Ná Miishɛjemɔ yɛ Yehowa Hewalɛ lɛ Mli

“Kɛ ŋkɔmɔyeli fa babaoo yɛ mimli lɛ, omiishɛjemɔi lɛ haa misusuma mii shɛɔ ehe.”—LALA 94:19.

BIBLIA lɛ yɛ miishɛjemɔ wiemɔi kɛha mɛi fɛɛ ni sumɔɔ ni amɛná miishɛjemɔ lɛ. Belɛ, ŋwanejee ko bɛ he akɛ, no hewɔ ni The World Book Encyclopedia lɛ kɛɔ akɛ “gbɔmɛi babaoo etsɔ amɛhe kɛtee Biblia lɛ he kɛha miishɛjemɔ, hiɛnɔkamɔ, kɛ gbɛtsɔɔmɔ yɛ haomɔ bei ni bɛ faŋŋ nɛɛ mli lɛ.” Mɛni hewɔ?

Ejaakɛ wɔ-Bɔlɔ ni yɔɔ suɔmɔ, ni ji “miishɛjemɔ fɛɛ Nyɔŋmɔ lɛ,” Mɔ ni “shɛjeɔ wɔmii yɛ wɔmanehului lɛ fɛɛ mli” lɛ ŋma Biblia lɛ. (2 Korintobii 1:3, 4) Lɛ ji ‘Nyɔŋmɔ ni kɛ miishɛjemɔ haa.’ (Romabii 15:5) Yehowa efee nɔkwɛmɔnɔ ní abaatsɔ nɔ akɛ yelikɛbuamɔ aha wɔ fɛɛ lɛ efɔ̃ shi. Etsu e-Bi koome, Kristo Yesu kɛba shikpɔŋ nɔ koni ebaha wɔ hiɛnɔkamɔ kɛ miishɛjemɔ. Yesu tsɔɔ akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Yohane 3:16) Biblia lɛ wieɔ Yehowa he akɛ mɔ ni “daa nɛɛ etereɔ wɔjatsui lɛ ehaa wɔ; Mawu lɛ nɔŋŋ ji wɔyiwalaheremɔ.” (Lala 68:20) Adesai ni sheɔ Nyɔŋmɔ gbeyei lɛ baanyɛ akɛɛ kɛ nɔmimaa akɛ: “Mikɛ Yehowa toɔ mihiɛ daa: ni eyɔɔ mininejurɔ nɔ nɛɛ, mididaŋ.”—Lala 16:8.

Biblia mli saji ni tamɔ enɛ tsɔɔ suɔmɔ ni mli kwɔ ni Yehowa Nyɔŋmɔ yɔɔ kɛha wɔ adesai lɛ. Eyɛ faŋŋ akɛ eesumɔ waa—ni agbɛnɛ ebaanyɛ—ni eshɛje wɔmii babaoo ni eha wɔpiŋmɔ yɛ haomɔ bei amli lɛ aba shi. “Lɛ ehaa mɔ ni egbɔjɔ lɛ hewalɛ, ni mɔ ni bɛ nyɛmɔ lɛ ehaa ehewalɛ fáa.” (Yesaia 40:29) Belɛ, te wɔɔfee tɛŋŋ wɔná miishɛjemɔ kɛjɛ Yehowa hewalɛ lɛ mli lɛ?

Miishɛjemɔ Hewalɛ ni Jɛɔ Yehowa Kwɛmɔ lɛ Mli

Lalatsɛ lɛ ŋma akɛ: “Shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ní jalɔ adidã.” (Lala 55:23) Hɛɛ Yehowa Nyɔŋmɔ yɛ adesai aweku lɛ he miishɛɛ. Bɔfo Petro ma nɔ mi eha klɛŋklɛŋ afii oha lɛ mli Kristofoi lɛ akɛ: ‘Nyɔŋmɔ jwɛŋɔ nyɛhe.’ (1 Petro 5:7) Yesu Kristo ma bɔ ni Nyɔŋmɔ buɔ adesai ehaa lɛ nɔ mi beni ekɛɛ akɛ: “Ani jeee kpãai enyɔ ahɔɔ afilimatai enumɔ aheɔ? shi Nyɔŋmɔ hiɛ kpaaa amɛteŋ ekomefolo nɔ. Shi nyɛyiteŋ tsɔi tete akane fɛɛ. No hewɔ lɛ nyɛkashea gbeyei; nyɛjara wa fe afilimatai babaoo.” (Luka 12:6, 7) Wɔjara wa kɛha Nyɔŋmɔ aahu akɛ esusuɔ wɔnii ni edaaa fe fɛɛ lɛ po he. Ele nibii ni wɔ diɛŋtsɛ lɛ wɔleee lɛ, ejaakɛ eyɛ wɔteŋ mɔ fɛɛ mɔ he miishɛɛ babaoo.

Beni Svetlana, ni ji oblayoo ahoshwibɔlɔ ni atsĩ etã yɛ sane ni tsɔ hiɛ lɛ mli nu miishɛɛ ni tamɔ nɛkɛ ni Yehowa yɔɔ kɛha lɛ lɛ he lɛ, ni eshɛje emii babaoo. Kulɛ eehe ní egbe ehe, ni ekɛ Yehowa Odasefoi kpe. Kɛkɛ ni ekpɛlɛ Biblia mli nikasemɔ nɔ, ni eye ebua lɛ ni ebale Yehowa akɛ mɔ ko ni yɔɔ diɛŋtsɛ ni yɔɔ ehilɛ-kɛhamɔ he miishɛɛ. Enɛ sa etsui he, ni etsirɛ lɛ ni efee tsakemɔ yɛ eshihilɛ mli, ni ejɔɔ ehe nɔ eha Nyɔŋmɔ. Eha Svetlana ná bulɛ ni sa ní he hiaa lɛ koni emia ehiɛ yɛ enaagbai lɛ fɛɛ sɛɛ, ni ená jwɛŋmɔ kpakpa yɛ shihilɛ he lɛ hu eha ehe. Amrɔ nɛɛ, ekɛɔ akɛ: “Miyɛ nɔmimaa akɛ, Yehowa shiŋ mi kɔkɔɔkɔ. Mina akɛ nɔ ni aŋma yɛ 1 Petro 5:7 lɛ ji anɔkwale. Ekɛɔ akɛ: ‘Nyɛŋɔa nyɛhaomɔ fɛɛ nyɛfɔa [Yehowa] nɔ, ejaakɛ lɛ ejwɛŋɔ nyɛnɔ.’”

Hiɛnɔkamɔ ni Damɔ Biblia nɔ lɛ Shɛjeɔ Mɔ Mii

Gbɛ titri ni Nyɔŋmɔ tsɔɔ nɔ ekɛ miishɛjemɔ haa lɛ ji kɛtsɔ e-Wiemɔ ni aŋma lɛ nɔ, nɔ ni hiɛnɔkamɔ ni yɔɔ miishɛɛ kɛha wɔsɛɛ be yɔɔ mli lɛ. Bɔfo Paulo ŋma akɛ: “Nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ aná hiɛnɔkamɔ.” (Romabii 15:4) Paulo ha bɔ ni anɔkwa hiɛnɔkamɔ kɛ miishɛjemɔ yɔɔ tsakpaa lɛ fee faŋŋ beni eŋma akɛ: “Wɔtsɛ Nyɔŋmɔ ni sumɔ wɔ ni ekɛ naanɔ miishɛjemɔ kɛ nɔhiɛkamɔ kpakpa ha wɔ yɛ duromɔ naa lɛ, lɛ nɔŋŋ eeetsɛ nyɛtsuii eŋmɛ nyɛmli, ni eeewaje nyɛ yɛ wiemɔ kpakpa kɛ nitsumɔ kpakpa fɛɛ mli.” (2 Tesalonikabii 2:16, 17) Nɔ ni fata “nɔhiɛkamɔ kpakpa” nɛɛ he ji gbɛkpamɔ akɛ aaana shihilɛ ni yeɔ emuu, ni miishɛɛ yɔɔ mli, ni bɛ naagbee yɛ paradeiso shikpɔŋ nɔ.—2 Petro 3:13.

Hiɛnɔkamɔ kpakpa ni yɔɔ diɛŋtsɛ ni tamɔ enɛ kanya Laimonis, ni ji dãatɔlɔ obubuafo ni atsĩ etã yɛ sane ni tsɔ hiɛ lɛ mli lɛ. Beni ekaneɔ  Yehowa Odasefoi a-Biblia kasemɔ woji lɛ, ená miishɛɛ akɛ eekase jeŋ hee ni yɔɔ Nyɔŋmɔ Maŋtsɛyeli lɛ shishi, he ni abaaku sɛɛ aha ená hewalɛ ekoŋŋ lɛ he nii. Ekane shiwoo ni baaba mli ni kɔɔ tsamɔ ni yɔɔ naakpɛɛ ni nyiɛ sɛɛ nɛɛ he yɛ Biblia lɛ mli akɛ: “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaalá kɛ nyamɔ.” (Yesaia 35:5, 6) Bɔni afee ni Laimonis he asa kɛha shihilɛ yɛ nakai Paradeiso lɛ mli lɛ, efee tsakemɔi wuji. Ekpa dãanumɔ, ni ekutsoŋbii kɛ mɛi ni ele amɛ lɛ yɔse tsakemɔ lɛ. Amrɔ nɛɛ, efeɔ Biblia mli nikasemɔi babaoo, ni egbaa mɛi krokomɛi miishɛjemɔ ni hiɛnɔkamɔ ni damɔ Biblia lɛ nɔ lɛ kɛhaa lɛ he sane.

Nii ni Sɔlemɔ Tsuɔ

Kɛji akɛ wɔmiinu tsuiŋdɔlɛ he yɛ yiŋtoo ko hewɔ lɛ, wɔbaanyɛ wɔná miishɛjemɔ kɛtsɔ sɔlemɔ ni wɔɔsɔle wɔha Yehowa lɛ nɔ. No baanyɛ ajie jatsu lɛ kɛjɛ wɔnɔ. Yɛ be mli ni wɔkpaa fai lɛ, ekolɛ, nibii ni akɛɛ ni yɔɔ Nyɔŋmɔ Wiemɔ lɛ mli ni wɔɔkai lɛ baashɛje wɔmii. Lala ni kɛ fe fɛɛ ni yɔɔ Biblia lɛ mli lɛ tamɔ sɔlemɔ ni ŋɔɔ. Mɔ ni ŋma lɛ lá akɛ: “Yehowa, mikaiɔ oblema kojomɔi lɛ, ni mikɛshɛjeɔ mimii.” (Lala 119:52) Yɛ shihilɛi ni mli wa waa mli, titri lɛ, yɛ nɔ ni kɔɔ gbɔmɔtsoŋ hewalɛnamɔ naagbai ahe lɛ, bei pii lɛ, onáaa nɔ kome, loo nɔ fɛɛ nɔ hetoo. Ekolɛ wɔnyɛŋ wɔkɛ wɔ diɛŋtsɛ wɔhewalɛ atsu nii koni wɔkɛle he ni esa akɛ wɔya. Mɛi babaoo ena akɛ beni amɛfee nɔ fɛɛ nɔ ni adesa baanyɛ afee lɛ sɛɛ lɛ, amɛhe ni amɛtsiɔ kɛyaa Nyɔŋmɔ ŋɔɔ yɛ sɔlemɔ mli lɛ kɛ miishɛjemɔ babaoo kɛ bei pii lɛ, tsabaai ni ayooo baa.—1 Korintobii 10:13.

Pat, ni akɛ lɛ tee helatsamɔhe yɛ oyaiyeli mli lɛ ná nɛkɛ miishɛjemɔ hewalɛ ni yɔɔ sɔlemɔ mli nɛɛ mli niiashikpamɔ. Beni ená hewalɛ sɛɛ lɛ, ekɛɛ akɛ: “Misɔle miha Yehowa, ni mikase diɛŋtsɛ akɛ, esa akɛ mikɛ miwala awo edɛŋ, ni maná hekɛnɔfɔɔ yɛ emli ni mafee esuɔmɔnaa nii. Yɛ nɛkɛ be nɛɛ fɛɛ mli lɛ, mifee dioo; ni miiná Nyɔŋmɔ hejɔlɛ ni atsĩ tã yɛ Filipibii 4:6, 7 lɛ mli ŋɔɔmɔ.” Kwɛ bɔ ni nɛkɛ kukuji nɛɛ baanyɛ ashɛje wɔ fɛɛ wɔmii eha! Paulo wo wɔ hewalɛ yɛ jɛmɛ akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!”

Mumɔ Krɔŋkrɔŋ lɛ ákɛ Miishɛjelɔ

Yɛ gbi gbɛkɛ dani Yesu baagbo lɛ mli lɛ, efee lɛ faŋŋ eha ebɔfoi lɛ akɛ etsɛŋ ni ebaashi amɛ. Enɛ hao amɛ ni eha amɛnii fee mɔbɔ. (Yohane 13:33, 36; 14:27-31) Akɛni Yesu yɔse akɛ miishɛjemɔ baaya nɔ ehe ahia amɛ hewɔ lɛ, ewo shi akɛ: “Mi lɛ mabi tsɛ lɛ, ni eeeha nyɛ hefatalɔ [loo, miishɛjelɔ] kroko, koni ekɛ nyɛ ahi shi kɛya naanɔ.” (Yohane 14:16; NW shishigbɛ niŋmaa) Yesu miiwie Nyɔŋmɔ mumɔ krɔŋkrɔŋ lɛ he yɛ biɛ. Kɛfata nibii krokomɛi ahe lɛ, Nyɔŋmɔ mumɔ lɛ shɛje bɔfoi lɛ amii yɛ amɛ kaai lɛ ashishi, ni ewaje amɛ koni amɛya nɔ amɛfee Nyɔŋmɔ suɔmɔnaa nii.—Bɔfoi lɛ Asaji 4:31.

Angie, mɔ ni shwɛ fioo ni ewu ágbo yɛ be mli ni ená oshara wulu ko sɛɛ lɛ nyɛ edamɔ haomɔi kɛ piŋmɔi fɛɛ ni eshihilɛ lɛ kɛba lɛ naa yɛ omanyeyeli mli. Mɛni ye ebua lɛ? Ekɛɛ akɛ: “Eji Yehowa mumɔ krɔŋkrɔŋ lɛ yeee ebuaaa wɔ kulɛ, wɔnyɛŋ wɔdamɔ niiashikpamɔ ni wɔná lɛ naa, ni wɔya nɔ wɔhe awa. Yehowa hewalɛ lɛ eje kpo faŋŋ yɛ wɔgbɔjɔmɔ lɛ mli lɛɛlɛŋ, ni efee mɔɔ ni wa yɛ wɔhaomɔ be lɛ mli.”

Nyɛmifeemɔ ni Shɛjeɔ Mɔ Mii

Bɔ fɛɛ bɔ ni mɔ aŋkro ko wala shihilɛ mli sane baafee, ni ekɔɔɔ he eko bɔ ni shihilɛi ni waa mɔ he baate shi aha lɛ fɛɛ sɛɛ lɛ, esa akɛ ená miishɛjemɔ yɛ nyɛmifeemɔ ni yɔɔ Yehowa asafo lɛ mli lɛ mli. Nɛkɛ nyɛmifeemɔ nɛɛ kɛ mumɔŋ sɛɛfimɔ kɛ yelikɛbuamɔ haa mɛi ni kɛ amɛhe bɔɔ he lɛ. Jɛmɛ ji he ni mɔ ko baanyɛ aná nanemɛi akuu ni sumɔɔ mɔ, ni susuɔ mɔ he, ni  shɛjeɔ mɔ mii, ni efee klalo, ni miisumɔ ni amɛye amɛbua ni amɛshɛje mɛi krokomɛi amii yɛ haomɔ bei amli lɛ yɛ.—2 Korintobii 7:5-7.

Atsɔɔ Kristofoi asafo lɛ mli bii ni ‘amɛfee mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.’ (Galatabii 6:10) Tsɔsemɔ ni damɔ Biblia lɛ nɔ ni amɛnine shɛɔ nɔ lɛ tsirɛɔ amɛ ni amɛjieɔ nyɛmimɛi asuɔmɔ kɛ hedɔɔ ni mli wa kɛha mɛi krokomɛi akpo. (Romabii 12:10; 1 Petro 3:8) Etsirɛɔ mumɔŋ nyɛmimɛi hii kɛ nyɛmimɛi yei ni yɔɔ asafo lɛ mli lɛ, ni amɛjieɔ mlihilɛ, miishɛjemɔ, kɛ musuŋtsɔlɛ babaoo kpo.—Efesobii 4:32.

Joe kɛ Rebecca, ní amɛbi gbo lɛ ná nakai miishɛjemɔ sɛɛfimɔ lɛ kɛjɛ Kristofoi asafo lɛ mli. Amɛkɛɛ akɛ: “Yehowa kɛ esafo ni sumɔɔ mɔ lɛ eye ebua wɔ kɛtsɔ wɔbe ni mli wa nɛɛ mli. Wɔnine shɛ woji ni aŋmala kɛ tɛlifoŋ ohai abɔ ni atswa lɛ nɔ. Enɛ ha wɔna bɔ ni wɔnyɛmifeemɔ lɛ jara wa ha. Be mli ni oshara lɛ eha wɔfee gbedee lɛ, asafoi babaoo ni yɔɔ he ni wɔyɔɔ lɛ baye amɛbua wɔ, ni amɛha wɔ niyenii, ni amɛsaa wɔshia lɛ amɛha wɔ.”

Ná Miishɛjemɔ!

Beni fimɔ ahum ni tswaa oyayaayai lɛ jeɔ shishi etswaa, ni haomɔ nugbɔ kɛ nyɔŋmɔŋtɛi ni naa wa waa lɛ yaa nɔ eshwieɔ shi lɛ, no mli lɛ, Nyɔŋmɔ efee klalo akɛ ekɛ miishɛjemɔ hebuu aaaha. Nɛkɛ ji bɔ ni lalai lɛ eko wie ehe akɛ mɔ ni kɛ miishɛjemɔ haa, akɛ: “Ekɛ etsɛji aaaha onɔ, ni oooba abo yɛ efiji ashishi.” (Lala 91:4) Nɔkwɛmɔnɔ ni yɔɔ biɛ lɛ baanyɛ afee okropɔŋ. Eji loofɔlɔ ni naa oshara, ní gbɛɔ efiji amli ni ekɛhàa ebii bibii lɛ anɔ lɛ he mfoniri. Yɛ shishinumɔ ni da po naa lɛ, Yehowa ebatsɔ anɔkwa Hebulɔ kɛha mɛi fɛɛ ni yabaa abo yɛ eŋɔɔ lɛ.—Lala 7:2.

Kɛ oosumɔ ni okase Nyɔŋmɔ, esui, eyiŋtoi, kɛ nyɛmɔ ni eyɔɔ ni ekɛshɛjeɔ mɔ mii lɛ he nii babaoo lɛ, no lɛ, aafɔ̃ bo nine ni obakase e-Wiemɔ lɛ. Yehowa Odasefoi baaná he miishɛɛ akɛ amɛaaye amɛbua bo yɛ no gbɛfaŋ. Hɛɛ, bo hu obaanyɛ oná miishɛjemɔ yɛ Yehowa hewalɛ lɛ mli!

[Mfonirii ni yɔɔ baafa 7]

Wɔsɛɛ be he hiɛnɔkamɔ ni damɔ Biblia lɛ nɔ lɛ baanyɛ ekɛ miishɛjemɔ aha