Bɔ ni Yesu Kristo Baafee Koni Enyɛ Eye Ebua Wɔ

NIBII ni Yesu Kristo fee ni ekɛye ebua gbɔmɛi beni eyɔɔ shikpɔŋ nɔ lɛ yɛ naakpɛɛ. Enɛ ji anɔkwale diɛŋtsɛ, ejaakɛ beni mɔ ko ni kɛ ehiŋmɛi ye enɛ he odase lɛ gbaa saji babaoo ni kɔɔ Yesu shihilɛ he lɛ, ekɛɛ: “Shi nii krokomɛi pii hu yɛ ni Yesu fee, ni kɛji akɛɛ aaaŋma fɛɛ ekomekome lɛ, misusuɔ akɛ je lɛ diɛŋtsɛ nyɛŋ woji ni kulɛ aaaŋma lɛ ato.” (Yohane 21:25) Akɛni Yesu tsu nii babaoo yɛ shikpɔŋ lɛ nɔ hewɔ lɛ, wɔbaanyɛ wɔbi akɛ: ‘Yɛ mɛɛ gbɛ nɔ ebaanyɛ efee wɔ yelikɛbualɔ yɛ ŋwɛi? Ani wɔbaanyɛ wɔná Yesu mlihilɛ babaoo lɛ he sɛɛ amrɔ nɛɛ?’

Hetoo lɛ haa wɔnáa miishɛɛ ni ewoɔ wɔ hewalɛ waa diɛŋtsɛ. Biblia lɛ kɛɔ wɔ akɛ “ŋwɛi diɛŋtsɛ” Kristo ‘yabote, koni agbɛnɛ eyapue yɛ Nyɔŋmɔ hiɛ eha wɔ.’ (Hebribii 9:24) Mɛni eyafee eha wɔ? Bɔfo Paulo tsɔɔ mli akɛ, ‘jeee tookpakpoi loo tsinabii alá, shi moŋ Kristo kɛ lɛ diɛŋtsɛ elá lɛ yabote hekrɔŋkrɔŋ [“ŋwɛi diɛŋtsɛ”] lɛ mli shikome nyɔŋlo, ekɛná naanɔ kpɔmɔ lɛ.’—Hebribii 9:12; 1 Yohane 2:2.

Mɛɛ sanekpakpa eji nɛkɛ! Yɛ nɔ najiaŋ ni Yesu ŋwɛiyaa lɛ kɛ nitsumɔ ni yɔɔ naakpɛɛ ni etsuɔ ehaa gbɔmɛi lɛ baaba naagbee lɛ, eye ebua lɛ koni etsu babaoo diɛŋtsɛ eha adesai. Nɔ hewɔ ji akɛ, yɛ Nyɔŋmɔ mlihilɛ kpele ni wɔsaaa hewɔ lɛ, ehala Yesu ni esɔmɔ akɛ “sɔɔlɔ”—osɔfonukpa—“ni tá hewalɔ agbo lɛ maŋtsɛsɛi lɛ ninejurɔ nɔ yɛ ŋwɛi.”—Hebribii 8:1, 2.

“Sɔɔlɔ”

Belɛ Yesu baatsɔ sɔɔlɔ yɛ ŋwɛi eha adesai. Ebaatsu nitsumɔ ni tamɔ nɔ ni Israel osɔfonukpa lɛ tsu eha Nyɔŋmɔ jálɔi yɛ blema beaŋ lɛ. Ni mɛni ji nakai nitsumɔ lɛ? Paulo tsɔɔ mli akɛ: “Osɔfonukpa fɛɛ osɔfonukpa lɛ, awo lɛ koni eŋɔ nikeenii kɛ afɔlei ebaha, no hewɔ lɛ ehia akɛ mɔnɛ [Yesu Kristo ni étee ŋwɛi lɛ] hu aná nɔ ko ni ekɛbaha.”—Hebribii 8:3.

Yesu yɛ nɔ ko ni ekɛbaaha ni nɔ kwɔ kwraa fe nɔ ni blema osɔfonukpa lɛ kɛha lɛ. “Kɛ́ tsinai kɛ tookpakpoi alá” baanyɛ ekɛ mumɔŋ hetsemɔ ko abaha blema Israel lɛ, “enyiɛ nɔŋŋ ni Kristo . . . lá lɛ tsuumɔŋ wɔhenilee lɛ he kɛjɛŋ nitsumɔi gbohii amli, koni wɔsɔmɔ Nyɔŋmɔ hiɛkãlɔ lɛ?”—Hebribii 9:13, 14.

Yesu ji sɔɔlɔ ni nɔ bɛ́ hu, ejaakɛ egbooo. Yɛ blema Israel lɛ, “akɛni gbele haaa amɛwo shihilɛ hewɔ lɛ, amɛyi pii amɛye osɔfoi.” Ni Yesu hu? Paulo ŋma akɛ: “Esɔfoyeli lɛ sɛɛ efooo. No hewɔ hu lɛ enyɛɔ mɛi ni tsɔɔ enɔ kɛbaa Nyɔŋmɔ ŋɔɔ lɛ ayiwala ehereɔ kwraa, ejaakɛ eyɛ daa koni edamɔ mli eha amɛ.” (Hebribii 7:23-25; Romabii 6:9) Hɛɛ, wɔyɛ sɔɔlɔ ni ‘yɔɔ daa’ yɛ Nyɔŋmɔ ninejurɔ nɔ yɛ ŋwɛi ‘koni edamɔ mli eha wɔ.’ Bo lɛ susumɔ nɔ ni no tsɔɔ kɛha wɔ bianɛ lɛ he!

Beni Yesu yɔɔ shikpɔŋ nɔ lɛ, gbɔmɛi ke yuu kɛba eŋɔɔ koni eye ebua amɛ, ni bei komɛi  lɛ amɛfãa gbɛ kakadaŋŋ diɛŋtsɛ koni amɛnine ashɛ edɛŋ yelikɛbuamɔ nɔ. (Mateo 4:24, 25) Majimaji fɛɛ amli gbɔmɛi baanyɛ aya Yesu ŋɔɔ yɛ ŋwɛi ni ewaaa kwraa. Kɛ eyɛ ŋwɛi he ni ebaanyɛ ejɛ ena mɛi lɛ, belɛ ebafeɔ mɔ ni yɔɔ ni sɔmɔɔ daa gbi.

Mɛɛ Osɔfonukpa Nɛkɛ Yesu Ji?

Bɔ ni awie Yesu Kristo he yɛ Sanekpakpai lɛ saji amli lɛ haaa aná yiŋkɔshikɔshifeemɔ yɛ yelikɛbuamɔ ni ekɛhaa kɛ mlihilɛ babaoo ni eyɔɔ lɛ he. Kwɛ he-kɛ-afɔleshaa ni eyɔɔ! Afite ekɛ ekaselɔi lɛ abe ni amɛkɛaajɔɔ amɛhe lɛ shii abɔ, beni amɛbɔɔ mɔdɛŋ ni amɛná hejɔɔmɔ babaoo akɛni ehe miihia amɛ lɛ hewɔ. Yɛ nɔ najiaŋ ni eeenu he akɛ ahaaa ená toiŋjɔlɛ kɛ dioofeemɔ be ni he hiaa moŋ lɛ, “emusuŋ tsɔ̃ lɛ” yɛ gbɔmɛi ni taoɔ edɛŋ yelikɛbuamɔ lɛ hewɔ. Beni etɔ Yesu, ní hɔmɔ miiye lɛ, ní kumai miiye lɛ po lɛ, “ehere amɛ hiɛmɛɛ” ni esumɔɔɔ ni eyeɔ nii kɛ́ ebaaye ebua eshafeelɔi anɔkwafoi.—Marko 6:31-34; Luka 9:11-17; Yohane 4:4-6, 31-34.

Akɛni Yesu musuŋ tsɔ̃ lɛ hewɔ lɛ, ebɔ mɔdɛŋ waa koni etsu gbɔmɛi agbɔmɔtsoŋ, henumɔŋ, kɛ mumɔŋ hiamɔ nii ahe nii. (Mateo 9:35-38; Marko 6:35-44) Kɛfata he lɛ, etsɔɔ amɛ nii koni amɛná naanɔ heyeli kɛ miishɛjemɔ. (Yohane 4:7-30, 39-42) Ákɛ nɔkwɛmɔnɔ lɛ, kwɛ bɔ ni ninefɔɔ ni ekɛhaa lɛ yɔɔ miishɛɛ ha, ni ji: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔ̃a nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaaná hejɔɔmɔ nyɛaaha nyɛsusumai lɛ.”—Mateo 11:28, 29.

Suɔmɔ ni Yesu yɔɔ kɛha gbɔmɛi lɛ da waa aahu akɛ yɛ naagbee lɛ ekɛ ewala kpɔ̃ adesai eshafeelɔi. (Romabii 5:6-8) Yɛ enɛ gbɛfaŋ lɛ, bɔfo Paulo susu sane he nɛkɛ akɛ: “[Yehowa Nyɔŋmɔ ní] kamaaa wɔ lɛ diɛŋtsɛ ebi lɛ, shi moŋ eŋɔ lɛ eha yɛ wɔ fɛɛ wɔnajiaŋ lɛ; ani eŋɔŋ nibii fiaa efataŋ ehe ekeŋ wɔ? . . . Kristo ji mɔ ni gbo, shi nɔ ni fe no lɛ, mɔ ni atee lɛ shi hu, ní eyɔɔ Nyɔŋmɔ ninejurɔ nɔ, ni esaa edamɔɔ mli ehaa wɔ lɛ.”—Romabii 8:32-34.

Osɔfonukpa ni Baanyɛ Ana Mɔ Mɔbɔ

Ákɛ adesa lɛ, hɔmɔ ye Yesu, kumai ye lɛ, etɔ lɛ, eye awerɛho, ena amanehulu, ni egbo. Haomɔ babaoo ni eŋmɛ etsui shi yɛ mli lɛ waje lɛ yɛ gbɛ ni yɔɔ srɔto kwraa nɔ koni esɔmɔ akɛ Osɔfonukpa eha adesai ni naa amanehulu lɛ. Paulo ŋma akɛ: ‘Nibii fɛɛ gbɛfaŋ lɛ esa akɛ Yesu atamɔ enyɛmimɛi lɛ, koni etsɔ̃ mɔbɔnalɔ kɛ anɔkwa osɔfonukpa yɛ Nyɔŋmɔ hiɛ, koni ekpa maŋ lɛ yi musu. Ejaakɛ akɛni lɛ diɛŋtsɛ lɛ ena amanehulu ni aka lɛ hewɔ lɛ, enyɛɔ eyeɔ ebuaa mɛi ni akaa amɛ lɛ.’—Hebribii 2:17, 18; 13:8.

Yesu tsɔɔ akɛ eji mɔ ni sa ni eesumɔ ni eye ebua gbɔmɛi koni amɛtsi amɛbɛŋkɛ Nyɔŋmɔ waa. Shi kɛlɛ, ani enɛ tsɔɔ akɛ esa akɛ ekɔne Nyɔŋmɔ ko ni mli woɔ la ni enaaa mɔ mɔbɔ ni eshashaoɔ shi akɛ ekɛ sane aaake lɛ yiŋ? Dabi kwraa, ejaakɛ Biblia lɛ maa nɔ mi ehaa wɔ akɛ, ‘Yehowa hi ni eŋɔfaa mra.’ Ekɛɔ hu akɛ: “Kɛji wɔjaje wɔhe eshai lɛ, anɔkwafo kɛ jalɔ ji lɛ, koni ekɛ wɔhe eshai lɛ afa wɔ ni etsumɔ wɔhe kɛjɛ nii ni ejaaa gbɛ fiaa mli.” (Lala 86:5; 1 Yohane 1:9) Yɛ anɔkwale mli lɛ, Yesu wiemɔi kɛ nifeemɔi ni mlijɔlɛ yɔɔ mli lɛ jieɔ mlihilɛ, mɔbɔnalɛ kɛ suɔmɔ ni e-Tsɛ lɛ diɛŋtsɛ yɔɔ lɛ kpo.—Yohane 5:19; 8:28; 14:9, 10.

Yɛ mɛɛ gbɛ nɔ Yesu kɛ heyeli bahaa eshafeelɔi ni etsake amɛtsui lɛ? Kɛtsɔ bɔ ni eyeɔ ebuaa  amɛ koni amɛ mii ashɛ amɛhe ni amɛtsui anyɔ amɛmli lɛ nɔ yɛ mɔdɛŋ ni amɛbɔɔ yɛ anɔkwayeli mli koni amɛsa Nyɔŋmɔ hiɛ lɛ mli lɛ nɔ. Beni Paulo ŋmaa wolo eyaha nanemɛi Kristofoi ni afɔ amɛ mu lɛ, emua bɔ ni shihilɛ lɛ yɔɔ lɛ naa kɛtsɔ enɛ kɛɛmɔ nɔ akɛ: “Agbɛnɛ, akɛ nɔ ni wɔyɔɔ osɔfonukpa kpeteŋkpele, ni efoŋ kɛtsɔ ŋwɛiniaŋ, ni ji Yesu, Nyɔŋmɔ bi lɛ nɛɛ, nyɛhaa wɔmɔa jajemɔ lɛ mli ni awaa. Ejaakɛ wɔsɔfonukpa ni wɔyɔɔ lɛ ejeee mɔ ni nyɛɛɛ anu wɔgbedemɔi lɛ ahe aha wɔ, shi eji mɔ ko ni aka lɛ yɛ nibii fɛɛ gbɛfaŋ tamɔ wɔ ní kɛlɛ esha ko esha ko bɛ ehe. Hewɔ lɛ nyɛhaa wɔkɛ ekãa atsia abɛŋkɛa duromɔ sɛi lɛ, koni wɔnine ashɛ mɔbɔnalɛ nɔ ni wɔná duromɔ ni aaaye abua wɔ yɛ be ni sa mli.”—Hebribii 4:14-16.

‘Yelikɛbuamɔ yɛ Be ni Sa Mli’

Shi mɛni wɔbaanyɛ wɔfee kɛ́ wɔkɛ naagbai ni wɔnuɔ he akɛ eda tsɔ fe bɔ ni wɔbaanyɛ wɔtsu he nii lɛ kpe—hela ni naa wa, fɔyeli he jatsu ni tsii lɛ, nijiaŋwujee ni naa wa waa, kɛ nɔnyɛɛ? Wɔbaanyɛ wɔkɛ gbɛjianɔtoo ni Yesu diɛŋtsɛ kɛ ehe fɔ̃ nɔ daa lɛ nɔŋŋ atsu nii—hegbɛ kpele ni ji sɔlemɔ lɛ. Ákɛ nɔkwɛmɔnɔ lɛ, yɛ gbɛkɛ dani ekɛ ewala fɔ̃ shi eha wɔ lɛ, “eha esɔlemɔ lɛ mli wa. Ni ehe latsaa tsɔ̃ tamɔ lákulibii ni tsereɔ shwieɔ shi.” (Luka 22:44) Hɛɛ Yesu le bɔ ni sɔlemɔ ni aaasɔle waa kɛ ekãa kɛha Nyɔŋmɔ lɛ yɔɔ ha. “Eŋɔ sɔlemɔi kɛ faikpamɔi ni bolɔmɔ ni naa wa kɛ yaafonui fata he eshã afɔle eha mɔ ni yɔɔ hewalɛ ni ekɛaahere lɛ kɛaajɛ gbele mli lɛ, ni abo lɛ toi hu, ejaakɛ ebuɔ Nyɔŋmɔ.”—Hebribii 5:7.

Yesu le bɔ ni etsɔɔ waa kɛ́ ‘aaabo mɔ toi jogbaŋŋ’ ni awo mɔ hewalɛ lɛ. (Luka 22:43) Kɛfata he lɛ, ewo shi akɛ: “Nɔ fɛɛ nɔ he fai ni nyɛaakpa tsɛ lɛ yɛ migbɛi anɔ lɛ, eeeha nyɛ. . . . nyɛkpaa fai, ni nyɛaaná, koni nyɛmiishɛɛ lɛ ayi.” (Yohane 16:23, 24) No hewɔ lɛ, wɔbaanyɛ wɔkpa Nyɔŋmɔ fai kɛ hekɛnɔfɔɔ akɛ ebaaŋmɛ gbɛ koni e-Bi lɛ kɛ hegbɛ ni eyɔɔ kɛ ekpɔmɔ afɔleshaa lɛ jara lɛ aye abua wɔ.—Mateo 28:18.

Wɔbaanyɛ wɔná nɔmimaa akɛ yɛ hegbɛ ni Yesu yɔɔ yɛ ŋwɛi lɛ naa lɛ, ekɛ yelikɛbuamɔ ni sa lɛ baaha yɛ be ni sa mli. Ákɛ nɔkwɛmɔnɔ lɛ, kɛ́ wɔfee esha ko ni wɔkɛ anɔkwayeli miishwa wɔhe waa lɛ, wɔbaanyɛ wɔná miishɛjemɔ kɛjɛ nɔmimaa ni tsɔɔ akɛ “wɔyɛ mlidamɔlɔ yɛ tsɛ lɛ ŋɔɔ, Yesu Kristo, jalɔ lɛ” mli. (1 Yohane 2:1, 2) Wɔyelikɛbualɔ kɛ Miishɛjelɔ ni yɔɔ ŋwɛi lɛ baakpa fai eha wɔ koni aha sɔlemɔ ni wɔsɔleɔ yɛ egbɛi amli yɛ Ŋmalɛi lɛ kɛ gbeekpamɔ naa lɛ hetoo.—Yohane 14:13, 14; 1 Yohane 5:14, 15.

 Hiɛ ni Aaasɔ Kristo Yelikɛbuamɔ Lɛ

Babaoo fata he fe nɔ ni aaakpa Nyɔŋmɔ fai kɛtsɔ e-Bi lɛ nɔ. ‘Kristo tsɔ̃ ekpɔmɔ nɔ̃’ lɛ nɔ ekɛ e-kpɔmɔ afɔleshaa jara lɛ batsɔ ‘mɔ ni kpɔ̃’ adesai aweku lɛ, taakɛ eji lɛ. (Galatabii 3:13; 4:5; 2 Petro 2:1) Wɔbaanyɛ wɔtsɔɔ bɔ ni wɔhiɛ sɔɔ nibii fɛɛ ni Kristo feɔ ehaa wɔ lɛ kɛtsɔ kpɛlɛmɔ ni wɔɔkpɛlɛ enii ni ji wɔ lɛ nɔ ní wɔkɛ miishɛɛ abo ninefɔɔ nɛɛ toi: “Kɛji mɔ ko miisumɔ akɛ enyiɛ misɛɛ lɛ, ha ni ekwa ehe, ní ewo esɛŋmɔtso lɛ etere daa nɛɛ kɛnyiɛ misɛɛ.” (Luka 9:23) ‘Hekwamɔ’ jeee wiemɔ kɛkɛ ni awieɔ akɛ abɛ mɔ ko shishi dɔŋŋ. Yɛ fɛɛ sɛɛ lɛ, Kristo ‘gbo mɛi fɛɛ yigbele, koni mɛi ni hiɛ kãmɔ lɛ ahiɛ akakãmɔ kɛmiiha amɛ diɛŋtsɛ amɛhe dɔŋŋ, shi moŋ amɛhiɛ akãmɔ aha mɔ ni gbo eha amɛ lɛ.’ (2 Korintobii 5:14, 15) No hewɔ lɛ, hiɛsɔɔ ni wɔnáa wɔhaa kpɔmɔ nɔ̃ lɛ náa hewalɛ waa yɛ bɔ ni wɔsusuɔ nii ahe wɔhaa, otii ni wɔkɛmamɔɔ wɔhiɛ kɛ wɔshihilɛ gbɛ lɛ nɔ. Esa akɛ hiɛsɔɔ ni wɔɔná wɔha ‘Yesu Kristo ni ŋɔ lɛ diɛŋtsɛ ehe eha yɛ wɔnajiaŋ’ lɛ he nyɔmɔ ni wɔhiɛ lɛ atsirɛ wɔ koni wɔkase lɛ kɛ e-Tsɛ Yehowa Nyɔŋmɔ ni yɔɔ suɔmɔ lɛ he nii babaoo. Esa akɛ wɔsumɔ akɛ wɔɔdara hu yɛ hemɔkɛyeli mli, ní wɔhi shi yɛ tɛi ni Nyɔŋmɔ efolɔ eshwie shi ni he yɔɔ sɛɛnamɔ lɛ naa, ní ‘wɔhiɛ adɔ nitsumɔi kpakpai ahe.’—Tito 2:13, 14; Yohane 17:3.

Kristofoi asafo lɛ ji gbɛ ni wɔtsɔɔ nɔ wɔnine shɛɔ mumɔŋ niyenii ni yɔɔ ebe naa, hewalɛwoo kɛ gbɛtsɔɔmɔ nɔ yɛ. (Mateo 24:45-47; Hebribii 10:21-25) Ákɛ nɔkwɛmɔnɔ lɛ, kɛ́ amɛteŋ mɛi komɛi ahe miiye yɛ mumɔŋ lɛ, amɛbaanyɛ ‘amɛtsɛ́ asafo lɛ mli onukpai, ni ji onukpai ni ahala amɛ lɛ kɛba.’ Yakobo ma nɔ mi kɛfata he akɛ: “Ni hemɔkɛyeli sɔlemɔ lɛ aaahere helatsɛ lɛ yiwala, ni Nuntsɔ lɛ aaatee lɛ shi, ni kɛji efee eshai lɛ, aaaŋɔfa lɛ.”—Yakobo 5:13-15.

Ákɛ nɔkwɛmɔnɔ lɛ: Nuu ko ni awo lɛ tsuŋ yɛ South Africa lɛ ŋma kɛyaha asafo mli onukpa ko, ni eetsɔɔ bɔ ni ehiɛ esɔ “Yehowa Odasefoi fɛɛ ni miitsu nitsumɔ kpakpa ni Yesu Kristo je shishi ni ekɛyeɔ ebuaa gbɔmɛi koni amɛpele kɛbote Nyɔŋmɔ Maŋtsɛyeli lɛ mli lɛ.” Kɛkɛ  ni eŋma akɛ: “Miná miishɛɛ waa diɛŋtsɛ beni minine shɛ owolo lɛ nɔ lɛ. Bɔ ni osusuɔ mimumɔŋ heyeli he lɛ esa mihiɛ waa diɛŋtsɛ. Yiŋtoo ni fe fɛɛ hewɔ ji akɛ, koni mahere tsɛmɔ ni Yehowa Nyɔŋmɔ kɛhaa kɛha tsuitsakemɔ lɛ nɔ. Afii 27 sɔŋŋ nɛ ni mikɛ mihe ewo efɔŋfeemɔ mli, ní miidu gbɛ yɛ duŋ ni ji eshafeemɔ, lakamɔ, bɔlɛnamɔ ni esaaa, jeŋba shara kɛ jamɔi gbohii amli. Beni mibale Yehowa Odasefoi lɛ, minu he akɛ agbɛnɛ lɛ, gbɛ lɛ—anɔkwale gbɛ lɛ nɛ! Nɔ ni esa akɛ mafee nɔŋŋ kɛkɛ ji ni mikɛtsu nii.”

Abaaná Yelikɛbuamɔ Babaoo yɛ Wɔsɛɛ Be Mli

Je lɛŋ shihilɛi ni yaa nɔ efiteɔ lɛ ji odaseyeli ni yɔɔ faŋŋ akɛ wɔyɛ jaramɔ be ni baatsɔ “amanehulu kpeteŋkpele” lɛ fɛ́mɔ lɛ hiɛ lɛ mli. Amrɔ nɛɛ, asafo babaoo ni jɛ maji, akutsei, gbɔmɛi kɛ maji anɔ wiemɔi fɛɛ amli lɛ ‘miifɔ́ amɛtadei lɛ ahe, ni amɛmiiha eeyɛ futaa yɛ Toobi lɛ lá lɛ mli.’ (Kpojiemɔ 7:9, 13, 14; 2 Timoteo 3:1-5) Yɛ be mli ni amɛjieɔ hemɔkɛyeli kpo yɛ Yesu kpɔmɔ afɔleshaa lɛ mli lɛ, belɛ akɛ amɛhe eshai miifa amɛ, ni aaye aabua amɛ koni amɛkɛ Nyɔŋmɔ abaná wekukpaa ni yɔɔ gbagbalii—yɛ anɔkwale mli lɛ, amɛmiitsɔmɔ enanemɛi.—Yakobo 2:23.

Toobi Yesu Kristo “aaalɛ̀ [mɛi ni baafo amanehulu kpeteŋkpele lɛ], ni eeetsɔɔ amɛ gbɛ kɛaatee wala nubui ahe, ni Nyɔŋmɔ aaatsumɔ amɛhiɛaŋ yaafonui fɛɛ.” (Kpojiemɔ 7:17) Kɛkɛ lɛ Kristo baatsu enitsumɔi akɛ Osɔfonukpa lɛ kwraa kɛmɔ shi. Ebaaye ebua Nyɔŋmɔ nanemɛi fɛɛ koni amɛná “wala nubui ahe” sɛɛ kɛmɔ shi—yɛ mumɔŋ, gbɔmɔtsoŋ, jwɛŋmɔŋ kɛ henumɔŋ. Kɛkɛ lɛ abaatsu nɔ ni Yesu je shishi yɛ afi 33 Ŋ.B. kɛ nɔ ni etsá efeemɔ nɔ kɛjɛ ŋwɛi kɛjɛ nakai beaŋ kɛbaa lɛ he nii yɛ emuuyeli mli.

No hewɔ lɛ, onijiaŋ akaje wui kɔkɔɔkɔ yɛ hiɛsɔɔ ni mli wa ni ojieɔ lɛ kpo otsɔɔ nibii fɛɛ ni Nyɔŋmɔ kɛ Kristo efee—ni amɛfeɔ—amɛhaa wɔ lɛ. Bɔfo Paulo wo hewalɛ akɛ: “Nyɛmii ashɛa yɛ Nuntsɔ lɛ mli daa! . . . Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!”—Filipibii 4:4, 6, 7.

Gbɛ ko yɛ ni sa kadimɔ ni oootsɔ nɔ ojie hiɛsɔɔ kpo oha Yesu Kristo wɔ-Yelikɛbualɔ ni yɔɔ ŋwɛi lɛ. Yehowa Odasefoi ni yɔɔ jeŋ fɛɛ lɛ baabua amɛhe naa koni amɛye Kristo gbele lɛ Kaimɔ lɛ, yɛ Shɔ, April 19, 2000 beni hulu enyɔ shi. (Luka 22:19) Enɛ baafee hegbɛ ni oooná akɛ oooha hiɛsɔɔ ni oyɔɔ kɛha Kristo kpɔmɔ afɔleshaa lɛ mli awa. Akɛ miishɛɛ babaoo miifɔ̃ bo nine koni oya eko ni oyabo bɔ ni obaanyɛ oná gbɛjianɔ ni Nyɔŋmɔ eto yɛ naakpɛɛ gbɛ nɔ kɛha yiwalaheremɔ kɛtsɔ Kristo nɔ lɛ he sɛɛ kɛya naanɔ lɛ toi. Ofainɛ ni obi Yehowa Odasefoi ni yɔɔ he ni oyɔɔ lɛ kɛha be pɔtɛɛ kɛ he ni abaafee kpee krɛdɛɛ nɛɛ yɛ.

[Mfoniri ni yɔɔ baafa 7]

Yesu le bɔ ni eji akɛ aaasɔle waa aha Nyɔŋmɔ

[Mfonirii ni yɔɔ baafa 8]

Kristo baaye ebua wɔ koni wɔdamɔ naagbai ni dara fe bɔ ni wɔ kome too wɔbaanyɛ wɔtsu he nii lɛ naa

[Mfoniri ni yɔɔ baafa 9]

Kristo tsɔɔ onukpai ni yɔɔ suɔmɔ lɛ anɔ eyeɔ ebuaa wɔ