Bó Nɔ ni Mumɔ lɛ Yɔɔ Kɛɛmɔ lɛ Toi
Bó Nɔ ni Mumɔ lɛ Yɔɔ Kɛɛmɔ lɛ Toi
“Otoii hu aaanu wiemɔ ko yɛ osɛɛ akɛ: Gbɛ lɛ nɛ! nyɛnyiɛa nɔ! ninejurɔgbɛ nyɛtsɔ́ jio, abɛkugbɛ nyɛtsɔ́ jio.”—YESAIA 30:21.
1, 2. Yehowa kɛ adesai egba sane yɛ yinɔ be fɛɛ mli yɛ mɛɛ gbɛ nɔ?
PUERTO RICO ŋshɔkpɔ lɛ nɔ ji he ni redio shwɛde kpãa ni yɔɔ hewalɛ waa, ni da fe fɛɛ yɛ je lɛŋ lɛ yɔɔ. Jeŋ nilelɔi kɛ nɔ ni fe afii nyɔŋmai abɔ ekpa gbɛ akɛ amɛkɛ tsɔne wulu nɛɛ baatsu nii ni amɛnine ashɛ shɛɛ saji anɔ kɛtsɔ wala ni yɔɔ ŋwɛiniiaŋ lɛ anɔ. Shi amɛnine shɛko shɛɛ saji ni tamɔ enɛ eko nɔ. Shi kɛlɛ, dɔlɛ sane ji akɛ, shɛɛ saji ni yɔɔ faŋŋ ni jɛ adesai aje lɛ sɛɛ ni wɔteŋ mɔ fɛɛ mɔ nine baanyɛ ashɛ nɔ be fɛɛ be—ni akɛ tsɔji ni yɔɔ haŋtsii tsuŋ he nii yɛ. Enɛɛmɛi jɛ Jɛɛhe ko ni nɔ kwɔ kwraa fe ŋwɛiniiaŋ he ko ni abaanyɛ asusu. Namɔ ŋɔɔ saji nɛɛ Jɛ, ni namɛi anine shɛɔ nɔ? Mɛni shɛɛ saji lɛ kɛɔ?
2 Amaniɛbɔi srɔtoi ni kɔɔ be ni aha adesai nu shɛɛ saji ni jɛ ŋwɛi lɛ he lɛ yɛ Biblia mli saji babaoo ní aŋmala ashwie shi lɛ amli. Bei komɛi lɛ, mumɔŋ bɔɔ nii ní miisɔmɔ akɛ Nyɔŋmɔ bɔfoi lɛ kɛ nɛkɛ shɛɛ saji nɛɛ haa. (1 Mose 22:11, 15; Zakaria 4:4, 5; Luka 1:26-28) Anu Yehowa diɛŋtsɛ gbee shii etɛ. (Mateo 3:17; 17:5; Yohane 12:28, 29) Nyɔŋmɔ hu wie kɛtsɔ adesai gbalɔi, ní amɛteŋ mɛi babaoo ŋmala nɔ ni akɛ mumɔ tsirɛ amɛ ni amɛwie lɛ amɛfɔ̃ shi lɛ anɔ. Ŋmɛnɛ, wɔyɛ Biblia lɛ, ní gbee nɛɛ he saji babaoo ni aŋmala ashwie shi kɛ Yesu kɛ ekaselɔi lɛ atsɔɔmɔi lɛ fata he lɛ yɛ mli. (Hebribii 1:1, 2) Yehowa kɛ saji miiha adesai ni ji ebɔɔ nii lɛ lɛɛlɛŋ.
3. Mɛni ji yiŋtoo ni yɔɔ Nyɔŋmɔ shɛɛ saji lɛ asɛɛ, ni mɛni akpaa gbɛ yɛ wɔdɛŋ?
3 Nyɔŋmɔ shɛɛ saji nɛɛ fɛɛ ni jɛ mumɔŋ lɛ ewieee shikpɔŋ diɛŋtsɛ lɛ he babaoo. Amɛgbalaa jwɛŋmɔ kɛyaa saji ni he hiaa babaoo, ni náa shihilɛ ni wɔyɔɔ mli bianɛ kɛ wɔsɛɛ lɛ nɔ hewalɛ lɛ nɔ. (Lala 19:8-12; 1 Timoteo 4:8) Yehowa kɛ amɛ tsuɔ nii ni ekɛtsɔɔ wɔ nɔ ni ji esuɔmɔnaa nii, ni ekɛ egbɛtsɔɔmɔ haa wɔ. Amɛji gbɛ kome nɔ ni gbalɔ Yesaia wiemɔi lɛ tsɔɔ nɔ enáa emli baa, akɛ: “Otoii hu aaanu wiemɔ ko yɛ osɛɛ akɛ: Gbɛ lɛ nɛ! nyɛnyiɛa nɔ! ninejurɔgbɛ nyɛtsɔ́ jio, abɛkugbɛ nyɛtsɔ́ jio.” (Yesaia 30:21) Yehowa enyɛɛɛ wɔnɔ ni wɔbo ‘ewiemɔ’ lɛ toi. Nyɔŋmɔ gbɛtsɔɔmɔ lɛ sɛɛnyiɛmɔ kɛ egbɛ lɛ nɔ nyiɛmɔ kã wɔnɔ. Yɛ no hewɔ lɛ, Ŋmalɛi lɛ woɔ wɔ hewalɛ ni wɔbo saji ni jɛɔ Yehowa ŋɔɔ lɛ toi. Ŋaa ni awoɔ akɛ “bo nɔ ni mumɔ kɛɔ lɛ toi” lɛ jeɔ kpo shii kpawo yɛ Kpojiemɔ wolo lɛ mli.—Kpojiemɔ 2:7, 11, 17, 29; 3:6, 13, 22.
4. Ani nilee yɛ mli akɛ wɔɔkpa gbɛ akɛ Nyɔŋmɔ kɛ wɔ baawie tɛ̃ɛ kɛjɛ ŋwɛi yɛ wɔbei nɛɛ amli?
4 Ŋmɛnɛ, Yehowa kɛ wɔ ewieee tɛ̃ɛ kɛjɛɛɛ ŋwɛi shihilɛhe lɛ. Yɛ Biblia beaŋ po lɛ, nɛkɛ saji ni fe adesai anɔ lɛ ji nifeemɔi ni efɔɔɔ kaa, ni bei pii lɛ afii ohai abɔ folɔɔ mli. Yehowa kɛ ewebii ni hi shi yɛ blema beaŋ lɛ ewieee tɛ̃ɛ yɛ bei babaoo mli. Nakai eji yɛ wɔbei nɛɛ mli. Nyɛhaa wɔsusua gbɛ̀i etɛ ni Yehowa tsɔɔ nɔ ekɛ wɔ wieɔ ŋmɛnɛ lɛ he wɔkwɛa.
‘Ŋmalɛ Fɛɛ Ŋmalɛ Jɛ Nyɔŋmɔ Mumɔ Lɛŋ’
5. Mɛni titri nɔ Yehowa tsɔɔ ekɛ wɔ gbaa sane ŋmɛnɛ, ni te wɔɔfee tɛŋŋ wɔná he sɛɛ lɛ?
5 Biblia lɛ ji nɔ titri ni Nyɔŋmɔ tsɔɔ nɔ ekɛ adesai gbaa sane. Ejɛ Nyɔŋmɔ mumɔ lɛ mli, ni nɔ fɛɛ nɔ ni yɔɔ mli lɛ he baanyɛ aba sɛɛnamɔ kɛha wɔ. (2 Timoteo 3:16) Biblia lɛ mli eyi obɔ kɛ nɔkwɛmɔnii ni kɔɔ adesai ni hi shi diɛŋtsɛ ni kɛ amɛheyeli tsu nii ni amɛkɛkpɛ amɛyiŋ akɛ amɛbaasumɔ ni amɛbo Yehowa gbee toi loo amɛfeŋ nakai lɛ he saji. Nɔkwɛmɔnii ni tamɔ enɛɛmɛi kaiɔ wɔ nɔ hewɔ ni ehe hiaa waa akɛ wɔbo nɔ ni Nyɔŋmɔ mumɔ lɛ yɔɔ kɛɛmɔ lɛ toi lɛ. (1 Korintobii 10:11) Nilee ni anyɛɔ atsuɔ he nii hu yɛ Biblia lɛ mli, ni ewoɔ wɔ ŋaa yɛ bei amli ni ehe miihia ni wɔkpɛ wɔyiŋ yɛ shihilɛ mli. Etamɔ nɔ ni Nyɔŋmɔ damɔ wɔsɛɛ, ni eewie kɛmiiwo wɔtoiŋ akɛ: “Gbɛ lɛ nɛ! nyɛnyiɛa nɔ!”
6. Mɛni hewɔ Biblia lɛ nɔ kwɔ kwraa fe woji krokomɛi fɛɛ lɛ?
6 Bɔni afee ni wɔnu nɔ ni mumɔ lɛ kɛɔ kɛtsɔ Biblia lɛ baafai amli lɛ, esa akɛ wɔkane daa. Biblia lɛ jeee woji ni aŋmala amɛ jogbaŋŋ ni ale waa ni babaoo yɔɔ ŋmɛnɛ lɛ ateŋ ekome kɛkɛ. Biblia lɛ jɛ mumɔŋ, ni Nyɔŋmɔ susumɔi yɔɔ mli. Hebribii 4:12 kɛɔ akɛ: “Nyɔŋmɔ wiemɔ hiɛ kã ni eyɛ hewalɛ ni enaa ba fe klante kɛ enaa ŋta fɛɛ, ni egbuɔ kɛboteɔ mli kɛyashi beyinɔ ni egbalaa susuma kɛ mumɔ lɛ kɛ talɔi kɛ wuiaŋfɔi lɛ amli, ni eji tsuiiaŋ susumɔi kɛ jwɛŋmɔi lɛ akojolɔ.” Yɛ be mli ni wɔkaneɔ Biblia lɛ, emli nibii lɛ gbuɔ kɛboteɔ wɔmligbɛ susumɔi kɛ kanyamɔi amli tamɔ klante, ni ejieɔ bɔ ni wɔshihilɛi kɛ Nyɔŋmɔ suɔmɔnaa nii kpãa gbee ehaa lɛ kpo.
7. Mɛni hewɔ Biblia lɛ ní wɔɔkane lɛ he hiaa lɛ, ni shii enyiɛ awoɔ wɔ hewalɛ ni wɔfee nakai?
7 “Tsuiiaŋ susumɔi kɛ jwɛŋmɔi” lɛ baanyɛ atsake yɛ be mli ni be shwieɔ mli kɛ be mli ni wɔshihilɛ mli niiashikpamɔi—nɔ ni hi kɛ nɔ ehiii fɛɛ lɛ náa wɔnɔ hewalɛ lɛ. Kɛ́ wɔkaseee Nyɔŋmɔ Wiemɔ lɛ be fɛɛ be lɛ, wɔsusumɔi, sui, kɛ henumɔi lɛ kɛ Nyɔŋmɔ shishitoo mlai lɛ kpãŋ gbee dɔŋŋ. No hewɔ lɛ, Biblia lɛ woɔ wɔ hewalɛ akɛ: ‘Nyɛyaa nɔ nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo; nyɛyaa nɔ nyɛkwɛa nyɛ diɛŋtsɛ nyɛhe ni ahia.’ (2 Korintobii 13:5) Kɛ́ wɔɔya nɔ wɔbo nɔ ni mumɔ lɛ kɛɔ lɛ toi lɛ, belɛ esa akɛ wɔbo ŋaawoo akɛ wɔkane Nyɔŋmɔ Wiemɔ lɛ daa lɛ toi.—Lala 1:2.
8. Mɛɛ bɔfo Paulo wiemɔi yeɔ ebuaa wɔ ni wɔkɛpɛiɔ wɔ mli yɛ nibii ni kɔɔ Biblia lɛ kanemɔ he lɛ?
8 Nɔ̃ ko ni he hiaa waa ni esa akɛ Biblia kanelɔi akai ji enɛ: Nyɛhea be ni sa ni nyɛkɛsusua nɔ ni nyɛkane lɛ he! Yɛ be mli ni wɔbɔɔ mɔdɛŋ koni wɔkɛ ŋaawoo akɛ wɔkane Biblia lɛ gbi fɛɛ gbi lɛ atsu nii lɛ, wɔsumɔŋ ni wɔkɛ oyaiyeli akane yitsei babaoo ni wɔnuuu nɔ ni wɔkaneɔ lɛ shishi. Yɛ be mli ni Biblia lɛ ní wɔɔkane daa lɛ he hiaa lɛ, nɔ ni sa akɛ ekanya wɔ lɛ akafee akɛ wɔɔnyiɛ ekanemɔ he gbɛjianɔtoo ko sɛɛ pɛpɛɛpɛ kɛkɛ; shi moŋ, esa akɛ wɔkɛ anɔkwayeli atao akɛ wɔɔkase Yehowa kɛ eyiŋtoi ahe nii. Yɛ enɛ gbɛfaŋ lɛ, wɔbaanyɛ wɔkɛ bɔfo Paulo wiemɔi nɛɛ atsu nii ni wɔkɛka wɔhe wɔkwɛ. Beni eŋmaa eyaha nanemɛi Kristofoi lɛ, ekɛɛ akɛ: “Midɔrɔɔ minakutsei mihaa wɔ-Nuntsɔ Yesu Kristo tsɛ lɛ, koni . . . eha . . . Kristo ahi shi yɛ nyɛtsuii amli, ni nyɛshishifai amɔmɔ shi ni nyɛmamɔ shi shiŋŋ yɛ suɔmɔ mli, koni nyɛná hewalɛ, ni nyɛkɛ mɛi krɔŋkrɔŋi lɛ fɛɛ ayoo nɔ ni ji lɛɛmɔ kɛ kɛlɛ kɛ mlikwɔlɛ kɛ nɔkwɔlɛ lɛ, ni nyɛle Kristo suɔmɔ ni ta nilee fɛɛ nɔ lɛ, koni Nyɔŋmɔ obɔyimɔ lɛ ayimɔ nyɛfɛɛ obɔ.”—Efesobii 3:14, 16-19.
9. Te wɔɔfee tɛŋŋ wɔná suɔmɔ ni wɔkɛkase nii kɛjɛ Yehowa ŋɔɔ, ni agbɛnɛ wɔha emli akwɔ hu?
9 Wɔkpɛlɛɔ nɔ akɛ, yɛ adebɔɔ su naa lɛ, wɔteŋ mɛi komɛi sumɔɔɔ nikanemɔ, ni mɛi krokomɛi sumɔɔ nikanemɔ waa. Shi kɛlɛ, bɔ fɛɛ bɔ ni wɔteŋ mɔ fɛɛ mɔ shihilɛ ji ha lɛ, wɔbaanyɛ wɔná suɔmɔ ni asumɔɔ akɛ akase nii kɛjɛ Yehowa dɛŋ lɛ ni wɔha emli awa. Bɔfo Petro tsɔɔ mli akɛ, esa akɛ wɔshwe Biblia mli nilee lɛ, ni eyɔse akɛ esa akɛ aná shwelɛ ni tamɔ enɛ. Eŋma akɛ: “Nyɛshwea wiemɔ lɛ mli fufɔ krɔŋŋ lɛ tamɔ fufɔbii ní afɔ́ bianɛ, koni nyɛdara yɛ mli kɛná yiwalaheremɔ.” (1 Petro 2:2, wɔma efã ko nɔ mi.) Kɛji wɔɔná ‘shwelɛ’ kɛha Biblia kasemɔ lɛ, no lɛ, he-tsɔsemɔ he miihia. Taakɛ bɔ ni wɔbaanyɛ wɔná suɔmɔ wɔha niyenii hee ko yɛ be mli ni wɔsa wɔnaa shii abɔ sɛɛ lɛ, nakai nɔŋŋ wɔsu yɛ nikanemɔ kɛ nikasemɔ he lɛ baanyɛ atsake ni ehi kɛji wɔtsɔse wɔ diɛŋtsɛ wɔhe ni wɔnyiɛ nɔ ni wɔfeɔ daa lɛ sɛɛ.
‘Ŋmãa yɛ Be ni Sa Nɔ’
10. Namɛi feɔ “tsulɔ anɔkwafo kɛ nilelɔ” kuu lɛ, ni mɛɛ gbɛ nɔ Yehowa kɛ amɛ tsuɔ nii ŋmɛnɛ?
10 Yesu tsɔɔ gbɛ kroko ni Yehowa tsɔɔ nɔ ekɛ wɔ wieɔ lɛ yɛ Mateo 24:45-47. Jɛmɛ ji he ni ewie Kristofoi asafo ni akɛ mumɔ efɔ amɛ mu—“tsulɔ anɔkwafo kɛ nilelɔ” ni ahala amɛ ni amɛkɛ mumɔŋ ‘ŋmãa yɛ be ni sa nɔ’ aha lɛ yɔɔ. Ákɛ aŋkroaŋkroi lɛ, nɛkɛ kuu nɛɛ mli bii lɛ ji Yesu ‘webii’ lɛ. Mɛnɛɛmɛi kɛ “tooi krokomɛi” lɛ amli “asafo babaoo” lɛ nine shɛɔ ekãawoo kɛ gbɛtsɔɔmɔ nɔ. (Kpojiemɔ 7:9; Yohane 10:16) Nɛkɛ niyenii ni baa yɛ be ni sa nɔ nɛɛ ateŋ babaoo baa kɛtsɔɔ woji ni akala, tamɔ Buu-Mɔɔ, Awake!, kɛ woji krokomɛi anɔ. Akɛ mumɔŋ niyenii krokomɛi ni fata he haa kɛtsɔɔ wiemɔi kɛ nɔkwɛmɔnii yɛ kpeei wuji, kpeei bibii, kɛ asafoŋ kpeei ashishi.
11. Wɔtsɔɔ akɛ wɔkpɛlɛɔ nɔ ni mumɔ lɛ yɔɔ kɛɛmɔ kɛtsɔ “tsulɔ anɔkwafo kɛ nilelɔ” lɛ nɔ lɛ nɔ yɛ mɛɛ gbɛ nɔ?
11 Ato saji ni “tsulɔ anɔkwafo kɛ nilelɔ” lɛ kɛhaa lɛ he gbɛjianɔ koni ewaje wɔhemɔkɛyeli ni etsɔse wɔjwɛŋmɔ nyɛmɔi lɛ. (Hebribii 5:14) Ekolɛ akɛ ŋaawoo ni tamɔ nakai baaha ni abaaŋmɛ mɔ fɛɛ mɔ gbɛ ni ekɛtsu nii yɛ lɛ diɛŋtsɛ eshihilɛ mli. Yɛ be kɛ bei amli lɛ, wɔnine shɛɔ ŋaawoo ni tsuɔ wɔsu pɔtɛɛ ko he nii hu nɔ. Mɛni esa akɛ efee wɔsu kɛji wɔmiibo nɔ ni mumɔ lɛ kɛɔ kɛtsɔ tsulɔ kuu lɛ nɔ lɛ toi lɛ? Bɔfo Paulo haa hetoo akɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ.” (Hebribii 13:17) Eji anɔkwale akɛ, mɛi fɛɛ ni yɔɔ gbɛjianɔtoo nɛɛ mli lɛ ji hii ni yeee emuu. Shi kɛlɛ, Yehowa náa he miishɛɛ akɛ ekɛ etsuji adesai, ni yeee emuu lɛ tsuɔ nii koni amɛkudɔ wɔ yɛ naagbee be nɛɛ mli.
Gbɛtsɔɔmɔ ni Wɔ Henilee Kɛhaa
12, 13. (a) Mɛɛ gbɛtsɔɔmɔ jɛɛhe kroko Yehowa kɛha wɔ? (b) Mɛɛ hewalɛ kpakpa henilee baanyɛ aná yɛ mɛi ni bɛ Nyɔŋmɔ Wiemɔ lɛ he anɔkwa nilee po lɛ anɔ?
12 Yehowa kɛ gbɛtsɔɔmɔ jɛɛhe kroko eha wɔ—wɔ henilee. Ebɔ gbɔmɔ yɛ gbɛ ni haa eleɔ nɔ ni ji ekpakpa kɛ efɔŋ. Akɛbɔ wɔ. Yɛ ewolo ni eŋma eyaha Romabii lɛ mli lɛ, bɔfo Paulo tsɔɔ mli akɛ: “Kɛ jeŋmajiaŋbii ni bɛ mla lɛ kɛ amɛfɔmɔŋ su lɛ tsuɔ mla naa nii lɛ, amɛ ni amɛbɛ mla lɛ amɛji mla ha amɛ diɛŋtsɛ amɛhe; no amɛkɛtsɔɔ akɛ aŋma mla lɛ nitsumɔ lɛ yɛ amɛtsuii amli, ni amɛhenilee hu yeɔ odase, ni amɛsusumɔi lɛ folɔfolɔɔ amɛnaa loo amɛjiejieɔ amɛnaa yɛ amɛteŋ.”—Romabii 2:14, 15.
13 Mɛi babaoo ni leee Yehowa lɛ baanyɛ aha amɛsusumɔi kɛ nifeemɔi kɛ Nyɔŋmɔ shishitoo mlai ni kɔɔ nɔ ni ja kɛ nɔ ni ejaaa he lɛ akpã gbee kɛyashi he ko. Etamɔ nɔ ni amɛmiinu mligbɛ gbee bibioo ko ni miikudɔ amɛ kɛmiiya gbɛ kpakpa nɔ. Kɛ́ enɛ baanyɛ afee anɔkwale yɛ mɛi ni bɛ Nyɔŋmɔ Wiemɔ lɛ he anɔkwa nilee ahe lɛ, enyiɛ nɔŋŋ ni esaaa akɛ nakai mligbɛ gbee lɛ wieɔ yɛ anɔkwa Kristofoi agbɛfaŋ! Eji anɔkwale akɛ, Kristofonyo henilee ni akɛ Nyɔŋmɔ Wiemɔ lɛ mli anɔkwa nilee etsuu he ní tsuɔ nii yɛ Yehowa mumɔ krɔŋkrɔŋ lɛ kɛ gbee kpãmɔ naa lɛ, baanyɛ ekɛ gbɛtsɔɔmɔ ni anyɛɔ akɛ he fɔ̃ɔ nɔ aha.—Romabii 9:1.
14. Henilee ni Biblia etsɔse lɛ lɛ baanyɛ aye abua wɔ ni wɔnyiɛ Yehowa mumɔ lɛ gbɛtsɔɔmɔ sɛɛ yɛ mɛɛ gbɛ nɔ?
14 Henilee kpakpa, ní Biblia lɛ etsɔse lɛ lɛ baanyɛ akai wɔ ni wɔnyiɛ gbɛ ni mumɔ lɛ taoɔ ni wɔnyiɛ nɔ lɛ nɔ. Bei komɛi shɛɔ ni Ŋmalɛi lɛ loo wɔ Biblia kasemɔ woji lɛ ewieee shihilɛ pɔtɛɛ ko ni ekolɛ wɔnaa wɔhe yɛ mli lɛ he. Shi kɛlɛ, wɔ henilee baabɔ wɔ kɔkɔ yɛ gbɛ ni baanyɛ aye awui lɛ he. Yɛ shihilɛi ni tamɔ enɛɛmɛi amli lɛ, kpoomɔ ni wɔɔkpoo nɔ ni wɔ henilee baakɛɛ wɔ lɛ tsɔɔ akɛ, wɔmiikpoo nɔ ni Yehowa mumɔ lɛ kɛɔ lɛ. Yɛ gbɛ kroko nɔ lɛ, kɛ́ wɔkase bɔ ni wɔkɛ wɔhe baafɔ̃ wɔ-Kristofoi ahenilee ni atsɔse lɛ lɛ nɔ lɛ, wɔbaanyɛ wɔfee nibii kpakpai yɛ be mli ni gbɛtsɔɔmɔ pɔtɛɛ ko po bɛ ni aŋmala. Shi kɛlɛ, ehe miihia ni wɔkai akɛ, kɛji ajɛko ŋwɛi akɛ shishitoo mla, loo mla hako lɛ, ebafeŋ nɔ ni sa akɛ wɔɔjɛ wɔ henilee mli wɔkojo naanyo Kristofonyo yɛ saji ni ji mɔ aŋkro nɔ̃ lɛ mli.—Romabii 14:1-4; Galatabii 6:5.
15, 16. Mɛni baanyɛ aha wɔ henilee akatsu nii jogbaŋŋ, ni te wɔɔfee tɛŋŋ wɔtsĩ nakai nifeemɔ ni aaaba lɛ naa lɛ?
15 Henilee ni Biblia lɛ etsɔse lɛ, ní he tse lɛ ji nikeenii kpakpa ni jɛ Nyɔŋmɔ ŋɔɔ. (Yakobo 1:17) Shi kɛji ebaatsu nii jogbaŋŋ akɛ nii ni báa jeŋba kpakpa yi lɛ, no lɛ, esa akɛ wɔbu nɛkɛ nikeenii nɛɛ he kɛjɛ hewalɛi ni fiteɔ mɔ lɛ mli. Kɛ wɔnyiɛ maŋ kusumii, blema saji, kɛ sui ni kɛ Nyɔŋmɔ shishitoo mlai kpãaa gbee asɛɛ lɛ, ebaanyɛ eha wɔ henilee akatsu nii jogbaŋŋ ni enyɛŋ ekanya wɔ ni wɔnyiɛ jalɛ gbɛ lɛ nɔ. Ekolɛ, wɔnyɛŋ wɔkojo saji jogbaŋŋ ni wɔbaanyɛ wɔlaka wɔ he ni wɔhe wɔye po akɛ efɔŋ ji nɔ kpakpa diɛŋtsɛ.—Okɛto Yohane 16:2 he.
16 Kɛ wɔtee nɔ wɔkpoo kɔkɔ ni wɔ henilee lɛ bɔɔ wɔ lɛ, ekɛ wɔ baakpa wiemɔ fiofio kɛyashi be mli ni wɔjeŋbaŋ henumɔnii lɛ baagbo loo enuuu nii ahe dɔŋŋ. Lalatsɛ lɛ wie yɛ nakai gbɔmɛi lɛ ahe beni ekɛɛ akɛ: “Amɛtsui eti tamɔ fɔ.” (Lala 119:70) Mɛi komɛi ni kpoo kanyamɔi ni amɛhenilee lɛ kanyaa amɛ lɛ nyɛɛɛ amɛsusu nii ahe jogbaŋŋ. Shishitoo mlai ni Nyɔŋmɔ gbeyeishemɔ yɔɔ mli kudɔɔɔ amɛ dɔŋŋ, ni amɛnyɛɛɛ amɛfee yiŋkpɛi ni ja. Bɔni afee ni wɔkwa nakai shihilɛ lɛ, esa akɛ wɔbo wɔ-Kristofoi ahenilee lɛ hiɛnyiɛmɔ lɛ toi kɛji sane ni asusuɔ he lɛ tamɔ nɔ ko bibioo po.—Luka 16:10.
Miishɛɛ Ji Mɛi ni Nuɔ ni Amɛboɔ Toi Lɛ
17. Yɛ be mli ni wɔboɔ ‘wiemɔ ni yɔɔ wɔsɛɛ lɛ’ toi ni wɔboɔ wɔ henilee ni Biblia etsɔse lɛ lɛ toi lɛ, mɛɛ gbɛ nɔ aaajɔɔ wɔ yɛ?
17 Yɛ be mli ni wɔtoɔ gbɛjianɔ ní wɔɔbo ‘wiemɔ ni yɔɔ wɔsɛɛ’ lɛ toi lɛ—taakɛ akɛha kɛtsɔ Ŋmalɛi lɛ kɛ tsulɔ anɔkwafo kɛ nilelɔ lɛ nɔ—ni wɔboɔ kaimɔi ni wɔ henilee ni Biblia etsɔse lɛ lɛ kɛhaa lɛ toi lɛ nɔ lɛ, Yehowa baajɔɔ wɔ kɛ emumɔ lɛ. Mumɔ krɔŋkrɔŋ lɛ hu baaha nyɛmɔ ni wɔyɔɔ akɛ wɔɔbo nɔ ni Yehowa kɛɔ wɔ lɛ toi lɛ ni wɔnu shishi lɛ aya hiɛ.
18, 19. Yehowa gbɛtsɔɔmɔ baanyɛ aye abua wɔ yɛ wɔsɔɔmɔ nitsumɔ lɛ kɛ wɔ diɛŋtsɛ wɔshihilɛ mli yɛ mɛɛ gbɛ nɔ?
18 Yehowa mumɔ lɛ baawo wɔ hewalɛ koni wɔkɛ nilee kɛ ekãa akpee shihilɛi ni naa wa waa anaa. Taakɛ eji yɛ bɔfoi lɛ abe lɛ mli lɛ, Nyɔŋmɔ mumɔ lɛ baanyɛ akanya wɔ jwɛŋmɔ hewalɛi lɛ ni ebaaye ebua ni wɔ nifeemɔ kɛ wɔ wiemɔi kɛ Biblia shishitoo mlai akpãa gbee be fɛɛ be. (Mateo 10:18-20; Yohane 14:26; Bɔfoi lɛ Asaji 4:5-8, 13, 31; 15:28) Yehowa mumɔ lɛ, kɛ wɔ diɛŋtsɛ wɔmɔdɛŋbɔɔ ni fata he lɛ baaha wɔye omanye yɛ be mli ni wɔfeɔ shihilɛ mli yiŋkpɛɛ ni he hiaa lɛ, ni ebaaha wɔná ekãa ni wɔkɛtsu nakai yiŋkpɛi lɛ ahe nii. Ákɛ nɔkwɛmɔnɔ lɛ, ekolɛ, oosusu tsakemɔi ni obaafee yɛ oshihilɛ mli, koni oná be babaoo ni okɛtsu mumɔŋ nibii ahe nii lɛ he. Aloo ekolɛ, okɛ shihilɛ mli nihalamɔi ni he hiaa waa tamɔ, hefatalɔ halamɔ, nitsumɔ taomɔ, loo shia hemɔ miikpe. Yɛ nɔ najiaŋ ni wɔɔha wɔ adesai ahenumɔi afee nɔ̃ titri ni wɔɔdamɔ nɔ wɔkpɛ wɔyiŋ lɛ, esa akɛ wɔbo nɔ ni Nyɔŋmɔ mumɔ lɛ yɔɔ kɛɛmɔ yɛ he lɛ toi ni wɔfee nii ni ekɛ egbɛtsɔɔmɔ lɛ akpã gbee.
19 Wɔhiɛ sɔɔ kaimɔ ni mlihilɛ yɔɔ mli kɛ ŋaawoo ni wɔnine shɛɔ nɔ kɛjɛɔ nanemɛi Kristofoi, ni onukpai lɛ fata he lɛ aŋɔɔ. Shi kɛlɛ, ehe ehiaaa ni wɔmɛ ni mɛi krokomɛi atsɛ wɔjwɛŋmɔ yisɛɛ kɛba saji anɔ be fɛɛ be. Kɛ wɔle gbɛ ni nilee yɔɔ mli ni esa akɛ wɔkɔ kɛ tsakemɔi ni ehe hiaa ni wɔfee yɛ wɔsui kɛ wɔjeŋba he bɔni afee ni wɔsa Nyɔŋmɔ hiɛ lɛ, no lɛ, nyɛhaa wɔfea nakai. Yesu kɛɛ akɛ: “Kɛji nyɛle nii nɛɛ ni nyɛye nɔ lɛ, ajɔɔ nyɛ.”—Yohane 13:17.
20. Mɛɛ jɔɔmɔi mɛi ni boɔ ‘wiemɔ ni yɔɔ amɛsɛɛ’ lɛ toi lɛ náa?
20 Eyɛ faŋŋ akɛ, bɔni afee ni Kristofoi ale gbɛ ni amɛaatsɔ nɔ amɛsa Nyɔŋmɔ hiɛ lɛ, ehe ehiaaa ni amɛnu gbee diɛŋtsɛ ko kɛjɛ ŋwɛi, ni ehe ehiaaa ni bɔfo ko hu abasara amɛ dã. Akɛ Nyɔŋmɔ Wiemɔ ni aŋma lɛ kɛ suɔmɔ gbɛtsɔɔmɔ ni ekuu ni afɔ amɛ mu yɛ shikpɔŋ lɛ nɔ lɛ kɛhaa lɛ ejɔɔ amɛ. Kɛ amɛbo ‘wiemɔ ni yɔɔ amɛsɛɛ’ nɛɛ toi ni amɛnyiɛ gbɛtsɔɔmɔ ni amɛ henilee ni Biblia etsɔse lɛ lɛ sɛɛ lɛ, amɛbaaye omanye yɛ Nyɔŋmɔ suɔmɔnaa nii ni amɛfeɔ lɛ mli. Kɛkɛ lɛ, amɛbaana bɔfo Yohane shiwoo lɛ mlibaa lɛɛlɛŋ, akɛ: “Mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17.
Kɛha Emlitii Kuku
• Mɛni hewɔ Yehowa kɛ adesai ni ji edebɔɔ nii lɛ wieɔ lɛ?
• Te wɔɔfee tɛŋŋ wɔná daa Biblia kanemɔ gbɛjianɔtoo lɛ he sɛɛ lɛ?
• Te esa akɛ wɔhere gbɛtsɔɔmɔ ni jɛɔ tsulɔ kuu lɛ nɔ wɔha tɛŋŋ?
• Mɛni hewɔ esaaa akɛ wɔkuɔ wɔhiɛ wɔfɔ̃ɔ wɔhenilee ni Biblia lɛ etsɔse lɛ lɛ nɔ lɛ?
[Nikasemɔ lɛ he Sanebimɔi]
[Mfoniri ni yɔɔ baafa 13]
Tsɔji ni yɔɔ ŋwanyaŋŋ ahe ehiaaa adesai dani amɛnine ashɛ shɛɛ saji anɔ kɛjɛ Nyɔŋmɔ ŋɔɔ
[He ni Sane lɛ Jɛ]
Courtesy Arecibo Observatory/David Parker/Science Photo Library
[Mfoniri ni yɔɔ baafa 15]
Yehowa kɛ wɔ wieɔ kɛtsɔɔ Biblia lɛ kɛ “tsulɔ anɔkwafo kɛ nilelɔ” lɛ nɔ