Gbɔmɛi Ahe Wuo ni Ayaa yɛ Aegean Ŋshɔ lɛ Hiɛ

GREECE shikpɔŋ wulu lɛ kã shi kɛyaa kooyigbɛ kɛ anaigbɛ, ni Crete ŋshɔkpɔ lɛ yɛ wuoyigbɛ, Turkey shikpɔŋ lɛ kã bokagbɛ, ni Aegean Ŋshɔ lɛ ehà hei babaoo yɛ Mediterranean lɛ bokagbɛ. Ákɛ he ni hiŋmɛigbelemɔ shihilɛi ni nɔ kwɔlɔ jɛ lɛ, Aegean Ŋshɔ lɛ nɔ eyi obɔ kɛ ŋshɔkpɔi wuji kɛ bibii pii. Bɔ ni ŋshɔkpɔ shikpɔji lɛ naabunaabui lɛ bɛ trɔmɔɔ, ni tsũi bibii yɛji mamɔ nɔ ni ekpɛlɛɔ yɛ hulu lɛ nɔ lɛ, ha lalafolɔ ko kɛto “tɛsaa okpɔŋɔ ni ekuɛ he tsɔi ete shi ni egbɛ basaa” lɛ he.

Ŋwanejee ko bɛ he akɛ no hewɔ ni nɛkɛ ŋshɔkpɔi nɛɛ ebafee hei ni afãa gbɛ ayakwɛɔ yɛ je lɛŋ lɛ ateŋ ekome ni mɛi babaoo yaa! Jeŋba kpakpai hu ni hii kɛ yei ni tsuɔ nii yɛ jɛmɛ lɛ yɔɔ lɛ haa shikpɔŋ lɛ nɔ fɛo lɛ yaa hiɛ. Nɛkɛ gbɔmɛi nɛɛ, ni yeɔ anɔkwa ni amɛfeɔ gbɔ, ni kɛlɛ, jeee mɔ ko tsɔɔ amɛ ni amɛbaa amɛjeŋ jogbaŋŋ nɛɛ kɛ su krɛdɛɛ ko fataa bɔ ni shikpɔji nɛɛ yɔɔ srɔto waa lɛ he.

Mɛi ni yɔɔ ŋshɔkpɔ lɛ nɔ lɛ ateŋ mɛi babaoo yaa wuo yɛ Aegean Ŋshɔ lɛ hiɛ, ni amɛkɛlɛɔ amɛhe. Shi “wuoyaa” he nɔ kroko ni he hiaa hu miiwo yibii yɛ nakai shikpɔŋ lɛ nɔ. “Gbɔmɛi ahe wolɛi,” Nyɔŋmɔ Maŋtsɛyeli lɛ he sanekpakpa lɛ shiɛlɔi, tsakeɔ Aegean ŋshɔkpɔi lɛ, ni amɛmiifee mɛi Kristofoi kaselɔi.—Mateo 4:18, 19; Luka 5:10.

Aaafee afii ohai 19 ni eho nɛɛ ni Kristofoi shiɛlɔi yasara Aegean ŋshɔkpɔi lɛ. Yɛ aaafee afi 56 Ŋ.B. lɛ, beni bɔfo Paulo miiku esɛɛ kɛmiijɛ emaŋsɛɛ sanekpakpa shiɛmɔ nitsumɔ mli kɛbaa lɛ, eyahi Lésvos, Chios, Samos, Kos, kɛ Rhodes ŋshɔkpɔi lɛ anɔ fioo. Ákɛ shiɛlɔ ni yɔɔ ekãa lɛ, Paulo baashiɛ eha mɛi ni yɔɔ ŋshɔkpɔi lɛ anɔ lɛ ekomɛi. (Bɔfoi lɛ Asaji 20:14, 15, 24; 21:1, 2) Etamɔ nɔ ni bɔ fɛɛ bɔ ni fee lɛ beni ekɛ afii enyɔ ehi tsũŋ yɛ Roma sɛɛ lɛ, etee Crete ni ekɛ ehe yawo Kristofoi anitsumɔ lɛ mli yɛ jɛmɛ. Beni klɛŋklɛŋ afii oha lɛ baa enaagbee lɛ, akɛ bɔfo Yohane yato Patmos ŋshɔkpɔ lɛ nɔ “yɛ Nyɔŋmɔ wiemɔ lɛ kɛ Yesu Kristo he odaseyeli lɛ hewɔ.” (Kpojiemɔ 1:9) Te sanekpakpa jajelɔi anitsumɔ lɛ yaa nɔ ehaa tɛŋŋ yɛ nɛkɛ ŋshɔkpɔi nɛɛ anɔ?

Shiɛmɔ He Tafaa ni Nyɔmɔwoo Yɔɔ Mli

Shiɛmɔ yɛ nɛkɛ ŋshɔkpɔi bibii nɛɛ nɔ wa, ni ebiɔ mɔdɛŋbɔɔ babaoo. Ebiɔ mɔdɛŋbɔɔ kɛ he-kɛ-afɔleshaa babaoo diɛŋtsɛ. Ŋshɔkpɔi lɛ ekomɛi kɛ amɛhe jɛkɛ. Yɛ hei komɛi lɛ etsɛɔ dani anáa lɛlɛ loo kɔɔyɔŋ lɛlɛ kɛfãa gbɛ, ni yɛ hei krokomɛi hu lɛ anáaa eko kwraa, titri yɛ fɛibe mli. Ŋshɔ lɛ hiɛ nyɛɔ efeɔ hamahama, titri lɛ kɛ meltemia—kooyigbɛ ahum ni naa wa lɛ tswa lɛ. Kɛfata he lɛ, akrowai ni yɔɔ ŋshɔkpɔi lɛ anɔ lɛ kɛ amɛhe jɛkɛ, ni jɛmɛ yaa wa ejaakɛ mulu ni teɔ shi yɛ gbɛjegbɛi ni awoko nɔ kootaa lɛ anɔnyiɛmɔ wa waa. Ni akrowai lɛ ekomɛi lɛ, lɛji bibii pɛ anyɛɔ akɛyaa jɛmɛ.

Ŋɔɔ Icaria ŋshɔkpɔ lɛ akɛ nɔkwɛmɔnɔ. Maŋtsɛyeli sanekpakpa lɛ shiɛlɔi 11 ni yɔɔ asafo bibioo lɛ mli lɛ nyɛɛɛ atsu akrowai ni yɔɔ nakai ŋshɔkpɔ lɛ nɔ lɛ mli nii kɛmɔ shi, ni nakai nɔŋŋ ji ŋshɔkpɔi  bibii ni bɛŋkɛ lɛ lɛ hu. Enɛ hewɔ lɛ, Kristofoi nyɛmimɛi hii kɛ yei jɛɔ Samos amɛbayeɔ amɛbuaa koni ashiɛ atsɔɔ gbɔmɛi ni yɔɔ Icaria lɛ, kɛ agbɛnɛ hu mɛi ni yɔɔ Phournoi, Patmos, kɛ Lipsos ŋshɔkpɔi lɛ anɔ. Nyɛsɛɛ nɛɛ, beni Odasefoi lɛ fã ta ni tamɔ nɛkɛ lɛ, amɛnyɛ amɛkɛ woji tɛtrɛbii 650, woji bibii 99, kɛ woji ni gbaa Biblia mli saji 25 ha! Efee amɛ naakpɛɛ akɛ amɛyanina gbɔmɛi ni leee Yehowa he nɔ ko kwraa, gbɔmɛi ni kpa amɛ fai koni amɛhi shi ni amɛtsɔɔ amɛ nii babaoo lolo kɛjɛ Biblia lɛ mli. Awula ko kɛɛ Odasefonyo ko akɛ: “Ojogbaŋŋ, amrɔ nɛɛ ooya. Shi miyɛ Biblia mli saji babaoo lolo ni mabi. Namɔ baaye ebua mi?” Kristofonyo yoo lɛ wo lɛ shi akɛ ebaatsu miishɛɛ ni ená lɛ he nii kɛtsɔ tɛlifoŋ nɔ, ni efee nakai kɛje Biblia nikasemɔ shishi.

Beni nɔkwɛlɔ gbɛfalɔ ko yasara Icaria lɛ, eto gbɛjianɔ koni ekɛ otsi lɛ naagbee gbi lɛ atsu ŋshɔkpɔ lɛ fɛɛ nɔ nii. Eha Maŋtsɛyeli shiɛlɔi 30 ni jɛ Samos lɛ baye amɛbua. Ehe bahia ni nyɛmimɛi ni baa lɛ awo gbii enyɔ ni amɛkɛhi gbɔiatoohe ko lɛ kɛ kar srɔtoi, kɛ tsɔne ni nyɛɔ eyaa he fɛɛ he ni amɛhai lɛ he nyɔji. Nugbɔ nɛ waa gbii enyɔ ni ho lɛ, ni hiɛnɔkamɔ ko bɛ akɛ jeŋ baatse. Shi nyɛmimɛi lɛ haaa enɛ atsĩ amɛnaa, amɛkai wiemɔi ni yɔɔ Jajelɔ 11:4 lɛ: “Mɔ ni saraa kɔɔyɔɔ lɛ, eduŋ nii, ni mɔ ni kwɛɔ atatui lɛ, ekpaŋ nii.” Yɛ naagbee lɛ jeŋ batse bɔ ni sa, ni beni amɛkɛ shɛɛ sane ni he hiaa lɛ ha mɛi fɛɛ ni yɔɔ ŋshɔkpɔ lɛ nɔ amɛgbe naa lɛ, nyɛmimɛi lɛ ku amɛsɛɛ kɛtee shia kɛ miishɛɛ, ni amɛtsui nyɔ amɛmli.

Shiɛlɔi 16 ni yɔɔ Andros ŋshɔkpɔ lɛ nɔ lɛ bɔ mɔdɛŋ waa koni amɛtsu ŋshɔkpɔ muu lɛ fɛɛ nɔ nii. Beni nyɛmimɛi enyɔ komɛi shɛ akrowa ko ni etse ehe banee ko mli lɛ, amɛtswa amɛfai shi akɛ amɛbaashiɛ amɛtsɔɔ mɛi ni yɔɔ jɛmɛ lɛ fɛɛ. Amɛkɛ mɛi wie yɛ amɛshiai amli, yɛ gbɛjegbɛi lɛ anɔ, kɛ ŋmɔshi. Amɛtee polisifoi lɛ anitsumɔhe lɛ po ni amɛyashi woji yɛ jɛmɛ. Akɛni amɛná nɔmimaa akɛ amɛkɛ mɛi fɛɛ ni yɔɔ akrowa lɛ mli lɛ egba sane hewɔ lɛ, amɛfee amɛjwɛŋmɔ akɛ amɛmiiku amɛsɛɛ ni amɛya. Beni amɛshiɔ maŋtelɛŋ lɛ, amɛna ni Greek Ɔrtodɔks osɔfo lɛ miiba. Akɛni amɛyɔse akɛ amɛshiɛko amɛhako lɛ hewɔ lɛ, amɛha lɛ wolo bibioo ko ni ekɛ miishɛɛ he. Kpaako agbɛnɛ amɛná nɔmimaa diɛŋtsɛ akɛ amɛshiko mɔ ko yɛ mɔdɛŋ ni amɛbɔɔ koni amɛshiɛ lɛ mli!

Gbɔmɛi 38 pɛ yɔɔ Gavdos (aloo Cauda)—ni ji ŋshɔkpɔ bibioo ni hɔ Crete mlishi lɛ—ni abuɔ jɛmɛ akɛ Europa wuoyigbɛ ni jɛkɛ fe fɛɛ. (Bɔfoi lɛ Asaji 27:16) Nɔkwɛlɔ gbɛfalɔ ko kɛ eŋa kɛ gbalashihilɛ mli hefatalɔi krokomɛi kɛ gbii etɛ shiɛ yɛ jɛmɛ. Amɛwɔ buu mli bɔni afee ni amɛkafite shika babaoo. Amɛkɛ mɛi fɛɛ ni yɔɔ jɛmɛ lɛ gba sanekpakpa lɛ he sane, ni eŋɔɔ nyɛmimɛi lɛ anaa akɛ gbɔmɛi lɛ ahe tsɛ̃ɛɛ amɛ. Amɛnuko Yehowa Odasefoi ahe sane ko kwraa dã—kɛ eji sane kpakpa jio, sane fɔŋ jio—amɛleee. Gbɔmɛi lɛ kɛ osɔfo lɛ he woji 19 kɛ woji bibii 13. Yɛ be mli ni Odasefoi lɛ kɛ lɛlɛ bibioo ko kuɔ amɛsɛɛ kɛbaa Crete lɛ, ŋshɔ lɛ hiɛ bafee hamahama, ni ekɛ amɛwala wo oshara mli. Amɛkɛɛ akɛ: “Wɔda Yehowa shi akɛ wɔyashɛ shia shweshweeshwe, shi wɔjie eyi hu akɛni eha wɔyawo egbɛi lɛ hiɛnyam yɛ Europa wuoyigbɛ ni jɛkɛ fe fɛɛ lɛ nɔ lɛ hewɔ.”

Patmos ji he ni bɔfo Yohane ŋma Biblia lɛ mli naagbee wolo, ni ji Kpojiemɔ lɛ yɛ. Kɛbashi nyɛsɛɛ nɛɛ, Yehowa Odasefonyo ko kwraa bɛ Patmos. Nyɛmimɛi ni yɔɔ Samos lɛ toɔ shiɛmɔ he tafãa krɛdɛɛ ko he gbɛjianɔ yɛ nakai ŋshɔkpɔ lɛ nɔ. Amɛle akɛ amɛkɛ shitee-kɛ-woo ni naa wa baakpe, ejaakɛ Greek Ɔrtodɔks Sɔlemɔ lɛ ehe shi waa yɛ jɛmɛ. Afɔ̃ nyɛmimɛi yei enyɔ ni kɛ awula ko wieɔ sanekpakpa lɛ he lɛ nine koni amɛba eshia lɛ mli.  Awula lɛ wu tee nɔ ebi nyɛmimɛi yei lɛ shii abɔ koni amɛtsɔɔ lɛ mɔ ni tsu amɛ kɛba amɛshia lɛ. Beni amɛkɛɛ lɛ akɛ amɛmiiya shiai lɛ fɛɛ mli lɛ, ebi ekoŋŋ akɛ: “Ani nyɛheɔ nyɛyeɔ akɛ jeee akutso lɛ mlinyo ko tsu nyɛ biɛ lo?” Eŋa ni ná ele Yehowa Odasefoi be mli ni eyɔɔ Zaire lɛ gba nyɛmimɛi yei lɛ sane ni ba nakai leebi lɛ. Awula lɛ kɛɛ akɛ: “Taakɛ mifeɔ yɛ gbii krokomɛi amli lɛ, miisɔle koni Yehowa atsu Odasefoi kɛba ŋshɔkpɔ lɛ nɔ. Miwu ŋmɔ mi. Efee mi kɛ miwu fɛɛ naakpɛɛ beni wɔna nyɛ yɛ wɔshinaa lɛ naa lɛ. No hewɔ ni ebiɔ nyɛ shii abɔ koni nyɛtsɔɔ lɛ mɔ ni tsu nyɛ kɛba wɔshia lɛ.” Akɛ awula lɛ je Biblia mli nikasemɔ shishi amrɔ nɔŋŋ. Atsɔ tɛlifoŋ nɔ akɛ nyɔji nyɔŋma kase nii, eyɛ mli akɛ nyɛmiyoo lɛ kɛ yoo lɛ ni yɔɔ wiemɔ lɛ he miishɛɛ lɛ fɛɛ fite shika babaoo yɛ he moŋ. Amrɔ nɛɛ abaptisi lɛ, ni lɛ pɛ ji Odasefonyo ni yɔɔ nakai ŋshɔkpɔ ni aaafee afii 1,900 ni eho nɛɛ lɛ, akɛ Yohane kome too yato nɔ lɛ.

“Wuoyaa” yɛ Lɛjiadaamɔhei

Lɛji bawaa Aegean ŋshɔkpɔi lɛ a-lɛjiadaamɔhei srɔtoi babaoo lɛ, ni amɛjieɔ saralɔi babaoo ni efã gbɛ kɛba koni amɛbakwɛ bɔ ni jɛmɛ yɔɔ. Enɛ hewɔ lɛ eji hegbɛ kpele ni Yehowa Odasefoi lɛ ená akɛ amɛnine aaashɛ gbɔmɛi ni jɛ maji srɔtoi kɛ wiemɔi srɔtoi anɔ. Asafo lɛ shɛɔ Biblia he woji yɛ wiemɔi srɔtoi amli, ni shiɛlɔi lɛ kɛ woji tɛtrɛbii akpekpei abɔ haa mɛi ni eba jɛmɛ kwɛmɔ lɛ. Lɛji lɛ ekomɛi kuɔ amɛsɛɛ kɛbaa lɛjiadamɔhei nɛɛ nɔŋŋ yɛ otsi lɛ mli, ni enɛ haa nyɛmimɛi lɛ náa hegbɛ ni sa babaoo kɛfeɔ sɛɛsaramɔi, ni amɛkɛ lɛlɛ lɛ mli bii lɛ ekomɛi po feɔ Biblia mli nikasemɔi.

Yɛ afi 1996 hulutsoo be mli lɛ, nyɛmiyoo ko ni ji be-fɛɛ shiɛlɔ ni yɔɔ Rhodes ŋshɔkpɔ lɛ nɔ lɛ ye oblanuu Jamaicanyo ko ni tsuɔ nii yɛ lɛlɛ lɛ eko mli ni baa lɛjiadaamɔhe lɛ daa Sohaa lɛ odase. Sohaa ni nyiɛ sɛɛ lɛ afɔ̃ nuu lɛ nine kɛtee kpokpaa wulu nɔ kpee ní abaafee yɛ ŋshɔkpɔ lɛ nɔ lɛ shishi. Nyɛmiyoo gbɛgbalɔ lɛ kɛ Blɔfo Biblia ni ehiɛ lɛ ye ebua lɛ ni enu Biblia mli anɔkwalei ni je kpo yɛ wiemɔi lɛ amli lɛ shishi. Suɔmɔ kɛ miishɛɛ ni Odasefoi lɛ jie lɛ kpo yɛ kpee lɛ shishi lɛ ná oblanuu lɛ nɔ hewalɛ waa diɛŋtsɛ. Sohaa ni nyiɛ sɛɛ lɛ, efɔ̃ gbɛgbalɔi enyɔ nine kɛba lɛlɛ lɛ mli. Gbɛgbalɔi lɛ kɔlɔ Blɔfo kɛ Spanish woji kɛtee. Eshɛɛɛ ŋmɛlɛtswaa kome ni amɛ shiɛmɔ baagi lɛ mli nibii fɛɛ tã! Jamaica oblanyo  nɛɛ tee nɔ ekase Biblia lɛ daa Sohaa aahu kɛyashi hulutsoo be lɛ ho. Beni hulutsoo be kroko shɛ lɛ, eku esɛɛ eba ekoŋŋ koni ebatsa enikasemɔ lɛ nɔ. Shi agbɛnɛ, ekpɛ eyiŋ akɛ ebaatsake enitsumɔ lɛ bɔni afee ni enyɛ ená mumɔŋ hiɛyaa. Kɛkɛ ni eku esɛɛ etee ekoŋŋ. Kwɛ bɔ ni nyɛmimɛi ni yɔɔ Rhodes lɛ amii shɛ amɛhe eha beni amɛná amɛle akɛ oblanuu nɛɛ yabaptisi yɛ afi 1998 shishijee lɛ mli!

“Loo” ni Hoɔ Kɛyaa He Kroko ni Ashaa

Aegean Ŋshɔ lɛ ji he ko ni looi ni miifã kɛya he kroko lɛ fɔɔ tsɔmɔ, looi tamɔ maŋ kɛ onyakele ni batsɔɔ jɛmɛ kɛyaa ni yɛ naagbee lɛ amɛyaboteɔ wuoyalɔi ni he esa waa ayai amli lɛ. Yɛ nakai gbɛ nɔŋŋ nɔ lɛ, Maŋtsɛyeli shiɛlɔi náa mɛi babaoo ni hiɛ tsui kpakpa yɛ nitsulɔi ni efã kɛjɛ Europa Bokagbɛ maji lɛ anɔ kɛba Greece lɛ amli.

Rezi eye afii nyɔŋma beni ekane Yehowa kɛ eyiŋtoi ahe nii klɛŋklɛŋ kwraa yɛ Buu-Mɔɔ kɛ Awake! lɛ mli lɛ. No mli lɛ eyɛ Albania. Afii etɛ sɛɛ lɛ ekɛ eweku lɛ fã kɛtee Rhodes ŋshɔkpɔ lɛ nɔ. Gbi ko lɛ, Rezi sɔle koni Yehowa aye abua lɛ ni ena ewebii lɛ yɛ eshia hee ni eba mli lɛ mli. Enɔ jetsɛremɔ lɛ, etsɛ ba shia ni ehiɛ woji tɛtrɛbii, ni ji Buu-Mɔɔ kɛ Awake! ni ele amɛ jogbaŋŋ lɛ yɛ edɛŋ, ni Rezi ná miishɛɛ waa. Rezi yatao nyɛmiyoo ni kɛ woji tɛtrɛbii lɛ ha etsɛ lɛ, ni etsɛɛɛ ni ebɔi Nilee Ni Kɛ Mɔ Yaa Naanɔ Wala Mli wolo lɛ kasemɔ. Bei komɛi lɛ ekɛɔ akɛ akɛ lɛ akase nii shii etɛ yɛ gbi kome too lɛ nɔŋŋ mli! Nyɔji enyɔ sɛɛ lɛ ebatsɔ shiɛlɔ ni abaptisiko lɛ, ni yɛ March 1998 mli lɛ, abaptisi lɛ beni eye afii 14. Nakai gbi lɛ nɔŋŋ lɛ, eje gbɛgbalɔi awalɔ nitsumɔ lɛ shishi, ni nyɔji ekpaa sɛɛ lɛ ekɛ ehe wo daa gbɛgbamɔ nitsumɔ lɛ, aloo be-fɛɛ sɔɔmɔ nitsumɔ lɛ mli.

Nyɛminuu ko ni yɔɔ Kos ŋshɔkpɔ lɛ nɔ lɛ, kɛ Russiabii komɛi miikase nii. Beni ebi amɛ akɛ amɛyɛ nanemɛi komɛi ni baasumɔ ni amɛkase Biblia lɛ, amɛkɛ amɛ tee Armeniabii enyɔ komɛi ni ebote gbalashihilɛ mli lɛ aŋɔɔ—Leonidas kɛ eŋa, Ophelia—yɛ akrowa ko ni kɛ jɛmɛ jɛkɛmɔ ji kilomitai 30. Nyɛmimɛi lɛ kɛ naakpɛɛ sane ko yakpe. Armeniabii ni ji gbalashihilɛ mli hefatalɔi nɛɛ jie kotoku ko kpo ni Armenia kɛ Russia Biblia woji ni Buu Mɔɔ Asafo lɛ fee eyi lɛ obɔ! Amɛtsɔɔ mli akɛ, amɛkɛ Yehowa Odasefoi ekase Biblia lɛ ni amɛtee hiɛ saŋŋ ni amɛbaanyɛ amɛtsɔmɔ shiɛlɔi ni abaptisiko amɛ. Yɛ maŋkwramɔ basabasafeemɔ kɛ shika he naagbai hewɔ lɛ, amɛjo foi amɛshi amɛmaŋ. Beni amɛshɛ Kos nɔŋŋ ni amɛkɛ Leonidas mami kɛ enyɛmiyoo ni yɔɔ jɛmɛ momo lɛ bɔi nikasemɔ. Etsɛɛɛ nɔŋŋ ni Odasefoi lɛ kɛ mɛi heei etɛ je Biblia mli nikasemɔi ashishi—Ophelia kɛ Leonidas, kɛ emami kɛ enyɛmiyoo. Enɛ biɔ ni amɛfã gbɛ kilomitai 30 kɛya kɛba shii etɛ daa otsi. Leonidas kɛ eŋa baptisi yɛ nyɔji komɛi asɛɛ. Kwɛ bɔ ni awo nyɛmimɛi ni yɔɔ jɛmɛ lɛ he-kɛ-afɔleshaa mumɔ ni amɛjie kpo amɛtsɔɔ lɛ he nyɔmɔ aha!

Yehowa Haa Eshwereɔ

Anaa yɛ faŋŋ mli akɛ, Yehowa jɔɔmɔ yɛ Maŋtsɛyeli jajelɔi 2,000 ni yɔɔ ekãa babaoo ni yɔɔ Aegean ŋshɔkpɔi nɛɛ anɔ lɛ. Amrɔ nɛɛ, ayɛ Yehowa Odasefoi asafoi 44 kɛ kui 25 yɛ jɛmɛ. Yɛ kui lɛ agbɛfaŋ lɛ, 17 ji nɔ ni afeɔ yɛ maŋsɛɛ wiemɔi amli, ejaakɛ Yehowa suɔmɔnaa nii ji akɛ, “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:4) Kɛfata he lɛ, gbɛgbalɔi krɛdɛɛi 13 kɛ ekãa babaoo miiye kɛmiibua koni nine ashɛ mɛi babaoo nɔ lolo yɛ shikpɔŋkukuji ni amɛtse amɛhe banee lɛ nɔ.

Afii ohai abɔ nɛ ni Aegean Ŋshɔ lɛ ebatsɔ he ko ni hiŋmɛigbelemɔ kɛ jarayeli etee hiɛ waa yɛ. Yɛ nyɛsɛɛ afii nyɔŋmai nɛɛ amli lɛ ebatsɔ he ni ale waa ni mɛi ni fãa gbɛ kɛyakwɛɔ nii lɛ ateŋ mɛi pii yaa. Shi nɔ ni he hiaa fe fɛɛ lɛ, ákɛ “gbɔmɛi ahe wolɛi lɛ,” Maŋtsɛyeli jajelɔi lɛ ená mɛi pii ni hiɛ tsui kpakpa ni miisumɔ ni amɛjie Yehowa yi. Amɛ fɛɛ amɛfee ekome ni amɛha gbalɛ naa ninefɔɔ ni akɛha lɛ eba mli akɛ: “Amɛkɛ anunyam aha Yehowa, ní amɛjaje eyijiemɔ lɛ yɛ ŋshɔkpɔi lɛ anɔ!”—Yesaia 42:12.

[Shikpɔŋ he mfoniri ni yɔɔ baafa 22]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Aegean Ŋshɔ

GREECE

Lésvos

Chios

Samos

Ikaria

Phournoi

Patmos

Kos

Rhodes

Crete

TURKEY

[Mfoniri ni yɔɔ baafa 23]

Lésvos Ŋshɔkpɔ

[Mfoniri ni yɔɔ baafa 24]

Patmos ŋshɔkpɔ lɛ

[Mfoniri ni yɔɔ baafa 24]

Crete ŋshɔkpɔ lɛ