Nɔ ni Esa akɛ Ole yɛ Ayɛ Kpɛmɔ He

EWA akɛ aaatsɔɔ ŋmɛnɛŋmɛnɛ beaŋ ayɛ kpɛmɔ shishi. Nɔ hewɔ lɛ ji akɛ, srɔto yɛ mɛi ni kɛ amɛhe woɔ mli lɛ waa. Amɛbɛ hegbɛ ko ni yeɔ amɛnɔ loo tsɔɔmɔ loo wolo krɔŋkrɔŋ ko ni feɔ amɛhemɔkɛyeli lɛ ekome. Amɛyɛ srɔto hu yɛ kusum, gbɛjianɔtoo, kusum nifeemɔ, kɛ susumɔi ahe yɛ nɔ ni kɔɔ nyɔŋmɔ ni esa akɛ akɛ woo aha lɛ he. Niŋmalɔ ko wie akɛ: “Mumɔi atsɛmɔ je lɛ haa aŋkroaŋkroi lɛ ‘nihalamɔ ni husu bɛ he’ lɛ he susumɔi.” Mɔ kroko hu kɛɛ akɛ: “Mɛi Heei ni Ji Wɔŋjalɔi lɛ ateŋ mɛi babaoo kɛ amɛhe kpãaa gbee yɛ nɔ ko nɔ ko mli.”

Kɛha mɛi babaoo lɛ, wiemɔi ni teɔ shi woɔ amɛhe lɛ jeee naagba ko. Gbɛtsɔɔmɔ wolo ko kɛha mɛi ni taoɔ abatsɔ ayɛi lɛ kɛɛ akɛ: “Kɛji okɛ ŋwanejee sane ko ni tamɔ nɔ ni teɔ shi woɔ ehe kpe lɛ, susumɔ sane nɛɛ he koni okpɛ oyiŋ yɛ amɛteŋ nɔ ni sɛɛ ni obaanyiɛ he. Bo ojwɛŋmɔ nyɛmɔ lɛ toi. Yɛ gbɛ kroko nɔ lɛ, oyɛ hegbɛ ni okɛaahala kusum nifeemɔi ni akala lɛ ateŋ eko kɛ woji ni wieɔ kusum he lɛ eko koni okpɛ oyiŋ yɛ nɔ ni onuɔ he akɛ eja lɛ he.”

Kɛha mɛi ni yɔseɔ su ni anɔkwale lɛ yɔɔ lɛ, saji ni teɔ shi woɔ ehe ni tamɔ nɛkɛ lɛ ji naagba. Anɔkwale lɛ ji anɔkwa sane, nɔ ni yɔɔ diɛŋtsɛ. Akɛni mɔ ko nuɔ he, loo osusuɔ he, loo eheɔ eyeɔ akɛ amɛji anɔkwale kɛkɛ lɛ etsɔɔɔ akɛ eji anɔkwale. Ákɛ nɔkwɛmɔnɔ lɛ, yɛ be ko mli lɛ datrɛfoi he amɛye akɛ amɛbaanyɛ amɛtsa flufla hela kɛtsɔ wuɔ hiɛkãalɔ ni amɛaafo emli enyɔ ni amɛkɛ efai lɛ ashwie helatsɛ lɛ tsitsi nɔ lɛ nɔ. Ŋwanejee ko bɛ he akɛ, helatsɛmɛi pii he amɛye yɛ anɔkwale mli akɛ nɛkɛ tsamɔ gbɛ nɛɛ baanyɛ atsa amɛ. Shi kɛlɛ, amɛhemɔkɛyelii kɛ hiɛnɔkamɔi lɛ kɛ anɔkwale lɛ kpãaa gbee—gbɛ ni tamɔ nɛkɛ lɛ tsaaa flufla hela. Gbɔmɛi nyɛɛɛ ato anɔkwale he gbɛjianɔ; amɛbɔɔ mɔdɛŋ koni amɛnu shishi.

Biblia lɛ kɛɔ akɛ anɔkwalei ni kɔɔ mumɔŋ saji ahe yɛ mli. Beni Yesu yɔɔ shikpɔŋ nɔ lɛ, ekɛɛ e-Tsɛ yɛ sɔlemɔ mli akɛ: “Owiemɔ lɛ anɔkwaleŋ.” (Yohane 17:17) Bɔfo Paulo ŋma akɛ: “Ŋmalɛ fɛɛ ŋmalɛ ní jɛ Nyɔŋmɔ Mumɔ lɛŋ.” (2 Timoteo 3:16) Mɛi babaoo ni kɛ amɛhe woɔ ayɛ kpɛmɔ mli lɛ epkɛlɛɛɛ nɔ nakai. Yɛ no najiaŋ lɛ, amɛyataoɔ hewalɛwoo kɛ gbɛtsɔɔmɔ yɛ adesã, blema jamɔi, kɛ jeŋ nilee adesãi po amli. Shi kɛlɛ, ani nilee bɛ mli akɛ kɛ hoo kwraa lɛ aaasusu nɔ ni Biblia lɛ kɛɔ lɛ he? Ejaakɛ, akpɛlɛɔ nɔ yɛ jeŋ muu fɛɛ ákɛ wolo ko ni yɔɔ krɔŋkrɔŋ. Ni eji jamɔ niŋmaai komɛi ni etsɛ fe fɛɛ ni eye omanye. Biblia lɛ ŋmaa  he nɔ ni fe afii 1,600, ni kɛlɛ eyɛ shiŋŋ yɛ enitsɔɔmɔ lɛ fɛɛ mli. Nyɛhaa wɔkɛ Biblia tsɔɔmɔi lɛ atoa hemɔkɛyelii komɛi ni mɛi ni woɔ ayɛ kpɛmɔ he hewalɛ lɛ tsɔɔ lɛ he.

Namɛi Yɔɔ Mumɔŋ Shihilɛhe Lɛ?

Shishijee sanebimɔ ko ni akɛtaoɔ emumɔŋ shishinumɔ ji akɛ, Namɛi yɔɔ mumɔŋ shihilɛhe lɛ? Yɛ be mli ni ŋmɛnɛŋmɛnɛ beaŋ ayɛi lɛ ateŋ mɛi babaoo ji adebɔɔ naa nibii asɛɛnyiɛlɔi, ní amɛnáa nyɔŋmɔi babaoo amli hemɔkɛyeli lɛ, amɛteŋ mɛi komɛi jáa nyɔŋmɔyoo kpeteŋkpele ko, ni abuɔ lɛ yɛ oblayoo toi etɛ gbɛ nɔ, nyɛ, kɛ yoomo ko ni nine egbo, ni damɔ shi kɛha wala shihilɛ mli shishijee gbɛ̀i. Esuɔlɔ ji nyɔŋmɔ ko ni yɔɔ akoloŋtoi. Ayɛi krokomɛi jáa nyɔŋmɔ kɛ nyɔŋmɔ yoo shikome. Niŋmalɔ ko kɛɛ akɛ: “Anaa Nyɔŋmɔyoo kɛ Nyɔŋmɔ lɛ akɛ nuu kɛ yoo adebɔɔ naa hewalɛ lɛ kpojiemɔ. Amɛteŋ mɔ fɛɛ mɔ hiɛ nibii ni yɔɔ srɔto ni kɛ afee fɛɛ ekome lɛ nɔ ni jɛɔ mli baa ji gbeekpamɔ ni yɔɔ wala bɔɔ mli.” Niŋmalɔ kroko hu ŋma akɛ: “Nihalamɔ ko ni he hiaa fe fɛɛ yɛ ayɛ kpɛmɔ mli ji nyɔŋmɔi (Nyɔŋmɔi/ Nyɔŋmɔyei) lɛ ateŋ mɔ ni ohalaa akɛ okɛbaatsu nii. . . . Ŋaa Nitsumɔ lɛ haa bo heyeli ní okɛhala koni yɛ no sɛɛ lɛ okɛ woo aha bo diɛŋtsɛ o-Nyɔŋmɔ.”

Biblia lɛ fiii susumɔi nɛɛ ateŋ eko kwraa sɛɛ. Yesu Kristo tuu esɔɔmɔ nitsumɔ lɛ fɛɛ ewo mɛi krokomɛi ni eeetsɔɔ amɛ Yehowa, “anɔkwa Nyɔŋmɔ koome” lɛ he nii lɛ mli. (Yohane 17:3) Biblia lɛ kɛɔ akɛ: “Yehowa da kpele ni esa yijiemɔ babaoo, ni ehe yɛ gbeyei fe nyɔŋmɔi lɛ fɛɛ. Ejaakɛ maji lɛ fɛɛ anyɔŋmɔi lɛ amagai ni.”—1 Kronika 16:25, 26.

Ni Abonsam hu? Webster’s Ninth New Collegiate Dictionary lɛ tsɔɔ ayɛ kpɛmɔ shishi akɛ “abonsam ni akɛ lɛ sharaa.” Ebaawa akɛ aaana ayɛ ko ŋmɛnɛ ni baakpɛlɛ shishitsɔɔmɔ nɛɛ nɔ, ejaakɛ mɛi babaoo heee amɛyeee po akɛ Satan Abonsam yɛ. Oblayoo ko ni awie ehe yɛ The Irish Times lɛ mli akɛ “onukpa ko ni yɔɔ hegbɛ babaoo kɛ Ireland ayɛi akpeehe lɛ ateŋ ekome hiɛnyiɛlɔ,” wie yɛ nɛkɛ gbɛ nɔ, akɛ: “Hemɔkɛyeli yɛ Abonsam mli lɛ tsɔɔ Kristojamɔ nɔkpɛlɛmɔ . . . [Abonsam] nyɛŋ ahi jeŋ muu fɛɛ he ko ni Nyɔŋmɔ bɛ.”

Biblia lɛ maa nɔ mi akɛ Abonsam yɛ, ni eshwaa lɛ yɛ piŋmɔi kɛ basabasafeemɔi babaoo ni yɔɔ shikpɔŋ nɔ lɛ he. (Kpojiemɔ 12:12) Yesu etsɔɔɔ kɛkɛ akɛ Abonsam yɛ shi moŋ etsɔɔ hu akɛ abaanyɛ afee Abonsam suɔmɔnaa nii ni aleee. Ákɛ nɔkwɛmɔnɔ lɛ, klɛŋklɛŋ afii oha lɛ mli jamɔŋ hiɛnyiɛlɔi ni feɔ amɛhe jalɔi lɛ jaje yɛ gbɛ ko nɔ akɛ amɛji Nyɔŋmɔ bii ni amɛheɔ amɛyeɔ akɛ amɛmiifee Nyɔŋmɔ suɔmɔnaa nii. Yesu ni baanyɛ ena nɔ ni yɔɔ amɛtsuii amli lɛ, le nɔ ko ni yɔɔ srɔto. Ekɛɛ amɛ faŋŋ akɛ: “Nyɛ lɛ nyɛtsɛ ni nyɛjɛ emli ji abonsam, ni nyɛtsɛ lɛ tsinebaa nii nyɛsumɔɔ akɛ nyɛfee.” (Yohane 8:44) Kɛfata he lɛ, Biblia mli wolo ni ji Kpojiemɔ lɛ wie akɛ Abonsam “shishiuɔ jeŋ muu lɛ fɛɛ lɛ.”—Kpojiemɔ 12:9.

Ani Ashwãifeemɔ Komɛi Hi?

Yɛ anɔkwale mli lɛ, akɛ ashwãifeemɔ toɔ ŋkunyaayeli he be fɛɛ be. * Mɛi pii ni hi shi yɛ blema kɛ ŋmɛnɛŋmɛnɛ beaŋ lɛ fɛɛ heɔ yeɔ akɛ afeɔ ashwãifeemɔ nifeemɔ ni ayɛi kɛ amɛhe woɔ mli lɛ koni ekɛ awuiyeli aba mɛi krokomɛi anɔ. Ale akɛ  ayɛi yɛ hewalɛ ni amɛbaanyɛ amɛkɛ piŋmɔ ni naa wa kɛ gbele po aba mɛi anɔ kɛtsɔ ashwãifeemɔ nɔ. Efɔɔ kaa akɛ, ashwaa ayɛi yɛ nɔnaa babaoo ni bɛ naagbee ni baa, ní hela, gbele, kɛ ŋmɔshi nibii ni hiɛ kpataa fata he lɛ ahe.

Ayɛi ni yɔɔ ŋmɛnɛ lɛ kpoɔ naafolɔmɔi ni tamɔ nɛkɛ. Yɛ be mli ni mɛi babaoo kpɛlɛɔ nɔ akɛ yɛ be kɛ beaŋ lɛ ayɛ ko ni yeee anɔkwa ni diɔ nɔ fɔŋ sɛɛ yɛ lɛ, amɛkpɛlɛɔ nɔ akɛ amɛkɛ amɛ ashwãifeemɔ lɛ tsuɔ nii koni ekɛ sɛɛnamɔi aba, shi jeee ni eye awui. Wiccans tsɔɔ akɛ nibii ni jɛɔ ashwãifeemɔ mli kɛbaa lɛ baafee sɛɛnamɔ toi etɛ kɛha mɔ ni kɛ ehe woɔ mli lɛ, ni ekɛɛ akɛ enɛ ji naatsii nɔ wulu kɛha loomɔi ni alomɔɔ. Nɔ ni fata nɔkwɛmɔnii ni kɔɔ nɔ ni akɛɛ atsɛɔ lɛ mlihilɛ kpojiemɔ ashwãifeemɔ lɛ he ji ŋkunyaayeli koni akɛbu he, koni okɛtsuu oshia lɛ he kɛjɛ mumɔi fɔji ni yeɔ awui ni tsutsu mɛi ni okɛyɔɔ shia lɛ eshi yɛ sɛɛ, koni okɛha mɔ ko aná suɔmɔ aha bo, koni oha tsamɔ kɛ hewalɛ namɔ aya hiɛ, koni okɛtsĩ nitsumɔ ni aaaje odɛŋ lɛ naa, ni oná shika. Abaanyɛ akɛɛ akɛ, yɛ hewalɛi ni mli lɛɛ ni tamɔ nɛkɛ ni akɛfataa ayɛkpɛmɔ he hewɔ lɛ, ebafee nɔ ni ale jogbaŋŋ.

Shi kɛlɛ, Biblia lɛ kɛ srɔtofeemɔ baaa ashwãifeemɔ kpakpa kɛ ashwãifeemɔ fɔŋ teŋ. Nyɔŋmɔ ha bɔ ni esusuɔ yɛ sane nɛɛ he lɛ fee faŋŋ yɛ Mla ni ekɛha Mose lɛ mli. Ekɛɛ akɛ: “Nyɛkayea ŋkunyaa.” (3 Mose 19:26) Wɔkaneɔ hu akɛ: “Akana nyɛteŋ mɔ ko . . . ashwãifeelɔ, aloo ŋkunyaayelɔ, aloo kaablɛfilɔ, aloo mɔ ni tsɛɔ sisa.”—5 Mose 18:10, 11.

Mɛni hewɔ Nyɔŋmɔ kɛɛ nakai? Eyiŋtoo lɛ jeee ni ekaha wɔmiiná nɔ ni sɛɛnamɔ yɔɔ he. Yehowa kɛ mlai nɛɛ ha ewebii lɛ ejaakɛ esumɔɔ amɛ, ni esumɔɔɔ ni amɛbatsɔmɔ nyɔji amɛha gbeyeishemɔ kɛ apasa hemɔkɛyeli. Yɛ no najiaŋ lɛ, efɔ̃ɔ nine etsɛɔ etsuji koni amɛbɛŋkɛ lɛ kɛha nibii ni he hiaa amɛ. Eji “duromɔ nii kpakpai fɛɛ kɛ nikeenii ni hi kɛwula shi fɛɛ lɛ a-Halɔ.” (Yakobo 1:17) Bɔfo Yohane kɛ nɔmimaa ha nanemɛi heyelilɔi akɛ: “Nɔ fɛɛ nɔ ni wɔbaa lɛ, wɔnáa yɛ edɛŋ, ejaakɛ ekitai lɛ wɔyeɔ nɔ, ni wɔfeɔ nii ni sa ehiɛ.”—1 Yohane 3:22.

Ni Mumɔi Fɔji Hu?

Ayɛi pii kɛ Biblia lɛ kpãa gbee yɛ nɛkɛ oti nɛɛ he: Mumɔi fɔji yɛ. Yɛ sane he wiemɔ ko ni aŋma lɛ mli lɛ, mɔ ko ni woɔ ayɛkpɛmɔ he hewalɛ lɛ bɔ kɔkɔ akɛ: “Ninaai lɛ yɛ jɛmɛ: Amɛyɛ shihilɛ mli yɛ mumɔi aje lɛ ni je wɔnɔ ni mli eyi obɔ kɛ bɔɔ nii ni yɔɔ wala mli. . . . Gbɛi ni ji ‘daimonio bibioo’, ‘Mumɔ Fɔŋ’ kɛ Daimonio’ ji nɔ ni ja pɛpɛɛpɛ. Amɛhe wa waa diɛŋtsɛ. . . . Amɛteŋ mɛi ni le nii waa . . . lɛ baanyɛ (kɛji mɔ ko bafee yelikɛbuamɔ jɛɛhe ni egbele shinaa ko naa eha amɛ) lɛ baanyɛ abote wɔ je lɛ mli. . . . Amɛbaanyɛ amɛbote ogbɔmɔtso  mli . . . , ekolɛ amɛbaanyɛ amɛná hewalɛ babaoo po yɛ onɔ. Hɛɛ, enɛ tamɔ blema adesãi ni kɔɔ mɛi ni yɔɔ Daimonio lɛ he pɛpɛɛpɛ.”

Yɛ Biblia beaŋ lɛ, daimonio ni ayɔɔ lɛ piŋ mɛi yɛ gbɛ̀i srɔtoi anɔ. Amɛteŋ mɛi ni eko yɔɔ amɛhe lɛ nyɛɛɛ awie, mɛi komɛi shwila, mɛi komɛi feɔ amɛnii tamɔ sɛkɛyelɔi, ni mɛi komɛi ná hewalɛ ni fe adesai anɔ. (Mateo 9:32; 12:22; 17:15, 18; Marko 5:2-5; Luka 8:29; 9:42; 11:14; Bɔfoi lɛ Asaji 19:16) Bei komɛi lɛ piŋmɔ lɛ mli woɔ wu kɛji daimonioi babaoo baná hewalɛ yɛ mɔ ko nɔ yɛ be kome too lɛ nɔŋŋ mli. (Luka 8:2, 30) Belɛ eka shi faŋŋ akɛ, yiŋtoo kpakpa ko yɛ hewɔ ni Yehowa bɔɔ mɛi akɔkɔ koni amɛtsi amɛhe kɛjɛ ayɛ kpɛmɔ kɛ ŋkunyaayeli nitsumɔi krokomɛi ahe lɛ.

Jamɔ ni Damɔ Anɔkwale Nɔ

Aagbala mɛi babaoo aawo ayɛ kpɛmɔ mli ŋmɛnɛ ejaakɛ etamɔ nɔ ni yeee mɔ awui, ni hejɔlɛ, kɛ jamɔ su yɛ mli. Ebatsɔ nɔ ni akpɛlɛɔ nɔ yɛ akutsei komɛi amli. Asheee lɛ gbeyei. Yɛ no najiaŋ lɛ, ebafee nɔ ko ni he ehiaaa tsɔ yɛ be kɛ beaŋ. Yɛ hei ni jamɔ he tsui ni anáa nyiɛɔ mɛi babaoo ahiɛ kɛyaa nibii po ni efɔɔɔ kaa lɛ anɔ kpɛlɛmɔ mli lɛ, ayɛ kpɛmɔ ená bulɛ babaoo.

Yɛ anɔkwale mli lɛ je lɛ mli jamɔi lɛ ebatsɔ jarayeli ko, heni mɛi yɔɔ heyeli ni amɛkɛaahala nɔ ni saa amɛhiamɔ nibii, taakɛ bɔ ni mɔ ko baahe aspaaterei. Nɔ ni tamɔɔɔ nakai lɛ, Yesu wie nibii enyɔ pɛ ni abaanyɛ ahala he. Ekɛɛ akɛ: “Nyɛbotea agbó fintɔŋŋ lɛ mli! Ejaakɛ agbó ni lɛɛ kɛ gbɛ tɛtrɛɛ ji nɔ ni kɛ mɔ yaa hiɛkpatamɔ mli lɛ, ni mɛi ní boteɔ mli lɛ fá pii. Shi agbó fintɔŋŋ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.” (Mateo 7:13, 14) Taakɛ eji lɛ, wɔyɛ heyeli ni wɔkɛaahala gbɛ ni wɔbaanyiɛ nɔ. Shi akɛni wɔ naanɔ hilɛ-kɛhamɔ he eba oshara hewɔ lɛ, nakai halamɔ lɛ he miihia waa. Bɔni afee ni wɔnine ashɛ mumɔŋ sɛɛyoomɔ nɔ lɛ, ebiɔ ni wɔtiu anɔkwale gbɛ lɛ sɛɛ—gbɛ ni anaa yɛ Nyɔŋmɔ Wiemɔ, ni ji Biblia lɛ pɛ mli lɛ.

[Shishigbɛ niŋmaa]

[Mfoniri ni yɔɔ baafa 5]

Mɛi babaoo buɔ ayɛ kpɛmɔ akɛ jamɔ su ko ni yeee mɔ awui

[Mfoniri ni yɔɔ baafa 6]

Ashwãifeemɔ kɛ ŋkunyaayeli yɛ tsakpaa be fɛɛ be

[Mfoniri ni yɔɔ baafa 6]

Ani mɛi ní kɛ amɛhe woɔ ayɛ kpɛmɔ mli lɛ miifee Abonsam suɔmɔnaa nii ni amɛleee?

[Mfonirii ni yɔɔ baafa 7]

Biblia lɛ jieɔ anɔkwale gbɛ lɛ kpo etsɔɔ