anɔ lɛ kɛ bɔɔ. Beni egbe skul naa lɛ, esɔmɔ yɛ South Africa tsutsu hewolonɔ su mlijiemɔ nɔyeli lɛ asraafoi akuu lɛ mli. Kɛkɛ ni trukaa lɛ, ejɔle lɛ kɛ lɛ kpá bɔɔ. Nɛkɛ nifeemɔ shihilɛ gbɛ ni haaa Paul tsui anyɔ emli nɛɛ hao lɛ waa diɛŋtsɛ. Ekaiɔ akɛ, “Gbi ko gbɛkɛ lɛ, misɔle miha Yehowa ni mibi koni eye ebua mi, eyɛ mli akɛ mikɛ anɔkwayeli eyako Nyɔŋmɔ ŋɔɔ afii abɔ.”

Yɛ sɔlemɔ nɛɛ sɛɛ lɛ, etsɛɛɛ ni Paul nyɛ fɔ̃ nine etsɛ́ lɛ koni eba daa afi Kristo gbele Kaimɔ lɛ. (Luka 22:19) Efee Paul naakpɛɛ akɛ enyɛ fee enɛ, ejaakɛ no mli lɛ edũ gbɛ ni Biblia lɛ he miishɛɛ fioo pɛ eyɔɔ. “Mibu ninefɔ̃ɔ nɛɛ akɛ hetoo ni Yehowa kɛhaa misɔlemɔ lɛ, ni minu he akɛ esa akɛ mafee nɔ ko kɛto najiaŋ.” Kɛjɛ nakai beaŋ kɛyaa lɛ, Paul bɔi Kristofoi akpeei fɛɛ yaa. Yɛ Biblia lɛ kasemɔ nyɔji ejwɛ sɛɛ lɛ, ehe basa kɛha baptisimɔ. Kɛfata he lɛ, etsaaa tsɔnei ahe nii ni ekaseɔ lɛ nɔ dɔŋŋ ni ehala akɛ ekɛ ehe baawo be-fɛɛ sanekpakpa jajemɔ nitsumɔ lɛ mli. Ŋmɛnɛ, Paul ji nuu ni yɔɔ miishɛɛ, ni etsutsu shihilɛ lɛ gbaaa enaa dɔŋŋ. Kɛbashi amrɔ nɛɛ, ekɛ afii 11 esɔmɔ yɛ Buu Mɔɔ Asafo lɛ nitsumɔhe nine ni yɔɔ South Africa lɛ.

Lɛɛlɛŋ, Yehowa Nyɔŋmɔ kɛ mlihilɛ haa sɔlemɔi ahetoo ni “eji mɛi ni taoɔ esɛɛgbɛ lɛ anyɔmɔwolɔ hu.” (Hebribii 11:6) Etsɛŋ ni Yehowa gbi wulu lɛ baaba ni ekɛ efɔŋfeemɔ fɛɛ baaba naagbee. Shi amrɔ nɛɛ, Yehowa miiha ewebii lɛ asɔlemɔi ahetoo kɛha hewalɛ kɛ gbɛtsɔɔmɔ yɛ be mli ni amɛkɛ amɛhe woɔ odaseyeli nitsumɔ ni he hiaa lɛ mli kɛ ekãa lɛ. No hewɔ lɛ, akɛ aŋkroaŋkroi akpekpei abɔ ni jɛ majimaji fɛɛ mli lɛ miiba Kristofoi asafo lɛ mli ni akɛ Biblia mli nilee ni kɛ mɔ yaa naanɔ wala mli lɛ miijɔɔ amɛ.—Yohane 17:3.

[Mfoniri ni yɔɔ baafa 5]

Kornelio sɔlemɔ ni jɛ tsuiŋ lɛ ha bɔfo Petro basara lɛ

[Mfoniri ni yɔɔ baafa 6]

Sɔlemɔ eye ebua mɛi babaoo yɛ jaramɔ bei amli

[Mfonirii ni yɔɔ baafa 7]

Ehi akɛ aaasɔle koni aná yelikɛbuamɔ ni baaha anu Biblia lɛ shishi

Gbalashihilɛ mli hefatalɔi baanyɛ asɔle koni amɛná yelikɛbuamɔ ni baawaje amɛgbalashihilɛ lɛ